Sīsū​–Ko ʻEne Moʻuí mo ʻEne Ngāue Fakafaifekau

Naʻe Fakafekiki ʻa e Kau Ākongá ʻi he Ofi ʻa e Pekia ʻa Sīsuú

NAʻE fakaofi atu ʻa Sīsū mo ʻene kau ākongá ki he Vaitafe Sioataní, ʻa ia naʻa nau kolosi atu ai mei he vahefonua ʻo Pēleá ki Siutea. Naʻe tokolahi mo e niʻihi kehe naʻa nau fononga mo kinautolu ki he Lakaatu ʻo e taʻu 33 T.S., ʻa ia naʻe toe pē nai ha uike ʻe taha pea hoko.

Naʻe fononga muʻomuʻa ʻa Sīsū ʻi heʻene kau ākongá, pea naʻa nau ofo ʻi heʻene loto-mālohi mo fakapapaú. Manatuʻi, ʻi he ngaahi uike siʻi pē ki muʻa atu ʻi he mate ko ia ʻa Lasalosí pea teu ʻalu atu ʻa Sīsū mei Pēlea ki Siuteá, naʻe fakalotolahiʻi ʻe Tōmasi ʻa e niʻihi kehe: “Tau ō foki, ke tau mate mo ia.” Manatuʻi foki ʻi he ʻosi hono fokotuʻu ʻe Sīsū ʻa Lasalosi mei he maté, naʻe faʻufaʻu ʻe he Sanetalimí ʻa e palani ke tāmateʻi ia. Tā neʻineʻi ke ʻi ai ʻa e manavahē ʻi heʻene kau ākongá ʻi heʻenau toe hū atu ko eni ki Siuteá.

Ke teuteuʻi kinautolu ki he ngaahi meʻa ne teu ke hokó, naʻe ʻalu ʻa Sīsū mo e toko 12 pē peá ne tala ange kiate kinautolu: “Ko eni, ʻoku tau ʻalu hake ki Selusalema; pea ʻe tuku atu ʻa e Fanautama ʻa tangata ki he houʻeiki taulaʻeiki mo e kau sikalaipe; pea te nau fakamāumatea ia; pea te nau tuku atu ia ki he kakai Senitaile: ʻa ia te nau taukaea ia, mo ʻanuhia, mo haha ia, mo tāmateʻi ia; pea hili ʻa e ʻaho ʻe tolu te ne toetuʻu.”

Naʻe tuʻo tolu ʻaki ʻeni ʻi he ngaahi māhina siʻi ʻa e fakahā ʻe Sīsū ki heʻene kau ākongá ʻo kau ki heʻene pekiá mo ʻene toetuʻú. Pea neongo naʻa nau fanongo kiate ia, ka naʻe ʻikai te nau malava ʻo maʻu ʻa e mahinó. Mahalo pē koeʻuhi ko ʻenau tui ki hono fakafoki mai ki he māmaní ʻa e puleʻanga ʻo ʻIsilelí, pea naʻa nau fakatuʻotuʻa atu ki he lāngilangi mo e ngeia ʻi ha puleʻanga ʻi he māmaní fakataha mo Kalaisi.

ʻI he lotolotonga ʻo e kau fononga ko ia ki he Lakaatú naʻe kau ai ʻa Sālome, ko e faʻē ʻa e ongo ʻapositolo ko Sēmisi mo Sione. Naʻe ui ʻe Sīsū ʻa e ongo tangatá ni ko e “Ongo foha ʻo Mana,” ʻoku ʻikai ha veiveiua koeʻuhi ko ʻena anga-kakahá. Naʻe tuku tauhi ʻe he toko ua ko ʻení ʻa e loto-feinga ke māʻolunga ʻi he Puleʻanga ʻo Kalaisí, pea naʻe hā ʻa ʻena holí ʻo ʻilo ʻe heʻena faʻeé. Ko ia naʻe haʻu leva ʻa e fefiné ni ʻo fakaofiofi mai kia Sīsū koeʻuhi ko ʻene ongo tamá, ʻo ne punou atu kiate ia, ʻo fai ʻene kole.

Naʻe ʻeke ange ʻe Sīsū: “Ko e ha ʻa e meʻa ʻoku ke holi ki ai?”

“Ke ke folofola mai ke nofo ʻa e ongo siana ni, ko ʻeku ongo tama, ko e taha ʻi ho toʻomataʻu, mo e taha ʻi ho toʻohema, ʻi haʻo ʻafio ho puleʻanga.”

ʻI hono ʻiloʻi ʻa e tupuʻanga ʻo e kolé ni naʻe tala ange ʻe Sīsū kia Sēmisi mo Sione: “ʻOku ʻikai te mo ʻilo ʻa e meʻa ʻoku mo kole ki ai. He te mo lava koā ke inu ʻi he ipu ʻoku ou teu inu ai?”

