Sīsū​–Ko ʻEne Moʻuí mo ʻEne Ngāue Fakafaifekau

Ko e Talanoa Fakatātā ʻo e Ngaahi Miná

ʻOKU mahalo naʻe kei ʻi he ʻapi ʻo Sākeasí ʻa Sīsū, ʻa ia naʻá ne nofo ai ʻi heʻene fononga ki Selusalemá. Naʻe tui ʻene kau ākongá ʻo pehē ʻi heʻenau aʻu ki Selusalemá te ne hanga ʻo fakahā ko e Mīsaiá ia pea te ne fokotuʻu ai hono Puleʻangá. Naʻe fai ai ʻe Sīsū ʻa e talanoa fakatātā ke fakatonutonu ʻa e fakakaukau ko ʻení mo fakahā ko e Puleʻangá naʻe kei tuai ʻene hoko maí.

Naʻá ne pehē: “Naʻe ai ha tangata, ko e foʻi ʻeiki, naʻa ne ʻalu ki ha fonua mamaʻo ke maʻu moʻona ha puleʻanga, pea toki foki mai.” Ko Sīsū ʻa e “tangata ko e ʻeiki,” pea ko e “fonua mamaʻo” ko hēvani ia. ʻI heʻene aʻu ki aí, naʻe foaki kiate ia ʻe heʻene Tamaí ʻa e mafai ko e tuʻi.

Kaekehe, ki muʻa ke ʻalu ʻa e tangata ko e ʻeikí naʻá ne ui ʻene kau tamaioʻeiki ʻe toko hongofulu ʻo ne tuku kiate kinautolu taki taha ha mina siliva ʻo ne pehē kiate kinautolu: “Fai fakatau ʻaki ia lolotonga ʻeku mamaʻo.” ʻI he ʻuluaki fakahoko ʻo e talanoa fakatātā ko ení ko e kau tamaioʻeiki ʻe toko hongofulú naʻa nau fakatātaaʻi ʻa e ʻuluaki kau ākonga ʻa Sīsuú. ʻI hono tuʻunga fakahoko lahi angé, ʻoku nau tuʻu fakaefakatātā kiate kinautolu kotoa ʻoku nau maʻu ʻa e ʻamanaki ke hoko ko e kau ʻea fakataha mo ia ki he Puleʻanga fakahēvaní.

Ko e ngaahi mina silivá ko e ngaahi konga paʻanga mahuʻinga, ko e mina ʻe taha ʻoku fakafuofua hono mahuʻingá ki he vāhenga ʻo e māhina ʻe tolu ʻo e ngāue ki he ngoué. Ka ko e hā ʻa e meʻa ʻoku fakatātā ʻe he ngaahi miná? Pea ko e hā ʻa e faʻahinga pisinisi ke fai ʻaki ʻe he kau tamaioʻeikí?

ʻOku fakatātaaʻi ʻe he ngaahi miná ʻa e ngaahi meʻa mahuʻinga naʻe malava ke ngāueʻaki ʻe he kau ākonga kuo pani ʻe he laumālié ke ʻai ke tokolahi ange ʻa e kau ʻea ki he Puleʻanga fakahēvaní kaeʻoua kuo hoko mai ʻa Sīsū ko e Tuʻi ʻi he Puleʻanga kuo talaʻofá. ʻI he hili ʻene toetuʻú peá ne hā ki heʻene kau ākongá, naʻá ne ʻoange kiate kinautolu ʻa e ngaahi mina fakaefakatātā ko ʻeni ke nau ngaohi ha toe kau ākonga ke tānaki atu ki he kalasi ko ia ʻo e Puleʻanga fakahēvaní.

Naʻe hoko atu ʻe Sīsū: “Ka ko e kakai ʻo hono fonua naʻa nau fehiʻa kiate ia [ʻa e tangata ko e ʻeiki], ʻo nau fekau atu ha tuʻunga fakafofonga ke fakataleʻi ia, pea ke fakahā, ʻOku ʻikai te mau loto ke ke fakanofo ʻa e siana ni ke tuʻi kiate kimautolu.” Ko e kakai ʻo e fonuá ko e kakai ʻIsilelí pe ko e kakai Siú, ʻo ʻikai ke kau ai ʻene kau ākongá. ʻI he hili ʻa e mavahe ʻa Sīsū ki hēvaní, naʻe ʻai ke ʻiloa ʻe he kau Siu ko ení ʻaki ʻenau fakatangaʻi ʻene kau ākongá naʻe ʻikai te nau fiemaʻu ia ko honau tuʻi. ʻI he founga ko ení naʻa nau fai ʻo hangē ko e kakai ʻo e fonua naʻa nau fekau atu ʻa e kau fakafofongá.

Naʻe anga-fēfē hono ngāueʻaki ʻe he kau tamaioʻeiki ʻe toko hongofulú ʻenau ngaahi miná? Naʻe fakamatalaʻi ʻe Sīsū: “Pea faifai pea ne foki mai, kuo oʻona ʻa e puleʻanga; pea ne fekau ke ui mai ʻa e tuʻunga tamaioʻeiki ko ia, ʻa ia naʻa ne tuku ki ai ʻa e paʻanga, koeʻuhi ke ne meaʻi pe kuo fēfē ʻenau fakatau. Pea tuʻu mai ʻa e ʻuluaki, ʻo ne pehē, ʻEiki ko hoʻo mina kuo ne maʻu mai mo ha mina ʻe hongofulu. Pea meʻa mai ia, ʻOiseuke! mālō, siʻi tamaioʻeiki lelei! pea ko e meʻa ʻi hoʻo lototō ʻi ha kiʻi momoʻi meʻa pehē, ke ke nofo ko e pule ʻo ha kolo ʻe hongofulu. Pea haʻu mo hono ua, ʻo ne pehē, ʻEiki, ko hoʻo mina kuo ne fakatupu ha mina ʻe nima. Pea ki he toko taha ko ia foki naʻa ne meʻa mai, Mo koe, foki, ke ke hoko ko e pule ʻo e ngaahi kolo ʻe nima.”

