Sīsū​—Ko ʻEne Moʻuí mo ʻEne Ngāue Fakafaifekau

ʻOku Hoko ha Liliu ki he Tangata Koloaʻiá mo Lasalosi

ʻOKU lave ʻa Sīsū ki ha talanoa fakatātā ʻo kau ki ha tangata koloaʻia mo ha tangata masiva naʻe hingoa ko Lasalosi. ʻOku fakatātaaʻi ʻe he tangata koloaʻiá ʻa e kau taki lotu ʻa ia naʻa nau monūʻia ʻi he ngaahi faingamālie fakalaumālié, pea ʻoku fakatātaaʻi ʻe Lasalosi ʻa e kakai lāuvale ʻoku nau fiekaia ki he meʻakai fakalaumālié. ʻOku hoko atu ʻe Sīsū ʻa ʻene talanoá, ʻo fakamatala ki he fuʻu liliu lahi ʻaupito ʻi he tuʻunga ʻo e ongo tangatá.

ʻOku pehē ʻe Sīsū: “Pea faifai pea pekia ʻa siʻi masiva, pea fata ange ia ʻe he kau angelo ki he fatafata ʻo Epalahame: naʻe pekia foki ʻa e matāpule koloaʻia, pea tanu. Pea ʻi heʻene ʻi Hetesi naʻa ne hanga hake ke vakai, he kuo ne moʻua ʻi he ngaahi mamahi; peá ne ʻilo ʻa Epalahame ʻoku nofo mamaʻo atu, pea mo Lasalosi ʻoku fāki ki hono fatafata.”

Koeʻuhi ko e tangata koloaʻiá mo Lasalosi ʻoku ʻikai ko ha ongo tangata moʻoni ia ka ʻokú na fakatātaaʻi pē ʻa e faʻahinga ʻo e kakai, ko ia ko ʻena maté ʻoku fakaefakatātā foki mo ia. Ko e hā ʻoku fakatātaaʻi ʻe heʻena maté?

Naʻe toki ʻosi ʻa e lave ʻa Sīsū ki he liliu ʻi he ngaahi tuʻungá ʻi heʻene pehē ‘naʻe ʻi ai ʻa e Lao mo e kau Palōfita ʻo aʻu kia Sione ko e Papitaiso, kae talu mei ai mo e fanongonongo ʻa e puleʻanga ʻo e ʻOtuá.’ Ko ia ʻoku fakatou mate ai ʻa e tangata koloaʻiá mo Lasalosi ki hona ngaahi tuʻunga ki muʻá ʻi he malanga fakatouʻosi ʻa Sione mo Sīsū Kalaisí.

Ko kinautolu ʻo e faʻahinga anga-fakatōkilalo mo fakatomala ʻo hangē ko Lasalosí ʻoku nau mate ki honau tuʻunga masiva fakalaumālie ki muʻá ʻo nau hoko ki ha tuʻunga ʻo e hōifua fakaʻotua. Neongo naʻa nau hanga ki muʻa atu ki he kau taki lotú ke maʻu ha kiʻi momo ʻoku tō mei he tēpile fakalaumālié, ka ʻi he taimí ni ko e ngaahi moʻoni faka-Tohitapu kuo ʻoatu ʻe Sīsuú ʻoku lato ai ʻenau fiemaʻú. Ko ia kuo ʻomai ai kinautolu ki he fatafatá, pe tuʻunga hōifua ʻo ʻEpalahame Lahi Ange, ko e ʻOtua ko Sihová.

ʻI he tafaʻaki ʻe tahá, ko kinautolu ʻoku nau hoko ko e faʻahinga ʻo e tangata koloaʻiá, ʻoku nau hoko ʻo ʻikai ke fakahōifua fakaʻotua koeʻuhi ko ʻenau kīvoi hono fakafisingaʻi ʻa e pōpoaki ʻo e Puleʻangá naʻe akoʻi ʻe Sīsuú. Ko ia ʻoku nau mate ki honau tuʻunga ki muʻa ʻa ia naʻe ngalingali monūʻiá. Ko hono moʻoní, ʻoku lave kiate kinautolu ʻo hangē ʻoku fakamamahiʻi fakaefakatātā kinautolu. Fanongo ki he lea ʻa e tangata koloaʻiá:

“ʻAlā Epalahame, ʻaloʻofa kiate au, mo ke fekau mai ʻa Lasalosi ke ne unu hono muʻa tuhu ki he vai, mo fakamokomoko hoto ʻelelo oʻota ni; he ʻoku ou mamahi ʻi he afi ni.” Ko e ngaahi pōpoaki fakaefakamaau vela ʻa e ʻOtuá naʻe fanongonongo ʻe he kau ākonga ʻa Sīsuú ko e meʻa ia ʻokú ne fakamamahiʻi ʻa e faʻahinga ʻo e tangata koloaʻiá. ʻOku nau loto ke tuku ʻe he kau ākongá ʻa ʻenau fanongonongo ʻa e ngaahi pōpoaki ko ʻení, ke hoko ha kiʻi fakafiemālie mei heʻenau ngaahi mamahí.

