Sīsū–Ko ʻEne Moʻuí mo ʻEne Ngāue Fakafaifekau

Naʻe Faiako ʻa Sīsū ʻi Sielikō

NAʻE vave pea aʻu atu ʻa Sīsū mo e kaungā-fononga ʻa ia naʻa nau fononga fakatahá ki Sielikō, ko e koló ni ko hono mamaʻó ko e fononga ʻi he ʻaho ʻe taha mei Selusalema. ʻOku ngalingali ko Sielikoó ko e kolo ʻe ua, ko e kolo motuʻa ʻo e kakai Siú naʻe kilomita ʻe taha mo e konga nai mei he kolo foʻou ʻo e kau Lomá. ʻI he fononga atu ʻa e kakaí ʻo hū atu ki tuʻa mei he kolo motuʻá ʻo fakaofiofi atu ki he kolo foʻoú, naʻe fanongo mai ʻa e ongo tangata kui moʻui kolekole ʻe toko ua ki he longoaʻá. Ko e taha ʻo kinaua ko hono hingoá ko Patimiosi.

ʻI hono ʻiloʻi ko Sīsū ia naʻe fononga maí, naʻe kamata leva ke kaila ʻa Patimiosi mo hono kaungā-kuí: “ʻAloʻofa mai, Hako ʻo Tevita e!” Pea ʻi he fekauʻi kinaua ʻe he kakaí ke na fakalongolongó, naʻe toe lahi ange ʻena kailá mo toe leʻo lahi ange hona leʻó: “ʻEiki, ʻaloʻofa mai! Hako ʻo Tevita e!”

Naʻe tuʻu ʻa Sīsū ʻi heʻene fanongo ki he kailá. Naʻá ne tala ange kiate kinautolu naʻa nau fonongá ke ui mai ʻa e faʻahinga ʻoku kaila maí. Ko ia naʻa nau ʻalu ki he ongo tangata kui moʻui kolekolé ʻo pehē ki ha taha ʻo kinaua: “Fiemālie pē, tuʻu; ʻoku ne ui koe.” ʻI he fiefia taʻealataʻofi naʻe liʻaki ʻe he tangata kuí hono pulupulú, ʻo ne puna ki ʻolunga ʻo ne ʻalu atu kia Sīsū.

Naʻe ʻeke ange ʻe Sīsū ki he ongo tangatá: “Ko e ha ʻa e meʻa ʻoku mo holi ke u fai maʻamoua?”

“ʻEiki, ke fakaʻā homa pokoʻi mata ni,” ko ʻena kolé ia.

ʻI he ueʻi ʻa Sīsū ʻi heʻene ʻofá, naʻá ne ala atu ki hona matá. Fakatatau ki he fakamatala ʻa Maʻaké, naʻe lea ange ʻa Sīsū ki he tokotaha ʻo kinaua: “ʻAlu ā; kuo fakamoʻui koe ʻe hoʻo tui.” Fakafokifā naʻe ʻā ʻa e mata ʻo e ongo kuí, pea ʻoku ʻikai ha veiveiua naʻe kamata leva ke na fakalāngilangiʻi ʻa e ʻOtuá. ʻI he sio ʻa e kakaí kātoa ki he meʻa naʻe hokó, naʻa nau toe fakamālō ki he ʻOtuá. Naʻe ʻikai ke toe tatali, ka naʻe kamata leva ke muimui ʻa Patimiosi mo hono kaungā-kuí kia Sīsū.

ʻI he fononga atu ʻa Sīsū ʻo fou atu ʻi Sielikoó, naʻe fuʻu tokolahi ʻa e kakaí. Ko e tokotaha kotoa pē naʻa nau fiemaʻu ke sio ki he tokotaha naʻá ne fakamoʻui ʻa e ongo tangata kuí. Ko ia naʻe feʻohofaki mai ʻa e kakai kia Sīsū mei he tafaʻaki kotoa pē, pea ko e meʻa leva naʻe hokó, naʻe ʻi ai ʻa e faʻahinga naʻe ʻikai malava ke kiʻi sio atu kiate ia. ʻI he lotolotonga ʻo e kakai ko ení naʻe ʻi ai ʻa Sākeasi, ko e taki ia ʻo e kau tānaki tukuhau ʻi he feituʻu ko eni ʻo Sielikoó. Naʻá ne fuʻu pukupuku ke sio pe ko e hā ʻa e meʻa ʻoku hokó.

Ko ia naʻe lele ʻa Sākeasi ki muʻa ʻo kaka he fuʻu ʻakau ko e sukamino ʻi he feituʻu ʻe fou atu ai ʻa e fononga ʻa Sīsuú. Pea mei he tuʻunga ko ʻení, naʻe malava ke ne sio lelei ki he meʻa kotoa pē. Pea ʻi he fakaofiofi atu ʻa e kakai naʻe fonongá, naʻe ui hake ʻa Sīsū ki he fuʻu ʻakaú: “ʻE Sakeasi, fai vave, pea ʻalu hifo; he kuo pau ke u ʻapitanga ʻi ho fale he ʻaho ni.”

