Ngāue ʻo Fehoanaki mo e Lotu Anga-ʻOfa ʻa Sīsuú

“Tamai, . . . fakalāngilangiʻi ho ʻaló, koeʻuhi ke fakalāngilangiʻi koe ʻe ho ʻaló.”—SIONE 17:1.

KO E HĀ HOʻO FAKAKAUKAÚ?

ʻOku ʻuhinga ki he hā ʻa e “hoko ʻo ʻiloʻi” ʻa e ʻOtuá?

Naʻe anga-fēfē hono tali ʻe Sihova ʻa e lotu ʻa Sīsū ʻi he ʻuluaki senitulí?

ʻE lava fēfē ke tau ngāue ʻo fehoanaki mo e lotu ʻa Sīsuú he ʻahó ni?

1, 2. Ko e hā naʻe fai ʻe Sīsū hili ʻene kātoangaʻi ʻa e Pāsová mo ʻene kau ʻapositoló ʻi he taʻu 33?

KUO fuoloa e poʻulí ʻi Nīsani 14 ʻi he taʻu 33. Ko e toki ʻosi pē ia hono kātoangaʻi ʻe Sīsū mo hono ngaahi kaungāmeʻa ofi tahá ʻa e Pāsová. Naʻe fakamanatu ange ʻe he kātoanga ko ení kia kinautolu ʻa e founga naʻe fakahaofi ai ʻe he ʻOtuá ʻa e kau ʻIsilelí mei ʻIsipité. Ka ko e kau ākonga faitōnunga ʻa Sīsuú ʻe fakahaofi kinautolu ʻi ha founga lahi ange. ʻI he ʻaho hono hokó, ʻe tāmateʻi ai ʻa Sīsū ʻe hono ngaahi filí. Ko hono feilaulauʻi ʻene moʻui haohaoá ʻe ʻai ai ke malava ki he faʻahinga kotoa ʻo e tangatá ke tauʻatāina mei he angahalá mo e maté.—Hep. 9:12-14.

² Ke fakapapauʻi ʻe ʻikai ngalo ʻia kitautolu ʻa e meʻaʻofa anga-ʻofa ko eni mei he ʻOtuá, naʻe kamataʻi ʻe Sīsū ha kātoanga foʻou ʻa ia naʻá ne fetongi ʻa e Pāsova fakataʻú. Naʻá ne toʻo ha mā taʻelēvani, pakipaki ia pea paasi ia ki he tokotaha taki taha ʻo ʻene kau ʻapositolo faitōnunga ʻe toko 11. Naʻá ne tala ange kia kinautolu: “ʻOku ʻuhinga eni ki hoku sinó, ʻa ia ʻe foaki koeʻuhi ko kimoutolu. Hanganaki fai eni ko hoku fakamanatu.” Naʻá ne toe ʻoange foki ha ipu ʻo e uaine kulokula peá ne pehē: “Ko e ipú ni ʻoku ʻuhinga ia ki he fuakava foʻou ʻoku faiʻaki hoku totó, ʻa ia ʻe lilingi koeʻuhi ko kimoutolu.”—Luke 22:19, 20.

 3. (a) Ko e hā ʻa e liliu lahi naʻe hoko hili ʻa e mate ʻa Sīsuú? (e) Ko e hā ʻa e ongo fehuʻi ʻoku totonu ke tau fakakaukau fekauʻaki mo ia ʻi heʻetau sivisiviʻi ʻa e lotu ʻa Sīsuú?

