ʻI he Māmaní Kae ʻIkai ko ha Konga ʻo Ia

“Koeuhi oku ikai o mamani akimoutolu, . . . oku fehia ai a mamani kiate kimoutolu.”​—SIONE 15:19, PM.

 1. Ko e hā ʻa e vahaʻangatae ʻoku maʻu ʻe he kau Kalisitiané fekauʻaki mo e māmaní, lolotonga ia ʻoku fēfē ʻa e vakai ia ʻa e māmaní kiate kinautolú?

ʻI HONO pō fakaʻosi mo ʻene kau ākongá, naʻe tala ange ai ʻe Sīsū kiate kinautolu: “Oku ikai o mamani akimoutolu.” Ko e māmani fē naʻá ne lea ki aí? ʻIkai naʻá ne lea ʻi ha taimi ki muʻa atu: “Naʻe ʻofa pehe ʻa e ʻOtua ki māmāni, ko ia naʻa ne foaki hono ʻAlo-tofu-pe-taha-ne-fakatupu, koeʻuhi ko ia kotoa pe ʻoku tui pikitai kiate ia ke ʻoua naʻa ʻauha, kae maʻu ʻa e moʻui taʻengata”? (Sione 3:16) Ko e kau ākongá naʻe mahino lelei ko ha konga kinautolu ʻo e māmani ko iá koeʻuhí ko e fuofua faʻahinga kinautolu naʻe tui pīkitai kia Sīsū ki he moʻui taʻengatá. Ko e hā leva ʻa e ʻuhinga, naʻe pehē ai ʻe Sīsū ʻi he taimi ko ení ko ʻene kau ākongá naʻa nau mavahe mei he māmaní? Pea ko e hā naʻá ne toe pehē ai: “Koeuhi oku ikai o mamani akimoutolu, . . . oku fehia ai a mamani kiate kimoutolu”?​—Sione 15:19, PM.

 2, 3. (a) Ko e “māmani” fē naʻe pau ke ʻoua ʻe kau ki ai ʻa e kau Kalisitiané? (e) Ko e hā ʻa e lau ʻa e Tohitapú fekauʻaki mo e “māmani” ko ia ʻoku ʻikai kau ki ai ʻa e kau Kalisitiané?

² Ko e tali ki aí, he ko e Tohitapú ʻokú ne ngāueʻaki ʻe ia ʻa e foʻi lea “māmani” (faka-Kalisí, koʹsmos) ʻi he ngaahi founga kehekehe. Hangē ko ia naʻe fakamatalaʻi ʻi he kupu ki muʻá, ʻi he taimi ʻe niʻihi ʻi he Tohitapú “ko e māmani” ʻoku lave ia ki he faʻahinga fakalūkufua ʻo e tangatá. Ko e māmani ʻeni naʻe ʻofa ki ai ʻa e ʻOtuá pea mo ia naʻe pekia ki ai ʻa Sīsuú. Ka neongo ia, ʻoku pehē ʻe he The Oxford History of Christianity: “Ko e ‘māmaní’ ko ha toe fakalea ia ʻi hono ngāueʻaki faka-Kalisitiané ki ha faʻahinga meʻa ʻoku mavahe mei he ʻOtuá pea ʻoku fakafili kiate ia.” ʻOku moʻoni fēfē ʻeni? ʻOku fakamatalaʻi ʻe he tangata faʻutohi Katolika ko ia ko Roland Minnerath, ʻi heʻene tohi ko e Les chrétiens et le monde (Kau Kalisitiané mo e Māmaní): “ʻI hano fakaʻuhingaʻi ʻi ha ʻuhinga ʻoku ʻikai sai, ko e māmaní ʻoku ʻuhinga ia . . . ko e feituʻu ʻa ia ʻoku fakahoko ai ʻe he ngaahi mafai ʻoku fakafili ki he ʻOtuá ʻa ʻenau ngāué mo ē ʻoku fokotuʻu ʻaki ʻene fakafepaki ki he pule maʻalali ʻa Kalaisí ha ʻemipaea tuʻufili ʻoku ʻi he malumalu ʻo e mafai ʻo Sētané.” Ko e “māmani” ko ʻení ko e fuʻu faʻahinga ia ʻo e tangatá ʻa ia ʻoku mavahe mei he ʻOtuá. Ko e kau Kalisitiané ʻoku ʻikai te nau ʻo e māmani ko ʻení, pea ʻokú ne fehiʻa kiate kinautolu.

