Naʻá Ne Maluʻi, Naʻá Ne Tokonaki, Naʻá Ne Kītaki

NAʻE fakaheka hake ʻe Siosifa ha toe uta ʻe taha ki he tuʻa ʻo e ʻasí. Sioloto atu kiate ia ʻokú ne sio takai holo ki he kolo fakapoʻuli ko Pētelihemá peá ne kiʻi tātaaʻi ʻa e tapaʻi-kete ʻo e kiʻi monumanu ngāue kaumālohi ko ení. ʻOku pau pē naʻá ne fakakaukau ki he fuʻu fononga lōloa ʻoku hanga mei muʻá. ʻIsipite! Ko ha kakai muli, ko ha lea muli, ngaahi tōʻonga muli—ʻe anga-fēfē ʻa e fengaʻunuʻaki hono kiʻi fāmilí ki ha fuʻu liliu lahi?

Naʻe ʻikai faingofua ke tala ʻa e ongoongo kovi ko ení ki hono uaifi ʻofaʻangá, ʻa Mele, ka naʻe teuteu ki ai ʻa Siosifa peá ne fai ia. Naʻá ne tala ange kia Mele ʻa e misi ʻa ia naʻe fakahoko ange ai ʻe ha ʻāngelo ʻa e fekau ko ení mei he ʻOtuá: Ko e tuʻí, ʻa Hēlota, ʻokú ne loto ke tāmateʻi ʻa hona kiʻi fohá! Naʻe pau ke na hiki leva ʻo ʻikai toe tatali. (Mātiu 2:13, 14) Naʻe hohaʻa lahi ʻa Mele. ʻE lava fēfē ke fiemaʻu ʻe ha taha ke tāmateʻi ʻene kiʻi tama tonuhia, mo ʻikai te ne fai ha koví? Naʻe ʻikai lava ke mahinoʻi ia ʻe Mele pe ko Siosifa. Ka naʻá na falala kia Sihova, ko ia naʻá na teuteu ai kinaua.

ʻI he taʻeʻilo ki he meʻa kuo fakaeʻá, naʻe mohe ʻa Pētelihema lolotonga ia ʻa e moulu atu ʻa Siosifa, Mele, mo Sīsū ki tuʻa mei he koló ʻi he fakapoʻulí. ʻI heʻenau huʻu fakatongá, pea kamata ke aata mai ʻa e langí ʻi he hahaké, ngalingali naʻe fifili ʻa Siosifa ʻo fekauʻaki mo e meʻa ʻoku toka mei muʻá. ʻE lava fēfē ʻe ha tufunga māʻulalo ke ne maluʻi hono fāmilí mei he ngaahi ivi tākiekina mālohí? Te ne lava maʻu pē ke fai ha tokonaki maʻa hono fāmilí? Te ne lava ke kītaki ʻi hono fakahoko ʻa e ngāue mafatukituki ko eni kuo tuku ange ʻe Sihova ko e ʻOtuá kiate iá, ke tokangaʻi mo ʻohake ʻa e kiʻi tama makehe ko ení? Naʻe fehangahangai ʻa Siosifa mo e ngaahi pole fakatupu manavasiʻi. ʻI heʻetau vakai ki he anga ʻo ʻene hanga atu ke fetaulaki mo e pole taki taha, te tau sio ai ki he ʻuhinga ʻoku fiemaʻu ai ki he ngaahi tamai he ʻaho ní—pea mo kitautolu kotoa—ke tau faʻifaʻitaki ki he tui ʻa Siosifá.

Naʻe Maluʻi ʻe Siosifa Hono Fāmilí

ʻI he ngaahi māhina ki muʻá, ʻi hono kolo tupuʻangá ʻa Nāsaleti, naʻe liliu fakaʻaufuli ai ʻa e moʻui ʻa Siosifá ʻi he hili ʻene fakamaʻu mo e ʻofefine ʻo Hēlaí. Kia Siosifa, ko Melé ko ha kiʻi finemui anga-tonu, mo fonu ʻi he tui. Ka neongo ia naʻá ne ʻiloʻi naʻe feitama ʻa Mele! Naʻá ne fakataumuʻa atu ke veteʻi fakafufū ia ke maluʻi ai ʻa Mele mei hano fakamaaʻi.a Kae kehe, naʻe lea ha ʻāngelo kiate ia ʻi ha misi, ʻo fakamatala ange ko e feitama ʻa Melé naʻe fakafou ia ʻi he laumālie māʻoniʻoni ʻo Sihová. Naʻe tānaki ange ʻe he ʻāngeló ko e tama te ne fanauʻí te ne “fakahaofi ʻa hono kakaí mei heʻenau ngaahi angahalá.” Naʻá ne toe fakapapauʻi kia Siosifa: “ʻOua te ke manavasiʻi ke ʻave ʻa Mele ko ho uaifí ki ho ʻapí.”—Mātiu 1:18-21.

