Taimi ʻo e Hāʻele Mai ʻa Sīsū ʻi he Nāunau ʻo e Puleʻangá

“ʻOku ai ha niʻihi ʻo kinautolu ʻoku tutuʻu heni, . . . ʻe ʻikai te nau momoʻi lave ki he mate, kaeʻoua ke nau mamata ki he Fanautama ʻa Tangata ʻoku ne haʻele fakapuleʻanga mai.”​—MĀTIU 16:28.

 1, 2. Ko e hā naʻe hoko he hili pē ha taimi siʻi mei he Penitekosi ʻo e 32 T.S., pea ko e hā naʻe fakataumuʻa ki ai ʻa e meʻa naʻe hokó?

ʻI HE hili pē ha taimi siʻi mei he Penitekosi ʻo e 32 T.S., naʻe mamata ai ʻa e toko tolu ʻo e kau ʻaposetolo ʻa Sīsū Kalaisí ʻi ha vīsone ʻoku taau ke manatuʻi. Fakatatau ki he lēkooti fakamānavaʻí, “naʻe ʻave ʻe Sisu ʻa Pita, mo Semisi, pea mo Sione ko e tehina ʻo Semisi, pea ne ʻohake kinautolu ki ha moʻunga maʻolunga fakaekinautolu. Pea naʻe fakakehe hono anga ʻi honau ʻao.”​—Mātiu 17:​1, 2.

² Ko e vīsone ʻo e fakakehé naʻe hoko ia ʻi ha taimi tauhaʻa. Naʻe kamata ke tala ʻe Sīsū ki hono kau muimuí ʻo pehē te ne faingataʻaʻia pea pekia ʻi Selusalema, ka naʻe faingataʻa ke nau makupusi ʻene ngaahi leá. (Mātiu 16:​21-​23) Naʻe fakaivia ʻe he vīsoné ʻa e tui ʻa e kau ʻaposetolo ʻe toko tolu ʻa Sīsuú ʻi he mateuteu ki heʻene pekia naʻe tuʻunuku maí pea pehē ki he ngaahi taʻu ʻo e ngāue lahi mo e ʻahiʻahi ʻe hokosia ʻe he fakatahaʻanga Kalisitiané. ʻOku lava ke ako ʻe kitautolu he ʻaho ní ha meʻa mei he vīsoné? ʻIo, koeʻuhi ko e meʻa naʻá ne tomuʻa fakatātaaʻi maí ʻoku hoko tonu ia ʻi hotau taimí.

 3, 4. (a) Ko e hā naʻe leaʻaki ʻe Sīsū ʻi he ʻaho ʻe ono ki muʻa ʻi he fakakehé? (e) Fakamatalaʻi ʻa e meʻa naʻe hoko he lolotonga ʻa e fakakehé?

³ ʻI he ʻaho ʻe ono ki muʻa ʻi he fakakehé, naʻe tala ʻe Sīsū ki hono kau muimuí: “ʻOku nānāfaki haʻele mai ʻae Fanautama ʻa Tangata, kuo ne ʻai ʻa e nāunau o ʻene ʻEiki, pea haʻofia ia ʻe heʻene kau angelo: pea te ne toki ʻange ki he tangata taki taha ʻo fakatatau ki heʻene ngāhi ngaue.” Ko e ngaahi leá ni ʻe fakahoko ia ʻi he “fakaʻosi ʻo e kuonga.” Naʻe toe fakahā ʻe Sīsū: “Ko au e, ʻoku ou tala atu, ʻOku ai ha niʻihi ʻo kinautolu ʻoku tutuʻu heni, ʻa ia ʻe ʻikai te nau momoʻi lave ki he mate, kaeʻoua ke nau mamata ki he Fanautama ʻa Tangata ʻoku ne haʻele fakapuleʻanga mai.” (Mātiu 16:​27, 28; 24:3; 25:​31-​34, 41; Taniela 12:4) Naʻe hoko ʻa e fakakehé ʻi he fakahoko ʻo e ngaahi lea ko ʻeni ki muí.

⁴ Ko e hā ʻa e meʻa tofu pē ko ia naʻe mamata ki ai ʻa e kau ʻaposetolo ʻe toko tolú? Ko e meʻa ʻoku hoko haké ko e fakamatala ia ʻa Luke ki he meʻa naʻe hokó: “Lolotonga ʻene lotu [ʻa Sīsū], ʻiloange naʻe ha kehe hono fōtunga, pea ko hono kofu naʻe hinaekiaki, pea tatapa hange ko e ʻuhila. Pea ta ko e ongo tangata ʻoku na talanoa mo ia, ʻa ia ko Mosese mo Ilaisia: naʻe ha langilangiʻia kinaua, ʻo nau alea ki heʻene ekisoto ʻoku ne fakatetuʻa ke lava ʻi Selusalema.” ʻI he hili iá, “naʻe hoko mai ha ʻao ʻo fakapulou [ʻa e kau ʻaposetoló]; pea nau manavahē ʻi he ʻena hu ki he ʻao. Pea naʻe hoko mai ha leʻo mei he ʻao ʻoku folofola mai, Ko hoku ʻAlo ʻena kuo u fili; mou fakaongo kiate ia.”​—Luke 9:​29-​31, 34, 35.