³ Fakaofiofi ki he ngataʻanga ʻo e senituli ʻuluakí, naʻe ʻi he fakakaukau ʻa Sioné ʻa e māmani ko ʻení ʻi he taimi naʻá ne tohi ai: “ʻOua te mou ʻofa ki mamani, ʻumaʻā ʻa e ngaahi meʻa ʻoku ʻi he mamani. Ka ʻofa ʻe ha taha ki mamani ʻoku ʻikai ʻiate ia ʻa e ʻofa ki he Tamai. He ko e meʻa katoa ʻoku ʻi mamani, ʻa e holi ʻo e kakano, mo e holi ʻo e mata, mo e ʻafungi ʻo e moʻui, ʻoku ʻikai mei he Tamai ia, ka ʻoku mei mamani.” (1 Sione 2:​15, 16) Naʻá ne toe tohi: “ʻOku tau lāuʻilo ko e tupu mei he ʻotua ʻa kitautolu, pea ko hono kotoa ʻo māmani ʻoku ʻi he nima ʻo e Fili.” (1 Sione 5:19) Ko Sīsū tonu naʻá ne ui ʻa Sētane ko e “ʻeiki ʻo e maama ko eni.”​—Sione 12:31; 16:11.

Ko e Tupu ʻa e Ngaahi Mafai ʻo e Māmaní

 4. Naʻe anga-fēfē ʻa e hoko mai ʻa e ngaahi mafai ʻo e māmaní?

⁴ Ko e māmani ʻoku lolotonga ʻi aí ni ʻo e faʻahinga ʻo e tangatá ʻa ia kuo mavahe mei he ʻOtuá, naʻe kamata ke tupulaki mai ia taimi nounou pē hili ʻa e Lōmaki ʻi he ʻaho ʻo Noá, ʻi he taimi naʻe ʻikai toe lotu ai ʻa e tokolahi ʻi he hako ʻo Noá kia Sihova ko e ʻOtuá. Ko e tuʻu-ki-muʻa ʻi he ngaahi ʻaho ki muʻá ko Nimilote, ko e tangata fokotuʻu kolo pea “ko e fuʻu toʻa ia ʻi he tulimanu ʻo [“fakafepaki kia,” NW] Sihova.” (Senesi 10:​8-12) ʻI he ngaahi taʻu ko iá ko e lahi taha ʻo e māmani ko ʻení naʻe fokotuʻutuʻu ia ki ha fanga kiʻi puleʻanga fakakolo, ʻa ia naʻa nau fakafaʻafaʻahi ʻi he taimi ki he taimi pea nau fetauʻaki. (Senesi 14:​1-9) Naʻe hoko ʻo hau ʻa e ngaahi puleʻanga fakakolo ʻe niʻihi ʻi he niʻihi kehé ʻo nau hoko ai ko e ngaahi mafai fakafeituʻu. Naʻe faifai pē ʻo tupu ʻa e ngaahi mafai fakafeituʻú ʻo hoko ko e ngaahi mafai mālohi ʻo māmani.

 5, 6. (a) Ko e hā ʻa e ngaahi mafai ʻe fitu ʻo e māmaní ʻi he hisitōlia ʻo e Tohitapú? (e) ʻOku anga-fēfē hono fakatātaaʻi ʻa e ngaahi mafai ko eni ʻo e māmaní, pea ʻoku mei fē honau mafaí?

⁵ ʻI he muimui ki he sīpinga ʻa Nimiloté, ko e kau pule ʻo e ngaahi mafai ʻo e māmaní naʻe ʻikai te nau lotu kia Sihova, ko ha moʻoniʻi meʻa ia naʻe tapua ʻi heʻenau ngaahi tōʻonga fakamamahí mo fakamālohí. Ko e ngaahi mafai ʻo e māmani ko ení ʻoku fakatātaaʻi ia ʻe he Konga Tohitapú ʻaki ʻa e fanga manu fekai, pea ʻi he tukuʻau mai ʻa e ngaahi senitulí, naʻe fakapapauʻi mai ʻe he Tohitapú ʻa e toko ono ʻo kinautolu ʻa ia naʻa nau uesia mālohi ʻa e kakai ʻa Sihová. Ko kinautolú ni ko ʻIsipite, ʻAsīlia, Pāpilone, Mītia-Pēsia, Kalisi, pea mo Loma. Hili ʻa Lomá, naʻe kikiteʻi ʻe hopo hake ha mafai hono fitu ʻo māmani. (Taniela 7:​3-7; 8:​3-7, 20, 21; Fakahā 17:​9, 10) Kuo fakamoʻoniʻi eni ko e Mafai Fakaemāmani ia ko Pilitānia-ʻAmeliká, ʻa ia ʻoku kau ki ai ʻa e ʻEmipaea Pilitāniá mo ʻene faʻahí ʻa e ʻIunaite Seteté, ʻa ia naʻe faai atu pē ʻone kāsia ʻa Pilitānia ʻi he mafaí. Ko e ʻEmipaea Pilitāniá naʻe kamata ke tupu ia hili ʻa e pulia atu ʻa e toetoenga kotoa ʻo e ʻEmipaea Lomá.a

