ʻOkú Ke ʻi he Lotolotonga ʻo e Faʻahinga ʻOku ʻOfeina ʻe he ʻOtuá?

“Ko ia ʻoku maʻu ʻeku ngaahi tuʻutuʻuni, mo tauhi ki ai, ko ia ia ʻoku ʻofa kiate au: pea ko ia ʻoku ʻofa kiate au ʻe ʻofeina ia ʻe heʻeku Tamai.”—SIONE 14:21.

1, 2. (a) Naʻe anga-fēfē hono fakahaaʻi ʻe Sihova ʻene ʻofa ki he faʻahinga ʻo e tangatá? (e) Ko e hā naʻe fokotuʻu ʻe Sīsū ʻi he poʻuli hifo ʻo Nīsani 14, 33 T.S.?

ʻOKU ʻofa ʻa Sihova ʻi heʻene fakatupu fakaetangatá. Ko hono moʻoní, ʻokú ne ʻofa lahi ʻi he māmani ʻo e faʻahinga ʻo e tangatá “ko ia naʻa ne foaki hono ʻAlo tofu-pe-taha-ne-fakatupu, koeʻuhi ko ia kotoa pe ʻoku tui pikitai kiate ia ke ʻoua naʻa ʻauha, kae maʻu ʻa e moʻui taʻengata.” (Sione 3:16) ʻI he fakaofiofi mai ʻa e taimi ke fai ai ʻa e Fakamanatu ʻo e pekia ʻa Kalaisí, ʻoku totonu ke lāuʻilo ʻo toe lahi ange ʻa e kau Kalisitiane moʻoní ko Sihová “naʻá ne ʻofa ʻiate kitautolu ʻo fekauʻi mai hono ʻAló ko ha feilaulau fakahōifuaʻanga ki heʻetau ngaahi angahalá.”—1 Sione 4:​10, NW.

² ʻI he poʻuli hifo ʻo Nīsani 14, 33 T.S., naʻe fakatahataha ai ʻa Sīsū mo ʻene kau ʻapositolo ʻe toko 12 ʻi ha loki ʻi ʻolunga ʻi Selusalema ke kātoangaʻi ʻa e Laka-Atú, ko hono fakamanatu ʻa e fakahaofi ʻo e kau ʻIsilelí mei ʻIsipité. (Mātiu 26:​17-20) ʻI he hili hono kātoangaʻi ʻa e kātoanga faka-Siu ko ʻení, naʻe tuku ange atu ʻe Sīsū ʻa Siutasi ʻIsikaliote pea fokotuʻu ha kai efiafi fakamanatu ʻa ia ʻe hoko ko e Fakamanatu faka-Kalisitiane ʻo e pekia ʻa Kalaisí.a ʻI hono ngāueʻaki ʻa e mā taʻefakatupu mo e uaine kulokulá ko ha fakatātā, pe ongo fakaʻilonga, ʻo hono sino fakakakanó mo e taʻataʻá, naʻe ʻai ʻe Sīsū ʻa e toenga ʻo ʻene kau ʻapositolo ʻe toko 11 ke nau ʻinasi fakataha ʻi he houa kai fakamanatú ni. Ko e ngaahi fakaikiiki ki he founga naʻá ne fai aí ʻoku ʻomai ia ʻe he kau tohi Kōsipeli Faitatau ko ia ko Mātiu, Maʻake, mo Luke pea mo e ʻapositolo ko Paulá, ʻa ia naʻá ne fakalea ia ko e “ʻOhomohe ʻo e ʻEiki.”—1 Kolinito 11:20; Mātiu 26:​26-28; Maake 14:​22-25; Luke 22:​19, 20.

3. ʻI he ngaahi founga mahuʻinga fē ʻoku kehe ai ʻa e fakamatala ʻa e ʻapositolo ko Sioné ki he ngaahi houa fakaʻosi ʻo Sīsū mo ʻene kau ākongá ʻi he loki ʻi ʻolungá mei he fakamatala ʻa e niʻihi kehé?