Ko Siosifa, ʻa ia ko ha tangata māʻoniʻoni mo talangofua, naʻá ne fai ʻa e meʻa tofu pē ko iá. Naʻá ne tali ʻa e ngāue mafatukituki tahá: ko hono tauhi hake mo tokangaʻi ha foha ʻa ia naʻe ʻikai ʻoʻona ka naʻe mahuʻinga ʻaupito ki he ʻOtuá. Ki mui ai, ʻi he talangofua ki ha tuʻutuʻuni fakaʻemipaeá, naʻe ʻave ʻe Siosifa hono uaifi feitamá ki Pētelihema ke lēsisita. Naʻe fanauʻi ai heni ʻa e tamá.b

Naʻe ʻikai ke ʻave ʻe Siosifa ʻa hono fāmilí ʻo nau foki ki Nāsaleti. ʻI hono kehé, naʻa nau nofo ʻi Pētelihema, ko ha ngaahi maile siʻi pē mei Selusalema. Naʻa nau masiva, ka naʻe fai ʻe Siosifa ʻa e meʻa kotoa naʻá ne malavá ke maluʻi ʻa Mele mo Sīsū mei he feʻamokakí pe faingataʻaʻiá. ʻI he hili ha taimi nounou, naʻa nau nofo ʻi ha ʻapi māʻulalo. Pea ʻi he ʻikai ke kei pēpē ʻa Sīsū ka ko ha kiʻi tama kei siʻí—ʻo mahili hake nai ʻi hono taʻu tahá—naʻe toe liliu fakafokifā ʻenau moʻuí.

Naʻe aʻu mai ha kulupu ko ha kau tangata, ko e kau vavalo fakaʻasitalolosia mei he Hahaké, ngalingali mei Pāpilone mamaʻo. Naʻa nau muimui mai ʻi ha foʻi feituʻu ki he ʻapi ʻo Siosifa mo Melé pea naʻa nau kumi ki ha kiʻi tama ʻa ia naʻe teu ke hoko ko e tuʻi ʻo e kau Siú. Ko e kau tangatá ni naʻa nau anga-fakaʻapaʻapa ʻaupito.

Pe naʻa nau ʻilo ki ai pe ʻikai, naʻe ʻai ʻe he kau vavalo fakaʻasitalolosiá ʻa e kiʻi tamasiʻi ko Sīsuú ke ʻi he tuʻunga fakatuʻutāmaki lahi. Ko e foʻi fetuʻu naʻa nau sio ki aí naʻá ne ʻuluaki taki kinautolu, ʻo ʻikai ki Pētelihema, ka ki Selusalema. Naʻa nau tala ange ai kia Tuʻi Hēlota fulikivanu ko ʻenau kumí ki ha tama ʻa ia naʻe teu ke hoko ko e tuʻi ʻo e kau Siú. Naʻe tafunaki ʻe he meʻá ni ʻa e ʻita meheka ʻi he tangatá ni.—Sio ki he kupu “ʻEke Heʻetau Kau Lautohí . . . Ko Hai Naʻá Ne Fekau Mai ʻa e ‘Foʻi Fetuʻú’?” ʻi he peesi 29.

Ka ko e meʻa fakafiefiá, naʻe ngāue mai ha ivi ia naʻe māʻolunga ange ʻia Hēlota. ʻO anga-fēfē? Sai, naʻe toʻo hake ʻe he kau ʻaʻahí ʻa e ngaahi meʻaʻofa, ʻo ʻikai ʻamanekina ke toe fetongi ange. He meʻa foʻou moʻoni ia kuo pau ne hoko kia Siosifa mo Mele ʻi he fakafokifā pē kuó na maʻu ʻa e “koula mo e ʻinisēnisi hinehina mo e mula”—ko ha ngaahi koloa mahuʻinga! Naʻe fakataumuʻa ʻa e kau vavalo fakaʻasitalolosiá ke tala kia Tuʻi Hēlota ʻa e feituʻu tofu pē ko ia naʻa nau ʻilo ai ʻa e tama naʻa nau kumi ki aí. Kae kehe, naʻe kau mai ʻa Sihova. Fakafou ʻi ha misi, naʻá ne fakahinohino ai ki he kau vavalo fakaʻasitalolosiá ke nau foki ki honau fonuá ʻi ha hala kehe.—Mātiu 2:1-12.