Fakaivia ʻa e Tuí

 5. Ko e hā ʻa e ola ʻo e fakakehé ki he ʻaposetolo ko Pitá?

⁵ Naʻe ʻosi fakamoʻoniʻi ʻe he ʻaposetolo ko Pitá ko Sīsuú ‘ko e Misaia, ko e ʻalo ʻo e ʻOtua moʻuí.’ (Mātiu 16:16) Naʻe fakapapauʻi ʻe he ngaahi folofola ʻa Sihova mei hēvaní ʻa e fakamoʻoni ko iá, pea ko e vīsone ʻo e fakakehe ʻa Sīsuú ko ha tomuʻa fakakite mai ia ʻo e hāʻele mai ʻa Kalaisi ʻi he mafai mo e nāunau ʻo e Puleʻangá, ke faai atu pē ʻo fakamāuʻi ʻa e faʻahinga ʻo e tangatá. ʻI he hili ʻa e taʻu ʻe 30 tupu mei he fakakehé, naʻe tohi ʻe Pita: “He talaʻehai ko ʻemau fai ki ha ngaahi fananga ne faʻu ke fakahinga ʻa e kakai, ʻa ʻemau ongoongoa atu ʻa e māfimafi ʻa hotau ʻEiki ko Sisu Kalaisi, mo ʻene toe hoko mai; ka ko e kau sio tonu kimautolu ki hono langilangi. He naʻa ne maʻu mei he ʻOtua ko e Tamai ʻa e fakaʻapaʻapa mo e fakalangilangiʻi, he ʻomai kiate ia ʻa e leʻo ko ia naʻe pehe fau ʻe he Sikaina nāunauʻia, ʻo pehe, Ko hoku ʻAlo Pele ʻena, ʻa ia kuo toka ki ai ʻeku hōifua. Pea ko e leʻo ko ia naʻa mau fanongo ki ai ʻi hono ʻomeia mei langi, ʻi heʻemau ʻiate ia ʻi he moʻunga tapu.”​—2 Pita 1:​16-​18; 1 Pita 4:​17.

 6. Naʻe anga-fēfē ʻa e hoko ʻa e ngaahi meʻá ʻi he hili ʻa e fakakehé?

⁶ ʻI he ʻahó ni, ʻoku kau mo ʻetau tuí foki ʻi hono fakaivia ʻe he meʻa naʻe mamata ki ai ʻa e kau ʻaposetolo ʻe toko tolú. Ko hono moʻoní, kuo hokohoko mai ʻa e ngaahi meʻa talu mei he 32 T.S. ʻI he taʻu hono hokó, naʻe pekia ai ʻa Sīsū pea toetuʻu, ʻo hāʻele hake ki he toʻomataʻu ʻo ʻene Tamaí. (Ngāue 2:​29-​36) ʻI he Penitekosi ʻo e taʻu ko iá, naʻe fakahoko mai ai ʻa e “Isileli faka-ʻOtua” foʻoú, pea naʻe kamata ai ha feingangāue fakamalanga, ʻo kamata ʻi Selusalema pea mafola atu ki mui ai ki he ngaahi ngataʻanga ʻo e māmaní. (Kaletia 6:​16; Ngāue 1:8) Taimi siʻi pē mei ai naʻe ʻahiʻahiʻi ʻa e tui ʻa e kau muimui ʻo Sīsuú. Naʻe tuku pōpula ʻa e kau ʻaposetoló pea haha fakamamahiʻi koeʻuhi ko ʻenau fakafisi ke tuku ʻenau malangá. Tuai-e-kemo naʻe fakapoongi ʻa Sitīveni. Hili iá, naʻe tāmateʻi ʻa Sēmisi, ʻa ia naʻá ne sio tonu ʻi he fakakehé. (Ngāue 5:​17-40; 6:​8–7:60; 12:​1, 2) Kae kehe, naʻe hao ʻa Pita mo Sione ʻo na tauhi anga-tonu kia Sihova ʻi he toe ngaahi taʻu lahi. Ko hono moʻoní, ʻi he fakaʻosiʻosi ʻo e ʻuluaki senituli T.S., naʻe hiki ai ʻe Sione ha toe hā fakaevīsone ʻa Sīsū ʻi ha nāunau fakahēvani.​—Fakahā 1:​12-20; 14:14; 19:​11-16.

