Vahe 75

Ko e Matavai ʻo e Fiefiá

LOLOTONGA ʻene ngāue fakafaifekau ʻi Kālelí, naʻe fakahoko ai ʻe Sīsū ha ngaahi mana, pea naʻá ne toe fai ʻa e ngaahi meʻá ni ʻi Siutea. Hangē ko ʻení, naʻá ne tuli atu mei ha tangata ha tēmeniō naʻá ne taʻofi ia ke ʻoua naʻá ne lea. Naʻe ofo ai ʻa e fuʻu kakaí, ka naʻe toe ʻohake ʻe he kau fakaangá ha meʻa tatau ʻo hangē ko ia naʻe ʻohake ʻi Kālelí. “ʻOkú ne fai ʻene kapusi tēmenioó ʻia Pelisipupe ko e ʻeiki ʻo e kau tēmenioó,” ko ʻenau taukaveʻí ia. Naʻe fiemaʻu ʻe he niʻihi kehe ha fakamoʻoni lahi ange meia Sīsū pe ko hai ia, pea naʻa nau feinga ke ʻahiʻahiʻi ia ʻaki ʻenau kole fekauʻaki mo ha fakaʻilonga mei hēvani.

ʻI heʻene ʻiloʻi ʻa e meʻa naʻa nau fakakaukau ki aí, naʻe fai ʻe Sīsū ki hono kau fakaanga ko ʻeni ʻi Siuteá ʻa e tali tatau ʻo hangē pē ko ia naʻá ne fai kiate kinautolu ʻi Kālelí. Naʻá ne fakahā ko e puleʻanga kotoa pē ʻoku mavahevahe ʻiate ia pē ʻe tō ki lalo. “Pea,” naʻá ne ʻeke, “ko Sētane foki, kapau te ne mavahevahe ʻo fetuʻusi mo ia, pea tuʻu fēfē hono puleʻangá?” Naʻá ne fakahāhā ʻa e tuʻunga fakatuʻutāmaki naʻe ʻi ai ʻa hono kau fakaangá ʻaki ʻene pehē: “Kapau ko e māfimafi ʻo e ʻOtuá ʻoku ou fai ai ʻeku kapusi tēmenioó, pea tā kuo aʻu mai kiate kimoutolu ʻa e puleʻanga ʻo e ʻOtuá.”

Naʻe totonu ki he faʻahinga naʻa nau mamata ki he ngaahi mana ʻa Sīsuú ke nau fai ha tali ʻi he founga tatau ʻo hangē ko ia naʻe fai ʻe he faʻahinga ʻi he laui senituli ki muʻá ʻi heʻenau mamata kia Mōsese heʻene fai ha mana. Naʻa nau pehē: “Ko e louhiʻi nima ʻeni ʻo e ʻOtuá!” Ko e toe ‘louhiʻi nima ʻo e ʻOtuá’ naʻá ne tongi ʻa e Fekau ʻe Hongofulú ʻi he ongo makalafalafá. Pea ko e ‘louhiʻi nima ʻo e ʻOtuá’​—ko hono laumālie māʻoniʻoní, pe ivi ngāué​—ʻa e meʻa ia naʻá ne fakaivia ʻa Sīsū ke ne tuli ʻa e kau tēmenioó pea ke fakamoʻui ʻa e mahakí. Ko ia naʻe aʻu tonu ʻa e Puleʻanga ʻo e ʻOtuá ki he kau fakaangá ni, koeʻuhi ko Sīsū, naʻe kotofa ko e Tuʻi ʻo e Puleʻangá, naʻe ʻi ai tonu ʻi honau lotolotongá.

Naʻe fakahā leva ʻe Sīsū ko hono mafai ke kapusi ʻa e kau tēmenioó ko e fakamoʻoniʻi ia ʻa ʻene mafai lahi ange ʻia Sētané, ʻo hangē pē ko ha haʻu ha tangata mālohi ange ʻo ne ikuʻi ha tangata kuo ʻai mahafu feʻunga ke leʻohi hono palasí. Naʻá ne toe lea ki he fakatātā naʻá ne fakahā ʻi Kāleli ʻo fekauʻaki mo ha laumālie ʻulí. Naʻe mavahe ʻa e laumālié mei ha tangata, ka ʻi he ʻikai fakafonu ʻe he tangatá ʻa e potu lala ko iá ʻaki ʻa e ngaahi meʻa leleí, naʻe foki mai ʻa e laumālié mo e toe ngaahi laumālie kehe ʻe fitu, pea kovi ange ʻa e tuʻunga ʻo e tangatá ni ʻi he tuʻunga naʻá ne ʻi ai ʻi muʻá.

Lolotonga ʻa e fanongo ki he ngaahi akonakí ni, naʻe ueʻi ai ha fefine mei he fuʻu kakaí ke ne kalanga leʻo-lahi: “Fiefiaā ka ko e manava naʻá ke tokoto aí, mo e ongo huhu naʻá ke huhu aí!” Koeʻuhi ko e fakaʻamu ia ʻa e fefine Siu kotoa pē ke ne hoko ko ha faʻē ʻa ha palōfita kae tautefito ki he Mīsaiá, naʻe mahinongofua ʻa e meʻa naʻe lea pehē ai ʻa e fefiné ni. Ngalingali naʻá ne fakakaukau ʻoku tautefito ʻa e fiefiá kia Mele koeʻuhi ko ʻene hoko ko e faʻē ʻa Sīsuú.

