Naʻa Nau Fai ʻa e Finangalo ʻo Sihová

Ko ha Samēlia ʻOku Fakamoʻoniʻi ko ha Kaungāʻapi Lelei

ʻI HE ʻaho ʻo Sīsuú, naʻe ʻi ai ʻa e loto-taufehiʻa mahino ʻi he vahaʻa ʻo e kau Siú mo e kau Senitailé. Naʻe faai pē, ʻo aʻu ʻo fakakau ʻe he Misinā faka-Siú ha lao ke taʻofi ʻa e kakai fefine ʻIsilelí mei heʻenau tokoni ki he fāʻele ʻa e faʻahinga ʻikai ko e Siú, koeʻuhi ʻe tokoni ai pē ʻeni ia ki hono ʻomi ʻo e toe Senitaile ki he māmaní.​—Abodah Zarah 2:1.

Ko e kau Samēliá naʻa nau kāinga ofi ange kinautolu ki he kau Siú ʻi he kau Senitailé, fakatouʻosi pē ʻi he fakalotu mo e fakaematakali. Kae kehe, naʻe toe lau pē mo kinautolu ia ko e kau liʻekina. “Oku ʻikai feofoofani ae kakai jiu moe kakai Samelia,” ko e tohi ia ʻa e ʻapositolo ko Sioné. (Sione 4:​9, PM) Ko e moʻoni, naʻe akoʻi ʻe he Talamatá “ko ha konga mā ʻoku foaki mai ʻe ha Samēlia ʻoku taʻemaʻa ange ia ʻi ha kakanoʻi puaka.” Naʻe aʻu ʻo ngāueʻaki ʻe he kau Siu ʻe niʻihi ʻa e kupuʻi lea “Samelia” ko ha fakalea ia ʻo e paetaku mo e manuki.​—Sione 8:48.

ʻI he vakai ki he tuʻunga ko ení, ko e ngaahi lea ko ia ʻa Sīsū ki ha tangata naʻe ʻilo lahi ki he lao faka-Siú ʻoku mātuʻaki ʻaonga lahi. Naʻe fakaofiofi atu ʻa e tangatá kia Sīsū ʻo ne ʻeke: “Tangataʻeiki, ko e ha ha meʻa te u fai kae tō moʻoku ʻa e moʻui taʻengata?” ʻI heʻene talí, naʻe fakahanga ai ʻe Sīsū ʻene tokangá ki he Lao ʻa Mōsesé, ʻa ia ʻoku fekauʻi ai ke ‘ʻofa ki he ʻEikí ʻaki ʻa e kotoa ʻo ho lotó, laumālié, iví, mo e ʻatamaí,’ pea ke ‘ʻofa ki ho kaungāʻapí ʻo hangē ko hoʻo ʻofa kiate koé.’ Naʻe ʻeke leva ʻe he loeá kia Sīsū: “Ko hai nai hoku kaungaʻapi?” (Luke 10:​25-29; Livitiko 19:18; Teutalonome 6:5) Fakatatau ki he kau Fālesí, ko e kupuʻi lea “kaungāʻapi” ʻoku ngāueʻaki pē ia ki he faʻahinga ʻoku nau tauhi ʻa e talatukufakaholo faka-Siú​—ʻo ʻikai ʻaupito ki he kau Senitailé pe kau Samēliá. Kapau naʻe fakakaukau ʻa e loea faʻa fehuʻi ko ení ʻe poupouʻi ʻe Sīsū ʻa e fakakaukau ko iá, te ne toki ʻohovale.

Ko ha Samēlia Anga-ʻOfa

Naʻe tali ʻe Sīsū ʻa e fehuʻi ʻa e tangatá ʻaki ʻene fakamatalaʻi ha pealapeli.a “Tokua naʻe ai ha tangata,” ko ʻene leá ia, “naʻe ʻalu hifo mei Selusalema ki Sielikō.” Ko e mamaʻo ʻi he vahaʻa ʻo Selusalema mo Sielikoó naʻe kilomita ʻe 23 nai. Ko e hala naʻá ne fakafehokotaki ʻa e ongo kolo ko ení naʻe ʻi ai hono ʻū afenga māsila mo hono ngaahi tepuʻi maka hope, ʻo ʻai ai ke faingofua ki he kau kaihaʻá ke toitoi, ʻohofi, pea hola. Ko e meʻa naʻe hokó, ko e tangata fononga ʻi he pealapeli ʻa Sīsuú “ne toloto ʻi ha kaihaʻakau; ʻa ia naʻa nau toʻo hono kofu, pea ʻikai ngata ai, ka naʻa nau tāʻi ia, pea ʻi he tuku ia ʻo nau ʻalu, kuo ne kafo lahi, ʻo tei mate ʻi heʻenau ngaue.”​—Luke 10:30.

“Pea feʻunga mo ia,” ko e hoko atu ia ʻa Sīsuú, “naʻe ʻalu hifo ha taulaʻeiki ʻi he hala ko ia: pea ʻi heʻene sio ki he tangata, naʻa ne halafaki ʻi he kauhala ʻe taha. Pehē foki mo ha motuʻa Livaite, naʻe hoko ki he potu ko ia, ʻo ne ʻalu atu ia ʻo mamata, pea toki halafaki ʻi he kauhala ʻe taha.” (Luke 10:​31, 32) Ko e kau taulaʻeikí mo e kau Līvaí ko e kau faiako kinautolu ʻo e Laó​—kau ai ʻa e lao ki he ʻofa fakakaungāʻapí. (Livitiko 10:​8-11; Teutalonome 33:​1, 10) Ko hono moʻoní, ko kinautolu ia naʻe totonu ange ke nau ongoʻi fietokoni ki he tangata fefonongaʻaki naʻe laveá.

