“ʻOku Ou Tangi kia Sisa!”

ʻOKU hanga ʻe ha fuʻu kakai ʻo puke ha tangata ʻoku ʻikai ʻi ai hano taukapo pea kamata ke haha ia. ʻOku nau fakakaukau ʻokú ne tuha mo e mate. ʻI he hā ngali ko e mate kuo paú, ʻoku ʻasi mai ha kau sōtia ʻo hamusi ʻa e tokotaha maʻukoviá neongo ʻene faingataʻá mei he fuʻu kakai fakamālohí. Ko e tangatá ko e ʻapositolo ko Paulá. Ko hono kau ʻohofí ko e kau Siu ʻa ia ʻoku nau fakafepaki mālohi ki he malanga ʻa Paulá pea tukuakiʻi ia ki hono ʻuliʻi ʻo e temipalé. Ko hono kau fakahaofí ko e kau Loma, naʻe taki ʻe honau ʻeiki taú, ko Kāloti Lisia. ʻI he maveuveú ni ʻoku puke ai ʻa Paula ʻi he tuʻunga ko ha tokotaha ʻoku mahaloʻi ko e faihia.

Ko e vahe ʻe fitu fakamuimui ʻo e tohi ʻa Ngāué ʻoku fakahaaʻi ai ʻa e tuʻunga naʻe kamataʻaki ʻa e puke ko ení. ʻI he maʻu ʻa e mahino ki he ʻātakai fakalao ʻo Paulá, ko e ngaahi tukuakiʻi naʻe fai kiate iá, ko ʻene taukapó, pea mo ha meʻa fekauʻaki mo e founga tautea faka-Lomá ʻokú ne ʻomai ʻa e fakamaama lahi ange ki he ngaahi vahé ni.

ʻI Hono Tauhi Fakalao ʻe Kāloti Lisiá

Ko e ngaahi fatongia ʻo Kāloti Lisiá ʻoku kau ai ʻa hono tauhi ʻo e māú ʻi Selusalema. Ko hono pule māʻolungá, ʻa e kōvana Loma ʻo Siuteá, naʻe nofo ia ʻi Sesalia. Ko e ngāue ʻa Lisia ʻi he keisi ʻa Paulá ʻoku lava ke vakai ki ai ko hano maluʻi ʻo ha tokotaha mei he fakamālohí mo hano tauhi fakalao ʻo ha tokotaha ʻokú ne veuveuki ʻa e melinó. Ko e tali ʻa e kau Siú naʻá ne ueʻi ʻa Lisia ke ne ʻave ʻene tokotaha pōpulá ki he ngaahi nofoʻanga sōtia ʻi he Taua ʻAnitoniá.​—Ngāue 21:27–​22:24.

Naʻe pau ke kumi ʻe Lisia ke ʻilo ʻa e meʻa naʻe fai ʻe Paulá. Lolotonga ʻa e fuʻu maveuveú, naʻe ʻikai te ne ʻilo ha meʻa. Ko ia, ʻi he ʻikai ha toe fakahohaʻa fakamole taimí, naʻá ne tuʻutuʻuni ke ‘eke mo kauimaea [“uipi,” NW] ia; ke ne ilo be koeha oku nau kalaga behe ai kia Paulá.’ (Ngāue 22:​24, PM) Ko e tōʻonga maheni eni ʻoku fai ki hono maʻu ha fakamoʻoni mei he kau faihiá, kau pōpulá mo e niʻihi kehe ʻoku ʻi he tuʻunga māʻulaló. Ko e uipí (flagrum) naʻe ola lelei nai ki he taumuʻa ko iá, ka ko ha meʻangāue fakalilifu ia. Ko e niʻihi ʻo e ngaahi uipi ko ení naʻe kau ai ha ngaahi foʻi pulu mētale naʻe tautau ʻi ha ngaahi sēini. Ko e ngaahi uipi ʻe niʻihi naʻe ʻi ai ʻa e ngaahi lauʻileta naʻe haʻi fakataha mo e ngaahi foʻi hui māsila pea mo e ngaahi kongokonga mētale. Naʻa nau fakatupunga ʻa e ngaahi lavea langa mamahi, ʻi hono hae ke mahaluhalu ʻa e kakanó.

