ʻOku Tokanga Mai ʻa e ʻOtuá Kiate Koe

KO Mary, ko ha fefine Kalisitiane naʻe faingataʻaʻia lahi ʻi heʻene moʻuí ʻi hono taʻu 40 tupú. Naʻe iku ʻa e tono ʻa hono husepānití ki he vete mali ʻo lahi hake ʻi he hongofuluʻi taʻu kuo maliu atú. ʻI he hili iá, naʻe fāinga ʻa Mary ke fakahoko ʻa hono ngafa ki heʻene fānau ʻe toko faá ʻi hono tuʻunga ko ha tokotaha mātuʻa taʻehoa. Ka ʻokú ne kei toko taha pē, pea ʻi he taimi ʻe niʻihi ʻoku hā ngali faingataʻa ke fuesia ʻa e nofo toko tahá. ʻOku fifili ʻa Mary, ‘ʻOku ʻuhinga ʻení ʻoku ʻikai ke tokanga mai ʻa e ʻOtuá ia kiate au pe ko ʻeku fānau ʻoku hala he tamaí?’

Tatau ai pē pe kuó ke hokosia ha faingataʻaʻia meimei tatau mo ia pe ʻikai, ʻoku pau ʻokú ke kaungāongoʻi fakataha mo e ngaahi ongoʻi ʻa Mary. Ko kitautolu hono kotoa kuo tau kātekina ha ngaahi tuʻunga faingataʻa, pea kuo tau fifili nai ki he taimi mo e founga tofu pē ko ia ʻe ngāue mai ai ʻa Sihova maʻatautolú. Ko e niʻihi ʻo e ngaahi meʻa ko ʻeni ʻoku hokosiá ko e tupu fakahangatonu ia mei heʻetau pīkitai ki he ngaahi lao ʻa e ʻOtuá. (Mātiu 10:​16-​18; Ngāue 5:​29) Ko e ngaahi hokosia ʻe niʻihi ko e ngaahi nunuʻa ia ʻo ʻetau hoko ko e faʻahinga taʻehaohaoa ʻoku nofo ʻi ha māmani ʻoku puleʻi ʻe Sētané. (1 Sione 5:​19) Naʻe tohi ʻe he ʻaposetolo ko Paulá: “Oku toʻetoʻe mo feiga i he lagā fakataha a mamani kotoabe.”​—Loma 8:​22, PM.

Kae kehe, ko e moʻoniʻi meʻa ko ia ʻo hoʻo fehangahangai mo ha ʻahiʻahi mamafá ʻoku ʻikai ke ʻuhinga iá kuo liʻaki koe ʻe Sihova pe ʻoku ʻikai ke mahuʻingaʻia ia ʻi ha lelei maʻau. ʻOku malava fēfē ke ke fakapapauʻi ʻeni? Ko e hā ʻokú ne fakahaaʻi ʻoku tokanga mai ʻa e ʻOtuá kiate koe?

Ko ha Fakatātā mei he Kuonga Muʻá

ʻOku ʻomai ʻe he Tohitapú ʻa e fakamoʻoni mahino ʻo e tokanga mai ʻa Sihova ki heʻene kakaí ʻi honau tuʻunga fakatāutahá. Fakakaukau atu kia Tēvita. Naʻe ʻi ai ha mahuʻingaʻia fakafoʻituitui ʻa Sihova ʻi he kiʻi tauhi-sipi kei talavou ko ʻení, ʻo ʻiloʻi ia ko ha “taha ʻoku tatau mo hono finangalo.” (1 Sāmiuela 13:14) Ki mui mai, ʻi he taimi naʻe pule ai ʻa Tēvita ko e tuʻí, naʻe talaʻofa ʻa e ʻOtuá kiate ia: “Kuo u ʻiate koe ʻi ho ngaahi fononga kotoa.”​—2 Sāmiuela 7:9.