Taimi nounou mei he mavahe ʻa e kau vavalo fakaʻasitalolosiá, naʻe maʻu ʻe Siosifa ʻa e fakatokanga ko ení mei he ʻāngelo ʻa Sihová: “Tuʻu hake, ʻave ʻa e kiʻi tamá mo ʻene faʻeé pea mou hola ki ʻIsipite, pea nofo ai kae ʻoua ke u toki fakahā atu, he ʻoku teu ke kumi ʻe Hēlota ʻa e kiʻi tamá ke tāmateʻi.” (Mātiu 2:13) Ko ia, hangē ko ia ʻoku tau fakatokangaʻi ʻi he kamataʻangá, naʻe talangofua ʻa Siosifa ʻo ʻikai toe tatali. Naʻá ne ʻai ʻa e tuʻunga malu ʻa ʻene tamá ke muʻomuʻa ia ʻi he meʻa kehe kotoa pē peá ne ʻave hono fāmilí ki ʻIsipite. Koeʻuhi naʻe ʻoange ʻe he kau vavalo fakaʻasitalolosia pangani ko iá ki he fāmilí ni ʻa e ngaahi meʻaʻofa totongi mamafa moʻoni, naʻa nau maʻu leva he taimi ko ení ha ngaahi meʻa ʻa ia ʻe lava ke tokoni kia kinautolu ʻi heʻenau nofo ʻāunofo naʻa nau hanga atu ki aí.

Ki mui ai, naʻe hanga ʻe he ngaahi fananga fakaʻapokalifá mo e ngaahi talatupuʻá ʻo ʻai ke ongo fakamānako ʻa e fononga ki ʻIsipité, ʻo taku naʻe fakanounouʻi fakaemana ʻe he kiʻi tamasiʻi ko Sīsuú ʻa e fonongá, manaʻi ʻa e kau kaihaʻá ke ʻoua te nau fai ha kovi, pea aʻu ki hono ʻai ʻa e ʻulu paame teití ke mapelu hifo ki heʻene faʻeé ke ne paki honau fuá.c Ko hono moʻoní, ko ha fononga lōloa mo fakaongosia moʻoni ia ki he taʻeʻiloá.

ʻOku lava ke ako lahi ʻa e ngaahi mātuʻá meia Siosifa. Naʻá ne loto-lelei ke taʻofi ʻene ngāué pea feilaulauʻi ʻa ʻene fiemālie ʻaʻaná koeʻuhi ke maluʻi ʻa hono fāmilí mei he fakatuʻutāmakí. ʻOku hā mahino, naʻá ne vakai ki hono fāmilí ko ha meʻa toputapu kuo tuku ange ʻe Sihova kiate ia. ʻOku ʻohake ʻe he ngaahi mātuʻa he ʻaho ní ʻenau fānaú ʻi ha māmani fakatuʻutāmaki, ko ha māmani ʻoku fonu ʻi he ngaahi mālohi ʻa ia te ne ʻai ki ha tuʻunga fakatuʻutāmaki, fakameleʻi, pea naʻa mo hono fakaʻauha ʻa e fānau tupú. He taau moʻoni ke fakavīkivikiʻi ʻa e ngaahi faʻē mo e ngaahi tamai ko ia ʻoku nau fai ʻa e foʻi ngāue papau hangē ko ia naʻe fai ʻe Siosifá, ʻo nau ngāue mālohi ke maluʻi ʻenau fānaú mei he ngaahi tākiekina peheé!

Naʻe Tokonaki ʻa Siosifa Maʻa Hono Fāmilí

ʻOku ngalingali naʻe ʻikai ke nofo fuoloa ʻa e fāmilí ni ʻi ʻIsipite, he naʻe vave pē hono fakahā ʻe he ʻāngeló kia Siosifa kuo mate ʻa Hēlota. Naʻe taki ʻe Siosifa ʻa hono fāmilí ʻo nau foki ki honau fonua tupuʻangá. Naʻe tomuʻa tala ʻe ha kikite ʻi he kuonga muʻá ʻe ui ʻe Sihova ʻa hono ʻaló “mei ʻIsipite.” (Mātiu 2:15) Naʻe tokoni ʻa Siosifa ki hono fakahoko iá, ka te ne taki he taimi ko ení hono fāmilí ki fē?

