Sīsū–Ko ʻEne Moʻuí mo ʻEne Ngāue Fakafaifekau

Toe ʻAʻahi ki he Temipalé

NAʻE ʻosi ʻa e pō ʻe tolu ʻa e nofo ʻa Sīsū mo ʻene kau ākongá ʻi Pētani talu ʻa ʻenau haʻu mei Sielikoó. ʻI he maama hake ʻa e pongipongi Mōnite ʻo Nīsani 10, naʻa nau fononga atu ʻi he halá ki Selusalema. Naʻe fiekaia ʻa Sīsū. Ko ia ʻi heʻene sio ki ha fuʻu fiki naʻe failau, naʻá ne ʻalu atu ki ai ke vakai pe ʻoku ʻi ai nai ha ngaahi foʻi fiki.

Naʻe vave ʻa e failau ʻa e fuʻu ʻakaú, koeʻuhi he ko e toʻu fikí naʻe toki kamata ia ʻi Sune, ka ko e konga fakaʻosi pē ʻeni ia ʻo Māʻasí. Kaekehe, naʻe fakakaukau ʻa Sīsū ʻo pehē koeʻuhi ko e vave ʻa ʻene failaú, ʻe vave nai ai mo e ngaahi foʻi fiki foki. Ka naʻá ne loto-mamahi. Naʻe hā fakahalahala ʻa e fuʻu ʻakaú ko ʻene failaú. Ko ia naʻe fakamalaʻiaʻi ʻe Sīsū ʻa e fuʻu ʻakaú, ʻo ne pehē: “Ke ʻoua naʻa kai hao fua ʻe ha taha ʻo taʻengata.” ʻI ha toe ʻīsiu ʻo e makasini ko ʻení, te tau mahuʻingaʻia ke ako ai ki he ola ʻo e fakamalaʻiaʻi ʻe Sīsū ʻa e fuʻu fikí pea mo e ʻuhinga fakaefakatātā ʻo e meʻa ko ʻení.

Naʻe hoko atu ʻa e fonongá pea naʻe vave ke aʻu ʻa Sīsū mo ʻene kau ākongá ki Selusalema. Naʻá ne ʻalu atu ki he temipalé, ʻa ia naʻá ne ʻosi ʻaʻahi ki ai ʻi he efiafi ki muʻa atu ai. Kaekehe, ʻi he ʻaho ko ʻení naʻá ne fai ha meʻa, ʻo hangē pē ko ia naʻá ne fai ʻi he taʻu ʻe tolu ki muʻa atu ʻi heʻene haʻu ki he Lakaatu ʻi he 30 T.S. Naʻe lī ki tuʻa ʻe Sīsū ʻa kinautolu ʻoku faifakatau mo fakatau ʻi he temipalé mo fulihi ʻa e ngaahi tēpile ʻa e kau fetongi paʻangá pea mo e ngaahi laupapa ʻa kinautolu naʻe fakatau ʻa e fanga lupé. Naʻe ʻikai te ne toe fakangofua ke toe ʻave ʻe ha taha ha nāunau ki he temipalé.

ʻI hono fakahalaʻi ʻa kinautolu naʻa nau fetongi paʻanga mo fakatau ʻa e fanga monumanú ʻi he temipalé, naʻá ne pehē ai: “ʻIkai kuo tohi, Ko hoku fale ʻe ui ko e falelotu moʻo e kakai kotoa pe? ka ko kimoutolu kuo mou ngaohi ia ko e ʻananga ʻo ha kaihaʻakau.” Ko e kau kaihaʻa kinautolu koeʻuhi naʻa nau ʻeke ha ngaahi totongi naʻe fuʻu hulu meiate kinautolu naʻe ʻikai te nau toe lava ke fai ha meʻa kehe ka ko hono fakatau pē meiate kinautolu ʻa e fanga monumanu naʻe fiemaʻu ki he feilaulaú. Ko ia naʻe lau ʻe Sīsū ia ʻa e faʻahinga pisinisi ko ʻení ko e faʻao fakamālohi pe kaihaʻa.

ʻI he fanongo ʻa e houʻeiki taulaʻeikí mo e kau sikalaipé mo e houʻeiki ʻo e kakaí ki he meʻa kuo fai ʻe Sīsuú, naʻa nau toe kumi ki ha founga ʻe lava ke nau tāmateʻi ai ia. Naʻa nau fakamoʻoniʻi ai naʻa nau taʻe mangoi. Ka, naʻe ʻikai te nau ʻilo pe ʻe anga-fēfē haʻanau tāmateʻi ʻa Sīsū, koeʻuhi he ko e kakaí hono kotoa naʻa nau muimui kiate ia ke fanongo kiate ia.

