Ko e kaveinga tefito ʻo e Tohi Tapú ʻoku fekauʻaki ia mo e Puleʻanga ʻo e ʻOtuá. ʻE ngāueʻaki ʻe Sihova ʻa e Puleʻanga ko iá ke fakahoko ʻene muʻaki taumuʻa ki he māmaní. Ko e hā ʻa e Puleʻanga ko iá? ʻOku anga-fēfē ʻetau ʻiloʻi ʻoku pule ia he taimi ní? Ko e hā kuó ne ʻosi fakahokó? Pea ko e hā te ne fai ʻi he kahaʻú? Ko e lēsoni ko ení mo e ongo lēsoni hoko maí te nau tali ʻa e ngaahi fehuʻi ko iá.

1. Ko e hā ʻa e Puleʻanga ʻo e ʻOtuá, pea ko hai ʻa hono Tuʻí?

Ko e Puleʻanga ko iá ko ha founga-pule ia kuo fokotuʻu ʻe Sihova ko e ʻOtuá. Ko hono Tuʻí, ʻa Sīsū Kalaisi, ʻokú ne pule mei hēvani. (Mātiu 4:17; Sione 18:36) ʻOku pehē ʻe he Tohi Tapú fekauʻaki mo Sīsū: “Te ne pule ko e Tuʻi . . . ʻo taʻengata.” (Luke 1:32, 33) ʻI hono tuʻunga ko e Tuʻi ʻo e Puleʻanga ʻo e ʻOtuá, ʻe pule ʻa Sīsū ki he taha kotoa ʻi he māmaní.

2. Ko hai ʻoku pule mo Sīsuú?

ʻOku ʻikai ke pule toko taha pē ʻa Sīsū. Ko e faʻahinga mei he “matakali mo e lea mo e kakai mo e puleʻanga kotoa pē . . . te nau pule ko e ngaahi tuʻi ki he māmaní.” (Fakahā 5:9, 10) Ko e toko fiha ʻe pule fakataha mo Kalaisí? Talu mei he haʻu ʻa Sīsū ki he māmaní, ko e kakai ʻe laui miliona kuo nau hoko ko hono kau muimui. Ka ko e toko 144,000 pē ʻo kinautolu ʻe ʻalu hake ki hēvani ʻo pule mo Sīsuú. (Lau ʻa e Fakahā 14:1-4.) Ko e toenga kotoa ʻo e kau Kalisitiane ʻi he māmaní te nau hoko ko e kakai ʻo e Puleʻanga ko iá.​—Saame 37:29.

3. Ko e hā ʻoku lelei ange ai ʻa e Puleʻanga ʻo e ʻOtuá ʻi he ngaahi puleʻanga fakaetangatá?

Naʻa mo e taimi ʻoku feinga ai ʻa e ngaahi pule fakaetangatá ke fai ʻa e ngaahi meʻa leleí, ʻoku ʻikai ke nau maʻu ʻa e mālohi ke fai ʻa e meʻa kotoa ʻoku nau loto ki aí. ʻOku faai atu pē ʻo fetongi kinautolu ʻe he kau pule kehe ʻa ia ʻoku ʻikai ke nau fietokoni ki honau kakaí. Ka ko e Tokotaha Pule ʻo e Puleʻanga ʻo e ʻOtuá, ʻa Sīsū, heʻikai ʻaupito ke fetongi ia ʻe ha taha. Kuo “fokotuʻu ʻe he ʻOtua . . . ha puleʻanga ʻa ia ʻe ʻikai ʻaupito ke fakaʻauha.” (Taniela 2:44) ʻE pule mai ʻa Sīsū ki he māmaní kotoa pea heʻikai ke ne filifilimānako. ʻOkú ne anga-ʻofa, anga-lelei mo fakamaau totonu, pea te ne akoʻi ʻa e kakaí ke nau fakafeangai ki he tokotaha taki taha ʻi he founga tatau, ʻi he ʻofa, anga-lelei mo e fakamaau totonu.​—Lau ʻa e ʻAisea 11:9.

