Fakamuʻomuʻa ʻa e ʻOtuá ʻi Hoʻo Moʻui Fakafāmilí!

KO BOB MO JEAN​—ko e ongo meʻa mali naʻe lave ki ai ʻi he kupu ki muʻá​—naʻe ʻikai te na vete mali. Ka, naʻá na fetalanoaʻaki mo ha faifekau Kalisitiane ʻo fekauʻaki mo ʻena ngaahi palopalemá. Naʻe vave ʻene ʻiloʻi naʻe fakatuʻunga hona ngaahi faingataʻaʻia koeʻuhi ko e faikehekehe ʻo e ʻātakai naʻá na tupu hake mo iá.

Ko e fakatātaá, koeʻuhi ko Bob naʻe tupu hake ia mei ha fāmili ko e kakai ngāue poto he ngaohi meʻá pea naʻá ne fai ʻa e ngāue pehe ní, naʻá ne saiʻia ke kai pongipongi lelei ange ʻi he pongipongi kotoa pē. Ko Jean, naʻe tupu hake ia mei ha fāmili ʻo e kakai ngāue fakaʻōfisí, pea naʻá ne ʻatu kia Bob ha ipu kofi mo e tousi pē. Ko ia ko e kē ia naʻe fai ʻo kau ki he kai pongipongí ʻo ne iku ai ki ha mamahi lahi!

Naʻe fiemaʻu leva kia Bob mo Jean ke fakaleleiʻi ʻena fetuʻutakí. Kaekehe, ko e tupuʻanga moʻoni ʻo ʻena faingataʻaʻiá naʻe loloto lahi ange. “ʻOkú mo fevakaiʻaki ʻo fakatatau ki he meʻa ʻoku ʻasi ʻia 1 Kolinitō 13:4?” ko e fehuʻi ia ʻa e faifekaú. ʻOku pehē ni hono lau ʻo e konga Tohitapú: “Ko ʻofa ʻoku ne angamokomoko, mo angalelei. Ko ʻofa ʻoku ʻikai, te ne meheka, ʻoku ʻikai te ne fai pe ke ongoongoa, ʻoku ʻikai te ne fakafuofuolahi.” ʻOku pehē ʻe he veesi hono hokó ko ʻofa “ʻoku ʻikai te ne fai taʻetāu, ʻoku ʻikai te ne kumi ʻene lelei aʻana, ʻoku ʻikai te ne fakaʻita, ʻoku ʻikai te ne lau ʻa e kovi.” Naʻe loto-lelei fakatouʻosi ʻa Bob mo Jean ke ngāueʻaki ʻa e ngaahi lea ko ʻení ʻi hona vahaʻangataé.

Ko e ngaahi palopalema ʻa e ongo meʻa mali ko ʻení naʻe fiemaʻu tefito ha fakaleleiʻanga fakalaumālie. Koeʻuhi ko e holi ʻa Bob mo Jean ke tauhimaʻu ha vahaʻangatae lelei mo e ʻOtuá, sinoemeʻa naʻá na fiemaʻu ke ngāueʻaki ʻa e ngaahi tefitoʻi moʻoni ʻo e Tohitapú pea ke na ʻiloʻi “ka ʻikai langa ʻe Sihova ʻa e fale, ko e ongosia ʻa e kau langa ko e kulanoa pe.” (Sāme 127:1) Ko e Sam 127 veesi 3 ki he 5 ʻoku lave ki he langa hake ʻo e fāmilí. Pea ʻoku hoko ʻa e lavameʻa lahi tahá ʻi hono poupouʻi ʻa e fiefia ʻi he ʻapí mei hono fakamuʻomuʻa ʻa e ʻOtuá ʻi he moʻui fakafāmilí.​—ʻEfesō 3:14, 15.