ʻOku ʻuhinga ʻení naʻe taki ʻa Tēvita ʻi ha moʻui “fakaʻofoʻofa,” ʻo ʻatā mei ha faingataʻa pē? ʻIkai, naʻe fehangahangai ʻa Tēvita mo e ngaahi ʻahiʻahi kakaha fakatouʻosi ʻi he ki muʻa pea mo e lolotonga ʻa ʻene pule fakatuʻí. ʻI he ngaahi taʻu ʻe niʻihi ki muʻa pea hoko ʻo tuʻí, naʻe tuli taʻetuku ia ʻe he Tuʻi loto-fakapō ko Saulá. ʻI he lolotonga ʻo e vahaʻa taimi ko ʻeni ʻo ʻene moʻuí, naʻe tohi ʻe Tēvita: “ʻOku lotolotoi ʻi ha fanga laione ʻeku moʻui . . . ko e hako ʻo houʻeiki, ko e tao mo e ngahau honau nifo.”​—Sāme 57:4.

Kae kehe, ʻi he kotoa ʻo e faingataʻaʻia ko ʻení naʻe tui pau pē ʻa Tēvita ki he tokanga fakafoʻituitui mai ʻa Sihová. “Ko ʻeku ʻaunoa ni ʻoku fakalau ʻe he ʻAfiona,” ko ʻene lea ia ʻi ha lotu kia Sihova. ʻIo, naʻe hangē kia Tēvita naʻe hanga ʻe Sihova ʻo lēkooti ʻa e ʻahiʻahi fakamamahí kātoa. Naʻe tānaki atu leva ʻe Tēvita: “ʻE, ke ke ʻai hoku loʻimata ki hoʻo hina na​—ʻIkai ʻoku tuʻu ʻi hoʻo tohi na?”a (Sāme 56:8) ʻI he fakatātaá ni, naʻe fakahaaʻi ai ʻe Tēvita ʻa e loto-maʻu naʻe lāuʻilo ʻa Sihova ʻo ʻikai ngata pē ʻi he tuʻunga naʻe hokó kae toe pehē foki ki he uesia fakaeongo aí.

ʻI he fakaʻau atu ki he ngataʻanga ʻo ʻene moʻuí, naʻe lava ai ʻe Tēvita ke ne tohi mei he meʻa naʻá ne hokosia tonu: “ʻOku meia Sihova ʻa e maʻu ʻo e laka ʻa e tangata; pea ʻoku ne ʻofa ki hono ʻaluʻanga. Neongo te ne humu ʻe ʻikai te ne lafalafa: he ʻoku pukepuke ʻe Sihova hono nima.” (Sāme 37:​23, 24) ʻOku malava mo koe ke ke loto-maʻu neongo ʻa e tuʻukāivi mo e hokohoko atu ho ngaahi ʻahiʻahí, ʻoku fakatokangaʻi ia ʻe Sihova mo mahuʻingaʻia ʻi hoʻo kātakí. Naʻe tohi ʻe Paula: “Oku ikai taeagatonu ae Otua, ke ne fakagaloʻi hoo mou gaue moe feiga ofa, aia kuo mou fakaha ki hono huafa, i hoo mou tauhihiʻi ae kaiga maonioni, mo hoo mou gaue.”​—Hepelū 6:​10, PM.

ʻIkai ko ia pē, ʻoku malava ʻe Sihova ke ne ngāue maʻau ʻaki hono ʻoatu kiate koe ʻa e mālohi ke ke kātekina ha faingataʻaʻiaʻanga pē ʻoku tuʻu ʻi ho ʻalungá. “Ko e angatonu ʻoku lahi ʻene ngaahi mamahi,” naʻe tohi ia ʻe Tēvita, “ka ʻoku hamusi ia mei ai kotoa ʻe he ʻEiki.” (Sāme 34:19) Ko e moʻoni, ʻoku tala mai ʻe he Tohitapú kiate kitautolu ko e ongo foʻi fofonga ʻo Sihová “ʻoku feleleaki ʻi mamani katoa, ke taukapoʻi ʻa e kakai ʻoku haohaoa loto kiate ia.”​—2 Kalonikali 16:9.

