Ako mei he Ngaahi Lea Fakaʻosi ʻa Sīsuú

1-2. Fakamatalaʻi ʻa e tuʻunga naʻe ʻi ai ʻa Sīsū ʻi heʻene leaʻaki ʻene ngaahi lea fakaʻosi ko ha tangata.

KO E taimi ʻahó eni, ʻi Nīsani 14, 33 T.S. ʻI he hili hono tukuakiʻi loi ʻa Sīsū pea fakahalaiaʻi ki ha hia naʻe ʻikai te ne fai, naʻe manukiʻi pea fakamamahiʻi anga-fakamamahi ia pea toki tutuki ki ha ʻakau fakamamahi. ʻOku ngalo atu ʻa e faʻó ʻi hono nimá mo hono vaʻé. Ko ʻene mānava kotoa pē, mo ʻene foʻi lea kotoa pē ʻokú ne mamahiʻia. Ka kuo pau ke ne lea​—ʻoku ʻi ai ʻa e ngaahi meʻa mahuʻinga ke ne leaʻaki.

² Te tau lāulea ki he ngaahi lea ʻa Sīsū ʻi he ofi ke ne pekia ʻi he ʻakau fakamamahí mo e ngaahi lēsoni ʻe lava ke tau ako mei aí. ʻI hono fakalea ʻe tahá, tuku ke tau “fanongo kiate ia.”​—Māt. 17:5.

 3. Ko hai ʻoku ngalingali naʻe ʻuhinga ki ai ʻa Sīsū ʻi heʻene lea: “Tamai, fakamolemoleʻi kinautolu”?

³ Ko e hā naʻe leaʻaki ʻe Sīsuú? ʻI hono tutuki ia ki he ʻakaú, naʻe lotu ʻa Sīsū: “Tamai, fakamolemoleʻi kinautolu.” Ko e fakamolemoleʻi ʻo hai? ʻOku tau maʻu ʻa e talí ʻi he ngaahi lea hokó: “ʻOku ʻikai te nau ʻilo ʻa e meʻa ʻoku nau faí.” (Luke 23:33, 34) Ngalingali naʻe ʻuhinga ʻa Sīsū ki he kau sōtia Loma naʻa nau tutuki hono nimá mo hono vaʻé. Naʻe ʻikai ke nau ʻiloʻi pe ko hai moʻoni ia. Naʻá ne toe fakakaukau nai ki he niʻihi ʻi he fuʻu kakaí naʻa nau kounaʻi ke tāmateʻi iá ka ki mui ai naʻa nau fakatomala pea tui kiate ia. (Ngā. 2:36-38) Naʻe ʻikai ke fakaʻatā ʻe Sīsū ʻa e fakamaau taʻetotonu naʻá ne faingataʻaʻia aí ke ne ʻita ai mo loto-mamahi. (1 Pita 2:23) ʻI hono kehé, naʻá ne kole kia Sihova ke fakamolemoleʻi ʻa e faʻahinga naʻa nau tāmateʻi iá.

