“Fononga ʻOku Fai Aki ʻa e Tui, ʻo ʻIkai ʻAki ʻa e Mamata”

“Ko ʻemau fononga ʻoku fai aki ʻa e tui, ʻo ʻikai ʻaki ʻa e mamata.”​—2 KOLINITO 5:7.

 1. Ko e hā hono ʻuhinga ʻo e “fononga ʻoku fai aki ʻa e tui”?

ʻI HE taimi kotoa pē ʻoku tau lotu ai ʻo fehoanaki mo e ngaahi fakahinohino ʻoku fokotuʻu mai ʻi he Folofola ʻa e ʻOtuá, ʻoku tau fakahāhā ai ʻi ha tuʻunga ʻoku ʻi ai ʻetau tui. ʻI he taimi ʻoku tau kamata faifakamoʻoni ai ki he niʻihi kehé ʻo fekauʻaki mo e Puleʻanga ʻo e ʻOtuá, ʻoku toe fakahaaʻi ʻi he meʻá ni foki ʻa e tuí. Pea ʻi he taimi ʻoku tau fakatapui ai ʻetau moʻuí kia Sihová, ʻoku tau ʻoatu ai ʻa e fakamoʻoni ko ʻetau holí ia ke ‘fononga aki ʻa e tuí,’ ʻa ia, ko e tuli ki ha ʻalunga moʻui ko ē ʻoku tatakiʻaki ʻa e tuí.​—2 Kolinito 5:​7, fakaʻītali ʻamautolu; Kolose 1:​9, 10.

 2. Ko e hā ʻoku ʻikai moʻoni ai ko ha fakamoʻoni ia ʻoku maʻu ʻe ha taha ʻa e tuí ʻi heʻene kau ʻi he ngaahi ngāue ʻi he fakatahaʻangá?

² Kapau te tau hoko moʻoni ʻo moʻui ʻi ha founga pehē, ʻoku tau fiemaʻu ʻa e tui ko ē ʻoku makatuʻunga leleí. (Hepelu 11:​1, 6) ʻOku tohoakiʻi ʻa e kakai tokolahi ki he Kau Fakamoʻoni ʻa Sihová koeʻuhi ko e tuʻunga māʻolunga fakaeʻulungaanga pea mo e ʻofa ko ia ʻoku nau sio ki ai ʻi he lotolotonga ʻo e Kau Fakamoʻoní. Ko ha kamata lelei ia, ka ʻoku ʻikai ʻuhinga ia ʻoku maʻu ʻe he kakai peheé ʻa e tuí. ʻOku maʻu nai ʻe he niʻihi kehe ha hoa mali pe ko ha ongo mātuʻa ʻa ia ʻoku mālohi ʻi he tuí, pea ʻoku nau kau nai ʻi he niʻihi ʻo e ngaahi ngāue naʻe kau ki ai ʻa e tokotaha ko ia ʻoku nau ʻofa aí. Ko hono moʻoní, ko ha tāpuaki ia ʻa hono maʻu ʻo ha tākiekina pehē ʻi ha ʻapi ʻo ha taha, ka ko e meʻá ni foki ʻoku ʻikai ko e fetongi ia ʻo e ʻofa fakafoʻituitui ki he ʻOtuá pea mo e tui fakafoʻituituí.​—Luke 10:​27, 28.

 3. (a) Ke tau maʻu ʻa e tui makatuʻunga leleí, ko e hā ʻa e tuipau kuo pau ke tau maʻu fakafoʻituitui ʻo fekauʻaki mo e Tohitapú? (e) Ko e hā ʻoku hoko ai ʻo tuipau lahi ange ʻo ʻikai toe tatali ʻa e kakai ia ʻe niʻihi ki hono fakamānavaʻi ʻo e Tohitapú ʻi he niʻihi kehé?

³ Ko e faʻahinga ko ia ʻoku fononga moʻoni ʻaki ʻa e tuí ʻoku nau falala kakato ko e Tohitapú ʻa e Folofola ʻa e ʻOtuá. ʻOku hulu fau moʻoni ʻa e ngaahi fakamoʻoni ko e ngaahi Konga Tohitapu Māʻoniʻoní “ne fakamanava mei he ʻOtua.”a (2 Timote 3:16) Ko e hā hono lahi kuo pau ke sivisiviʻi ki ai ʻa e fakamoʻoni ko ʻení ki muʻa ke tuipau ha tokotaha? ʻE fakatuʻunga nai ia mei heʻene pōtoʻí. Ko e meʻa ko ē ʻokú ne fakafiemālieʻi kakato ha tokotahá ʻe ʻikai nai ke loto ki ai ʻa e tokotaha kehé ia. ʻI he ngaahi tuʻunga ʻe niʻihi, neongo ai pē hano fakahaaʻi ki ha taha ha fakamoʻoni lahi taʻealafakakikihiʻi, te ne kei talitekeʻi pē nai ʻa e fakamulituku ʻa ia ʻoku ʻuhinga ki aí. Ko e hā hono ʻuhingá? Koeʻuhi ko e ngaahi holi ʻoku tanumia loloto ʻi hono lotó. (Selemaia 17:9) Ko ia ai, neongo hano lau ʻe ha taha ʻokú ne mahuʻingaʻia ʻi he taumuʻa ʻa e ʻOtuá, ʻe holi nai hono lotó ke leleiʻia ai ʻa e māmaní. Heʻikai nai te ne loto ke tuku ange ha tōʻonga ʻo e moʻuí ʻa ia ʻoku fepaki mo e ngaahi tuʻunga ʻa e Tohitapú. Kae kehe, kapau ʻoku ʻi ai ha taha ʻe fiekaia moʻoni ki he moʻoní, kapau ʻokú ne faitotonu ʻiate ia, pea kapau ʻokú ne anga-fakatōkilalo, ʻe ʻi ai pē ʻa e taimi te ne ʻiloʻi ai, ko e Tohitapú ko e Folofola ia ʻa e ʻOtuá.