Naʻe tokanga ʻa Siosifa. Naʻe fakapotopoto ʻene manavasiʻi ki he fetongi ʻo Hēlotá, ʻa ʻAkileosi, ʻa ia naʻe tatau pē mo ia ʻi he anga-fulikivanú mo e fakapoó. Ko e tataki fakaʻotuá naʻá ne taki ʻa Siosifa ke ne ʻave hake hono fāmilí ki he tokelaú, ʻo mamaʻo mei Selusalema mo e kotoa ʻo hono ngaahi alēlea fakafufuú, pea nau foki ki hono kolo tupuʻangá ko Nasaleti ʻi Kālelí. Naʻá ne tauhi hake ai mo Mele ʻa hona fāmilí.—Mātiu 2:19-23.

Naʻa nau moʻui ʻi ha founga moʻui faingofua—ka naʻe ʻikai ko ha moʻui ia naʻe faingofua. ʻOku lave ʻa e Tohi Tapú kia Siosifa ko e tufunga, ʻo ngāueʻaki ha foʻi lea ʻoku kāpui ai ʻa e ngaahi founga lahi ʻo hono ngāueʻaki ʻa e papá, ʻo hangē ko hono tutuʻu hifo ʻo e papá, fetuku ia, pea mo hono tauaki ia ke ngāueʻaki ʻi hono langa ʻa e ngaahi fale, ngaahi vaka, fanga kiʻi hala-fakakavakava iiki, ngaahi saliote, ngaahi veʻeteka, ngaahi ʻioke, pea mo e ngaahi meʻangāue kehekehe ki he ngoué. (Mātiu 13:55) Ko e ngāue fakaesino faingataʻa ia. Ko e tokotaha tufunga ʻi he taimi ʻo e Tohi Tapú naʻe faʻa ngāue pē ʻo ofi ki he matapā ʻo hono kiʻi fale faingofua pē pe ʻi ha fale ngāue naʻe hoko mai ki ai.

Naʻe ngāueʻaki ʻe Siosifa ha ngaahi meʻangāue kehekehe lahi, ko e niʻihi ai ngalingali naʻe tukuʻau mai mei heʻene tamaí. ʻOku pau pē naʻá ne ngāueʻaki ha sikuea, palameti, ko ha sioka laine, kiʻi toki, ko ha kili, ko ha toki toʻoliu, hāmala, hāmala papa, ngaahi tutuʻu, ko ha vili ʻa ia naʻá ne ngāueʻaki ai ha kaufana ke fusi ki muʻa mo mui, ngaahi kulū kehekehe, pea mo ha ngaahi foʻi faʻo nai ʻe niʻihi, neongo naʻe mamafa honau totongí.

Fakaʻuta atu kia Sīsū ʻi heʻene kei tamasiʻí ʻokú ne sio ki he ngāue ʻa ʻene tamai ohí. Naʻe ulo hono matá mo hangataha ki he ngaʻunu kotoa pē ʻa Siosifa, ʻa ia ʻoku pau pē naʻe fakamānako kiate ia ʻa e mālohi naʻe ʻi hono ongo uma lalahí mo hono ongo nima kaumālohí, ko ʻene nima potó, mo e tonu ʻa ʻene sió. Naʻe kamata fakahāhā nai ʻe Siosifa ki hono kiʻi fohá ʻa e anga hono fakahoko ʻo e ngaahi ngāue faingofua pehē ʻo hangē ko hono fakahamolemole ʻa e ngaahi konga tungotunga ʻi he papá ʻaki ʻa e kiliʻi ika mōmoá. ʻOku ngalingali naʻá ne akoʻi kia Sīsū ʻa e ngaahi faikehekehe ʻo e ngaahi kalasi kehekehe ʻo e papa naʻá ne ngāueʻakí—hangē ko e sukaminó, ʻoké pe ʻōlivé.

Naʻe ʻiloʻi foki ʻe Sīsū ko e ongo nima mālohi ko ia naʻá ne tā hifo ʻa e ʻakaú, tuʻutuʻu ʻa e ngaahi fuʻu papa pimí, mo tuki fakamaʻu ʻa e ngaahi hokoʻangá ko e toe ongo nima anga-ʻofa pē ia naʻá ne milimili mo fakafiemālieʻi ia, mo ʻene faʻeé, pea mo e toenga ʻo e fānaú. ʻIo, naʻe maʻu ʻe Siosifa mo Mele ha fāmili tokolahi ʻa ia naʻe faai atu ʻo kau ki ai ʻo ʻikai siʻi hifo ʻi he fānau ʻe toko ono ʻo tānaki atu kia Sīsū. (Mātiu 13:55, 56) Naʻe pau kia Siosifa ke toe ngāue mālohi ange ke tokangaʻi mo fafanga kotoa kinautolu.