 4. Ko e hā ʻoku lava ke tau ako mei he loto-lelei ʻa Sīsū ke fakamolemoleʻi hono kau fakafepakí?

⁴ Ko e hā ʻe lava ke tau ako mei he lea ʻa Sīsuú? Hangē ko Sīsuú, ʻoku fiemaʻu ke tau loto-lelei ke fakamolemoleʻi ʻa e niʻihi kehé. (Kol. 3:13) ʻOku fakafepakiʻi nai kitautolu ʻe he niʻihi, kau ai hotau kāingá, koeʻuhi ʻoku ʻikai ke nau mahinoʻi ʻetau tuí mo ʻetau founga moʻuí. Te nau tala nai ha loi fekauʻaki mo kitautolu, fakamaaʻi kitautolu ʻi he ʻao ʻo e niʻihi kehé, fakaʻauha ʻetau ʻū tohí pe naʻa mo hono fakamanamanaʻi ke fakamamahiʻi fakaesino kitautolu. ʻI he ʻikai ke tukulotoʻi ʻa e ʻitá, ʻe lava ke tau kole kia Sihova ke fakaʻā ʻa e mata ʻo e faʻahinga ʻoku nau fakafepakiʻi kitautolú koeʻuhi ke ʻi ai ha ʻaho te nau ʻiloʻi nai ai ʻa e moʻoní. (Māt. 5:44, 45) ʻI he taimi ʻe niʻihi, ʻoku faingataʻa nai ke tau fakamolemole, tautefito kapau ʻoku tau hokosia ha fakamaau taʻetotonu mafatukituki. Ka ʻo kapau ʻoku tau fakaʻatā ʻa e loto-mamahí mo e ʻitá ke faiaka ʻi hotau lotó, ʻoku tau fakamamahiʻi ai kitautolu. Naʻe fakamatala ha tuofefine: “ʻOku ou ʻiloʻi ko e fakamolemolé ʻoku ʻikai ko ʻeku tali ʻa e faihalá pe fakaʻatā ʻa e niʻihi kehé ke nau ngaohikoviʻi au. ʻOku ʻuhinga pē ia ʻoku ou fili ke tuku ange ʻa e ʻitá.” (Saame 37:8) ʻI he taimi ʻoku tau fili ai ke fakamolemolé, ʻoku tau fili ai ke ʻoua naʻa tau tuku ʻa e ngaahi hokosia ʻikai leleí ke ne fakaʻitaʻi kitautolu.​—ʻEf. 4:31, 32.

 5. Ko e hā ʻa e talaʻofa naʻe fai ʻe Sīsū ki he taha ʻi he ongo tangata faihia naʻe tāmateʻi fakataha mo iá, pea ko e hā naʻá ne fai ai ʻa e talaʻofa ko iá?

⁵ Ko e hā naʻe leaʻaki ʻe Sīsuú? Naʻe tāmateʻi fakataha ʻa Sīsū mo ha ongo tangata faihia. ʻI he ʻuluaki taimí, naʻá na kau ʻi hono lumaʻi iá. (Māt. 27:44) Ka ki mui ai, naʻe liliu ʻa e loto ʻo e taha ʻo kinaua. Naʻá ne fakaʻosiʻaki ko Sīsuú naʻe “ʻikai te ne momoʻi fai ha hala.” (Luke 23:40, 41) ʻIkai ko ia pē, naʻá ne fakahaaʻi ʻene tui ko Sīsū ʻe toetuʻu mei he pekiá pea ʻe ʻi ai ʻa e ʻaho ʻe pule ko ha tuʻi. Naʻá ne pehē ki he Fakamoʻui ne mei pekiá: “Sīsū, manatuʻi au ʻi hoʻo hoko ki ho Puleʻangá.” (Luke 23:42) He tui lahi ē naʻe fakahaaʻi ʻe he tangatá! ʻI he tali ki ai ʻa Sīsuú, naʻá ne pehē kiate ia: “ʻOku ou tala moʻoni atu kiate koe ʻi he ʻahó ni, te ke ʻi Palataisi mo au [kae ʻikai ʻi he Puleʻangá].” (Luke 23:43) Fakatokangaʻi naʻe fai ʻe Sīsū ʻa e talaʻofá ʻo fakafoʻituitui ʻi heʻene pehē “ʻOku ou,” “koe,” pea mo e “au.” ʻI he ʻiloʻi ʻe Sīsū ʻoku mohu meesi ʻene Tamaí, naʻá ne leaʻaki ʻa e ngaahi lea naʻe ʻoatu ai ʻa e ʻamanaki ki he tokotaha faihia ko eni naʻe mei maté.​—Saame 103:8.

