Ko ha Maʻuhala Siʻisiʻi Pē?

Naʻe sio atu ha kiʻi taʻahine ki he kohu ʻoku ʻalu hake mei ha fale ngāue ʻoku ʻi ai hano siminī pea ʻoku ʻalu lahi hake ha ngaahi ʻao matolu mei ai. Naʻá ne fakaʻosiʻaki ko e taumuʻa ʻa e fale ngāué ko hono ngaohi ʻo e ngaahi konga ʻaó. Ko e maʻuhala siʻisiʻi ko eni ʻa e kiʻi taʻahiné ʻoku fakaoli. Kae kehe, ko ha maʻuhala lahi ʻoku lava ke ne uesia lahi ʻetau moʻuí. Ko e fakatātaá, ko e lau halaʻi ha leipolo ʻo ha hina faitoʻo ʻoku lava ke ne ʻomai ha ngaahi faingataʻa mafatukituki.

ʻI he ʻikai mahinoʻi ʻa e ngaahi meʻa fakalaumālié ʻe lava ke hoko ʻo mafatukituki ange. Ko e fakatātaá, ko e kakai ʻe niʻihi ʻoku ʻikai ke nau mahinoʻi ʻa e ngaahi akonaki ʻa Sīsuú. (Sione 6:48-68) ʻI he ʻikai ke ako lahi angé, ʻoku nau talitekeʻi ʻa e ngaahi meʻa kotoa naʻe akoʻi ʻe Sīsuú. Ko ha mole lahi ē!

ʻOkú ke lau ʻa e Tohi Tapú ke maʻu ha tataki? Ko ha meʻa lelei ia. ʻOku ʻi ai nai ha fakatuʻutāmaki ʻi he ʻikai mahinoʻi ʻa e ngaahi meʻa ʻokú ke laú? ʻOku hoko eni ki he kakai tokolahi. Fakakaukau angé ki ha maʻuhala anga-maheni ʻe tolu.

• Ko e kakai ʻe niʻihi ʻoku nau maʻuhala ʻa e fekau ʻi he Tohi Tapú “ke ke manavahe ki he Otua.” ʻOku nau pehē ʻoku fiemaʻu ʻe he ʻOtuá ha manavahē taʻetotonu kiate ia. (Koheleti 12:13, PM) Ka ʻoku ʻikai finangalo ʻa e ʻOtuá ke ongoʻi pehē ʻa e kakai ʻoku nau lotu ange kiate iá. ʻOkú ne pehē: “Oua ʻe manavahe, he ʻoku ou ʻiate koe ʻe au; ʻoua ʻe kilokilo holo, he ko ho ʻOtua au: te u poupou koe ʻe au; ʻio, te u tokoni kiate koe.” (ʻAisea 41:10) Ke manavahē ki he ʻOtuá ʻoku ʻuhingá ko e ongoʻi māluʻia mo fakaʻapaʻapa loloto kiate ia.

• 

  Ko e kakai ʻe niʻihi ʻoku nau maʻuhala ʻa e ngaahi lea fakamānavaʻi ko ení: “Ko e meʻa kotoa ʻoku ai hano taimi . .  . ko e ʻaho ke fanauʻi mo e ʻaho ke pekia.” ʻOku nau fakaʻosiʻaki ʻoku ʻosi ʻai pē ʻe he ʻOtuá ia ʻa e taimi pau ke mate ai ʻa e tangata taki taha. (Koheleti 3:1, 2) Kae kehe, ko e potu tohi ko ení ʻoku fakamatala ia ʻo fekauʻaki mo e vilo ʻetau moʻuí pea fakahaaʻi ai ko e maté ko e meʻa anga-maheni. ʻOku toe akoʻi ʻe he Folofola ʻa e ʻOtuá ko ʻetau ngaahi filí ʻoku ʻi ai ʻene kaunga lahi ki he lōloa ʻetau moʻuí. Ko e fakatātaá, ʻoku tau lau: “Oku fakalahi ae gaahi aho e he manavahe kia Jihova.” (Palōveepi 10:27, PM; Saame 90:10; ʻAisea 55:3) ʻI he founga fē? Ko e tafaʻaki ʻe taha, ko e tokaʻi ʻa e Folofola ʻa e ʻOtuá ʻe ueʻi ai kitautolu ke fakaʻehiʻehi mei hono fai ʻo ha ngaahi tōʻonga ʻoku kovi ki heʻetau moʻuí hangē ko e konā mo e ʻulungaanga taʻetāú.—1 Kolinitō 6:9, 10.

