Faʻifaʻitaki ki Heʻenau Tuí

Naʻá Ne Ako ʻa e Fakamolemolé mei he ʻEikí

HEʻIKAI ʻaupito ngalo ʻia Pita ʻa e mōmeniti fakamamahi ko ia naʻá na fesiofaki aí. Naʻá ne sio ʻoku hā mei he fofonga ʻo Sīsuú ha ʻamanaki-tōnoa pe mā? ʻOku ʻikai lava ke tau fakapapauʻi; ko e lēkooti fakamānavaʻí ʻoku pehē pē ai “pea tafoki ʻa e ʻEiki ʻo sio fakamamaʻu kia Pita.” (Luke 22:61) Ka ʻi he foʻi hila pē ko iá, naʻe ʻiloʻi ai ʻe Pita ʻa e mafatukituki ʻo ʻene taʻelavameʻá. Naʻá ne ʻiloʻi ai kuó ne toki ʻosi fai ʻa e meʻa tofu pē ko ia naʻe tomuʻa tala ʻe Sīsuú, ʻa e meʻa ko ia ʻe taha naʻe fakamatematē ʻa Pita heʻikai ʻaupito te ne faí—kuó ne fakafisingaʻi ʻa hono ʻEiki ʻofeiná. Ko ha tuʻunga fakamamahi ia kia Pita, mahalo ko e mōmeniti kovi taha eni ʻi he ʻaho kovi taha ʻi heʻene moʻuí.

Neongo ia, naʻe ʻikai mole kotoa ʻa e ʻamanakí. Koeʻuhi ko Pitá ko ha tangata naʻe lahi ʻa ʻene tuí, naʻá ne kei maʻu pē ha faingamālie ke fakaakeake ai mei heʻene ngaahi fehālaakí pea ke ako ʻa e taha ʻo e ngaahi lēsoni māʻolunga taha ʻa Sīsuú. Naʻe fekauʻaki ia mo e fakamolemolé. Ko kitautolu taki taha ʻoku fiemaʻu ke tau ako ʻa e lēsoni tatau, ko ia tau vakai angé ki he anga hono ako ʻe Pita ʻa e lēsoni faingataʻa ko ení.

Tangata mo ha Meʻa Lahi ke Ako

ʻI he māhina nai ʻe ono ki muʻa ange ʻi hono kolo tupuʻanga ko Kāpaneumé, naʻe fakaofiofi atu ai ʻa Pita kia Sīsū ʻo ʻeke: “ʻEiki, ʻe tuʻo fiha ʻa e fai hala ʻa hoto tokoua kia kita, ka te fakamolemole pe? ʻo tuʻo fitu ʻapē?” ʻOku ngalingali naʻe fakakaukau ʻa Pita naʻá ne anga-lelei. He ko ē naʻe akoʻi ʻe he kau taki lotu ʻo e ʻaho ko iá kuo pau ki ha taha ke ne fakamolemole tuʻo tolu pē! Naʻe tali ange ʻe Sīsū: “ʻOku ʻikai te u pehe kiate koe, ʻO tuʻo fitu: ka, ʻo tuʻo fitu liunga ʻaki ʻa e fitungofulu” pe fitu-fitu.—Mātiu 18:21, 22.

Naʻe fokotuʻu ange ʻe Sīsuú ke tauhi ʻe Pita ha lēkooti papau ʻo e tokotaha faihalá? ʻIkai; ʻi hono kehé, ʻi hono liliu ʻa e tuʻo 7 ʻa Pitá ki ha tuʻo 77, naʻá ne pehē ai ʻoku ʻikai ha lahi pau ia ki he fakamolemolé. Naʻe fakahaaʻi ʻe Sīsū naʻe tākiekina ʻa Pita ʻe ha loto-fefeka mo e tōʻonga taʻefakamolemole ʻa ia naʻe hoko lahi ʻi he ngaahi ʻaho ko iá, ko e tōʻonga ʻa ia naʻe fakafuofua ai ʻa e fakamolemolé mei ha tohi naʻe hiki ai ʻa e faihalá. Kae kehe, ko e fakamolemole fakaʻotuá ʻoku ʻatā ia mo lahi.