4. ʻE pule mai ʻa e Puleʻanga ʻo e ʻOtuá ki he kotoa ʻo e māmaní

Ko Sīsū Kalaisi ʻa e pule lelei tahá ʻi ha toe taha pē ʻi he hisitōliá. Lau ʻa e Mātiu 28:18, pea lāulea leva ki he fehuʻi ko ení:

• ʻOku anga-fēfē ʻa e lelei ange ʻa e founga-pule ʻa Sīsuú ʻi ha toe pule fakaetangata pē?

Ko e ngaahi founga-pule fakaetangatá ʻoku faʻa liliu, pea ko e kau pulé ʻoku nau pule pē ki ha konga ʻo e māmaní. Fēfē ʻa e Puleʻanga ʻo e ʻOtuá? Lau ʻa e Taniela 7:14, pea lāulea leva ki he ongo fehuʻi ko ení:

• ʻE anga-fēfē haʻatau maʻu ʻaonga koeʻuhí “ʻe ʻikai ke fakaʻauha” ʻa e Puleʻanga ʻo e ʻOtuá?

• ʻE anga-fēfē haʻatau maʻu ʻaonga koeʻuhí ko e pule mai ʻa e Puleʻanga ʻo e ʻOtuá ki he māmaní kotoa?

5. Kuo pau ke fetongi ʻa e ngaahi founga-pule fakaetangatá

Ko e hā kuo pau ai ke fetongi ʻe he Puleʻanga ʻo e ʻOtuá ʻa e ngaahi founga-pule ʻa e tangatá? Huluʻi ʻa e VITIOÓ, pea lāulea leva ki he fehuʻi hokó.

VITIŌ: Konga mei he​—Ko e Hā ʻa e Puleʻanga ʻo e ʻOtuá? (1:41)

• Ko e hā ʻa e nunuʻa ʻo e ngaahi founga-pule ʻa e tangatá?

Lau ʻa e Tangata Malanga 8:9, pea lāulea leva ki he ongo fehuʻi ko ení:

• ʻOkú ke fakakaukau ʻoku totonu ke fetongi ʻe he Puleʻanga ʻo e ʻOtuá ʻa e ngaahi founga-pule fakaetangatá? Ko e hā hono ʻuhingá?

6. Ko e kau pule ʻi he Puleʻanga ʻo e ʻOtuá ʻoku nau mahinoʻi kitautolu

Koeʻuhi ko hotau tuʻí, ʻa Sīsū, naʻá ne moʻui ko ha tangata, ʻoku lava ke ne “kaungāongoʻi mai ki heʻetau ngaahi vaivaiʻangá.” (Hepelū 4:15) Ko e kau tangata mo e kau fefine faitōnunga ʻe 144,000 te nau pule fakataha mo Sīsū. Kuo fili kinautolu ʻe Sihova “mei he matakali mo e lea mo e kakai mo e puleʻanga kotoa pē.”​—Fakahā 5:9.

• ʻOkú ke ongoʻi fiemālie ʻi hono ʻiloʻi ko Sīsū mo e kotoa hono kaungāpulé ʻoku nau mahinoʻi ʻa e anga ʻo ʻetau ongoʻí mo e ngaahi palopalema ʻoku tau maʻú? Ko e hā hono ʻuhingá?

7. ʻOku lelei ange ʻa e ngaahi lao ʻa e Puleʻanga ʻo e ʻOtuá

ʻOku faʻu ʻe he ngaahi puleʻangá ha lao ʻoku totonu ke maʻu ʻaonga mo maluʻi ai ʻa e kakai ʻo e fonuá. ʻOku ʻi ai foki mo e ngaahi lao ʻa e Puleʻanga ʻo e ʻOtuá ʻa ia kuo pau ke muimui ki ai hono kakai. Lau ʻa e 1 Kolinitō 6:9-11, pea lāulea leva ki he ngaahi fehuʻi ko ení:

• ʻOkú ke fakakaukau ʻe fēfē ʻa e māmaní ʻi he taimi ʻe muimui ai ʻa e taha kotoa ki he ngaahi lao ʻa e ʻOtuá?a

• ʻOkú ke fakakaukau ʻoku totonu hono ʻamanekina ʻe Sihova ʻa e kakai ʻo e Puleʻangá ke talangofua ki he ngaahi lao ko ení? Ko e hā hono ʻuhingá?