³ Ko e meʻa fakatupu tokangá, naʻe ʻikai ha lave ia ʻa e ʻapositolo ko Sioné ki he paasi ʻo e maá mo e uainé, mahalo koeʻuhi pē ʻi he aʻu mai ki he taimi naʻá ne tohi ai ʻene fakamatala Kōsipelí (ʻi he 98 T.S. nai), ne ʻosi fokotuʻu lelei ʻa e foungá ia ʻi he lotolotonga ʻo e muʻaki kau Kalisitiané. (1 Kolinito 11:​23-26) Kae kehe, ʻi hono fakamānavaʻí, ko Sione pē ʻokú ne ʻomai kiate kitautolu ha fakamatala mātuʻaki mahuʻinga fekauʻaki mo e meʻa naʻe lea ʻaki ʻe Sīsū mo ne fai ʻi he ki muʻa siʻi pea mo e hili atu pē ʻo ʻEne fokotuʻu ʻa e Fakamanatu ʻo ʻEne pekiá. ʻOku ʻikai toe siʻi hifo ʻi he vahe ʻe nima ʻo e Kōsipeli ʻa Sioné ʻoku fonu ai ʻa e ngaahi fakaikiiki fakatoʻoalotó ni. ʻOkú ne fakahāhaaʻi mahino ʻa e faʻahinga tokotaha ʻoku ʻofa ai ʻa e ʻOtuá. Tau sivisiviʻi ange ʻa e Sione vahe 13 ki he 17.

Ako mei he ʻOfa Alafaʻifaʻitakiʻanga ʻa Sīsuú

4. (a) Naʻe anga-fēfē hono fakamamafaʻi ʻe Sione ʻa e kaveinga tefito ʻo e fakataha ʻa Sīsū mo ʻene kau ākongá ʻi heʻene fokotuʻu ʻa e Fakamanatú? (e) Ko e hā ʻa e ʻuhinga mahuʻinga ʻe taha ʻoku ʻofa ai ʻa Sihova ʻia Sīsuú?

⁴ Ko e ʻofá ko ha kaveinga tuʻu-ki-muʻa ia ʻi he kotoa ʻo e ngaahi vahe ko ʻeni ʻoku ʻi ai ʻa e akonaki fakamāvae ʻa Sīsū ki hono kau muimuí. Ko hono moʻoní, ko e ngaahi faʻunga kehekehe ʻo e foʻi lea ko e “ʻofa” ʻoku hā tuʻo 31 ai. Ko e ʻofa loloto ʻa Sīsū ki heʻene Tamaí, ʻa Sihova, pea ki heʻene kau ākongá ʻoku ʻikai mo ha toe feituʻu ʻe lahi ange ai ʻene haá ka ko e ngaahi vahé ni. Ko e ʻofa ʻa Sīsū kia Sihová ʻoku malava ke hā mahino ia mei he kotoa ʻo e ngaahi fakamatala Kōsipeli fekauʻaki mo ʻene moʻuí, ka ko Sione pē ʻokú ne lēkooti ʻa hono fakahaaʻi māʻalaʻala ʻe Sīsū: “ʻOku ou ʻofa ki he Tamai.” (Sione 14:31) Naʻe toe fakahaaʻi ʻe Sīsū ʻo pehē ʻoku ʻofa ʻa Sihova ʻiate ia pea fakamatalaʻi ʻa e ʻuhingá. Naʻá ne pehē: “Hangē ko e ʻofaʻi au ʻe he Tamai, kuo pehē ʻeku ʻofaʻi kimoutolu: mou nofo maʻu ʻi he ʻofa ko ia aʻaku. Kapau te mou tauhi ʻeku ngaahi tuʻutuʻuni, te mou nofo maʻu ʻi heʻeku ʻofa; ʻo hangē foki kuo u tauhi ʻe au ʻa e ngaahi tuʻutuʻuni ʻa e Tamai, pea u nofo maʻu ʻi he ʻofa aʻana.” (Sione 15:​9, 10) ʻIo, ʻoku ʻofa ʻa Sihova ʻi hono ʻAló koeʻuhi ko ʻene talangofua haohaoá. Ko ha lēsoni lelei ē ki he kotoa ʻo e kau muimui ʻo Sīsū Kalaisí!