ʻI he tuʻunga ko ení naʻe fakahaaʻi ai ʻe Paula ʻa ʻene tangataʻifonua Lomá. Naʻe ʻikai lava ke uipi ha tokotaha Loma naʻe ʻikai fakahalaiaʻi, ko ia ko hono fakahaaʻi ʻe Paula ʻa ʻene ngaahi totonú naʻe ʻi ai leva hono ʻaonga. Ko hono ngaohikoviʻi pe tauteaʻi ha tangataʻifonua Loma naʻe lava ke mole ai mei ha ʻōfisa Loma ʻa hono lakangá. ʻOku lava ke mahino, talu mei ai ʻo faai mai, naʻe fai kia Paula ʻa e tōʻonga ʻi he tuʻunga ko ha pōpula makehe, ko ha tokotaha ʻa ia naʻe lava ke ne maʻu ha kau ʻaʻahi.​—Ngāue 22:​25-​29; 23:​16, 17.

ʻI he ʻikai fakapapauʻi ʻa e ngaahi tukuakiʻí, naʻe tataki ʻe Lisia ʻa Paula ki he ʻao ʻo e Sanetalimí ke kumi ha fakamatala ki he tuʻunga ʻo e ʻita fakamālohi ʻa e fuʻu kakaí. Ka naʻe tafunaki ai ʻe Paula ha fakakikihi ʻi heʻene lea fekauʻaki mo hono fakamāuʻi ia ʻi he ʻīsiu fekauʻaki mo e toetuʻú. Naʻe lahi fau ʻa e fekīhiakí ʻo manavahē ʻa Lisia naʻa hae fakakongokonga ʻa Paula, pea naʻe toe pau ai kia Lisia ke ne hamusi ia ʻo ʻave mei he fuʻu kau Siu teketekelilí.​—Ngāue 22:30–​23:10.

Naʻe ʻikai loto ʻa Lisia ke kaunga ki ha fakapoongi ʻo ha tokotaha Loma. ʻI heʻene ʻilo ki he faʻufaʻufono ki ha maté, naʻá ne ʻave fakavave ʻa ʻene tokotaha pōpulá ki Sesalia. Ko e ngaahi founga fakalaó naʻe fiemaʻu ai ke ʻoange fakataha mo e kau pōpulá ʻa e ngaahi līpooti ʻo e keisí ki he kau maʻu mafai fakaefakamaau māʻolungá. Ko e ngaahi līpooti ko iá ʻe kau ai ʻa e ola ʻo e ngaahi fakamaau ʻeke ʻi he kamatá, ko e ngaahi ʻuhinga ki he meʻa kuo faí pea mo e fakakaukau ʻa e tokotaha fakatotoló ʻo fekauʻaki mo e keisí. Naʻe līpooti ʻe Lisia ʻo pehē ko Paulá naʻe ‘fakahopo ia ʻi ha koto meʻa pē ʻoku kau ki he lao faka-Siú, ʻo ʻikai ʻi ha meʻa ʻoku tāu ke ne mate ai, pe nofo pilisone,’ pea naʻá ne tuʻutuʻuni ki he kau talatalaakiʻi ʻo Paulá ke ʻave ʻenau ngaahi lāungá ki he fakafofonga fakapuleʻanga ko Filiké.​—Ngāue 23:​29, 30.