Kae kehe, naʻe mahinoʻi ʻe Siosifa ko hono tokangaʻi ʻa e ngaahi fiemaʻu fakalaumālie ʻa hono fāmilí naʻe mahuʻinga tahá. Ko ia naʻá ne vaheʻi ʻa e taimi ki hono akoʻi ʻene fānaú fekauʻaki mo Sihova ko e ʻOtuá mo ʻEne ngaahi laó. Ko ia mo Mele naʻá na ʻave maʻu pē kinautolu ki he sinakoke ʻi honau feituʻú, ʻa ia naʻe lau leʻo-lahi mo fakamatalaʻi ai ʻa e Laó. ʻI he hili iá naʻe lahi nai ʻa e ngaahi fehuʻi ʻa Sīsuú pea naʻe feinga mālohi ʻa Siosifa ke fakafiemālieʻi ʻa e fiekaia fakalaumālie ʻa e tamasiʻí. Naʻe toe ʻave ʻe Siosifa ʻa hono fāmilí ki he ngaahi kātoanga fakalotu ʻi Selusalemá. ʻI he Pāsova fakataʻú, naʻe fiemaʻu nai kia Siosifa ʻa e uike ʻe ua ke fai ai ʻa e fononga ʻo e maile nai ʻe 70 (kilomita ʻe 112.65), ke kau ki he meʻa naʻe faí, pea toki foki.

Ko e ngaahi ʻuluʻi fāmili Kalisitiane he ʻaho ní ʻoku nau muimui ʻi ha sīpinga meimei tatau. ʻOku nau foaki atu kinautolu ki heʻenau fānaú, ʻo fakamuʻomuʻa ʻa e akoʻi fakalaumālié ʻi he ngaahi tokanga kehe kotoa pē, kau ai ʻa e ngaahi fiemālie fakamatelié. ʻOku nau feinga lahi ke ʻave ʻenau fānaú ki he ngaahi fakataha faka-Kalisitiané fakatouʻosi ʻa e ngaahi fakataha lalahi mo e iiki. ʻI he hangē ko Siosifá, ʻoku nau ʻilo ʻoku ʻikai ha toe ʻinivesi lelei ange heni ʻe lava ke nau fai maʻá e lelei ʻa ʻenau fānaú.

“Loto-Hohaʻa Lahi”

ʻI he taʻu 12 ʻa Sīsuú, naʻe ʻave ʻe Siosifa ʻa e fāmilí ki Selusalema ʻo hangē pē ko e anga-mahení. Ko e Pāsová ia, ko ha taimi ʻo e kātoanga, pea naʻe fononga fakataha ha ngaahi fāmili tokolahi ʻo fou atu ʻi he feituʻu tukuʻuta tupu maʻuiʻui ʻo e faʻahitaʻu failaú. ʻI heʻenau fakaofiofi atu ki he funga fonua ʻatāloa ʻo ofi ki he kolo māʻolunga ko Selusalemá, naʻe hivaʻi ʻe he tokolahi ʻa e ngaahi saame ʻiloa ʻo e ʻalu-haké. (Saame 120-134) Naʻe ngaeve nai ʻa e koló ʻi he kakai ʻe laui kilu. ʻI he hili iá, naʻe kamata ke fononga ʻa e ngaahi fāmilí ʻo foki ki ʻapi. Ko Siosifa mo Mele, ʻi he lahi nai ʻena meʻa ke faí, naʻá na fakamahalo naʻe fononga fakataha ʻa Sīsū ia mo e niʻihi kehé, ko e ngaahi mēmipa nai ʻo e fāmilí. ʻI he toki hili ha ʻaho kakato ʻo e mamaʻo mai mei Selusalemá naʻá na ʻiloʻi hake ai ha foʻi moʻoni fakatupu manavasiʻi—naʻe puli ʻa Sīsū!—Luke 2:41-44.

ʻI heʻena hahaka holó, naʻá na toe lue ʻo foki ki Selusalema. Fakaʻuta atu ki he ngaongao mo hā ngalikehe ʻa e koló kiate kinaua ʻi he taimi ko ení ʻi heʻena laka atu ʻi he halá, ʻo na ui ʻa e hingoa ʻo hona fohá. ʻOku ʻi fē nai ʻa e tamasiʻí? ʻI he ʻaho hono tolu ʻo e kumí, naʻe kamata nai ke fifili ʻa Siosifa pe naʻá ne mātuʻaki taʻelavameʻa moʻoni ʻi hono tokangaʻi ʻa e meʻa toputapu ko eni naʻe tuku ange ʻe Sihova kiate iá? Faifai pē, naʻá na ʻalu ki he temipalé. Naʻá na kumi holo ai ʻo na aʻu mai ki ha loki naʻe fakatahataha ai ha kau tangata poto tokolahi, naʻa nau mataotao ʻi he Laó—fakataha mo e tamasiʻi ko Sīsuú ʻoku tangutu ʻi honau lotolotongá! Fakaʻuta atu ki he fiemālie naʻe ongoʻi ʻe Siosifa mo Melé!—Luke 2:45, 46.

