“Kuo Pau Ke Mau Talangofua ki he ʻOtuá ko e Pulé Ia”

1-3. (a) Ko e hā ne ʻomi ai ʻa e kau ʻapositoló ki he ʻao ʻo e Sanetalimí, pea ko e hā ʻa e ʻīsiu tefito ne nau fehangahangai mo iá? (e) Ko e hā ʻoku tau mātuʻaki mahuʻingaʻia ai ʻi he tuʻu loto-toʻa ʻa e kau ʻapositoló?

ʻOKU ʻalu ke fakalalahi ange ʻa e ʻita tōlili ʻa e kau fakamaau ʻo e Sanetalimí! ʻOku hopoʻi ʻa e kau ʻapositolo ʻa Sīsuú ʻi he ʻao ʻo e fakamaauʻanga māʻolunga ko ʻení. Ko e hā hono ʻuhingá? Ko Siosifa Kaiafasi, ko e taulaʻeiki lahi mo e palesiteni ia ʻo e Sanetalimí, ʻokú ne lea anga-fefeka ange kiate kinautolu: “Naʻa mau mātuʻaki tuʻutuʻuni atu ke ʻoua te mou toe faiako ʻi he hingoa ko ení.” ʻOku aʻu ē ki he ʻikai lava ʻe he palesiteni ʻitá ni ke ne teitei puʻaki ʻa e hingoa ʻo Sīsuú. Pea naʻe hoko atu ʻa Kaiafasí, “kuo mou fakafonu ʻa Selusalema ʻaki hoʻomou akonakí, pea ʻoku mou tukupā ke hilifaki kiate kimautolu ʻa e toto ʻo e tangatá ni.” (Ngā. 5:28) ʻOku māʻalaʻala ʻa e fekaú: Tuku ʻa e malangá​—he ka ʻikai ʻe tauteaʻi kimoutolu!

² ʻE anga-fēfē ha tali ki ai ʻa e kau ʻapositoló? Ko e fekau ne ʻoange kiate kinautolu ke nau malangá ko e ʻomi ia meia Sīsū, ʻa ia ko hono mafaí naʻe foaki fakaʻotua ange. (Māt. 28:18-20) ʻE tukulolo nai ʻa e kau ʻapositoló ki he manavahē tangatá pea nau longo pē? Pe te nau maʻu nai ʻa e loto-toʻa ke nau tuʻu mālohi pea hokohoko atu ʻa e malangá? Ko hono moʻoní, ko e ʻīsiu tefito ne nau fehangahangai mo iá ʻa eni: Te nau talangofua nai ki he ʻOtuá pe ko e tangatá? ʻI he ʻikai ke toe toumouá, ʻoku lea hake ʻa e ʻapositolo ko Pitá maʻá e kotoa ʻo e kau ʻapositoló. Ko ʻene ngaahi leá ʻoku taʻetoealafehuʻia mo loto-toʻa.

³ ʻI he tuʻunga ko e kau Kalisitiane moʻoní, ʻoku tau mātuʻaki mahuʻingaʻia ʻi he anga ʻo e tali ʻa e kau ʻapositoló ki he ngaahi fakamanamana ʻa e Sanetalimí. Ko e fekau ko ia ke malangá ʻoku toe kau ki ai mo kitautolu foki. ʻI hono fakahoko ʻa e ngāue ko ʻeni kuo vaheʻi mai mei he ʻOtuá, te tau fehangahangai nai mo kitautolu mo e fakafepakí. (Māt. 10:22) ʻE feinga nai ʻa e kau fakafepakí ke nau taʻofi pe tapui ʻetau ngāué. Ko e hā te tau faí? ʻE lava ke tau maʻu ʻaonga mei he fakakaukau atu ki he tuʻu loto-toʻa naʻe fai ʻe he kau ʻapositoló pea mo e ngaahi tuʻunga naʻe taki atu ʻo aʻu ki honau hopoʻi ʻi he ʻao ʻo e Sanetalimí.a

4, 5. Ko e hā naʻe hoko ai ʻa Kaiafasi mo e kau Sātusí ʻo “fonu ʻi he meheká”?

