“Ko e Laumālié Tonu ʻOku Kaungā-Fakamoʻoni Ia mo Hotau Laumālié”

1-2. Ko e hā ʻa e founga makehe naʻe hoko ʻi he ʻaho ʻo e Penitekosi 33 T.S.?

KO E pongipongi Sāpate ia ʻi Selusalema. Ko e taʻu 33 T.S. ia, pea ko e ʻaho ia ʻo e Penitekosí. Ko ha kulupu ʻo e kau ākonga ʻe toko 120 nai ʻoku nau fakatahataha ʻi he loki ʻi ʻolunga ʻi ha fale. (Ngā. 1:13-15; 2:1) ʻI he ngaahi ʻaho siʻi ki muʻá, naʻe fakahinohinoʻi ʻe Sīsū kinautolu ke nau nofo ai pē ʻi Selusalema koeʻuhi naʻe teu ke nau maʻu ha meʻaʻofa makehe. (Ngā. 1:4, 5) Ko e hā ʻa e meʻa naʻe hoko atu aí?

² “Fakafokifā [ʻoku] ongo mai ha longoaʻa mei he langí, ʻo hangē ko e mumuhu mai ʻa ha fuʻu matangi mālohí,” pea ʻokú ne fakafonu kotoa ʻa e falé. ʻOku hā leva ʻi he ʻulu ʻo e kau ākongá “ʻa e ngaahi uloʻi afi naʻe hangē ha ngaahi ʻeleló” pea ʻoku nau “fonu kotoa ʻi he laumālie māʻoniʻoní.” (Ngā. 2:2-4) ʻI he founga makehe ko ení, ʻoku huaʻi hifo ai ʻe Sihova hono laumālie māʻoniʻoní ki he kulupu ko iá. (Ngā. 1:8) ʻOku nau hoko ko e fuofua faʻahinga ke pani ʻe he laumālie māʻoniʻoníb pea ʻoange mo e ʻamanaki ke pule fakataha mo Sīsū ʻi hēvani.

 3. Ko e hā naʻe ʻikai toe veiveiua ai ʻa e faʻahinga ʻi he Penitekosí ki hono pani kinautolu ʻe he laumālie māʻoniʻoní?

³ Kapau naʻá ke kau ʻi he kau ākonga naʻe fakatahataha ʻi he loki ʻi ʻolungá ʻi he ʻaho ko iá, heʻikai ʻaupito ngalo ia ʻiate koe. Ko ha meʻa ʻoku hangē ha ʻeleloʻi afí ʻoku ʻalu hifo ki ho ʻulú, pea ʻoku kamata ke ke lea ʻi he ngaahi lea kehekehe! (Ngā. 2:5-12) Heʻikai haʻo toe veiveiua ʻi hoʻo fakakaukaú kuo pani koe ʻe he laumālie māʻoniʻoní. Ka ko e faʻahinga kotoa ʻoku pani ʻe he laumālie māʻoniʻoní ʻoku ʻi ai ha founga makehe ʻoku pani ai kinautolu pea ʻoku pani kinautolu ʻi he taimi tatau ʻo ʻenau moʻuí? ʻIkai. ʻOku anga-fēfē ʻetau ʻiloʻí?

 4. Naʻe maʻu ʻe he kau pani kotoa ʻi he ʻuluaki senitulí honau uí ʻi he taimi tatau ʻi heʻenau moʻuí? Fakamatalaʻi.

⁴ Tau lāulea angé fekauʻaki mo e taimí. Ko e kulupu ko ia ʻo e kau Kalisitiane ʻe toko 120 nai naʻe ʻikai ko kinautolu pē naʻe pani ʻe he laumālie māʻoniʻoní ʻi he Penitekosi, 33 T.S. Ki mui ange ʻi he ʻaho ko iá, ʻoku fakafuofua ki he toko 3,000 kehe naʻa nau toe maʻu ʻa e talaʻofa ʻa e laumālie māʻoniʻoní. Naʻe pani kinautolu ʻi heʻenau papitaisó. (Ngā. 2:37, 38, 41) Ka ʻi he ngaahi taʻu hoko atu aí, naʻe ʻikai ke pani ʻa e kau Kalisitiane paní kotoa ʻi heʻenau papitaisó. Naʻe pani ʻa e kau Samēliá ʻi ha taimi hili ʻenau papitaisó. (Ngā. 8:14-17) Pea ko hono pani ʻo Koliniusi mo hono falé naʻe mātuʻaki kehe. Naʻe pani kinautolu ki muʻa ʻi heʻenau papitaisó.—Ngā. 10:44-48.