Kuo Tohoaki Koe ʻe Sihova

Ko e toe fakamoʻoni ki he tokanga fakafoʻituitui mai ʻa Sihová ʻoku lava ke maʻu ia ʻi he ngaahi lea ʻa Sīsuú. “ʻOku ʻikai lava ʻe ha taha ke haʻu kiate au,” ko ʻene leá ia, “ka ʻi he tohoaki ia ʻe he Tamai naʻa ne fekau mai au.” (Sione 6:44) ʻIo, ʻoku tokoniʻi ʻe Sihova ʻa e kakaí fakatāutaha ke nau ngāueleleiʻaki ʻa e ngaahi ʻaonga ʻo e feilaulau ʻa Kalaisí. ʻI he founga fē? ʻI he tuʻunga lahi, ʻoku fakafou ia ʻi he ngāue fakamalanga ʻo e Puleʻangá. Ko e moʻoni, ʻoku hoko ʻa e ngāué ni “koe mea fakamooni ki he buleaga kotoabe,” ka ʻoku aʻu ia ki he kakaí ʻi ha tuʻunga fakatāutaha. Ko e moʻoniʻi meʻa ko ia ʻokú ke fanongo mo fai ha tali ki he pōpoaki ʻo e ongoongo leleí ko e fakamoʻoni ia ʻo e tokanga fakafoʻituitui mai ʻa Sihova kiate koé.​—Mātiu 24:​14, PM.

Fakafou ʻi he laumālie māʻoniʻoní, ʻoku tohoaki ai ʻe Sihova ʻa e faʻahinga ki hono ʻAló pea mo e ʻamanaki ʻo e moʻui taʻengatá. ʻOku fakaivia ʻe he meʻá ni ʻa e tokotaha taki taha ke ne maʻu mo ngāueʻaki ʻa e ngaahi moʻoni fakalaumālié neongo ha faʻahinga fakangatangata mo e taʻehaohaoa tukufakaholó. Ko hono moʻoní, heʻikai lava ke mahino ki ha taha ʻa e ngaahi taumuʻa ʻa e ʻOtuá ʻo ʻikai kau ai ʻa e tokoni ʻa e laumālie ʻo e ʻOtuá. (1 Kolinitō 2:​11, 12) Hangē ko ia naʻe tohi ʻe Paula ki he kau Tesalonaiká, “oku ikai maʻu kotoabe ae tui.” (2 Tesalonaika 3:​2, PM) ʻOku foaki ʻe Sihova ʻa hono laumālié ki he faʻahinga pē ʻoku nau fakahāhaaʻi ha loto-lelei ke tohoaki ʻe iá.

ʻOku tohoaki ʻe Sihova ʻa e kakaí koeʻuhi ʻokú ne ʻofa ʻiate kinautolu tāutaha mo fiemaʻu kinautolu ke nau aʻusia ʻa e fakamoʻuí. Ko ha fakamoʻoni mālohi ē ʻo e tokanga fakafoʻituitui ʻa Sihová! Naʻe pehē ʻe Sīsū: “ʻOku ʻikai ko e tuʻutuʻuni ʻa hoʻomou Tamai ʻoku ʻi Hevani ke mole ha toko taha.” (Mātiu 18:14) ʻIo, ʻi he vakai mai ʻa e ʻOtuá ʻoku mahuʻinga ʻa e tokotaha kotoa pē ʻi he tuʻunga ko ha tokotaha mavahe. Ko e ʻuhinga ia naʻe lava ai ʻa Paula ke ne tohi: “ʻA ʻEne ʻAfio te ne ʻatu ki he tangata taki taha, ʻo fakatatau ki heʻene ngaue.” (Loma 2:6) Pea naʻe pehē ʻe he ʻaposetolo ko Pitá: “ʻOku ʻikai ke filifilimanako ʻa e ʻOtua: ka neongo pē ko e fēʻia ʻa e kakai, ka ʻilonga ʻa ia [ko e tokotaha tāutaha] ʻoku ʻapasia kiate ia, pea ngāue fai ki he totonu, ʻoku ngofua ke ne aʻu mai kiate ia.”​—Ngāue 10:​34, 35.

Ko e Ngaahi Mana ʻa Sīsuú

Naʻe fakahāhaaʻi fakatupu maongo moʻoni ʻa e mahuʻingaʻia fakafoʻituitui ʻa e ʻOtuá ʻi he faʻahinga ʻo e tangatá ʻi he ngaahi mana naʻe fakahoko ʻe hono ʻAló, ko Sīsū. Ko e ngaahi fakamoʻui ko ʻení naʻe kau atu ki ai ʻa e ongoʻi loloto. (Maʻake 1:​40, 41) Koeʻuhi ko Sīsuú “ʻoku ʻikai lava . . . ke [ne] fai ʻiate ia ha momoʻi meʻa, ngata pe ʻi he meʻa ʻoku ne vakai ʻoku fai ʻe he Tamai,” ʻoku hanga ʻe heʻene manavaʻofá ʻo fakahaaʻi lelei mai ʻa e tokanga anga-ʻofa ʻa Sihova ki he tokotaha taki taha ʻo ʻene kau sevānití.​—Sione 5:​19.

