Sīsū—Ko ʻEne Moʻuí mo ʻEne Ngāue Fakafaifekau

Ngaahi Lēsoni ʻi he Vete Malí mo e ʻOfa ki he Fānaú

NAʻE fononga atu ʻa Sīsū mo ʻene kau ākongá ki Selusalema ke kau ki he Lakaatu ʻo e 33 T.S. Naʻa nau kolosi atu he Vaitafe Sioataní ʻo fou ʻi he hala naʻe hū atu ʻi he vahefonua ʻo Pēleá. Naʻe ʻi Pēlea ʻa Sīsū ʻi ha ngaahi uike siʻi ki muʻa atu, pea naʻe fekau ke haʻu ki Siutea koeʻuhi ko hono kaungāmeʻa ko Lasalosí naʻe puke. Lolotonga ʻa ʻene ʻi Pēlea he taimi ko iá, naʻe lea ai ʻa Sīsū ki he kau Fālesí ʻo kau ki he vete malí, pea ko ʻeni naʻa nau toe ʻo hake ʻeni.

ʻI he lotolotonga ʻo e kau Fālesí naʻe ʻi ai ʻa e ngaahi fakakaukau kehekehe ʻo kau ki he vete malí. Naʻe pehē ʻe Mōsese ʻoku totonu ke veteʻi ha fefine koeʻuhi ko ha meʻa “fakalielia ʻi heʻene tafaʻaki.” Ko e niʻihi naʻa nau tui ʻoku ʻuhinga pē ʻeni ia ki he taʻe anga-maʻá. Ka naʻe lave ʻa e niʻihi ko e “meʻa fakalielia” ʻoku kau ki ai ʻa e ngaahi hala iiki pē. Ko ia, ʻi heʻenau feinga ke tauheleʻi ʻa Sīsuú, naʻe ʻeke ai ʻe he kau Fālesí: “ʻOku ngofua koā ke veteʻi hoto uaifi ʻi ha meʻa pe?” Naʻa nau tui pau ʻo pehē tatau ai pē pe ko e hā ʻa e lau ʻa Sīsuú ʻe hoko ha faingataʻa kiate ia mo e kau Fālesi ʻa ia ʻoku kehe ʻenau fakakaukau ki aí.

Naʻe poto ʻaupito ʻa Sīsū hono tali ʻa e fehuʻí, ʻo ʻikai te ne lave ki ha fakakaukau fakaetangata, ka ne lave ki he ʻuluaki faʻunga ʻo e nofo malí. Naʻá ne ʻeke: “Ne ʻikai te mou lau koā, Ko ia naʻa ne ngaohi ʻa e kakai ʻi he kamataʻanga naʻa ne ngaohi tangata mo fefine kinautolu; mo ne folofola, Ko e meʻa ko ia ʻe tuku ai ʻe ha tangata ʻene tamai mo ʻene faʻe, ka ne pikitai ki hono uaifi: pea ʻe hoko ʻa e toko ua ko e kakano pe taha? Ta ʻoku ʻikai te na kei ua, ka ko e kakano pe taha. ʻAua; pea ko e meʻa kuo fakahoko ʻe he ʻOtua, ke ʻoua naʻa fakamavae ʻe ha tangata.”

Naʻe fakahā ʻe Sīsū ko e muʻaki taumuʻa ʻa e ʻOtuá, ke nofo fakataha ʻa e ongo meʻa malí pea ʻikai ke vete. Naʻe tali ʻe he kau Fālesí ʻo pehē, kapau ko ia, “pea ko e ha naʻe tuʻutuʻuni ai ʻe Mosese ke ʻange ha tohi vete, ʻo tukuange?”

Naʻe tali ʻe Sīsū: “Ko e meʻa ʻi he fefeka ʻo hoʻomou anga, ko ia naʻe fakangofua ai ʻe Mosese ke mou tukuange homou ngāhi uaifi: ka naʻe ʻikai ke pehe ʻi he kamataʻanga.” ʻIo, ʻi hono fokotuʻu ʻe he ʻOtuá ʻa e tuʻunga moʻoni ki he nofo malí ʻi he ngoue ʻo ʻĪtení, naʻe ʻikai te ne fai ai ha tokonaki ki ha vete mali.

Naʻe hoko atu ʻe Sīsū ke tala ki he kau Fālesí: “Ka ai ha taha te ne veteʻi hono uaifi, ʻo ʻikai ʻi haʻane feʻauaki [faka-Kalisi, por·neiʹa], pea ne toki mali mo ha fefine kehe, ʻoku ne tono.” Naʻe fakahā ʻi heni ko e por·neiʹa, ʻa ia ko e fehokotaki fakasino taʻetaau maʻataʻatā, ko e makatuʻunga pē ia ʻe taha ʻoku hōifua ai ʻa e ʻOtuá ke fai ha vete mali.

