Sīsū—Ko ʻEne Moʻuí mo ʻEne Ngāue Fakafaifekau

ʻI he Fakahā Mai ʻa e Fanautama ʻa Tangatá

ʻI HE lolotonga ʻo e kei ʻi he tokelaú ʻa Sīsuú (ʻi Samēlia pe ko Kāleli), ʻoku ʻeke kiate ia ʻe he kau Fālesí ʻo kau ki he hoko mai ʻa e Puleʻangá. ʻOku nau tui ʻe hoko mai ia mo ha ngeia mo ha kātoanga lahi, ka ʻoku pehē ʻe Sīsū: “Ko e hoko mai ʻo e puleʻanga ʻo e ʻOtua ʻe ʻikai ala lamasia: ʻumaʻā ha faʻa pehē ʻe ha kakai, ʻE, ko eni ia; pe, Ko ena: he vakai, ko e puleʻanga ʻo e ʻOtua ʻoku ʻi homou lotolotonga ni.”

Ko e ngaahi lea ʻa Sīsū ko e “ʻi homou lotolotonga ni” kuo liliu ia ʻi he taimi ʻe niʻihi ko e “ʻi loto ʻiate kimoutolu.” Ko ia kuo fakakaukau ai ʻa e niʻihi ia ko e ʻuhinga ʻa Sīsuú ko e Puleʻanga ʻo e ʻOtuá ʻoku pule ʻi he loto ʻo e kau sevāniti ʻa e ʻOtuá. Ka ʻoku hā mahino, ko e Puleʻanga ia ʻo e ʻOtuá ʻoku ʻikai ke ʻi he loto ia ʻo e kau Fālesi taʻetui ko ʻeni ʻa ia ʻoku lea ki ai ʻa Sīsuú. Ko ia ʻoku ʻi honau lotolotongá, koeʻuhi ko e Tuʻi kuo fakanofo ʻo e Puleʻanga ʻo e ʻOtuá, ko Sīsū Kalaisi, ʻoku ʻi honau lotolotongá tonu pē.

ʻOku ngalingali ʻi he ʻosi ʻa e mavahe ʻa e kau Fālesí ʻoku talanoa lahi ange ʻa Sīsū mo ʻene kau ākongá ʻo kau ki he hoko mai ʻa e Puleʻangá. ʻOkú ne fakakaukau tefito ai ki heʻene hoko mai ʻi he kahaʻú ʻi he mafai ʻo e Puleʻangá ʻi heʻene fakatokanga ʻo pehē: “Pea ʻe pehe ʻe he niʻihi kiate kimoutolu, ʻE, ko eni ia; pe, ʻE, ko ena ia: kae ʻoua te mou afe ki ai pe kumia [ʻa e kau Mīsaia loi ko ení]. He ʻoku hange ko e tapa mai ʻa e ʻuhila mei he potu ʻe taha ʻo e langi, ʻo ne huluʻia ʻo aʻu ki he potu ʻe taha ʻo e langi; ʻe pehe pe foki ʻa e Fanautama ʻa tangata ʻo ka hoko mai hono ʻaho.” Ko ia, ʻo hangē pē ko e ʻuhila ʻoku hā ʻi ha fuʻu feituʻu lahi, ʻoku fakahā ʻe Sīsū ko e fakamoʻoni ʻo ʻene ʻi ai ʻi he mafai ʻo e Puleʻangá ʻe mātuʻaki hā mahino kiate kinautolu hono kotoa ʻoku nau loto ke tokanga ki aí.

Ko ia ʻoku ʻomai ʻe Sīsū ha fakafehoanaki ʻo e ngaahi meʻa ʻi he kuonga ko ē ke fakahā ʻa e ngaahi fakakaukau ʻa e kakaí he lolotonga ʻa ʻene ʻi ai ʻi he kahaʻú. ʻOkú ne fakamatala: “Pea hangē ko ia naʻe fai ʻi he kuonga ʻo Noa, ʻe pehe foki ʻi he kuonga ʻo e Fanautama ʻa tangata . . . ʻE tatau foki mo ia naʻe fai ʻi he kuonga ʻo Lote, naʻa nau kai, naʻa nau inu, naʻa nau fakatau mai, naʻa nau fakatau atu, naʻa nau tō taʻu, naʻa nau langa fale; ka ʻi he ʻaho ko ia naʻe hu atu ai ʻa Lote mei Sotoma, ne fakaʻuha hifo ʻa e afi mo e sulifa mei langi, ʻo fakaʻauha kinautolu fulipe. ʻE tatau tofu pe mo ia ʻi he ʻaho ʻe fakapū mei ai ʻa e Fanautama ʻa tangata.”