⁶ Ko e ngaahi mafai hokohoko ʻe fitu ʻo e māmaní ʻoku fakatātaaʻi ia ʻi he tohi ʻa Fakahaá ʻaki ʻa e ngaahi foʻi ʻulu ʻo ha manu fekai ʻulu fitu ʻoku ʻalu hake mei he tahi ʻo e faʻahinga taʻemanonga ʻo e tangatá. (Aisea 17:​12, 13; 57:​20, 21; Fakahā 13:1) Ko hai ʻokú ne ʻoange ki he manu fekai pule ko ʻení hono mālohí? ʻOku tali ʻe he Tohitapú: “Naʻe tuku kiate ia ʻe he Talakoni a ʻene malohi aʻana mo hono taloni, mo ʻene fuʻu pule.” (Fakahā 13:2) Ko e talākoní ʻoku ʻikai ko ha toe taha kehe ka ko Sētane ko e Tēvoló.​—Luke 4:​5, 6; Fakahā 12:9.

Ko e Hoko Mai ʻa e Pule ʻa e Puleʻanga ʻo e ʻOtuá

 7. ʻOku tuku ʻa e ʻamanaki ʻa e kau Kalisitiané ʻi he hā, pea ʻoku anga-fēfē ʻa hono uesia ʻe he meʻá ni honau vahaʻangatae mo e ngaahi puleʻanga ʻo e māmaní?

⁷ ʻI he meimei taʻu ʻe 2,000, kuo lotu ai ʻa e kau Kalisitiané: “Ke hoko mai hoo bule [“puleʻangá,” NW]. Ke fai ho finagalo i mamani, o hage i he lagi.” (Matiu 6:​10, PM) ʻOku ʻiloʻi ʻe he Kau Fakamoʻoni ʻa Sihová ko e Puleʻanga pē ʻo e ʻOtuá te ne malava ke ʻomai ʻa e melino moʻoní ki he māmaní. ʻI heʻenau hoko ko e kau tokanga fakamātoato ki he kikite ʻa e Tohitapú, ʻoku nau tuipau ai ko e lotu ko ení kuo vavé ni ke tali pea ko e Puleʻanga ko iá ʻoku ofí ni ke ne pule ki he ngaahi meʻa ʻo e māmaní. (Taniela 2:44) Ko ʻenau piki maʻu ki he Puleʻanga ko ʻení ʻokú ne ʻai ai kinautolu ke nau tuʻu ʻatā ʻi he ngaahi meʻa ʻo e ngaahi puleʻanga ʻo e māmaní.

 8. ʻOku anga-fēfē ʻa e tali ʻa e ngaahi puleʻangá ki he pule ʻa e Puleʻanga ʻo e ʻOtuá, ʻo hangē ko ia ko hono kikiteʻi ʻi he Sāme 2?

⁸ ʻOku taku ʻe he ngaahi fonua ʻe niʻihi ʻoku nau tauhi ʻa e ngaahi tefitoʻi moʻoni fakalotú. Ka neongo ia, ʻi heʻenau tōʻongá ʻoku nau taʻetokangaʻi ai ʻa e moʻoniʻi meʻa ko ia ko Sihová ko e Hau Fakalevelevá pea kuó ne ʻosi fokonofo ʻa Sīsū ko e Tuʻi fakahēvani mo e mafai ki he māmaní. (Taniela 4:17; Fakahā 11:15) ʻOku pehē ʻe ha sāme fakaekikite: “He tuʻu mai ʻa e ngaahi tuʻi ʻo mamani, pea fakatahataha ʻa e houʻeiki ke puleakiʻi ʻa Sihova, pea mo e pani aʻana [Sīsū]: ‘Tau motuhi ʻa e ngaahi haʻi ʻanaua, ʻo liʻaki meiate kitautolu ʻena ngaahi kafa.’” (Sāme 2:​2, 3) ʻOku ʻikai tali ʻe he ngaahi puleʻangá ʻa e “kafa” pe “afo” fakaʻotua ʻa ia te ne fakangatangata ʻenau fakahoko honau tuʻunga-hau fakafonuá. Ko ia ai, ʻoku folofola ʻa Sihova kia Sīsū, ki heʻene Tuʻi kuo fakanofó: “Kole mai pea u ʻatu moʻo tofiʻa ʻa e ngaahi kakai, mo e ngaahi ngataʻanga ʻo mamani moʻo ʻinasi. Te ke laiki kinautolu ʻaki ʻa e sepita ukamea te ke haveʻi kinautolu hange ha ipu ʻumea.” (Sāme 2:​8, 9) Neongo ia, ko e māmani ko ia ʻo e faʻahinga ʻo e tangatá naʻe pekia ki ai ʻa Sīsuú ʻe ʻikai ke ‘laiki’ fakaʻaufuli ia.​—Sione 3:17.

