Sīsū–Ko ʻEne Moʻuí mo ʻEne Ngāue Fakafaifekau

ʻI Pētani, ʻi he Fale ʻo Saimoné

ʻI HE mavahe atu ʻa Sīsū mei Sielikoó, naʻá ne huʻu ki Pētani. Naʻe meimei ʻaho kakato ʻa e fonongá, koeʻuhi he ko e kaka ʻi he ngaahi konga fonua faingataʻa ko ha kilomita nai ʻe 19. Ko Sielikō ʻoku fakafuofua ki he mita ʻe 250 nai ʻokú ne māʻulaloʻaki ʻi he fukahi tahí, pea ko Pētani ʻokú ne māʻolungaʻaki ʻe ia ʻa e mita nai ʻe 762 mei he fukahi tahí. ʻOkú ke manatuʻi nai ko Pētaní ko e kolo ia ʻo Lasalosi mo hono ongo tuofāfiné. Ko e kiʻi koló ni ʻoku kilomita nai ʻe tolu mei Selusalema, pea ʻoku tuʻu ʻi he tahifo fakahahake ʻo e Moʻunga ko ʻOlivé.

Ko e tokolahi naʻa nau ʻosi aʻu hake ki Selusalema ki he Lakaatú. Naʻa nau haʻu ki muʻa ke fakamaʻa fakaeouau kinautolu. Mahalo naʻa nau ala ki ha ʻangaʻanga pe fai ha ngaahi meʻa kehe ʻoku nau hoko ai ʻo taʻemaʻa. Ko ia naʻa nau fai ki he ngaahi founga naʻe ʻosi fokotuʻu ke fakamaʻa kinautolu koeʻuhi kae kātoangaʻi ʻa e Lakaatú ʻi he tuʻunga taau. ʻI he fakataha ʻa e faʻahinga ko ʻeni naʻe muʻa maí ki he temipalé, ko e tokolahi naʻa nau fifili pe ʻe haʻu ʻa Sīsū ki he Lakaatú.

Ko Selusalemá ko e fekihiʻakiʻanga ia ʻo kau kia Sīsū. Naʻe ʻiloa ʻa hono fiemaʻu ai ʻe he kau taki lotú ke puke ia ʻo tāmateʻi. Ko hono moʻoní, naʻa nau fai ha tuʻutuʻuni ka ʻi ai ha taha te ne ʻilo pe ʻoku ʻi fē ʻa Sīsū, ke nau fakahā ia kiate kinautolu. Naʻe tuʻo tolu ʻi he ngaahi māhina ki mui mai aí​—ʻi he Kātoanga ʻo e Falelouʻakaú, ʻi he Kātoanga Huufi, pea mo e ʻosi ʻene fokotuʻu ʻa Lasalosi​—ʻa e feinga ʻa e kau taki ko ʻení ke tāmateʻi ia. Ko ia naʻe fifili ʻa e kakaí pe ʻe toe haʻu nai ʻa Sīsū? Naʻa nau feʻekenaki: “Ko e ha hoʻomou poa? ʻOku mo u pehē ʻe ʻikai ʻaupito te ne haʻu ki he katoanga?”

Lolotonga ʻení naʻe aʻu hake ʻa Sīsū ia ki Pētani, ʻa ia ko e ʻaho ia ʻe ono ki muʻa ʻi he Lakaatú, ʻa ia naʻe hoko ia ʻi Nīsani 14 ʻo fakatatau ki he tohimāhina faka-Siú. Naʻe aʻu ʻa Sīsū ki Pētani ʻi ha taimi ʻi he efiafi Falaité, ʻa ia ko e kamata ia ʻo Nīsani 8. Naʻe ʻikai malava ke ne fai ʻa e fononga ki Pētani ʻi he Tokonakí koeʻuhi he ko e fononga ʻi he Sāpate​—mei he tō ʻa e laʻā he Falaité ki he tō ʻa e laʻā ʻi he Tokonakí​—naʻe tapui ia ʻe he lao ʻa e kau Siú. Ngalingali naʻe ʻalu ʻa Sīsū ia ki he ʻapi ʻo Lasalosí, ʻo hangē ko ʻene faʻa fai ki muʻa atú, ʻo nofo ai ia ʻi he pō Falaité.