 5. Fakatatau ki he 2 Kolinitō 1:21, 22, ko e hā ʻoku hoko ʻi hono pani ʻe he laumālie māʻoniʻoní ha tokotaha?

⁵ Tau toe lāulea angé ki he meʻa ʻoku hoko ʻi he pani ʻe he laumālie māʻoniʻoní ha tokotaha. Ko e niʻihi ʻoku paní ʻoku faingataʻa nai ʻi he kamatá ke nau tali kuo fili kinautolu ʻe Sihova. ʻOku nau fifili nai, ‘Ko e hā naʻe fili ai au ʻe he ʻOtuá?’ Heʻikai nai ke ongoʻi pehē ʻa e niʻihi. Pe ko e hā pē ʻa e tuʻungá, ʻoku fakamatala ʻa e ʻapositolo ko Paulá ki he meʻa ʻoku hoko ki he faʻahinga kotoa ʻoku paní: “ʻI he hili hoʻomou tuí, naʻe silaʻic kimoutolu fakafou ʻiate ia ʻaki ʻa e laumālie māʻoniʻoni ne talaʻofaʻakí, ʻa ia ko ha tomuʻa fakapapauʻiʻanga ʻo hotau tofiʻá.” (ʻEf. 1:13, 14; fkm. ʻi lalo) Ko ia ʻoku ngāueʻaki ʻe Sihova hono laumālie māʻoniʻoní ke ʻai ke papau moʻoni ki he kau Kalisitiane ko ení kuó ne fili kinautolu. ʻI he foungá ni, ko e laumālie māʻoniʻoní ko ha “fakapapauʻiʻanga [meʻa maluʻi pe talaʻofa]” ʻoku ʻoatu ke fakapapauʻi kiate kinautolu ʻi he kahaʻú te nau moʻui taʻengata ʻi hēvani kae ʻikai ʻi he māmaní.—Lau ʻa e 2 Kolinitō 1:21, 22.

 6. Ko e hā kuo pau ke fai ʻe ha Kalisitiane pani ke maʻu ai hono pale fakahēvani?

⁶ Kapau ʻoku pani ha Kalisitiane, te ne maʻu ʻi he taimi pē ko iá hono pale fakahēvaní? ʻIkai. ʻOkú ne fakapapauʻi kuo fili ia ke ʻalu ki hēvani. Kae kehe, kuo pau ke ne manatuʻi ʻa e ekinaki ko ení: “Fanga tokoua, ʻai ke toe ʻāsili ange hoʻomou tōtōivi ʻi hono ʻai ke papau homou uí mo homou filí, he kapau ʻoku mou hanganaki fai ʻa e ngaahi meʻá ni ʻe ʻikai ʻaupito faifai ange pea mou hinga.” (2 Pita 1:10) Ko ia neongo kuo fili pe ui ha Kalisitiane pani ke ʻalu ki hēvani, te ne maʻu hono palé ʻo kapau pē te ne nofoʻaki faitōnunga.—Fil. 3:12-14; Hep. 3:1; Fkh. 2:10.

 7. ʻOku anga-fēfē hono ʻiloʻi ʻe he kau paní kuo nau maʻu ʻa e ui fakahēvaní?