ʻI hono fakatokangaʻi ko e nofo malí ʻoku totonu ko ha fehokotaki taʻengata pea ko e tuʻunga pē ʻeni ʻe taha ke vete aí, naʻe ueʻi ai ʻa e kau ākongá ke nau pehē: “Kapau ko hono anga ia ʻo e tangata mo hono uaifi, ta ʻoku lelei ke ʻoua ʻe mali.” ʻOku ʻikai ke toe fehuʻia ko ha toko taha ʻoku fakakaukau ki he nofo malí ʻoku totonu ke fakakaukau māfatukituki ki he tuʻu maʻu ʻa e haʻi ʻo e nofo malí!

Naʻe hoko atu ʻa Sīsū ke fakamatala ʻo kau ki he nofo taʻemalí. Naʻá ne fakamatala ko e fānau tangata ʻe niʻihi ʻoku fanauʻi ko e kau ʻiunoke, ʻoku ʻikai ke malava ʻo mali koeʻuhi he ʻoku ʻikai ke tupu honau ōkani fakafanaú. Ko e niʻihi kuo ʻai ko ha kau ʻiunoke ʻe he tangata, kuo ʻai ke lavea anga-fakamamahi honau ōkani fakafanaú. Fakaʻosí, ko ha niʻihi kuo nau lōmia ʻa e holi ke mali mo fiefia ʻi he fehokotaki fakasinó koeʻuhi kae lava ke nau kau kakato ange kinautolu ki he ngaahi meʻa ʻo fekauʻaki mo e Puleʻanga ʻo hēvaní. Naʻe fakaʻosiʻaki ʻe Sīsū: “Ko ia ʻoku ne mafai ke tali [ʻa e taʻemali], ke ne tali.”

Naʻe kamata leva ʻa e kakaí ke ʻomai kia Sīsū ʻenau fānau iikí. Kaekehe, naʻe tafuluʻi ʻe he kau ākongá ʻa e fānaú mo feinga ke ʻave kinautolu, ʻoku ʻikai ha tālaʻa ko e feinga ke maluʻi ʻa Sīsū mei hano fakahohaʻasi. Ka naʻe pehē ʻe Sīsū: “Tuku pe ʻa e kau tamaiki ke nau haʻu kiate au, pea ʻoua ʻe taʻofi kinautolu: he ʻoku maʻa e faʻahinga ko ia ʻa e puleʻanga ʻo e ʻOtua. Ko au e, ʻoku ou tala atu, Ko ia ʻe ʻikai te ne tali ʻa e puleʻanga ʻo e ʻOtua ʻo hange ko ha tamasiʻi, ʻe ʻikai ʻaupito hu ia ki ai.”

Ko ha ngaahi lēsoni lelei ē ʻoku ʻomai ʻe Sīsū! Ke maʻu ʻa e Puleʻanga ʻo e ʻOtuá, kuo pau ke tau faʻifaʻitaki ki he anga-fakatōkilalo mo akoʻingofua ʻo e fānau iikí. Ka ko e fakatātā ʻa Sīsuú ʻokú ne toe fakahāhaaʻi ʻa e mahuʻinga tautefito ki he ngaahi mātuʻá, ke vaheʻi ha taimi mo ʻenau fānaú. Naʻe fakahāhā heni ʻe Sīsū ʻa ʻene ʻofa ki he fānau iikí ʻaki ʻene fua mo tāpuakiʻi kinautolu. Mātiu 19:​1-15; Teutalōnome 24:1; Luke 16:18; Maʻake 10:​1-16; Luke 18:​15-17.

◆ Ko e hā ʻa e ngaahi fakakaukau kehekehe ʻa e kau Fālesí ʻo kau ki he vete malí, pea ko ia naʻe anga-fēfē ʻa ʻenau feinga ke tauheleʻi ʻa Sīsuú?

◆ Naʻe anga-fēfē hono tali ʻe Sīsū ʻa e feinga ʻa e kau Fālesí ke tauheleʻi iá, pea ko e hā naʻá ne fakahā ko e tuʻunga pē ia ʻe taha ki ha vete malí?

◆ Ko e hā naʻe pehē ai ʻe he kau ākonga ʻa Sīsuú ʻoku lelei ange ke ʻoua ʻe mali, pea ko e hā ʻa e fakamatala naʻe fokotuʻu ʻe Sīsuú?

◆ Ko e hā ʻoku akoʻi kiate kitautolu ʻe Sīsū ʻi heʻene feangainga mo e fānau iikí?