Kalofi “ʻa e Fakaʻilonga” ʻo e “Manu Fekai”

 9, 10. (a) Ko e hā ʻoku fakatokanga mai kiate kitautolu ʻi he tohi ʻa Fakahaá? (e) Ko e ha ʻoku fakatātāʻaki ʻa hono tui ʻo e ‘fakaʻilonga ʻo e manu fekaí’? (f) Ko e hā ʻa e ngaahi fakaʻilonga ʻoku tali ʻe he kau sevāniti ʻa Sihová?

⁹ Ko e Fakahā naʻe maʻu ʻe he ʻaposetolo ko Sioné naʻá ne fakatokanga ko e māmani ʻo e faʻahinga ʻo e tangatá ʻa ia kuo mavahe mei he ʻOtuá te ne fakahoko ha ngaahi fiemaʻu fakautuutu ki muʻa siʻi pē peá ne ʻosí, ʻo ne “kouna ʻa e kakai kotoa pe, ʻa e ʻiki mo e lalahi, ʻa e koloaʻia mo e masiva, ʻa e tauʻataina mo e popula, ke nau ʻai kiate kinautolu ha fakaʻilonga ʻi honau nima toʻomataʻu, pē ʻi honau laʻe: pea ke ʻoua naʻa lava ha taha ke fakatau mai pe fakatau atu, ʻo kapau ʻoku ʻikai ʻiate ia ʻa e fakaʻilonga ko ia.” (Fakahā 13:​16, 17) Ko e hā ʻa e ʻuhinga ʻo e meʻá ni? Ko ha fakaʻilonga ʻi he nima toʻomataʻú ko ha fakatātā feʻungamālie ia ʻo e poupou longomoʻui. Fēfē ʻa e fakaʻilonga ia ʻi he laʻé? ʻOku pehē ʻe he The Expositor’s Greek Testament: “Ko e fakamatala fakaefakatātā mātuʻaki heliaki ko ʻení ko e fai ia ʻi hono angaʻaki hono fakaʻilongaʻi ʻa e kau sōtiá pe kau pōpulá ʻaki ha tā-tatau pe fakaʻilonga-tutu mataʻāʻā . . . ; pe, toe sai angé, ʻi he anga fakalotu ko ia ʻo hono tui ha hingoa ʻo ha ʻotua ko ha ʻomi-monū.” ʻI heʻenau ngaahi tōʻongá mo ʻenau ngaahi leá ʻoku tui fakaefakatātā ai ʻe he faʻahinga tokolahi ʻo e tangatá ʻa e fakaʻilonga ko ʻení, ʻo fakamahinoʻi ai kinautolu ko e “kau pōpula” pe “kau sōtia” ʻa e “manu fekai.” (Fakahā 13:​3, 4) Ka ki honau kahaʻú, ʻoku pehē ʻe he Theological Dictionary of the New Testament: “ʻOku fakaʻatā ʻe he ngaahi fili ʻo e ʻOtuá ʻa e [fakaʻilonga] ʻo e manu fekaí, ʻa e fika fakamisiteli ʻoku ʻai ai hono hingoá, ke fakapipiki ki honau foʻi laʻé mo honau nima ʻe taha. ʻOku ʻoange ʻe he meʻá ni kiate kinautolu ha ngaahi faingamālie ʻo e fakalakalaka fakaʻikonōmika mo e fakakomēsiale, ka ʻoku ʻomai ai kinautolu ki he malumalu ʻo e houhau ʻa e ʻOtuá pea taʻofi ai kinautolu mei he puleʻanga taʻu ʻe afé, Fkh. 13:16; 14:9; 20:4.”