Naʻe ʻikai ke fakakikihi ʻa Pita mo Sīsū. Ka naʻe aʻu moʻoni ʻa e lēsoni ʻa Sīsuú ki hono lotó? ʻOku tau ako he taimi ʻe niʻihi ʻa e meʻa lahi fekauʻaki mo e fakamolemolé ʻi heʻetau ʻiloʻi ʻa ʻetau fiemaʻu vivili iá. Ko ia tau toe foki angé ki he ngaahi meʻa naʻe taki atu ki he pekia ʻa Sīsuú. ʻI he ngaahi houa faingataʻa ko iá, naʻe fai ai ʻe Pita ʻa e fehālaaki lahi naʻe fiemaʻu ai ke fakamolemoleʻi ia ʻe hono ʻEikí.

Fiemaʻu Lahi ʻa e Fakamolemolé

Ko ha efiafi mahuʻinga ia—ʻa e pō fakaʻosi ʻo e moʻui ʻa Sīsū ʻi he māmaní. Naʻe kei lahi ʻaupito ʻa e meʻa ke akoʻi ʻe Sīsū ki heʻene kau ʻapositoló—ko e fakatātaá, fekauʻaki mo e anga-fakatōkilaló. Naʻe fokotuʻu ʻe Sīsū ha faʻifaʻitakiʻanga ʻi heʻene fufulu anga-fakatōkilalo ʻa honau vaʻé, ko ha ngāue naʻe anga-maheniʻaki hono vaheʻi ki he tokotaha māʻulalo taha ʻi he kau sevānití. ʻUluakí, naʻe fehuʻia ʻe Pita ʻa e ngāue ʻa Sīsuú. Pea naʻe ʻikai te ne tali ke fai ange kiate ia ʻa e ngāue ko iá. Hokó naʻá ne vilitaki ange ke fufulu ʻe Sīsū ʻo ʻikai ko hono ongo vaʻé pē kae pehē foki ki hono nimá mo hono ʻulú! Naʻe ʻikai ʻosi ai ʻa e kātaki ʻa Sīsuú ka naʻá ne fakamatalaʻi ʻi he anga-mokomoko ʻa e mahuʻinga mo e ʻuhinga ʻo e meʻa naʻá ne faí.—Sione 13:1-17.

Kae kehe, taimi nounou mei ai, naʻe kamata fakakikihi ai ʻa e kau ʻapositoló pe ko hai ʻoku lahi taha ʻia kinautolú. Naʻe kau moʻoni ʻa Pita ʻi he fakahāhā ko ia ʻi he tuʻunga fakamā ʻa e hīkisia fakaetangatá. Neongo ia, naʻe fakatonutonuʻi kinautolu ʻe Sīsū ʻi he anga-lelei pea aʻu ʻo ne fakaongoongoleleiʻi kinautolu ʻi he meʻa lelei naʻa nau faí—ʻi heʻenau fakahāhā ʻa e faitōnunga ʻi he pipiki ki honau ʻEikí. Kae kehe, naʻá ne tomuʻa tala, te nau liʻaki kotoa ia. Naʻe tali ange ʻe Pita te ne pipiki kia Sīsū ʻo aʻu ki he fehangahangai mo e maté. ʻI hono kehé, naʻe kikiteʻi ʻe Sīsū ʻe fakafisingaʻi tuʻo tolu ʻe Pita ʻa hono ʻEikí ʻi he pō pē ko iá ki muʻa ke ʻuʻua tuʻo ua ha moa. ʻI he taimi ko iá naʻe ʻikai ngata pē ʻi hono fakafepakiʻi ʻe Pita ʻa Sīsuú ka naʻá ne lea pōlepole te ne hoko ʻo faitōnunga ange ʻi he kotoa ʻo e kau ʻapositolo kehé!—Mātiu 26:31-35; Maake 14:27-31; Luke 22:24-28.