⁷ Ka ʻoku anga-fēfē hono ʻiloʻi ʻe ha taha kuó ne maʻu ha ui fakahēvani? Ko e talí ʻoku hā mahino ia ʻi he lea ʻa Paula ki he faʻahinga ʻi Lomá ʻa ia naʻe “ui ke hoko ko e kakai tapú.” Naʻá ne tala ange: “Naʻe ʻikai te mou maʻu ha laumālie ʻo e pōpula ʻo fakatupunga ai ha toe manavahē, ka naʻa mou maʻu ha laumālie ʻo e ohi ko e ngaahi foha, ʻa ia ko e laumālie ia ʻoku tau kalanga ai ʻo pehē: ‘ʻApā, Tamai!’ Ko e laumālié tonu ʻoku kaungā-fakamoʻoni ia mo hotau laumālié ko e fānau kitautolu ʻa e ʻOtuá.” (Loma 1:7; 8:15, 16) Ko ia fakafou ʻi hono laumālie māʻoniʻoní, ʻoku ʻai ʻe he ʻOtuá ke hā mahino ki he kau paní kuo nau maʻu ʻa e ui fakahēvani ko ení.—1 Tes. 2:12.

 8. ʻOku anga-fēfē hono fakahaaʻi ʻi he 1 Sione 2:20, 27 ko e kau Kalisitiane paní ʻoku ʻikai ke nau fiemaʻu ke fakapapauʻi ange ʻe he niʻihi kehé honau paní?

⁸ ʻOku ʻikai ke tuku ʻe Sihova ke toe ʻi ai ha veiveiua ʻi he ʻatamai mo e loto ʻo e faʻahinga ʻoku nau maʻu ʻene fakaafe ke ʻalu ki hēvaní. (Lau ʻa e 1 Sione 2:20, 27.) Ko e moʻoni, ko e kau Kalisitiane paní ʻoku fiemaʻu ke akoʻi ʻe Sihova fakafou ʻi he fakatahaʻangá ʻo hangē pē ko e tokotaha kotoa. Ka ʻoku ʻikai ke nau fiemaʻu ke fakapapauʻi ange ʻe ha taha ʻoku pani kinautolu. Kuo ngāueʻaki ʻe Sihova ʻa e ivi mālohi taha ʻi he ʻunivēsí, ʻa hono laumālie māʻoniʻoní, ke fakahaaʻi papau kiate kinautolu ʻoku pani kinautolu!

 9. ʻI he pani ha tokotaha, ko e hā ʻa e liliu ʻoku hokosia ʻe he tokotaha ko iá, hangē ko ia ʻoku fakamatalaʻi ʻi he ʻEfesō 1:18?

⁹ Ko e tokolahi taha ʻo e kau sevāniti ʻa e ʻOtuá ʻi he ʻaho ní ʻoku faingataʻa nai ke nau mahinoʻi ʻa e meʻa ʻoku hoko ki ha tokotaha ʻi he taimi ʻoku pani ai ia ʻe he ʻOtuá. ʻOku anga-maheni pē eni koeʻuhí kuo teʻeki pani kinautolu. Naʻe fakatupu ʻe he ʻOtuá ʻa e faʻahinga ʻo e tangatá ke moʻui taʻengata ʻi he māmaní, ʻo ʻikai ʻi hēvani. (Sēn. 1:28; Saame 37:29) Ka kuo fili ʻe Sihova ʻa e niʻihi ke moʻui ʻi hēvani. Ko ia ʻi he taimi ʻokú ne pani ai kinautolú, ʻokú ne liliu he taimi pē ko iá ʻenau ʻamanakí mo e anga ʻenau fakakaukaú, ʻo nau fakatuʻotuʻa atu ai ke moʻui ʻi hēvani.—Lau ʻa e ʻEfesō 1:18.

10. ʻOku ʻuhinga ki he hā ʻa e “fanauʻi foʻou”? (Sio foki ki he fakamatala ʻi lalo.)