¹⁰ ʻOku fiemaʻu ʻa e loto-toʻa mo e kātaki lahi ange ke talitekeʻiʻaki ʻa e tenge ko ia ke tali ʻa e “fakaʻilonga.” (Fakahā 14:​9-12) Ka neongo ia, ʻoku maʻu ʻe he kau sevāniti ʻa e ʻOtuá ia ha mālohi pehē, pea koeʻuhí ko e meʻá ni, ʻoku faʻa fehiʻanekinaʻi ai mo lauʻikoviʻi loi ai kinautolu. (Sione 15:​18-20; 17:​14, 15) ʻI he ʻikai te nau ʻai ʻa e fakaʻilonga ʻo e manu fekaí, naʻe pehē ʻe ʻAisea te nau tohi fakaefakatātā ai ʻi honau nimá, “ʻA Sihova.” (Aisea 44:5) Tānaki atu ki aí, koeʻuhí ʻoku nau “mapuhoi mo toʻe” ʻi he ngaahi meʻa fakalielia ʻoku fai ʻe he lotu tafoki mei he moʻoní, ʻoku nau maʻu ai ʻa e fakaʻilonga fakaefakatātā ʻi honau laʻé ʻo fakamahinoʻi ai kinautolu ʻoku nau taau ke fakahaofi ʻi he taimi ʻe fakahoko mai ai ʻa e fakamaau ʻa Sihová.​—Isikeli 9:​1-7.

11. Ko hai ʻokú ne ʻoange ʻa e ngofua ke pule ʻa e ngaahi puleʻanga fakaetangatá kaeʻoua kuo hoko mai ʻa e Puleʻanga ʻo e ʻOtuá ʻo ʻave ʻa e tuʻunga-pule ʻo e māmaní?

¹¹ ʻOku fakaʻatā ʻe he ʻOtuá ʻa e ngaahi puleʻanga fakaetangatá ke pule kaeʻoua kuo hoko ʻa e taimi ke fetongi fakaʻaufuli ai ʻe he Puleʻanga fakahēvani ʻo Kalaisí ʻa e tuʻunga pule ʻo e māmani ko ʻení. Ko hono makātakiʻi fakaʻotua ʻo e ngaahi tuʻunga fakapolitikalé ʻoku lave ki ai ʻa Palōfesa Oscar Cullmann ʻi heʻene tohi The State in the New Testament. ʻOkú ne tohi: “Ko e foʻi fakakaukau fihi ʻo e ‘fakataimi pē’ ʻa e anga ʻo e Puleʻangá, ko e ʻuhinga ia ʻoku ʻikai huʻufataha ai ʻa e fakakaukau ʻa e muʻaki kau Kalisitiané mo e Puleʻangá, ka ʻoku hā ʻoku fepaki. ʻOku ou fakamamafaʻi atu, ʻoku hā ʻoku pehē ia. Ko e fiemaʻú pē ke tau fakahā ʻa e Loma 13:​1, ‘Ke anga-nofo ʻa e tangata kotoa pē ki he ngaahi mafai ʻoku ʻi aí . . . ,’ fakataha mo e Fakahā 13: ko e Puleʻangá ko e manu fekai ia mei he luo taʻehano takelé.”

Ko e “Manu Fekai” mo “Sisa”

12. Ko e hā ʻa e fakakaukau mafamafatatau ʻoku maʻu ʻe he Kau Fakamoʻoni ʻa Sihová fekauʻaki mo e ngaahi puleʻanga fakaetangatá?

¹² ʻE hala ia ke fakaʻosiʻaki ko e faʻahinga kotoa pē ʻo e tangatá ʻoku ʻi he mafai fakapuleʻangá ko e ngaahi meʻangāue ʻa Sētane. Ko e tokolahi kuo nau fakamoʻoniʻi kinautolu ko e kakai ʻo e tefitoʻi moʻoni, ʻo hange ko e kōvana ko Sēsio Paulá ʻa ia ʻoku fakamatalaʻi ʻe he Tohitapú ko e “ʻeiki loto matala.” (Ngāue 13:7) Ko e kau pule ʻe niʻihi kuo nau taukapoʻi loto-toʻa ʻa e ngaahi totonu ʻa e faʻahinga tokosiʻí, ʻi hono tākiekina kinautolu ʻe honau konisēnisi foaki mei he ʻOtuá, neongo kapau naʻe ʻikai te nau ʻilo kia Sihova mo ʻene ngaahi taumuʻá. (Loma 2:​14, 15) Manatuʻi, ʻoku ngāueʻaki ʻe he Tohitapú ʻa e “māmani” ʻi he ongo ʻuhinga fehangahangai ʻe ua: ko e māmani ʻo e faʻahinga ʻo e tangatá, ʻa ia ʻoku ʻofa ki ai ʻa e ʻOtuá mo ia ʻoku totonu ke tau ʻofa ki aí, pea mo e māmani ko ia ʻo e faʻahinga ʻo e tangatá ʻoku mavahe meia Sihová, ʻa ia ʻoku ʻotua ai ʻa Setané mo ia kuo pau ke tau tuʻu mavahe mei aí. (Sione 1:​9, 10; 17:14; 2 Kolinito 4:4; Semisi 4:4) Ko ia ai, ʻoku maʻu ʻe he kau sevāniti ʻa Sihová ha fakakaukau mafamafatatau fekauʻaki mo e tuʻunga pule fakaetangatá. ʻOku tau tuʻu ʻatā mei he ngaahi meʻa fakapolitikalé koeʻuhí ʻoku tau ngāue ko e kau ʻamipasitoa pe kau talafekau ʻo e Puleʻanga ʻo e ʻOtuá pea ko ʻetau moʻuí ʻoku fakatapui ia ki he ʻOtuá. (2 Kolinito 5:20) ʻI he tafaʻaki ʻe tahá, ʻoku tau anganofo fakakonisēnisi ki he faʻahinga ʻoku maʻu mafaí.

