Ko Hono Maʻu ʻa e ʻIloʻi ʻo e ʻOtuá​—Anga-Fēfē?

ʻE veiveiua nai ʻa e niʻihi ʻi he pehē ko ia ʻoku mahuʻingaʻia moʻoni ʻa e ʻotuá ʻi hono fakahaaʻi ʻa ia tonu ki he tangatá. kapau ʻoku pehē, ko e hā ʻene meʻa ʻoku fai fekauʻaki mo iá?

KO E Fakalelei-Lotu Palotisani ʻi he senituli hono 16 ko Sione Kalaviní naʻá ne fakamulituku totonu ʻaki ko e tangatá heʻikai lava ke nau ʻiloʻi ʻia kinautolu pē ʻa e ʻOtuá tuku kehe ʻo ka ne fakahaaʻi mai ʻa ia tonu ki he faʻahinga ʻo e tangatá. Kae kehe, ʻoku fifili nai ʻa e niʻihi pe ʻoku mahuʻingaʻia moʻoni nai ʻa e ʻOtuá ʻi hono fakahaaʻi ʻa ia tonu ki he tangatá. Pea kapau ko ia, ko e hā ʻene meʻa ʻoku fai fekauʻaki mo iá?

Ko Sihova, ʻa e “Tubuaga,” ʻoku ʻi ai ʻene ʻuhinga ki he meʻa kotoa pē ʻokú ne faí. Pehē foki, ʻi hono tuʻunga ko e “Otua Mafimafi [Aoniú],” ʻokú ne malava kakato ke fakahoko ʻa ʻene ngaahi taumuʻá. (Koheleti 12:​1, 2, PM; Ekisoto 6:​3, PM) ʻOku lava ke tau fakapapauʻi kuó ne finangalo ke fakahaaʻi ʻa ʻene ngaahi taumuʻá ki he tangatá, he ko ʻene palōfita ko ʻĒmosí naʻe fakamānavaʻi ia ke ne tohi: “Talaʻehai ʻe fai ʻe Atonai Sihova ha meʻa, ka te ne fukefuke ki heʻene kau tamaioʻeiki ko e kau palofita ʻa e meʻa kuo tuʻutuʻuni” pe meʻa fakapulipulí. Ko ia ai, fakatokangaʻi naʻe pehē kuo fakahaaʻi ʻe he ʻOtuá ʻene ngaahi taumuʻá ki heʻene kau sevānití pē, ʻa e faʻahinga ʻoku nau ʻofa moʻoni kiate iá. ʻIkai ʻoku ʻuhinga lelei ia? Ko hai ʻokú ke fakahaaʻi ki ai hoʻo ngaahi meʻa fakapulipulí? Ki ha faʻahinga taha pē pe ko ho ngaahi kaumeʻa ofi tahá?—Emosi 3:7; Aisea 40:​13, 25, 26.

Ko e poto mo e ʻilo ʻa e ʻOtuá ʻoku ʻai ai ke ongoʻi māluʻia ʻa e faʻahinga fakatōkilaló, pea ʻoku feʻungamālie ia. Neongo ia, ʻoku fiemaʻu ʻa e meʻa lahi ange ia ʻi he ongoʻi māluʻiá kapau ʻoku fiemaʻu ke tau maʻu ʻaonga fakafoʻituitui mei he poto mo e ʻilo fakaʻotuá. ʻOku fakamamafaʻi ʻe he Tohi Tapú ʻoku tau fiemaʻu ha loto fakatōkilalo koeʻuhí ke tau ako ai ʻa e ngaahi fakakaukau ʻa e ʻOtuá: ‘Tuku tauhi mo koe ʻeku ngaahi tuʻutuʻuní. Tuku ho telingá ke fanongo ki he potó. Ofeʻi ho lotó kia Fakahinohino. Ui ʻa ʻilomeʻa, pea haʻaki ho leʻó kia Fakahinohino. Haʻao ia hange ha haʻao silivá.’—Palovepi 2:​1-4.