ʻIkai Lava ke Fakahoko ʻe Kōvana Filike ha Tautea

Ko e tuʻunga mafai fakaefakamaau fakavahefonuá naʻe makatuʻunga ia ʻi he mālohi mo e mafai ʻo Filiké. Naʻe malava ke ne muimui ki he tōʻonga fakafeituʻú kapau naʻá ne fili ki ai pe muimui ʻi he lao kuo fokotuʻu ki he faihiá​—naʻe malava ke ngāueʻaki ki he faʻahinga māʻolunga ʻo e sōsaietí pea mo e kau ʻōfisa fakapuleʻangá. Naʻe ʻiloa ʻa e lao ko ia ki he faihiá ko e ordo, pe hokohoko. Naʻá ne toe ohi nai mo e tuʻunga mafai fakaefakamaau ko e extra ordinem, ʻa ia naʻe lava ke ngāueʻaki ki hono fai ha tuʻutuʻuni ki ha faʻahinga faihia pē. Ko ha kōvana fakavahefonua naʻe ʻamanekina ke ne ‘fakakaukau ʻo ʻikai ki he meʻa naʻe fai ʻi Lomá, ka ki he meʻa naʻe totonu ke fai ʻi he fakalūkufuá.’ Ko ia ai, naʻe lahi ʻa e meʻa naʻe tuku ke ne fakamāuʻí.

ʻOku ʻikai ke ʻiloʻi ʻa e ngaahi fakaikiiki kotoa fekauʻaki mo e lao faka-Loma motuʻá, ka ʻoku vakai ki he keisi ʻa Paulá “ko ha sīpinga fakamatala ia ʻo fekauʻaki mo e founga tautea fakavahefonua ko e extra ordinem.” Ko e kōvaná, ʻi hono tokoniʻi ʻe he kau faleʻí, naʻa nau fanongo ki he ngaahi talatalaaki naʻe fai ʻe ha faʻahinga tāutaha fakafoʻituitui. Naʻe ui ʻa e fakaʻiloá ke ne fehangahangai mo hono tokotaha talatalaakí, pea naʻe lava ke ne taukapoʻi ia tonu, ka ko e fatongia ʻo e fakamoʻoniʻi ʻo e meʻá ko e meʻa ia ʻa e talatalaakí. ʻOku hilifaki ʻe he fakamāú ha tautea pē naʻá ne sio ʻoku feʻungá. Naʻe lava ke ne fai ha tuʻutuʻuni he taimi pē ko iá pe toloi ʻa e fakamāú ki ha taimi kehe, ʻa ia ʻi he tuʻunga ko ení naʻe pau ke tauhi fakalao ai ʻa e fakaʻiloá. “ʻOku ʻikai ha veiveiua,” ko e lau ia ʻa e mataotao ko Henry Cadbury, “ʻi he mafai taʻefakangatangata peheé naʻe ʻi he tuʻunga ai ʻa e fakafofonga fakapuleʻangá ke tukulolo ki he ‘tākiekina taʻetotonú’ pea ke fai hano totongi fufū​—ke ne fai ha fakatonuhiaʻi, ke fakahalaiaʻi pe ke ne toloi.”

Ko e Taulaʻeiki Lahi ko ʻAnanaiá, kau tangata taʻumotuʻa ʻo e kau Siú mo Tetulo naʻa nau tukuakiʻi fakalao ʻa Paula ʻi he ʻao ʻo Filiké ki heʻene hoko ‘ko ha fakahohaʻa ʻa ia naʻá ne langaʻi ʻa e ngaahi angatuʻu ʻi he lotolotonga ʻo e kau Siú.’ Naʻa nau taukaveʻi ko ha taki angatuʻu ia ʻo e “lotu mavahe ʻa e kau Nasaletí” pea naʻá ne feinga ke maumauʻi ʻa e toputapu ʻo e temipalé.​​—Ngāue 24:​1-6, NW.