Naʻe fakafanongo ʻa Sīsū ki he kau tangata potó mo vēkeveke ke ʻeke ha ngaahi fehuʻi. Naʻe ofoofo ʻa e kau tangatá ni ʻi he mahino ʻa e kiʻi tamá pea mo ʻene ngaahi talí. Kae kehe, naʻe moʻutāfuʻua ʻa Mele mo Siosifa. Fakatatau ki he lēkōtí, ʻoku fakalongolongo pē ʻa Siosifa. Ka ko e ngaahi lea ʻa Melé naʻe fakahoko pōtoʻi atu ai kinaua fakatouʻosi: “Tama, ko e hā naʻá ke fai pehē ai kiate kimauá? Ko hoʻo tamaí eni mo au kuó ma kumi kiate koe mo e loto-hohaʻa lahi.”—Luke 2:47, 48.

Ko ia ʻi ha ngaahi foʻi lea siʻi pōtoʻi, ʻoku ʻomai ai ʻe he Folofola ʻa e ʻOtuá ha fakatātā moʻoni ʻo e tuʻunga ko e mātuʻá. ʻOku malava ke fakalotomafasia—naʻa mo e taimi ʻoku haohaoa ai ʻa e kiʻi tamá! Ko e tauhi fānau ʻi he māmani fakatuʻutāmaki ʻo e ʻaho ní ʻe lava ke ne ʻomai ʻa e “loto-hohaʻa lahi” faufaua, ka ʻe lava ke maʻu ʻe he ngaahi tamaí mo e ngaahi faʻeé ha fiemālie ʻi hono ʻiloʻi ʻoku fakahaaʻi ʻe he Tohi Tapú ʻoku moʻoni ʻa e pole ʻoku nau fehangahangai mo iá.

Ko e meʻa fakafiefiá, naʻe nofo ʻa Sīsū ʻi he foʻi feituʻu ʻe taha he māmaní ʻa ia naʻá ne ongoʻi ofi taha ai ki heʻene Tamai fakahēvaní, ʻa Sihova, ʻo ne vēkeveke ke ako ha faʻahinga meʻa pē te ne malava ʻo akó. Ko ia ai, naʻá ne fai ha tali faingofua mo loto-moʻoni ki heʻene ongo mātuʻá: “Ko e hā naʻá mo kumi holo ai aú? ʻIkai naʻá mo ʻilo kuo pau ke u ʻi he fale ʻo ʻeku Tamaí?”—Luke 2:49.

ʻOku pau pē naʻe toutou fakakaukau ʻa Siosifa ki he ngaahi lea ko iá ʻi he ngaahi taimi lahi. Naʻá ne hoko nai ʻo fiefia ʻo ne laukauʻaki ia. He ko ē, naʻá ne ngāue tōtōivi ke akoʻi ʻa hono foha ohí ke ne maʻu ʻa e ongoʻi pehē fekauʻaki mo Sihova ko e ʻOtuá. ʻI he taimi ko ia ʻo ʻene moʻuí ʻi he tuʻunga ko ha tamasiʻí, naʻe ʻosi maʻu ʻe Sīsū ha ngaahi ongoʻi māfana fekauʻaki mo e foʻi lea “tamaí”—ko e ngaahi ongoʻi ʻa ia ʻi hono tuʻunga lahi naʻe fakafuo ia ʻi heʻene feohi mo Siosifá.

Kapau ko ha tamai koe, ʻokú ke ʻiloʻi ʻa e monū ʻokú ke maʻu ke tokoniʻi ʻa hoʻo fānaú ke nau maʻu ha fakakaukau pe ko e hā koā ʻa e tamai anga-ʻofá mo e tamai ʻokú ne fai ha maluʻí? ʻOku pehē pē, kapau ʻoku ʻi ai ha fānau ho malí ki muʻa pe fānau ohi, manatuʻi ʻa e faʻifaʻitakiʻanga ʻa Siosifá pea tōʻongafai ki he tokotaha taki taha ʻi he tuʻunga ʻokú ne makehe mo mahuʻinga. Tokoniʻi kinautolu ke nau ʻunuʻunu ofi ange ki heʻenau Tamai fakahēvaní, ʻa Sihova ko e ʻOtuá.