Naʻe meimei ʻosi e kātaki ʻa Sīsuú ʻia Pita? Ko hono moʻoní, ʻi he kotoa ʻo e taimi faingataʻa ko ení, naʻe hanganaki fakasio pē ʻa Sīsū ki he lelei ʻi heʻene kau ʻapositolo taʻehaohaoá. Naʻá ne ʻiloʻi ʻe tōnounou ʻa Pita mei he meʻa naʻá ne ʻamanekiná, ka naʻá ne pehē: “Kuo u hufia koe, ke ʻoua naʻa mate ʻaupito hoʻo tui aʻau: pea ʻo ka ke ka toki foki mai, ke ke poupou ʻe koe ho ngaahi tokoua.” (Luke 22:32) Naʻe fakahāhā ai ʻe Sīsū ʻa e tuipau ʻe fakaakeake fakalaumālie ʻa Pita pea toe foki ʻo ngāue faitōnunga. Ko ha tōʻonga anga-lelei mo fakamolemole moʻoni ia!

Ki mui ai, ʻi he ngoue ko Ketisemaní, naʻe fiemaʻu ai kia Pita ʻa e fakatonutonu lahi ange he tuʻo tahá. Naʻe kole ʻe Sīsū kiate ia, pea pehē kia Sēmisi mo Sione, ke nau hanganaki leʻo lolotonga ʻEne lotú. Naʻe mamahi fakaeongo ʻa Sīsū pea naʻe fiemaʻu kiate ia ʻa e poupou, ka naʻe toutou mohe ʻa Pita mo e niʻihi kehé. Naʻe fai ai ʻe Sīsū ʻa e lea kaungāongoʻi mo e fakamolemole ko ení: “ʻOku loto pē ʻa laumālie ke fai, ka ʻoku vaivai ʻa kakano.”—Maake 14:32-38.

ʻIkai fuoloa mei ai, naʻe aʻu atu ha fuʻu kakai, naʻa nau toʻo tūhulu mo e heletā mo e pōvai. Ko ha taimi eni ke ngāue tokanga ai mo fakapotopoto. Neongo ia, naʻe mahiki fakavave hake ʻa Pita ʻo fai ha meʻa, ʻaki ʻene taaʻi ʻaki ha heletā ʻa Malekusi, ko ha tamaioʻeiki ʻa e taulaʻeiki lahí, ʻo motu ai ʻa e telinga ʻe taha ʻo e tangatá ni. Naʻe fakatonutonuʻi anga-mokomoko ʻe Sīsū ʻa Pita, fakamoʻui ʻa e laveá, pea fakamatalaʻi ha tefitoʻi moʻoni ʻo e ʻikai fakamālohí ʻa ia ʻokú ne tataki ʻa hono kau muimuí ʻo aʻu mai ki he ʻahó ni. (Mātiu 26:47-55; Luke 22:47-51; Sione 18:10, 11) Ne ʻosi fai ʻe Pita ʻa e fehālaaki lahi naʻe fiemaʻu ai ke fakamolemoleʻi ia ʻe hono ʻEikí. ʻOku fakamanatu mai nai ʻi hono tuʻungá “ʻoku lahi ʻa e meʻa ʻoku tau humu ai kotoa pe.” (Semisi 3:2) Ko hai ʻia kitautolu ʻoku ʻikai fiemaʻu ki ai ha fakamolemole ʻa e ʻOtuá ʻi he ʻaho taki taha? Ko ia ai, kia Pita, naʻe lahi ʻa e meʻa ʻe toe hoko ʻi he pō ko iá. Naʻe kovi ange ʻa e meʻa naʻe tuʻu mei muʻá.

Tō Kovi Taha ʻa Pitá

Naʻe fakaʻuhinga ʻa Sīsū ki he fuʻu kakaí kapau ko ʻenau kumí ia, ʻoku totonu ke nau tuku ange ʻa e kau ʻapositoló. Naʻe sio ʻa Pita ʻo ʻikai lava ke ne fai ha tokoni ʻi hono haʻi ʻe he fuʻu kakaí ʻa Sīsuú. Pea naʻe hola leva ʻa Pita, ʻo hangē pē ko hono kaungā ʻapositoló.