 6. Ko e hā ʻoku tau ako mei he lea ʻa Sīsū ki he tokotaha faihiá?

⁶ Ko e hā ʻe lava ke tau ako mei he lea ʻa Sīsuú? Ko Sīsū ʻokú ne tapua haohaoa mai ʻene Tamaí. (Hep. 1:3) ʻOku vēkeveke ʻa Sihova ke fakamolemoleʻi kitautolu pea fakahaaʻi mai ʻene mēsí kapau te tau fakaʻiseʻisa moʻoni ʻi he ngaahi meʻa kovi naʻa tau fai ʻi he kuohilí pea tau tui ʻe lava ke fakamolemoleʻi ʻetau angahalá fakafou ʻi he taʻataʻa ʻo Sīsū Kalaisi naʻe lilingí. (1 Sio. 1:7) ʻOku faingataʻa nai ki he niʻihi ke tui ʻe faifai ange pea fakamolemoleʻi ʻe Sihova ʻenau ngaahi fehālaaki ʻi he kuohilí. Kapau ʻokú ke ongoʻi pehē ʻi ha taimi, fakakaukau ki heni: Ki muʻa siʻi pē ke pekia ʻa Sīsuú, naʻá ne fakahaaʻi ha meesi ki he tokotaha faihia naʻe fakahalaiaʻi ʻa ia naʻá ne toki kamata pē ke fakahaaʻi ʻa e tuí. Ko ia huanoa ange ai hono fakahāhā ʻe Sihova ʻene mēsí ki heʻene kau lotu faitōnungá, ʻa ia ʻoku nau fai honau lelei tahá ke talangofua ki heʻene ngaahi fekaú!​—Saame 51:1; 1 Sio. 2:1, 2.

 7. Ko e hā naʻe leaʻaki ʻe Sīsū kia Mele mo Sione, ʻa ia naʻe hiki ʻi he Sione 19:26, 27, pea ko e hā naʻá ne leaʻaki ai ení?

⁷ Ko e hā naʻe leaʻaki ʻe Sīsuú? (Lau ʻa e Sione 19:26, 27.) Naʻe hohaʻa ʻa Sīsū fekauʻaki mo ʻene faʻeé ʻa ia ko ha uitou nai. Ko hono fanga tokouá mo e fanga tuofāfiné mahalo te nau tokangaʻi ʻa e ngaahi fiemaʻu fakaesino mo fakamatelie ʻenau faʻeé. Ka ko hai te ne tokangaʻi ʻene ngaahi fiemaʻu fakalaumālié? Naʻe teʻeki ai hoko hono fanga tokouá ko ha kau ākonga. Kae kehe, ko Sione ko ha ʻapositolo faitōnunga pea ko e taha ia ʻi he ngaahi kaumeʻa ofi taha ʻo Sīsuú. Naʻe vakai ʻa Sīsū ki he faʻahinga naʻa nau kau mo ia ʻi he lotu kia Sihová ko hono fāmili fakalaumālie. (Māt. 12:46-50) Ko ia ai, ʻi hono ueʻi ia ʻe he ʻofa mo e hohaʻa fekauʻaki mo Melé, naʻe falala ʻa Sīsū kia Sione ke ne tokangaʻi ia, ʻo ʻiloʻi te ne tokangaʻi ʻene meʻa fakalaumālié. Naʻá ne pehē ki heʻene faʻeé: “Vakai! Ko hoʻo tama ena!” Pea naʻá ne pehē kia Sione: “Vakai! Ko hoʻo faʻē ena!” Pea mei he ʻaho ko iá, naʻe hoko ʻa Sione ʻo hangē pē ko ha tama ʻa Melé pea naʻá ne tokangaʻi ia ʻo hangē pē ko haʻane faʻeé. Ko ha ʻofa ē naʻe fakahaaʻi ʻe Sīsū ki he fefine mahuʻinga naʻá ne tokangaʻi fakaalaala ia mei hono fanauʻí pea naʻe tuʻu ʻi hono tafaʻakí ʻi heʻene pekiá!