³ Ko e fuakava Lao ʻi he vahaʻa ʻo e ʻOtuá mo e puleʻanga ʻo ʻIsilelí naʻe vave ke ngata. ʻE ʻi ai ha fuakava foʻou ʻi he vahaʻa ʻo Sihova mo e kau muimui pani ʻo Sīsuú. Naʻe ʻikai loto ʻa Sīsū ke hoko hono kau muimuí ʻo hangē ko e puleʻanga ʻo ʻIsilelí. Naʻe ʻikai ke fāʻūtaha ʻa e kau ʻIsilelí ʻi heʻenau lotu ki he ʻOtuá, pea naʻe taʻefakalāngilangiʻi heni ʻa e huafa ʻo e ʻOtuá. (Sione 7:45-49; Ngā. 23:6-9) Naʻe loto ʻa Sīsū ke ngāue fāʻūtaha fakataha ʻa hono kau muimuí koeʻuhí kae lava ke nau ʻoatu ʻa e lāngilangí ki he huafa ʻo e ʻOtuá. Ko ia, ko e hā naʻe fai ʻe Sīsuú? Naʻá ne kole ki he tokoni ʻene Tamaí ʻi he lotu fakaʻofoʻofa taha ʻe faifai ange pea maʻu ʻe ha tangata ʻa e monū ke laú. (Sio ki he ʻuluaki fakatātā ʻi he kupú ni.) Ko e lotu ko ení ʻoku lēkooti ia ʻi he Sione 17:1-26. ʻI heʻetau sivisiviʻi ʻa e lotu ko ení, tau fakakaukau angé fekauʻaki mo e ongo fehuʻi ko ení: “Kuo tali ʻe he ʻOtuá ʻa e lotu ʻa Sīsuú? ʻOku ou ngāue ʻo fehoanaki mo ia?

KO E MEʻA NAʻE MAHUʻINGA TAHA KIA SĪSUÚ

4, 5. (a) Ko e hā ʻoku tau ako mei he ʻuluaki konga ʻo e lotu ʻa Sīsuú? (e) Naʻe anga-fēfē hono tali ʻe Sihova ʻa e kole naʻe fai ʻe Sīsū maʻaná?

⁴ Naʻe akoʻi ʻe Sīsū ki heʻene kau ākongá ʻa e ngaahi meʻa fakaofo lahi ʻo aʻu ki he tuʻapoó. Pea naʻá ne hanga hake leva ki he langí ʻo ne lotu: “Tamai, kuo hoko mai ʻa e houá; fakalāngilangiʻi ho ʻaló, koeʻuhi ke fakalāngilangiʻi koe ʻe ho ʻaló koeʻuhi, hangē pē ko ia ko hoʻo foaki kiate ia ʻa e mafai ki he kakano kotoa pē, ke ne foaki ʻa e moʻui taʻengatá ki he tokolahi fakakātoa ʻa ia kuó ke ʻoange kiate iá.” Naʻá ne tānaki mai: “Kuó u fakalāngilangiʻi koe ʻi he māmaní, ʻi hono fakaʻosi ʻa e ngāue kuó ke tuku mai kiate au ke u faí. Ko ia leva ʻe Tamai, ke ke fakalāngilangiʻi au ʻi ho tafaʻakí ʻaki ʻa e lāngilangi naʻá ku maʻu ʻi heʻeku ʻi ho tafaʻakí ki muʻa ke tuʻu ʻa e māmaní.”—Sione 17:1-5.

⁵ Naʻe kamata ʻe Sīsū ʻene lotú ʻaki ʻa e lave ki he ngaahi meʻa naʻe mahuʻinga taha kiate iá. ʻUluakí, naʻá ne lotu ke fakalāngilangiʻi ʻene Tamaí. Naʻe kamata ʻe Sīsū ʻene sīpinga lotú ʻaki ʻene kole ʻa e meʻa tatau. (Luke 11:2) Uá, naʻá ne lotu ki he ngaahi fiemaʻu ʻene kau ākongá. Naʻá ne kole ‘ke ne foaki kia kinautolu ʻa e moʻui taʻengatá.’ Fakaʻosí, naʻe kole ʻe Sīsū ha meʻa maʻana. Naʻá ne kole: “Tamai, ke ke fakalāngilangiʻi au ʻi ho tafaʻakí ʻaki ʻa e lāngilangi naʻá ku maʻu ʻi heʻeku ʻi ho tafaʻakí ki muʻa ke tuʻu ʻa e māmaní.” Naʻe fanongo ʻa Sihova ki he lotu ʻa hono ʻAló pea ʻoange kiate ia ʻa e meʻa lahi ange ʻi he meʻa naʻá ne kolé. Naʻe ʻoange kiate ia ʻe he ʻOtuá “ha hingoa ʻoku lelei ʻaupito ange ia” ʻi he kau ʻāngeló kotoa.—Hep. 1:4.

