Vahe 101

ʻI Pētani, ʻi he Fale ʻo Saimoné

ʻI HE mavahe atu ʻa Sīsū mei Sielikoó, naʻá ne huʻu ki Pētani. Naʻe meimei ʻaho kakato ʻa e fonongá, koeʻuhi he ko e kaka ʻi he ngaahi konga fonua faingataʻa ko ha kilomita nai ʻe 19. Ko Sielikoó ʻoku fakafuofua ki he mita ʻe 250 nai ʻokú ne māʻulaloʻaki ʻi he fukahi tahí, pea ko Pētaní ʻokú ne māʻolungaʻaki ʻe ia ʻa e mita nai ʻe 760 mei he fukahi tahí. ʻOkú ke manatuʻi nai ko Pētaní ko e kolo ia ʻo Lasalosi mo hono ongo tuofāfiné. Ko e kiʻi koló ni ʻoku kilomita nai ʻe tolu mei Selusalema, pea ʻoku tuʻu ʻi he tahifo fakahahake ʻo e Moʻunga ko ʻOlivé.

Ko e tokolahi naʻa nau ʻosi aʻu hake ki Selusalema ki he Laka-Atú. Naʻa nau haʻu ki muʻa ke fakamaʻa fakaeouau kinautolu. Mahalo naʻa nau ala ki ha ʻangaʻanga pe fai ha ngaahi meʻa kehe ʻo nau hoko ai ʻo taʻemaʻa. Ko ia naʻa nau muimui ki he ngaahi founga ke fakamaʻa ai kinautolu koeʻuhi kae kātoangaʻi ʻa e Laka-Atú ʻi he tuʻunga taau. ʻI he fakataha ʻa e faʻahinga ko ʻeni naʻe muʻa maí ki he temipalé, naʻe fifili ʻa e tokolahi pe ʻe haʻu ʻa Sīsū ki he Laka-Atú.

Ko Selusalemá ko e fekihiakiʻanga ia ʻo kau kia Sīsū. Naʻe ʻiloa ʻa hono fiemaʻu ai ʻe he kau taki lotú ke puke ia ʻo tāmateʻí. Ko hono moʻoní, naʻa nau fai ha tuʻutuʻuni ka ʻi ai ha taha te ne ʻilo pe ʻokú ne ʻi fē, ke nau fakahā ange ia kiate kinautolu. Naʻe tuʻo tolu ʻi he ngaahi māhina ki mui mai aí​—ʻi he Kātoanga ʻo e Fale-Louʻakaú, ʻi he Kātoanga Fakatapuí, pea mo e hili ʻo ʻene fokotuʻu ʻa Lasalosí​—ʻa e feinga ʻa e kau taki ko ʻení ke tāmateʻi iá. Ko ia, naʻe fifili ʻa e kakaí, pe ʻe toe hā mai ʻa Sīsū? “Ko e hā hoʻomou fakakaukau?” ko ʻenau feʻekenakí ia.

Lolotonga ʻení, naʻe aʻu hake ʻa Sīsū ia ki Pētani, ʻa ia ko e ʻaho ia ʻe ono ki muʻa ʻi he Laka-Atú, ʻa ia ʻe hoko ia ʻi Nīsani 14 ʻo fakatatau ki he tohimāhina faka-Siú. Naʻe aʻu ʻa Sīsū ki Pētani ʻi ha taimi ʻi he efiafi Falaité, ʻa ia ko e kamata ia ʻo Nīsani 8. Naʻe ʻikai malava ke ne fai ʻa e fononga ki Pētaní ʻi he Tokonakí koeʻuhi he ko e fononga ia ʻi he Sāpate​—mei he tō ʻa e laʻaá he Falaité ki he tō ʻa e laʻaá ʻi he Tokonakí​—naʻe tapui ia ʻe he lao ʻa e kau Siú. Ngalingali naʻe ʻalu ʻa Sīsū ia ki he ʻapi ʻo Lasalosí, ʻo hangē ko ia naʻá ne fai ki muʻá, ʻo nofo ai ia ʻi he pō Falaité.

Kae kehe, ʻi he efiafi Tokonakí naʻe fakaafeʻi ai ʻe ha tokotaha kehe ia ʻi Pētani ʻa Sīsū mo hono kau takangá ke nau kai efiafi ʻi he Tokonakí. Ko e tangatá ko Saimone, ko ha kilia ki muʻa, ʻa ia naʻe fakamoʻui nai ia ki muʻa ʻe Sīsū. Ko Māʻata naʻá ne tokangaʻi ʻa e kau ʻaʻahí, ʻi hono ʻulungaanga faʻa ngāué. Ka naʻe tokanga ʻa Mele ia ʻo hangē ko ia naʻá ne angaʻakí kia Sīsū ʻi he taimi ko ʻení ʻi ha founga naʻe hoko ai ha felauaki.