 7. (a) Naʻe kamata ke fakahoko ʻanefē ʻa e vīsone ʻo e fakakehé? (e) Naʻe totongi ange ʻanefē ʻe Sīsū ki he niʻihi ʻo fakatatau ki heʻenau ngāué?

⁷ Talu mei he kamata ʻa e “ʻaho ʻo e ʻEiki” ʻi he 1914, ko e konga lahi ʻo e ngaahi vīsone naʻe sio ki ai ʻa Sioné kuo fakahoko ia. (Fakahā 1:10) Fēfē ʻa e ‘haʻele mai ʻa Sīsū ʻi he nāunau o ʻene ʻEikí,’ hangē ko ia naʻe tomuʻa fakatātaaʻi mai ʻe he fakakehé? Naʻe kamata ke fakahoko ʻa e vīsone ko ʻení ʻi hono fanauʻi ʻo e Puleʻanga fakahēvani ʻo e ʻOtuá ʻi he 1914. ʻI he taimi naʻe malanga hake ai ʻa Sīsū, hangē ha fetuʻuʻahó, ʻi he tuʻunga fakaeʻuniveesi ko ha Tuʻi kuo toki fakanofó, naʻe hangē ia, ha mafoa mai ʻa e ata ʻo ha ʻaho foʻoú. (2 Pita 1:19; Fakahā 11:15; 22:16) Naʻe totongi-huhuʻi ai ʻe Sīsū ha niʻihi ʻi he taimi ko iá ʻo fakatatau ki honau angá? ʻIo. ʻOku ʻi ai ʻa e fakamoʻoni mālohi naʻe hili pē ha taimi siʻi mei ai, naʻe kamata leva ʻa e toetuʻu fakahēvani ʻa e kau Kalisitiane paní.​—2 Timote 4:8; Fakahā 14:13.

 8. Ko e hā ʻa e ngaahi meʻa te nau fakaʻilongaʻi ʻa e tumutumu ʻo e vīsone ʻo e fakakehé?

⁸ Neongo ia, kuo vavé ni ke hoko mai ʻa Sīsū ʻi “hono nāunau, pea haʻofia ia ʻe he kau angelo kotoa pe,” ke fai hono fakamāuʻi ʻo e faʻahinga ʻo e tangatá fakalūkufua. (Mātiu 25:31) ʻI he taimi ko iá, te ne fakahaaʻi ai ia ʻi hono nāunau molumalu kotoa pea ʻange ki he “tangata taki taha” ʻa e totongi totonu ʻo fakatatau ki heʻene ngāue. Ko e faʻahinga hangē ha sipí te nau maʻu ʻa e moʻui taʻengata ʻi he Puleʻanga naʻe teuteu moʻonautolú, pea ko e faʻahinga hangē ha kosí te nau ʻalu atu ki he “tautea taʻengata.” Ko ha fakamulituku fisifisimuʻa ē ʻi hono fakahoko ʻo e vīsone ʻo e fakakehé!​—Mātiu 25:​34, 41, 46; Maake 8:38; 2 Tesalonaika 1:​6-10.

Ngaahi Takanga Nāunauʻia ʻo Sīsuú

 9. ʻOku totonu ke tau ʻamanekina ʻa Mōsese mo ʻIlaisiā te na kau fakataha mai mo Sīsū ʻi hono fakahoko ʻo e vīsone ʻo e fakakehé? Fakamatalaʻi.

⁹ Naʻe ʻikai ke tokotaha pē ʻa Sīsū ʻi he fakakehé. Naʻe mātā fakataha ia mo Mōsese pea mo ʻIlaisiā. (Mātiu 17:​2, 3) Naʻa nau hā sino moʻoni mai? ʻIkai, he ne fuoloa ʻa e mate ʻa e ongo tangatá ia fakatouʻosi ʻo na mohe ʻi he efú ʻo tatali ai ki ha toetuʻu. (Koheleti 9:​5, 10; Hepelu 11:35) Te na hā fakataha mai mo Sīsū ʻi heʻene hoko mai ʻi hono nāunau fakahēvaní? ʻIkai, koeʻuhi he naʻe moʻui ʻa Mōsese ia mo ʻIlaisiā ki muʻa pea toki fakaʻatā ʻa e ʻamanaki fakahēvaní ki he faʻahinga ʻo e tangatá. Te na kau ʻi he “toetuʻu ʻa e . . . angatonu.” (Ngāue 24:15) Ko ia ko ʻenau hā ʻi he vīsone ʻo e fakakehé ʻoku tuʻu fakaefakaʻilonga ia. ʻOku fekauʻaki mo e hā?