“HOKO ʻO ʻILOʻI” ʻA E ʻOTUA MOʻONI PĒ TAHÁ

 6. Ko e hā naʻe fiemaʻu ke fai ʻe he kau ʻapositoló ke maʻu ai ʻa e moʻui taʻengatá? ʻOku tau ʻiloʻi fēfē naʻe fai eni ʻe he kau ʻapositoló?

⁶ ʻI heʻene lotú, naʻe toe lave ʻa Sīsū ki he meʻa kuo pau ke tau faí ke maʻu ai ʻa e meʻaʻofa ʻo e moʻui taʻengatá. (Lau ʻa e Sione 17:3.) Naʻá ne pehē kuo pau ke tau hanganaki “hoko ʻo ʻiloʻi” ʻa e ʻOtuá mo Kalaisi. ʻE lava fēfē ke tau fai ení? ʻUluakí, kuo pau ke tau fai ʻa e meʻa kotoa te tau malavá ke ako lahi ange fekauʻaki mo Sihova mo hono ʻAló. Uá, ʻoku fiemaʻu ke tau ngāueʻaki ʻa e meʻa kuo tau akó ʻi heʻetau moʻuí. Naʻe ʻosi fai ʻe he kau ʻapositoló ʻa e ongo meʻa ko ení, hangē ko ia naʻe leaʻaki ʻe Sīsū ʻi heʻene lotú: “Ko e ngaahi lea naʻá ke tuku mai kiate aú kuó u tuku ia kiate kinautolu, pea kuo nau maʻu ia.” (Sione 17:8) Ka ke maʻu ʻa e moʻui taʻengatá, naʻe fiemaʻu ke nau hanganaki fakalaulauloto ki he Folofola ʻa e ʻOtuá pea ngāueʻaki ʻa e meʻa kuo nau akó ʻi heʻenau moʻui fakaʻahó. Naʻe hanganaki fai eni ʻe he kau ʻapositoló ʻi he toenga ʻenau moʻui he māmaní? ʻIo, naʻa nau fai pehē. ʻOku tau ʻiloʻi eni koeʻuhí ko honau hingoá taki taha kuo hiki tuʻuloa ia ʻi he ngaahi maka fakavaʻe ʻe 12 ʻo Selusalema Foʻoú.—Fkh. 21:14.

 7. ʻOku ʻuhinga ki he hā ʻa e “hoko ʻo ʻiloʻi” ʻa e ʻOtuá? Ko e hā ʻoku mātuʻaki mahuʻinga ai ʻa e “hoko ʻo ʻiloʻi” ʻa e ʻOtuá?

⁷ Kapau ʻoku tau loto ke moʻui taʻengata, kuo pau ke tau hanganaki “hoko ʻo ʻiloʻi” ʻa e ʻOtuá. ʻOku ʻuhinga eni ki he hā? Ko e kupuʻi lea faka-Kalisi ʻoku ngāueʻaki hení ʻe lava ke toe liliu ia ko e “totonu ke hanganaki ʻiloʻi” pe “totonu ke hokohoko ʻiloʻi.” Ko ia ko e “hoko ʻo ʻiloʻi” ʻa e ʻOtuá ʻoku ʻuhingá ke hanganaki ako lahi ange fekauʻaki mo ia. Ka ʻoku ʻuhinga lahi ange eni ia ʻi he ʻiloʻi pē hono ngaahi ʻulungāngá mo e taumuʻá. Kuo pau ke tau ʻofa loloto kiate ia pea maʻu ha vahaʻangatae vāofi mo ia. Pea kuo pau ke tau fakahāhā ʻa e ʻofa ki hotau fanga tokouá mo e fanga tuofāfiné. ʻOku fakamatala ʻa e Tohi Tapú: “ʻIlonga ʻa ia ʻoku ʻikai ke ʻofá kuo ʻikai te ne hoko ʻo ʻiloʻi ʻa e ʻOtuá, koeʻuhí ko e ʻOtuá ko e ʻofa.” (1 Sio. 4:8) Ko hono ʻiloʻi ʻa e ʻOtuá ʻoku toe kau ai ʻa e hoko ʻo talangofua kiate ia. (Lau ʻa e 1 Sione 2:3-5.) Ko ha monū lahi ia ke hoko ʻo ʻi he lotolotonga ʻo e faʻahinga ʻoku ʻiloʻi ʻa Sihová! Ka kuo pau ke tau tokanga ke ʻoua ʻe mole hotau vahaʻangatae mahuʻinga mo iá, ʻo hangē ko ia naʻe fai ʻe Siutasi ʻIsikalioté. Ko ia tau ngāue mālohi ke fakaivimālohiʻi hotau vahaʻangatae mo Sihová. Kapau te tau fai pehē, ʻe ʻomai kia kitautolu ʻe Sihova ʻa e meʻaʻofa fakaofo ʻo e moʻui taʻengatá.—Māt. 24:13.