 8. Ko e hā ʻoku lava ke tau ako mei he lea ʻa Sīsū kia Mele mo Sioné?

⁸ Ko e hā ʻe lava ke tau ako mei he lea ʻa Sīsuú? Ko hotau vahaʻangatae mo hotau fanga tokoua mo e fanga tuofāfine Kalisitiané ʻe lava ke mālohi ange ia ʻi he ngaahi haʻi fakafāmilí. ʻE fakafepakiʻi nai kitautolu ʻe hotau kāingá, pe naʻa mo hono liʻaki kitautolu, kae hangē ko ia naʻe talaʻofa ʻe Sīsuú, ʻi he nofo ofi kia Sihova mo ʻEne kautahá, te tau maʻu “ʻo liunga 100” ʻi he meʻa naʻa tau fakamolekí. ʻE hoko ʻa e tokolahi ʻo hangē kiate kitautolu ko ha foha, ʻofefine, faʻē, pe tamai ʻofeina. (Mk. 10:29, 30) ʻOku anga-fēfē hoʻo ongoʻi fekauʻaki mo hoʻo hoko ko ha konga ʻo e fāmili fakalaumālie ʻoku nau fāʻūtaha ʻi he tui mo e ʻofa​—ʻofa kia Sihova pea feʻofaʻakí?​—Kol. 3:14; 1 Pita 2:17.

 9. Ko e hā ʻa e lēsoni ʻoku tau ako mei he lea ʻa Sīsū ʻoku hiki ʻi he Mātiu 27:46?

⁹ Ko e hā naʻe leaʻaki ʻe Sīsuú? Ki muʻa siʻi pē pea pekia ʻa Sīsuú, naʻá ne kalanga leʻo-lahi: “ʻE hoku ʻOtua, ʻe hoku ʻOtua, ko e hā kuó ke liʻaki ai aú?” (Māt. 27:46) ʻOku ʻikai fakamatalaʻi ʻi he Tohi Tapú ʻa e ʻuhinga naʻe lea peheni ai ʻa Sīsuú. Kae fakakaukau angé ki he lēsoni ʻoku tau ako mei he lea ko iá. Ko e meʻa ʻe taha, ʻi hono leaʻaki ení, naʻe fakahoko ai ʻe Sīsū ʻa e kikite ʻi he Saame 22:1.b ʻIkai ko ia pē, ʻoku hā mahino ʻi he lea ko iá naʻe ʻikai ke “ʻaaʻi malu takai” ʻe Sihova hono ʻAló. (Siope 1:10) Naʻe mahinoʻi ʻe Sīsū kuo tuku ange kakato ia ʻe heʻene Tamaí ki he nima ʻo hono ngaahi filí koeʻuhi ke ʻahiʻahiʻi ia ki he taupotu tahá ʻa ia ʻoku teʻeki ai ha tangata kuo faifai ange pea ʻahiʻahiʻi ʻi he tuʻunga ko iá. Tānaki atu ki ai, ʻoku fakapapauʻi ʻi he lea ko ení naʻá ne tonuhia ʻi he ngaahi hia naʻe tuha mo e maté.

10. Ko e hā ʻa e ngaahi lēsoni ʻoku lava ke tau ako mei he lea ʻa Sīsū ki heʻene Tamaí?

¹⁰ Ko e hā ʻe lava ke tau ako mei he lea ʻa Sīsuú? Ko ha lēsoni ʻe taha ʻoku lava ke tau akó ko e pau ko ia ke ʻoua te tau ʻamanekina ʻe maluʻi kitautolu ʻe Sihova mei he ngaahi pole ʻokú ne ʻahiʻahiʻi ʻetau tuí. Hangē pē ko hono ʻahiʻahiʻi ʻa Sīsū ki he taupotu tahá, kuo pau foki ke tau mateuteu ke fakamoʻoniʻi ʻetau anga-tonú ʻo aʻu ki he mate ʻo ka fiemaʻu. (Māt. 16:24, 25) Kae kehe, ʻoku lava ke tau fakapapauʻi heʻikai fakaʻatā ʻe he ʻOtuá kitautolu ke ʻahiʻahiʻi ʻo fakalaka atu ia ʻi he meʻa ʻoku malava ke tau kātekiná. (1 Kol. 10:13) Ko ha toe lēsoni ʻe taha ʻoku tau ako, hangē ko Sīsuú, te tau faingataʻaʻia taʻetotonu nai. (1 Pita 2:19, 20) Ko e faʻahinga ʻoku nau fakafepakiʻi kitautolú ʻoku nau fai pehē, ʻo ʻikai koeʻuhi ko ʻetau fai ha meʻa hala, ka koeʻuhi ʻoku ʻikai ko ha konga kitautolu ʻo e māmaní pea ʻoku tau faifakamoʻoni ki he moʻoní. (Sione 17:14; 1 Pita 4:15, 16) Naʻe mahinoʻi ʻe Sīsū ʻa e ʻuhinga naʻe fakaʻatā ai ia ʻe Sihova ke ne faingataʻaʻiá. Kae kehe, ʻi he ʻikai hangē ko Sīsuú, ʻi he taimi ʻe niʻihi ko e kau lotu faitōnunga ʻi he malumalu ʻo e ʻahiʻahí kuo nau fifili pe ko e hā kuo fakaʻatā ai ʻe Sihova ʻa e ngaahi meʻa ko iá ke hokó. (Hap. 1:3) Ko hotau ʻOtua mohu meesi mo kātakí ʻokú ne mahinoʻi ko e faʻahinga peheé ʻoku ʻikai siʻi ʻenau tuí; ʻoku nau fiemaʻu ʻa e fakafiemālie ko ia pē ʻoku lava ke ne tokonaki maí.​—2 Kol. 1:3, 4.