Naʻe tuʻu ʻa Pita mo Sione ʻi heʻena holá, ofi nai ki he fale ʻo e Taulaʻeiki Lahi ki muʻa ko ʻĀnasí, ʻa ia naʻe muʻaki ʻave ki ai ʻa Sīsū ki hono fakafehuʻí. ʻI hono taki atu ʻa Sīsū mei aí, naʻe muimui ai ʻa Pita mo Sione kae “mei he mamaʻo.” (Mātiu 26:58; Sione 18:12, 13) Naʻe ʻikai ke vaipalo ʻa Pita. Naʻe fiemaʻu moʻoni ha tuʻunga ʻo e loto-toʻa ke muimui atu ai. Naʻe toʻo naunau tau ʻa e fuʻu kakaí, pea naʻe ʻosi fakalaveaʻi ʻe Pita ha taha ʻo kinautolu. Kae kehe, naʻe ʻikai te tau sio heni ʻi he faʻifaʻitakiʻanga ʻa Pitá ki he faʻahinga ʻofa mateaki ko ē naʻá ne laú tonu—ko ha loto-lelei ke mate ʻi he tafaʻaki ʻo e ʻEikí ʻo kapau ʻe fiemaʻu.—Maake 14:31.

ʻI he hangē ko Pitá, ʻoku feinga ʻa e tokolahi he ʻahó ni ke muimui ʻia Kalaisi “mei he mamaʻo”—ʻi ha founga heʻikai ke fakatokangaʻi ʻe ha toe taha kehe. Kae hangē ko ia naʻe tohi ki mui ʻe Pitá, ko e founga pē taha ke muimui totonu ai ʻia Kalaisí ko e pipiki kiate ia ʻi he ofi taha ʻo ʻetau malavá, ʻo muimui ʻi heʻene faʻifaʻitakiʻangá ʻi he meʻa kotoa pē, ʻo tatau ai pē pe ko e hā ʻa e ikuʻangá.—1 Pita 2:21.

Ko e muimui tokanga ʻa Pitá naʻe faifai pē ʻo ne aʻu atu ai ki he matapā ʻo e taha ʻo e ngaahi fuʻu ʻapi lalahi taha ʻi Selusalemá. Ko e ʻapi ʻo Kaiafasí, ʻa e taulaʻeiki lahi koloaʻia mo mafai lahí. Ko e ngaahi ʻapi peheé naʻe faʻa langa takai ia ʻi ha lotoʻā, mo ha matapā ʻi muʻa. Naʻe aʻu atu ʻa Pita ki he matapaá pea naʻe ʻikai fakaʻatā ia ke hū ki loto. Ko Sione, ʻa ia naʻá ne ʻosi ʻi lotó, naʻá ne ʻalu ʻo ʻomai ʻa e leʻo matapaá ke fakahū ʻa Pita ki loto. ʻOku hā ngali naʻe ʻikai nofo ofi ʻa Pita kia Sione; pea naʻe ʻikai te ne feinga ke hū ki loto ki he falé ʻo tuʻu ʻi he tafaʻaki ʻo hono ʻEikí. Naʻá ne nofo ʻi he lotoʻaá, ʻa ia naʻe fakamāfana ai ʻa e niʻihi ʻo e kau tamaioʻeikí mo e kau sevānití ʻi he ngaahi houa momoko ʻo e poó ʻi muʻa ʻi ha afi naʻe ulo, ʻo sio ʻi he hū ki loto mo e hū ki tuʻa ʻa e kau fakamoʻoni loi kia Sīsuú ʻi he hopo naʻe fai ʻi lotó.—Maake 14:54-57; Sione 18:15, 16, 18.

ʻI he ulo ʻa e afí, naʻe sio lelei ange ai ʻa e taʻahine naʻá ne fakahū ʻa Pita ki lotó kiate ia. Naʻá ne ʻiloʻi ia. Naʻá ne lea ʻo tukuakiʻi ia: “Ko koe foki naʻa ke ʻia Sisu mei Kaleli!” ʻI hono fakaʻohovaleʻí, naʻe fakafisingaʻi ʻe Pita ʻoku ʻikai te ne ʻiloʻi ʻa Sīsū—pe naʻa mo hano mahinoʻi ʻa e meʻa naʻe talanoa ki ai ʻa e taʻahiné. Naʻá ne ʻalu ʻo tuʻu ʻo ofi ki he matapaá, ʻi he feinga ke ʻoua naʻa ʻilongofua ia, ka naʻe toe fakatokangaʻi ia ʻe ha taʻahine ʻe taha peá ne fakahaaʻi ʻa e foʻi moʻoni tatau: “Ko e siana ni foki naʻe ʻia Sisu mei Nasaleti.” Naʻe fuakava ʻa Pita: “ʻOku ʻikai te u ʻiloa ʻa e tangata!” (Mātiu 26:69-72) Mahalo ko e ʻosi ʻa e fakafisingaʻi ko eni hono uá naʻe fanongo ai ʻa Pita ki he ʻuʻua ʻa ha moá, ka naʻá ne fuʻu hohaʻa ke manatuʻi ʻa e kikite naʻe leaʻaki ʻe Sīsū ʻi ha houa siʻi pē ki muʻa.