Naʻe Kītaki Faitōnunga ʻa Siosifa

ʻOku fakahaaʻi mai ʻe he Tohi Tapú ha toe ngaahi fakamatala siʻi pē ʻo kau ki he moʻui ʻa Siosifá, ka ʻoku taau ke fai ha vakai lelei ki ai. ʻOku tau lau ai ko Sīsuú “naʻe hokohoko atu ʻene anganofo kiate kinauá”—ki heʻene ongo mātuʻá. ʻOku tau toe ʻiloʻi ai “naʻe fakautuutu ʻa Sīsū ʻi he potó pea ʻi he tupu fakaesinó pea mo e leleiʻia ai ʻa e ʻOtuá mo e tangatá.” (Luke 2:51, 52) Ko e hā ʻoku fakahaaʻi mai ʻe he ngaahi lea ko iá ʻo fekauʻaki mo Siosifá? Ko ha ngaahi meʻa ʻe niʻihi. ʻOku tau ako ai naʻe hokohoko atu ʻa e takimuʻa ʻa Siosifa ʻi hono fāmilí, he ko hono foha haohaoá naʻá ne fakaʻapaʻapa ki he mafai ʻo ʻene tamaí pea hokohoko atu ʻene anganofo ki aí.

ʻOku tau toe ako naʻe hokohoko atu ʻa e tupulekina ʻa Sīsū ʻi he potó. Ko hono moʻoní naʻe ʻi ai ʻa e kaunga lahi ʻa Siosifa ki he fakalakalaka ʻa hono fohá ʻi he tafaʻaki ko iá. ʻI he ngaahi ʻaho ko iá, naʻe ʻi ai ha palōveepi motuʻa ʻa e kau Siú. Naʻe taukaveʻi ai ko e kau tangata pē ʻoku nau mālōlō fakahāueé ʻe lava ke nau hoko ʻo poto moʻoní, lolotonga ia ko e kau tangata pōtoʻi ngāue hangē ko e kau tufungá, kau fāmá, mo e kau tuki-ukameá “ʻe ʻikai lava ke nau fai ha fakamaau totonu mo fai ha fakamaau; pea ʻe ʻikai ke maʻu kinautolu ʻi ha feituʻu ʻoku maheʻa ai ʻa e ngaahi pealapelí.” Ki mui ai, naʻe fakaeʻa ʻe Sīsū ʻa e koto māngoa ʻa e foʻi palōveepi ko iá. ʻI heʻene kei tamasiʻí, he tātuʻolahi moʻoni ē ʻene fanongo ki heʻene tamai ohí, neongo ko ha tufunga māʻulalo ia, ʻi heʻene faiako ola lelei ʻo fekauʻaki mo e ‘fakamaau totonu mo e fakamaau’ ʻa Sihová! ʻOku ʻikai ha veiveiua, naʻe hoko ia ʻi he ngaahi taimi taʻefaʻalaua.

ʻOku tau toe sio nai ki he fakamoʻoni ʻo e tākiekina ʻa Siosifá ʻi he tupu fakaesino ʻa Sīsuú. ʻI heʻene hoko ko ha tamasiʻi naʻe tokangaʻi leleí, naʻe tupu hake ʻa Sīsū ʻo hoko ko ha tangata sino mālohi mo moʻui lelei. ʻIkai ko ia pē, naʻe akoʻi ʻe Siosifa ʻa hono fohá ke ne hoko ʻo pōtoʻi ʻi he ngāue fakaesino naʻá ne faí. Naʻe ʻiloa ʻa Sīsū ʻo ʻikai ngata pē ʻi he tuʻunga ko e foha ʻo e tufungá ka ‘ko e tufunga’ foki. (Maʻake 6:3) Ko ia ko e ako naʻe fai ʻe Siosifá naʻe lavameʻa. ʻOku fai fakapotopoto ʻa e ngaahi ʻuluʻi fāmilí ʻi heʻenau faʻifaʻitaki kia Siosifa, ʻo tokanga ki he tuʻunga lelei ʻoku ʻaonga ki heʻenau fānaú pea fakapapauʻi ʻoku lava ke nau tokangaʻi pē kinautolu.

