Vahe 96
Ko Sīsū mo ha Pule Koloaʻia Kei Talavou
ʻI HE fononga atu ʻa Sīsū ʻi he vahefonua ʻo Pēleá ʻo huʻu ki Selusalemá, naʻe lele mai ha tangata kei talavou ʻo tō tūʻulutui ʻi muʻa ʻiate ia. Ko e tangatá naʻe ui ko e pule, ʻo ʻuhinga nai naʻe ʻi ai hono tuʻunga mahuʻinga ʻi he sinakoke fakalotofonuá pe ko ha mēmipa ia ʻo e Sanetalimí. Pea naʻe toe fuʻu koloaʻia foki. “Faiako Lelei,” ko ʻene fehuʻí ia, “ko e hā te u fai, kae tō moʻoku ʻa e moʻui taʻengatá?”
“Ko e hā ʻokú ke ui ai au ko e leleí?” ko e tali ia ʻa Sīsuú. “ʻOku ʻikai ha taha ʻoku lelei, ngata pē ʻi he ʻOtuá toko taha.” ʻOku ngalingali naʻe ngāueʻaki ʻe he tangata kei talavoú ni ʻa e “leleí” ko ha hingoa fakalakanga, ko ia naʻe fakahā ai ʻe Sīsū kiate ia ke ne ʻilo ko e hingoa fakalakanga peheé ʻoku ʻa e ʻOtuá pē ia.
“Ka ʻo kapau,” naʻe hoko atu ʻa Sīsū, “ko ho lotó ke ke hū ki he moʻuí, pea ke ke tauhi ʻa e ngaahi fekaú.”
“ʻA e fē fua?” ko e fehuʻi ia ʻa e tangatá.
Naʻe tali ʻe Sīsū ʻo lave ki he nima ʻo e Fekau ʻe Hongofulú: “ʻA ʻeni, ʻE ʻikai te ke fakapō, ʻE ʻikai te ke feʻauaki, ʻE ʻikai te ke kaihaʻa, ʻE ʻikai te ke tukuaki, Fakaʻapaʻapa ki hoʻo tamaí mo hoʻo faʻeé.” Pea ʻi hono tānaki atu mo e fekau mahuʻinga ange ʻe taha, naʻe pehē ʻe Sīsū: “Te ke ʻofa ki ho kaungāʻapí ʻo hangē pē ko hoʻo ʻofa kiate koé.”
“Ko e ngaahi lao ko iá kuó u tauhi ki ai kotoa pē talu mei heʻeku kei tamasiʻí,” ko e tali mai ia ʻa e tangatá ʻi he loto-moʻoni. “Ko e hā ʻaku ʻoku kei toe ke faí?”
ʻI he fanongo ki he kole vivili mo fakamātoato ʻa e tangatá, naʻe ongoʻi ʻofa ai ʻa Sīsū kiate ia. Ka naʻe ʻiloʻi ʻe Sīsū ʻa e pipiki ʻa e tangatá ki he ngaahi koloa fakamatelié, peá ne fakahā atu ʻa e meʻa naʻe fiemaʻu kiate iá: “Ko e meʻa pē taha ʻokú ke tōmui aí: Mole pē ʻo fakatau atu ʻa e meʻa kotoa pē ʻokú ke maʻú, pea foaki hono paʻangá ki he masivá, pea ʻe ai ha koloa ʻe faʻoaki maʻau ʻi he langí, peá ke haʻu ʻo hoko ko e tokotaha muimui ʻiate au.”
ʻOku ʻikai ha veiveiua ʻa e sio atu pē ʻa Sīsū mo e ongoʻi ʻofa ʻi he malanga hake ʻa e tangatá ʻo tafoki mo e loto-mamahi lahi. Naʻe fakakuihi ia ʻe heʻene koloaʻiá mei he mahuʻinga ʻo e koloa moʻoní. “Hono ʻikai faingataʻa,” ko e tangilāulau ia ʻa Sīsuú, “ki he kakai maʻu paʻangá ke hū ki he puleʻanga ʻo e ʻOtuá!”
Naʻe moʻutāfuʻua ʻa e kau ākongá ʻi he ngaahi lea ʻa Sīsuú. Ka naʻa nau toe ofo lahi ange ʻi he hoko atu ʻe Sīsū ʻo ne fakahā ha lao fakalūkufua: “He ʻoku faingofua ange ke hū ha kāmeli ʻi ha avaʻi hui tuitui, ʻi he hū ʻa ha koloaʻia ki he puleʻanga ʻo e ʻOtuá.”
“Ko hai nai ʻe ala moʻui?” ko e fie ʻilo ia ʻa e kau ākongá.
ʻI he sio hangatonu kiate kinautolú, naʻe tali ʻe Sīsū ʻo pehe: “ʻI he vakai ʻa e tangatá ʻe ʻikai lava, ka ʻoku ʻikai pehē ki he ʻOtuá, he ʻoku malava ʻa e meʻa kotoa pē ki he ʻOtuá.”