¹⁰ ʻI he taimi ʻoku pani ai ʻa e kau Kalisitiané ʻe he laumālie māʻoniʻoní, ʻoku “fanauʻi foʻou” ai kinautolu pe “fanauʻi mei ʻolunga.”d Naʻe toe fakahaaʻi ʻe Sīsū ʻoku faingataʻa ia ke fakamatalaʻi totonu ki ha tokotaha kuo teʻeki ke pani ʻa e anga ʻo e ongoʻi fekauʻaki mo e hoko ʻo “fanauʻi foʻou,” pe “fanauʻi mei he laumālié.”—Sione 3:3-8; fkm. ʻi lalo.

11. Fakamatalaʻi ʻa e liliu ʻi he fakakaukaú ʻoku hoko ʻi he taimi ʻoku pani ai ha tokotaha.

¹¹ Ko e hā ʻa e liliu ʻi he fakakaukaú ʻoku hoko ʻi he taimi ʻoku pani ai ʻa e kau Kalisitiané? Ki muʻa ke pani ʻe Sihova ʻa e kau Kalisitiane ko ení, naʻa nau koloaʻaki ʻa e ʻamanaki ʻo e moʻui taʻengata ʻi māmaní. Naʻa nau fakatuʻotuʻa mo vēkeveke lahi ki he taimi ʻe toʻo atu ai ʻe Sihova ʻa e fulikivanú kotoa pea ʻai ʻa e māmaní ko ha palataisi. Mahalo naʻa nau sioloto atu ki heʻenau talitali lelei ha mēmipa ʻo e fāmilí pe ko ha kaumeʻa naʻe mate. Ka ʻi he hili hono pani kinautolú, naʻe kamata ke kehe ʻenau fakakaukaú. Ko e hā hono ʻuhingá? Naʻe ʻikai ke nau hoko ʻo taʻefiemālie ʻi he ʻamanaki ke moʻui ʻi he māmaní. Naʻe ʻikai ke liliu ʻenau fakakaukaú koeʻuhi ko e ongoʻi loto-mafasia pe lōmekina. Naʻe ʻikai ke fakafokifā pē ʻenau ongoʻi ʻe hoko ʻa e moʻui taʻengata ʻi he māmaní ʻo fakapipiko. ʻI hono kehé, naʻe ngāueʻaki ʻe Sihova hono laumālie māʻoniʻoní ke liliu ʻa e anga ʻenau fakakaukaú mo e ʻamanaki ʻoku nau koloaʻakí.

12. Fakatatau ki he 1 Pita 1:3, 4, ʻoku anga-fēfē ʻa e ongoʻi ʻa e kau Kalisitiane paní fekauʻaki mo ʻenau ʻamanakí?

¹² Ko ha tokotaha kuo pani te ne ongoʻi nai ʻoku ʻikai ke ne taau mo e monū maʻongoʻonga ko ení. Ka ʻoku ʻikai ʻaupito haʻane veiveiua kuo fili ia ʻe Sihova. ʻOku fonu hono lotó ʻi he fiefia mo e houngaʻia ʻi he taimi ʻokú ne fakakaukau ai ki heʻene ʻamanaki ko eni ki he kahaʻú.—Lau ʻa e 1 Pita 1:3, 4.

13. ʻOku anga-fēfē ʻa e ongoʻi ʻa e kau paní fekauʻaki mo ʻenau moʻui ʻi heni he māmaní?

¹³ ʻOku ʻuhinga ení ko e kau paní ʻoku nau loto ke mate? ʻOku tali ʻe he ʻapositolo ko Paulá ʻa e fehuʻi ko iá? Naʻá ne fakahoa honau sino fakaetangatá ki ha tēniti pea pehē: “Ko hono moʻoní, ko kitautolu ʻa ia ʻoku tau ʻi he tēnití ni ʻoku tau toʻe, mo mafasia, koeʻuhi ʻoku ʻikai te tau loto ke huʻi atu ʻa e tēnití ni, ka ʻoku tau loto ke tau kofuʻaki ʻa e fale ʻe tahá, koeʻuhi ke hoko ʻa e meʻa ʻoku matengofuá ʻo fetongi ʻaki ʻa e moʻui.” (2 Kol. 5:4) Ko e kau Kalisitiane ko ení ʻoku ʻikai ke nau taʻeoliʻia ʻi he moʻui ko ení pea loto ke nau mate vave. ʻI hono kehé, ʻoku nau fiefia ʻi he moʻuí pea loto ke ngāueʻaki ʻa e ʻaho taki taha ke tauhi kia Sihova fakataha mo honau fāmilí mo e kaungāmeʻá. Neongo ia, tatau ai pē pe ko e hā ʻoku nau faí, ʻoku nau manatuʻi maʻu pē ʻa e ʻamanaki lāngilangiʻia ʻoku nau maʻu ki he kahaʻú.—1 Kol. 15:53; 2 Pita 1:4; 1 Sio. 3:2, 3; Fkh. 20:6.