10, 11. Ko hai ʻoku fakatātaaʻi ʻe ʻIlaisiā mo Mōsese ʻi he ngaahi potutohi kehekehe?

¹⁰ ʻI he ngaahi potutohi kehe, ʻoku tuʻu fakaekikite ai ʻa Mōsese ia mo ʻIlaisiā. ʻI he tuʻunga ko e tokotaha-fakalaloa ʻo e Fuakava Laó, naʻe tomuʻa fakatātaaʻi mai ai ʻe Mōsese ʻa Sīsū, ko e Tokotaha-Fakalaloa ʻo e fuakava foʻoú. (Teutalonome 18:18; Kaletia 3:19; Hepelu 8:6) Naʻe tomuʻa fakatātaaʻi mai ʻe ʻIlaisiā ia ʻa Sione Papitaiso, ko ha fakamelomelo ʻo e Mīsaiá. (Mātiu 17:​11-13) ʻIkai ko ia pē, ʻi he potutohi ʻo e Fakahā vahe 11, naʻe tomuʻa fakatātaaʻi mai ai ʻe Mōsese mo ʻIlaisiā ʻa e toenga ʻo e kau paní ʻi he taimi ʻo e ngataʻangá. ʻOku tau ʻilo fēfē ia?

¹¹ Sai, huke ki he Fakahā 11:​1-6. ʻI he veesi 3 ʻoku tau lau ai: “Te u tuku ki heʻeku ongo fakamoʻoni, ke na palofisai ʻi he ngaahi ʻaho ʻe taha afe ma uangeau ma onongofulu, kuo na ʻai tauangaʻa.” Naʻe fakahoko ʻa e kikite ko ʻení ʻi he toenga ʻo e kau Kalisitiane paní he lolotonga ʻo e Tau I ʻa Māmaní.a Ko e hā ʻoku pehē ai ko e ongo fakamoʻoní? Koeʻuhi ʻoku fakahoko ʻe he toenga ʻo e kau paní ʻa e ngaahi ngāue ko ia, ʻi ha founga fakalaumālie, ʻoku hangē ko ia naʻe fai ʻe Mōsese mo ʻIlaisiaá. ʻOku hoko atu ʻa e lau ʻa e veesi 5 mo e 6 ʻo pehē: “Kapau ʻe loto ʻe ha taha ke ngaohikoviʻi [ʻa e ongo fakamoʻoní], ʻe ʻalu atu ha afi mei hona ngutu, ʻo keina hona ngaahi fili: ʻio, kapau ʻoku loto ʻe ha taha ke ngaohikoviʻi kinaua kuo pau ke ne mate pehē. Ko eni ia ʻoku na mafai ke tapuni ʻa e langi, ke ʻoua naʻa to ʻa e ʻuha lolotonga ʻa e ngaahi ʻaho oʻena palofisai, pea ʻoku na faʻiteliha ki he ngaahi vai ke liliu ia ke toto, pea ke tāʻi ʻa e fonua ʻaki ʻa e ngaahi tautea kehekehe, ʻoka na loto ki ai.” Ko ia, ʻoku fakamanatu mai kiate kitautolu ʻa e ngaahi mana naʻe fakahoko ʻe ʻIlaisiā mo Mōsesé.​—Nomipa 16:​31-34; 1 Tuʻi 17:1; 2 Tuʻi 1:​9-12.

12. ʻI he potutohi ʻo e fakakehé, ko hai ʻoku fakatātaaʻi ʻe Mōsese mo ʻIlaisiaá?

¹² Ko ia, ko hai leva ʻoku tomuʻa fakatātaaʻi mai ʻe Mōsese mo ʻIlaisiā ʻi he potutohi fekauʻaki mo e fakakehé? ʻOku pehē ʻe Luke naʻá na hā “i he nāunāu” fakataha mo Sīsū. (Luke 9:​31, PM) ʻOku hā mahino, ʻokú na tomuʻa fakahāhaaʻi ʻa e kau Kalisitiane kuo pani ʻaki ʻa e laumālie māʻoniʻoní ke hoko ʻo “kaungā-ʻea” mo Sīsū pea te nau maʻu ai ʻa e ʻamanaki fakaofo ko hono “kaungā-hakeakiʻi” fakataha mo ia. (Loma 8:17) Ko e faʻahinga pani ko ia ʻe toetuʻú te nau fakataha mo Sīsū ʻi heʻene hoko mai ʻi he nāunau ʻo ʻene Tamaí ke “ʻange ki he tangata taki taha ʻo fakatatau ki heʻene ngāhi ngaue.”​—Mātiu 16:27.