Fakakaukau atu ki he fakamatala ʻo ha mana naʻe fakahoko ʻe Sīsū, naʻe hiki ʻi he Maʻake 7:​31-​37. ʻI hení naʻe fakamoʻui ai ʻe Sīsū ha tangata naʻe tuli pea naʻe leʻovale. Naʻá ne “taki [ʻa e tangatá] mei he kakai ʻo fakaekinaua pe,” ko e fakamatala ia ʻa e Tohitapú. Hili iá, “pea ne tangaki hono mata ki langi, ʻo ne mapuhoi, ʻo ne pehe ki he tangata, Efata, ʻa ia ko hono hiki, Ke ava mai.”

Ko e hā naʻe taki mamaʻo ai ʻe Sīsū ʻa e tangatá ni mei he fuʻu kakaí? Sai, ʻoku ngalingali nai ko ha tokotaha tuli ʻa ia ʻoku ʻikai ke loko malava ke lea, te ne ongoʻi mā ʻi he ʻao ʻo e kau mamatá. Naʻe fakatokangaʻi nai ʻe Sīsū ʻa e taʻefiemālie ʻa e tangatá ni, pea ko e ʻuhinga ia naʻá ne fili ai ke fakamoʻui ia fakaekinaua pē. “Ko e foʻi talanoá fakakātoa,” ʻoku pehē ʻe ha tokotaha mataotao ʻi he Tohitapú, “ʻokú ne fakahaaʻi māʻalaʻala ʻaupito mai kiate kitautolu naʻe ʻikai ke fakakaukau pē ʻa Sīsū ki he tangatá ni ko ha tokotaha mahaki; naʻá ne fakakaukau kiate ia ʻi he tuʻunga ko ha tokotaha. Naʻe ʻi ai ha fiemaʻu makehe ʻa e tangatá mo haʻane palopalema makehe, pea ʻaki ʻa e fakakaukau tokanga lahi taha ki aí naʻe feangai ai ʻa Sīsū mo ia ʻi ha founga naʻe fakaalaala fekauʻaki mo e ngaahi ongoʻi ʻa e tangata ko iá pea ʻi ha founga naʻe malava ke ne mahinoʻi.”

ʻOku fakahaaʻi ʻe he fakamatalá ni naʻe ʻi ai ha tokanga fakafoʻituitui ʻa Sīsū ki he kakaí. ʻOku lava ke ke fakapapauʻi ʻoku pehē pē ʻa ʻene mahuʻingaʻia mai ʻiate koé. Moʻoni, ko ʻene pekia fakaefeilaulaú ko ha fakahaaʻi ia ʻo ʻene ʻofa ki he māmani fakakātoa ʻo e faʻahinga ʻo e tangatá ʻoku ala huhuʻí. Ka, ʻoku malava ke ke ʻai pē ia kiate koe, ʻo hangē ko ia naʻe fai ʻe Paulá, ʻa ia naʻá ne tohi: “Ki he ʻAlo ʻo e ʻOtua . . . naʻa ne ʻofeina au, mo ne foaki ia ʻe ia ke pekia koeʻuhi ko au.” (Kalētia 2:​20, fakaʻītali ʻamautolu.) Pea koeʻuhi naʻe pehē ʻe Sīsū ko ‘ia kuo ne mātā iá, kuo ne mātā ʻa e Tamaí,’ ʻoku lava ke tau fakapapauʻi ai kuo ʻia Sihova ʻa e mahuʻingaʻia tatau pē ʻi he tokotaha taki taha ʻo ʻene kau sevānití.​—Sione 14:9.