Naʻá na tali: “Te ma lava pe.” Neongo ne toki ʻosi hono tala ange ʻe Sīsū kiate kinautolu te ne fehangahangai mo e fakatanga fakalilifu pea ʻe fakaiku ki hono tāmateʻi, naʻe ʻikai pē ke na maʻu ʻa e mahino ko e meʻa ia naʻe ʻuhinga ki ai ʻa Sīsū ʻi heʻene lea “ko e ipu” ʻoku teu ke ne inú.

Ka neongo ia, naʻe tala ange ʻe Sīsū kiate kinaua: “Ko e meʻa ki heʻeku ipu, te mo inu ai: ka ko e meʻa ki he nofo ki hoku toʻomataʻu mo hoku toʻohema, ʻoku ʻikai aʻaku ke ʻatu ia, ka kiate kinautolu pe kuo teuteu ia ki ai ʻe heʻeku Tamai.”

Faifai atu pē pea ʻilo ʻe he toenga ʻo e kau ʻapositolo ʻe hongofulú ʻa e meʻa naʻe kole ki ai ʻe Sēmisi mo Sioné pea naʻa nau ʻita ai. Mahalo pē ko Sēmisi mo Sioné naʻá na ʻi ha tuʻunga tuʻu-ki-muʻa ʻi he fakafekiki ki muʻa ʻi he lotolotonga ʻo e kau ʻapositoló pē ko hai ʻoku lahi tahá. Ka ko e kole ko ʻeni naʻá na lolotonga faí naʻe fakahā ai naʻe teʻeki ai ke na ngāueʻaki ʻa e akonaki ʻa Sīsū naʻe fai ʻo kau ki he meʻá ni. Ko e meʻa fakamamahí, ko ʻena holi ki he tuʻunga māʻolungá naʻe kei mālohi pē.

Ko ia ke fakaleleiʻi ʻa e meʻa ko ʻeni naʻe toki hokó mo e loto kovi kuó ne fakatupungá, naʻe ui ai ʻe Sīsū ʻo fakatahataha ʻa e toko 12. ʻI heʻene akonakiʻi anga-ʻofa kinautolu naʻá ne pehē: “ʻOku mou ʻilo pe, ko kinautolu ʻoku pule ki he Senitaile ʻoku nau fakafieʻeiki ki he kakai, pea ko honau kau maʻolunga ʻoku nau fakamoʻulaloaʻi ʻa e kakai. Ka ʻe ʻikai pehe ʻiate kimoutolu: ka ko ia ʻoku ne holi ke hoko ko e lahi ʻiate kimoutolu te ne nofo ko homou sevaniti; pea ko ia ʻoku ne holi ke tuʻukimuʻa ʻiate kimoutolu te ne nofo ko hoʻomou tamaioʻeiki.”

Naʻe fokotuʻu ʻe Sīsū ʻa e faʻifaʻitakiʻanga naʻe totonu ke nau muimui ki aí, ʻo hangē ko ia naʻá ne hanga ʻo fakamatalá: “ʻO hange foki ko e Fanautama ʻa tangata naʻe ʻikai te ne haʻu ke maʻu sevaniti, ka ke sevaniti pe ʻe ia, pea ke tuku ʻene moʻui ke huhuʻiʻaki ha tokolahi, heʻene fetongi kinautolu.” Naʻe ʻikai ke ngata pē ʻa e fai tauhi ʻa Sīsū koeʻuhi ko e niʻihi kehé ka te ne toe hoko atu foki ʻa hono fai ia ʻo aʻu ki he tuʻunga ke mate maʻá e faʻahinga ʻo e tangatá! Naʻe fiemaʻu ki he kau ākongá ʻa e anga faka-Kalaisi tatau, ko e holi ke fai ʻa e tauhí kae ʻikai ke tauhia pea toe hoko ko ha tokotaha māʻulalo kae ʻikai ke hoko ki ha tuʻunga ʻoku māʻolunga. Mātiu 20:​17-28; Maʻake 3:17; 9:​33-37; 10:​32-45; Luke 18:​31-34; Sione 11:16.

◆ Ko e hā naʻe manavahē ai ʻa e kau ākongá?

◆ Naʻe anga-fēfē ʻa hono teuteu ʻe Sīsū ʻene kau ākongá ki he ngaahi meʻa ko ia ne teu ke hokó?

◆ Ko e hā ʻa e kole naʻe fai kia Sīsuú, pea naʻe uesia fēfē ai ʻa e kau ʻapositolo kehé?

◆ Naʻe anga-fēfē ʻa e fehangahangai ʻa Sīsū mo e palopalema naʻe ʻi he lotolotonga ʻo ʻene kau ʻapositoló?