Ko e Meʻa ʻOku Kau ki Hono Fakamuʻomuʻa ʻa e ʻOtuá

Ko hono fakamuʻomuʻa ʻa e ʻOtuá ʻi hoʻo moʻui fakafāmilí ʻoku toe laka atu ia ʻi he palovepí, “Ko e fāmili ʻoku lotu fakatahá ʻoku nau taha.” Fakatatau ki he makasini ko e Family Relations, ʻoku tui ʻa e tokolahi ko e “lotú ʻokú ne ʻai ke fakafaingofua ʻa e felāveʻiʻaki fakafāmili pau mo totonú pea ʻokú ne ʻai ke lelei ange ʻa e fiemālie ʻi he moʻui ʻo hono kau mēmipá.” Ka ko e kau mo faʻa ʻalu ki he lotú ʻoku ʻikai ke tatau ia mo hono fakamuʻomuʻa ʻa e ʻOtuá. Ko e tokolahi ʻoku nau kau ki ha lotu koeʻuhi ko e meʻa ʻoku anga ki ai, ko e meʻa talatukufakaholo ʻi he fāmilí, pe ko e ʻaonga fakasōsialé. ʻOku siʻisiʻi ʻaupito ʻa e tākiekina ʻa e ʻOtuá ʻi heʻenau moʻuí ʻi he ʻaho ki he ʻaho. Ko e meʻa mahuʻinga angé, ʻoku ʻikai ko e lotu kotoa pē ʻoku “maʻa mo taʻe hano ʻuli ʻi he ʻafio ʻa e ʻOtua ko ʻetau Tamai.”​—Sēmisi 1:27.

Ke fakamuʻomuʻa ʻa e ʻOtuá ʻi heʻetau moʻui fakafāmilí, ko kitautolu mo hotau ngaahi ʻofaʻangá kuo pau ke tau lotu kia Sihova, “ko e fungani maʻolunga ʻi mamani kotoa pe,” ʻo fakatatau ki he ngaahi meʻa ʻokú ne fiemaʻu. (Sāme 83:​18, PM) Ko e ʻAlo ʻo e ʻOtuá, ko Sīsū Kalaisi naʻá ne pehē: “Ka ʻoku ʻunu mai ha taimi​—ʻio, kuo hoko ni​—ʻa ia ko e kakai ʻoku lotu moʻoni te nau fai ʻi laumalie mo fai ʻi moʻoni ʻenau lotu ki he Tamai: he ko e Tamai foki ʻoku ne kumi ʻa e faʻahinga ko ia, ʻakinautolu ʻoku matuʻaki lotu kiate ia. Ko e ʻOtua ko e laumālie: pea ko kinautolu ʻe hū kiate ia, kuo pau ke nau fai ʻi laumālie pea fai ʻi moʻoni ʻenau hu.” (Sione 4:​23, 24) Ke lotu ki he ʻOtua ko Sihová “ʻi laumālie,” ko ʻetau ngāue toputapu kiate iá kuo pau ke ueʻi ia ʻe he loto ʻoku fonu ʻi he ʻofa mo e tui. (Maʻake 12:​28-31; Kalētia 2:16) Ko e lotu kia Sihová ʻi he “moʻoni” ʻoku fiemaʻu ke tau liʻaki ʻa e ngaahi loi fakalotú pea ke muimui kakato ki hono finangaló ʻa ia ʻoku fakahā ʻi he Tohitapú. ʻOku ʻikai te tau malava ke fakamuʻomuʻa ʻa e ʻOtua ko Sihová kaeʻoua kuo fua tatau ʻa e lotu ʻoku tau kau ki aí mo ʻene ngaahi tuʻungá.a Ko e hā ʻa e niʻihi ʻo e ngaahi meʻá ni? Pea ʻe fēfē haʻane ʻaonga ʻi hono ngāueʻaki ʻi ho fāmilí?

Ko Hono Fakamuʻomuʻa ʻa e ʻOtuá ʻi he Tuʻunga ko ha Husepāniti

ʻOku pehē ʻe he Tohitapú ʻi he 1 Kolinitō 11:​3: “Ko e ʻulu ʻo e tangata kotoa pe ko Kalaisi; pea ko e ʻulu ʻo e fefine ko e tangata; pea ko e ʻulu ʻo Kalaisi ko e ʻOtua.” Kapau ko ha husepāniti koe, ʻokú ke maʻu ʻa e fatongia kuo foaki ʻe he ʻOtuá ke ke hoko ko e tokotaha tefito ke fai ʻa e ngaahi fili ʻi ho fāmilí. Ka ʻoku ʻikai ke fakangofua ai ha husepāniti ke ne anga-fakafēʻatungia pe anga-fakaaoao.