• Ko e niʻihi ʻoku nau fakaʻuhinga fakahangatonu ʻa e Tohi Tapú ʻi he taimi ʻoku fakalea ai ko hēvani mo māmani “oku tuku tauhi ia ki he afi” pea ʻoku nau fakamulitukuʻaki ʻe fakaʻauha ʻe he ʻOtuá ʻa e foʻi māmaní. (2 Pita 3:7) Ka ʻoku talaʻofa ʻa e ʻOtuá heʻikai ʻaupito te ne fakaʻatā ʻa e māmaní ke fakaʻauha. Ko e ʻOtuá “naʻa ne fakamaʻu ʻa e fonua ki hono ngaahi tuʻunga, ke ʻoua naʻa ueʻi ʻo lauikuonga pea taʻengata.” (Saame 104:5; ʻAisea 45:18) Ko e fokotuʻutuʻu lolotonga ia ʻo e māmani fakameleʻi ko ení, kae ʻikai ko e foʻi palanite ko māmaní, ʻe fakangata ʻosi ia ʻo hangē pē ko ha fakaʻauha ʻoku fai ʻe ha afi. Ko hēvani leva, ʻi he ʻuhinga fakamatelié ʻe ʻuhinga nai ia ki he langí, ko e ʻuniveesi fetuʻua pe ko e feituʻu ia ʻoku ʻafio ai ʻa e ʻOtuá. ʻE ʻikai ke fakaʻauha ʻa e ngaahi meʻá ni.

Hangē ko ia ʻokú ke vakai ki he ngaahi fakatātā ko ení, ʻoku faʻa maʻuhala ʻa e kakai tokolahi ʻo fekauʻaki mo ha potu tohi ʻi heʻenau lau ʻa e Tohi Tapú. Ka ko e hā ʻoku fakaʻatā ai ʻe he ʻOtuá ke hoko ai ení? ʻOku fakaʻuhinga nai ʻa e niʻihi: ‘Kapau ʻoku poto taha mo lahi taha ʻa e ʻilo ʻa e ʻOtuá, ʻe lava ke ne ʻomai kiate kitautolu ha tohi ʻoku mahino hono hikí ki he tokotaha kotoa pea faingofua ʻa hono mahinoʻí. Ko e hā ʻoku ʻikai ke ne fai ai ení?’ Sio angé ki he ngaahi ʻuhinga ʻe tolu ʻoku faʻa maʻuhala ai ʻa e niʻihi ki he Tohi Tapú.

1. Naʻe faʻu ʻa e Tohi Tapú ke mahinoʻi ia ʻe he faʻahinga ʻoku anga-fakatōkilalo mo loto-lelei ke ako. Naʻe pehē ʻe Sīsū ki heʻene Tamaí: “ʻOku ou fakahīkihikiʻi fakahāhaaʻi koe, ʻe Tamai, ko e ʻEiki ʻo hēvani mo māmani, he kuó ke mātuʻaki fufū ʻa e ngaahi meʻá ni mei he kau potó mo e kau ʻatamaiʻiá pea kuó ke fakaeʻa ia ki he kau valevalé.” (Luke 10:21) Kuo hiki ʻa e Tohi Tapú ʻi ha founga ʻe lava ai ke mahinoʻi ia ʻe he niʻihi ʻoku nau maʻu ʻa e fakakaukau totonú. Ko e kakai ʻoku pōlepolé—ko e ʻulungaanga anga-maheni ia ʻo e “kau potó mo e kau ʻatamaiʻiá”—ʻoku nau hehema ke maʻuhala fekauʻaki mo e Tohi Tapú. Ka ko e faʻahinga ʻoku nau lau ʻa e Tohi Tapú ʻo hangē ko ha “kau valevalé”—ʻoku anga-fakatōkilalo mo vēkeveke ke ako—kuo tāpuakiʻi kinautolu ke mahinoʻi lelei ʻa e pōpoaki ʻa e ʻOtuá. He poto moʻoni ē ko e ʻOtuá ʻi heʻene faʻu ʻa e Tohi Tapú!

2. ʻOku fakataumuʻa ʻa e Tohi Tapú ki he kakai ʻoku nau loto-moʻoni ke maʻu ʻa e tataki ʻa e ʻOtuá ke mahinoʻi ʻa e Tohi Tapú. Naʻe fakahaaʻi ʻe Sīsū ko e kakaí te nau fiemaʻu ha tokoni ke mahinoʻi kakato ʻa e meʻa naʻá ne akoʻí. ʻI he founga fē te nau maʻu ai iá? Naʻe fakamatalaʻi ʻe Sīsū: “Ko e tokoní, ʻa e laumālie māʻoniʻoní, ʻa ia ʻe fekau mai ʻe he Tamaí ʻi hoku hingoá, ko e tokoni ko iá te ne akoʻi kiate kimoutolu ʻa e ngaahi meʻa kotoa pē.” (Sione 14:26) Ko ia ʻoku ʻomai ʻe he ʻOtuá hono laumālie māʻoniʻoní—ʻa hono ivi ngāue mālohí—ke tokoniʻi ʻa e kakaí ke mahinoʻi ʻa e meʻa ʻoku nau lau ʻi he Tohi Tapú. Neongo ia, ʻoku taʻofi ʻe he ʻOtuá ʻa hono laumālié mei he kakai ʻoku ʻikai ke nau falala kiate ia ki ha tokoní, ko ia ʻoku hā taʻemahino ia kia kinautolu. Ko e laumālie māʻoniʻoní ʻokú ne toe ueʻi ʻa e kau Kalisitiane ʻoku lahi ʻenau ʻiló ke nau tokoniʻi ʻa e faʻahinga ʻoku nau fekumi ke maʻu ha mahino lahi angé.—Ngāue 8:26-35.

