Fehuʻi mei he Kau Lautohí

Ko e hā naʻe tangi ai ʻa Sīsū ki muʻa ke fokotuʻu hake ʻa Lāsalosí, hangē ko ia ʻoku fakamatalaʻi ʻi he Sione 11:35?

▪ ʻI he taimi ʻoku mate ai ha taha ʻofaʻanga, ʻoku fakanatula ke tau tangi koeʻuhí te tau ongoʻi ʻene pulí. Neongo naʻá ne ʻofa ʻia Lāsalosi, naʻe ʻikai tangi ʻa Sīsū ia koeʻuhí ko e mate ʻa Lāsalosí. Naʻá ne tangi ʻi heʻene manavaʻofa ki he kau mamahí, hangē ko ia ʻoku fakahaaʻi ʻi he potutohi ʻo e fakamatala ʻa Sioné.—Sione 11:36.

ʻI he taimi naʻe ʻuluaki fanongo ai ʻa Sīsū naʻe puke ʻa Lāsalosí, naʻe ʻikai ke ne fakavave ki he ʻapi ʻo Lāsalosí ke fakamoʻui ia. ʻOku pehē ʻe he fakamatalá: “ʻI heʻene [Sīsū] fanongo naʻá ne [Lāsalosi] puké, ko hono moʻoní, naʻá ne toe nofo atu ʻi he ʻaho ʻe ua ʻi he feituʻu naʻá ne ʻi aí.” (Sione 11:6) Ko e hā naʻe tautoloi ai ʻa Sīsuú? Naʻe ʻi ai ʻa e taumuʻa ʻene fai peheé. Naʻá ne pehē: “Ko e puke ko ení ʻoku ʻikai ko e taumuʻá ke mate ai, ka ki he lāngilangi ʻo e ʻOtuá, koeʻuhi ke lava ke fakalāngilangiʻi ʻa e ʻAlo ʻo e ʻOtuá fakafou ʻi he meʻa ko iá.” (Sione 11:4) Ko e maté naʻe ʻikai ko e ‘taumuʻa’ pe ikuʻanga ia ʻo e puke ʻa Lāsalosí. Naʻe fakataumuʻa ʻa Sīsū ke ngāueʻaki ʻa e mate ʻa Lāsalosí “ki he lāngilangi ʻo e ʻOtuá.” Anga-fēfē? Naʻe teu ke fai ʻe Sīsū ha mana fakaofo ʻaki hono fokotuʻu hake hono kaumeʻa ʻofeiná mei he faʻitoká.

ʻI heʻene fetalanoaʻaki mo ʻene kau ākongá ki he tuʻungá ni, naʻe fakahoa ai ʻe Sīsū ʻa e maté ki he mohé. Ko e ʻuhinga ia naʻá ne tala ange ai kia kinautolu ko ʻene “ʻalu ʻeni ki ai ke fafangu [ʻa Lāsalosi].” (Sione 11:11) Kia Sīsū, ko hono fokotuʻu hake ʻa Lāsalosi mei he maté ʻe hangē ia hano fafangu ʻe ha mātuʻa ʻene kiʻi tamá mei he mohé. Ko ia naʻe ʻikai ha ʻuhinga ia kiate ia ke ne mamahi ʻi he mate ko ia ʻa Lāsalosí.

Ko e hā leva, naʻá ne ueʻi ʻa Sīsū ke ne tangí? ʻOku toe ʻomai ʻe he potutohí ʻa e talí. ʻI he taimi naʻe fetaulaki ai ʻa Sīsū mo e tuofefine ʻo Lāsalosi ko Melé pea sio ki heʻene tangi mo e niʻihi kehé, “naʻá ne toʻe ʻi loto ʻiate ia peá ne hoko ʻo mamahi.” ʻI he sio ki heʻenau mamahí naʻe ueʻi ai ʻa Sīsū ke ongoʻi mamahi ʻo aʻu ki he tuʻunga ko e “toʻe ʻi loto ʻiate ia.” Ko e ʻuhinga ia ‘naʻe tangi ai ʻa Sīsuú.’ Naʻe fakalotomamahi lahi kia Sīsū ke sio ki hono ngaahi kaungāmeʻa ʻofeiná ʻoku nau faingataʻaʻia lahi.—Sione 11:33, 35.

ʻOku fakahaaʻi ʻe he fakamatala ko ení kuo maʻu ʻe Sīsū ʻa e mālohi mo e malava ke toe fakamoʻui mai hotau ngaahi ʻofaʻangá ki he māmani foʻou ka hoko maí. ʻOku toe tokoniʻi kitautolu ke tau houngaʻia ʻi he kaungāongoʻi ʻa Sīsū ki he faʻahinga kuo mole honau ngaahi ʻofaʻanga ʻi he mate meia ʻĀtamá. Ko ha lēsoni ʻe taha ʻe lava ke tau ako mei he fakamatala ko ení ʻoku totonu ke tau kaungāongoʻi ki he faʻahinga ko ia ʻoku nau mamahi ʻi he mate honau ngaahi ʻofaʻangá.

Naʻe ʻiloʻi ʻe Sīsū te ne fokotuʻu hake ʻa Lāsalosi. Ka, naʻá ne tangí, ko e ueʻi ʻe heʻene ʻofa mo e manavaʻofa loloto ki hono ngaahi kaungāmeʻá. Pehē foki, ʻe ueʻi nai kitautolu ʻe heʻetau kaungāongoʻí ke “tangi mo e faʻahinga ko ia ʻoku tangí.” (Loma 12:15) Ko hono fakahaaʻi ʻa e mamahi peheé ʻoku ʻikai hā ia ai ʻoku siʻi ʻa e tui ʻa ha tokotaha ki he ʻamanaki ʻo e toetuʻú. He feʻungamālie leva, hono fokotuʻu ʻe Sīsū ha faʻifaʻitakiʻanga ʻo e kaungāongoʻi ki he kau mamahí ʻaki ʻa e tangi loto-moʻoni neongo naʻe teu ke ne fokotuʻu hake ʻa Lāsalosi.

[Fakatātā ʻi he peesi 32]