11. Ko e hā naʻe leaʻaki ai ʻe Sīsū ʻa e lea ʻoku hiki ʻi he Sione 19:28?

¹¹ Ko e hā naʻe leaʻaki ʻe Sīsuú? (Lau ʻa e Sione 19:28.) Ko e hā ʻa e ʻuhinga naʻe lea ai ʻa Sīsū: ʻOku ou fieinua”? Naʻá ne lea pehē “koeʻuhi ke fakahoko ʻa e potu folofolá”​—ʻa ia ko e kikite ʻoku ʻi he Saame 22:15, ʻoku pehē: “Kuo maha hoku iví hangē ha mapakipakiʻi meʻa ʻumeá; ʻoku pipiki ʻa hoku ʻeleló ki hoku teʻenifó.” Pehē foki, hili ʻa e faingataʻaʻia kotoa ʻa Sīsuú, kau ai ʻa e langa lahi ʻi he ʻakau fakamamahí, kuo pau pē naʻá ne fieinua ʻaupito. Naʻá ne fiemaʻu ha tokoni ke fakanonga ʻene fieinuá.

12. Ko e hā ʻoku lava ke tau ako mei he lea ʻa Sīsū “ʻOku ou fieinua”?

¹² Ko e hā ʻe lava ke tau ako mei he lea ʻa Sīsuú? Naʻe ʻikai fakakaukau ʻa Sīsū ko hono fakahaaʻi ʻa e anga ʻene ongoʻí ko ha fakaʻilonga ʻo ha vaivaiʻanga; ʻoku totonu ke pehē mo kitautolu. Ko e taimi lahi ʻi heʻetau moʻuí ʻoku tau saiʻia nai ke ʻoua ʻe tala ki he niʻihi kehé ʻetau ngaahi fiemaʻú. Ka ʻo kapau te tau fiemaʻu ha tokoni, ʻoku totonu ke ʻoua te tau toumoua ke kole tokoni ki he niʻihi kehé. Ko e fakatātaá, kapau ʻoku tau taʻumotuʻa pe vaivai, ʻe fiemaʻu nai ke tau kole ki ha kaumeʻa ke ne ʻave kitautolu ki he falekoloá pe sio ki he toketaá. Kapau ʻoku tau loto-mafasia pe loto-siʻi, ʻoku fiemaʻu nai ke tau kole ki ha mātuʻa pe ko ha Kalisitiane matuʻotuʻa ʻe fanongo lelei mai pe vahevahe mai “ha lea lelei” ke fakafiefiaʻi kitautolu. (Pal. 12:25) Tau manatuʻi ʻoku ʻofa hotau fanga tokouá mo e fanga tuofāfiné ʻiate kitautolu, pea ʻoku nau loto ke tokoniʻi kitautolu ʻi he “taimi faingataʻá.” (Pal. 17:17) Ka ʻoku ʻikai ke nau ʻiloʻi ʻetau fakakaukaú. ʻOku ʻikai nai ke nau ʻiloʻi ʻoku tau fiemaʻu tokoni kae ʻoua leva ke tau tala ange.