ʻI heʻetau aʻu pē ko ia ki he tuʻunga ʻi he lēkooti ʻa e Tohi Tapú ʻa ia ʻoku papitaiso ai ʻa Sīsū ʻi hono taʻu 30, ʻoku tau ʻiloʻi ai ʻoku ʻikai ke toe kau ʻa Siosifa ia ʻi he talanoá. ʻOku fokotuʻu mai ʻe he fakamoʻoní naʻe hoko ʻa Mele ko ha uitou ʻi he taimi naʻe kamata ai ʻe Sīsū ʻene ngāue fakafaifekaú. (Sio ki he puha “Naʻe Mate ʻa Siosifá ʻAnefē?” ʻi he peesi 27.) Neongo ia, naʻe tuku mai ʻe Siosifa ha fakaʻilonga mahino—ko ha faʻifaʻitakiʻanga lelei moʻoni ʻo ha tamai naʻá ne maluʻi hono fāmilí, fai ha tokonaki maʻanautolu, pea kītaki faitōnunga ʻo aʻu ki he ngataʻangá. ʻE lelei ki ha tamai pē, ki ha ʻuluʻi fāmili pē, pe ki ha Kalisitiane kehe pē ke faʻifaʻitaki ki he tui ʻa Siosifá.

[Fakamatala ʻi lalo]

[Puha ʻi he peesi 27]

Naʻe Mate ʻa Siosifá ʻAnefē?

ʻOku tau ʻiloʻi naʻe moʻui ʻa Siosifa ʻi he taimi naʻe taʻu 12 ai ʻa Sīsuú. ʻI he tuʻunga taʻumotuʻa ko iá naʻe kamata ai ke ako ʻe he toʻutupu Siu tokolahi ʻa e pōtoʻi ngāue ʻa ʻenau tamaí pea nau hoko ko ha kau akoako ʻi heʻenau taʻu 15. ʻOku hā mai naʻe moʻui ʻa Siosifa ʻo fuoloa feʻunga ke ne akoʻi ai ʻa Sīsū ke hoko ko ha tufunga. Naʻe kei moʻui nai ʻa Siosifa ʻi he taimi naʻe kamata ai ʻe Sīsū ʻa ʻene ngāue fakafaifekaú ʻi heʻene taʻu 30 nai? ʻOku hā mātuʻaki fakaʻalongaua ʻaupito. Ko e faʻē, fanga tokoua, mo e fanga tuofāfine ʻo Sīsuú ʻoku fai ʻa e lave kiate kinautolu kotoa naʻa nau moʻui ʻi he taimi ko iá ka ʻoku ʻikai fai ha lave ia kia Siosifa. Naʻe aʻu ʻo ui ʻa Sīsū ʻi he taimi ʻe taha “ko e tama ʻa Mele,” kae ʻikai pehē ko e foha ʻo Siosifa. (Maʻake 6:3) ʻOku fai ʻa e lave kia Mele heʻene ngāue mo tamuʻomuʻa ʻiate ia pē ʻi hono fai ha meʻa, ʻo ʻikai ke ne fakapā ki hano husepāniti. (Sione 2:1-5) Ne mei ngalikehe ʻa e meʻa ko iá ʻi he ngaahi taimi ʻo e Tohi Tapú tuku kehe kapau ko ha uitou ia. Fakaʻosí, ʻi he teitei pekia ʻa Sīsuú, naʻá ne tuku atu ʻa hono tokangaʻi ʻene faʻeé ki he ʻapositolo ko Sioné. (Sione 19:26, 27) Naʻe ʻikai mei fiemaʻu ia ke ne fai pehē kapau naʻe kei moʻui ʻa Siosifa. ʻOku hā mahino leva, naʻe mate ʻa Siosifa ʻi he taimi naʻe kei talavou nai ai ʻa Sīsuú. ʻI he tuʻunga ko e foha lahi tahá, ʻoku ʻikai ha veiveiua naʻe hoko atu ʻe Sīsū ʻa e ngāue fakatufungá pea tokangaʻi ʻa e fāmilí ʻo aʻu ki heʻene papitaisó.

[Fakatātā ʻi he peesi 24]

Naʻe fai ʻe Siosifa ʻa e foʻi ngāue papau mo taʻesiokita ke maluʻi ʻene kiʻi tamá

[Fakatātā ʻi he peesi 25]

Naʻe ngāue mālohi ʻa Siosifa ke tokonaki maʻa hono fāmilí

[Fakatātā ʻi he peesi 26]

Naʻe ʻave maʻu pē ʻe Siosifa ʻa hono fāmilí ke nau lotu ʻi he temipalé ʻi Selusalema

[Fakatātā ʻi he peesi 28]

Naʻe akoʻi ʻe Siosifa ʻa hono fohá ke hoko ko ha tufunga