2. Ko e hā ʻoku hoko ʻi he māmaní pea ʻoku fēfē ʻa e tōʻonga ʻo e kakaí talu mei he 1914?

Naʻe ʻeke ange ʻe he kau ākonga ʻa Sīsuú kiate ia: “Ko e hā ʻa e fakaʻilonga ʻo hoʻo ʻi hení pea mo e fakaʻosiʻosi ʻo e fokotuʻutuʻu lolotongá?” (Mātiu 24:3) ʻI he talí, naʻe tomuʻa tala ʻe Sīsū ʻa e ngaahi meʻa lahi ʻe hoko hili ʻene kamata ke pule ʻi hēvani ko e Tuʻi ʻo e Puleʻanga ʻo e ʻOtuá. ʻOku kau heni ʻa e tau, ngaahi nounou fakameʻatokoni mo e ngaahi mofuike. (Lau ʻa e Mātiu 24:7.) Naʻe toe tomuʻa tala ʻe he Tohi Tapú ko e tōʻonga ʻo e kakai “ʻi he ngaahi ʻaho fakaʻosí” ʻe ʻai ai ʻa e moʻuí ke “faingataʻa ke fekuki mo ia.” (2 Tīmote 3:1-5) Ko e ngaahi tuʻunga mo e ngaahi tōʻonga ko ení kuo hā mahino ʻaupito ia talu mei he 1914.

3. Ko e hā kuo hoko ai ʻa e māmaní ʻo kovi ʻaupito talu mei he kamata pule ʻa e Puleʻanga ʻo e ʻOtuá?

Hili ha taimi nounou mei he hoko ʻa Sīsū ko e Tuʻi ʻo e Puleʻanga ʻo e ʻOtuá, naʻá ne faitau mo Sētane mo ʻene fanga tēmenioó ʻi hēvani. Naʻe foʻi ʻa Sētane ʻi he tau ko iá. ʻOku pehē ʻe he Tohi Tapú “naʻe lī hifo ia ki he māmaní, pea naʻe lī fakataha hifo mo ia ʻene kau ʻāngeló.” (Fakahā 12:9, 10, 12) ʻOku ʻita lahi ʻa Sētane koeʻuhi ʻokú ne ʻilo ʻe fakaʻauha ia. Ko ia, ʻokú ne fakatupunga ai ʻa e mamahi mo e faingataʻa ʻi he kotoa ʻo e māmaní. ʻOku tokoni eni ke tau mahinoʻi ai ʻa e ʻuhinga ʻoku kovi pehē ai ʻa e māmaní! Ko e Puleʻanga ʻo e ʻOtuá te ne fakaleleiʻi ʻa e ngaahi palopalema kotoa ko ení.