ʻI ha taimi siʻi ki mui ai, naʻe kei feinga vavale ai pē ʻa Pita ke hao ʻo ʻikai fakatokangaʻi ia. Ka naʻe fakaofiofi mai ha pupunga kakai naʻa nau tuʻu takatakai ʻi he lotoʻaá. Ko e taha ʻo kinautolu naʻe kāinga mo Malekusi, ʻa e tamaioʻeiki naʻe fakalaveaʻi ʻe Pitá. Naʻá ne pehē ange kia Pita: “ʻIkai naʻa ku mātuʻaki sio kiate koe ʻi he ngoue tapu fakataha mo ia?” Naʻe ongoʻi mālohi ʻe Pita ʻa e fiemaʻu ke fakatuipauʻi kia kinautolu naʻa nau hala. Ko ia naʻá ne fuakava ʻi he meʻá ni, ʻo hā mahino naʻá ne pehē ʻoku totonu ke hoko mai ha mala kiate ia kapau naʻá ne loi. Ko e tuai pē homo ʻene leá mo e ʻuʻua ʻa ha moa—ko e ʻuʻua hono ua ia naʻe fanongo ki ai ʻa Pita ʻi he pō ko iá.—Sione 18:26, 27; Maake 14:71, 72.

Ko e toki ʻosi hū mai ia ʻa Sīsū ki he falefakatolo naʻe hanga mai ki he lotoʻaá. ʻI he mōmeniti ko iá, ʻa ē naʻe fakamatala ki ai he kamatá, naʻá ne fesiofaki ai mo Pita. Naʻe ʻiloʻi ai ʻe Pita ʻa e lahi ko ia ʻo ʻene tō mei he meʻa naʻe ʻamanekina ʻe hono ʻEikí. Naʻe mavahe ʻa Pita mei he lotoʻaá, kuo lōmekina ia ʻe he mamafa ʻo ʻene ongoʻi halaiá. Naʻá ne huʻu ki he ngaahi hala ʻo e koló, ʻo maama ʻa hono halá ʻi he fakatōtō hifo ʻa ha māhina kātoa. Naʻá ne ongoʻi taumuʻavalea. Naʻe tō loʻimata. Naʻá ne tangi mamahi.—Maake 14:72; Luke 22:61, 62.

ʻI he hili ʻa ha fuʻu tō lahi pehē, ʻoku faingofua ʻaupito ki ha taha ke ne fakakaukau ʻoku fuʻu fakalilifu ʻene angahalá ke malava ʻo fakamolemoleʻi. Naʻe fifili pehē nai ʻa Pita fekauʻaki mo ia. ʻE lava ke fakamolemoleʻi ia?

Naʻe ʻIkai Lava ke Fakamolemoleʻi ʻa Pita?

ʻOku faingataʻa ke sioloto atu ki he lahi ʻo e mamahi ʻa Pitá ʻi he kamata hopo hake ʻa e laʻaá ʻo fakaeʻa mai ʻa e ngaahi meʻa ʻo e ʻahó. He pau moʻoni ē naʻá ne valokiʻi tonu ia ʻi he pekia ʻa Sīsū ʻi he efiafi ko iá hili ʻa e ngaahi houa ʻo e fakamamahí! Kuo pau pē naʻe mamahi ʻa Pita ʻi he fakakaukau atu ki heʻene fakalahi ʻa e mamahi ʻa hono ʻEikí ʻi he ʻaho fakaʻosi ʻo ʻEne moʻui ko ha tangatá. Neongo ʻa e lahi moʻoni ʻo ʻene loto-mamahí, naʻe ʻikai tuku ʻe Pita ke ikuʻi ia ʻe he ʻamanaki-tōnoá. ʻOku tau ʻiloʻi ení koeʻuhi he ʻoku pehē ʻe he fakamatalá naʻe vave ʻa ʻene toe feohi mo hono fanga tokouá. (Luke 24:33) ʻOku ʻikai ha veiveiua naʻe fakameʻapangoʻia ʻa e kau ʻapositoló kotoa ʻi heʻenau tōʻonga ʻi he pō fakamamahi ko iá pea naʻa nau fefakafiemālieʻaki.