13. (a) ʻOku anga-fēfē ʻa e vakai ʻa Sihova ki he ngaahi puleʻanga fakaetangatá? (e) ʻOku anga-fēfē ʻa e lahi ʻo e anganofo ʻa e kau Kalisitiané ki he ngaahi puleʻanga fakaetangatá?

¹³ Ko e fakakaukau mafamafatatau ko ʻení ʻoku tapua mai ai ʻa e fakakaukau tonu ʻa Sihova ko e ʻOtuá. ʻI he taimi ʻoku ngāuehalaʻaki ai ʻe he ngaahi mafai ʻo māmaní, pe naʻa mo e ngaahi Puleʻanga īkí honau mafaí, lōmekina honau kakaí, pe fakatangaʻi ʻa e faʻahinga ko ia ʻoku lotu ki he ʻOtuá, ʻoku nau tuha moʻoni ai mo hono fakamatalaʻi fakaekikite kinautolu ko e fanga manu fekai fakailifia. (Taniela 7:​19-21; Fakahā 11:7) Neongo ia, ʻi he taimi ʻoku fakahoko ai ʻe he ngaahi puleʻanga fakafonuá ʻa e taumuʻa ʻa e ʻOtuá ʻi hono tauhi maʻu ʻa e melinó mo e māú ʻi he fakamaau totonú, ʻokú ne lau leva kinautolu ko ʻene “kau tamaioeiki.” (Loma 13:​6, PM) ʻOku ʻamanekina mai ʻe Sihova ʻene kakaí ke nau fakaʻapaʻapa ki he ngaahi puleʻanga fakaetangatá pea ke anganofo kiate kinautolu, ka ko ʻenau anganofó ʻoku ʻikai taʻefakangatangata. ʻI he taimi ʻoku fiemaʻu ai ʻe he tangatá ʻa e ngaahi meʻa mei he kau sevāniti ʻa e ʻOtuá ʻa ia ʻoku tapui ʻe he lao ʻa e ʻOtuá pe taimi ʻoku nau tapui ai ʻa e ngaahi meʻa ʻoku fiemaʻu ʻe he ʻOtuá ʻene kau sevānití ke nau faí, ʻe muimui leva ʻa e faʻahinga ki muí ʻi he tuʻunga naʻe ngāueʻaki ʻe he kau ʻaposetoló, a ia ʻoku pehē: “ʻOku totonu pe ke fai ki he pule ʻa e ʻOtua ʻi he pule ʻa e tangata.”​—Ngāue 5:29.

14. ʻOku anga-fēfē ʻa e anganofo ʻa e Kalisitiané ki he ngaahi puleʻanga fakaetangatá ʻi hono fakamatalaʻi ʻe Sīsuú? ʻe Paulá?

¹⁴ Naʻe pehē ʻe Sīsū ko hono kau muimuí te nau maʻu ha ngaahi fatongia fakatouʻosi ki he ngaahi puleʻangá pea ki he ʻOtuá ʻi heʻene pehē: “Peʻi ʻange kia Sisa ʻa e ngāhi meʻa ʻa Sisa; pea ki he ʻOtua ʻa e ngāhi meʻa ʻa e ʻOtua.” (Mātiu 22:21) Naʻe tohi ʻe he ʻaposetolo ko Paulá ʻi hano fakamānavaʻi: “Ke anganofo ʻa e tangata kotoa pe ki he ngaahi pule ʻoku maʻolunga . . . Ka ʻo kapau te ke fai kovi, ke ke manavahe muʻa; he talaʻehai ko e vaʻinga ʻene toʻo ʻa e heletā; he ko e sevaniti ia ʻa e ʻOtua ke fai ʻene houhau kia faikovi. Ko ia kuo pau ke mou anganofo, ʻo ʻikai telia ʻa e houhau pe, kae telia ʻa konisenisi foki. Seuke, ko hono ʻuhinga foki ia ʻoku mou tukuhau ai.” (Loma 13:​1, 4-6) Mei he ʻuluaki senituli T.S. ʻo aʻu mai ki he ʻahó ni, naʻe pau ke fai ʻe he kau Kalisitiané ha fakakaukau ki he ngaahi fiemaʻu ʻoku fai mai ʻe he Puleʻangá. Naʻe fiemaʻu kiate kinautolu ke ʻiloʻi pe ko e muimui ki he ngaahi fiemaʻu ko iá ʻe tākiekina atu ai ke fakangaloku ʻenau lotú, pe ko e ngaahi fiemaʻu peheé naʻe fakalao pea naʻe totonu ke fai ia fakakonisēnisi.