Hoko ʻa Sihova ko ha Tokotaha-Fakapale

Ko hono maʻu ʻa e ʻiloʻi ʻo e ʻOtuá ʻoku kau ai ʻa e hoko ʻo ʻiloʻi ʻa e tafaʻaki taki taha ʻo hono ʻulungaangá ʻo hangē ko ia ʻoku fakahaaʻi mai ʻi he Tohitapú. Ko e huafa Sihová ʻoku ʻuhingá “ʻOkú Ne Fakatupunga ke Hoko,” ʻi he ʻuhinga ʻoku malava ʻa Sihova ke ne hoko ki ha meʻa pē ʻokú ne fili ke fai koeʻuhi ke fakahoko hono finangaló. ʻI he faai mai ʻa e hisitōliá, kuó ne fatongiaʻaki ʻa e ngaahi ngafa kehekehe, kau ai ʻa e ngaahi fatongia ʻo e Tokotaha-Fakatupu, Tamai, ʻEiki Hau, Tauhi-Sipi, Sihova ʻo e ngaahi kau tau, Tokotaha-Talilotu, Fakamaau, Faiako Māʻongoʻonga, mo e Koeli.b

Ke mahino ʻa e ʻuhinga kakato ʻo e huafa ʻo e ʻOtuá, kuo pau ke tau toe ʻiloʻi ʻa Sihova ʻi hono ngafa ko e Tokotaha-Fakapale. Naʻe tohi ʻe Paula: “Ka ʻo ka taʻekau ʻa e tui, ʻoku ʻikai momoʻi lava haʻate fakahōifua ia: he ko ia ʻoku ʻunuʻunu ki he ʻOtua, kuo pau ʻoku ne tui ʻoku ʻi ai ia, pea te ne hanga ʻo totongi kiate kinautolu ʻoku kumi hākili kiate ia.”​—Hepelū 11:6.

Kuo talaʻofa ʻe Sihova ʻa e moʻui taʻengata ʻi ha māmani palataisi ki he faʻahinga he ʻahó ni kuo nau fili ke tauhi ia ʻaki ʻa e lotó kotoa. ʻOku ʻikai ko ha siokita ia ke fakatuʻotuʻa atu ki he fakahoko ʻo e talaʻofa māʻongoʻonga ko iá, pea ʻoku ʻikai ko ha fiematamuʻa ia ʻa ʻete fakaʻuta atu ki haʻate moʻui ai. Ko Mōsese “naʻa ne sio fakamamaʻu atu ki he totongi.” (Hepelū 11:26) Naʻe pehē pē mo e fakatuʻamelie loto-vēkeveke ʻa Paula ki he fakahoko ʻo e talaʻofa ʻa e ʻOtuá ki he kau Kalisitiane pani mo anga-tonú. Naʻá ne tohi: “ʻOu tuli atu pe ki he ngataʻanga, ke maʻu ʻa e pale ʻo hoto ui mei ʻolunga naʻe fai ʻe he ʻOtua ʻia Kalaisi Sisu.”​—Filipai 3:14.

ʻOkú ke fakatuʻotuʻa atu nai mo koe ki he pale ʻoku talaʻofa ʻe Sihova ki he faʻahinga ʻoku kātakí. Ko e fakatuʻamelie ki he pale ko iá ko ha konga mātuʻaki mahuʻinga ia ki hoʻo ʻiloʻi ʻa e ʻOtuá pea mo hoʻo kātaki ʻi heʻene ngāué. Ko ia, fakalaulauloto fakaʻaho ki he ngaahi tāpuaki kuo tukutauhi ʻe Sihova maʻaú. Ko Mary, naʻe lave ki ai ʻi he kamataʻangá, kuó ne fai ha feinga makehe ke fai ʻa e meʻá ni. “Ko e ʻuluaki taimi ʻi heʻeku moʻuí,” ko ʻene leá ia, “naʻá ku toki talí ni ai ko e feilaulau huhuʻi ʻa Sīsuú ʻoku kaunga kiate au. ʻOku kamata ke u ongoʻi ʻoku tokanga mai ʻa Sihova kiate au ʻi hoku tuʻunga ko ha tokotaha. Kuó u hoko ko ha Kalisitiane ʻo laka hake he taʻu ʻe 20, ka naʻá ku toki kamatá ni pē ke u tui moʻoni ki he meʻá ni.”