3. Ko e ngaahi potu tohi ʻe niʻihi ʻi he Tohi Tapú ʻoku lava pē ke mahinoʻi ia ʻe he faʻahinga ʻo e tangatá ʻi he taimi totonu pē ʻoku hoko ʻi he hisitōliá. Ko e fakatātaá, naʻe fekau ki he palōfita ko Tanielá ke hiki ʻa e pōpoaki ki he kahaʻú. Naʻe tala ange ʻe he ʻāngeló: “Ko koe, Taniela, tapuni ʻa e ngaahi lea, ʻo silaʻi ʻa e tohi, ʻo aʻu ki he taimi fakamui.” ʻI ha ngaahi senituli laka hake ai, ko e kakai tokolahi naʻa nau lau ʻa e tohi ʻa Tanielá ka naʻe ʻikai ke nau mahinoʻi. Ko e moʻoni, naʻa mo Taniela tonu naʻe ʻikai ke ne mahinoʻi ʻa e ngaahi meʻa ʻe niʻihi naʻá ne hikí. Naʻá ne fakahaaʻi anga-fakatōkilalo: “Naʻa ku fanongo ki ai ka naʻe ʻikai ʻuhinga kiate au.” Ne faai atu pē, naʻe lava ke mahinoʻi ʻe he kakaí ʻa e kikite ʻa e ʻOtuá naʻe hiki ʻe Tanielá, ka ʻi he taimi pau pē naʻe fili ʻe he ʻOtuá ʻi he hisitōliá. Naʻe fakamatala ʻa e ʻāngeló: “ʻAlu ā, Taniela: he kuo tapuni mo silaʻi ʻa e ngaahi lea, ʻo aʻu ki he taimi fakamui.” Ko hai te ne mahinoʻi ʻa e ngaahi pōpoaki ʻa e ʻOtuá? “ʻE ʻikai ʻuhinga ki ha taha ʻo e kau angahala, ka ko e kau fakapotopoto ʻe ʻuhinga ki ai.” (Taniela 12:4, 8-10) Ko ia ʻoku ʻikai fakaeʻa ʻe he ʻOtuá ʻa e ʻuhinga ʻo ha ngaahi potu tohi ʻi he Tohi Tapú kae ʻoua ke aʻu ki hono taimi kotofá.

Kuo fakatupunga nai ʻe he taimí ʻa e Kau Fakamoʻoni ʻa Sihová ke maʻuhala ʻo fekauʻaki mo e Tohi Tapú? ʻIo. Ka ʻi he taimi ʻoku kotofa ai ʻe he ʻOtuá ke mahino ʻa e ngaahi meʻá, ʻoku loto-lelei ʻa e Kau Fakamoʻoní ke fakatonutonu ʻenau mahinó. ʻOku nau tui ʻoku nau faʻifaʻitaki ofi ki he kau ʻapositolo ʻa Kalaisí, naʻa nau fakatonutonu anga-fakatōkilalo ʻenau fakakaukaú ʻi he taimi naʻe fakatonutonu ai kinautolu ʻe Sīsuú.—Ngāue 1:6, 7.

Ko e kiʻi taʻahine naʻe hala ʻene fakakaukau ʻo fekauʻaki mo e feituʻu ʻoku haʻu mei ai ʻa e ʻaó mahalo ko ha kiʻi maʻuhala siʻisiʻi pē ia. Kae kehe, ko e ngaahi meʻa ʻoku akoʻi ʻe he Tohi Tapú ʻoku mātuʻaki mahuʻinga ia kiate koe. Ko e pōpoaki ʻi he Tohi Tapú ʻoku mahuʻinga ʻaupito ia ki ha tokotaha ʻoku feinga ke ne mahinoʻi ia ʻi heʻene lau fakafoʻituitui pē ʻa e Tohi Tapú. Ko ia kumi ki ha tokoni ke mahinoʻi ʻa e meʻa ʻokú ke laú. Kumi ki he faʻahinga ʻoku nau ako ʻa e Tohi Tapú mo ha fakakaukau anga-fakatōkilalo, ko e kakai ʻoku nau falala ki he laumālie māʻoniʻoni ʻo e ʻOtuá ke mahinoʻi ʻa e Tohi Tapú, ko e kakai ʻoku nau fakapapauʻi ʻoku tau moʻui ʻi he taimi mahuʻinga ʻi he hisitōliá ʻa ia ʻoku finangalo ai ʻa e ʻOtuá ke tau mahinoʻi ʻa e Tohi Tapú ʻi ha toe taimi ki muʻa. ʻOua ʻe toumoua ke talanoa mo e Kau Fakamoʻoni ʻa Sihová pe lau ʻenau ngaahi fekumi fakaʻauliliki ʻi he uepisaiti jw.org. ʻOku talaʻofa ʻa e Tohi Tapú: ‘Kapau te ke ui ʻa ʻilomeʻa te ke maʻu ʻa e ʻiloʻi ʻo e ʻOtuá.’​—Palōveepi 2:3-5.