ʻI ha founga, ʻoku tau sio heni kia Pita ʻi he taha ʻo ʻene ngaahi fili lelei angé. ʻI he taimi ʻoku tō ai ha sevāniti ʻa e ʻOtuá, ko e meʻa ʻoku mahuʻinga tahá ʻoku ʻikai ko e lahi ʻo ʻene toó ka ko e mālohi ʻo ʻene fakapapau ke toe tuʻu hake, ʻo fakatonutonu ʻa e ngaahi meʻá. (Palovepi 24:16) Naʻe fakahaaʻi ʻe Pita ʻa e tui moʻoni ʻaki ʻene fakatahataha mo hono fanga tokouá neongo ʻa ʻene ongoʻi mafasiá. ʻI he taimi ʻoku mafasia ai ha taha ʻi he mamahí pe ongoʻi fakameʻapangoʻiá, ʻoku fakataueleʻi ai ia ke nofo mavahe ka ʻoku fakatuʻutāmaki. (Palovepi 18:1) Ko e ʻalunga fakapotopotó ke nofo ofi ki he kaungātuí pea toe maʻu ai ʻa e mālohi fakalaumālie.—Hepelu 10:24, 25.

Koeʻuhi naʻá ne feohi mo hono fanga tokoua fakalaumālié, naʻe fanongo ai ʻa Pita ki he fakamatala fakaʻohovale ʻo pehē ʻoku ʻikai ʻi he fonualotó ʻa e sino ʻo Sīsuú. Naʻe lele ʻa Pita mo Sione ki he fonualoto naʻe telio ai ʻa Sīsuú pea ko e matapaá naʻe tāpuni malu. Ko Sione, ngalingali naʻe kei siʻi angé, naʻá ne tomuʻa aʻu ki aí. ʻI he ʻiloʻi ʻoku ava ʻa e matapā ʻo e fonualotó, naʻá ne toumoua. Ka naʻe ʻikai pehē ʻa Pita. Neongo ʻene fakatau mānavá, naʻá ne hū hangatonu ki loto. Naʻe ʻikai ha taha ai!—Sione 20:3-9.

Naʻe tui ʻa Pita kuo toetuʻu ʻa Sīsū? Naʻe ʻikai pehē ʻi he ʻuluaki taimí, neongo ʻa hono fakamatala ange ʻe he kau fefine faitōnungá naʻe hā kia kinautolu ha ongo ʻāngelo ʻo fakahaaʻi kuo toetuʻu ʻa Sīsū mei he pekiá. (Luke 23:55–24:11) Ka ʻi he aʻu ki he fakaʻosinga ʻo e ʻaho ko iá, naʻe mole kotoa atu ʻa e fakaʻilonga ʻo e mamahi mo e veiveiua kotoa pē naʻe ʻi he loto ʻo Pitá. Kuo moʻui ʻa Sīsū he taimi ko ení ko ha laumālie māfimafi! Naʻá ne hā ki he kotoa ʻo ʻene kau ʻapositoló. Neongo ia, naʻá ne ʻuluaki fai ʻa e meʻa kehe, ko ha meʻa fakafoʻituitui. Naʻe pehē ʻe he kau ʻapositoló ʻi he ʻaho ko iá: “Kuo toetuʻu moʻoni ʻa e ʻEiki, pea kuo ha kia Saimone!” (Luke 24:34) ʻI he founga meimei tatau, naʻe tohi ki mui ʻa e ʻapositolo ko Paulá fekauʻaki mo e ʻaho fakaofo ko ia naʻe hoko ai ʻa Sīsū ʻo “ha kia Kifasi, pea hili ia ki he kau Hongofulumaua.” (1 Kolinito 15:5) Ko e Kīfasi mo e Saimoné ʻa e toe ongo hingoa kehe ʻo Pitá. Naʻe hā ʻa Sīsū kiate ia ʻi he ʻaho ko iá—ʻo hā mahino ʻi he taimi naʻe toko taha pē ai ʻa Pitá.