Ko e faʻahinga naʻa nau muʻaki ʻohofi ʻa Paulá naʻa nau fakakaukau naʻá ne taki ʻa e Senitaile ko hono hingoá ko Talofima ki he lotoʻā naʻe tuku tauhi maʻá e kau Siú pē.a (Ngāue 21:​28, 29) ʻI he fakalea totonú, ko e tokotaha naʻe taku ʻoku faihalá ko Talofima. Ka ʻo kapau naʻe fakaʻuhingaʻi ʻe he kau Siú ʻa e tōʻonga ʻoku taku naʻe fai ʻe Paulá ko hano tokoniʻi pe poupouʻi ʻa e faihalá, naʻe lava foki ke fakaʻuhingaʻi ia ko ha angahala tautea mate. Pea ʻoku hā ngali naʻe fakangofua fakalao ʻe Loma ʻa e tautea mate ki he faihia ko ení. Ko ia, kapau naʻe puke ʻa Paula ʻe he kau polisi ʻi he temipale faka-Siú ʻo ʻikai ko Lisia, naʻe mei lava ke fakamāuʻi mo tautea ia ʻe he Sanetalimí ʻo ʻikai ha palopalema.

Naʻe fakaʻuhinga ʻa e kau Siú ko e meʻa naʻe akoʻi ʻe Paulá naʻe ʻikai ko e lotu faka-Siú, pe ko e lotu naʻe fakalaó (religio licita). ʻI hono kehé, naʻe totonu ke vakai ki ai ʻoku taʻefakalao, naʻa mo e fakatupu-maveuveu.

Naʻa nau toe taukaveʻi naʻe hanga ʻe Paula ʻo “langaʻi hake ʻa e ngaahi angatuʻu ʻi he lotolotonga ʻo e kau Siu kotoa ʻi he māmaní.” (Ngāue 24:​5, NW) Naʻe toki ʻosi pē ia hono talatalaakiʻi ʻe ʻEmipola Kāloti ʻa e kau Siu Kalisí ki hono “langaʻi ha mala fakalūkufua ʻi he kotoa ʻo e māmaní.” ʻOku tekeutua ʻa ʻene ʻi he tuʻunga meimei tataú. “Ko e tukuakiʻí ko e meʻa tofu pē ia ke ʻomai ʻo fakafepakiʻi ʻaki ha Siu ʻi he lolotonga ʻo e Pule ʻa Kālotí pe ko e muʻaki ngaahi taʻu ʻo Neló,” ko e lau ia ʻa e faihisitōlia ko A. N. Sherwin-White. “Naʻe feinga ʻa e kau Siú ke fakalotoʻi ʻa e kōvaná ke ne fakamatalaʻi ʻa e malanga ʻa Paulá ʻoku tatau ia mo hono fakatupunga ha ngaahi fakahohaʻa fakalotofonua ʻi he kotoa ʻo e kau Siu ʻi he ʻEmipaeá. Naʻa nau ʻiloʻi naʻe ʻikai ke loto-lelei ʻa e kau kōvaná ke fai ha fakahalaia ʻi he ngaahi tukuakiʻi fakalotú ʻataʻatā pē pea ko ia ai naʻa nau feinga ke fai ha mioʻi fakapolitikale ki he tukuakiʻi fakalotú.”