13. Ko e hā naʻe lavaʻi ʻe Sīsū ʻi heʻene tauhi maʻu ʻene anga-tonú ʻo aʻu ki he pekiá?

¹³ Ko e hā naʻe leaʻaki ʻe Sīsuú? ʻI he taimi tolu nai ʻi he efiafi ʻo Nīsani 14, naʻe kalanga ʻa Sīsū: “Kuo lava!” (Sione 19:30) ʻI he mōmeniti pē ki muʻa pea pekia ʻa Sīsū, naʻá ne ʻiloʻi kuo kakato kotoa ʻa e meʻa naʻe ʻamanekina ʻe Sihova ke ne faí. ʻI he tauhi maʻu ʻe Sīsū ʻene anga-tonú ʻo aʻu ki he pekiá, naʻá ne lavaʻi ai ʻa e ngaahi meʻa lahi. ʻUluakí, naʻá ne fakamoʻoniʻi ko ha tokotaha loi ʻa Sētane. Naʻe fakahaaʻi ʻe Sīsū ʻoku lava ke tauhi maʻu ʻe ha tangata haohaoa ʻene anga-tonú neongo ʻa e meʻa kotoa kuo fai ʻe Sētané. Uá, naʻe foaki ʻe Sīsū ʻene moʻuí ko ha huhuʻi. Ko ʻene pekia fakaefeilaulaú naʻe lava ai ke maʻu ʻe he faʻahinga taʻehaohaoa ʻo e tangatá ha tuʻunga māʻoniʻoni ʻi he ʻao ʻo e ʻOtuá, pea ʻoange ai kiate kinautolu ʻa e ʻamanaki ki he moʻui taʻengatá. Tolú, naʻe pouaki ʻe Sīsū ʻa e māʻoniʻoni ʻo e tuʻunga-hau ʻo Sihová pea fakaʻataʻatā ai ʻa e huafa ʻo ʻene Tamaí mei hono lumaʻí.

14. ʻOku totonu ke fēfē ʻetau fakapapau ke moʻui ʻi he ʻaho taki taha? Fakamatalaʻi.

¹⁴ Ko e hā ʻe lava ke tau ako mei he lea ʻa Sīsuú? Kuo pau ke tau fakapapauʻi ʻoku tau tauhi maʻu ʻetau anga-tonú ʻi he ʻaho kotoa. Fakakaukau ki he fakamatala ʻa Tokoua Maxwel Friend, naʻe hoko ko ha faiako ʻi he Akoʻanga Tohi Tapu Taua Leʻo ko Kiliatí. ʻI ha ʻAsemipilī Fakavahaʻapuleʻanga, naʻe pehē ai ʻe Tokoua Friend ʻi ha malanga fekauʻaki mo e faitōnungá: “ʻOua ʻe toloi ki ʻapongipongi ʻa e meʻa ʻoku lava ke ke fai pe leaʻaki ʻi he ʻaho ní. ʻOkú ke fakapapauʻi te ke moʻui ʻo aʻu ki ʻapongipongi? Moʻui ʻi he ʻaho taki taha ʻo hangē pē ko ha faingamālie fakaʻosi ia ke ke fakahaaʻi ʻokú ke taau ki he moʻui taʻengatá.” ʻOfa ke tau moʻui ʻi he ʻaho taki taha ʻo hangē ko ha faingamālie fakaʻosi ia ke tau tauhi maʻu ai ʻetau anga-tonú! Pea neongo kapau te tau fehangahangai mo e maté, ʻe lava ke tau pehē, “Sihova kuó u fai hoku lelei tahá ke tauhi maʻu ʻeku anga-tonú, ke fakamoʻoniʻi ʻoku loi ʻa Sētane, pea fakatonuhiaʻi ho huafá mo ho tuʻunga-haú!”

