“Kuo Mau Ilo ae Misaia”!

“Naʻa ne [ʻAnitelū] motuʻa maʻu hono tokoua oʻona ko Saimone, ʻo ne pehē ki ai, ʻE, kuo ma ʻilo ʻa e Misaia (ʻa ia ko hono hiki, ko Kalaisi.)”​—SIONE 1:42 [41, PM].

 1. Ko e hā naʻe fakamoʻoniʻi ʻe Sione Papitaiso ʻo fekauʻaki mo Sīsū ʻo Nasaletí, pea ko e hā naʻe fakaʻosiʻaki ʻe ʻAnitelū ʻo fekauʻaki mo iá?

NAʻE siofi ʻe ʻAnitelū ʻa e tangata Siu ʻa ia naʻe ui ko Sīsū ʻo Nasaletí. Naʻe ʻikai ke hā mei hono fōtungá ko ha tuʻi, pe ko ha tangata poto, pe ko ha lāpai. Naʻe ʻikai ke ʻi ai hano vala fakatuʻi, ʻikai ke hinā hono ʻulú, pe molū hono nimá mo kili-ʻui. Naʻe kei talavou ʻa Sīsū​—ʻoku fakafuofua ki he taʻu 30​—pea naʻe patu hono ongo nimá mo melomelo hono kilí hangē ha tokotaha ngāue lahí. Ko ia ʻoku pau naʻe ʻikai ke ofo ʻa ʻAnitelū ʻi heʻene ʻilo ko ha tokotaha tufunga ia. Ka neongo ia, naʻe pehē ʻe Sione Papitaiso ʻo kau ki he tangatá ni: “Vakai, ko ena ʻa e Lami ʻa e ʻOtua!” ʻI he ʻaho ki muʻa hení, naʻe leaʻaki ʻe Sione ʻa e meʻa naʻe toe fakaʻohovale ange: “Ko eni ia ʻa e ʻAlo ʻo e ʻOtua.” ʻOku moʻoni nai ʻeni? Naʻe nofo hifo ʻa ʻAnitelū ʻo fakafanongo kia Sīsū ʻi ha vahaʻa taimi ʻi he ʻaho ko iá. ʻOku ʻikai te tau ʻilo pe ko e hā naʻe leaʻaki ʻe Sīsuú; ka ʻoku tau ʻilo naʻe liliu ʻe heʻene ngaahi leá ʻa e moʻui ʻa ʻAniteluú. Naʻá ne fakavavevave ʻo kumi ʻa hono tokoua ko Saimoné mo ne kalanga, “Kuo ma ʻilo ʻa e Misaia”!​—Sione 1:​34-42.

 2. Ko e hā ʻoku mahuʻinga ai ke vakai ki he fakamoʻoni pe ko Sīsū ʻa e Mīsaia naʻe talaʻofá?

² Ki mui mai naʻe hoko ʻa ʻAnitelū mo Saimone (ʻa ia naʻe toe fakahingoa ʻe Sīsū ko Pitá) ko e ongo ʻapositolo ʻa Sīsū. ʻI he hili ʻena hoko ko ʻene ongo ākongá ʻo lahi hake ʻi he taʻu ʻe ua, naʻe pehē ʻe Pita kia Sīsū: “Ko koe koe Kalaisi [Mīsaia], koe Alo oe Otua moui.” (Mātiu 16:​16, PM) Naʻe fakamoʻoniʻi ʻe he kau ʻapositoló mo e kau ākonga mateakí ʻenau loto-lelei ke mate maʻá e tui ko iá. ʻI he ʻahó ni, ʻoku laui miliona ʻa e kakai loto-moʻoni ʻoku nau fai ʻa e mateaki tatau tofu pē. Ka ko e hā ʻa e fakamoʻoni ki aí? He ko e fakamoʻoní ʻokú ne fakafaikehekeheʻi ʻe ia ʻa e tuí mo e tuingofua pē. (Sio kia Hepelū 11:1.) Ko ia tau vakai ange ki he ngaahi tafaʻaki ʻe tolu ʻo e fakamoʻoni ʻa ia ʻoku nau fakamoʻoniʻi ko e moʻoni ko Sīsū ko e Mīsaiá ia.