“KOEʻUHI KO HO HUAFA ʻOʻOÚ”

8, 9. Ko e hā ʻa e meʻa naʻe mahuʻinga taha kia Sīsū lolotonga ʻene ʻi he māmaní? Ko e hā ʻa e akonaki kuo pau naʻe fehiʻa ai ʻa Sīsuú?

⁸ ʻI heʻetau lau ʻa e lotu ʻa Sīsū ʻi he Sione vahe 17, ʻoku lava ke tau sio ki he ʻofa loloto ʻa Sīsū ʻo ʻikai ki heʻene kau ʻapositoló pē ka kia kitautolu foki. (Sione 17:20) Kae kehe, ko e meʻa mahuʻinga taha kia Sīsuú, ʻoku ʻikai ko hotau fakahaofí. Lolotonga ʻa e taimi kotoa naʻá ne ʻi he māmaní aí, ko e meʻa mahuʻinga taha kiate iá ko hono fakalāngilangiʻi ʻa e huafa ʻo ʻene Tamaí. Ko e fakatātaá, ʻi he taimi naʻe ʻuluaki fakamatalaʻi ai ʻe Sīsū ʻa e ʻuhinga ʻo ʻene haʻu ki he māmaní, naʻá ne lau mei he takainga tohi ʻa ʻAiseá: “ʻOku ʻiate au ʻa e laumālie ʻo Sihová koeʻuhi naʻá ne pani au ke u talaki ʻa e ongoongo leleí ki he masivá.” ʻE lava ke tau fakapapauʻi ʻi he taimi naʻe lau ai eni ʻe Sīsuú, naʻá ne puʻaki mahino ai ʻa e huafa ʻo e ʻOtuá.—Luke 4:16-21.

⁹ Ki muʻa fuoloa pea haʻu ʻa Sīsū ki he māmaní, naʻe akoʻi ʻe he kau taki lotu Siú ʻa e kakaí ke ʻoua ʻe ngāueʻaki ʻa e huafa ʻo e ʻOtuá. Sioloto atu ki he fehiʻa lahi kuo pau naʻe maʻu ʻe Sīsū ki he talatukufakaholo ko iá. Naʻá ne pehē ki he kau taki lotu ko iá: “Kuó u haʻu ʻi he huafa ʻo ʻeku Tamaí, ka ʻoku ʻikai te mou tali au; kapau ne aʻu mai ha taha kehe ʻi hono hingoa pē ʻoʻoná, te mou tali ʻe kimoutolu ʻa e tokotaha ko iá.” (Sione 5:43) Pea, ʻi ha ngaahi ʻaho siʻi leva ki muʻa ke ne maté, naʻe toe lave ʻa Sīsū ki he meʻa naʻe mahuʻinga taha kiate iá ʻi heʻene lotu: “Tamai, fakalāngilangiʻi ho huafá.” (Sione 12:28) Pea ʻi he lotu ʻoku tau lāulea ki aí, ʻoku toe hā mahino ai ko e meʻa mahuʻinga taha ʻi he moʻui ʻa Sīsuú ko hono ʻave ʻa e lāngilangí ki he huafa ʻo ʻene Tamaí.