15. Fakatatau ki he Luke 23:46, ko e hā ʻa e tuipau naʻe fakahaaʻi ʻe Sīsuú?

¹⁵ Ko e hā naʻe leaʻaki ʻe Sīsuú? (Lau ʻa e Luke 23:46.) ʻI he tuipau kakato, naʻe pehē ʻe Sīsū: “Tamai, ʻoku ou tuku atu hoku laumālié ki ho toʻukupú.” Naʻe ʻiloʻi ʻe Sīsū ko hono kahaʻú naʻe fakafalala kia Sihova, pea naʻá ne fakapapauʻi ʻe manatuʻi ia ʻe heʻene Tamaí.

16. Ko e hā ʻokú ke ako mei he hokosia ʻa ha Fakamoʻoni taʻu 15?

¹⁶ Ko e hā ʻe lava ke tau ako mei he lea ʻa Sīsuú? Hoko ʻo loto-lelei ke tuku atu hoʻo moʻuí ki he toʻukupu ʻo Sihová. Ke fai iá, kuo pau ke ke “falala kia Sihova ʻaki ho lotó kotoa.” (Pal. 3:5) Fakakaukau ki he faʻifaʻitakiʻanga ʻa Joshua, ko ha Fakamoʻoni taʻu 15 naʻe puke ʻi ha mahaki fakatupu mate. Naʻá ne fakafisi ke tali ʻa e ngaahi founga fakafaitoʻo ʻokú ne maumauʻi ʻa e lao ʻa e ʻOtuá. Ki muʻa siʻi pē peá ne maté, naʻá ne tala ange ki heʻene faʻeé: “Mami, ʻoku ou ʻi he toʻukupu ʻo Sihová. . . . Mami, ʻoku lava ke u tala atu eni ʻi he tuipau: ʻOku ou ʻiloʻi kuo pau ke toe fokotuʻu mai au ʻe Sihova ʻi he toetuʻú. Kuó ne ʻiloʻi hoku lotó, pea ʻoku ou ʻofa moʻoni kiate ia.”c ʻOku lelei kiate kitautolu taki taha ke ʻeke hifo, ‘Kapau te u fehangahangai mo ha tuʻunga ʻokú ne fakamanamanaʻi ʻeku moʻuí ʻo ʻahiʻahiʻi ai ʻeku tuí, te u tuku atu ʻeku moʻuí ki he toʻukupu ʻo Sihová pea falala te ne manatuʻi au?’

17-18. Ko e hā ʻa e ngaahi lēsoni kuo tau akó? (Sio foki ki he puha “Lēsoni mei he Ngaahi Lea Fakaʻosi ʻa Sīsū.”)

¹⁷ He ngaahi lēsoni mālohi ē ʻoku lava ke tau ako mei he ngaahi lea fakaʻosi ʻa Sīsuú! ʻOku fakamanatu mai ai ʻa e fiemaʻu ke tau fakamolemoleʻi ʻa e niʻihi kehé pea falala ʻe fakamolemoleʻi kitautolu ʻe Sihova. Ko ha monū ia ʻetau maʻu ha fāmili fakalaumālie fakaofo ʻo e fanga tokoua mo e fanga tuofāfine ʻoku nau mateuteu ke tokoniʻi kitautolu. Ka ʻi heʻetau fiemaʻu tokoní, kuo pau ke tau tamuʻomuʻa ʻi hono kole iá. ʻOku tau ʻiloʻi ʻe tokoniʻi kitautolu ʻe Sihova ke kātekina ha ʻahiʻahi pē ʻe hoko mai. Pea ʻoku tau sio ki he mahuʻinga ʻo e moʻui ʻi he ʻaho taki taha ʻo hangē ko e ʻaho fakaʻosi ia ke tau fakamoʻoniʻi ai ʻetau anga-tonú, ʻo tuipau ko ʻetau moʻuí ʻoku malu ʻi he toʻukupu ʻo Sihová.

¹⁸ Ko e moʻoni, he mohu ʻuhinga ē ko e ngaahi lea ʻa Sīsū ʻi he ofi ke ne pekia ʻi he ʻakau fakamamahí! ʻI hono ngāueʻaki ʻa e ngaahi lēsoni kuo tau akó, te tau talangofua ai ki he lea tonu ʻa Sihova ki hono ʻAló: “Mou fanongo kiate ia.”​—Māt. 17:5.