5. Naʻe anga-fēfē hono fakahāhaaʻi ʻe Sīsū ʻene ʻofa ki heʻene kau ākongá?

⁵ Ko e ʻofa tautakele ʻa Sīsū ki hono kau muimuí ʻoku fakamamafaʻi ia ʻi he kamataʻanga pē ʻo e fakamatala ʻa Sione fekauʻaki mo e fakataha fakaʻosi ʻa Sīsū mo e kau ʻapositoló. Naʻe pehē ʻe Sione: “Pea ko eni, i he teʻeki fai ʻa e katoanga ʻo e Pasova, ko e meʻa ʻi heʻene meaʻi ʻe Sisu kuo hokosia hono taimi ke hiki mei he maama ko eni ʻo ʻalu ki he Tamai, pea ko e meʻa ʻi heʻene ʻofa ki hono kakai oʻona ʻoku ʻi māmani; ko ia naʻa ne fai ʻene ʻofa taupotu kiate kinautolu.” (Sione 13:1) ʻI he efiafi poʻuli ʻiloa ko iá, naʻá ne ʻoange kiate kinautolu ha lēsoni fakangalongataʻa ʻi hono tauhi anga-ʻofa ʻo e niʻihi kehé. Naʻá ne fufulu honau vaʻé. Ko e meʻa ʻeni ia naʻe tonu ke loto-lelei ʻa e tokotaha taki taha ʻo kinautolu ke fai kia Sīsū pea ki honau fanga tokouá, ka naʻa nau fakaʻehiʻehi mei ai. Naʻe fakahoko ʻe Sīsū ʻa e ngafa fakatōkilalo ko ʻení pea lea leva ki heʻene kau ākongá: “Kapau ā kuo u fufulu homou vaʻe, ʻa au ko e ʻEiki mo e Lapai; pea ʻoku totonu ke fai ʻekimoutolu foki, ʻo fefufuluʻaki homou vaʻe ʻomoutolu. He kuo u tuku hamou faʻifaʻitakiʻanga, koeʻuhi ke mou fai foki, ʻo hange ko ʻeku fai kiate kimoutolu.” (Sione 13:​14, 15) ʻOku totonu ki he kau Kalisitiane moʻoní ke nau loto-lelei mo fiefia ke tauhi honau fanga tokouá.—Mātiu 20:​26, 27; Sione 13:17.

Muimui ʻi he Tuʻutuʻuni Foʻou

6, 7. (a) Ko e hā ʻa e fakaikiiki mahuʻinga ʻoku ʻomai ʻe Sione ʻo fekauʻaki mo hono fokotuʻu ʻo e Fakamanatú? (e) Ko e hā ʻa e tuʻutuʻuni foʻou naʻe ʻoange ʻe Sīsū ki heʻene kau ākongá, pea ko e hā naʻe foʻou ʻi he fekauʻaki mo e meʻa ko iá?

⁶ Ko e fakamatala ʻa Sione ki he meʻa naʻe hoko ʻi he loki ʻi ʻolunga ʻi he poʻuli hifo ʻo Nīsani 14 ʻa e fakamatala pē taha ʻoku lave tonu ai ki he mavahe atu ʻa Siutasi ʻIsikalioté. (Sione 13:​21-30) ʻI hono fakafehoanaki ʻa e ngaahi fakamatala Kōsipelí ʻoku hā ai naʻe toki fokotuʻu ʻe Sīsū ʻa e Fakamanatu ʻo ʻEne pekiá ʻi he hili ʻa e mavahe atu ʻa e tokotaha lavaki ko ʻení. Naʻá ne lea fakalūkufua leva ki heʻene kau ʻapositolo loto-tōnungá, ʻo ne ʻoange kiate kinautolu ʻa e akonaki mo e ngaahi fakahinohino fakamāvae. ʻI heʻetau mateuteu atu ke maʻu ʻa e Fakamanatú, ʻoku totonu ke tau mahuʻingaʻia lahi ʻaupito ʻi he meʻa naʻe leaʻaki ʻe Sīsū ʻi he taimi ko iá, pea tautefito koeʻuhi ʻoku tau fiemaʻu moʻoni ke ʻi he lotolotonga ʻo e faʻahinga ko ia ʻoku ʻofa ai ʻa e ʻOtuá.