⁴ Manatuʻi ko e fuofua taimi ko ia naʻe fekauʻi ai ke tuku ʻena malangá, naʻe tali ange ʻe Pita mo Sione: “ʻE ʻikai lava ke tuku ʻema lea ʻo fekauʻaki mo e ngaahi meʻa kuó ma mamata mo fanongo ki aí.” (Ngā. 4:20) ʻI he hili ʻa e fehangahangai ko ia mo e Sanetalimí, ko Pita mo Sione, fakataha mo e toenga ʻo e kau ʻapositoló, naʻe hokohoko atu ʻenau malangá ʻi he temipalé. Naʻe fakahoko ʻe he kau ʻapositoló ʻa e ngaahi mana lalahi, ʻo hangē ko hono fakamoʻui ʻa e kau mahamahakí pea mo hono kapusi ʻa e fanga tēmenioó. Naʻa nau fai ia ʻi he “Hala Fakafale ʻo Solomoné,” ko ha foʻi hala ia naʻe ʻato ʻa ia naʻe ʻi he tafaʻaki fakahahake ʻo e temipalé, ʻa ia naʻe faʻa fakatahataha ki ai ʻa e kau Siu tokolahi. ʻIo, ʻoku hā mai naʻe aʻu ē ki he ʻata ʻo Pitá ne malava ke ne fai ha ngaahi faifakamoʻui! Ko e tokolahi ʻa ia naʻe fakamoʻui fakaesinó naʻa nau tali ʻa e ngaahi lea ʻo e fakamoʻui fakalaumālié. Ko hono olá, “naʻe tupulekina ai pē ʻa e kau tui ki he ʻEikí, ko ha fuʻu tokolahi ʻo e kakai tangata mo e kakai fefine.”​—Ngā. 5:12-15.

⁵ Ko Kaiafasi mo e kau Sātusí, ʻa e kulupu lotu mavahe ʻa ia naʻá ne kau ki aí, naʻa nau hoko ʻo “fonu ʻi he meheká” pea nau ʻai ke lī ʻa e kau ʻapositoló ki pilīsone. (Ngā. 5:17, 18) Ko e hā naʻe tōtōlili ai ʻa e kau Sātusí? Naʻe faiako ʻa e kau ʻapositoló ʻo pehē naʻe toetuʻu ʻa Sīsū, ka naʻe ʻikai ke tui ʻa e kau Sātusí ia ki he toetuʻú. Naʻe pehē ʻe he kau ʻapositoló ko e tui pē kia Sīsuú ʻe lava ke hoko ai ha taha ʻo fakahaofí, ka naʻe manavasiʻi ʻa e kau Sātusí naʻa fai ʻe Loma ha sāuni ʻo kapau ʻe vakai ʻa e kakaí kia Sīsū ko honau Takí ia. (Sione 11:48) Tāneʻineʻi ke fakapapauʻi ʻe he kau Sātusí ke nau fakasīlongoʻi ʻa e kau ʻapositoló!

 6. Ko hai ʻi he ʻahó ni ʻa e kau fakalanga tefito ʻo hono fakatangaʻi ʻa e kau sevāniti ʻa Sihová, pea ko e hā ʻoku totonu ai ke ʻoua te tau ʻohovale ʻi he meʻá ni?

⁶ ʻOku pehē pē ʻi he ʻahó ni, ko e kau fakalanga tefito ko ia ʻo hono fakatangaʻi ʻa e kau sevāniti ʻa Sihová ko e kau fakafepaki fakalotu. Ko e faʻahinga peheé ʻoku nau faʻa feinga ke ngāueʻaki ʻa e tākiekina ko ia kuo nau fai ki he kau maʻu mafai fakapuleʻangá pea mo e mītiá ke nau fakasīlongoʻi ʻetau malangá. ʻOku totonu nai ke tau ʻohovale ai? ʻIkai. ʻOku fakaeʻa ʻe heʻetau pōpoakí ʻa e lotu loí. ʻI hono tali ʻa e ngaahi moʻoni ʻi he Tohi Tapú, ʻoku fakatauʻatāinaʻi ai ʻa e kakai loto-totonú mei he ngaahi tui mo e ngaahi tōʻonga taʻefakatohitapú. (Sione 8:32) Ko e hā leva ka fai ai ha ofo ʻi hono faʻa fakatupunga ʻe heʻetau pōpoakí ʻa e kau taki lotú ke nau hoko ʻo fonu ʻi he meheka tāufehiʻá?

7, 8. Ko e hā ʻa e ola ʻoku ʻikai ha veiveiua naʻe hoko ki he kau ʻapositoló ko e meʻa ʻi he fekau ʻa e ʻāngeló, pea ʻoku lelei ke tau ʻeke hifo kiate kitautolu ʻa e fehuʻi ko e hā?