Naʻe taukapoʻi hokohoko ʻe Paula ia tonu ʻi he poini ki he poini. ‘Kuo ʻikai te u fakatupunga ha fakamoveuveu. Ko e moʻoni, ʻoku ou kau ki he meʻa ʻoku nau ui ko ha “lotu mavahe,” ka ko e meʻá ni ʻoku kau ki ai ʻa hono tauhi ʻo e ngaahi tuʻutuʻuni faka-Siú. Ko e kau Siu ʻĒsia ʻe niʻihi naʻa nau fakatupunga ʻa e fakamoveuveú. Kapau ʻoku ʻi ai haʻanau lāunga, ʻoku totonu ke nau ʻi heni ke fai ia.’ Naʻe fakamāʻopoʻopo tefito ʻe Paula ʻa e ngaahi tukuakiʻí ko ha fakakikihi fakalotu ʻi he lotolotonga ʻo e kau Siú, ʻa ia naʻe siʻi ʻa e mafai ki ai ʻa Lomá. ʻI he tokanga ki hano fakaʻitaʻi ʻa e kau Siu ne nau ʻosi talitekeʻi fefeka ʻa e tuʻutuʻuní, naʻe toloi kotoa ia ʻe Filike, ʻo fakamālohiʻi ai ʻa e meimei tuʻunga fakaefakamaau kotoa ke taʻofi. Naʻe ʻikai ke tukuange ai ʻa Paula ki he kau Siú, ʻa ia naʻa nau taukaveʻi ʻa e taau fakalaó, pea naʻe ʻikai ke fakamāuʻi ia ʻi he lao faka-Lomá pea naʻe ʻikai foki ke tukuange ia. Naʻe ʻikai lava ke ueʻi ʻa Filike ke ne fai ha tuʻutuʻuni fakaefakamaau, pea ʻi he tānaki atu ki heʻene loto ke fakalai ki he kau Siú, naʻe ʻi ai ʻene toe taumuʻa ʻe taha ki hono toloiʻí​—naʻá ne ʻamanaki ʻe totongi fufū ia ʻe Paula.​​—Ngāue 24:​10-​19, 26.b

Ko e Tuʻunga Mahuʻinga ʻi he Malumalu ʻo Posio Fesitó

ʻI he taʻu ʻe ua ki mui aí ʻi Selusalema, naʻe toe fakafoʻou ʻe he kau Siú ʻenau ngaahi tukuakiʻí ʻi he aʻu ki ai ʻa Posio Fesito, ko e kōvana foʻoú, ʻo kole ke ʻoange ʻa Paula ki honau mafai fakaefakamāú. Ka naʻe tali fefeka ʻe Fesito: “ʻOku ikai ko e anga ʻo e kakai Loma ke tukuange ha tangata ke tautea, neongo pe ko hai, kaeʻoua muʻa ke tuʻu fehangahangai ʻa ia ʻoku fakahopo pea mo hono kau tukuaki, pea ke ʻoua foki ke ai hano ava ke fakamatala ki he meʻa kuo lau kiate ia.” ʻOku pehē ʻe he faihisitōlia ko Harry W. Tajra: “Naʻe ʻiloʻi fakapapau ʻe Fesito naʻe ʻi ai ha faʻufaʻu ki hano tāmateʻi fakatokolahi ʻo ha tangataʻifonua Loma.” Ko ia, naʻe tala ki he kau Siú ke fakahoko ʻenau keisí ʻi Sesalia.​—Ngāue 25:​1-6, 16.

Naʻe fakahaaʻi mālohi ai ʻe he kau Siú ko Paulá “ʻoku ʻikai totonu ke ne moʻui,” neongo ia naʻe ʻikai te nau ʻomai ha fakamoʻoni, pea naʻe mahino kia Fesito naʻe ʻikai ke fai ʻe Paula ha meʻa ke tuha ai mo e maté. “Ko e meʻa kuo haʻu mo kinautolu kiate ia, ko e koto meʻa pe ʻoku kau ki heʻenau toʻonga fakalotu fakaekinautolu, ʻo kau ki ha toko taha, ko Sisū tokua, ʻa ia kuo pekia, kae taukave pe ʻe Paula kuo ne moʻui,” ko e fakamatala ia ʻa Fesito ki ha ʻōfisa ʻe taha.​—Ngāue 25:​7, 18, 19, 24, 25.