⁷ Ko e fuofua fakahinohino naʻe ʻoange ʻe Sīsū ki heʻene kau ākongá ʻi he hili hono fokotuʻu ʻa e Fakamanatu ʻo ʻene pekiá ko ha meʻa foʻou ia. Naʻá ne fanongonongo: “Ko e tuʻutuʻuni foʻou ʻoku ou tuku kiate kimoutolu, Ke mou feʻofaʻaki: hange ā ko ʻeku ʻofaʻi kimoutolu, ke pehē foki hoʻomou feʻofaʻaki. Ko e meʻa kó é ʻe ʻilo ai ʻe he kakai kotoa pē ko e kau ako kimoutolu aʻaku, ʻo kapau ʻe ai haʻamou feʻofaʻaki.” (Sione 13:​34, 35) Ko e hā naʻe foʻou ʻi he fekauʻaki mo e fekau ko ʻení? Ki mui siʻi atu ʻi he efiafi pē ko iá, naʻe fakamahino ai ʻe Sīsū ʻa e ngaahi meʻá, ʻo ne pehē: “Ko eni ia ʻa e tuʻutuʻuni aʻaku, Ke mou feʻofaʻaki, ʻo hangē ko e ʻofa ne u fai kiate kimoutolu. Talaʻehai ʻoku ai ha ʻofa ʻa ha taha ʻe lahi ʻi he ʻofa ko é, ke ne liʻaki ʻene moʻui koeʻuhi ko hono ngaahi kaumeʻa.” (Sione 15:​12, 13) Naʻe tuʻutuʻuni ʻe he Lao ʻa Mōsesé ʻa e kau ʻIsilelí ke ‘ʻofa ki honau kaungaʻapí, ʻo hange ko ʻenau ʻofa kiate kinautolú.’ (Livitiko 19:18) Ka naʻe toe mahulu atu ʻa e tuʻutuʻuni ia ʻa Sīsuú. Naʻe fiemaʻu ki he kau Kalisitiané ia ke nau feʻofaʻaki ʻo hangē ko hono ʻofaʻi kinautolu ʻe Kalaisí, ʻo loto-lelei ke feilaulauʻi ʻenau moʻuí tonu maʻa honau fanga tokouá.

8. (a) Ko e hā ʻoku kau ki he ʻofa feilaulauʻi-kitá? (e) ʻOku anga-fēfē hono fakahāhā ʻe he Kau Fakamoʻoni ʻa Sihová ʻa e ʻofa feilaulauʻi-kitá he ʻahó ni?

⁸ Ko e faʻahitaʻu Fakamanatú ko ha taimi feʻungamālie ia ke sivisiviʻi ai kitautolu, fakatāutaha pea ʻi he tuʻunga ko ha fakatahaʻangá, ke sio pe ʻoku tau maʻu moʻoni ʻa e fakaʻilonga makehe ko ʻeni ʻo e lotu faka-Kalisitiane moʻoní—ʻa e ʻofa faka-Kalaisí. Ko e ʻofa feilaulauʻi-kita peheé ʻe malava ke ʻuhinga ia, pea kuo ʻuhinga ʻi he taimi ʻe niʻihi, ʻe hanga ʻe ha Kalisitiane ʻo ʻai ke ʻi ha tuʻunga fakatuʻutāmaki ʻa ʻene moʻuí kae ʻikai ko hono lavakiʻi hono fanga tokouá. Neongo iá, ʻoku faʻa kau ki ai ʻa ʻetau loto-lelei ke feilaulauʻi ʻetau ngaahi meʻa fakatāutahá koeʻuhi kae tokoniʻi mo tauhi hotau fanga tokouá mo e niʻihi kehé. Ko ha faʻifaʻitakiʻanga lelei ʻa e ʻapositolo ko Paulá ʻi he meʻá ni. (2 Kolinito 12:15; Filipai 2:17) ʻOku ʻiloa ʻa e Kau Fakamoʻoni ʻa Sihová ʻi he kotoa ʻo e māmaní ʻi heʻenau maʻu ʻa e laumālie feilaulauʻi-kitá, ʻo tokoniʻi honau fanga tokouá mo honau ngaahi kaungāʻapí pea ʻi hono ngāueʻaki kinautolu ke fakahaaʻi atu ʻa e moʻoni ʻo e Tohitapú ki honau kaungā faʻahinga ʻo e tangatá.b​—Kaletia 6:10.

