“Fiefiaā ka ko Kinautolu ʻOku Nau ʻIloʻi ʻa ʻEnau Fiemaʻu Fakalaumālié”
ʻI HE ʻā hake ʻa e fanga manupuná ʻi he pongipongí, ʻoku nau faʻa kiokio pea nau puna leva ʻo kumi meʻakai. ʻI he efiafí, ʻoku nau foki ki honau moheʻangá, toe kiʻi kiokio pea nau mohe leva. ʻI he ngaahi faʻahitaʻu pau ʻoku nau fakaoʻo, fakatō mo tauhi hake honau ʻuhikí. Ko e fanga manu kehé ʻoku nau muimui pē ʻi ha sīpinga meimei tatau.
Ko kitautolu ia faʻahinga ʻo e tangatá ʻoku tau kehe. Ko e moʻoni, ʻoku tau kai, mohe mo fakafanau, ka ko e tokolahi taha ʻo kitautolú ʻoku ʻikai ke tau fiemālie ʻi he ngaahi meʻa pē ko iá. ʻOku tau loto ke ʻiloʻi ʻa e ʻuhinga ʻoku tau ʻi heni aí. ʻOku tau fekumi ki ha taumuʻa ʻi heʻetau moʻuí. ʻOku tau fiemaʻu foki ha ʻamanaki ki he kahaʻú. Ko e ngaahi fiemaʻu loloto ko ení ʻoku tuhu ai ia ki ha anga ʻoku makehe ai ʻa e faʻahinga ʻo e tangatá—ko e tuʻunga fakalaumālié, pe ko e fiemaʻu mo e malava ki he ngaahi meʻa fakalaumālié.
Ngaohi ʻi he ʻĪmisi ʻo e ʻOtuá
ʻOku fakamatalaʻi ʻe he Tohi Tapú ʻa e ʻuhinga ki he natula fiemaʻu fakalaumālie ʻa e tangatá ʻi heʻene pehē: “Naʻe fakatupu ʻe he ʻOtua ʻa e tangata ʻi he imisi oʻona, ʻio i he imisi ʻo e ʻOtua naʻa ne fakatupu ia; naʻa ne fakatupu ʻakinaua ko e tangata mo e fefine.” (Senesi 1:27) Ko hono faʻu kitautolu “i he imisi ʻo e ʻOtua” ʻoku ʻuhingá neongo kuo tau mele ʻi he angahalá mo e taʻehaohaoá, ʻoku tau maʻu ʻa e malava ke tapua atu ʻa e ngaahi ʻulungāanga ʻe niʻihi ʻo e ʻOtuá. (Loma 5:12) Ko e fakatātaá, ʻoku malava ke tau faʻu meʻa. ʻOku tau maʻu foki ha tuʻunga ʻo e potó, ko ha ongoʻi ke fakamaau totonu pea mo e malava ke fefakahāhāʻaki ʻa e ʻofa feilaulauʻi-kitá. ʻIkai ko ia pē, ʻoku malava ke tau fakalaulauloto ki he kuohilí mo palani ki he kahaʻú.—Palovepi 4:7; Koheleti 3:1, 11; Maika 6:8; Sione 13:34; 1 Sione 4:8.
Ko ʻetau malava fakalaumālié ʻoku fakatātaaʻi mahino taha ia ʻi heʻetau holi fakanatula ko ia ke lotu ki he ʻOtuá. ʻE ʻikai lava ke tau maʻu ʻa e fiefia moʻoni mo tuʻuloá, kae ʻoua ke tau fakalato totonu ʻa e fiemaʻu ke maʻu ha vahaʻangatae lelei ange mo hotau Tokotaha-Fakatupú. Naʻe pehē ʻe Sīsū: “Fiefiaā ka ko kinautolu ʻoku nau ʻiloʻi ʻa ʻenau fiemaʻu fakalaumālié.” (Mātiu 5:3, NW) Kae kehe, kuo pau ke tau tokanga ke fakalato ʻa e foʻi fiemaʻu ko ia fekauʻaki mo e moʻoni fakalaumālié—ngaahi moʻoni fekauʻaki mo e ʻOtuá, ko ʻene ngaahi tuʻungá mo ʻene taumuʻa ki he faʻahinga ʻo e tangatá. ʻE lava ke tau maʻu mei fē ʻa e moʻoni fakalaumālié? ʻI he Tohi Tapú.