ʻI he fakatokangaʻi kuo nau fai ha fili naʻe mātuʻaki faikehekehe ia mei he tokotaha pule kei talavoú, naʻe pehē ai ʻe Pita: “Vakai! Ko kimautolu kuo mau liʻaki ʻa e meʻa kotoa pē, ʻo mau muimui kiate koe.” Ko ia naʻá ne ʻeke: “Ko e hā ai ha meʻa te mau maʻu?”
“Ka hoko ʻa e fakatupu foʻoú,” ko e talaʻofa ia ʻa Sīsuú, “pea nofo ʻa e Fanautama ʻa tangatá ʻi hono taloni lāngilangiʻiá, pea ko kimoutolu kuo mou muimui ʻiate aú ʻe fakanofo kimoutolu foki ki ha taloni ʻe hongofulu mā ua, ʻo mou fakamaau ʻa e matakali ʻe hongofulu mā ua ʻo ʻIsilelí.” ʻIo, naʻe fakahā ʻe Sīsū ʻe hoko ʻa e fakatupu foʻou ʻo e ngaahi tuʻunga ʻi he māmaní pea ʻe hoko ʻa e ngaahi meʻa aí ʻo hangē pē ko ia naʻe ʻi he ngoue ko ʻĪtení. Pea ko Pita mo e kau ākonga kehé te nau maʻu ʻa e pale ko e pule fakataha mai mo Kalaisi ki he Palataisi ko ʻeni ʻi māmani lahí. Ko e moʻoni, ko ha pale maʻongoʻonga pehē ʻoku tuha mo ha faʻahinga feilaulau!
Kae kehe, naʻa mo e taimí ni ʻoku ʻi ai ʻa e ngaahi pale, ʻo hangē ko ia naʻe fakamamafaʻi ʻe Sīsuú: “ʻOku ʻikai ha taha kuó ne liʻaki ha fale, pe ha ngaahi tokoua, pe ha ngaahi tuofāfine, pe ha faʻē, pe ha tamai, pe ha fānau, pe ha ngaahi tokanga ngoue, koeʻuhiā ko au, pea koeʻuhi ko e kōsipelí, te ne taʻemaʻú ni, ʻi he nofo ko ʻení, ʻo lōteau, ha ngaahi fale, mo ha ngaahi tokoua, mo ha ngaahi tuofāfine, mo ha ngaahi faʻē, mo ha fānau, mo ha ngaahi tokanga ngoue, ʻo ō pē mo e ngaahi fakatanga, pea ʻi he maama ka haʻú ko e moʻui taʻengata.”
Hangē ko ia naʻe talaʻofa mai ʻe Sīsuú, ʻi ha ʻalu ʻene kau ākongá ki ha feituʻu pē ʻi he māmaní, te nau fiefia ʻi ha vahaʻangatae mo e kaungā-Kalisitiane ʻa ia ʻoku ofi ange ia mo mahuʻinga ange ʻi he vahaʻangatae mo e ngaahi mēmipa ʻo hono fāmili totonú. ʻOku hā mahino naʻe ʻikai ke maʻu ʻe he pule koloaʻia kei talavoú ʻa e pale ko ʻení pea pehē ki he moʻui taʻengata foki ʻi he Puleʻanga fakahēvani ʻo e ʻOtuá.
Ki mui maí, naʻe tānaki atu ʻe Sīsū: “Ka ko e tokolahi ʻoku muʻomuʻá te nau muimui, pea ko e tokolahi ʻoku muimuí te nau muʻomuʻa.” Ko e hā ʻa ʻene ʻuhingá?
Naʻá ne ʻuhingá ko e kakai tokolahi naʻa nau “muʻomuʻa” ʻi he faingamālie ki he ngaahi monūʻia fakalotú, ʻo hangē ko e pule koloaʻia kei talavoú, ʻe ʻikai ke hū ki he Puleʻangá. Te nau “muimui.” Ka ko e tokolahi, kau ai mo e kau ākonga anga-fakatōkilalo ʻa Sīsuú, ʻa ia naʻe sio lalo ki ai ʻa e kau Fālesi fiemāʻoniʻoní ʻo pehē ko e “muimui”—ko e kakai ʻo e kelekelé, pe ‛am ha·’aʹrets—te nau hoko ʻo “muʻomuʻa.” Ko ʻenau hoko ʻo “muʻomuʻá” ʻoku ʻuhingá te nau maʻu ʻa e monūʻia ke hoko ko e kaungāpule mo Kalaisi ʻi he Puleʻangá. Maake 10:17-31; Mātiu 19:16-30; Luke 18:18-30.
▪ ʻOku hā mahino, ko e faʻahinga pule fēfē ʻa e tangata koloaʻia kei talavoú?
▪ Ko e hā naʻe fakafisi ai ʻa Sīsū ke ui ia ko e leleí?
▪ ʻOku anga-fēfē ʻa e fakatātaaʻi ʻe he meʻa naʻe hokosia ʻe he pule kei talavoú ʻa e fakatuʻutāmaki ʻo e koloaʻiá?
▪ Ko e hā ʻa e ngaahi pale naʻe talaʻofa ʻe Sīsū ki hono kau muimuí?
▪ ʻOku anga-fēfē ʻa e hoko ʻo muimui ʻa e muʻomuʻá, pea muʻomuʻa ʻa e muimuí?