Ongo Vahaʻangatae ke Koloaʻaki

9. Ke tauhi maʻu hotau vahaʻangatae mahuʻinga mo e ʻOtuá mo hono ʻAló, ko e hā ʻoku tau fiefia ke faí?

⁹ ʻOku ʻikai ha toe meʻa ʻe mahuʻinga ange kiate kitautolu ka ko e hoko ʻo ʻofaʻi ʻe Sihova mo hono ʻAlo, ko Kalaisi Sīsuú. Kae kehe, ke maʻu mo ongoʻi ʻa e ʻofa ko ʻení, kuo pau ke tau fai ha meʻa. ʻI he pō fakaʻosi ko ia mo ʻene kau ākongá, naʻe pehē ʻe Sīsū: “Ko ia ʻoku maʻu ʻeku ngaahi tuʻutuʻuni, mo tauhi ki ai, ko ia ia ʻoku ʻofa kiate au: pea ko ia ʻoku ʻofa kiate au ʻe ʻofeina ia ʻe heʻeku Tamai, pea te u ʻofa mo au kiate ia, pea te u fakahāʻi kiate ia.” (Sione 14:21) Koeʻuhi ʻoku tau koloaʻaki hotau vahaʻangatae mo e ʻOtuá pea mo hono ʻAló, ʻoku tau talangofua fiefia ki heʻena ngaahi tuʻutuʻuní. ʻOku kau heni ʻa e tuʻutuʻuni foʻou ke fakahāhā ʻa e ʻofa feilaulauʻi-kitá pea pehē ki he fekau naʻe ʻoange ʻe Kalaisi ʻi he hili ʻene toetuʻú “ke malanga ki he kakaí pea ke fai ha fakamoʻoni fakaʻauliliki,” ʻo feinga ke “ngaohi . . . ko e kau ākonga” ʻa e faʻahinga ʻoku nau tali ʻa e ongoongo leleí.—Ngāue 10:​42, NW; Mātiu 28:​19, 20, NW.

10. Ko e hā ʻa e ongo vahaʻangatae mahuʻinga ʻoku ala maʻu ʻe he kau paní pea mo e “fanga sipi kehé”?

¹⁰ Ki mui ʻi he pō ko iá, ʻi ha tali ki ha fehuʻi naʻe ʻeke kiate ia ʻe he ʻapositolo loto-tōnunga ko Siutasí (Tatiusi), naʻe pehē ʻe Sīsū: “Kapau ʻoku ʻofa ha taha kiate au, te ne tauhi ʻeku lea: pea ʻe ʻofa kiate ia ʻa ʻeku Tamai, pea te ma ōmi kiate ia, ʻo ma nofoʻanga taha mo ia.” (Sione 14:​22, 23) Naʻa mo e lolotonga ʻo e kei ʻi he māmaní, ko e kau Kalisitiane paní, ʻa ia kuo fakaafeʻi ke pule fakataha mo Kalaisi ʻi hēvaní, ʻoku nau maʻu ha vahaʻangatae vāofi ʻaupito mo Sihova pea mo hono ʻAló. (Sione 15:15; 16:27; 17:22; Hepelu 3:1; 1 Sione 3:​2, 24) Ka ko honau ngaahi takanga ko e “fanga sipi kehé,” ʻa ia ko ʻenau ʻamanakí ke moʻui taʻengata ʻi he māmaní, ʻoku nau toe maʻu ha vahaʻangatae mahuʻinga mo honau “tauhi pē taha,” ko Sīsū Kalaisí, pea mo honau ʻOtua, ko Sihová, kapau ʻe fakamoʻoniʻi ʻoku nau talangofua.—Sione 10:​16, NW; Sāme 15:​1-5; 25:14.

“ʻIkai ʻo Māmani ʻa Kimoutolu”

11. Ko e hā ʻa e fakatokanga fakatupu fakakaukau naʻe fai ʻe Sīsū ki heʻene kau ākongá?

¹¹ ʻI he lolotonga ʻa e fakataha fakaʻosi ko ʻeni mo ʻene kau ākonga loto-tōnungá ki muʻa peá ne pekiá, naʻe fai ʻe Sīsū ha fakatokanga fakatupu fakakaukau: Kapau ʻoku ʻofaʻi ʻe he ʻOtuá ha taha, ʻe fehiʻanekinaʻi ia ʻe he māmaní. Naʻá ne tala: “Kapau ʻoku fehiʻa ʻa māmani kiate kimoutolu, manatu naʻe muʻa noa pē ʻene fehiʻa kiate au ʻiate kimoutolu. Ka ne ʻo māmani ʻakimoutolu, pehē ʻe ʻofa ʻa māmani ki he meʻa ʻaʻana: ka ko e meʻa ʻi he ʻikai ʻo māmani ʻa kimoutolu kae, kehe, ko e fili kimoutolu ʻe au mei māmani, ko hono ʻuhingā ʻe ʻoku fehiʻa ai ʻa māmani kiate kimoutolu. Manatu he lea naʻa ku fai kiate kimoutolu, ʻOku ʻikai ha tamaioʻeiki ʻe lahi ʻi heʻene ʻeiki. Kapau kuo nau fakatangaʻi au, te nau fakatangaʻi ʻa kimoutolu foki; kapau kuo nau tauhi ʻa e lea aʻaku, te nau tauhi ʻa e lea ʻamoutolu foki.”—Sione 15:​18-20.

12. (a) Ko e hā naʻe fakatokanga ai ʻa Sīsū ki heʻene kau ākongá ʻo pehē ʻe fehiʻa ʻa e māmaní kiate kinautolú? (e) Ko e hā ʻe lelei ki he tokotaha kotoa ke fakakaukau ki ai ʻi he fakaofi mai ʻa e Fakamanatú?