• Ko e hā ʻokú ne fakahaaʻi mai ko e kakai ʻoku talangataʻa ki he ngaahi lao ko ení ʻe lava ke nau liliu?​—Sio ki he veesi 11.

FAKANOUNOU

Ko e Puleʻanga ʻo e ʻOtuá ko ha founga-pule moʻoni ʻi hēvani ʻa ia ʻe pule mai ki he kotoa ʻo e māmaní.

Fakamanatu

• Ko hai ʻe pule ʻi he Puleʻanga ʻo e ʻOtuá?

• ʻOku anga-fēfē ʻa e mātuʻaki lelei ange ʻa e Puleʻanga ʻo e ʻOtuá ʻi ha founga-pule fakaetangata pē?

• Ko e hā ʻoku ʻamanekina ʻe Sihova mei he kakai ʻo e Puleʻangá?

AKO LAHI ANGE

Fakakaukau angé ki he meʻa naʻe akoʻi ʻe Sīsū fekauʻaki mo e feituʻu ʻoku tuʻu ai ʻa e Puleʻangá.

“ʻOku Tuʻu ʻi Ho Lotó ʻa e Puleʻanga ʻo e ʻOtuá?” (Kupu ʻi he uepisaití)

Ko e hā ʻoku ongoʻi ai ʻe he Kau Fakamoʻoni ʻa Sihová ko e mateaki ki he Puleʻanga ʻo e ʻOtuá ʻoku mahuʻinga ange ia ʻi he mateaki ki he founga-pule fakaetangatá?

Līʻoa Kakato ki he Puleʻanga ʻo e ʻOtuá (1:43)

Ako ki he meʻa ʻoku fakamatalaʻi ʻe he Tohi Tapú fekauʻaki mo e toko 144,000 kuo fili ʻe Sihova ke pule mo Sīsuú.

“Ko Hai ʻOku ʻAlu ki Hēvaní?” (Kupu ʻi he uepisaití)

Ko e hā naʻá ne fakatuipauʻi ha fefine ʻi pilīsone ko e ʻOtuá pē ʻoku lava ke ne ʻomai ha māmani fakamaau totonu?

“Founga ʻEku Maʻu ʻa e Tali ki he Fakamaau Taʻetotonú” (Toʻo mei he ʻĀ Hake!)

Naʻe akoʻi ʻe Sīsū ko hono kau muimuí ʻoku ʻikai totonu ke hoko ko ha konga ʻo e māmaní. (Sione 15:19) ʻOku kau ki heni ʻa e tuʻu-ʻatā mei he kau ki ha tafaʻaki ʻi he ngaahi meʻa fakapolitikale ʻa e māmaní mo e ngaahi taú. Ko hono moʻoní, ʻoku ʻikai ke faingofua maʻu pē ke hoko ʻo tuʻu-ʻatā. ʻE kataʻi nai kitautolu ʻe he kakaí koeʻuhí ko ʻetau tuʻu-ʻataá. ʻE lava fēfē ke tau nofoʻaki tuʻu-ʻatā pea kei hanganaki mateaki kia Sihova ko e ʻOtuá?

1. Ko e hā ʻa e vakai ʻa e kau Kalisitiane moʻoní ki he puleʻanga fakaetangatá?

ʻOku fakaʻapaʻapaʻi ʻe he kau Kalisitiané ʻa e puleʻangá. ʻOku tau fai ki he meʻa naʻe leaʻaki ʻe Sīsuú ʻo “ʻoange kia Sisa ʻa e ngaahi meʻa ʻa Sisá,” ʻa ia ko ʻetau talangofua ki he ngaahi lao ʻo e fonuá ʻo hangē ko ia ko hono totongi ʻa e tukuhaú. (Maʻake 12:17) ʻOku akoʻi mai ʻe he Tohi Tapú ʻoku pule ʻa e ngaahi puleʻanga fakaetangatá koeʻuhí pē ʻoku fakaʻatā kinautolu ʻe Sihova ke pule. (Loma 13:1) Ko ia ʻoku tau mahinoʻi ko e ngaahi puleʻanga fakaetangatá ʻoku fakangatangata pē honau mafaí. ʻOku tau hanga ki hotau ʻOtuá mo hono Puleʻanga fakahēvaní ke solova ʻa e ngaahi palopalema ʻa e tangatá.