Naʻe mahino ʻa e tonuhia ʻa Paula ʻo fekauʻaki mo ha tukuakiʻi fakapolitikale pē, ka ʻi he fakakikihi fakalotú, ʻoku ngalingali naʻe fakakikihi ʻa e kau Siú ko hoʻonautolu fakamaauʻangá pē naʻe taau ke fakamāuʻi aí. ʻE ʻalu nai ʻa Paula ki Selusalema ki hano fakamāuʻi ʻo e ngaahi meʻá ni? Naʻe kole ʻa Fesito kia Paula pe te ne fai ia, ka ko e moʻoni ko ha fokotuʻu ʻikai feʻungamālie ia. Ko hano toe fekauʻi ki Selusalema ʻa ia ʻe hoko ai ʻa e kau talatalaakí ko e kau fakamāú naʻe ʻuhinga iá ʻe pau ke tuku atu ʻa Paula ki he kau Siú. “ʻOku ou tuʻu ʻi he ʻao ʻo e nofoʻanga fakaefakamaau ʻo Sisá, ʻa ia ʻoku totonu ke fakamāuʻi ai au,” ko e lea ia ʻa Paulá. “Kuo ʻikai te u fai ha hala ki he kau Siú . . . ʻOku ʻikai ha tangata ʻe lava ke ne ʻave au kiate kinautolu ko haʻane ngāue lelei. ʻOku ou tangi kia Sisa!”​​—Ngāue 25:​10, 11, 20, NW.

Ko e leaʻaki ʻe ha tokotaha Loma ʻa e ngaahi leá ni naʻá ne taʻofi fakataimi ai ʻa e tuʻunga mafai fakaefakamaau fakavahefonua kotoa pē. Ko ʻene totonu ki he tangí (provocatio) naʻe “moʻoni, mahino pea ʻaonga.” Ko ia, ʻi he hili ʻa e alea ki he fakaikiikí mo hono kau faleʻí, naʻe talaki ʻe Fesito: “Kuó ke tangi kia Sisa; te ke ʻalu kia Sisa.”​​—Ngāue 25:​12, NW.

Naʻe fiefia ʻa Fesito ke ʻatā meia Paula. Hangē ko ia naʻá ne fakahaaʻi ange kia Hēlota ʻAkilipa II ʻi ha ngaahi ʻaho siʻi ki mui ai, naʻe fakapuputuʻuʻi ia ʻe he keisí. Naʻe pau leva ke faʻu ʻe Fesito ha fakamatala ʻo e keisí ki he ʻemipolá, ka kia Fesito, naʻe kau ki he ngaahi tukuakiʻí ʻa e ngaahi meʻa fihi ʻikai ala mahino ʻo e lao faka-Siú. Kae kehe, ko ʻAkilipá ko ha mataotao ia ʻi he ngaahi meʻa peheé, ko ia ʻi heʻene fakahaaʻi ha mahuʻingaʻiá, naʻe kole leva ia ke ne tokoni ki hono faʻu ʻo e tohí. ʻI he ʻikai lava ke mahino ʻa e lea ʻa Paula ki mui ʻi he ʻao ʻo ʻAkilipá, naʻe kalanga ʻa Fesito: “ʻOkú ke fakasesele, ʻe Paula! Kuo hanga ʻe he ako lahí ʻo ʻai koe ke ke sesele!” Ka naʻe mahinoʻi lelei ia ʻe ʻAkilipa. “ʻI ha taimi nounou te ke fakalotoʻi au ke u hoko ko ha Kalisitiane,” ko ʻene leá ia. Pe ko e hā naʻá na ongoʻi fekauʻaki mo e ngaahi fakakikihi ʻa Paulá, naʻe felotoi ʻa Fesito mo ʻAkilipa naʻe tonuhia ʻa Paula pea naʻe mei lava ke tukuange kapau naʻe ʻikai te ne tangi kia Sisa.​​—Ngāue 25:​13-​27; 26:​24-​32, NW.