Ko e Hohoko ʻo Sīsū

 3. Ko e hā ʻoku fakaikiiki mai ʻe he Kosipeli ʻa Mātiu mo Luké ʻo fekauʻaki mo e hohoko ʻo Sīsuú?

³ Ko e hohoko ʻo Sīsuú ʻa e ʻuluaki fakamoʻoni ʻoku ʻomi ʻe he Konga Tohitapu Faka-Kalisi Kalisitiané ke poupouʻiʻaki ʻa hono tuʻunga Faka-Mīsaiá. Naʻe kikiteʻi ʻe he Tohitapú ʻe tupu ʻa e Mīsaiá mei he fāmili ʻo e Tuʻi ko Tēvitá. (Sāme 132:​11, 12; ʻAisea 11:​1, 10) ʻOku kamata ʻe he Kosipeli ʻa Mātiú: “Ko e tohi hohoko ʻeni ʻo Sisu Kalaisi, ʻa ia ko e Hako ʻo Tevita mo e Hako ʻo ʻEpalahame.” Naʻe poupouʻi ʻe Mātiu ʻa e fakamatala mālohi ko ʻení ʻaki ʻene fakatotoloʻi ʻa e hohoko ʻo Sīsuú ʻo fou ʻi heʻene tamai pusiaki ko Siosefá. (Mātiu 1:​1-16) ʻOku fakatotoloʻi ʻe he Kosipeli ʻa Luké ʻa e hohoko ʻo Sīsuú ʻo fakafou ʻi heʻene faʻē totonu ko Melé, ʻo foki ʻo aʻu kia Tēvita mo ʻĒpalahame pea aʻu kia ʻĀtama foki. (Luke 3:​23-38)a Ko ia ʻoku fakamoʻoniʻi fakaʻāuliliki ʻe he kau tohi ʻo e Kosipelí ʻa ʻenau fakamatala ko Sīsuú ko e ʻea ia ʻo Tēvita, fakatouʻosi ʻi he founga fakalao pea fakafou totonu ʻi he fāmili.

 4, 5. (a) Naʻe fehuʻia ʻe he kakai naʻa nau moʻui ʻi he kuonga tatau mo Sīsuú ʻa e pehē ko e hako ia ʻo Tēvitá, pea ko e hā ʻoku mahuʻinga ai ʻení? (e) Ko e hā ʻa e poupou ʻoku ʻomai ʻe he ngaahi maʻuʻanga fakamatala kehe ia mei he Tohitapú ʻo kau ki he hohoko ʻo Sīsuú?

⁴ Naʻa mo e tokotaha fakafepaki mo tuingataʻa lahi taha ki he tuʻunga Faka-Mīsaia ʻo Sīsuú ʻe ʻikai malava ke ne fakaʻikaiʻi ʻa e taukaveʻi ʻe Sīsū ko e foha ia ʻo Tēvitá. Ko e hā ʻa hono ʻuhingá? ʻOku ʻi ai ʻa e ʻuhinga ʻe ua. ʻUluaki, naʻe mafolalahia ʻa e taukaveʻi ko iá ʻi Selusalema ʻi he ngaahi hongofuluʻi taʻu ki muʻa pea toki fakaʻauha ʻa e koló ʻi he 70 T.S. (Fehoanaki mo Mātiu 21:9; Ngāue 4:27; 5:​27, 28.) Kapau naʻe loi ʻa e taukaveʻi ko ení, ko ha taha pē ʻi he kau fakafepaki kia Sīsuú​—ʻa ia naʻe tokolahi​—naʻe mei malava ke nau fakamoʻoniʻi ko e loi ʻa Sīsū ʻaki haʻanau vakaiʻi ʻa hono hohokó ʻi he ngaahi tohi hohoko ʻi he tauhiʻanga tohi fakapuleʻangá.b Ka ʻoku ʻikai fakahā ʻe he hisitōliá naʻe ʻi ai ha taha naʻá ne poleʻi ʻa e tupu ʻa Sīsū mei he Tuʻi ko Tēvitá. ʻOku hā mahino, naʻe moʻoni ʻa e taukaveʻi ko iá. ʻOku ʻikai ha toe veiveiua naʻe hiki ʻe Mātiu mo Luke mei he ngaahi lekooti fakapuleʻanga ʻa e ngaahi hingoa naʻe lava ke fakamoʻoniʻi ai ʻa e tupuʻanga ʻo Sīsuú.

⁵ Ko hono uá, ʻoku fakapapauʻi ʻe he ngaahi maʻuʻanga fakamatala kehe ia mei he Tohitapú ʻa hono tali fakalūkufua ʻa e hohoko ʻo Sīsuú. Hangē ko ʻení, ʻoku fakamatala ʻe he tohi Talmud ʻo kau ki ha lāpai ʻi he senituli hono faá naʻá ne fai ha lau fakalielia fekauʻaki mo Mele, ko e faʻē ʻa Sīsuú, ki heʻene hoko hangē ha ‘paʻumutu mo e kau tufunga’; ka ʻi he konga tohi tatau pē ʻokú ne fakahā ko Melé “ko e hako ʻo ha kau pilinisi mo e kau pule.” Ko ha fakatātā ʻe taha ki muʻa atu ʻi he senituli hono uá ko e faihisitōlia ko Hekesepuse. Naʻá ne fakamatala ʻo pehē, ʻi he fiemaʻu ʻe Sisa Tomitiani ʻo Lomá ke fakaʻauha ʻosiʻosingamālie ʻa e ngaahi hako ʻo Tēvitá, naʻe talatalaakiʻi ʻe he ngaahi fili ʻo e muʻaki kau Kalisitiané ʻa e ngaahi mokopuna tangata ʻo Siutasi, ko e tokoua faʻē taha ʻo Sīsū, “ko e famili ʻo Tēvita.” Kapau naʻe ʻilo ko e hako ʻo Tēvita ʻa Siutasi, ʻikai ko e hako ʻo Tēvita foki ʻa Sīsū? ʻOku ʻikai lava ke fakaʻikaiʻi ia!​—Kalētia 1:19; Siutasi 1.