2. ʻE lava fēfē ke tau fakahaaʻi ʻoku tau tuʻu-ʻatā?

Hangē ko Sīsuú, ʻoku ʻikai ke tau kaunga ki ha ngaahi meʻa fakapolitikale. ʻI he sio ʻa e kakaí ki ha taha ʻo e ngaahi mana ʻa Sīsuú, naʻa nau feinga ke puke ia ʻo fakanofo ko honau tuʻi ʻi māmani, ka naʻe ʻikai ke ne fakaʻatā kinautolu. (Sione 6:15) Ko e hā hono ʻuhingá? Koeʻuhí, hangē ko ia ko ʻene lea ki mui aí, “ko hoku Puleʻangá ʻoku ʻikai ko ha konga ia ʻo e māmani ko ení.” (Sione 18:36) ʻI he tuʻunga ko e kau ākonga ʻa Sīsū, ʻoku tau fakahaaʻi ʻetau tuʻu-ʻataá ʻi he ngaahi founga lahi. Ko e fakatātaá, ʻoku ʻikai ke tau kau ʻi he taú. (Lau ʻa e Maika 4:3.) ʻOku tau fakaʻapaʻapaʻi ʻa e ngaahi fakaʻilonga fakafonuá, hangē ko e fuká, ka ʻoku ʻikai ke tau salute ki ai koeʻuhí he ʻoku tatau pē ia mo e lotu ki aí. (1 Sione 5:21) Pea ʻoku ʻikai ke tau kau ki ha tafaʻaki ʻi hono poupouʻi pe fakafepaki ʻi ha faʻahi fakapolitikale pe kanititeiti. ʻI he ngaahi founga ko ení, ʻoku tau fakahaaʻi ai ʻoku tau mateaki kakato ki he founga-pule ʻa e ʻOtuá, ʻa hono Puleʻangá.

KELI LOLOTO ANGE

3. ʻOku tuʻu-ʻatā ʻa e kau Kalisitiane moʻoní

Naʻe fokotuʻu ʻe Sīsū mo hono kau muimuí ʻa e faʻifaʻitakiʻanga kiate kitautolu. Lau ʻa e Loma 13:1, 5-7 mo e 1 Pita 2:13, 14. Huluʻi ʻa e VITIOÓ, pea lāulea leva ki he ongo fehuʻi hokó.

VITIŌ: ʻOku Tuʻu-ʻAtā ʻa e Kau Kalisitiane Moʻoní​—Konga 1 (4:28)

• Ko e hā ʻoku totonu ai ke tau fakaʻapaʻapaʻi ʻa e ngaahi mafai māʻolungá?

• Ko e hā ʻa e ngaahi founga ʻoku tau fakahaaʻi ai ʻetau moʻulaloa kia kinautolú?

ʻI he taimi ʻo e taú, ko e ngaahi puleʻanga ʻe niʻihi ʻoku nau taku ʻoku nau tuʻu-ʻatā, ka ʻoku nau poupouʻi fakatouʻosi ʻa e ongo tafaʻaki ʻi he taú. ʻOku ʻuhinga moʻoni ki he hā ʻa e tuʻu-ʻataá? Lau ʻa e Sione 17:16. Huluʻi ʻa e VITIOÓ, pea lāulea leva ki he fehuʻi hokó.

VITIŌ: ʻOku Tuʻu-ʻAtā ʻa e Kau Kalisitiane Moʻoní​—Konga 2 (3:11)

• ʻOku ʻuhinga ki he hā ʻa e hoko ʻo tuʻu-ʻataá?

Fēfē ka tuʻutuʻuni atu ʻa e puleʻanga fakaetangatá ke ke fai ha meʻa ʻoku fepaki ia mo e lao ʻa e ʻOtuá? Lau ʻa e Ngāue 5:28, 29. Huluʻi ʻa e VITIOÓ, pea lāulea leva ki he ongo fehuʻi hokó.

VITIŌ: ʻOku Tuʻu-ʻAtā ʻa e Kau Kalisitiane Moʻoní​—Konga 3 (1:18)

• Ko e lao ʻa hai ʻoku totonu ke tau talangofua ki aí kapau ʻe fepaki ʻa e lao ʻa e tangatá mo e lao ʻa e ʻOtuá?