“Ko e Folofola Aʻau ko e Moʻoni Ia”
Naʻe tohi ʻa e ʻapositolo ko Paulá: “Ko e potu Folofola kotoa pe ne fakamanava mei he ʻOtua, ʻoku ʻaonga foki ki he akonaki, ki he fakaʻilo hala, ki he fakatonutonu.” (2 Timote 3:16) ʻOku fehoanaki ʻa e lea ʻa Paulá mo e lea ʻa Sīsū, ʻa ia naʻá ne pehē ʻi he lotu ki he ʻOtuá: “Ko e folofola aʻau ko e moʻoni ia.” ʻI he ʻahó ni, ʻoku tau ʻiloʻi ʻa e Folofola ko iá ko e Tohi Tapu Māʻoniʻoní, pea ʻoku fakapotopoto ke tau vakaiʻi pe ʻoku fakatatau mo ia ʻetau ngaahi tuí mo e ngaahi tuʻungá.—Sione 17:17.
ʻI hono fakahoa ʻetau ngaahi tuí ki he Folofola ʻa e ʻOtuá, ʻoku tau faʻifaʻitaki ai ki he kakai ʻo Pēlea ʻi he kuonga muʻá, ʻa ia naʻa nau fakapapauʻi naʻe fehoanaki ʻa e ngaahi akonaki ʻa Paulá mo e Tohi Tapú. ʻI he ʻikai ke fakaangaʻi ʻe Luke ʻa e kau Pēleá, naʻá ne fakaongoongoleleiʻi ʻa honau angá. Naʻa nau “tali loto lelei ʻaupito ʻa e folofola,” ko ʻene tohí ia, “ʻo nau kumi ʻi he Tohitapu ʻi he ʻaho kotoa pe ʻa e moʻoni ʻo e ngaahi meʻa ko ia.” (Ngāue 17:11) ʻI he vakai ki he ngaahi akonaki fakalotu mo fakamōlale fepakipaki ʻoku lahi he ʻaho ní, ʻoku mahuʻinga ai ke tau faʻifaʻitaki ki he sīpinga ʻa e kau Pēlea anga-fakaʻeiʻeikí.
Ko e founga ʻe taha ke ʻilo ai ʻa e moʻoni fakalaumālié ko e sio ki he anga ʻo ʻene tākiekina ʻa e moʻui ʻa e kakaí. (Mātiu 7:17) Ko e fakatātaá, ko e moʻui ʻo fakatatau ki he moʻoni ʻo e Tohi Tapú ʻoku totonu ke hoko ai ha taha ko ha husepāniti lelei ange, tamai lelei ange, uaifi lelei ange pe ko ha faʻē lelei ange ʻo tokoni ai ia ki he fiefia ʻa e fāmilí pea fakalahi ai ʻa ʻete fiemālié. “Oku monuia [pe fiefia] lahi hake akinautolu oku nau fanogo ki he folofola ae Otua, bea fai ki ai,” ko e lea ia ʻa Sīsuú.—Luke 11:28, PM.
ʻOku fakamanatu mai ʻe he ngaahi lea ʻa Sīsuú ʻa e ngaahi folofola ʻa ʻene Tamai fakahēvaní, ʻa ia naʻá ne pehē ki he kau ʻIsileli ʻo e kuonga muʻá: “Ko au Sihova ko ho ʻOtua, ʻoku ou ako koe ke fai meʻa ʻaonga, ʻoku ou tataki koe ʻi he hala ʻoku totonu ke ke fou ai. Taumaiā naʻa ke tokanga ki heʻeku ngaahi tuʻutuʻuni! pehe kuo hange ha vaitafe hoʻo fiemalie, pea ko hoʻo [maʻoniʻoni] hange ko e ngaahi peau ʻo e tahi.” (Aisea 48:17, 18) Ko kinautolu kotoa ʻoku ʻofa ʻi he leleí mo e māʻoniʻoní ʻe ueʻi moʻoni kinautolu ʻe ha kole anga-ʻofa pehē!