“Ka ka pehē ʻe Epalahame, Ngaʻata, manatu naʻa ke maʻu kātoa ʻa hoʻo ngaahi meʻa lelei ʻi hoʻo moʻui; pehē foki naʻe maʻu ʻe Lasalosi ʻa e ngaahi kovi: ka ko eni, ʻi he potu ni, ʻoku ne maʻu ʻa e fiemālie, ka ko koe ʻa e mamahi. Kaeʻumaʻa, ʻi he vahaʻa ʻomautolu mo koe ʻoku ʻi ai ha fuʻu vanu kuo maʻumaʻuluta hono fokotuʻu: koeʻuhi ke ʻilonga kinautolu ʻoku fie ʻalu atu mei heni kiate kimoutolu ke ʻoua te nau lava; ʻumaʻā ha laka mai kiate kimautolu mei hena.”

Hono ʻikai feʻungamālie mo totonu ʻa e hoko ʻo e liliu lahi ʻaupito pehē ʻi he faʻahinga hangē ko Lasalosí mo e faʻahinga hangē ko e tangata koloaʻiá! ʻOku fakahoko ʻa e liliu ko ʻeni ʻo e ngaahi tuʻungá ʻi he ʻosi ha ngaahi māhina siʻi pē mei he Penitekosi ʻo e 33 T.S., ʻi hono fetongi ʻa e fuakava motuʻa ʻo e Laó ʻaki ʻa e fuakava foʻou. Pea ʻoku hoko ʻo mātuʻaki hā mahino ʻoku fakamonūʻiaʻi ʻe he ʻOtuá ʻa e kau ākongá kae ʻikai ko e kau Fālesí mo e kau taki lotu kehé. Ko e “fuʻu vanu” ʻoku ne vaheʻi ʻa e tangata koloaʻia fakaefakatātaá mei he kau ākonga ʻa Sīsuú ʻokú ne fakatātaaʻi ʻa e fakamaau māʻoniʻoni taʻeliliu ʻa e ʻOtuá.

ʻOku toki kole ʻa e tangata koloaʻiá kia “ʻalā Epalahame” ke fekau ʻa Lasalosi “ki he ʻapi ʻo ʻeku ʻeiki: he ʻoku ai hoku fototehina ʻe toko nima.” Ko ia ʻoku vete ʻe he tangata koloaʻiá ʻo pehē ʻoku felāveʻi vāofi ange ia mo ha tamai kehe, ʻa ia ko Sētane ko e Tēvolo. ʻOku kole ʻa e tangata koloaʻiá ke hanga ʻe Lasalosi ʻo fuʻifuʻi ʻa e ngaahi pōpoaki fakaefakamaau ʻa e ʻOtuá koeʻuhi ke ʻoua ʻe haʻu ʻa hono “fototehina ʻe toko nima,” ko hono kaungā-lotú, ki he “potu fakamamahi ko eni.”

“Ka ka pehē ʻe Epalahame, ʻOku nau maʻu ʻa Mōsese mo e kau Palōfita; nau tokanga muʻa ki he ngaahi tohi ko ia.” ʻIo, ke hao ʻa e “fototehina ʻe toko nima” mei he fakamamahí, ko e meʻa pē ke nau faí ke nau tokanga ki he ngaahi tohi ʻa Mōsese mo e kau Palōfitá ʻa ia ʻoku fakahaaʻi ai ʻa Sīsū ko e Mīsaiá pea hoko ko ʻene kau ākonga. Ka ʻoku taʻeloto ki ai ʻa e tangata koloaʻiá ʻo ne pehē: “Ka ka pehē ʻe ia, Fakamolemole, ʻalā Epalahame, ka ʻo kapau ʻe ʻalu ange ha taha ʻiate kinautolu kuo pekia, kuo pau te nau fakatomala. Ka ka tali ʻe ia, Kapau ʻe ʻikai te nau tokanga kia Mōsese mo e kau Palōfita, ʻe ʻikai fakalotoʻi kinautolu neongo ʻe toetuʻu ha taha mei he pekia.” ʻE ʻikai ke ʻomai ʻe he ʻOtuá ia ha ngaahi fakaʻilonga makehe pe ko ha ngaahi mana ke fakatuiʻiʻaki ʻa e faʻahinga peheé. Ke maʻu ʻa e hōifua ʻa e ʻOtuá kuo pau ke lau ʻe he kakaí mo ngāueʻaki ʻa e Tohitapú. Luke 16:​16, 22-31; Sione 8:44.

◆ Ko e hā ʻoku pau ai ko e fakatou mate ʻa e tangata koloaʻiá mo Lasalosí ko e fakatātā pē, pea ko e hā kuo fakatātaaʻi ʻe heʻena maté?

◆ Ko e hā ʻa e ngaahi fakamamahi naʻe moʻua ai ʻa e tangata koloaʻiá, pea naʻá ne kole ke fakafiemālieʻi kinautolu ʻaki ʻa e hā?

◆ Ko e hā ʻoku fakatātaaʻi ʻe he “fuʻu vanu”?

◆ Ko hai ʻa e tamai moʻoni ʻa e tangata koloaʻiá, pea ko hai hono fototehina ʻe toko nimá?