Kae kehe, naʻe fakatonutonu vave ʻe Sīsū ʻa e fefiné ni fekauʻaki mo e matavai moʻoni ʻo e fiefiá. “ʻA,” naʻá ne tali, “ʻoku fiefia pē ʻa kinautolu ʻoku maʻu ʻa e folofola ʻa e ʻOtuá, ʻo tauhi ki aí!” Naʻe ʻikai ʻaupito ha fakahuʻuhuʻu ʻa Sīsū ʻoku totonu ke fai ha fakalāngilangi makehe ki heʻene faʻē ko Melé. Kae kehe, naʻá ne fakahāhā ko e fiefia moʻoní ʻoku maʻu ia ʻi haʻate hoko ko ha sevāniti anga-tonu ʻa e ʻOtuá, ʻo ʻikai ʻi ha ngaahi fepikitaki fakaekakano pe ko ha ngaahi lavameʻa.

Hangē pē ko ia naʻá ne fai ʻi Kālelí, naʻe toe hoko atu hono valokiʻi ʻe Sīsū ʻa e kakai ʻi Siuteá ʻi heʻenau kole ki ha fakaʻilonga mei hēvaní. Naʻá ne fakahā kiate kinautolu ʻe ʻikai ke toe ʻomai ha fakaʻilonga tuku kehe ʻa e fakaʻilonga ʻo Sioná. Naʻe hoko ʻa Siona ko ha fakaʻilonga fakatouʻosi ʻi heʻene ʻi he loto kete ʻo e iká he ʻaho ʻe tolú pea mo ʻene malanga loto-toʻa, ʻa ia naʻe ueʻi ai ʻo fakatomala ʻa e kakai Ninivé. “Kae vakai!” ko e lea ia ʻa Sīsuú, “ʻoku ʻi heni ha meʻa ʻoku lahi ʻia Siona.” ʻI he founga meimei tatau, naʻe ofo ʻa e kuini ʻo Sipá ʻi he poto ʻo Solomoné. “Kae vakai!” ko e lea ia ʻa Sīsuú, “ʻoku ʻi heni ha meʻa ʻoku lahi ʻia Solomone.”

Naʻe fakamatala ʻa Sīsū ʻo pehē ʻi he tutu ʻe ha tokotaha ha maama, ʻoku ʻikai te ne tuku ia ʻi ha loto ʻana pe ʻi lalo ha kato ka ʻi he tuʻunga-māmá koeʻuhi kae lava ke sio ʻa e kakaí ki he māmá. Mahalo pē naʻá ne fakaʻali mai ʻoku tatau ʻa e akonakí pea mo hono fakahoko ʻo e ngaahi maná ʻi he haʻohaʻonga ʻo e faʻahinga loto-fefeka ko ʻeni ʻi heʻene kau fanongó mo hano fūfuuʻi ʻo e maama ʻo ha maama. Naʻe ʻikai huʻufataha pe ʻatalelei ʻa e mata ʻo e kau mamata ko iá, ko ia ai, naʻe ʻikai fakahoko ʻa e taumuʻa ʻo ʻene ngaahi maná.

Naʻe toki kapusi foki ʻe Sīsū ha tēmeniō peá ne fakaleaʻi ʻa e tangata naʻe noa. Naʻe totonu ke ueʻi ʻe he meʻá ni ʻa e kakai ʻoku ʻi ai honau mata huʻufataha pe ʻataleleí, ke fakahīkihikiʻi ʻa e ngāue lāngilangí ni pea fanongonongo ʻa e ongoongo leleí! Kae kehe, ko e kau fakaanga ko ʻení, naʻe ʻikai ke hoko ai ʻa e meʻá ni ia. Ko ia naʻe fakaʻosiʻaki ʻe Sīsū: “Ko ia ke ke vakavakai naʻa ko e koto poʻuli ia, ʻa e meʻa ʻiate koe naʻe ngaohi ke fakamāmá. Pea kapau ʻoku māma ho sinó kotoa, ʻo ʻikai hano feituʻu ʻe fakapoʻuli, pea ʻe toki māmangia hono kotoa, ʻo hangē ko ha huluʻia ʻi ha māma ʻoku fuʻu ulo.” Luke 11:​14-36; Ekisoto 8:​18, 19; 31:18; Mātiu 12:​22, 28.

▪ Ko e hā ʻa e tali ki he fakamoʻui ʻe Sīsū ha tangata?

▪ Ko e hā ʻa e ‘louhiʻi nima ʻo e ʻOtuá,’ pea naʻe anga-fēfē ʻa e aʻu tonu ʻa e Puleʻanga ʻo e ʻOtuá ki he kau fanongo ʻa Sīsuú?

▪ Ko e hā ʻa e matavai ʻo e fiefia moʻoní?

▪ ʻOku anga-fēfē malava ke maʻu ʻe ha taha ha mata huʻufataha?