Sīsū—Ko ʻEne Moʻuí mo ʻEne Ngāue Fakafaifekaú

Ko e ʻOhomohe Fakamanatú

ʻI HE ʻosi hono fufulu ʻe Sīsū ʻa e vaʻe ʻo ʻene kau ʻaposetoló, naʻá ne lave ki he Sāme 41:​9, ʻo ne pehē: “Ko ia ʻoku kai ʻeku ma kuo ne hiki hono muivaʻe kiate au.” Pea ʻi he hoko ʻo mamahi hono lotó, naʻá ne fakamatala ange: “Ko e toko taha ʻiate kimoutolu te ne lavakiʻi au.”

Naʻe kamata ke loto-mamahi ʻa e kau ʻaposetoló ʻo nau pehē taha taha kia Sīsū: “ʻOku ʻikai nai ko au, ʻe?” Naʻa mo Siutasi ʻIsikaliote naʻá ne kau ʻi he ʻeke ʻo e fehuʻi ko ʻení. Ko Sione ʻa ia naʻá ne tokoto he tafaʻaki ʻo Sīsuú ʻi he tēpilé, naʻá ne falala ki he fatafata ʻo Sīsuú mo ne ʻeke ange: “ʻEiki, ko hai ia?”

Naʻe tali ange ʻe Sīsū: “Ko e toko taha pē ʻo e kau Hongofulumāua, ʻa ia ʻoku ala fakataha mo au ʻi he tisi. He ʻoku moʻoni ko e mole ʻa e Fanautama ʻa Tangata ʻoku hangē ko ia kuo tohi maʻana: ka ʻoiauē ʻa e tangata ko ia te ne lavakiʻi ʻa e Fānautama ʻa Tangata! ne ngutuhuaange ki he tangata ko ia ʻo ka ne ʻikai fanauʻi.” ʻI he hili iá, naʻe toe hū ʻa Sētane kia Siutasi, ʻo ngāuekoviʻaki hono lotó, ʻa ia kuo hoko ʻo fulikivanu. Ki mui mai ʻi he pō ko iá, naʻe feʻungamālie hono ui ʻe Sīsū ʻa Siutasi ko e “hako ʻo mala.”

Naʻe tala ʻe Sīsū kia Siutasi: “Fai vave ange ʻa e meʻa ʻoku ke fai.” Naʻe ʻikai ke mahino ia ki he toenga ʻo e kau ʻaposetolo kehé pe ko e ʻuhinga ʻa Sīsuú ki he hā. Naʻe fakakaukau ʻa e niʻihi koeʻuhi he ko Siutasi naʻá ne tauhi ʻa e puha paʻangá, ko e tala ʻa Sīsū kiate ia ke: “Fakatau muʻa ʻa e ngaahi meʻa kuo teʻeki ke tau maʻu ki he katoanga,” pe ʻoku totonu ke ne ʻalu ke ʻave ha meʻa ki he kakai masivá.

ʻI he hili ʻa e ʻalu ʻa Siutasí, naʻe fokotuʻu ʻe Sīsū ha kātoanga, pe fakamanatu foʻou fakakātoa mo ʻene kau ʻaposetolo angatonú. Naʻá ne toʻo ha foʻi mā, ʻo fai ha lotu fakafetaʻi, peá ne pakipaki ia, ʻo ne ʻoange kiate kinautolu mo ne pehē: “Toʻo ʻo kai.” Naʻá ne fakamatala: “Ko hoku sino ʻeni, ʻa ia ʻoku foaki koeʻuhi ko kimoutolu: mou fai ʻeni mōku fakamanatu.”

ʻI he ʻosi ʻa e kai ʻa e tokotaha kotoa pē ʻi he maá, naʻe toʻo ʻe Sīsū ha ipu uaine, ʻoku hā mahino ko e ipu ia hono fā naʻe ngāueʻaki ʻi he Laka-atú. Naʻá ne toe fai foki mo e lotu fakafetaʻi ʻo ia, pea ʻoatu ia kiate kinautolu, ʻo ne kole ke nau inu mei ai, peá ne pehē: “Ko e ipu ni ko e fuakava [“kovinānite,” NW] foʻou ia ʻoku faiʻaki hoku toto, ʻa ia ʻoku lilingi koeʻuhi ko kimoutolu.”

Ko hono moʻoní, ko e fakamanatu ʻeni ʻo e pekia ʻa Sīsuú. ʻE toutou fai ia ʻi he taʻu taki taha ʻi Nīsani 14, ʻo hangē ko e lea ʻa Sīsū, ko e fakamanatu kiate ia. ʻE ʻai ai ʻeni ke manatu ai ʻe kinautolu te nau fai ʻa e fakamanatú ki he meʻa ko ia kuo fai ʻe Sīsū mo ʻene Tamai fakahēvaní ke tokonaki mai ai ha haoʻanga ki he faʻahinga ʻo e tangatá mei he fakahalaia ʻo e maté. Ki he kau Siu te nau hoko ko e kau muimui ʻo Kalaisí, ko e kātoanga ko ʻení te ne fetongi ʻa e Laka-atú.

Ko e kovinānite foʻoú, ʻa ia naʻe kamata ke ngāue ia ʻi he toto ʻo Sīsū ne lilingí, naʻá ne fetongi ʻa e kovinānite ʻo e Lao motuʻá. Naʻe fakalaloa ai ʻa Sīsū ʻi he tafaʻaki ʻe ua​—ʻi he tafaʻaki ʻe tahá, ko Sihova ko e ʻOtuá, pea ʻi he tafaʻaki ʻe tahá, ko e toko 144,000 ʻo e kau Kalisitiane fanauʻi ʻe he laumālié. Tukukehe ʻa e tokonaki ki he fakamolemole ʻo e ngaahi angahalá, naʻe toe ʻatā ʻi he kovinānité ni ki hano faʻu ʻo ha puleʻanga fakahēvani ʻo e kau tuʻi-taulaʻeiki. Mātiu 26:​21-​29; Maʻake 14:​18-25; Luke 22:​19-23; Sione 13:​18-30; 17:12; 1 Kolinitō 5:7.

◆ Ko e hā ʻa e kikite Fakatohitapu naʻe lave ki ai ʻa Sīsū ʻo fekauʻaki mo ha kaungāmeʻa, pea ko e hā hono fakahoko ʻokú ne ʻai ki aí?

◆ Ko e hā naʻe loto-mamahi lahi ai ʻa e kau ʻaposetoló, pea ko e hā naʻe ʻeke ʻe he tokotaha taki taha ʻo kinautolu?

◆ Ko e hā e meʻa naʻe tala ʻe Sīsū kia Siutasi ke faí, ka naʻe anga-fēfē hono fakaʻuhingaʻi ʻe he toenga ʻo e kau ʻaposetoló ʻa e ngaahi lea ko iá?

◆ Ko e hā ʻa e kātoanga naʻe fokotuʻu ʻe Sīsū ʻi he hili ʻa e ʻalu ʻa Siutasí, pea ko e hā hono taumuʻá?

◆ Ko hai ʻa e ongo tafaʻaki ki he kovinānite foʻoú, pea ko e hā ʻoku fakahoko ʻe he kovinānité?