Ngaahi Kikite Fekauʻaki mo e Mīsaiá

 6. Ko e hā hono lahi ʻo e ngaahi kikite fekauʻaki mo e Mīsaiá ʻi he Konga Tohitapu Faka-Hepeluú?

⁶ Ko ha toe fakamoʻoni ʻe taha ko Sīsū ko e Mīsaiá ia ko e ngaahi kikite naʻe fakahoko. ʻOku lahi ʻaupito ʻa e ngaahi kikite fekauʻaki mo e Mīsaiá ʻi he Konga Tohitapu Faka-Hepeluú. ʻI heʻene tohi ko e The Life and Times of Jesus the Messiah, naʻe fakahokohoko ai ʻe Alfred Edersheim ʻa e ngaahi potutohi ʻe 456 ʻi he Konga Tohitapu Faka-Hepeluú ʻa ia naʻe vakai ki ai ʻa e kau lāpai ʻo e kuonga muʻá ko e ngaahi lave ki he mīsaiá. Kaekehe, naʻe lahi ʻa e ngaahi fakakaukau hala naʻe maʻu ʻe he kau lāpaí ʻo fekauʻaki mo e Mīsaiá; ko e ngaahi potutohi lahi naʻa nau tuhu ki ai ʻoku ʻikai ke lave ia ki he mīsaiá. Kaekehe, ʻoku ʻi ai ʻa e ngaahi kikite lahi ʻaupito ʻoku nau fakapapauʻi ko Sīsū ko e Mīsaiá ia.​—Fehoanaki mo Fakahā 19:10.

 7. Ko e hā ʻa e ngaahi kikite ʻe niʻihi naʻe fakahoko ʻia Sīsū he lolotonga ʻa ʻene ʻi māmaní?

⁷ Ko e niʻihi eni ʻo e ngaahi kikité: ko e kolo naʻe faʻeleʻi aí (Maika 5:2; Luke 2:​4-11); ko e fakamamahi naʻe hoko ko hono tāmateʻi tavale ʻo e tamaiki kei valevalé ʻi he hili hono fāʻeleʻi maí (Selemaia 31:15; Mātiu 2:​16-18); ʻe ui ia mei ʻIsipite (Hōsea 11:1; Mātiu 2:15); ʻe fāʻūtaha ʻa e kau pule ʻo e ngaahi puleʻangá ke fakaʻauha ia (Sāme 2:​1, 2; Ngāue 4:​25-28); ko hono lavakiʻi ʻaki ʻa e konga siliva ʻe 30 (Sākalaia 11:12; Mātiu 26:15); pea naʻa mo e founga ʻo ʻene maté.​—Sāme 22:​16, fakamatala ʻi lalo, NW; Sione 19:​18, 23; 20:​25, 27.c

Naʻe Kikiteʻi ʻa ʻEne Haʻú

 8. (a) Ko e hā ʻa e kikite ʻokú ne tuhuʻi tonu ʻa e taimi ne hā mai ai ʻa e Mīsaiá? (e) Ko e hā ʻa e ongo meʻa ʻe ua kuo pau ke ʻilo kae maʻu ʻa e mahino ʻo fekauʻaki mo e kikite ko ʻení?

⁸ Tau fakahanga ʻetau tokangá ki ha foʻi kikite pē ʻe taha. ʻI he Tāniela 9:​25, naʻe tala ai ki he kau Siú ʻa e taimi ʻe haʻu ai ʻa e Mīsaiá. ʻOku pehē ʻa hono laú: “Ke ke ʻilo foki, pea ke mahino kiate koe; mei he ʻalu atu ʻa e fekau ke fokotuʻu foʻou mo langa ʻa Selusalema, ʻo aʻu kia Misaia ko e ʻEiki, ko e uike ʻe fitu mo e uike ʻe onongofulu ma ua.” ʻI he ʻuluaki sio ki he kikite ko ʻení ʻoku hā ngali fakapulipuli nai. Ka ʻi he founga fakalūkufua, ʻokú ne ʻai kitautolu ke tau kumi ki he ongo fakamatala pē ʻe ua: ko hono kamataʻangá mo hono lōloa ʻo e taimí. Ko e fakatātā, kapau ʻokú ke maʻu ha mape ʻokú ne fakahā ha koloa ʻoku tanu ʻi he “ofa ʻe 50 fakahahake mei ha vaikeli ʻi he paʻake fakakoló,” te ke pehē nai ʻoku fihi ʻa e ngaahi fakahinohinó​—tautefito kapau ʻoku ʻikai te ke ʻilo pe ko e fē ʻa e vaikeli ko ení, pea ko e hā ʻa e lōloa ʻo ha ‘ofa’ ʻe taha. ʻIkai te ke kumi ke ʻilo ki he ongo moʻoniʻi meʻa ko iá koeʻuhi ke lava ke ke ʻilo ʻa e koloa ko iá? Sai, ko e kikite ʻa Tānielá ʻoku meimei tatau, ko hono kehekehé pē ʻoku tau feinga ke ʻilo ʻa e kamataʻanga ʻo e taimí mo hono lōloa ʻo e vahaʻa taimi ʻoku hoko mai aí.