⁷ ʻI he tangutu ʻo talitali ʻi pilīsone ki he hopó, kuo pau pē naʻe fifili ʻa e kau ʻapositoló pe ʻe hoko nai ʻo fakamamahiʻi fakamāʻata kinautolu ʻi he nima ʻo honau ngaahi filí. (Māt. 24:9) Ka ʻi he lolotonga ʻa e pō ko iá, naʻe hoko ai ha meʻa mātuʻaki taʻeʻamanekina​—“naʻe fakaava ʻe he ʻāngelo ʻa Sihová ʻa e ngaahi matapā ʻo e pilīsoné.”b (Ngā. 5:19) Naʻe ʻoange leva ʻe he ʻāngeló kiate kinautolu ha fakahinohino pau: “Mou . . . tuʻu ʻi he temipalé, pea hanganaki lea.” (Ngā. 5:20) Ko e fekau ko iá ʻoku ʻikai ha veiveiua naʻá ne fakapapauʻi ai ki he kau ʻapositoló naʻa nau fai pē ʻa e meʻa totonú. ʻOku pau pē naʻe toe fakaivimālohiʻi foki kinautolu ʻe he ngaahi lea ʻa e ʻāngeló ke nau hanganaki tuʻu maʻu ʻo tatau ai pē pe ko e hā ʻe hokó. ʻI he tui mālohi mo e loto-toʻa, ko e kau ʻapositoló “naʻa nau hū ki he temipalé ʻi he maʻa hake ʻa e ʻahó ʻo kamata ke faiako.”​—Ngā. 5:21.

⁸ ʻOku lelei kiate kitautolu taki taha ke tau ʻeke hifo, ‘Te u maʻu nai ʻa e tui mo e loto-toʻa ʻoku fiemaʻú ke kei hokohoko atu ʻa e malangá ʻi he malumalu ʻo e ngaahi tuʻunga meimei tatau?’ ʻE lava ke tau maʻu ʻa e mālohi mei hono ʻiloʻi ko e ngāue mātuʻaki mahuʻinga ʻo e “fakamoʻoni fakaʻāuliliki fekauʻaki mo e Puleʻanga ʻo e ʻOtuá” ʻokú ne maʻu ʻa e poupou mo e tataki fakaeʻāngeló.​—Ngā. 28:23; Fkh. 14:6, 7.

9-11. Naʻe anga-fēfē ʻa e tali ʻa e kau ʻapositoló ki hono kounaʻi ʻe he Sanetalimí ke tuku ʻenau malangá, pea naʻe anga-fēfē hono fokotuʻu ʻe he meʻá ni ha faʻifaʻitakiʻanga ki he kau Kalisitiane moʻoní?

⁹ Ko Kaiafasi mo e kau fakamaau kehe ʻo e Sanetalimí naʻa nau mateuteu atu eni ke fehangahangai mo e kau ʻapositoló. ʻI he ʻikai ke nau ʻiloʻi ʻa e meʻa naʻe hoko ʻi he pilīsoné, naʻe fekauʻi atu ʻe he fakamaauʻangá ha kau ʻōfisa ke nau ō ʻo ʻomi ʻa e kau pōpulá. Sioloto atu ki he ʻohovale ʻa e kau ʻōfisá ʻi heʻenau aʻu atu ʻo ʻiloʻi kuo puli ʻa e kau pōpulá, neongo ko e pilīsoné naʻe lokaʻi mo malu ʻaupito pea “naʻe tuʻu pē ʻa e kau kaʻaté ʻi he ngaahi matapaá.” (Ngā. 5:23) Naʻe ʻikai fuoloa kuo ʻiloʻi ʻe he kapiteni ʻo e temipalé ko e kau ʻapositoló ē kuo nau toe ʻi he temipalé, ʻo faifakamoʻoni fekauʻaki mo Sīsū Kalaisi​—ʻa e ngāue tonu ko ia naʻe ʻuhinga ai hono lī kinautolu ki pilīsoné! Naʻe fakavave atu ʻa e kapitení mo ʻene kau ʻōfisá ki he temipalé ke tānaki mai ʻa e kau pōpulá ʻo taki kinautolu ki he Sanetalimí.