Kau Fakamoʻoni Hangē ko Mōsese mo ʻIlaisiā

13. Ko e hā ʻa e ngaahi tafaʻaki ʻoku nau fakaʻilongaʻi ʻa Mōsese mo ʻIlaisiā ko e ongo fakatātā fakaekikite feʻungamālie ia ʻo e kau kaungāʻea pani ʻo Sīsū ʻoku fakalāngilangiʻi fakataha mo iá?

¹³ ʻOku ʻi ai ʻa e ngaahi tafaʻaki ʻoku taau ke fakatokangaʻi ʻoku nau fakaʻilongaʻi ʻa Mōsese mo ʻIlaisiā ʻokú na feʻungamālie mo e ngaahi fakatātā fakaekikite fekauʻaki mo e kau kaungāʻea pani ʻo Sīsuú. Naʻe ngāue fakatouʻosi ʻa Mōsese mo ʻIlaisiā ko ha ongo tangata-lea ʻa Sihova ʻi he ngaahi taʻu lahi. Naʻá na fakatou fehangahangai mo e houhau ʻa ha tokotaha-pule. ʻI ha taimi ʻo e masivá, naʻe fakatou tokoniʻi kinaua taki taha ʻe ha fāmili muli. Naʻá na fakatou kikite loto-toʻa ki ha ngaahi tuʻi pea naʻá na tuʻumaʻu ʻo fakafepakiʻi ha kau palōfita loi. Naʻe sio fakatouʻosi ʻa Mōsese mo ʻIlaisiā ki he ngaahi fakahāhā ʻo e mālohi ʻo Sihová ʻi Moʻunga Sainai (naʻe toe ui ko Moʻunga Hōlepí). Naʻá na fakatou fakanofo ha kau fetongi ʻo kinaua ʻi he tafaʻaki fakahahake ʻo Sioataní. Pea ʻi he taimi fakatouʻosi ʻo Mōsese (mo Siosiuá) pea mo ʻIlaisiā (mo ʻIlaisá) naʻe mātā ai ʻa e lahi taha ʻo e ngaahi maná, tukukehe ʻa e ngaahi mana ko ia naʻe hoko ʻi he lolotonga ʻo e moʻui ʻa Sīsuú.b

14. Kuo anga-fēfē ʻa e ngāue ʻa e kau paní ko e tangata-lea ʻa Sihova, hangē ko Mōsese mo ʻIlaisiaá?

¹⁴ ʻIkai ʻoku fakamanatu mai ʻe he meʻa kotoa ko iá kiate kitautolu ʻa e ʻIsileli faka-ʻOtuá? ʻIo, ko e moʻoni. Naʻe tala ʻe Sīsū ki heʻene kau muimui anga-tonú: “Ko ia ke mou ō, ʻo ngaohi ʻa e ngāhi kakai kotoa pe ko ʻeku kau ako, ʻi he papitaiso kinautolu ki he Huafa ʻo e Tamai mo e ʻAlo mo e Laumalie Maʻoniʻoni, mo e akoʻi kinautolu ke tauhi ʻa e ngāhi meʻa kotoa pe kuo u tuʻutuʻuni atu. Pea ko eni, ʻoku ou ʻiate kimoutolu ʻe au ʻi he ʻaho kotoa pe, ʻo aʻu ki he ngataʻanga ʻo mamani.” (Mātiu 28:​19, 20) ʻI he talangofua ki he ngaahi leá ni, kuo ngāue ai ʻa e kau Kalisitiane paní ʻi he tuʻunga ko e kau tangata-lea ʻa Sihova talu mei he Penitekosi ʻo e 33 T.S. ʻo aʻu mai ki he taimí ni. Hangē ko Mōsese mo ʻIlaisiaá, kuo nau fehangahangai mo e houhau ʻa e kau pule, pea kuo nau faifakamoʻoni kiate kinautolu. Naʻe tala ʻe Sīsū ki heʻene kau ʻaposetolo ʻe toko 12: “ʻE ʻave kimoutolu ki he ngāhi kovana, mo e ngāhi tuʻi, koeʻuhi ko au, ke ai ha fakamatala kiate kinautolu Siu pea mo e kau Senitaile.” (Mātiu 10:18) Naʻe toutou fakahoko ʻene ngaahi leá he lolotonga ʻo e hisitōlia ʻo e fakatahaʻanga Kalisitiané.​—Ngāue 25:​6, 11, 12, 24-27; 26:3.