 9, 10. (a) Ko e hā ʻa e kamataʻanga ʻe lau mei ai ʻa e ngaahi uike ʻe 69? (e) Ko e hā ʻa hono lōloa ʻo e ngaahi uike ʻe 69, pea ʻoku tau ʻilo fēfē ʻa e meʻa ko ʻení?

⁹ Ko e ʻuluakí, ʻoku fiemaʻu ke tau ʻilo ʻa e kamataʻangá, ʻa ia ko e taimi ʻa ia naʻe “ʻalu atu ʻa e fekau ke fokotuʻu foʻou mo langa ʻa Selusalema.” Ko hono hokó, ʻoku fiemaʻu ke tau ʻilo hono lōloa mei he kamataʻanga ko iá, pe ko e hā hono lōloa ʻo e ngaahi uike ʻe 69 (7 tānaki mo e 62). ʻOku ʻikai ke faingataʻa ke maʻu ha taha ʻo e ongo fakamatalá ni. ʻOku tala fakapatonu mai ʻe Nehemaia naʻe fekau atu ke toe langa ʻa e ʻākolo ʻo Selusalemá, ʻo ʻai ia ko ha kolo kuo toe langa foʻoú “ʻi hono uofulu taʻu ʻo Kingi Atasease.” (Nehemaia 2:​1, 5, 7, 8) ʻOku fokotuʻu ai ʻa e ʻetau kamataʻanga ʻi he 455 K.M.d

¹⁰ Ko ia ʻi he fekauʻaki mo e ngaahi uike ko ʻeni ʻe 69, ko e ngaahi uike moʻoni ia ʻo taki ʻaho pē ʻe fitu? ʻIkai, he naʻe ʻikai ke ʻasi mai ʻa e Mīsaiá ia ʻi ha ʻosi ha taʻu pē ʻe taha mei he 455 K.M. Ko ia ʻoku loto-tatau ʻa e kau poto mataotao tokolahi taha fekauʻaki mo e Tohitapú pea mo e ngaahi paaki lahi (kau ai mo e Tanakh faka-Siu ʻi he fakamatala ʻi lalo ʻo fekauʻaki mo e Tāniela 9:25) ʻo pehē ko e ngaahi uike eni ʻo e “ngaahi taʻu.” Naʻe anga ʻa e kau Siu ʻo e kuonga muʻá ki he fakakaukau ko ʻeni ʻo kau ki he ʻuike ʻo e ngaahi taʻú,’ pe ko e fakataʻufitu. Koeʻuhi he hangē pē ko ʻenau tauhi ʻa e ʻaho sāpate ʻi he ʻaho hono fitu kotoa pē, naʻa nau tauhi ʻa e sāpate fakataʻufitu kotoa pē. (ʻEkisoto 20:​8-11; 23:​10, 11) Ko ia ko e ngaahi uike ʻe 69 ʻo e ngaahi taʻú ʻe fakakātoá ko e 69 liungaʻaki ʻa e taʻu ʻe 7, pe ko e taʻu ʻe 483. Ko e meʻa pē ʻoku toé ke tau lau leva. ʻI hono lau ʻa e taʻu ʻe 483 mei he 455 K.M. ʻoku tau aʻu ai ki he taʻu 29 T.S.​—ko e taʻu pē ia naʻe papitaiso ai ʻa Sīsū peá ne hoko ko e ma·shiʹach, ko e Mīsaiá!​—Sio ki he “Seventy Weeks,” Insight on the Scriptures, Voliume 2, peesi 899.

11. Ko e hā nai haʻatau tali kiate kinautolu ʻoku nau pehē ko e founga fakaeonopooni pē ia ʻo hono fakaʻuhingaʻi ʻa e kikite ʻa Tānielá?