Ko e tamaioʻeiki mo e ngaahi mina ʻe hongofulú ʻokú ne fakatātaaʻi ʻa e kalasi pe ko e falukunga kakai ʻo e kau ākonga mei he Penitekosi ʻo e 33 T.S. ʻo aʻu mai ki he ngaahi ʻahó ni ʻa ia naʻe fakakau ki ai ʻa e kau ʻapositoló. Ko kinautolu naʻa nau maʻu ʻa e ngaahi mina ʻe nimá ʻoku nau toe fakatātaaʻi ha falukunga kakai he lolotonga ʻo e vahaʻa taimi tatau, ʻa e faʻahinga kuo nau fakalahi ʻa e ngaahi meʻa mahuʻinga ʻa e tuʻí ʻi he māmaní ʻo fakatatau ki honau ngaahi faingamālié mo ʻenau malavá. Ko e ongo kulupu ko ení ʻoku nau faivelenga ʻi he malangaʻi ʻa e ongoongo leleí, pea ko hono olá ʻoku tokolahi ʻa e kau loto-totonu kuo hoko ko e kau Kalisitiane. Ko e kau tamaioʻeiki ʻe toko hiva naʻa nau lavameʻa ʻi he ngāué pea naʻe fakalahi ʻa e ngaahi meʻa naʻa nau maʻú.

Naʻe hoko atu ʻe Sīsū: “Pea toki haʻu ʻa e taha naʻe kehe, ʻo ne pehē ʻEiki, ko ena hoʻo mina, ʻa ia kuo u moʻu tauhia, kuo kofu ʻi ha holoholo: he ne u manavahē kiate koe, koeʻuhi ko e tangata fakataʻehuohuesia koe: he ko hoʻo anga ke ʻeke ʻa e meʻa naʻe ʻikai te ke ʻange, pea ke utu ʻa e meʻa naʻe ʻikai te ke tō. Pea folofola mai ia, ʻA e tamaioʻeiki pauʻu! te u fakamāu koe mei hoʻo lea aʻau. Naʻa ke ʻilo koā ko e tangata faingataʻa au, ʻoku ou ʻeke ʻa e meʻa naʻe ʻikai te u ʻange, mo utu ʻa e meʻa naʻe ʻikai te u tō, ʻo? pea ko e ha ai naʻe ʻikai te ke tuku ʻeku paʻanga ki he pangike, pehe kuo u maʻu ai ia mo hono fua foki ʻi heʻeku haʻu ni? Pea meʻa ia kiate kinautolu naʻe haʻofia ia, Mou toʻo ʻa e mina meiate ia, ʻo tuku kiate ia ʻoku maʻu ʻa e hongofulu.”

Ko e mole ʻa e mina fakaefakatātaá ko hono ʻuhingá ko e mole ʻa e tuʻunga ʻi he Puleʻanga fakahēvaní mei he tamaioʻeiki pauʻú. ʻIo, naʻe mole meiate ia hono faingamālie ke pule ki he ngaahi kolo ʻe hongofulú pe ko e ngaahi kolo ʻe nimá. Toe fakatokangaʻi foki, naʻe ʻikai ke tala ʻoku anga-fulikivanu ʻa e tamaioʻeikí ʻi ha faʻahinga kovi naʻá ne fai, ka koeʻuhi ko e ʻikai te ne ngāue ke tupu ʻa e koloa ʻo e puleʻanga ʻo hono ʻeikí.

ʻI hono ʻoatu ʻa e mina ʻa e tamaioʻeiki pauʻú ki he ʻuluaki tamaioʻeikí, naʻe fai ʻa e taʻe loto ki ai: “ʻEiki, ka ʻoku hongofulu ʻene mina aʻana.” Ka naʻe tali atu ʻe Sīsū: “Tala atu, ʻIlonga ha taha ʻoku maʻu ha meʻa ʻe ʻange ki ai mo ha meʻa; ka ko ia ʻoku ʻikai ke maʻu, naʻa mo e meʻa ʻoku ne maʻu ʻe toʻo meiate ia. Ka ko hoku ngaahi fili ko ia naʻe ʻikai loto ke u tuʻi kiate kinautolu, taki mai ki heni, pea tamateʻi ʻi hoku ʻao.” Luke 19:​11-27; Mātiu 28:​19, 20.

◆ Ko e hā naʻá ne langaʻi ʻa Sīsū ke fai ʻa e talanoa fakatātā ʻo e ngaahi miná?

◆ Ko hai ʻa e tangata ko e ʻeikí, pea ko e hā ʻa e fonua mamaʻo naʻá ne fononga ki aí?

◆ Ko hai ʻa e kakai ʻo e fonuá, pea naʻe fēfē ʻenau fakahā ʻenau fehiʻá?

◆ Ko hai ʻa e kau tamaioʻeikí, pea ko e hā ʻa e meʻa ʻoku fakatātaaʻi ʻe he ngaahi miná?

◆ Ko e hā naʻe ui ai ʻa e tamaioʻeiki ʻe taha ko e pauʻú, pea ko e hā ʻa e ʻuhinga ʻo e mole ʻo ʻene miná?