Ko ha tokotaha fakatōkilalo ʻokú ne fai ʻa e faʻahinga feinga ko ení te ne malava moʻoni ai ke ʻiloʻi ʻa e ʻOtuá. Ko e kupu ko ia ʻi he tohi Palovepí ʻoku hoko atu: “ʻOku foaki poto ʻe Sihova; ʻoku mei hono fofonga ʻa e ʻilo mo e fakahinohino.” ʻIo, ko e kau kumi loto-moʻoni ki he moʻoní ʻe lava ai ke “toki mahino kiate [kinautolu] ʻa e totonu mo e fakakonisitutone; ʻa e tāu, ʻa e founga kotoa pe ʻoku lelei.”—Palovepi 2:​6-9.

ʻI he Fekumi ki he Moʻoní

ʻOku fakahaaʻi ʻe he Encyclopedia of Religion: “Ko e moʻui ʻa e tangatá ʻoku fakaʻilongaʻi ia ʻaki ʻa e fiemaʻu ke fakafaikehekeheʻi ʻa e meʻa ʻoku moʻoní mo ia ʻoku taʻemoʻoní, mālohí mo ʻikai mālohí, totonú mo e kākaá, maʻá mo e ʻulí, māʻalaʻalá mo e ʻikai māʻalaʻalá, pea pehē ki he ngaahi tuʻunga felāveʻi mo ia ʻa ia ʻoku ʻikai fuʻu loko mahinó.” Ke fakalato ʻa e fiemaʻu ko ení, kuo fuoloa ʻa e fekumi ʻa e kakaí ki he moʻoní. ʻI he tuʻunga ʻo ʻenau fakahanga ʻa ʻenau fekumí kia Sihova, ʻa ia ʻoku ui ʻe he tokotaha-tohi-sāmé ko e “ʻOtua moʻoniā,” kuo nau fakalakalaka ai ʻi hono ʻiloʻi iá.—Sāme 31:5.

Ko e huafa Sihová ʻoku ʻuhinga totonú ko e “ʻOkú Ne Fakatupunga ke Hoko.” (Senesi 2:​4, NW; fakamatala ʻi laló) Ko ia ai, ko e ʻuhinga tonu ʻo e huafa ʻo e ʻOtuá ʻoku fakahanga ai ʻa e tokangá ki hono Tuʻunga Fakaefakatupú mo ʻene taumuʻá. Ko hono moʻoní, ko e ʻiloʻi mo ngāueʻaki ʻa e huafa Sihová ko ha fakaʻilonga ia ʻoku fakahaaʻiʻaki ʻa e lotu moʻoní. Naʻe ʻiloʻi lelei ʻe Sīsū ʻa e moʻoniʻi meʻa ko iá. ʻI he lave ki hono kau muimuí, naʻá ne pehē ki he ʻOtuá ʻi heʻene lotú: “Kuo u fakaʻilo kiate kinautolu ho huafa, ʻio, pea te u fakaʻilo pē: koeʻuhi ke ʻiate kinautolu ʻa e ʻofa kuo ke ʻofa ʻaki kiate au, pea ke u ʻiate kinautolu foki mo au.”—Sione 17:26.

ʻI he falala ʻa ha Hepelū ko Siosifa ʻi he kuonga muʻá ki heʻene kaumeʻa mo e ʻOtuá, ʻi heʻene fehangahangai mo e ngāue ko hono fakahaaʻi ʻa e ʻuhinga ʻo e ngaahi misí, naʻá ne lea ʻi he loto-maʻu: “ʻIkai ʻoku ʻi he ʻOtua ʻa e fakaʻuhinga?”—Senesi 40:8; 41:​15, 16.

ʻI he ngaahi senituli ki mui ai, naʻe ʻi ai ha misi ʻa Tuʻi Nepukanesa ʻo Pāpiloné ʻa ia naʻe ʻikai malava ʻe heʻene kau tangata potó ke fakaʻuhingaʻi. Naʻe pehē ʻe he palōfita ko Tanielá ki he tuʻí: “ʻOku ai ha ʻOtua ʻi langi ʻoku ne tatala ʻa e ngaahi meʻa ʻoku fufū, pea kuo ne fakaʻilo ki he ʻafio ʻa Nepukanesa ʻa e meʻa ʻe hoko ʻi he ngaahi ʻaho ʻamui.”—Taniela 2:28.