¹¹ ʻE taʻeloto nai ki ai ha niʻihi ʻo pehē ko e founga fakaeonopooni pē ia ʻo hono fakaʻuhingaʻi ʻa e kikité ke feʻunga mo e hisitōliá. Kapau ko ia, ko e hā naʻe ʻi ai ai ʻa e kakai ʻi he ʻaho ʻo Sīsuú naʻa nau ʻamanekina ʻe hā mai ʻa e Mīsaiá ʻi he taimi ko iá? Naʻe moʻui ʻo ofi ki he taimi ko iá ʻa e faihisitōlia Kalisitiane ko Luke, mo e kau faihisitōlia Loma ko Tasitusi mo Sutoniasi, mo e faihisitōlia Siu ko Siosefusi, mo e filōsefa Siu ko Filo pea naʻa nau fakamoʻoniʻi ʻa e ʻamanekina ko ʻení. (Luke 3:15) ʻOku taukaveʻi ʻe he kau poto mataotao ʻe niʻihi he ʻahó ni naʻe hanga ʻe he ngaohikoviʻi ʻe he kau Lomá ʻa e kau Siú ʻo ʻai ke fakaʻamu mo ʻamanekina ʻe he kau Siú ʻa e Mīsaiá ʻi he ngaahi ʻaho ko iá. Ka, ko e hā naʻe toki ʻamanekina ai ʻe he kau Siú ʻa e Mīsaia ʻi he taimi ko iá kae ʻikai te nau ʻamanekina pehē ʻi he fakatanga anga-fakamanu naʻe fai ʻe he kau Kalisí kiate kinautolu ʻi he ngaahi senituli ki muʻa atu aí? Ko e hā naʻe pehē ai ʻe Tasitusi naʻe tataki ʻa e kau Siú ʻe he “ngaahi kikite fakamisiteli” ke nau ʻamanekina ʻe haʻu mei Siutea ʻa e kau pule mālohi mo “maʻu ʻa e ʻemipaea kāfakafa”? Naʻe fakahā ʻe Abba Hillel Silver ʻi heʻene tohi ko e A History of Messianic Speculation in Israel, ko e moʻoni “naʻe ʻamanekina ke hā ʻa e Mīsaiá ʻi he kuata hono ua ʻo e ʻuluaki senituli T.S.,” ʻo ʻikai koeʻuhi ko e fakatanga ʻa e kau Lomá, ka koeʻuhi “ko e fakahokohoko ʻiloa ʻo e ʻaho ko iá,” ʻa ia naʻe maʻu hono konga mei he tohi ʻa Tānielá.

Fakapapauʻi Mei ʻOlunga

12. ʻI he founga fē naʻe fakapapauʻi mai ai ʻe Sihova ʻa Sīsū ko e Mīsaiá ia?

¹² Ko e fakamoʻoni ko hono tolu ʻo e Tuʻunga Faka-Mīsaia ʻo Sīsuú ko e fakamoʻoni ʻa e ʻOtuá tonu pē. Fakatatau ki he Luke 3:​21, 22, ʻi he hili ʻa e papitaiso ʻo Sīsuú, naʻe paniʻaki ia ʻa e ivi toputapu mo mālohi taha ʻi he ʻuniveesí, ko e laumālie māʻoniʻoni ʻo Sihova ko e ʻOtuá. Pea ʻaki ʻa hono leʻo ʻoʻona tonu pē, naʻe fakamoʻoniʻi mai ai ʻe Sihova kuó ne hōifua ki hono ʻAló, ko Sīsū. ʻI ha toe taimi kehe ʻe ua, naʻe lea fakahangatonu mai pē ʻa Sihova mei hēvani kia Sīsū, ʻo fakahaaʻi ai ʻa ʻEne hōifua ki aí: taimi ʻe taha ʻi he ʻao ʻo e toko tolu ʻo e kau ʻapositolo ʻa Sīsuú, pea ʻi he taimi ʻe taha ʻi he ʻao ʻo e fuʻu kakai naʻe mamata ai. (Mātiu 17:​1-5; Sione 12:​28, 29) ʻIkai ko ia pē, naʻe fekau mai mei ʻolunga ʻa e kau ʻāngelo ke fakapapauʻi ʻa e tuʻunga ʻo Sīsū ko e Kalaisí, pe Mīsaiá.​—Luke 2:​10, 11.

13, 14. ʻI he founga fē naʻe fakahāhā ai ʻe Sihova ʻa ʻene hōifua kia Sīsū ko e Mīsaiá?