14. Ko e hā ʻoku ʻikai ke ne fakamoʻoniʻi kuo pani ha taha ʻe he laumālie māʻoniʻoní?

¹⁴ Mahalo ʻokú ke fifili pe kuo pani koe ʻe he laumālie māʻoniʻoní. Kapau ko ia, fakakaukau angé ki he ngaahi fehuʻi mahuʻinga ko ení: ʻOkú ke maʻu ha holi mālohi ke fai ʻa e finangalo ʻo Sihová? ʻOkú ke ongoʻi ʻokú ke mātuʻaki faivelenga ʻi he ngāue fakamalangá? Ko ha tokotaha ako vēkeveke koe ʻo e Folofola ʻa e ʻOtuá ʻa ia ʻokú ke saiʻia ke ako fekauʻaki mo e “ngaahi meʻa loloto ʻa e ʻOtuá”? (1 Kol. 2:10) ʻOkú ke ongoʻi kuo ʻoatu ʻe Sihova ʻa e ngaahi ola fakaofo ʻi he ngāue fakamalangá? ʻOkú ke ongoʻi ʻokú ke fakamahuʻingaʻi lahi ho fatongia ke tokoniʻi fakalaumālie ʻa e niʻihi kehé? Kuó ke sio ki ha fakamoʻoni hono tokoniʻi koe ʻe Sihova ʻi he ngaahi tafaʻaki pau ʻi hoʻo moʻuí? Kapau ʻoku papau hoʻo tali ʻio ki he ngaahi fehuʻi ko ení, ʻoku fakamoʻoniʻi heni kuó ke maʻu he taimí ni ʻa e ui fakahēvaní? ʻIkai ʻaupito. He ko e hā? Koeʻuhí ko e kotoa ʻo e kau sevāniti ʻa e ʻOtuá ʻoku lava ke nau ongoʻi pehē, tatau ai pē pe ʻoku pani kinautolu pe ʻikai. Pea fakafou ʻi hono laumālie māʻoniʻoní, ʻoku lava ke foaki ʻe Sihova ʻa e mālohi tatau ki ha taha pē ʻo ʻene kau sevānití, tatau ai pē pe ko e hā ʻenau ʻamanakí. Ko hono moʻoní, kapau ʻokú ke fifili pe kuo pani koe ʻe he laumālie māʻoniʻoní, ko e veiveiua ko iá ʻiate ia pē ʻoku ʻuhingá kuo teʻeki ai ke pani koe. Ko e faʻahinga kuo ui ʻe Sihová ʻoku ʻikai ke nau fifili pe kuo pani kinautolu pe ʻikai! ʻOku nau ʻiloʻi!

15. ʻOku anga-fēfē ʻetau ʻiloʻi kuo ʻikai fili ke ʻalu ki hēvani ʻa e faʻahinga kotoa kuo nau maʻu ʻa e laumālie ʻo e ʻOtuá?