10, 11. (a) Naʻe anga-fēfē hono ʻai ʻe Sīsū ke ʻiloa ʻa e huafa ʻo ʻene Tamaí? (e) Ko e hā ʻoku ʻai ai ʻe he kau ākonga ʻa Sīsuú ke ʻiloa ʻa e huafa ʻo Sihová?

¹⁰ Naʻe lotu ʻa Sīsū: “Kuó u fakaeʻa ho huafá ki he faʻahinga naʻá ke foaki mai kiate au mei he māmaní. Naʻe ʻoʻou ʻa kinautolu, pea naʻá ke foaki mai kinautolu kiate au, pea kuo nau tauhi hoʻo folofolá. Pehē foki, ʻoku ʻikai te u kei ʻi he māmaní, ka ʻoku nau ʻi he māmaní pea ʻoku ou ʻalu atu kiate koe. Tamai māʻoniʻoni, maluʻi muʻa kinautolu koeʻuhi ko ho huafa ʻoʻoú ʻa ia kuó ke foaki mai kiate aú, ke nau hoko ai ʻo taha ʻo hangē tofu pē ko kitauá.”—Sione 17:6, 11.

¹¹ ʻI he taimi naʻe “fakaeʻa” ai pe ʻai ke ʻiloa ʻe Sīsū ʻa e huafa ʻo ʻene Tamaí ki heʻene kau ākongá, naʻá ne fai ʻa e meʻa lahi ange ʻi hono ngāueʻaki pē ʻa e huafa Sihová. Naʻe tokoniʻi kinautolu ʻe Sīsū ke mahinoʻi pe ko hai ʻa Sihova. Naʻá ne akoʻi kinautolu fekauʻaki mo e ngaahi ʻulungaanga fakaofo ʻo e ʻOtuá mo e founga anga-ʻofa ʻene fakafeangai mai kia kitautolú. (ʻEki. 34:5-7) ʻOku Tuʻi ʻa Sīsū he taimí ni ʻi hēvani, pea ʻoku hokohoko atu ʻene tokoniʻi ʻene kau ākongá ke nau ʻai ke ʻiloa ʻa e huafa ʻo Sihová ʻi he kotoa ʻo e māmaní. Ko e hā ʻoku fakahoko ai ʻa e ngāué ni? Ke tokoniʻi ʻa e kakai tokolahi ange ke nau ako fekauʻaki mo Sihova ki muʻa ke ngata ʻa e fokotuʻutuʻu fulikivanu ko ení. Pea ʻi he hoko mai ʻa e taimi ko iá, te ne fakahaofi ʻene kau fakamoʻoni mateakí, pea ʻe ʻiloʻi ʻe he tokotaha kotoa ʻa e huafa lahi ʻo Sihová!—ʻIsi. 36:23.

“KOEʻUHÍ KE TUI ʻA MĀMANI”

12. Ko e hā ʻa e meʻa ʻe tolu ʻoku fiemaʻu ke tau fai ke fakaʻosiʻaki ʻa e ngāue naʻe kamataʻi ʻe Sīsuú?

¹² Naʻe fekauʻi ʻe Sīsū ʻene kau ākongá ke fakaʻosi ʻa e ngāue naʻá ne kamataʻí. Naʻá ne lotu: “Hangē pē ko hoʻo fekauʻi mai au ki he māmaní, naʻá ku fekau atu foki kinautolu ki he māmaní.” Ka naʻe ʻiloʻi ʻe Sīsū naʻa nau fiemaʻu ʻa e tokoni ke fai ʻa e ngāué ni. Lolotonga ʻene ʻiate kinautolú, naʻe ngāue mālohi ʻa Sīsū ke tokoniʻi ʻene kau ākongá ke ikuʻi honau ngaahi vaivaiʻangá. Pea ʻi heʻene lotú, naʻá ne kole kia Sihova ke tokoniʻi ʻene kau ākongá ke fai ʻa e meʻa mahuʻinga ʻe tolu. ʻUluakí, naʻá ne lotu ke ʻoua ʻe hoko ʻene kau ākongá ko ha konga ʻo e māmani ʻo Sētané. Uá, naʻá ne lotu ke talangofua ʻene kau ākongá ki he Folofola ʻa e ʻOtuá pea hanganaki māʻoniʻoni. Tolú, naʻe kōlenga ʻa Sīsū ke hoko ʻo fāʻūtaha ʻene kau ākongá, ʻo hangē pē ko ʻene fāʻūtaha mo ʻene Tamaí. ʻOku fiemaʻu kia kitautolu taki taha ke ʻeke, ‘ʻOku ou fai ʻa e meʻa ʻe tolu naʻe lave ki ai ʻa Sīsū ʻi heʻene lotú?’ Naʻe falala-pau ʻa Sīsū kapau naʻe fai ʻe heʻene kau ākongá ʻa e ngaahi meʻá ni, ʻe tali ʻe he kakai tokolahi ʻenau pōpoakí.—Lau ʻa e Sione 17:15-21.