Kaekehe, ʻi he efiafi Tokonakí naʻe fakaafeʻi ai ʻe ha tokotaha kehe ia naʻe nofo ʻi Pētani ʻa Sīsū mo hono kau takangá ke nau kai efiafi. Ko e tangata ko Saimone ko ha kilia ki muʻa, ʻa ia naʻe fakamoʻui ki muʻa nai ia ʻe Sīsū. Naʻe kau ʻa Lasalosi ʻi he faʻahinga naʻe tākoto mo Sīsū ʻi he tēpilé. Ko Māʻata naʻá ne tokangaʻi ʻa e kau ʻaʻahí, koeʻuhi ko hono ʻulungaanga faʻa ngāué. Ka naʻe tokanga ʻa Mele ia kia Sīsū ʻi ha founga naʻe hoko ai ha felauaki.

Naʻe fakaava ʻe Mele ha puha ʻalapasita, pe ko ha foʻi hina, ʻa ia naʻe ʻi ai ha vaeua ʻo e kilo lolo namu lelei, ko e “naʻati moʻoni.” Naʻe fuʻu mahuʻinga ʻaupito ʻeni. Ko hono mahuʻingá naʻe fakafuofua ki he vāhenga ʻi he taʻu kakato ʻe taha! ʻI hono lilingi ʻe Mele ʻa e loló ki he ʻulu ʻo Sīsuú pea pehē ki hono vaʻé peá ne holoholoʻaki hono louʻulú ʻa e vaʻe ʻo Sīsuú, naʻe kātoi ʻi he falé hono kotoa ʻa e namu kakala.

Naʻe ʻita ʻa e kau ākongá mo ʻeke: “Ko e fai ha maumau lolo pehē koeʻumaʻā?” Pea naʻe pehē ʻe Siutasi ʻIsikaliote: “Ko e ha naʻe ʻikai fakatau ai ʻa e lolo ni, ʻo maʻu ai ha tenali ʻe tolungeau, ʻo foaki ki he masiva?” Ka naʻe ʻikai ko e tokanga moʻoni ʻa Siutasi ia ki he kau masivá, he naʻá ne ʻosi kaihaʻa ia mei he puha paʻanga naʻe tauhi ʻe he kau ākongá.

Ka naʻe taukapoʻi ʻe Sīsū ʻa Mele. Naʻá ne fekau: “Tuku ai pē ʻa e fefine: ko e ha ʻoku mou fakamamahi ai kiate ia? he ko e ngāue lelei ia kuo ne fai kiate au. He ko e meʻa ki he masiva te mou feangai ai pē mo kinautolu, pea ka mou ka loto ke fai ha ʻofa ki ai pea faingofua: ka ʻe ʻikai te mou feangai ai pē mo au. Kuo ne fai siʻono tūkuingata: kuo ne sinaki tākai hoku sino ki faʻitoka. Pea ko au ē, ʻoku ou tala atu, ʻIlonga ha potu ʻi māmani kātoa ʻe malangaʻaki ki ai ʻa e kōsipeli, ʻe leaʻaki ai foki ʻa e meʻa ne fai ʻe siʻi fefine ni, ko e fakamanatu kiate ia.”

Naʻe laka hake ʻi he houa ʻe 24 ʻa e ʻi Pētani ʻa Sīsū ia, pea naʻe mafola atu naʻá ne ʻi ai. Ko ia ai, ko e tokolahi naʻa nau haʻu ki he fale ʻo Saimoné ke sio kia Sīsū, ka naʻa nau toe omi foki ke sio kia Lasalosi. Ko ia naʻe faʻufaʻu ʻe he houʻeiki taulaʻeikí ke tāmateʻi ʻa Sīsū pea mo Lasalosi foki. Naʻa nau fai pehē koeʻuhi he ko e tokolahi naʻa nau tui kia Sīsū ko ʻenau sio ʻoku moʻui ʻa e tokotaha naʻá ne fokotuʻu mei he maté! Ko e moʻoni, ko ha anga-fulikivanu ē ʻa e kau taki lotú! Sione 11:​55–12:11; Mātiu 26:​6-13; Maʻake 14:​3-9; Ngāue 1:12.

◆ Naʻe aʻu fakakū hake ʻa Sīsū ki Pētaní, pea ngalingali naʻe Sāpate ia ʻi fē?

◆ Ko e hā ʻa e fetalanoaʻaki naʻe fai ʻi he temipalé, pea ko e hā hono ʻuhingá?

◆ Ko e hā ʻa e ngāue ʻa Mele naʻá ne fakatupu ha felauaki, pea naʻe anga-fēfē ʻa e taukapoʻi ia ʻe Sīsū?

◆ Ko e hā naʻá ne fakahāhaaʻi ʻa e fuʻu anga-fulikivanu ʻa e houʻeiki taulaʻeikí?