ʻOku Sai Ange ki he Niʻihi ke ‘Fakaveli Honau Telingá’
Naʻe fai ʻe he ʻOtuá ʻa e kole fakamātoato ko iá ki he kau ʻIsilelí he naʻe tākihalaʻi kinautolu ʻe he ngaahi loi fakalotú. (Sāme 106:35-40) Kuo pau foki ke tau leʻohi mo kitautolu mei he ngaahi loí. Naʻe tohi ʻa Paula fekauʻaki mo e faʻahinga naʻe lau ko e kau Kalisitiané: “ʻE faifai pea hoko ha kuonga, ʻa ia ʻe ʻikai te nau kātaki ai ʻa e tokateline haohaoa; ka te nau fokotuʻuniu hanau kau akonaki, ʻo fakatatau ki he ngaahi holi ʻanautolu, he veli honau telinga: pea te nau leʻei honau telinga mei he moʻoni.”—2 Timote 4:3, 4.
ʻOku fakaveli ʻe he kau taki lotú ʻa e telinga ʻo e kakaí ʻaki ʻenau fakatukutukuʻi ʻa e ngaahi tōʻonga ʻa ia ʻoku fakamānako ki he ngaahi holi fehālaakí, hangē ko e fehokotaki fakasino ʻi tuʻa mei he nofo malí, fakasōtomá mo e konaá. ʻOku fakahaaʻi mahino ʻe he Tohi Tapú ko e faʻahinga ʻoku leleiʻia ʻi he ngaahi meʻa ko iá mo e faʻahinga ʻoku nau fai iá “ʻe ʻikai hanau tofiʻa ʻi he Puleʻanga ʻo e ʻOtua.”—1 Kolinito 6:9, 10; Loma 1:24-32.
Ko e moʻoni, ʻoku fiemaʻu ʻa e loto-toʻa ke moʻui ai ʻo fakatatau ki he ngaahi tuʻunga Fakatohitapú, tautefito ʻi he fehangahangai mo e manukí, ka ʻoku malava ia. ʻI he Kau Fakamoʻoni ʻa Sihová ʻoku tokolahi ai ʻa e faʻahinga tāutaha ʻa ia naʻa nau hoko ko e kau maʻu faitoʻo kona tapu, kau faʻa konā, kau feʻauaki, kau fakaaoao he halá, kau kaihaʻa mo e kau loi ki muʻa. Ka, naʻa nau tali fakamātoato ʻa e Folofola ʻa e ʻOtuá pea ʻi he tokoni ʻa e laumālie māʻoniʻoní naʻa nau fai ha ngaahi liliu ʻi heʻenau moʻuí koeʻuhi ke ‘tāu ʻenau laká pea mo e ʻEikí.’ (Kolose 1:9, 10; 1 Kolinito 6:11) ʻI heʻenau fakamelino mo e ʻOtuá, naʻa nau toe maʻu foki mo e nonga ʻi loto pea mo ha ʻamanaki moʻoni ki he kahaʻú, ʻo hangē ko ia te tau vakai ki aí.
Ko e ʻAmanaki ʻo e Puleʻangá
Ko e ʻamanaki ʻa e Tohi Tapú ki he nonga tuʻuloa ʻa e faʻahinga talangofua ʻo e tangatá ʻe fakahoko ia fakafou ʻi he Puleʻanga ʻo e ʻOtuá. “Ke hoko mai ho Puleʻangá. Ke fai ho finangaló ʻi māmani, ʻo hangē ko ia ʻoku fai ʻi Hēvaní,” ko e lea ia ʻa Sīsū ʻi heʻene sīpinga lotú. (Mātiu 6:10, Ko e Kōsipeli ʻe Fā) ʻIo, ko e Puleʻanga pē ʻo e ʻOtuá ʻoku malava ke ne fakapapauʻi ʻoku fakahoko ʻa e finangalo ʻo e ʻOtuá ʻi he māmaní. Ko e hā hono ʻuhingá? Koeʻuhi ko e Puleʻanga fakahēvani ko iá—ko ha founga-pule ʻi he nima ʻo Sīsū Kalaisí—ko e founga ia ʻa e ʻOtuá ki hono fakahaaʻi ʻa Hono tuʻunga-hau totonú ki he māmaní.—Sāme 2:7-12; Taniela 7:13, 14.