Tangataʻifonua ʻOku Fakakonisēnisi

15. ʻOku anga-fēfē ʻa hono totongi fakafoki fakakonisēnisi ʻe he Kau Fakamoʻoni ʻa Sihová kia Sisa ʻa e meʻa ʻoku nau moʻuaʻakí?

¹⁵ Ko e “pule ʻoku maʻolunga” fakapolitikalé ko e “sevaniti” ia ʻa e ʻOtuá ʻi he taimi ʻoku nau fakahoko ai honau ngafa ʻoku hōifua ki ai ʻa e ʻOtuá, ʻa ia ʻoku kau ki ai ʻa e mafai “ke tautea ʻa e faikovi, kae fakamālōʻi ʻa e failelei.” (1 Pita 2:​13, 14) Ko e kau sevāniti ʻa Sihová ʻoku nau fai fakakonisēnisi ʻa hono totongi fakafoki kia Sisa ʻa e meʻa ʻokú ne fiemaʻu mai ʻoku fakalaó fakafou ʻi he ngaahi tukuhaú, pea ʻoku nau ʻalu ʻo aʻu ki he tuʻunga ʻoku fakaʻatā kinautolu ki ai ʻe honau konisēnisi kuo akoʻi faka-Tohitapú, ʻi heʻenau “anganofo ki he ngaahi pule maʻolunga, mo e ngaahi tuʻunga; . . . ke nofo teu ki he ngaue lelei kotoa pe.” (Taitusi 3:1) ʻOku kau ki he “ngaue lelei” ʻa hono tokoniʻi ʻa e niʻihi kehé, hangē ko e taimi ʻoku tō ai ha fakatuʻutāmaki. Kuo fakamoʻoni ha tokolahi ki he anga-ʻofa kuo fakahā ʻe he Kau Fakamoʻoni ʻa Sihová ki honau kaungā faʻahinga ʻo e tangatá ʻi he ngaahi tuʻunga ko ʻení.​—Kaletia 6:10.

16. Ko e hā ʻa e ngaahi ngāue lelei ʻoku fakahoko fakakonisēnisi ʻe he Kau Fakamoʻoni ʻa Sihová ki he ngaahi puleʻangá mo e kaungā faʻahinga ʻo e tangatá?

¹⁶ ʻOku ʻofa ʻa e Kau Fakamoʻoni ʻa Sihová ki honau kaungā faʻahinga ʻo e tangatá pea ʻoku nau ongoʻi ko e ngāue lelei taha ʻoku malava ke nau fai kiate kinautolú ko e akoʻi kinautolu ke nau aʻusia ha ʻilo totonu fekauʻaki mo e taumuʻa ʻa e ʻOtuá ke fakahoko mai ha “ngaahi langi foʻou mo ha fonua foʻou” māʻoniʻoni. (2 Pita 3:13) ʻI hono akoʻaki mo hono ngāueʻaki ʻa e ngaahi tefitoʻi moʻoni fakaeʻulungaanga māʻolunga ʻo e Tohitapú, ʻoku nau hoko ai ʻo ʻaonga lahi ki he sōsaieti ʻo e faʻahinga ʻo e tangatá, ʻi hono fakahaofi ʻa e tokolahi mei he talangataʻá. Ko e kau sevāniti ʻa Sihová ʻoku nau tauhi-lao pea ʻapasia ki he kau minisitā fakapuleʻanga, kau ngāue fakapuleʻanga, kau fakamaau, mo e kau maʻu mafai fakakoló, ʻo ʻatu ʻa e fakaʻapaʻapa ‘kiate kinautolu ʻoku ʻo nautolu ʻa e fakaʻapaʻapá.’ (Loma 13:7) ʻOku ngāue fiefia fakataha ʻa e ngaahi mātuʻa Fakamoʻoní mo e kau faiako ʻa ʻenau fānaú pea ʻoku nau tokoniʻi ʻenau fānaú ke nau fai fakalelei ʻa e akó, koeʻuhi ke malava ai ʻamui ʻe he faʻahingá ni ʻo kumi haʻanau moʻui pea ʻikai hoko ai ko e fakakavenga ki he sōsaietí. (1 Tesalonaika 4:​11, 12) ʻI loto ʻi heʻenau ngaahi fakatahaʻangá ʻoku fakafepakiʻi ai ʻe he Kau Fakamoʻoní ʻa e laulanu fakamatakalí mo e māvahevahe fakakalasí, pea ʻoku nau fakamahuʻingaʻi lahi ʻa hono langa hake ʻa e moʻui fakafāmilí. (Ngāue 10:​34, 35; Kolose 3:​18-21) Ko ia ai, ʻi heʻenau ngaahi tōʻongá, ʻoku nau fakahā ai ʻoku loi ʻa e ngaahi tukuakiʻi fekauʻaki mo ʻenau taʻefiefāmilí pe taʻefietokoni ki he koló. ʻI heʻene peheé, ʻoku fakamoʻoniʻi ai ʻa e moʻoni ʻo e ngaahi lea ʻa e ʻaposetolo ko Pitá: “He kuo tuʻutuʻuni pehe ʻa e ʻOtua, ke mou fakamoʻulongoa ʻaki hoʻomou fai lelei ʻa e vale ʻa e kau siana taʻeloto na.”​—1 Pita 2:15.