13. Naʻe anga-fēfē hono tali ʻe Sihova ʻa e lotu ʻa Sīsuú ʻi he ʻuluaki senitulí?

¹³ ʻI he taimi ʻoku tau ako ai ʻa e tohi ʻa Ngāué, ʻe lava ke tau sio naʻe tali ʻe Sihova ʻa e lotu ʻa Sīsuú. Ko e kau Kalisitiane ʻi he ʻuluaki senitulí naʻe faʻuʻaki ʻa e kau Siu mo e kau Senitaile, tuʻumālie mo e masiva, kau tamaioʻeiki mo e kau pule ʻo e tamaioʻeikí. Fakakaukau atu ki he ngaahi māvahevahe naʻe mei malava ke hoko ʻiate kinautolú! Ka naʻa nau fāʻūtaha vāofi ʻaupito ʻa ia naʻe fakahoa kinautolu ʻe he ʻapositolo ko Paulá ki he ngaahi konga kehekehe ʻo e sino ʻo e tangatá pea ko Sīsū honau ʻulú. (ʻEf. 4:15, 16) ʻI he māmani māvahevahe ʻo Sētané, ko e faʻahinga fāʻūtaha ko ení naʻe malavá pē koeʻuhí ko e laumālie māʻoniʻoni mālohi ʻo Sihová.—1 Kol. 3:5-7.

14. Kuo anga-fēfē hono tali ʻa e lotu ʻa Sīsuú ʻi hotau taimí?

¹⁴ Ko e meʻa fakamamahí, naʻe liliu ʻa e ngaahi meʻá ʻi he hili ʻa e mate ʻa e kau ʻapositoló. Naʻe lahi ʻa e tafoki ʻo fakafepaki ki he moʻoní. Naʻe hū ʻa e ngaahi akonaki loí ki he fakatahaʻangá, pea naʻe iku eni ki he taʻefāʻūtaha. (Ngā. 20:29, 30) Ka ʻi he 1919, naʻe tukuange ʻe Sīsū ʻa e kau Kalisitiane paní mei he mālohi ʻo e lotu loí pea tānaki fakataha kinautolu ʻi ha ‘fakamaʻu haohaoa ʻo e fāʻūtahá.’ (Kol. 3:14) Ko e hā ʻa e ola ʻenau ngāue fakamalanga fāʻūtahá? Laka hake ʻi he kakai ʻe toko fitu miliona “mei he kotoa ʻo e ngaahi puleʻanga mo e ngaahi matakali mo e ngaahi kakai mo e ngaahi lea” ʻoku nau lotu fāʻūtaha kia Sihova fakataha mo e kau paní he taimí ni. (Fkh. 7:9; Sione 10:16) Ko e tali fakaofo eni ki he lotu ʻa Sīsū kia Sihová, “ke ʻilo ai ʻe māmani naʻá ke fekau mai au pea naʻá ke ʻofa ʻiate kinautolu ʻo hangē pē ko hoʻo ʻofa ʻiate aú.”—Sione 17:23.

