Vahe 91

ʻI he Toetuʻu ʻa Lasalosí

NAʻE aʻu atu ʻeni ʻa Sīsū mo kinautolu naʻa nau ō mo iá ki he faʻitoka ʻo Lasalosí. Ko hono moʻoní, ko ha ʻana pea mo ha fuʻu maka naʻe tāpuni ʻaki ʻa e hūʻangá. “Toʻo ʻa e maká,” ko e lea ia ʻa Sīsuú.

Naʻe ʻikai loto ki ai ʻa Māʻata, he naʻe ʻikai ke mahino kiate ia ʻa e meʻa naʻe fakakaukau ʻa Sīsū ke faí. “ʻEiki,” ko ʻene leá atu ia, “kuo namu-hāhā, he ko hono ʻaho fā ʻeni.”

Ka naʻe ʻeke ʻe Sīsū: “ʻIkai naʻá ku tala atu, kapau te ke tui, te ke mamata ki he lāngilangi ʻo e ʻOtuá?”

Ko ia naʻe toʻo ʻa e maká. Pea naʻe hanga hake ʻa e fofonga ʻo Sīsuú ʻo ne lotu: “ʻAlā Tamai, ʻoku ou fakafetaʻi atu koeʻuhi naʻá ke ongoʻi au. ʻIo, kuó u ʻilo pē ʻe au ʻokú ke ongoʻi au maʻu ai pē; ka ko ʻeku leá koeʻuhi ko e fuʻu kakai ʻoku tutuʻú ni, koeʻuhi ke nau tui ko koe kuó ke fekau mai aú.” Naʻe lotu fakahāhā ʻa Sīsū koeʻuhi ke ʻilo ʻe he kakaí ko e meʻa ko ia ʻokú ne teu ke faí ʻe fakahoko ia ʻi he mālohi ʻoku maʻu mei he ʻOtuá. Pea naʻá ne kalanga leʻo-lahi: “Lasalosi, tuʻu mai ki tuʻa!”

ʻI he taimi ko iá, naʻe hū mai ki tuʻa ʻa Lasalosi. Naʻe kei haʻi pē hono ongo nimá mo hono ongo vaʻé ʻaki ʻa e ngaahi noʻo ʻi hono tanú, pea ko hono matá ʻoku ʻufiʻufiʻaki ia ha tupenu. “Vete ia, pea tukuange ke ne ʻalu,” ko e lea ia ʻa Sīsuú.

ʻI heʻenau sio ki he maná, ko e tokolahi ʻo e kau Siu naʻa nau haʻu ko e fakafiemālie kia Mele mo Māʻatá naʻa nau tui leva kia Sīsū. Kae kehe, naʻe ʻalu atu ʻa e niʻihi ia ke tala ki he kau Fālesí ʻa e meʻa kuo hokó. Naʻa nau fokotuʻutuʻu leva ʻe kinautolu mo e houʻeiki taulaʻeikí ke fai ha fakataha ʻa e fakamaauʻanga māʻolunga faka-Siú, ko e Sanetalimí.

Naʻe kau ki he Sanetalimí ʻa e taulaʻeiki lahi lolotongá, ko Kaiafasi pea pehē ki he kau Fālesí mo e kau Sātusí, houʻeiki taulaʻeikí, mo e kau taulaʻeiki lahi ki muʻá. Naʻe lāunga ʻa e faʻahingá ni: “Ko e hā muʻa ʻoku tau faí? He ko e tangatá ni ʻokú ne fakahoko ʻa e ngaahi mana lahi. Kapau te tau tuku ia ke fai pehē ai pē, ʻe tui pīkitai kiate ia ʻa e kakai kotoa pē, pea ʻe haʻu ʻa e kau Lomá, ʻo ʻave hotau fonuá mo hotau puleʻangá fakatouʻosi.”

Neongo naʻe tala ʻe he kau taki lotú ko e moʻoni ʻoku hanga ʻe Sīsū ʻo “fakahoko ʻa e ngaahi mana lahi,” ko e meʻa pē ʻe taha naʻa nau tokanga kinautolu ki aí ko honau tuʻungá mo honau mafaí. Ko hono fokotuʻu ʻo Lasalosí ko ha tā mātuʻaki mālohi ia ki he kau Sātusí, koeʻuhi he naʻe ʻikai te nau tui kinautolu ki he toetuʻú.

Ko Kaiafasi, ʻa ia ko ha Sātusi nai, naʻá ne lea ʻo pehē: “Tā ko e kakai kimoutolu ʻoku ʻikai te mou momoʻi ʻilo ha meʻa, pe te mou fakakaukau, ʻoku lelei muʻa kiate kimoutolu ke mate ha foʻi tangata ʻe toko taha koeʻuhi ko e kakaí, pea ʻoua naʻa ʻauha ʻa e puleʻangá kotoa.”

Naʻe tākiekina ʻe he ʻOtuá ʻa Kaiafasi ke ne leaʻaki ʻa e meʻá ni, he ki mui maí naʻe tohi ʻe he ʻaposetolo ko Sioné: “Ka naʻe ʻikai meiate ia [Kaiafasi] ʻa e lea ko iá.” Ko e ʻuhinga ʻa Kaiafasí ke tāmateʻi ʻa Sīsū ke fakangata Ia mei haʻane toe hokohoko atu ʻene fakavaivaiʻi honau ngaahi tuʻunga mafaí mo e tākiekiná. Ka, fakatatau kia Sione, ‘naʻe kikite ʻa Kaiafasi kuo pau ke pekia ʻa Sīsū ʻo ʻikai koeʻuhi ko e puleʻangá pē, ka koeʻuhi foki ke fakatahatahaʻi ʻa e fānau ʻa e ʻOtuá.’ Pea ko e moʻoni, ko e taumuʻa ia ʻa e ʻOtuá ke pekia ʻa hono ʻAló ko ha huhuʻi maʻá e kakai kotoa pē.

Naʻe lavameʻa ʻa Kaiafasi ʻi hono tākiekina ʻa e Sanetalimí ke fai ha ngaahi faʻufaʻu ke tāmateʻi ʻa Sīsū. Ka naʻe mavahe mei ai ʻa Sīsū, ʻoku ngalingali naʻá ne ʻilo ki he ngaahi faʻufaʻu ko ʻení meia Nikotīmasi, ko ha mēmipa ia ʻo e Sanetalimí naʻe anga-fakakaumeʻa kiate ia. Sione 11:​38-54.

▪ Ko e hā naʻe lotu fakahāhā ai ʻa Sīsū ki muʻa ʻi hono fokotuʻu hake ʻo Lasalosí?

▪ Ko e hā ʻa e meʻa naʻe fai ʻe he faʻahinga naʻa nau sio ki he toetuʻu ko iá?

▪ Ko e hā ʻokú ne fakahā ʻa e anga-fulikivanu ʻa e kau mēmipa ʻo e Sanetalimí?

▪ Ko e hā ʻa e taumuʻa ʻa Kaiafasí, ka naʻe ngāueʻaki ia ʻe he ʻOtuá ke fai ʻa e kikite ki he hā?