Naʻe hifo leva ʻa Sākeasi ʻi he fiefia ʻo ne fakavave ki hono ʻapí ke fakamaau ʻa e ngaahi meʻa ki he tokotaha ʻilonga ko eni ʻe ʻaʻahi angé. Ka ʻi he mamata ʻa e kakai ki he meʻa naʻe hokó, naʻe kamata leva ʻenau muhu. Naʻa nau fakakaukau ʻoku taʻe totonu kia Sīsū ke ʻalu ʻo hoko ko ha taha fakaafe ʻa ha tangata pehē. He ko Sākeasí naʻe hoko ʻo maʻu koloa ʻi heʻene maʻu fakamālohi ʻa e paʻanga ʻi heʻene ngāue ko e tānaki tukuhaú.

Naʻe muimui atu ʻa e kakai tokolahi, pea ʻi he hū atu ʻa Sīsū ki he ʻapi ʻo Sākeasí, naʻa nau lāunga: “ʻA, kuo ne ʻalu ke nofo mo ha fuʻu angahala.” Ka naʻe sio ʻa Sīsū ko Sākeasí ʻe lava pē ke ne fakatomala. Pea naʻe ʻikai ke siva ʻa e ʻamanaki ʻa Sīsū, he naʻe tuʻu hake ʻa Sākeasi peá ne fakahā: “Ko eni te u ʻatu ni hono vaeua ʻo ʻeku ngaʻotoʻota ki he masiva; pea kapau kuo u maʻu ha meʻa ʻi he lohiakiʻi ha taha, te u toe totongi ni, ʻo liunga fa.”

Naʻe fakamoʻoniʻi ʻe Sākeasi ʻoku moʻoni ʻene fakatomalá ʻi heʻene foaki atu ʻa e vaeua ʻo ʻene ngaʻotoʻotá ki he masivá pea ko e toe ko ia ʻo ʻene ngaʻotoʻotá ke totongi fakafoki kiate kinautolu naʻá ne kākaaʻí. He ʻoku ngalingali naʻá ne malava ke fikaʻi mei he lekooti ʻo ʻene tānaki tukuhaú pe ko e hā hono lahi naʻá ne moʻuaʻaki ki he kakai ko iá. Ko ia naʻá ne fuakava te ne totongi ʻo liunga fā, ʻi hono fehoanaki mo e lao ʻa e ʻOtuá ʻa ia naʻe pehē: ‘Kapau ʻe kaihaʻasi ʻe ha taha ha sipi, te ne ʻange ha sipi ʻe fa ke fetongi ʻa e sipi.’

Naʻe fiefia ʻa Sīsū ʻi he founga ko eni naʻe talaʻofa ki ai ʻe Sākeasi te ne tuku ange ʻa e ngaahi meʻa ko ia kuó ne maʻú, he naʻá Ne pehē: “Ko e ʻaho ni kuo hoko mai ʻa e fakamoʻui ki he fale ni, kaeʻumaʻā ko e hako foki ia ʻo ʻEpalahame. He naʻe haʻu ʻa e Fanautama ʻa tangata ke kumi mo fakamoʻui ʻa ia kuo mole.”

Ki muʻa siʻi mei ai naʻe fakatātaaʻi ʻe Sīsū ʻa e tuʻunga ʻo e ‘mole’ ʻaki ʻene talanoa ʻo kau ki he foha maumau koloá. ʻI he taimí ni kuo tau maʻu ʻa e faʻifaʻitakiʻanga moʻoni ʻoku hoko tonu ʻi he moʻuí ʻo fekauʻaki mo ha tokotaha mole kuo maʻu mai. Neongo naʻe fakaanga mo lāunga ʻa e kau taki lotú mo kinautolu naʻe muimui ʻiate kinautolú ʻo kau ki he tokanga ʻa Sīsū ki he faʻahinga hangē ko Sākeasí, naʻe hokohoko atu ʻe Sīsū ʻa ʻene kumi mo fakafoki mai ʻa e fānau ko eni ʻa ʻĒpalahame kuo molé. Mātiu 20:​29-34; Maʻake 10:​46-52; Luke 18:35–19:10; ʻEkisoto 22:1.

◆ Ko fē ʻa e feituʻu naʻe fetaulaki ai ʻa Sīsū mo e ongo tangata kui moʻui kolekolé, pea ko e hā ʻa e meʻa naʻa ne fai maʻanauá?

◆ Ko hai ʻa Sākeasi, pea ko e hā ʻa e ʻuhinga naʻá ne kaka ai he fuʻu ʻakaú?

◆ Naʻe fēfē hono fakamoʻoniʻi ʻe Sākeasi ʻene fakatomalá?

◆ Ko e hā ʻa e lēsoni te tau malava ʻo ako mei he founga naʻe fai ʻe Sīsū kia Sākeasí?