KO HA FAKAMULITUKU FAKALOTOMĀFANA

15. Ko e hā ʻa e kole makehe naʻe fai ʻe Sīsū maʻa hono kau muimui paní?

¹⁵ Ki muʻa siʻi ʻi he efiafi ʻo Nīsani 14, naʻe ʻoange ʻe Sīsū ʻa e “lāngilangi” pe monū, ki heʻene kau ʻapositoló ʻaki hono fai ha fuakava mo kinautolu ke pule fakataha mo ia ʻi hono Puleʻangá. (Sione 17:22; Luke 22:28-30) Ko ia naʻe lotu leva ʻa Sīsū maʻá e faʻahinga kotoa te nau hoko ko hono kau muimui paní: “Tamai, ʻoku ou loto ke hoko ʻa e faʻahinga kuó ke tuku mai kiate aú ʻo nau fakataha foki mo au ʻi he feituʻu ʻoku ou ʻi aí, koeʻuhi ke nau sio ki hoku lāngilangi kuó ke ʻomai kiate aú, koeʻuhi naʻá ke ʻofa ʻiate au ki muʻa ia ʻi he tanupou ʻo māmaní.” (Sione 17:24) ʻOku fiefia ʻa e fanga sipi kehé ʻi he pale ʻe maʻu ʻe he kau paní, kae ʻikai meheka. ʻOku toe fakamoʻoniʻi heni ko e kau Kalisitiane moʻoni he ʻaho ní ʻoku nau fāʻūtaha moʻoni.

16, 17. (a) ʻI he fakaʻosi ʻo ʻene lotú, ko e hā naʻe leaʻaki ʻe Sīsū te ne hokohoko atu ke faí? (e) Ko e hā ʻoku totonu ke tau hokohoko atu ke faí?

¹⁶ Ko e tokolahi taha ʻi he māmaní ʻoku nau fili ke tukunoaʻi ʻoku ʻi ai ʻa e kakai ʻa Sihova ʻoku nau fāʻūtaha mo ʻiloʻi moʻoni ia. ʻOku faʻa hoko eni koeʻuhí ko e ngaahi loi ʻoku akoʻi ʻe he kau taki lotú. Naʻe hoko foki eni ʻi he ʻaho ʻo Sīsuú. Ko ia naʻá ne fakaʻosi ʻene lotú ʻaki ʻa e ngaahi leá ni: “Tamai māʻoniʻoni, ko e moʻoni, kuo ʻikai ke ʻiloʻi koe ʻe māmani; ka kuó u ʻiloʻi koe, pea ko e faʻahingá ni kuo nau ʻilo naʻá ke fekau mai au. Pea kuó u ʻai ke nau ʻilo ho huafá pea te u ʻai ia ke ʻiloa, koeʻuhi ke ʻiate kinautolu ʻa e ʻofa naʻá ke ʻofa ʻaki kiate aú pea ʻoku ou fāʻūtaha mo kinautolu.”—Sione 17:25, 26.

¹⁷ Kuo ʻai moʻoni ʻe Sīsū ʻa e huafa ʻo ʻene Tamaí ke ʻiloa. Pea ʻi he taimi ní, ʻi he tuʻunga ko e ʻUlu ʻo e fakatahaʻangá, ʻokú ne hokohoko atu ke tokoniʻi kitautolu ke ʻai ke ʻiloa ʻa e huafa ʻo ʻene Tamaí mo ʻene taumuʻá ki he niʻihi kehé. ʻOfa ke tau talangofua ki he tataki ʻa Sīsuú pea malanga faivelenga mo ngaohi ākonga. (Māt. 28:19, 20; Ngā. 10:42) ʻOfa ke tau toe ngāue mālohi ke nofoʻaki fāʻūtaha ko e kakai ʻa e ʻOtuá. Te tau hoko leva ʻo ngāue ʻo fehoanaki mo e lotu ʻa Sīsuú. ʻE iku eni ke fakalāngilangiʻi ai ʻa e huafa ʻo Sihová pea ki heʻetau fiefia taʻengatá.

[Fakatātā ʻi he peesi 26]

[Fakatātā ʻi he peesi 28]

Naʻe ngāue fakataha ʻa e kau Kalisitiane ʻi he ʻuluaki senitulí mo e laumālie māʻoniʻoní ke tauhi maʻu ʻa e fāʻūtahá (Sio ki he palakalafi 13)

[Fakatātā ʻi he peesi 30]

ʻOku fāʻūtaha ʻa e kakai ʻa Sihová takatakai ʻi he māmaní (Sio ki he palakalafi 14)