ʻI he tuʻunga ʻo Sīsū Kalaisi ko e Tuʻi ʻo e Puleʻanga fakahēvani ko iá, te ne hanga ʻo fakatauʻatāinaʻi ʻa e tangata talangofuá mei he faʻahinga haʻisia kotoa pē, kau ai ʻa e haʻi maʻu ʻo e angahala meia ʻĀtamá pea mo hono nunuʻa ko e puké mo e maté. ʻOku pehē ʻi he Fakahā 21:3, 4: “Ko eni, ko e tapanekale ʻo e ʻOtua, ʻoku tuʻu mo e kakai . . . Pea te ne [Sihova ko e ʻOtuá] holoholo ʻa e loʻimata kotoa pē mei honau mata; pea ʻe ʻikai toe ai ha mate, pea ʻe ʻikai toe ai ha mamahi, pe ha tangi, pe ha ongosia; kuo mole ʻa e ngaahi meʻa muʻa.”
Ko e nonga tuʻuloá ʻe ikuna ia ʻi māmani kātoa. Ko e hā ʻoku malava ke tau fakapapauʻi ai iá? ʻOku fakaeʻa ʻa e ʻuhingá ʻi he Aisea 11:9, ʻa ia ʻoku pehē: “ʻE ʻikai te nau [faʻahinga ʻi he malumalu ʻo e Puleʻangá] fai ha maumau, pea ʻe ʻikai te nau fai ha fakaʻauha ʻi he kotoa ʻo hoku moʻunga tapu: he ʻe fonu ʻa mamani ʻi he ʻiloʻi ʻo Sihova, ʻo hange ko e mafola ʻa e vai ʻi he tahi.” ʻIo, ʻe maʻu ʻe he tangata kotoa pē ʻi he māmaní ʻa e ʻilo totonu ki he ʻOtuá pea talangofua kiate ia. ʻOku fakalotomāfana kiate koe ʻa e ʻamanaki ko iá? Kapau ko ia, ko e taimi eni ke kamata ai ʻa e feinga ke maʻu ʻa e ‘ʻilo [mahuʻinga] ʻo Sihová.’
Te Ke Fanongo ki he Pōpoaki ʻo e Puleʻangá?
Fakafou ʻi he Puleʻangá, ʻe vete ai ʻe he ʻOtuá ʻa e ngaahi ngāue kotoa pē ʻa Sētané pea akoʻi ʻa e kakaí ʻi Heʻene ngaahi founga māʻoniʻoní. Ko ia ai, ʻoku ʻikai ha ofo ʻi he fakahangataha ʻa e akonaki ʻa Sīsuú ki he Puleʻangá. “Kuo pau ke u ʻave ʻa e ongoongolelei . . . ʻo tala ʻa e Puleʻanga ʻo e ʻOtua,” ko ʻene leá ia, “he naʻe fekau mai au ki he meʻa ko ia.” (Luke 4:43) Naʻe fekauʻi ʻe Kalaisi ʻa ʻene kau ākongá ke nau vahevahe atu ʻa e pōpoaki tatau ki he niʻihi kehé. (Mātiu 28:19, 20) Naʻá ne tomuʻa tala: “Koe ogoogolelei ni oe buleaga e malaga aki i mamani kotoabe, koe mea fakamooni ki he buleaga kotoabe, bea e toki hoko mai ae ikuaga.” (Mātiu 24:14, PM) Ko e ikuʻanga ko iá ʻoku vavé ni mai. Hono mahuʻinga leva ke fanongo ʻa e kakai loto-totonú ki he ongoongolelei fakahaofi moʻuí!
Naʻe fanongo ʻa Albert, naʻe lave ki ai ʻi he kupu ki muʻá, ʻi he pōpoaki ʻo e Puleʻangá ʻi he taimi naʻe kamata ako Tohi Tapu ai ʻa hono uaifí mo hono fohá pea mo e Kau Fakamoʻoni ʻa Sihová. Naʻe ʻuluaki veiveiua ʻa Albert. Naʻe aʻu ʻo ne kole ki ha faifekau honau feituʻú ke ʻaʻahi ange ki hono uaifí mo hono fohá koeʻuhi ke fakaeʻa ʻa e loi ʻa e Kau Fakamoʻoní. Ka naʻe ʻikai loto ʻa e faifekaú ke kau ai. Ko ia, naʻe pehē ai ʻe Albert ke ne fanongo ʻi he lāulea Fakatohitapú ke ne fakaeʻa ai ha ngaahi fehālaaki. ʻI he hili pē ha foʻi ako ʻe taha, naʻá ne kau ai ʻi he akó, ʻo vēkeveke ke ako ʻa e meʻa lahi ange. Naʻá ne fakamatala ki mui ki he ʻuhinga naʻe liliu ai ʻa ʻene fakakaukaú. Naʻá ne pehē: “Ko e meʻa eni naʻá ku fekumi maʻu pē ki aí.”