17. ʻOku malava fēfē ʻa e hoko ʻa e kau Kalisitiané ʻo ‘fakapotopoto ʻenau fakafeangai ki he kakai ʻo tuaʻaá’?

¹⁷ Ko ia lolotonga ko e kau muimui moʻoni ʻo Kalaisí ʻoku “ʻikai te nau ʻo māmāni,” ʻoku nau kei ʻi he māmani pē ʻo e sōsaieti ʻo e faʻahinga ʻo e tangatá pea kuo pau ke ‘fakapotopoto ʻenau fakafeangai ki he kakai ʻo tuaʻaá.’ (Sione 17:16; Kolose 4:5) Ko e hā pē ʻa e fuoloa ʻa hono fakaʻatā ʻe Sihova ʻa e ngaahi mafai māʻolungá ke ngāue ko ʻene tamaiʻoeikí, te tau fakahā ʻa e fakaʻapaʻapa totonú kiate kinautolu. (Loma 13:​1-4) Lolotonga ʻoku tau tuʻu ʻatā pē ʻi he felāveʻi mo e politikí, ʻoku tau lotu fekauʻaki mo e “ngaahi tuʻi, mo kinautolu kotoa pe ʻoku maʻolunga,” tautefito ʻi he taimi ʻoku fai ai ha fakatangi ki he faʻahingá ni ke fai ʻa e ngaahi fili ko ia ʻe malava ke ne uesia ʻa e tauʻatāina ʻo e lotú. Te tau hokohoko atu ʻi hono fai ʻa e meʻá ni “koeʻuhi pe ke malu ʻetau moʻui, mo fiemalie, ʻo tau matuʻaki fai fakalotu mo angamaopo,” koeʻuhí “ke maʻu moʻui ʻe he kakai kotoa pe.”​—1 Timote 2:​1-4.

[Fakamatala ʻi lalo]

Ngaahi Fehuʻi Fakamanatu

◻ Ko e “māmani” fē ko hono konga ē ʻa e kau Kalisitiané, ka ko e “māmani” fē ʻoku ʻikai malava ke nau hoko ko hano kongá?

◻ Ko e hā ʻoku fakatātaaʻiʻaki ʻe he “fakaʻilonga” ʻo e “manu fekaí” ʻi he nima pe laʻe ʻo ha taha, pea ko e hā ʻa e ngaahi fakaʻilonga ʻoku maʻu ʻe he kau sevāniti anga-tonu ʻa Sihová?

◻ Ko e hā ʻa e fakakaukau mafamafatatau ʻoku maʻu ʻe he kau Kalisitiane moʻoní fekauʻaki mo e ngaahi puleʻanga fakaetangatá?

◻ Ko e hā ʻa e ngaahi founga ʻe niʻihi ʻoku tokoni ai ʻa e Kau Fakamoʻoni ʻa Sihová ki he tuʻunga lelei ʻa e sōsaieti ʻo e faʻahinga ʻo e tangatá?

[Fakatātā ʻi he peesi 30]

ʻOku fakamahinoʻi ʻe he Tohitapú ʻa e puleʻanga fakaetangatá fakatouʻosi ko e sevāniti ʻa e ʻOtuá pea mo e manu fekai

[Fakatātā ʻi he peesi 31]

Koeʻuhí ko ʻenau tokanga anga-ʻofa ki he niʻihi kehé, ʻoku hoko ai ʻa e Kau Fakamoʻoni ʻa Sihová ʻo ʻaonga lahi ki honau ngaahi koló