15, 16. Ko e hā ʻa e ngaahi faitatau ʻi he vahaʻa ʻo e kau paní ʻi he tafaʻaki ʻe tahá pea mo Mōsese mo ʻIlaisiā ʻi he tafaʻaki ʻe tahá ʻi he meʻa fekauʻaki mo ʻenau (a) tuʻu taʻemanavahē maʻá e moʻoní? (e) ko hono maʻu ʻa e tokoni mei he faʻahinga ʻikai ko e ʻIsilelí?

¹⁵ ʻIkai ko ia pē, kuo taʻemanavahē ʻa e kau Kalisitiane paní ʻo hangē ko Mōsese mo ʻIlaisiaá ʻi he tuʻu maʻá e moʻoní ʻo fakafepakiʻi ʻa e loi fakalotú. Manatuʻi ʻa hono hanga ʻe Paula ʻo talatalaakiʻi ʻa e palōfita loi Siu ko Pasisú pea mo hono fakaeʻa pōtoʻi kae papau ʻa e loi ʻa e ngaahi ʻotua ʻo e kau ʻAtenisí. (Ngāue 13:​6-12; 17:​16, 22-31) Manatuʻi foki, ʻi he taimi ʻi onopooní kuo fakaeʻa loto-toʻa ai ʻe he toenga ʻo e kau paní ʻa Puleʻanga-Haʻa-Kalisitiane pea kuo hanga ʻe he faifakamoʻoni peheé ʻo fakamamahiʻi ia.​—Fakahā 8:​7-12.c

¹⁶ ʻI he taimi naʻe hola ai ʻa Mōsese ʻi he houhau ʻa Feló, naʻá ne hūfanga ʻi he ʻapi ʻo ha tokotaha ʻikai ko ha ʻIsileli, ko Liueli, naʻe toe ui ko Setelō. ʻI ha taimi ki mui ai, naʻe maʻu ai ʻe Mōsese ha akonaki mahuʻinga fakaefokotuʻutuʻu maau meia Liueli, ʻa ia ko hono foha ē ʻa Hopapi naʻá ne tataki ʻa ʻIsileli ʻi he toafá.d (Ekisoto 2:​15-22; 18:​5-27; Nomipa 10:29) Kuo tokoniʻi meimei tatau ʻa e kau mēmipa ʻo e ʻIsileli faka-ʻOtuá ʻe he faʻahinga tāutaha ʻoku ʻikai ko ha kau mēmipa pani ʻo e ʻIsileli faka-ʻOtuá? ʻIo, kuo tokoniʻi kinautolu ʻe he “fuʻu kakai lahi” ʻo e “fanga sipi kehe,” ʻa ia kuo nau hā mai ʻi he lolotonga ʻo e ngaahi ʻaho fakaʻosí ni. (Fakahā 7:9; Sione 10:16; Aisea 61:5) ʻI hono tomuʻa tala ʻa e poupou māfana, anga-ʻofa ʻe fai ʻe he “fanga sipi” ko ʻení ki hono ngaahi tokoua paní, naʻe pehē fakaekikite ʻe Sīsū kiate kinautolu: “Naʻa ku fiekaia, pea mou ʻomi haʻaku kai; naʻa ku fie inu, pea mou ʻomi haku inu; naʻa ku ʻāunofo, pea mou fakaafeʻi au; nae ʻikai haku kofu, pea mou fakakofu au; naʻa ku mahaki, pea mou ōmi hoku vakai; naʻa ku ʻi he pilisone, pea mou aʻahi mai. . . . Ko au e, ʻoku ou talaatu, ʻI hoʻomou fai pehe ki ha taha ʻo hoku ngāhi tokoua mamaʻo ni, naʻa mou fai ia kiate au.”—Mātiu 25:​35-40.