¹² Naʻe fai ʻe Sīsū ʻa e fakatokanga ko ʻení koeʻuhi ko e kau ʻapositolo ko ʻeni ʻe toko 11 pea mo e kotoa ʻo e kau Kalisitiane moʻoni ʻi he hili kinautolú ke ʻoua te nau hoko ʻo loto-siʻi mo foʻi koeʻuhi ko e fehiʻa ʻa e māmaní. Naʻá ne tānaki atu: “Ko e ngaahi meʻa ni kuo u tala atu, koeʻuhi ke ʻoua te mou tūkia. Te nau hifo kimoutolu mei he falelotu: ʻio, ʻoku ʻunu mai ha taimi, ʻa ia ʻe ʻilonga ai ha taha te ne tamateʻi kimoutolu, te ne lau kuo ne fai ha feilaulau [“ngāue toputapu,” NW] ki he ʻOtua. Pea te nau fai pehē, koeʻuhi kuo ʻikai te nau ʻilo ʻa e Tamai, ʻumaʻā au.” (Sione 16:​1-3) ʻOku fakamatalaʻi ʻe ha tikisinale Tohitapu ʻe taha ʻo pehē ko e faʻunga ʻo e foʻi veape ʻoku liliu heni ko e “tūkia” ʻoku ʻuhingá “ke fakatupunga ha taha ke kamata ke taʻefalala pea liʻaki ʻa e tokotaha ko ia naʻe tonu ke falala mo talangofua ki aí; ke fakatupunga ke tō mamaʻo atu.” ʻI he fakaofi mai ʻa e taimi ke fai ai ʻa e Fakamanatú, ʻoku totonu ki he tokotaha kotoa ke fakakaukau atu ki he ʻalunga ʻo e moʻui ʻa e faʻahinga loto-tōnunga, ʻi he kuohilí mo e lolotongá, pea faʻifaʻitaki ki heʻenau faʻifaʻitakiʻanga ʻo e tuʻumaʻu ʻi he malumalu ʻo e ʻahiʻahí. ʻOua ʻe fakaʻatā ʻa e fakafepakí pe fakatangá ke ne fakatupunga koe ke ke liʻaki ʻa Sihova mo Sīsū, ka ke fakapapauʻi ke falala mo talangofua kiate kinaua.

13. Ko e hā naʻe kole ʻe Sīsū koeʻuhi ko hono kau muimuí ʻi ha lotu ki heʻene Tamaí?

¹³ ʻI heʻene lotu fakaʻosi ki muʻa pea mavahe mei he loki ko ia ʻi ʻolunga ʻi Selusalemá, naʻe pehē ai ʻe Sīsū ki heʻene Tamaí: “Ko au kuo u tuku kiate kinautolu hoʻo folofola; pea ko māmāni naʻa ne fehiʻa kiate kinautolu, koeʻuhi ʻoku ʻikai te nau ʻo māmāni, ʻo hange ko au, ʻoku ʻikai te u ʻo māmāni. ʻOku ʻikai te u pehē, ke ke toʻo kinautolu mei māmani, ka ke ke taʻofi kinautolu mei he Fili. ʻOku ʻikai te nau ʻo māmāni, hange ko au, ʻoku ʻikai te u ʻo māmāni.” (Sione 17:​14-16) ʻOku malava ke tau fakapapauʻi ʻoku tokanga mai ʻa Sihova ki he faʻahinga ko ia ʻokú ne ʻofa aí, ke fakaivimālohiʻi kinautolu ʻi heʻenau hanganaki mavahe mei he māmaní.—Aisea 40:​29-31.

Nofo Maʻu ʻi he ʻOfa ʻa e Tamaí pea ʻi he ʻOfa ʻa e ʻAló

14, 15. (a) Naʻe fakatatau ʻe Sīsū ʻa ia tonu ki he hā, ʻo kehe ia mei he ‘vaine kovi’ ko e hā? (e) Ko hai ʻa e “ngaahi vaʻa” ʻo e “vaine moʻonia”?