• ʻE lava ke ke fakakaukau ki ha tuʻunga ʻa ia heʻikai ke talangofua ai ʻa e kau Kalisitiané ki he ngaahi mafai māʻolungá?

4. Tuʻu-ʻatā ʻi he fakakaukau mo e ngāue

Lau ʻa e 1 Sione 5:21. Huluʻi ʻa e VITIOÓ, pea lāulea leva ki he ongo fehuʻi hokó.

VITIŌ: ʻUhinga ʻOku Fiemaʻu Ai ki he Kau Kalisitiane Moʻoní ʻa e Loto-Toʻá​—Ke Nofoʻaki Tuʻu-ʻAtā (2:49)

• ʻI he vitioó, ko e hā naʻe fili ai ʻa Ayenge ke ʻoua ʻe kau ki ha faʻahi fakapolitikale pe kau ʻi he ngaahi ouau fakafonua, hangē ko e salute ki he fuká?

• ʻOkú ke fakakaukau naʻá ne fai ha fili fakapotopoto?

Ko e hā ʻa e toe ngaahi tuʻunga te ne ʻahiʻahiʻi ʻetau tuʻu-ʻataá? Huluʻi ʻa e VITIOÓ, pea lāulea leva ki he ngaahi fehuʻi hokó.

VITIŌ: Lēsoni mei he Taua Leʻo​—Hanganaki Tuʻu-ʻAtā ʻi ha Māmani Māvahevahe (5:16)

• ʻE lava fēfē ke tau hanganaki tuʻu-ʻatā ʻi heʻetau sio ʻi ha sipoti ʻoku feʻauʻauhi ai ʻa e ngaahi fonuá?

• ʻE lava fēfē ke tau nofoʻaki tuʻu-ʻatā kapau ʻoku uesia fakafoʻituitui kitautolu ʻe he ngaahi fili ʻa e kau maʻu mafai ʻi he puleʻangá?

• Ko e hā ʻe hoko ai ʻa e ngaahi ongoongó pe ko ʻetau feohí ʻo ʻai ke faingataʻa kiate kitautolu ke nofoʻaki tuʻu-ʻataá?

FAKANOUNOU

ʻOku feinga mālohi ʻa e kau Kalisitiané ke nau tuʻu-ʻatā mei he meʻa fakapolitikalé ʻi heʻenau fakakaukaú, leá mo e ngāué.

Fakamanatu

• Ko e hā ʻoku fiemaʻu ke tau ʻoatu ki he ngaahi puleʻanga fakaetangatá?

• Ko e hā ʻoku tau nofoʻaki tuʻu-ʻatā fakapolitikale aí?

• Ko e hā ʻa e ngaahi tuʻunga ʻoku lava ke ne ʻahiʻahiʻi ʻetau tuʻu-ʻataá?

AKO LAHI ANGE

Ko e hā ʻa e ngaahi feilaulau ʻoku fiemaʻu ke tau fai ke tau hanganaki tuʻu-ʻataá?

Kuo ʻIkai ʻAupito ke Liʻaki Kitautolu ʻe Sihova (3:14)

Ko e hā ʻoku lava ke fai tokamuʻa ʻe he ngaahi fāmilí ke mateuteu ki hono ʻahiʻahiʻi ʻenau tuʻu-ʻataá?

Tauhi Maʻu ʻa e Tuʻu-ʻAtā ʻi ha Meʻa ʻOku Hoko ʻi he Feituʻu Kakaí (4:25)

Ko e hā ʻoku ʻikai ko e lāngilangi māʻolunga tahá ia ʻa hono maluʻi ʻa hoto fonuá?

“Ki he ʻOtuá ʻOku Malava ʻa e Meʻa Kotoa Pē” (5:19)

Fakakaukau ki he founga ke hanganaki ʻikai ko ha konga ʻo e māmaní ʻi he fili hoʻo ngāué.

“Kuo Pau Ke Taki Taha Fua ʻEne Kavenga Aʻana” (Ko e Taua Leʻo, Maʻasi 15, 2006)