Naʻe hoko atu ʻa Sīsū: “Ka ʻi he fononga mai ha tangata Samelia, naʻa ne aʻu ki he tangata.” Ko hono fakaʻasi ko ia ʻo e tangata Samēliá naʻe ʻikai ha veiveiua naʻá ne langaʻi ʻa e fifili ʻa e loeá. ʻE leleiʻia nai ʻa Sīsū ʻi he fakakaukau hala ko ia fekauʻaki mo e matakali ko ení? ʻI hono kehé, ʻi he sio atu ʻa e Samēliá ki he tangata fefonongaʻaki faingataʻaʻiá, “naʻe langa hono fatu ʻi he ʻofa.” Naʻe pehē ʻe Sīsū: “ʻO ne ʻunuʻunu atu, ʻo tuluʻi hono ngaahi lavea ʻaki ʻa e lolo mo e uaine, mo ne haʻihaʻi; pea ne fakaheka ia ki heʻene manu, ka ne ʻalu ia ʻi lalo ʻo taki ki he faletalifononga, ʻo ne tauhi ia ʻi ai.b Pea pongipongi hake, naʻa ne toʻo mai ha foʻi tenali ʻe ua, ʻo ne ʻange ki he motuʻa naʻe tauhi ʻa e faletalifononga, ʻo ne pehē, Ke ke tauhi pē ʻa e tangata ni; pea ka ʻoku siʻi ʻeni, pea ʻi heʻeku foki mai te u totongi ʻe au haʻo meʻa kuo mole ai.”​—Luke 10:​33-​35.

Naʻe ʻeke ʻe Sīsū ʻi he taimi ko ení ki he tokotaha naʻe fai hono fakaʻeké: “Ko hai ʻi he toko tolu ni, ʻi hoʻo poa, naʻe hoko ko e kaungaʻapi ʻo e siana naʻe moʻua ʻe he kaihaʻakau?” Naʻe ʻilo ʻe he loeá ia ʻa e talí, ka naʻe hā naʻá ne toumoua ke pehē “ko e tangata Samelia.” ʻI he ʻikai peheé, naʻá ne tali pē: “Ko ia naʻa ne fai ʻofa ki he tangata.” Naʻe pehē ange leva ʻe Sīsū: “ʻAlu, ʻo fai pehē mo koe foki.”​—Luke 10:​36, 37.

Lēsoni Maʻa Kitautolu

Ko e tangata naʻá ne fakafehuʻi ʻa Sīsuú naʻá ne fai peheé ko ʻene feinga ke “fakatonuhia ia.” (Luke 10:29) Mahalo naʻá ne fakakaukau ʻe fakahīkihikiʻi ia ʻe Sīsū ʻi heʻene piki fakalautelau ki he Lao ʻa Mōsesé. Ka naʻe fiemaʻu ki he tokotaha ʻafungi-kita ia ko ení ke ne ako ʻa e moʻoni ʻo e palōvepi Tohitapu: “Ko e ʻalunga kotoa ʻo e tangata ʻoku totonu ʻi he vakai aʻana: Ka ʻoku hanga ʻa Sihova ʻo fua ʻa e ngaahi loto.”​—Palovepi 21:2.

ʻOku fakahā ʻe he pealapeli ʻa Sīsuú ko ha tokotaha anga-tonu moʻoni ko e tokotaha ia ʻoku ʻikai ke talangofua pē ki he ngaahi lao ʻa e ʻOtuá ka ʻokú ne toe faʻifaʻitaki foki ki hono ngaahi ʻulungāngá. (Efeso 5:1) Ko e fakatātaá, ʻoku tala mai ʻe he Tohitapú kiate kitautolu “ʻoku ʻikai ke filifilimanako ʻa e ʻOtua.” (Ngāue 10:34) ʻOku tau faʻifaʻitaki ki he ʻOtuá ʻi he tuʻunga ko ení? ʻOku fakahā ʻe he pealapeli fakaueʻiloto ʻa Sīsuú ko ʻetau anga fakakaungāʻapí ʻoku totonu ke manga fakalaka ia ʻi he ngaahi fakangatangata fakafonuá, anga fakafonuá, mo e fakalotú. Ko e moʻoni, ko e kau Kalisitiané ʻoku fakahinohinoʻi ke “ngaue ʻaonga ki he kakai kotoa pe”​—kae ʻikai ki he kakai pē ʻo e tuʻunga fakasōsiale tatau, matakali, pe fonua pea ʻikai ki he kaungātuí pē.​—Kaletia 6:10, fakaʻītali ʻamautolu.

ʻOku feinga ʻa e Kau Fakamoʻoni ʻa Sihová ke muimui ʻi he akonaki Fakatohitapu ko ení. Ko e fakatātaá, ʻi he taimi ʻoku hoko ai ha fakatamaki, ʻoku nau fakaaʻu atu ʻa e tokoni ʻofa fakaetangatá ki he kaungātuí pea pehē ki he faʻahinga ʻikai ko e Kau Fakamoʻoní.c Tānaki atu ki aí, ʻoku nau fakamoleki fakakātoa ʻa e ngaahi houa laka hake ʻi he pilioná ʻi he taʻu taki taha ʻi hono tokoniʻi ʻa e kakaí ke nau maʻu ha ʻilo lelei ange ʻo e Tohitapú. ʻOku nau feinga ke nau aʻu ki he tokotaha kotoa pē mo e pōpoaki ʻo e Puleʻangá, he ko e finangalo ia ʻo e ʻOtuá ke “maʻu moʻui ʻe he kakai kotoa pe, pea ke nau aʻusia ʻa e ʻilo kanokano ki he moʻoni.”​—1 Timote 2:4; Ngāue 10:35.

[Fakamatala ʻi lalo]