¹⁰ Hangē ko ia naʻe fakamatala ki ai ʻi he kamataʻanga ʻo e vahé ni, naʻe fakamahino ʻe he kau taki lotu teketekelilí naʻe fiemaʻu ki he kau ʻapositoló ke tuku ʻenau malangá. Naʻe anga-fēfē ʻa e tali ki ai ʻa e kau ʻapositoló? ʻI he hoko ko ha tangata lea maʻanautolú, naʻe tali loto-toʻa ange ʻa Pita: “Kuo pau ke mau talangofua ki he ʻOtuá ko e pulé ia kae ʻikai ki he tangatá.” (Ngā. 5:29) Naʻe fokotuʻu ai ʻe he kau ʻapositoló ha faʻifaʻitakiʻanga maʻá e kau Kalisitiane moʻoni ʻi he kotoa ʻo e ngaahi kuongá. ʻOku mole mei he kau pule fakaetangatá ʻa ʻenau totonu ko ia ke fai ange ʻa e talangofuá kiate kinautolú, ʻi he ngaahi tuʻunga ʻa ia ʻoku nau tapui ai ʻa e meʻa ʻoku fiemaʻu ʻe he ʻOtuá pe fiemaʻu ʻa e meʻa ʻoku tapui ʻe he ʻOtuá. Ko ia ʻi hotau ʻahó ni, kapau ʻoku tapui ʻe he “ngaahi mafai māʻolungá” ʻa ʻetau ngāue faifakamoʻoní, ʻe ʻikai lava ke tau tuku ʻa hono fakahoko ʻa e ngāue ko ia kuo vaheʻi mai ʻe he ʻOtuá kiate kitautolu ke tau malangaʻi ʻa e ongoongo leleí. (Loma 13:1) ʻI hono kehé, te tau kumi kitautolu ki ha ngaahi founga fakapotopoto ke kei hokohoko atu ai ʻetau faifakamoʻoni fakaʻāuliliki ʻo fekauʻaki mo e Puleʻanga ʻo e ʻOtuá.

¹¹ ʻOku ʻikai ha ofo ai, ʻi hono langaʻi ko ia ʻe he tali loto-toʻa ʻa e kau ʻapositoló ʻa e kau fakamaau ongoʻi feifeitamakí ke nau hoko ʻo ʻita anga-fakamālohí. Naʻa nau fakapapauʻi ai “ke tāmateʻi” ʻa e kau ʻapositoló. (Ngā. 5:33) ʻI he taimi ko ʻení, naʻe hā ngali pau ai ʻe mate fakamāʻata ʻa e kau fakamoʻoni loto-toʻa mo faivelenga ko iá. Ka neongo ia, naʻe teu ke hoko mai ha tokoni ʻi ha founga mātuʻaki anga-kehe atu!

12, 13. (a) Ko e hā ʻa e faleʻi naʻe fai ʻe Kāmelieli ki hono ngaahi kaungāfakamāú, pea ko e hā naʻa nau faí? (e) ʻE anga-fēfē ha tuʻu-ʻi-vahaʻa nai ʻa Sihova maʻa hono kakaí he ʻahó ni, pea ko e hā ʻe lava ke tau fakapapauʻí ʻo kapau ʻoku fakaʻatā kitautolu ke tau “faingataʻaʻia koeʻuhiā ko e māʻoniʻoní”?

¹² Ko Kāmelieli, “ko ha faiako Lao ia naʻe tokaʻi ʻe he kakaí kotoa,” naʻá ne lea hake.c Ko e mataotao lao ko ʻení ʻoku pau pē naʻe fakaʻapaʻapaʻi lahi ia ʻe hono ngaahi kaungāfakamāú, he ko ia naʻe faituʻutuʻuní, ʻo aʻu ki heʻene “fai ʻa e tuʻutuʻuni ke kiʻi tuku atu ki tuʻa ʻa e kau [ʻapositoló].” (Ngā. 5:34) ʻI he lave ki he ngaahi fakatātā he kuohilí ʻo e ngaahi angatuʻu ʻa ia naʻe vave ʻene hōloá ʻi he hili ʻa e mate ʻa honau kau takí, naʻe fakaʻaiʻai ai ʻe Kāmelieli ʻa e fakamaauʻangá ke nau faʻa-kātaki mo tukunoaʻi muʻa ʻa e kau ʻapositoló, ʻa ia ko honau Takí, ʻa Sīsū, naʻe toki maté ni atu pē. Naʻe fakatupu fakalotoʻi ʻa e fakaʻuhinga ʻa Kāmelielí: “ʻOua te mou kaunoa ʻi he kau tangatá ni, kae tukunoaʻi kinautolu. He kapau ko e faʻufaʻú ni pe ko e ngāué ni ʻoku mei he tangatá, ʻe liua ia; ka ʻo kapau ʻoku mei he ʻOtuá ia, heʻikai malava ke mou liua kinautolu. Naʻa ʻiloangé te mou hoko ai ko e kau faitau ʻo fakafepaki ki he ʻOtuá.” (Ngā. 5:38, 39) Naʻe muimui ʻa e kau fakamāú ki heʻene faleʻí. Neongo ia, naʻa nau haha ʻa e kau ʻapositoló ʻo fekauʻi kinautolu “ke tuku ʻenau lea ʻi he huafa ʻo Sīsuú.”​—Ngā. 5:40.