Ko e ongo faʻifaʻitakiʻanga ʻa Siosifa mo Tanielá ʻoku fakahaaʻi ai ko e poto mo e ʻilo ʻa e ʻOtuá ʻoku ala maʻu pē ia ʻe he faʻahinga ʻoku nau tauhi kia Sihova ko e ʻOtuá. Ko e moʻoni, ko ʻetau maʻu ʻa e hōifua ʻa e ʻOtuá ʻe fiemaʻu nai ai ke tau liʻaki ʻa e ngaahi fakakaukau naʻa tau maʻu ki muʻá. Ko e kau Siu naʻa nau hoko ko e kau Kalisitiane ʻi he taimi ʻo e kau ʻapositoló naʻe pau ke nau fai ʻa e meʻa tofu pē ko iá. ʻI hono tauhi hake ke nau fakaʻapaʻapaʻi mo talangofua ki he ngaahi lao naʻe fokotuʻu ʻi he malumalu ʻo e fokotuʻutuʻu ʻo e ngaahi meʻa faka-Siú, naʻe fiemaʻu ʻa e taimi kia kinautolu ke nau tali ai ʻa Sīsū ko e Mīsaiá. Naʻá ne haʻu ke fakahoko ʻa e Lao ʻa Mōsesé, ʻa ia naʻe hoko ko e “ʻata pe ʻo e ngaahi lelei ka hoko.” (Hepelu 10:1; Mātiu 5:17; Luke 24:​44, 45) Naʻe fetongi ia ʻe he “lao ʻa Kalaisi,” ʻa ia ʻoku māʻolunga mamaʻo ange ia ʻi he Lao ʻa Mōsesé.—Kaletia 6:2; Loma 13:10; Semisi 2:8.

Ko kitautolu kotoa kuo fanauʻi mai ki ha māmani kuo mavahe mei he ʻOtuá. Koeʻuhi ko e angahala tukufakaholo mei he ʻuluaki ongo meʻa fakaetangatá, ne fanauʻi mai ai kitautolu ko e fili ʻo e ʻOtuá, ʻo ʻikai te tau maʻu ʻa e ʻilo totonu ki heʻene ngaahi taumuʻá. Kuo tau toe maʻu foki ha loto kākā. (Selemaia 17:9; Efeso 2:​12; 4:​18; Kolose 1:​21) Ke kaumeʻa mo e ʻOtuá, kuo pau ke tau ako ke fakatatau ʻetau fakakaukaú ki he ngaahi fakakaukau ʻa e ʻOtuá. Ko e fai peheé ʻoku ʻikai ʻaupito faingofua.

ʻE faingataʻa nai ke liʻaki ʻa e ngaahi fakakaukau pe ngaahi tōʻonga fakalotu loí, tautefito kapau ko e ngaahi fakakaukau peheé naʻe akoʻi ia kia kitautolu mei heʻetau kei siʻí. Ka ko e hokohoko atu ʻi he founga halá ʻa e ʻalunga fakapotopoto ke fou aí? Mole ke mamaʻo! ʻOku fakapotopoto moʻoni ange ke liliu ʻete founga fakakaukaú pea maʻu ai ʻa e hōifua ʻa e ʻOtuá.

Ko Hono ʻIloʻi ʻa e Fouʻanga Fakahinohino ʻa e ʻOtuá

Ko fē ʻe lava ke tau maʻu mei ai ʻa e tokoni ki hono mahinoʻi ʻa e Folofola ʻo e moʻoní pea moʻui leva ʻo fakatatau ki aí? ʻI ʻIsileli ʻo e kuonga muʻá, naʻe tokonaki ki ai ʻe he ʻOtuá ʻa e tuʻunga taki fakafou ʻi he faʻahinga tāutaha falalaʻanga mo mateaki ʻi he ngaahi tuʻunga fua fatongia. Ko e ʻUlu ʻo e fakatahaʻanga Kalisitiane he ʻaho ní, ʻa Kalaisi, ʻokú ne tataki tatau ʻa e faʻahinga ʻoku nau kumi loto-moʻoni ki he moʻoní. ʻOkú ne fai ia fakafou ʻi hono kau muimui falalaʻanga mo mateakí, ʻa ia ʻoku faʻuʻaki ʻa e fouʻanga fua fatongia ki hono tataki mo maluʻi ʻa e kau kumi fakamātoato ki he moʻoní. (Mātiu 24:​45-​47; Kolose 1:​18) Ka ʻe lava fēfē ke tau ʻiloʻi ʻa e fouʻanga fakahinohino ʻa e ʻOtuá?