Tukukehe ʻa e kau Siu totonú, naʻe haʻu mo e kau Senitaile foki ki he Lakaatú. Ko e kau ului kinautolu, ko hono ʻuhingá naʻa nau liliu ki he lotu ʻa e kau Siú. Ko ha kau Kalisi, ʻoku mahino ko e kau ului, naʻa nau fakaofiofi kia Filipe ʻo kole ke nau sio kia Sīsū. Naʻe ʻalu ʻa Filipe kia ʻAnitelū, ke ʻeke nai pe ʻe lelei ke fai ha fakataha pehē. ʻOku mahino naʻe kei ʻi he temipalé pē ʻa Sīsū, ʻa ia naʻe malava ai ʻa e kau Kalisí ke sio kiate ia.

Naʻe ʻilo ʻe Sīsū naʻe toe pē ʻa e ngaahi ʻaho siʻi ʻo ʻene moʻuí, ko ia naʻá ne fakatātaaʻi fakalelei ʻa hono tuʻungá: “Kuo hokosia ʻa e taimi ke fakalangilangiʻi ʻa e Fanautama ʻa tangata. Ko au e, ko au e, ʻoku ou tala atu, Kapau ʻe ʻikai to ki he kelekele ʻa e tengaʻi uite ʻo mate, ʻoku teka taha ai pe ia: ka ʻo kapau ʻe mate, te ne fua lahi.”

Ko e tengaʻi uite ʻe tahá ʻoku siʻi hono ʻaongá. Ka, ʻoku fēfē ʻo kapau ʻe tuku ia ki he kelekele pea “mate” ia, ʻo ngata ʻa ʻene moʻui ko ha tengá? ʻOku kamata tupu leva ia pea faifai atu pē ʻoku hoko ko e kau ʻokú ne ʻomai ʻa e ngaahi tengaʻi uite lahi ʻaupito. ʻI ha founga meimei tatau pē, ko Sīsū ko ha tangata haohaoa pē ʻe taha. Ko ia ʻi heʻene mate angatonu ki he ʻOtuá, naʻe hoko ia ko e founga ke foaki ai ʻa e moʻui taʻengatá ki he faʻahinga angatonu ʻoku nau maʻu ʻa e laumālie tatau ʻo e feilaulauʻi kitá ʻo hangē ko iá. Ko ia, naʻe pehē ai ʻe Sīsū: “Ko ia ʻoku ʻofa ki heʻene moʻui, ko ʻene tuku ia ke mole; pea ko ia ʻoku ne fehiʻa ki heʻene moʻui ʻi he maama ko eni, ko ʻene tauhi ia ʻo aʻu ki he moʻui taʻengata.”

ʻOku hā mahino naʻe ʻikai ko ha fakakaukau pē ʻa Sīsū ia kiate ia pē, he naʻá ne hoko atu ʻene fakamatalá: “Kapau ʻe tauhi au ʻe ha taha, ke ne muimui kiate au; pea ko e potu ʻoku ʻi ai au, ʻe ʻi ai foki ʻeku sevaniti: kapau ʻe tauhi au ʻe ha taha, ʻe fakahikihikiʻi ia ʻe he Tamai.” Ko ha pale fakaofo ē ʻo e muimui ʻia Sīsū mo fai tauhi kiate iá! Ko e palé ko hono fakahīkihikiʻi ʻe he Tamaí ke kau mo Kalaisi ʻi he Puleʻangá.

ʻI he fakakaukau atu ʻa Sīsū ki he mamahi lahi mo e mate langa lahi naʻe ʻamanaki ke hoko kiate iá, naʻá ne hoko atu: “ʻE, kuo takatuʻu ʻeni ʻeku moʻui; pea ko e hā ai ʻeku lea ʻe fai? ʻAlā Tamai, fakahaofi au mei he houa ko eni.” Taumaiā naʻe lava ke taʻofi ʻa e meʻa naʻe ʻamanaki ke hoko ki aí! Ka naʻe ʻikai, ʻo hangē ko ia naʻá ne pehē: “Ka ko hono ʻuhinga e naʻa ku hoko mei ai ki he houa ni.” Naʻe loto-tatau ʻa Sīsū mo e fokotuʻutuʻu fakakātoa ʻa e ʻOtuá, kau ki ai mo ʻene mate fakaefeilaulaú. Mātiu 21:​12, 13, 18, 19; Maʻake 11:​12-18; Luke 19:​45-48; Sione 12:​20-27.

◆ Ko e hā naʻe ʻamanaki ai ʻa Sīsū ʻe maʻu ha ngaahi fuaʻi fiki neongo naʻe teʻeki ai ke hoko ʻa e toʻufikí?

◆ Ko e hā naʻe ui ai ʻe Sīsū ʻa e kau faifakatau ʻi he temipalé ko e “kau kaihaʻa”?

◆ ʻI he founga fē naʻe hangē ai ʻa Sīsū ko ha tengaʻi uite ʻoku mate?

◆ Naʻe anga-fēfē ʻa e ongoʻi ʻa Sīsū ʻo kau ki he faingataʻaʻia mo e mate naʻe ʻamanaki hoko kiate iá?