Ko e Ngataʻanga ʻo ha Fononga Fakaefakamaau

ʻI heʻene tūʻuta ʻi Lomá, naʻe fekau ʻe Paula ke haʻu ʻa e kau tangata tuʻu-ki-muʻa ʻo e kau Siú ʻo ʻikai koeʻuhi pē ke malanga kiate kinautolu kae pehē foki ke ne ʻiloʻi ʻa e meʻa naʻa nau ʻilo ʻo fekauʻaki mo iá. ʻE fakahaaʻi nai ʻi he meʻa ko iá ha meʻa fekauʻaki mo e ngaahi taumuʻa ʻa hono kau talatalaakí. Naʻe ʻikai ko ha meʻa foʻou ia ʻa e kumi tokoni ʻa e kau maʻu mafai ʻi Selusalemá ki he kau Siu Lomá ʻi he talatalaaki ʻo ha keisi, ka naʻe fanongo ʻa Paula naʻe ʻikai haʻanau ngaahi akonaki ʻo fekauʻaki mo ia. Lolotonga ʻa e tatali ki he hopó, naʻe fakaʻatā ʻa Paula ke ne haea ha fale pea ke ne malanga tauʻatāina. Ko e fakafaingofuaʻi peheé naʻe ʻuhinga nai ai ʻi he fakakaukau faka-Lomá, ko ha tangata tonuhia ʻa Paula.​​—Ngāue 28:​17-​31.

Naʻe nofo ʻa Paula ʻi hono tauhi fakalaó feʻunga mo e toe taʻu ʻe ua. Ko e hā hono ʻuhingá? ʻOku ʻikai ke ʻomai ʻe he Tohitapú ha ngaahi fakaikiiki. Naʻe fai anga-maheni hano tauhi ha tokotaha naʻe tangi kae ʻoua kuo hā ʻa hono kau talatalaakí ʻo fai ha ngaahi tukuakiʻi, kae mahalo ko e kau Siu ʻi Selusalemá, ʻi hono ʻiloʻi ʻa e tuʻunga vaivai ʻo ʻenau keisí, naʻe ʻikai ʻaupito te nau toe aʻu ange. Mahalo ko e founga ola lelei taha ʻo hono tauhi ʻa Paula ke fakalongolongo ʻi he tuʻunga lōloa taha ʻe ala lavá ko e ʻikai te nau toe ʻasi ki ai. Ko e hā pē ʻa e tuʻungá, ʻoku hā ngali naʻe tuʻu ʻa Paula ʻi he ʻao ʻo Neló, naʻe fakahaaʻi ai ʻokú ne tonuhia, pea naʻe iku ʻo fakatauʻatāinaʻi ia ke toe hoko atu ʻene ngaahi ngāue fakamisinalé​—ʻi he taʻu ʻe nima nai hili hono puké.​​—Ngāue 27:24.

Ko e kau fakafepakiʻi ʻo e moʻoní kuo fuoloa ʻenau ‘faʻu ha maumau ʻaki ʻa e laó’ ke taʻofi ʻa e ngāue fakamalanga faka-Kalisitiané. ʻOku ʻikai totonu ke tau ʻohovale ʻi he meʻá ni. Naʻe pehē ʻe Sīsū: “Kapau kuo nau fakatangaʻi au, te nau fakatangaʻi ʻa kimoutolu foki.” (Sāme 94:​20, King James Version; Sione 15:20) Neongo ia, ʻoku toe fakapapauʻi mai ʻe Sīsū ha tauʻatāina kiate kitautolu ke tala ai ki he māmaní kotoa ʻa e ongoongo leleí. (Mātiu 24:14) Ko ia ai, hangē ko ia ko hono talitekeʻi ʻe he ʻapositolo ko Paulá ʻa e fakatangá mo e fakafepakí, ko e Kau Fakamoʻoni ʻa Sihova ʻi he ʻaho ní ʻoku nau ‘taukapoʻi mo fokotuʻu fakalao ʻa e ongoongo leleí.’​​—Filipai 1:​7, NW.

[Fakamatala ʻi lalo]