¹⁴ ʻI he lolotonga ʻo e fetalanoaʻaki fekoekoeʻi naʻá ne fai mo ʻene kau ākonga loto-tōnungá ʻi he poʻuli hifo ʻo Nīsani 14, naʻe fakatatau ai ʻe Sīsū ʻa ia tonu ki he “vaine moʻonia,” ʻo kehe ia mei he ‘vaine kovi’ ko ʻIsileli taʻefaitōnungá. Naʻá ne pehē: “Ko au ko e vaine moʻonia, pea ko ʻeku Tamai ko e tauhi ngoue ia.” (Sione 15:1) ʻI he laui senituli ki muʻa, naʻe lēkooti ai ʻe he palōfita ko Selemaiá ʻa e ngaahi lea ko ʻeni ʻa Sihova ki heʻene kakai tafoki mei he moʻoní: “Naʻa ku to koe ko e vaine ʻeiki . . . pea fēfē fua hoʻo liliu ʻo laku mai kiate au ʻa e ngaahi lito kovi ʻo e vaine kehe?” (Selemaia 2:21) Pea naʻe tohi ʻe he palōfita ko Hōseá: “Ko ha vaine kovi ʻa ʻIsileli. ʻOkú ne fua mai kiate ia pē. . . . Ko honau lotó kuo hoko ʻo mālualoi.”—Hosea 10:​1, 2, NW.

¹⁵ ʻI he ʻikai ke ne fakatupu mai ʻa e fua ʻo e lotu moʻoní, naʻe tō ʻa ʻIsileli ia ki he tafoki mei he moʻoní pea fakatupu mai ʻa e fua kiate ia pē. ʻI he ʻaho ʻe tolu ki muʻa ʻi heʻene fakataha fakaʻosi mo ʻene kau ākonga loto-tōnungá, naʻe tala ai ʻe Sīsū ki he kau taki Siu mālualoí: “ʻOku ou tala atu, ʻE toʻo meiate kimoutolu ʻa e Puleʻanga ʻo e ʻOtua, pea ʻe tuku ki ha kakai ʻoku fua ʻo tāu mo ia.” (Mātiu 21:43) Ko e kakai foʻou ko iá ko e “Isileli oe Otua,” ʻoku faʻuʻaki ia ʻa e kau Kalisitiane pani ʻe toko 144,000, ʻa ia ʻoku fakatatau ki he “ngaahi vaʻa” ʻo e “vaine moʻonia,” ko Kalaisi Sīsuú.—Kaletia 6:​16, PM; Sione 15:5; Fakahā 14:​1, 3.

16. Ko e hā naʻe naʻinaʻi ʻe Sīsū ki he kau ʻapositolo loto-tōnunga ʻe toko 11 ke nau faí, pea ko e hā ʻoku malava ke leaʻaki fekauʻaki mo e toenga loto-tōnunga ʻi he taimi ko ʻeni ʻo e ngataʻangá?

¹⁶ Naʻe tala ʻe Sīsū ki he kau ʻapositolo ʻe toko 11 naʻe ʻi ai mo ia ʻi he loki ko ia ʻi ʻolungá: “ʻIlonga ha vaʻa ʻiate au ʻoku ʻikai fua, ʻoku ne motuhi ia: pea ʻilonga ha vaʻa ʻoku fua, ʻoku ne ʻauhani ia, ke ʻasili ʻene fua. ʻE, ʻai ke mou nofo maʻu ʻiate au, mo au ʻiate kimoutolu. Hangē ʻoku ʻikai ke faʻa fua ʻa e vaʻa ʻiate ia pē, ʻo kapau ʻe ʻikai nofo maʻu ʻi he vaine; pehē foki, ʻe ʻikai te mou lava ʻe kimoutolu, ʻo kapau ʻe ʻikai te mou nofo maʻu ʻiate au.” (Sione 15:​2, 4) ʻOku fakahaaʻi ʻe he hisitōlia ʻi onopooni ʻo e kakai ʻa Sihová kuo nofo maʻu ʻa e toenga loto-tōnunga ʻo e kau Kalisitiane paní ki honau ʻUlú, ko Kalaisi Sīsū. (Efeso 5:23) Kuo nau tali ʻa e fakamaʻá mo e ʻauhaní. (Malakai 3:​2, 3) Talu mei he 1919, kuo nau ʻomai ʻa e fua ʻo e Puleʻangá ʻo lahi fau, ʻuluakí ko e kau Kalisitiane pani kehé, pea talu mei he 1935, ko ha ngaahi takanga ko e “fuʻu kakai lahi” ʻoku tupulaki fakautuutu.—Fakahā 7:9; Aisea 60:​4, 8-11.