Naʻe fakaava ʻe Mele ha ʻaiʻanga ʻalapasita, pe ko ha foʻi hina, ʻa ia naʻe ʻi ai ha vaeua ʻo e kilo lolo namu kakala, ko e “naʻati moʻoni.” Naʻe fuʻu mahuʻinga ʻaupito ʻeni. Ko e moʻoni, ko hono mahuʻingá naʻe fakafuofua ki he vāhenga ʻi he meimei taʻu kakato ʻe taha! ʻI hono lilingi ʻe Mele ʻa e loló ki he ʻulu ʻo Sīsuú pea pehē ki hono vaʻé peá ne holoholoʻaki hono louʻulú ʻa e vaʻe ʻo Sīsuú, naʻe kātoi ʻi he falé hono kotoa ʻa e namu kakalá.

Naʻe ʻita ʻa e kau ākongá mo ʻeke: “Ko e fai ha maumau lolo pehē koeʻumaʻā?” Pea naʻe pehē ʻe Siutasi ʻIsikaliote: “Ko e hā naʻe ʻikai fakatau ai ʻa e loló ni, ʻo maʻu ai ha tēnali ʻe tolungeau, ʻo foaki ki he masivá?” Ka naʻe ʻikai ko e tokanga moʻoni ʻa Siutasi ia ki he kau masivá, he naʻá ne ʻosi kaihaʻa mei he puha paʻanga naʻe tauhi ʻe he kau ākongá.

Naʻe taukapoʻi ʻe Sīsū ʻa Mele. “Tuku ai pē ʻa e fefiné,” ko ʻene fekaú atu ia. “Ko e hā ʻoku mou fakamamahi ai kiate iá? He ko e ngāue lelei ia kuó ne fai kiate aú. He ko e meʻa ki he masivá te mou feangai ai pē mo kinautolu, pea ka mou ka loto ke fai ha ʻofa ki ai pea faingofua, ka ʻe ʻikai te mou feangai ai pē mo au. Kuó ne fai siʻono tūkuingata, kuó ne sinaki tākai hoku sinó ki faʻitoka. Pea ko au ē, ʻoku ou tala atu, ʻIlonga ha potu ʻi māmani kātoa ʻe malangaʻaki ki ai ʻa e kōsipelí, ʻe leaʻaki ai foki ʻa e meʻa naʻe fai ʻe siʻi fefiné ni, ko e fakamanatu kiate ia.”

Naʻe laka hake ʻi he houa ʻe 24 ʻa e ʻi Pētani ʻa Sīsuú, pea naʻe mafola atu naʻá ne ʻi ai. Ko ia ai, ko e tokolahi naʻa nau haʻu ki he fale ʻo Saimoné ke sio kia Sīsū, ka naʻa nau toe ōmai foki ke sio kia Lasalosi, ʻa ia naʻe ʻi ai foki mo ia. Ko ia naʻe faʻufaʻu ʻe he houʻeiki taulaʻeikí ke tāmateʻi ʻa Sīsū pea mo Lasalosi foki. Naʻa nau fai pehē koeʻuhi he ko e kakai tokolahi naʻa nau tui kia Sīsū ko ʻenau sio kuo moʻui ʻa e tokotaha naʻá ne fokotuʻu mei he maté! Ko e moʻoni, ko ha anga-fulikivanu lahi ē ka ko e kau taki lotú! Sione 11:​55–12:11; Mātiu 26:​6-13; Maake 14:​3-9; Ngāue 1:12.

▪ Ko e hā ʻa e fetalanoaʻaki naʻe fai ʻi he temipale ʻi Selusalemá, pea ko e hā hono ʻuhingá?

▪ Ko e hā kuo pau ai naʻe aʻu ʻa Sīsū ki Pētani ʻi he Falaité kae ʻikai ko e Tokonakí?

▪ ʻI he aʻu hake ʻa Sīsū ki Pētaní, ʻoku ngalingali naʻe Sāpate ia ʻi fē?

▪ Ko e hā ʻa e ngāue ʻa Mele naʻá ne fakatupu ha felauakí, pea naʻe anga-fēfē ʻa hono taukapoʻi ia ʻe Sīsuú?

▪ Ko e hā naʻá ne fakahāhaaʻi ʻa e fuʻu anga-fulikivanu ʻa e houʻeiki taulaʻeikí?