¹³ ʻI he taimí ni, ʻo hangē pē ko e taimi ko ē, ʻe ʻohake nai ʻe Sihova ha kau tangata tuʻu-ki-muʻa hangē ko Kāmelielí ke nau tuʻu-ʻi-vahaʻa maʻa Hono kakaí. (Pal. 21:1) ʻE lava ke ngāueʻaki ʻe Sihova ʻa hono laumālié ke ueʻi ʻa e kau pule, kau fakamaau, pe kau faʻu lao ʻoku nau maʻu ha mafai lahí ke nau ngāue ʻo fehoanaki mo hono finangaló. (Nehe. 2:4-8) Ka ʻo kapau te ne fakaʻatā kitautolu ke tau “faingataʻaʻia koeʻuhiā ko e māʻoniʻoní,” ʻe lava ke tau fakapapauʻi ʻa e meʻa ʻe ua. (1 Pita 3:14) ʻUluakí, ʻe lava ke foaki mai ʻe he ʻOtuá ʻa e mālohi ke tau kātakiʻi ʻaki. (1 Kol. 10:13) Ko hono uá, ko e kau fakafepakí ‘heʻikai malava ke nau liua’ ʻa e ngāue ʻa e ʻOtuá.​—ʻAi. 54:17.

14, 15. (a) Naʻe anga-fēfē ʻa e tali ʻa e kau ʻapositoló ki hono haha kinautolú, pea ko e hā hono ʻuhingá? (e) Fakamatala angé ki ha meʻa naʻe hokosia ʻoku fakahaaʻi ai ko e kakai ʻa Sihová ʻoku nau kātaki fakataha mo e fiefia.

¹⁴ Naʻe hanga ʻe he hahá ʻo ʻai ke hōloa ʻa e laumālie naʻe maʻu ʻe he kau ʻapositoló pe fakavaivaiʻi ʻenau loto-fakapapaú? ʻIkai ʻaupito! “Naʻa nau ʻalu atu mei he ʻao ʻo e Sanetalimí ʻoku nau fiefia.” (Ngā. 5:41) “Fiefia”​—ko e hā hono ʻuhingá? Ko hono moʻoní, naʻe ʻikai koeʻuhí ko e mamahi fakaesino naʻe fakatupunga ʻe he hahá. Naʻa nau fiefiá koeʻuhí naʻa nau ʻiloʻi naʻe fakatangaʻi kinautolú ko ʻenau tauhi maʻu ko ia ʻenau anga-tonu kia Sihová pea mo ʻenau molomolo muivaʻe ʻi honau Faʻifaʻitakiʻangá, ʻa Sīsū.​—Māt. 5:11, 12.

¹⁵ ʻI he hangē ko hotau fanga tokoua ʻi he ʻuluaki senitulí, ʻoku tau kātaki fakataha mo e fiefia ʻi he taimi ʻoku tau faingataʻaʻia ai koeʻuhiā ko e ongoongo leleí. (1 Pita 4:12-14) Ko hono moʻoní, ʻoku ʻikai te tau fiefia kitautolu ʻi hono maʻukovia kitautolu ʻe he ngaahi fakamanamaná, fakatangá, pe tuku pilīsoné. Ka ʻoku tau maʻu ʻa e fiemālie loloto ʻi hono tauhi maʻu ʻetau anga-tonú. Ko e fakatātaá, fakakaukau angé kia Henryk Dornik, ʻa ia naʻá ne kātakiʻi he laui taʻu ʻa e ngaohikovia anga-kakaha ʻi he malumalu ʻo e ngaahi founga-pule fakaaoaó. ʻOkú ne manatu ai ki ʻAokosi ʻo e 1944, naʻe tuʻutuʻuni ai ʻa e kau maʻu mafaí ke ʻave ia mo hono tokouá ki ha kemi fakamamahi. Naʻe pehē ʻe he kau fakafepakí: “ʻOku ʻikai pē ke malava ia ke fakalotoʻi kinaua ke na fai ha meʻa. Ko ʻena mamahi fakamāʻatá ʻokú ne ʻomai kiate kinaua ʻa e fiefia.” ʻOku fakamatala ʻa tokoua Dornik: “Neongo naʻe ʻikai haʻaku fie hoko ʻe taha ko ha māʻata, ko e faingataʻaʻia fakataha mo e loto-toʻa mo e ngeia koeʻuhiā ko ʻeku mateaki kia Sihová naʻá ne ʻomai kiate au ʻa e fiefia.”​—Sēm. 1:2-4.