ʻOku fakalototoʻaʻi ʻe he Tohitapú ʻa e ngaahi husepānití ke nau fakakaukauʻi ʻa e ongoʻi ʻo honau ngaahi uaifí he taimi ʻoku fai ai ʻa e ngaahi fili ʻoku kaunga kiate kinautolu. (Fehoanaki mo Sēnesi 21:​9-14.) Ko hono moʻoní, ʻoku naʻinaʻi mai ʻe he Tohitapu kiate kitautolu kotoa ke ‘ʻoua naʻa taki taha tokanga ki heʻetau meʻa ʻatautolu pē, ka ki he meʻa ʻa e kakai kehe foki.’ (Filipai 2:​2-4) ʻI he ʻikai ke kau ai ha tefitoʻi moʻoni faka-Tohitapú, ko ha husepāniti Kalisitiane te ne faʻa ʻunua ki he manako ʻo hono uaifí. ʻI hono maʻu ha tokanga fakaeia ki hono uaifí, te ne toe fakapapauʻi foki ʻoku ʻikai ke fuʻu kavengaʻia ia ʻi hono ngaahi fatongia. Ko e fakatātaá, te ne lava nai ʻo tokoni ki hono uaifi ʻi he ngaahi ngāue fakaʻapí, tautefito ʻo kapau ʻoku ngāue ʻa e uaifí.

Naʻe tohi ʻe he ʻapositolo ko Paulá ʻo pehē: “ʻOku totonu ke pehe foki ʻa e ʻofa ʻa e ngaahi husepaniti ki siʻonau ngaahi uaifi, he ko siʻonau sino kinautolu. Ko ia ʻoku ne ʻofa ki hono uaifi ʻoku ne ʻofa kiate ia. Seuke, ʻanefē ia ʻa e fehiʻa ʻa ha taha ki hono kakano oʻona; kaekehe ʻoku ne fafanga mo tauhi ia, ʻo hangē foki ko e fai ʻa Kalaisi ki he siasi.” (ʻEfesō 5:​28, 29) ʻOku feangai mo e kau mēmipa ʻo e fakatahaʻangá ʻa Sīsū Kalaisi ʻi he founga anga-ʻofa.

ʻOku taau ke tokangaʻi foki ʻa e akonaki ʻa e ʻapositolo ko Pitá: “Pehe foki mo kimoutolu tangata [ngaahi husepāniti], ko hoʻomou nonofo mo e fefine [ngaahi uaifi] ke fai fakakaukauʻi, he ko e hama vaivai; ʻo mou tuʻutuʻuni hanau fakaʻapaʻapa, ʻo tāu mo ha kakai ʻoku nau kaungāʻea foki mo kimoutolu ki he kelesi ko e moʻui; koeʻuhi ke ʻoua naʻa taʻofi hoʻomou ngaahi lotu.” (1 Pita 3:7) ʻIkai ko e meʻa ʻoku fakatupu fakakaukau fakamātoato ke ʻiloʻi ko e feangai mo hoto uaifí ʻoku fai ʻi ha founga taʻe anga-ʻofa ʻe lava ke ne taʻofi ʻa e ngaahi lotu ʻa e husepānití? ʻIo, ke fanongo pea tali ʻe he ʻOtua ʻa ʻene ngaahi lotú kuo pau ki ha husepāniti ke ne feangai mo hono uaifí ʻi he anga-ʻofa.

Ko hono fakamuʻomuʻa ʻa e ʻOtuá ʻokú ne toe laveʻi ʻa e vahaʻangatae ʻa ha tamai mo ʻene fānaú. ʻOku totonu ke ne mātuʻaki tokanga lahi ʻo kau ki he tuʻunga lelei fakalaumālie ʻo ʻene fānaú. Ka, ʻi ha savea lahi ʻi ʻAmeliká, ko e vaeua pē ʻo e kakai tangata naʻa nau pehē “ko e kau ki ha ako ʻo e Tohitapú pe ha kulupu ke fetalanoaʻaki” ko e meʻa ‘mahuʻinga lahi taha ʻi he tupu fakalaumālie ʻo honau ngaahi fāmilí.’ Ko e toengá naʻa nau lave ki he faʻahinga meʻa ʻo hangē ko e “mamata mo fanongo ki he ngaahi lotu ʻoku fakamafola atú” pe ‘fakakaukau pē ki he ʻuhinga ʻo e moʻui.’