¹³ Naʻe fakahā ʻe Sihova ʻa ʻene hōifua ki heʻene tokotaha paní ʻaki ʻa ʻene fakaivia ia ke ne lavaʻi ʻa e ngaahi ngāue lahi. Ko e fakatātā, naʻe leaʻaki ʻe Sīsū ʻa e ngaahi kikite ʻa ia naʻe tomuʻa hā fakaikiiki ʻa e hisitōliá ki muʻa pea toki hoko​—ko e niʻihi ʻoku aʻu mai ki hotau ʻahó ni.e Naʻá ne toe fai foki mo e ngaahi mana, ʻo hangē ko e fafanga ʻo e fuʻu kakai fiekaia mo fakamoʻui ʻa e mahakí. Naʻa mo e maté naʻá ne fokotuʻu ia. Naʻe toki faʻu pē ʻe he kau muimui ʻo Sīsuú ʻa e ngaahi talanoa ʻo e ngaahi ngāue fakaofo ko ʻení ʻi he ʻosi hono fakahoko ʻo e ngaahi meʻá ni? Naʻe fai ʻe Sīsū ʻa ʻene ngaahi mana lahi ʻi he ʻao ʻo e kau sio tonu pē, ʻi he taimi ʻe niʻihi ko e kakai ʻe laui afe. Naʻa mo e ngaahi fili ʻo Sīsuú naʻe ʻikai te nau lava ke fakaʻikaiʻi ʻa e moʻoni naʻá ne fai ʻa e ngaahi meʻa ko ʻení. (Maʻake 6:2; Sione 11:47) Tukukehe ia, kapau naʻe hehema ʻa e kau muimui ʻo Sīsuú ke toki faʻu ʻa e ngaahi fakamatala peheé, ko e hā naʻa nau fuʻu lea totonu ai ʻo fekauʻaki mo ʻenau ngaahi tō nounou ʻa kinautolu pē? Te nau loto-lelei nai ke mate ʻo fekauʻaki mo ha tui naʻe makatuʻunga mei ha ngaahi talatupuʻa naʻa nau toki faʻu pē? ʻIkai. Ko e ngaahi mana ʻa Sīsuú ko e ngaahi moʻoniʻi meʻa ia ʻi he hisitōliá.

¹⁴ Naʻe ʻikai ko e fakamoʻoni pē ia ʻa e ʻOtuá ʻo fekauʻaki mo Sīsū ko e Mīsaiá ia. Naʻá ne ʻai ke fakapapauʻi ʻo fakafou mai ʻi he laumālie māʻoniʻoní kuo tohi ʻa e fakamoʻoni ki he tuʻunga Faka-Mīsaia ʻo Sīsuú pea kuo hoko ko e konga ia ʻo e tohi kuo lahi taha ʻa hono liliu mo tufaki ʻi he kotoa ʻo e hisitōliá.

Ko e Hā Naʻe ʻIkai ke Tali Ai ʻe he Kau Siú ʻa Sīsuú?

15. (a) Ko e hā ʻa hono lahi ʻo e ngaahi fakamoʻoni ʻo kau kia Sīsū ʻo fakapapauʻi ai ia ko e Mīsaiá? (e) Ko e hā ʻa e ngaahi ʻamanaki ʻa e kau Siú naʻe ʻai ai ʻa e tokolahi ʻo kinautolu ke nau talitekeʻi ʻa Sīsū ko e Mīsaiá?

¹⁵ Ko ia, ʻoku kau ʻa e ngaahi moʻoniʻi meʻa ʻe laui teau ʻi he ngaahi tafaʻaki ʻe tolu ko eni ʻo e fakamoʻoni ʻa ia ʻoku fakapapauʻi ai ko Sīsū ko e Mīsaiá. ʻIkai ʻoku feʻunga ia? Fakakaukau ange ki ha kole ki haʻo laiseni fakaʻuli pe tohi pangikē pea tala mai ʻoku ʻikai ke feʻunga ʻa e ngaahi fakamoʻoni ʻe tolú​—kuo pau ke ke ʻomai ha ngaahi fakamoʻoni ʻe laui teau. Ko ha toki meʻa taʻefaituʻunga ē! Ko ia, ʻoku feʻunga ʻānoa pē ʻa e fakapapauʻi mai ʻo Sīsū ʻi he Tohitapú. Ka, ko e hā naʻe fakaʻikaiʻi ai ʻe he tokolahi ʻo hono kakaí totonu pē ʻa e ngaahi fakamoʻoni kotoa ko ʻeni ko Sīsū ko e Mīsaiá? Koeʻuhi he neongo ʻoku mahuʻinga ʻa e fakamoʻoní ki he tui moʻoní, ka ʻoku ʻikai te ne fakapapauʻi ʻe ia te ne ʻomi ʻa e tuí. Ko e meʻa pangó, ʻoku tui ʻa e kakai tokolahi ki he meʻa ʻoku nau fie tui ki aí, neongo ʻa e hulu fau ʻo e fakamoʻoní. ʻI he fekauʻaki mo e Mīsaiá, naʻe ʻi ai ʻa e ngaahi fakakaukau pau ʻa e kau Siu tokolahi taha ʻo fekauʻaki mo e meʻa naʻa nau fiemaʻú. Naʻa nau fiemaʻu ha mīsaia fakapolitikale, ko ha tokotaha te ne fakangata ʻa e fakafeʻātungia ʻa e kau Lomá pea toe fakafoki ʻa ʻIsileli ki ha lāngilangi ʻi ha founga fakamatelie ʻo hangē ko ia ʻi he ngaahi ʻaho ʻo Solomoné. Ko ia, ʻe malava fēfē ke nau tali ai ʻa e foha māʻulalo ko ʻeni ʻo ha tufunga, ʻa e tokotaha Nasaleti ko ʻeni ʻa ia naʻe ʻikai te ne mahuʻingaʻia ʻi he ngaahi meʻa fakapolitikalé pe ki he koloá? Ko e hā ke pehē ai ko ha Mīsaia ia hili iá naʻá ne faingataʻaʻia mo mate fakamā ʻi he ʻakau fakamamahí?