16. Naʻe anga-fēfē hono fakahāhā ʻe he kau ʻapositoló naʻa nau fakapapauʻi ke nau faifakamoʻoni fakaʻāulilikí, pea ʻoku anga-fēfē ʻetau muimui ʻi he founga fakaʻapositolo ki he malangá?

¹⁶ Naʻe ʻikai toe fakamoleki noa ʻe he kau ʻapositoló ha taimi ʻi heʻenau toe hoko atu ko ia ʻi heʻenau ngāue faifakamoʻoní. ʻI he taʻemanavaheé, naʻa nau hokohoko atu “ʻi he ʻaho kotoa pē ʻi he temipalé pea mei he fale ki he fale” ʻi he ngāue ko ia ko hono “talaki ʻa e ongoongo lelei fekauʻaki mo e Kalaisí.”d (Ngā. 5:42) Ko e kau malanga faivelenga ko ʻení naʻa nau fakapapauʻi ke nau faifakamoʻoni fakaʻāuliliki. Fakatokangaʻi ange naʻa nau ʻave ʻenau pōpoakí ki he ngaahi ʻapi ʻo e kakaí, ʻo hangē ko ia ko e fakahinohino ne ʻoange ʻe Sīsū Kalaisí. (Māt. 10:7, 11-14) ʻOku ʻikai ha veiveiua, ko e founga ia naʻe malava ai ke nau fakafonu ʻa Selusalema ʻaki ʻenau akonakí. ʻI he ʻahó ni, ʻoku ʻiloa ʻa e Kau Fakamoʻoni ʻa Sihová ʻi heʻenau muimui ʻi he founga fakaʻapositolo ko ia ki he malangá. ʻI he ʻaʻahi ko ia ki he ʻapi taki taha ʻi hotau feituʻu ngāué, ʻoku tau fakahaaʻi māʻalaʻala ai ʻoku tau loto mo kitautolu ke tau fakaʻāuliliki, ʻo ʻoange ki he tokotaha kotoa ha faingamālie ke nau fanongo ai ki he ongoongo leleí. Kuo tāpuakiʻi ʻe Sihova ʻa ʻetau ngāue fakafaifekau fale-ki-he-falé? ʻIo, kuó ne fai pehē! Kuo tali ʻe he laui miliona ʻa e pōpoaki ʻo e Puleʻangá ʻi he taimi ko ʻeni ʻo e ngataʻangá, pea ko e tokolahi ko ʻenau ʻuluaki fanongo ia ʻi he ongoongo leleí ko e taimi ko ia naʻe tukituki ai ha tokotaha Fakamoʻoni ʻi honau matapaá.

17-19. Ko e hā ʻa e ʻīsiu fakatupu māvahevahe naʻe mapuna hake he taimi ko ʻení, pea ko e hā ʻa e fakahinohino naʻe ʻoange ʻe he kau ʻapositoló koeʻuhí ke fakaleleiʻi ʻaki iá?

¹⁷ Naʻe fehangahangai ʻa e fakatahaʻanga foʻoú he taimi ko ʻení mo ha tuʻunga ne natula fakatuʻutāmaki ange ʻa ia naʻá ne fakamanamanaʻi ʻa e fakatahaʻangá mei loto. Ko e hā ʻa e tuʻunga ko iá? Ko e tokolahi ʻo e kau ākonga naʻe papitaisó ko e kau ʻaʻahi mai ki Selusalema pea naʻa nau loto ke nau ako ha meʻa lahi ange ki muʻa ke nau toki foki ki honau feituʻú. Ko e kau ākonga naʻe nofo ʻi Selusalemá naʻa nau fai ha ngaahi foaki loto-lelei fakapaʻanga ke fakalatoʻaki ʻa e fiemaʻu fakameʻakaí mo e ngaahi fiemaʻu kehé. (Ngā. 2:44-46; 4:34-37) ʻI he taimi ko ʻení, naʻe mapuna hake ai ha tuʻunga pelepelengesi. “ʻI he tufa [meʻakai] naʻe fai fakaʻahó,” ko e kau uitou lea faka-Kalisí naʻe “taʻetokangaʻi” kinautolu. (Ngā. 6:1) Kae kehe, ko e kau uitou lea faka-Hepeluú ia naʻe ʻikai ke taʻetokangaʻi kinautolu. ʻOku hā mahino leva ko e palopalemá naʻe kau ki ai ʻa e filifilimānakó. Ko e filifilimānakó ko e taha ia ʻo e ngaahi meʻa ʻokú ne lavangofua ke fakatupunga ʻa e māvahevahé.