17, 18. (a) Ko e hā ʻa e ngaahi lea ʻa Sīsū ʻoku tokoni ki he kau paní mo e fanga sipi kehé ke nau nofo maʻu ʻi he ʻofa ʻa Sihová? (e) ʻE anga-fēfē ʻa e tokoni ʻa hono maʻu ʻo e Fakamanatú kiate kitautolú?

¹⁷ ʻOku kaunga ʻa e toe ngaahi lea ʻa Sīsuú ki he kotoa ʻo e kau Kalisitiane paní pea mo honau takangá: “Ko e meʻa ko ia kuo fakalangilangiʻi ai ʻa ʻeku Tamai, koeʻuhi ke iku ki hoʻomou fua lahi, mo hoʻomou mātuʻaki hoko ko e kau ako aʻaku. Hangē ko e ʻofaʻi au ʻe he Tamai, kuo pehē ʻeku ʻofaʻi kimoutolu: mou nofo maʻu ʻi he ʻofa ko ia aʻaku. Kapau te mou tauhi ʻeku ngaahi tuʻutuʻuni, te mou nofo maʻu ʻi heʻeku ʻofa; ʻo hangē foki kuo u tauhi ʻe au ʻa e ngaahi tuʻutuʻuni ʻa e Tamai, pea u nofo maʻu ʻi he ʻofa aʻana.”—Sione 15:​8-10.

¹⁸ ʻOku tau fiemaʻu kotoa ke nofo maʻu ʻi he ʻofa ʻa e ʻOtuá, pea ʻoku ueʻi kitautolu ʻe he meʻá ni ke tau hoko ko e kau Kalisitiane fua lahi. ʻOku tau fai ʻeni ʻaki ʻetau ngāueʻaki ʻa e faingamālie kotoa pē ke malangaʻi ai ʻa e “ongoongolelei ko eni ʻo e puleʻanga.” (Mātiu 24:14) ʻOku tau toe fai hotau lelei tahá ke fakahāhā ʻa e “fua ʻo e laumālié” ʻi heʻetau moʻui fakafoʻituituí. (Kaletia 5:​22, 23, NW) Ko hono maʻu ʻa e Fakamanatu ʻo e pekia ʻa Kalaisí ʻe fakaivimālohiʻi ai kitautolu ʻi heʻetau fakapapau ke fai ʻa e meʻá ni, he ʻe fakamanatu mai ai kiate kitautolu ʻa e ʻofa lahi ʻa e ʻOtuá mo Kalaisi kiate kitautolú.—2 Kolinito 5:​14, 15.

19. Ko e hā ʻa e toe tokoni ʻe lāulea ki ai ʻi he kupu hoko maí?

¹⁹ ʻI he hili hono fokotuʻu ʻa e Fakamanatú, naʻe talaʻofa ʻa Sīsū ʻo pehē ʻe hanga ʻe heʻene Tamaí ʻo ʻomai ki hono kau muimui loto-tōnungá ha “Taukapo [“tokoni,” NW], ko e Laumālie Māʻoniʻoni.” (Sione 14:26) Ko e founga ʻoku tokoni ai ʻa e laumālie ko ʻení ki he kau paní mo e fanga sipi kehé ke nau nofo maʻu ʻi he ʻofa ʻa Sihová ʻe sivisiviʻi ia ʻi he kupu hoko maí.

[Fakamatala ʻi lalo]

Ngaahi Fehuʻi Fakamanatu

• Ko e hā ʻa e lēsoni ʻaonga ʻi he ngāue anga-ʻofá naʻe ʻoange ʻe Sīsū ki heʻene kau ākongá?

• ʻI he fekauʻaki mo e hā, ko ha taimi feʻungamālie ai ʻa e faʻahitaʻu Fakamanatú ki he sivisiviʻi-kitá?

• Ko e hā ʻoku totonu ai ke ʻoua te tau hoko ʻo tūkia ʻi he fakatokanga ʻa Sīsū fekauʻaki mo e fehiʻa mo e fakatanga mei he māmaní?

• Ko hai ʻa e “vaine moʻonia”? Ko hai ʻa e “ngaahi vaʻa,” pea ko e hā ʻoku ʻamanekina meiate kinautolú?

[Fakatātā ʻi he peesi 15]

Naʻe ʻoange ʻe Sīsū ki heʻene kau ʻapositoló ha lēsoni fakangalongataʻa ʻi he ngāue anga-ʻofá

[Fakatātā ʻi he peesi 16, 17]

ʻOku talangofua ʻa e kau ākonga ʻa Kalaisí ki heʻene tuʻutuʻuni ke fakahāhā ʻa e ʻofa feilaulauʻi-kitá