Kaekehe, ʻoku fakahā ʻe he Tohitapú ki he ngaahi tamaí: “ʻOua te mou fakaʻitaʻi hoʻomou fanau; kae akonekina ʻaki ʻa e tautea mo e valoki ʻa e ʻEiki [Sihova].” (ʻEfesō 6:4) ʻI he lotolotonga ʻo e Kau Fakamoʻoni ʻa Sihová, ʻoku ʻamanekina mei he ngaahi tamaí ke nau takimuʻa ʻi he lotu fakafāmilí. Ko e kakai tangata pehē ʻoku nau fakamuʻomuʻa ʻa e ʻOtuá ʻi he moʻui fakafāmilí ʻaki ʻenau fai tuʻumaʻu ha ako Tohitapu fakafāmilí, maʻu ʻa e ngaahi fakataha faka-Kalisitiané, pea ke fai fakatatau ki he ngaahi fiemaʻu kehe ʻa e Tohitapú.

Fakamuʻomuʻa ʻa e ʻOtuá ʻi he Tuʻunga ko ha Uaifi

Kapau ko ha uaifi koe, te ke lava ke fakamuʻomuʻa ʻa e ʻOtuá ʻaki hoʻo poupou ki ho husepānití ʻi hono ngafa ko e ʻulu ʻo e fāmilí. ʻOku pehē ʻe he Tohitapú: “ʻA e kau fefine, mou anganofo ki homou ngaahi husepaniti, ʻa ia naʻe tāu leva ke mou fai he ko e kakai lotu.” (Kolose 3:18) ʻE fuʻu faingataʻa nai ʻeni ʻo kapau ko e tangatá ʻoku anga-taʻe fie-fetuʻutaki pe taʻe loto-māfana ke ne takimuʻa ʻi he fai ʻa e lotu fakafāmilí. Tatau ai pē pe ko e hā ʻa e meʻa ʻoku hokó, ko hono faʻa fakatokangaʻi maʻu pē hono ngaahi mele, pe ko e meʻa ʻoku kovi angé ko e talituʻu kiate iá ʻe fakalahi ange ai pē ʻa e mafasia fakafāmilí.

ʻOku lea ʻa Palōvepi 14:​1, PM ʻo pehē: “Oku laga hake hono fale e he fefine kotoabe oku boto: ka oku holoki hifo ia e he vale aki hono nima.” Ko e founga ʻe taha ʻe malava ai ʻe he fefine mali fakapotopoto moʻoní ke ne fakamuʻomuʻa ʻa e ʻOtua mo “laga hake hono fale” ko e hoko ʻo anganofo ki hono husepānití. (1 Kolinitō 11:3) Fakataha mo e “lao ʻofa ʻi hono funga ʻelelo,” ʻokú ne taʻofi ai ʻene faʻa fakaangaʻi taʻe totonu ʻa hono husepānití. (Palōvepi 31:26) ʻOkú ne toe ngāue mālohi ke lavameʻa ʻa e ngaahi fili ʻoku fai ʻe hono husepānití.

Ko ha toe founga ʻe taha ke fakamuʻomuʻa ai ʻe he fefine malí ʻa e ʻOtuá ko ʻene hoko ko e uaifi faʻa ngāue. Ko e moʻoni, ʻo ka kuo pau ke ne ngāue fakamāmani, ʻe ʻikai nai ke ʻi ai hano taimi pe ko hano ivi ke tauhi hono ʻapí ʻo hangē ko ia ʻokú ne saiʻia aí. Te ne kei lava ke feinga pē ke hangē ko ha “uaifi fita” ʻa ia ʻoku lea ʻo kau ki ai ʻa e Tohitapú: “ʻOku ne lama ʻa e ngaahi ʻalunga ʻo hono famili; pea ʻoku ʻikai te ne kai ʻa e meʻakai ʻa e fakapikopiko.”​—Palōvepi 31:​10, 27.

Sinoemeʻa, ʻoku fiemaʻu ki ha uaifi ke ne tauhimaʻu ke fakamuʻomuʻa ʻi heʻene moʻuí ʻa e lotu ki he ʻOtuá. Ko e tokolahi ʻo e kakai ko ʻenau ʻuluaki ʻaʻahi ia ki he Kingdom Hall ʻo e Kau Fakamoʻoni ʻa Sihová ʻoku nau lea ʻo kau ki he maʻa ʻo e fōtunga ʻo e fānaú. Ko e ngāue ʻa e uaifí ki he meʻá ni ʻoku taʻealafakatataua. Ka kuo pau ke ne toe feinga ke tauhimaʻu hono tuʻunga fakalaumālié ʻaki ʻene lotu, ako, mo ngāue ki he ʻOtuá.