¹⁸ Ko e kau ʻapositoló, ʻi heʻenau ngāue ʻi he tuʻunga ko e kulupu pule ia ʻo e fakatahaʻanga ko ʻeni naʻe tupulakí, naʻa nau ʻiloʻi ʻe taʻefakapotopoto kiate kinautolu ‘ke tuku ʻa e folofola ʻa e ʻOtuá ka nau tufa meʻakai kinautolu.’ (Ngā. 6:2) Ke fakaleleiʻi ʻa e ngaahi meʻa ko ia ne hokó, naʻa nau fakahinohino ai ki he kau ākongá ke nau kumi mai ha kau tangata ʻe toko fitu “ʻoku nau fonu ʻi he laumālie mo e poto” ʻa ia ʻe lava ke fakanofo ʻe he kau ʻapositoló ke nau tokangaʻi ʻa e ‘meʻa ko eni naʻe fiemaʻú.’ (Ngā. 6:3) Naʻe fiemaʻu ha kau tangata taau koeʻuhí ko e ngāué ʻoku ngalingali naʻe ʻikai ngata pē ʻi he kau ki ai ʻa hono ʻoatu ʻo e meʻakaí ka naʻe toe kau foki ki ai mo hono tokangaʻi ʻo e paʻangá, ko hono fakatau mai ʻa e ngaahi fiemaʻú, pea mo hono tauhi fakalelei ʻa e ngaahi lēkōtí. Ko e kau tangata naʻe filí naʻa nau hingoa faka-Kalisi kotoa, ʻa ia naʻá ne ʻai nai ai ke ala tali lahi ange kinautolu ʻe he kau uitou ko ia naʻe mamahí. Hili ʻa e fakakaukau fakataha mo e lotu ʻo fekauʻaki mo e ngaahi fakaongoongolelei naʻe fai maí, naʻe fakanofo leva ʻe he kau ʻapositoló ʻa e kau tangata ʻe toko fitú ke nau tokangaʻi ʻa e ‘meʻa ko eni naʻe fiemaʻú.’e

¹⁹ Naʻe ʻuhinga ʻa hono tokangaʻi ʻo e tufa meʻakaí ke pehē ai ko e kau tangata ʻe toko fitu naʻe fakanofó ne nau ʻatā kinautolu he taimi ko ení mei he fatongia ko ia ke malangaʻi ʻa e ongoongo leleí? Mole ke mamaʻo! Naʻe kau ʻi he kau tangata naʻe filí ʻa Sitīveni, ʻa ia naʻá ne fakamoʻoniʻi ʻa ia tonu ko ha tokotaha faifakamoʻoni loto-toʻa mo mālohi ia. (Ngā. 6:8-10) Naʻe kau foki mo Filipe ʻi he toko fitú, pea ʻoku ui ia “ko e ʻevangelioó.” (Ngā. 21:8) ʻOku hā mahino leva, ko e kau tangata ʻe toko fitú naʻe hokohoko atu ʻenau hoko ko e kau malanga faivelenga ʻo e Puleʻangá.

20. ʻOku anga-fēfē ʻa e muimui ʻa e kakai ʻa e ʻOtuá he ʻaho ní ki he sīpinga fakaʻapositoló?