16. Ko e hā naʻe fiemaʻu ai ki he kau muimui ʻo Sīsū ke nau fakatonutonu ʻenau ngaahi fakakaukau ʻo kau ki he Mīsaiá?

¹⁶ Naʻa mo e kau ākonga tonu ʻa Sīsuú naʻa nau loto-mamahi ʻi heʻene maté. ʻI he hili ʻo ʻene toetuʻu lāngilangiʻia mei he maté, ʻoku hā mahino naʻa nau ʻamanaki te ne ‘toe fakafoki leva ʻa e puleʻangá ki ʻIsileli.’ (Ngāue 1:6) Ka naʻe ʻikai te nau talitekeʻi ʻa Sīsū ko e Mīsaiá koeʻuhi ko e ʻikai ke hoko ʻa e ʻamanaki fakafoʻituitui ko iá. Naʻa nau tui kiate ia ʻo makatuʻunga ʻi he hulu fau ʻa e fakamoʻoni naʻe ala maʻu, pea naʻe fakaʻau ke lahi ange ʻa ʻenau mahinó; naʻe hoko ʻo mahino ʻa e ngaahi misitelí. Naʻa nau hoko ʻo ʻilo ʻe ʻikai malava ʻe he Mīsaiá ke fakahoko ʻa e ngaahi kikite kotoa pē ʻo fekauʻaki mo iá he lolotonga ʻo e kiʻi taimi nounou ʻo ʻene nofo ʻi māmani ko ha tangata. Naʻe lave ʻa e kikite ʻe taha fekauʻaki mo ʻene haʻú ʻi ha founga anga-fakatōkilalo, ʻokú ne heka ʻi ha ʻuhikiʻi ʻasi, ka naʻe toe lave ʻa e taha ia ki heʻene haʻu lāngilangiʻia ʻi he ngaahi ʻao! ʻOku lava fēfē ke na fakatou moʻoni? ʻOku hā mahino naʻe pau ke ne toe haʻu ko hono tuʻo ua.​—Tāniela 7:13; Sākalaia 9:9.

ʻUhinga Naʻe Pau Ai ke Mate ʻa e Mīsaiá

17. Naʻe fakamahino fēfē ʻe he kikite ʻa Tānielá naʻe pau ke mate ʻa e Mīsaiá, pea ko e hā ʻa e ʻuhinga naʻe mate ai iá?

¹⁷ ʻIkai ko ia pē, naʻe fakahā mahino ʻe he ngaahi kikite fekauʻaki mo e Mīsaiá naʻe pau ke mate ʻa e Mīsaiá. Hangē ko ʻení, ko e kikite pē ko ia naʻá ne kikiteʻi ʻa e taimi ʻe ʻasi ai ʻa e Mīsaiá naʻá ne kikiteʻi ʻi he veesi pē hono hokó: “Pea hili ʻa e onongofulu-ma-uaʻi uike [ʻa ia naʻe hoko atu ʻi he ngaahi uike ʻe fitu] ʻe tuʻusi ʻa e Misaia.” (Tāniela 9:26) Ko e foʻi lea faka-Hepelū ko e ka·rathʹ ʻoku ngāueʻaki heni ki he “tuʻusi” ko e foʻi lea tatau pē ia naʻe ngāueʻaki ki he tautea mate ʻi he Lao ʻia Mōsesé. ʻOku ʻikai ha toe veiveiua naʻe pau ke mate ʻa e Mīsaiá. Ko e hā hono ʻuhingá? ʻOku ʻomai ʻe he Tan 9 veesi 24 ʻa e tali kiate kitautolu: “Ke fakaʻosi ʻa e angahala, pea ke silaʻi ʻa e hia, pea ke fakamolemole ʻa e kovi, pea ke fakahu mai ʻa e maʻoniʻoni taʻengata.” Naʻe ʻilo lelei ʻe he kau Siú ko ha feilaulau pē, ko ha mate, te ne ʻomai ʻa e fakalelei ki he angahalá.​—Livitikō 17:11; fehoanaki mo Hepelū 9:22.

18. (a) Ko e hā ʻoku fakahā ʻe ʻAisea vahe 53 ʻo kau ki he pau ke mamahi pea mo e mate ʻa e Mīsaiá? (e) Ko e hā ʻoku hā ngali vale ʻi he lau ʻa e kikite ko ʻení?