ʻOku ʻikai ke pehē ʻe Sīsū ia naʻe fakaʻauha pē ʻa e kakai ʻo e kuonga ʻo Noá mo Loté koeʻuhi ko ʻenau tulimui ki he ngaahi ngāue anga-maheni ʻo e ʻahó ko e kai, inu, fakatau mai, fakatau atu, tō meʻakai mo e langa fale. Naʻa mo Noa mo Lote mo hona fāmilí naʻa nau fai ʻa e ngaahi meʻa ko ʻení. Ka ko e niʻihi ko ē naʻa nau fai ʻa e ngaahi ngāue fakaʻaho peheé ʻo ʻikai te nau momoʻi tokanga ki he finangalo ʻo e ʻOtuá, pea ko e ʻuhinga ia naʻe fakaʻauha ai kinautolú. Ko e ʻuhinga tatau pē, ʻe fakaʻauha ai ʻa e kakaí ʻi he fakahā mai ʻa Kalaisi he lolotonga ʻa e fuʻu fakamamahi lahi ʻi he ngaahi meʻa ʻoku tuʻu ní.

ʻI hono fakamamafaʻi ʻa e mahuʻinga ʻo e tali vave ki he fakamoʻoni ʻo ʻene ʻi ai ʻi he kahaʻú ʻi he mafai ʻo e Puleʻangá, ʻoku tānaki atu ʻe Sīsū: “Ka hoko ʻa e ʻaho ko ia, pea ka ai ha taha ʻoku ʻi he tuʻafale, kae ʻi loto fale ʻene ngaʻotoʻota, ke ʻoua te ne ʻalu hifo ke ʻave ia: pehe foki, ko ia ʻoku ne ʻi he ngoue; ke ʻoua te ne tafoki ke ʻomi ʻa e ngaahi meʻa kuo tuku ʻi ʻapi. Manatuʻi ʻa e uaifi ʻo Lote.”

ʻI he hā mai ʻa e ngaahi fakamoʻoni ʻo e ʻi ai ʻa Kalaisí, ʻe ʻikai totonu ke ʻai ʻe he kakaí ʻa ʻenau ngaahi koloa fakamatelié ke taʻofi kinautolu mei ha fai leva ha meʻa. ʻI heʻene ʻalu atu mei Sōtomá, ʻoku ngalingali naʻe sio ki mui mo fakaʻamu ʻa e uaifi ʻo Loté ki he ngaahi meʻa naʻe tuku ʻi Sōtomá, pea naʻe hoko ai ia ko ha pou māsima.

ʻI he hokohoko atu ʻene fakamatala ʻo kau ki he tuʻunga ʻe hoko he lolotonga ʻo ʻene ʻi ai ʻi he kahaʻú, ʻoku tala ʻe Sīsū ki heʻene kau ākongá: “Ko e po ko ia ʻene tokaange ha ongo tangata ʻoku na mohenga taha; ʻe ʻave ʻa e taha, kae tuku ʻa e taha. ʻEne tokaange ha ongo fafine ʻoku kau ʻi he momosi koane; ʻe ʻave ʻa e taha, kae tuku ʻa e taha.”

Ko hono ʻave ʻa e tahá ʻoku fakafehoanaki ia mo e hū ʻa Noa mo hono fāmilí ki he ʻaʻaké pea mo e ʻave ʻe he ongo ʻāngeló ʻa Lote mo hono fāmilí mei Sōtomá. ʻOku ʻuhingá ko e fakahaofi. ʻI he tafaʻaki ʻe tahá, ko hono tuku ha taha ʻoku ʻuhingá ko e fakaʻauha.

ʻI he taimi ko ʻení ʻoku ʻeke ʻe he kau ākongá: “ʻI fe, ʻEiki?”

ʻOku tali ʻe Sīsū: “Ko e potu ʻoku ʻi ai ʻa e ʻangaʻanga, ʻe fakataha ki ai foki ʻa e fanga ikale.” Ko kinautolu ʻoku “ʻave” ke nau moʻuí ʻoku nau hangē ko e fanga ʻikale ʻoku vakai mamaʻo ki he “ʻangaʻanga” koeʻuhi ke nau fakataha ki ai. Ko e ʻangaʻangá ʻoku lave ki he Kalaisi moʻoní ʻi heʻene ʻi ai taʻe hā mai ʻi he mafai ʻo e Puleʻangá pea mo e kai meʻakai fakalaumālie ʻoku tokonaki ʻe Sihová. Luke 17:​20-37; Sēnesi 19:26.

◆ Naʻe anga-fēfē ʻa e ʻi he lotolotonga ʻo e kau Fālesí ʻa e Puleʻangá?

◆ ʻI he founga fē ʻoku hangē ai ha ʻuhilá ʻa e ʻi ai ʻa Kalaisí?

◆ Ko e hā ʻe fakaʻauha ai ʻa e kakai lolotonga ʻa e ʻi ai ʻa Kalaisí?

◆ Ko e hā ʻa e ʻuhinga ʻo e pehē ke ʻave ʻa e taha, mo e tuku ʻa e taha?