Fakafou ʻi he ako mo e fakalaulauloto loto-moʻoni ʻi he Tohitapú, ko Mary, fakataha mo e toko laui miliona kehe, ʻoku nau hoko ʻo ʻilo ʻoku tokanga mai ʻa Sihova ki heʻene kakaí ʻo ʻikai ngata pē ʻi he tuʻunga ko ha kulupú ka ʻi honau tuʻunga fakatāutahá. Naʻe tui pau ʻa e ʻaposetolo ko Pitá ki he meʻá ni ʻo ne tohi: “Li atu ā hono kotoa ʻo hoʻomou lotomoʻua ki he [ʻOtuá] he ʻoku ne mamahiʻi kimoutolu.” (1 Pita 5:7) ʻIo, ʻoku tokanga mai ʻa e ʻOtuá kiate koe!

[Fakamatala ʻi lalo]

[Puha ʻi he peesi 6]

Ko e Toetuʻú​—Fakamoʻoni ʻOku Tokanga Mai ʻa e ʻOtuá

KO E fakamoʻoni fakatupu tui pau ʻo e mahuʻingaʻia ʻa e ʻOtuá ʻi he tokotaha taki tahá ʻoku maʻu ia ʻi he Tohitapú ʻia Sione 5:​28, 29: “ʻOku ʻunu mai ha taimi, ʻa ia ʻe fanongo ai ki hono leʻo [ʻo Sīsuú] ʻe he kakai kotoa pe ʻoku ʻi he ngaahi faʻitoka, pea te nau ʻalu atu mei ai.”

Ko e meʻa ʻoku fakatupu tokangá, ko e foʻi lea faka-Kalisi ko e mne·meiʹon (fonualoto ʻoku manatua) ʻoku ngāueʻaki hení kae ʻikai ko e taʹphos (faʻitoka). Ko e foʻi lea taʹphos ʻokú ne fakahoko mai pē ʻe ia ʻa e foʻi fakakaukau ʻo kau ki he tanu ʻo ha taha. Ka ko e mne·meiʹon ʻokú ne fokotuʻu mai ko e lēkooti ʻo e tokotaha kuo maté ʻoku manatuʻi.

ʻI he ʻuhingá ni, fakakaukau ange ʻo fekauʻaki mo e meʻa ʻe fiemaʻu meia Sihova ko e ʻOtuá ki he toetuʻú. Ke fakafoki mai ha taha ke moʻui, kuo pau ke ne ʻafioʻi ʻa e meʻa kotoa pē fekauʻaki mo e tokotaha ko iá​—ʻo kau ai hono ngaahi anga naʻe tupu hake mo iá mo ʻene ngaahi manatu kakató. Ko e meʻa pē ia ʻe toki malava ai ke toe fakafoki mai ha taha mo e ʻulungaanga tatau.

Ko hono moʻoní, ʻoku taʻemalava ʻeni ia mei he vakai ʻa e tangatá, ka “ʻoku malava ʻa e meʻa kotoa pē ki he ʻOtua.” (Maʻake 10:27) ʻOku malava foki ke ne fakapapauʻi ʻa e meʻa ʻoku ʻi he loto ʻo ha taha. Naʻa mo ha taha kuó ne mate ʻi ha laui senituli lahi, ʻoku ʻikai tuka ai ʻa e manatu ʻa e ʻOtuá kiate iá; ʻoku ʻikai mole ia. (Siope 14:​13-​15) Ko ia, ʻi he lave kia ʻĒpalahame, ʻAisake, mo Sēkopé, naʻe malava ʻe Sīsū ke ne lea neongo ko e hili ia ʻa e laui senituli mei heʻenau maté ʻo ne pehē ko Sihová “ʻoku ʻikai ko e ʻOtua ia ʻo e mate ka ʻo e moʻui: koeʻuhi ʻi heʻene ʻafio aʻana ʻoku nau māʻuʻui kotoa pe.”​—Luke 20:​38, fakaʻītali ʻamautolu.

Ko ia, ko e laui piliona ko ia kuo nau maté ʻoku nau ʻi he manatu ʻa Sihova ko e ʻOtuá ʻi he fakaikiiki kakato. Ko ha fakamoʻoni fakatupu tāfuʻua lahi ē ʻo e tokanga mai ʻa e ʻOtuá ki he faʻahinga ʻo e tangatá ʻi he tuʻunga fakatāutahá!

[Fakatātā ʻi he peesi 7]

Naʻe mahuʻingaʻia fakafoʻituitui ʻa Sīsū ʻi he faʻahinga naʻá ne fakamoʻuí