Fakamuʻomuʻa ʻa e ʻOtuá ʻi he Tuʻunga ko e Kau Talavou

Ko e kupu ʻi he Adolescent Counselor ʻoku pehē: “Kuo hehema ʻa e fānaú ke fakatupu ʻa e ngaahi anga ʻo e fakakaukau mo e fakakaukau kehe ʻa ia kuo fakangofuaʻi ai kinautolu ke nau puleʻi ʻenau ngaahi mātuʻa. . . . Koeʻuhi ʻoku nau nofo ʻi ha sōsaieti ʻokú ne fakamamafaʻi mo fakalāngilangiʻi ʻa e fakafiemālie vave taha pea mo e koloa fakamatelié, ko e kau talavoú ʻoku nau fakatupu ʻa e anga ʻo e fakakaukau ko e ‘ʻOku ou fiemaʻu ia he taimí ni.’” Kapau ko ha tokotaha talavou koe, ʻoku pehē nai ʻa e anga ʻo hoʻo fakakaukaú?

ʻOku pehē ʻia Kolose 3:20: “ʻA e fanau, mou talangofua ki hoʻomou matuʻa ʻi he meʻa kotoa pe, he ko e meʻa fakaʻofoʻofa ia ʻi he lotu.” Ko ha taha kei taʻu siʻi ʻokú ne vakai atu ki he talangofua peheé ko ha fiemaʻu fakaʻotua ia te ne ngāue fakataha mo ʻene ongo mātuʻá. Ko e fakatātaá, ʻe ʻikai te ne angatuʻu fakapulipuli kiate kinaua ʻaki ʻene feohi mo e kaungāako ʻa ia ʻoku ʻikai te na loto-lelei ki aí; pea ʻe ʻikai foki te ne feinga ke kākaaʻi ha taha ʻo e ongo mātuʻá kae malava ke ne fai ʻa e founga pē ʻaʻaná. (Palōvepi 3:32) ʻI he lelei ange ke ʻoua ʻe fai pehē ha taha pē kei siʻi ʻa ia ʻokú ne fakamuʻomuʻa ʻa e ʻOtuá ʻi heʻene moʻuí te ne ʻulutukua ki he tataki anga-ʻofa fakaemātuʻá.

ʻAi ke Fakamuʻomuʻa ʻa e ʻOtuá!

Tatau ai pē pe ko e hā ʻa e tuʻunga ʻoku tau ʻi ai ʻi he siakale ʻo e fāmilí, ʻoku fiemaʻu ke tau fakamuʻomuʻa ʻa e ʻOtuá ʻi he moʻuí pea ke fakatupu ʻa e vahaʻangatae vāofi kiate ia. ʻOkú ke fai pehē ʻa koe mo ho fāmilí?

ʻI he “kuonga fakamui” ni, ko kitautolu kotoa ʻoku tau fehangahangai mo e “ngaahi taimi faingataʻa.” (2 Tīmote 3:​1-5) Ka neongo ia, ʻoku malava ke tupu lelei fakalaumālie pea ke hao moʻui atu ʻi he ngataʻanga ʻo e ngaahi meʻa ko ia ʻoku tuʻu ní. (Mātiu 24:​3-14) ʻI hono fai ʻo fehoanaki mo e ʻilo kānokano ʻo e Tohitapú, ko koe mo ho fāmilí te mou malava ke maʻu ʻa e ʻamanaki ʻo e moʻui taʻengata ʻi he māmani palataisi. (Luke 23:43; Sione 17:3; Fakahā 21:​3, 4) ʻIo, ʻe malava ke pehē ʻení ʻo kapau te ke fakamuʻomuʻa ʻa e ʻOtuá ʻi hoʻo moʻui fakafāmilí.

[Fakamatala ʻi lalo]

[Fakatātā ʻi he peesi 5]

ʻOku fakahoungaʻi lahi ʻa e uaifi fita

[Fakatātā ʻi he peesi 7]

ʻOku fakalototoʻaʻi ʻe he Tohitapú ʻa e ngaahi husepānití ke nau tataki ʻi he lotu fakafāmilí