Kuo faifai pē pea kamata ke fakalato ʻe Albert ʻa ʻene fiemaʻu fakalaumālié pea naʻe ʻikai te ne fakaʻiseʻisa ai. Naʻe ʻoange kiate ia ʻe he moʻoni ʻo e Tohi Tapú ʻa e meʻa naʻá ne fekumi ki ai ʻi heʻene moʻuí kotoa—ko e fakaleleiʻanga ki he fakamaau taʻetotonu mo e taʻefaitotonu ʻa ia ʻoku hūhū ʻi he sōsaietí pea mo ha ʻamanaki ki he kahaʻú. Naʻe ʻoange kiate ia ʻe he moʻoni ʻo e Tohi Tapú ʻa e nonga ʻi lotó. ʻOku fakalato ʻa hoʻo fiemaʻu fakalaumālié? Fēfē ke ke vaheʻi ha mōmeniti ke lau ai ʻa e ngaahi fehuʻi ʻoku hā ʻi he puha ʻo e peesi 6? Kapau te ke fiemaʻu ha fakamatala lahi ange, ʻe fiefia ʻa e Kau Fakamoʻoni ʻa Sihová ke tokoniʻi koe.
[Puha/Fakatātā ʻi he peesi 6]
ʻOKU FAKALATO ʻA HOʻO FIEMAʻU FAKALAUMĀLIÉ?
ʻOkú ke fiemālie ʻi he meʻakai fakalaumālie ʻokú ke lolotonga maʻú? ʻOku mau fakaafeʻi atu koe ke ke lau ʻa e ngaahi fehuʻi ko ení peá ke fakatonuki ʻa e ngaahi fehuʻi ʻoku malava ke ke tali tonú.
□ Ko hai ʻa e ʻOtuá, pea ko hai hono huafá?
□ Ko hai ʻa Sīsū Kalaisi? Ko e hā naʻe pau ai ke pekiá? ʻOku ʻaonga fēfē kiate koe ʻa ʻene pekiá?
□ ʻOku ʻi ai ha Tēvolo? Kapau ko ia, naʻe haʻú mei fē?
□ Ko e hā ʻoku hoko kiate kitautolu ʻi heʻetau maté?
□ Ko e hā ʻa e taumuʻa ʻa e ʻOtuá ki he māmaní pea ki he faʻahinga ʻo e tangatá?
□ Ko e hā ʻa e Puleʻanga ʻo e ʻOtuá?
□ Ko e hā ʻa e ngaahi tuʻunga fakamōlale ʻa e ʻOtuá?
□ ʻI he fāmilí, ko e hā ʻa e ngaahi ngafa vaheʻi faka-ʻOtua ʻo e husepānití pea mo e uaifí? Ko e hā ʻa e ngaahi tefitoʻi moʻoni Fakatohitapu ʻoku pouaki ai ʻa e fiefia ʻi he fāmilí?
Kapau ko e tali ki ha niʻihi ʻo e ngaahi fehuʻí ni ʻoku ʻikai te ke fakapapauʻi, ʻe malava ke ke kole ha tatau ʻo e polosiua Ko e Hā ʻOku Fiemaʻu ʻe he ʻOtuá Meiate Kitautolú? ʻI he meimei lea ʻe 300 ʻoku pulusi ai ia ʻe he Kau Fakamoʻoni ʻa Sihová, ʻoku fakamatalaʻi ʻe he polosiuá ni ʻa e ngaahi kaveinga Fakatohitapu tefito ʻe 16 pea ʻoku ʻomai ai ha tali Fakatohitapu ki he ngaahi fehuʻi kotoa ʻoku hā ʻi ʻolungá.
[Fakatātā ʻi he peesi 4]
ʻI he ʻikai hangē ko e fanga manú, ko e tangatá ʻoku ʻi ai ʻene fiemaʻu fakalaumālie
[Fakatātā ʻi he peesi 5]
“Te nau fokotuʻuniu hanau kau akonaki . . . he veli honau telinga.”—2 Timote 4:3
[Fakatātā ʻi he peesi 7]
Ko e nonga tuʻuloá ʻe fakahoko mai ia fakafou he Puleʻanga Faka-Mīsaia ʻo e ʻOtuá