17. Naʻe anga-fēfē hono hokosia ʻe he kau paní ha meʻa meimei tatau mo ia naʻe hokosia ʻe ʻIlaisiā ʻi Moʻunga Hōlepí?

¹⁷ ʻIkai ko ia pē, naʻe hokosia ʻe he ʻIsileli faka-ʻOtuá ha meʻa ʻoku ala fakatatau ki he meʻa ko ia naʻe hokosia ʻe ʻIlaisiā ʻi Moʻunga Hōlepí.e Hangē pē ko ʻIlaisiā ʻi he taimi naʻá ne hola ai meia Kuini Sisipelí, naʻe fakakaukau ʻa e toenga ʻo e kau paní naʻe manavaheé naʻe kakato ʻenau ngāué ʻi he ngataʻanga ʻo e Tau I ʻa Māmaní. Pea, ʻi he toe hangē pē ko ʻIlaisiaá, naʻa nau fetaulaki mo Sihova, ʻa ia naʻá ne hoko mai ke fakamāuʻi ʻa e ngaahi kautaha ko ia naʻe taukaveʻi ko e “ʻapi ʻo e ʻOtua.” (1 Pita 4:17; Malakai 3:​1-3) ʻI hono ʻilo naʻe ʻikai ke aʻusia ʻe Puleʻanga-Haʻa-Kalisitiane ʻa e meʻa naʻe ʻamanekina mei aí, naʻe fakatokangaʻi ai ko e toenga ʻo e kau paní ko e “tamaioeiki agatonu mo boto” ia pea naʻe fakanofo ke ne pule ki he ngaahi meʻa ʻa Sīsū ʻi he māmaní. (Mātiu 24:​45-47, PM) ʻI Hōlepi, naʻe fanongo ai ʻa ʻIlaisiā ki ha “leʻo naʻe ngananganaiki mai” ʻa ia naʻe fakamoʻoniʻi ko e leʻo ia ʻo Sihová, ʻi hono ʻoange kiate ia ʻa e ngāue lahi ange ke fai. ʻI he vahaʻa taimi nonga ʻo e ngaahi taʻu hili ʻa e taú, naʻe fanongo ai ʻa e kau sevāniti anga-tonu pani ʻa Sihová ki hono leʻó mei he ngaahi peesi ʻo e Tohitapú. Naʻa nau ʻilo foki mo kinautolu naʻa nau maʻu ha fekau ke fakahoko.​—1 Tuʻi 19:​4, 9-18; Fakahā 11:​7-13.

18. Kuo anga-fēfē hono fakahoko mai ʻa e ngaahi fakahāhā fisifisimuʻa ʻo e mālohi ʻo Sihová ʻo fakafou mai ʻi he ʻIsileli faka-ʻOtuá?

¹⁸ Fakaʻosí, kuo fakafou mai ʻi he ʻIsileli faka-ʻOtuá ʻa e ngaahi fakahāhā tuʻu-ki-muʻa ʻo e mālohi ʻo Sihová? ʻI he hili ʻa e pekia ʻa Sīsuú, naʻe fakahoko ʻe he kau ʻaposetoló ha ngaahi mana lahi, ka naʻe faai mai pē ʻo ngata ʻa e ngaahi meʻá ni. (1 Kolinito 13:​8-13) ʻI he ngaahi ʻahó ni, ʻoku ʻikai te tau sio ʻi ha ngaahi mana ʻi he tuʻunga fakasinó. ʻI he tafaʻaki ʻe tahá, naʻe pehē ʻe Sīsū ki hono kau muimuí: “Ko au ē, ko au e, ʻoku ou tala atu, Ko ia ʻoku tui pikitai kiate au, ko e ngaahi ngāue ʻoku ou fai ʻe fai ʻe he toko taha ko ia foki; ʻio, te ne fai ʻa e ngaahi meʻa ʻoku hulu atu ʻi he ngaahi meʻa ni.” (Sione 14:12) Naʻe ʻuluaki fakahoko ʻeni ʻi hono malangaʻi ʻe he kau ākonga ʻa Sīsuú ʻa e ongoongo leleí ʻi he kotoa ʻo e ʻEmipaea Lomá ʻi he ʻuluaki senitulí. (Loma 10:18) Kuo toe lahi ange ʻa e ngaahi ngāue kuo fai ʻi he ʻaho ní ʻi he takimuʻa ʻa e toenga ʻo e kau paní ʻi hono malangaʻi ʻa e ongoongo leleí “ki mamani katoa . . . ke ai ha fakamatala ki he ngāhi kakai kotoa pe.” (Mātiu 24:14) Ko e olá? Kuo sio tonu ʻa e senituli hono 20 ʻi hono fakatahatahaʻi ʻa e fika tokolahi taha ʻo e kau sevāniti anga-tonu ʻosi fakatapui ʻa Sihová ʻi he hisitōliá. (Fakahā 5:​9, 10; 7:​9, 10) He fakamoʻoni fisifisimuʻa ē ʻo e mālohi ʻo Sihová!​—Aisea 60:22.