²⁰ Ko e kakai ʻa Sihova he ʻaho ní ʻoku nau muimui ʻi he sīpinga fakaʻapositoló. Ko e kau tangata kuo fakaongoongoleleiʻi ki he fatongia fakaefakatahaʻangá kuo pau ke nau fakahāhā ʻa e poto fakaʻotuá pea ke ʻomai ha fakamoʻoni ʻoku ngāue ʻa e laumālie māʻoniʻoní ʻiate kinautolu. ʻI he malumalu ʻo e tataki ʻa e Kulupu Pulé, ko e kau tangata ʻoku nau aʻusia ʻa e ngaahi fiemaʻu Fakatohitapú ʻoku fakanofo kinautolu ke nau hoko ko e kau mātuʻa pe kau sevāniti fakafaifekau ʻi he ngaahi fakatahaʻangá.f (1 Tīm. 3:1-9, 12, 13) Ko e faʻahinga ko ia ʻoku nau aʻusia ʻa e ngaahi tuʻunga tāú ʻe lava pē ke pehē ko e fakanofo kinautolu ʻe he laumālie māʻoniʻoní. Ko e kau tangata ngāue mālohi ko ʻení ʻoku nau tokangaʻi ʻa e ngaahi meʻa lahi ʻoku fiemaʻu. Ko e fakatātaá, ʻe lava ke fokotuʻutuʻu ʻe he kau mātuʻá ha tokoni ʻaonga maʻá e kau faitōnunga taʻumotuʻa ʻa ia ʻoku ʻi ai haʻanau fiemaʻu moʻoní. (Sēm. 1:27) ʻOku ʻi ai ʻa e kau mātuʻa ʻe niʻihi ʻoku nau kau lahi ʻaupito ʻi hono langa ʻo e ngaahi Fale Fakatahaʻangá, ko hono fokotuʻutuʻu ʻa e ngaahi fakataha-lahí, pe ngāue mo e Kōmiti Fetuʻutaki Fakafalemahaki fakalotofonuá. ʻOku tokangaʻi ʻe he kau sevāniti fakafaifekaú ha ngaahi ngafa lahi ʻa ia ʻoku ʻikai ke kaunga fakahangatonu ki he tauhi-sipí pe faiakó. Ko e kotoa ʻo e kau tangata taau ko iá kuo pau ke nau fakamafamafatatau ʻa e ngaahi fatongia fakaefakatahaʻangá mo e fakaekautahá pea mo e ngāue ʻoku nau moʻuaʻaki ʻa ia kuo vaheʻi ange ʻe he ʻOtuá ko hono malangaʻi ʻa e ongoongo lelei ʻo e Puleʻangá.​—1 Kol. 9:16.

21, 22. Ko e hā ʻokú ne fakahaaʻi mai naʻe tāpuakiʻi ʻe Sihova ʻa e fakatahaʻanga naʻe toki fokotuʻu foʻoú?

²¹ ʻI he tokoni ʻa Sihová, naʻe haofakiʻi ai ʻa e fakatahaʻanga naʻe toki fokotuʻu foʻoú mei he fakatanga mei tuʻá pea mo ha palopalema mei loto ʻa ia naʻe ala lava ke ne fakatupunga ha māvahevahe. Ko e tāpuaki ʻa Sihová naʻe hā mahino, he ʻoku tala mai kiate kitautolu: “Naʻe hokohoko atu ai pē ʻa e mafola ʻa e folofola ʻa e ʻOtuá, pea naʻe mātuʻaki tupulekina ai pē ʻa e tokolahi ʻo e kau ākongá ʻi Selusalema; pea ko ha fuʻu tokolahi ʻo e kau taulaʻeikí naʻa nau hoko ʻo tui.” (Ngā. 6:7) Ko e taha pē eni ia ʻo e ngaahi fakamatala lahi fekauʻaki mo e ngaahi laka ki muʻa ʻa ia ʻoku maʻu ʻi he tohi ʻa Ngāué. (Ngā. 9:31; 12:24; 16:5; 19:20; 28:31) ʻI he ʻahó ni, ʻikai ʻoku fakalototoʻaʻi kitautolu ʻi he taimi ʻoku tau fanongo ai ki he ngaahi līpooti fekauʻaki mo e laka ki muʻa ʻa e ngāue malangaʻi ʻo e Puleʻangá ʻi he ngaahi feituʻu kehe ʻo e māmaní?

²² ʻI he ʻuluaki senituli T.S., ko e kau taki lotu ko ia ne nau ʻita teketekelilí naʻe ʻikai pē haʻanau teu ʻa kinautolu ke nau tukulolo. Naʻe maluʻaki mai mei muʻa ha fuʻu peau ʻo e fakatanga. ʻIkai fuoloa, naʻe hoko ʻa Sitīveni ko ha tāketi tefito ia ʻo e fakafepaki kakahá, ʻo hangē ko ia te tau sio ki ai ʻi he vahe hono hokó.