ʻI he Tohi Tapú, ʻoku ʻikai ke ʻi ai ʻa e fakaikiiki ʻo e toe fakataha fakaueʻiloto ko ia ʻa Sīsū mo Pitá. ʻOku lava pē ke tau sioloto atu ki he maongo kia Pita ʻa ʻene sio ki he toe moʻui ʻa hono ʻEiki ʻofeiná pea ke maʻu ha faingamālie ke fakahāhā ai ʻene mamahí mo ʻene fakatomalá. Naʻá ne fiemaʻu ʻa e fakamolemolé ʻo laka ia ʻi ha toe meʻa pē ʻi he māmaní. Ko hai ia ʻe lava ke veiveiua naʻe fakaaʻu mai ia ʻe Sīsū pea ʻi he tuʻunga lahi? Ko e kau Kalisitiane he ʻahó ni ʻoku nau tō ki he angahalá ʻoku fiemaʻu ke nau manatuʻi ʻa e tuʻunga ʻo Pitá. ʻOku ʻikai ʻaupito totonu ke tau fakakaukau heʻikai lava ke aʻu mai kia kitautolu ʻa e fakamolemole ʻa e ʻOtuá. Naʻe tapua haohaoa atu ʻe Sīsū ʻa ʻene Tamaí, ʻa ia ʻoku “lōlahi ʻene fakamolemole.”—Aisea 55:7.

Fakamoʻoni Lahi Ange ʻo e Fakamolemolé

Naʻe tala ʻe Sīsū ki heʻene kau ʻapositoló ke nau ō ki Kāleli, ʻa ia te nau toe feʻiloaki ai mo ia. ʻI heʻenau aʻu ki aí, naʻe fili ai ʻa Pita ke ʻalu ʻo toutai ʻi he Tahi Kālelí. Naʻe ʻalu fakataha mo ia ha niʻihi kehe. Naʻe toe ʻi ai tonu ʻa Pita he anovai ʻa ia naʻá ne fakamoleki ai ʻa e taimi lahi ʻo ʻene moʻui ki muʻá. Ko e ngaiʻi ʻa e vaká, ko e pākakihi ʻa e peaú, ko e ongoʻi ʻo hono puke ʻa e kupenga tuʻo-lalahí kuo pau pē naʻe hā anga-maheni mo fakalata kotoa ia. Naʻá ne fifili he pō ko iá ki he founga tofu pē ʻoku totonu ke fakahanga ki ai ʻa ʻene moʻuí ʻi he ʻosi ko eni ʻa e ngāue fakafaifekau ʻa Sīsū ʻi he māmaní? Naʻe toe fakataueleʻi ia ki he moʻui faingofua ko ia ʻo e hoko ko ha tangata toutaí? Ko e hā pē ʻa e tuʻungá, naʻe ʻikai te nau maʻu ha ika ʻi he pō kotoa ko iá.—Mātiu 26:32; Sione 21:1-3.

Kae kehe, ʻi he mafoa ʻa e atá, naʻe ui mai ha tokotaha mei he matātahí ʻo fakaʻaiʻai ke nau lī honau kupengá ki he tafaʻaki ʻe taha ʻo e vaká. Naʻa nau fai ki ai pea toho mai ha ika lahi ʻe 153! Naʻe ʻiloʻi ʻe Pita ʻa e tokotaha ko iá. Naʻá ne puna mei he vaká ʻo kakau ki ʻuta. ʻI he matātahí, naʻe ʻoange ai ʻe Sīsū ʻenau meʻakai ko e ika naʻe tunu ʻi he malalá. Naʻá ne tokangataha kia Pita.