¹⁸ ʻOku lau ʻa e ʻAisea vahe 53 ʻo kau ki he Mīsaiá ko ha Sevāniti makehe ʻa Sihova ʻa ia ʻe mamahi pea mate ke ʻufiʻufi ʻa e ngaahi angahala ʻa e niʻihi kehe. ʻOku pehē ʻe he ʻAi 53 veesi 5: “ʻOsi naʻe fai hono hokaʻi koeʻuhi ko e ngaahi angahala ʻatautolu, naʻe tuki ia koeʻuhi ko ʻetau ngaahi hia.” Ko e kikite tatau pē ko ení, ʻi he ʻosi ʻene tala kiate kitautolu ʻe pau ke mate ʻa e Mīsaiá ko ha “feilaulau-halaia,” ʻokú ne fakahā ko e Tokotaha tatau pē ko ení “te ne fakalahi hono ngaahi ʻaho, pea ko e finangalo ʻo Sihova ʻe tuʻumalie ʻi hono nima.” (ʻAi 53 Veesi 10) ʻIkai ʻoku ngali vale ia? ʻE lava fēfē ke mate ʻa e Mīsaiá, peá ne toki “fakalahi hono ngaahi ʻaho”? ʻE lava fēfē ke feilaulauʻi ia pea hili ia “ko e finangalo ʻo Sihova ʻe tuʻumalie ʻi hono nima”? ʻE lava fēfē nai ke ne mate ʻo mate ai pē ʻo ʻikai te ne fakahoko ʻa e ngaahi kikite mahuʻinga lahi taha ʻo fekauʻaki mo iá, ʻa ia te ne pule ʻo taʻengata ko e Tuʻi peá ne ʻomai ʻa e melino mo e fiefia ki he māmaní fakakātoa?​—ʻAisea 9:​6, 7, [5, 6, PM].

19. ʻI he founga fē ʻoku fakaleleiʻi ai ʻe he toetuʻu ʻa Sīsū mei he maté ʻa e ngaahi kikite naʻe ngali fepaki ʻo fekauʻaki mo e Mīsaiá?

¹⁹ Naʻe fakaleleiʻi ʻa e meʻa naʻe hā ko e meʻa ngali valé ʻe ha mana fakaholomamata pē ʻe taha. Naʻe toetuʻu ʻa Sīsū mei he maté. Naʻe hoko ʻa e kau Siu loto-totonu ʻe laui teau ko e kau fakamoʻoni sio tonu ki he moʻoni lāngilangiʻia ko ʻení. (1 Kolinitō 15:6) Naʻe tohi ki mui mai ai ʻe he ʻapositolo ko Paulá: “Ka ko e Toko Taha ni [ko Sīsū Kalaisi], hili ʻene ʻatu koeʻuhi ko e angahala ha foʻi feilaulau tofu pe taha ʻo taʻengata, naʻa ne nofo hifo mei he toʻomataʻu ʻo e ʻOtua; pea talunga ia mo ʻene nofoʻaki tali kaeʻoua ke ngaohi hono ngaahi fili ko hono tuʻunga vaʻe.” (Hepelū 10:​10, 12, 13) ʻIo, ʻi he hili ʻo hono fokotuʻu ʻo Sīsū ki he moʻui fakahēvaní, pea ʻi he hili ʻa e vahaʻa taimi ʻo e “nofoʻaki tali,” ne fakanofo ia ko e Tuʻi peá ne fai ha ngāue ki he ngaahi fili ʻo ʻene Tamai ko Sihová. ʻI hono tuʻunga ko e Tuʻi fakahēvaní, ʻoku ʻi ai ʻa e kaunga ʻa Sīsū ko e Mīsaiá ki he moʻui ʻa e tokotaha kotoa pē ʻoku lolotonga moʻui. ʻI he founga fē? ʻE lave ʻa ʻetau konga hono hoko maí ki he meʻa ko ʻení.

[Fakamatala ʻi lalo]

Ko e Hā Haʻo Tali?

◻ Ko e hā ke sivisiviʻi ai ʻa e ngaahi fakamoʻoni pe ko Sīsuú ko e Mīsaia ia ne talaʻofá?

◻ ʻOku anga-fēfē ʻa hono poupouʻi ʻe he hohoko ʻo Sīsuú ʻa hono tuʻunga Faka-Mīsaiá?

◻ ʻI he founga fē ʻoku tokoni ai ʻa e ngaahi kikite ʻi he Tohitapú ke fakamoʻoniʻi ko Sīsū ko e Mīsaiá ia?

◻ Ko e hā ʻa e ngaahi founga naʻe fakapapauʻi tonu ai ʻe Sihova ʻo fakamoʻoniʻi ai ko Sīsū ko e Mīsaiá?

◻ Ko e hā naʻe talitekeʻi ai ʻe he kau Siu tokolahi ʻa Sīsū ʻi hono tuʻunga ko e Mīsaiá, pea ko e hā naʻe ʻikai ke loko lelei ai ʻa e ngaahi ʻuhinga ko iá?

[Fakatātā ʻi he peesi 14]

Naʻe toe ʻomai ʻa e mana taki taha ʻo e ngaahi mana lahi ʻa Sīsū ha fakamoʻoni ki hono tuʻunga Faka-Mīsaiá