Ko e kau muimui moʻoni ʻo Sīsū Kalaisí ʻoku nau feinga ke tapua atu ʻa e ngaahi ʻulungāanga tatau naʻe fakahāhā ʻe Sīsū ʻi heʻene hoko ko ha tangatá. ʻI ha māmani fakautuutu ʻi he fulikivanú, ko ʻenau makehe ʻi hono fakahāhā ʻa e ngaahi ʻulungāanga fakalaumālie peheé ʻoku ʻai ai ke faingofua ʻa hono ʻiloʻi ʻo e kau muimui ko ení. (Sio ki he puha ʻi he peesi 6.) ʻOku tapua atu ʻa e ngaahi ʻulungāangá ni ʻi he lotu ʻa ia kuó ke feohi mo iá pe ʻi he ngaahi lotu ʻa ho ngaahi kaungāʻapí? ʻE ʻaonga ke fakatotoloʻi ʻa e meʻá ni ʻi he tokoni ʻa e Tohi Tapú.

ʻOku mau fakaafeʻi atu koe, ʻa ʻemau tokotaha lautohí, ke ke fai ia fakafou ʻi ha ako Tohi Tapu. ʻI he taʻu kuo ʻosí, ʻi hono fakaʻavalisí, ko e faʻahinga tāutaha pe ngaahi fāmili laka hake he 6,000,000 ʻi he fonua ʻe 235 naʻa nau ngāueʻaongaʻaki ʻa e fokotuʻutuʻu ko eni ke ako Tohi Tapu mo e Kau Fakamoʻoni ʻa Sihová. Ko hono maʻu ʻa e poto mo e ʻilo ʻa e ʻOtuá ko ha ngāue hokohoko, fakafiemālie mo mahuʻinga ia. Fēfē ke ke kamata ʻi ha fononga ke maʻu ʻa e poto mo e ʻilo ʻa e ʻOtuá? Ko ha fononga ia heʻikai ʻaupito te ke fakaʻiseʻisa ʻi hono faí. ʻIo, ʻe lava moʻoni ke tau ʻiloʻi ʻa e ʻOtuá!

[Puha ʻi he peesi 6]

KO E FAʻAHINGA ʻOKU NGĀUE FEONGOONGOI MO E ʻOTUÁ . . .

ʻoku nau tauhi maʻu ʻa e tuʻu-ʻatā ʻi he ngaahi fepaki fakapolitikalé.​—Aisea 2:4.

ʻoku nau ʻomi ʻa e fua lelei ʻaki hono fai ʻa e finangalo ʻo e ʻOtuá.​—Mātiu 7:​13-​23.

ʻoku nau fakahāhā ʻa e feʻofaʻaki moʻoni.​—Sione 13:35; 1 Sione 4:20.

ʻoku nau lea fāitaha ʻi he feituʻu kotoa pē.​—Maika 2:​12.

ʻoku ʻikai te nau faʻifaʻitaki ki he ngaahi tōʻonga hala mo e ʻulungāanga ʻo e māmani takatakai ʻia kinautolú.​—Sione 17:16.

ʻoku nau faifakamoʻoni ki he moʻoní pea ngaohi-ākonga.​—Mātiu 24:14; 28:​19, 20.

ʻoku nau fiefia ʻi he fakataha maʻu pē ki he fefakalototoʻaʻaki.​—Hepelu 10:25.

ʻoku nau fakahīkihikiʻi ʻa e ʻOtuá ʻi he tuʻunga ko ha kulupu fakavahaʻapuleʻanga.​—Fakahā 7:​9, 10.

[Fakatātā ʻi he peesi 7]

Ko e ʻiloʻi ʻo e ʻOtuá ʻoku maʻu ia ʻi he tuʻunga tāutahá, fāmilí pea ʻi he fakatahaʻangá