Naʻe ʻeke ange ʻe Sīsū pe naʻá ne ʻofa ʻi hono ʻEikí “ʻo lahi hake ʻi he ngaahi meʻá ni”—ʻo hā mahino ko ʻene ʻuhingá ki he ika lahi naʻe maʻú. ʻI he loto ʻo Pitá, ʻe feʻauhi ʻa e ʻofa ki he toutaí mo e ʻofa kia Sīsuú? Hangē ko hono fakafisingaʻi tuʻo tolu ʻe Pita ʻa e ʻEikí, naʻe ʻoange heni ʻe Sīsū kiate ia ʻa e faingamālie ke fakapapauʻi tuʻo tolu ʻa ʻene ʻofá ʻi he ʻao ʻo hono ngaahi kaumeʻá. ʻI hono fai ia ʻe Pitá, naʻe tala ange ai ʻe Sīsū ʻa e founga ke fakahāhā ai ʻa e ʻofa ko iá: ʻaki hono fakamuʻomuʻa ʻa e ngāue toputapú ʻi he meʻa kehe kotoa pē, ʻo fafanga mo tauhi ʻa e fanga sipi ʻa Kalaisí, ʻa hono kau muimui faitōnungá.—Sione 21:4-17, NW,

Naʻe fakapapauʻi ai ʻe Sīsū naʻe kei ʻaonga pē ʻa Pita kiate ia pea ki heʻene Tamaí. ʻE fakahoko ʻe Pita ha ngafa mahuʻinga ʻi he fakatahaʻangá ʻi he malumalu ʻo e tataki ʻa Kalaisí. Ko ha fakamoʻoni mālohi moʻoni ē ʻo e fakamolemole kakato ʻa Sīsuú! ʻOku pau naʻe maongo ʻa e meesi ko iá kia Pita, pea naʻá ne tukulotoa.

Naʻe fakahoko faitōnunga ʻe Pita ʻa ʻene ngāué ʻi he ngaahi taʻu lahi. Naʻá ne fakaivimālohiʻi ʻa hono fanga tokouá, hangē ko ia naʻe fekauʻi ʻe Sīsū ʻi he efiafi ʻo ʻEne pekiá. Naʻe ngāue ʻa Pita ʻi he anga-lelei mo e kātaki ʻi heʻene tauhi mo fafanga ʻa e kau muimui ʻo Kalaisí. Naʻe moʻui ai ʻa e tangata ko Saimoné ʻo tatau mo e hingoa naʻe ʻoange ʻe Sīsū kiate iá—ko Pita, pe Maka—ʻaki ʻene hoko ʻo tuʻumaʻu, mālohi, tākiekina alafalalaʻanga ki he lelei ʻi he fakatahaʻangá. Ko e fakamoʻoni lahi ki he meʻa ko iá ʻoku maʻu ia ʻi he ongo tohi anga-ʻofa fakafoʻituitui naʻe fai ʻe Pita ʻa ia naʻe hoko ko e ongo tohi mahuʻinga ʻi he Tohi Tapú. Ko e ongo tohi ko iá ʻoku fakahaaʻi ai foki, naʻe ʻikai ʻaupito ngalo ʻia Pita ʻa e lēsoni naʻá ne ako meia Sīsū fekauʻaki mo e fakamolemolé.—1 Pita 3:8, 9; 4:8.

ʻOfa ke tau ako ʻa e lēsoni ko iá foki. ʻOku tau kole fakaʻaho ʻa e fakamolemole ʻa e ʻOtuá ki heʻetau ngaahi fehālaakí? ʻOku tau tali leva ʻa e fakamolemole ko iá pea tui ki hono mālohi ke fakamaʻa kitautolú? Pea ʻoku tau fakaaʻu atu foki ʻa e fakamolemole ki he faʻahinga takatakai ʻia kitautolú? Kapau ʻoku tau fai pehē, te tau faʻifaʻitaki ai ki he tui ʻa Pitá—mo e meesi ʻa hono ʻEikí.

[Fakamatala ʻi he peesi 22]

Naʻe fai ʻe Pita ʻa e fehālaaki lahi naʻe fiemaʻu ai ke fakamolemoleʻi ia ʻe hono ʻEikí, ka ko hai ʻia kitautolu ʻoku ʻikai te ne fiemaʻu ʻa e fakamolemolé ʻi he ʻaho kotoa pē?

[Fakatātā ʻi he peesi 23]

“Pea tafoki ʻa e ʻEiki ʻo sio fakamamaʻu kia Pita”

[Fakatātā ʻi he peesi 24]

‘Kuo ha ʻa e ʻEikí kia Saimone!’