¹⁵ ʻI he kotoa ʻo e Tohi Tapú, ʻoku lahi ʻa e ngaahi faʻifaʻitakiʻanga ʻo e kau tangata ʻo e tuí naʻa nau maʻu ʻa e laumālie māʻoniʻoní; neongo ia, naʻe ʻikai ke nau maʻu ʻa e ʻamanaki ʻo e moʻui ʻi hēvaní. Ko Tēvita naʻe tataki ʻe he laumālie māʻoniʻoní. (1 Sām. 16:13) Naʻe tokoniʻi ia ʻe he laumālie māʻoniʻoní ke mahinoʻi ʻa e ngaahi meʻa loloto fekauʻaki mo Sihová pea tataki foki ia ke hiki ʻa e ngaahi konga ʻo e Tohi Tapú. (Mk. 12:36) Ka neongo ia, naʻe pehē ʻe he ʻapositolo ko Pitá “naʻe ʻikai ke ʻalu hake ʻa Tēvita ia ki he langí.” (Ngā. 2:34) Ko Sione Papitaiso naʻe “fonu ʻi he laumālie māʻoniʻoní.” (Luke 1:13-16) Naʻe pehē ʻe Sīsū naʻe ʻikai ha tangata ʻe lahi hake ʻia Sione, ka naʻá ne pehē leva heʻikai kau ʻa Sione ia ʻi he Puleʻanga fakahēvaní. (Māt. 11:10, 11) Naʻe ngāueʻaki ʻe Sihova hono laumālie māʻoniʻoní ke ʻoange ki he kau tangata ko ení ʻa e mālohi ke fai ʻa e ngaahi ngāue fakaofo, ka naʻe ʻikai ke ne ngāueʻaki ʻa e laumālie ko iá ke fili kinautolu ke moʻui ʻi hēvani. ʻOku ʻuhinga ení naʻe siʻi ange ʻenau faitōnungá ʻi he faʻahinga naʻe fili ke pule ʻi hēvaní? ʻIkai. ʻOku ʻuhinga pē ia ʻe fokotuʻu mai kinautolu ʻe Sihova ke moʻui ʻi he Palataisi ʻi he māmaní.—Sione 5:28, 29; Ngā. 24:15.

16. Ko e hā ʻa e pale ʻoku fakatuʻotuʻa atu ki ai ʻa e tokolahi taha ʻo e kau sevāniti ʻa e ʻOtuá ʻi he ʻahó ni?

¹⁶ Ko e tokolahi taha ʻo e kau sevāniti ʻa e ʻOtuá ʻi he māmaní he ʻahó ni ʻoku ʻikai ke nau maʻu ʻa e ʻamanaki ke moʻui ʻi hēvaní. Hangē ko ʻĒpalahame, Sela, Tēvita, Sione Papitaiso mo e kau tangata mo e kau fefine tokolahi kehe ʻi he taimi ʻo e Tohi Tapú, ʻoku nau fakatuʻotuʻa atu ke moʻui ʻi he māmaní ʻi he taimi ʻe pule mai ai ʻa e Puleʻanga ʻo e ʻOtuá kiate kinautolú.—Hep. 11:10.

17. Ko e hā ʻa e ngaahi fehuʻi te tau lāulea ki ai ʻi he kupu hoko maí?

¹⁷ Koeʻuhi ko e niʻihi ʻo e kau paní ʻoku nau kei ʻi he haʻohaʻonga ʻo e kakai ʻa e ʻOtuá ʻi he ʻahó ni, ʻoku malanga hake ai ʻa e ngaahi fehuʻi ʻe niʻihi. (Fkh. 12:17) Ko e fakatātaá, ʻoku totonu ke fēfē ʻa e vakai ʻa e kau paní kiate kinautolu tonú? Kapau ʻoku kamata ha tokotaha ʻi hoʻo fakatahaʻangá ke maʻu ʻinasi ʻi he Fakamanatú, ʻoku totonu ke fēfē hoʻo fakafeangai ki he tokotaha ko iá? Pea fēfē kapau ʻoku tupulaki pē ʻa e tokolahi ia ʻo e faʻahinga ʻoku nau pehē ʻoku pani kinautolú? ʻOku totonu ke ke hohaʻa ki ai? Te tau lāulea ki he tali ʻo e ngaahi fehuʻi ko iá ʻi he kupu hoko maí.