Haʻu ʻa e Ngaahi Tokoua ʻo Sīsuú ʻi he Nāunau

19. Ko ʻafē ʻe mātā ai ʻa e ngaahi tokoua pani ʻo Sīsuú fakataha mo ia ʻi he nāunauʻiá?

¹⁹ ʻI he ʻosi ʻa e ʻalunga ʻi māmani ʻo e toenga ʻo e ngaahi tokoua pani ʻo Sīsuú, ʻoku fakalāngilangiʻi kinautolu fakataha mo ia. (Loma 2:​6, 7; 1 Kolinito 15:53; 1 Tesalonaika 4:​14, 17) ʻOku nau hoko leva ai ko e ngaahi tuʻi mo e kau taulaʻeiki taʻefaʻamate ʻi he Puleʻanga fakahēvaní. Fakataha mo Sīsū, te nau hoko leva ʻo “pule ki he ngaahi kakai: pea te [nau] puleʻi kinautolu ʻaki ha sepita ukamea; ʻo hangē ko e laiki ke lailai ʻa e ngaahi ipu ʻumea.” (Fakahā 2:​27; 20:​4-6; Sāme 110:​2, 5, 6) Fakataha mo Sīsū, te nau ʻafio ʻi he ngaahi taloni ʻo fakamāuʻi “ʻa e matakali ʻe hongofulu ma ua ʻo Isileli.” (Mātiu 19:28) Kuo tatali loto-vēkeveke ʻa e ngaahi meʻamoʻui fakatupu ʻoku toʻé ki he ngaahi meʻá ni, ʻa ia ko e konga ia ʻo e “fakaeʻa ʻo e ngaahi foha ʻo e ʻOtua.”​—Loma 8:​19-21; 2 Tesalonaika 1:​6-8.

20. (a) ʻI he fekauʻaki mo e ʻamanaki fē naʻe ʻai ai ʻe he fakakehé ʻo mālohi ʻa e tui ʻa Pitá? (e) ʻOku anga-fēfē hono ʻai ʻe he fakakehé ke mālohi ʻa e kau Kalisitiané he ʻahó ni?

²⁰ Naʻe lea ʻa Paula ʻo kau ki he fakahā mai ʻa Sīsū ʻi he lolotonga ʻa e “mamahi lahi” ʻi heʻene tohi: “Te ne hoko mai ke ha hono langilangi heʻene hoʻata ʻi hono kau maʻoniʻoni, pea ha hono fakaofo heʻene hoʻata ʻi he kakai naʻe tui.” (Mātiu 24:21; 2 Tesalonaika 1:10) Ko ha ʻamanaki fisifisimuʻa ē kia Pita, Sēmisi, Sione, pea mo e kotoa ʻo e kau Kalisitiane pani ʻe he laumālié! Naʻe ʻai ʻe he fakakehé ʻo mālohi ʻa e tui ʻa Pitá. Ko hono moʻoní, ko hono lau iá ʻoku mālohi ai ʻetau tuí foki pea mālohi ai ʻetau falala pau ʻe vavé ni hono hanga ʻe Sīsū ʻo “ʻange ki he tangata taki taha ʻo fakatatau ki heʻene ngāhi ngaue.” Ko e kau Kalisitiane anga-tonu pani ko ia kuo nau moʻui ʻo aʻu mai ki he ʻaho ní ʻoku nau sio ki hono fakapapauʻi ʻenau falala pau ʻe fakalāngilangiʻi kinautolu fakataha mo Sīsū. Kuo hoko ʻo mālohi ʻa e tui ʻa e fanga sipi kehé ʻi he ʻilo te ne fakahaofi atu kinautolu ʻi he ngataʻanga ʻo e ngaahi meʻa ʻo e fokotuʻutuʻu fulikivanú ni ki he maama foʻou nāunauʻiá. (Fakahā 7:14) Ko ha fakalototoʻa ē ke tuʻumaʻu ki he ngataʻangá! Pea ʻoku malava ʻe he vīsone ko ʻení ʻo akoʻi mai kiate kitautolu ha toe meʻa lahi ange, ʻo hangē ko ia te tau vakai ki ai ʻi he kupu hono hoko maí.

[Fakamatala ʻi lalo]

ʻOkú Ke Manatuʻi?

◻ Ko hai naʻe hā fakataha mo Sīsū ʻi he fakakehé?

◻ Naʻe anga-fēfē hono ʻai ʻe he fakakehé ʻo mālohi ʻa e tui ʻa e kau ʻaposetoló?

◻ ʻI he hā fakataha mai ʻi he “nāunāu” ʻa Mōsese mo ʻIlaisiā mo Sīsū ʻi he fakakehé, ko hai naʻá na fakatātaaʻí?

◻ Ko e hā ʻa e ngaahi faitatau ʻi he vahaʻa ʻo Mōsese mo ʻIlaisiā ʻi he tafaʻaki ʻe tahá pea mo e ʻIsileli faka-ʻOtuá ʻi he tafaʻaki ʻe tahá?

[Fakatātā ʻi he peesi 10]

Naʻe ʻai ʻe he fakakehé ʻo mālohi ʻa e tui ʻa e kau Kalisitiane ʻi he kuohilí mo e lolotongá ni