 4. Ko e hā ʻoku fiemaʻú mei he tafaʻaki ʻa ha tokotaha, koeʻuhi ke maʻu ʻa e tuí?

⁴ ʻOku faʻa hoko ʻi ha ngaahi māhina siʻi pē, ko e kakai ko ē ʻoku tokoniʻi ke ako ʻa e Tohitapú ʻoku nau mahinoʻi ʻa ʻenau ʻiloʻi ʻa e fakamoʻoni lahi ko e Folofola ia ʻa e ʻOtuá. Kapau ʻoku ueʻi kinautolu ʻe he meʻá ni ke fakaava honau lotó ke fakahinohinoʻi ʻe Sihova, ʻe faifai atu pē ʻo fakafuo leva ʻe he meʻa kuo nau akó ʻa e tefito ʻo ʻenau ngaahi fakakaukaú, ko ʻenau ngaahi holí, mo e ngaahi meʻa ʻokú ne ueʻi honau lotó. (Sāme 143:10) ʻOku pehē ʻe he Loma 10:10 ʻoku ngāueʻi ʻe ha taha ʻa e tuí “ʻaki ʻa e loto.” ʻOku fakahaaʻi ʻe he tui peheé ʻa e meʻa ʻoku ongoʻi moʻoni ʻe he tokotahá, pea ʻe hā ia ʻi he ʻalunga ʻo ʻene moʻuí.

Naʻe Ngāue ʻa Noa ʻi he Tui Makatuʻunga Lelei

 5, 6. Naʻe makatuʻunga ʻi he hā ʻa e tui ʻa Noá?

⁵ Ko Noá ko ha tokotaha naʻá ne maʻu ʻa e tui makatuʻunga lelei. (Hepelu 11:7) Ko e hā ʻa e makatuʻunga naʻá ne maʻu ki he meʻa ko iá? Naʻe maʻu ʻe Noa ʻa e Folofola ʻa e ʻOtuá, ʻo ʻikai ʻi ha tohi kuo hiki, ka naʻe leaʻaki kiate ia. ʻOku pehē ʻi he Senesi 6:​13: “Pea folofola ʻa e ʻOtua kia Noa, Kuo ongo mai kiate au kuo aʻu ʻa e kakano kotoa pe ki hono ngataʻanga; he ko e meʻa ʻiate kinautolu kuo opeope ʻi he fonua ʻa e fakamalohi.” (Fakaʻītali ʻamautolu.) Naʻe fakahinohino ʻe Sihova ʻa Noa ke langa ha ʻaʻake pea ʻoange mo e ngaahi fakaikiiki ʻo fekauʻaki mo hono langá. Naʻe tānaki atu leva ki ai ʻe he ʻOtuá: “Pea ko au e ʻoku ou teu ʻomi ʻa e lomaki, ko e fuʻu vai ke ʻufiʻufi ʻa e fonua, ke fakaʻauha ʻa e kakano kotoa pe ʻi he lalo langi ʻa ia ʻoku ʻi ai ha manava moʻui: ʻilonga ha meʻa ʻoku ʻi he fonua ʻe mate.”​—Senesi 6:​14-17.

⁶ Kuo ʻi ai ha ʻuha ki muʻa ʻi he meʻá ni? ʻOku ʻikai ha lau ia ki ai ʻa e Tohitapú. ʻOku pehē ʻe he Senesi 2:5: “Kuo teʻeki ke fakaʻuha ki he fonua ʻe Sihova Elohimi.” Ka ko e founga ʻeni ʻo hono fakamatalaʻi ʻa e ngaahi meʻá ʻe Mōsese, ʻa ia ne moʻui ʻi ha ngaahi senituli ki mui ai, ʻi heʻene lāulea ki ha taimi fuoloa ki muʻa ai, kae ʻikai ko e taimi ʻo Noá. Hangē ko ia naʻe fakahaaʻi ʻi he Senesi 7:​4, naʻe lave ʻa Sihova ki he ʻuhá ʻi heʻene lea kia Noá, pea ʻoku hā mahino naʻe mahino kia Noa ʻa ʻene ʻuhingá. Ka, ko e tui ʻa Noá naʻe ʻikai ʻi he meʻa ia naʻe lava ke ne sio ki aí. Naʻe tohi ʻe he ʻaposetolo ko Paulá ko Noá naʻe “ʻoange ki ai ʻa e fakatokanga fakaʻotua ʻo e ngaahi meʻa ʻoku teʻeki ai haá.” Naʻe tala ʻe he ʻOtuá kia Noa te Ne ʻomai ki he fonuá ʻa e “lomaki, ko e fuʻu vai,” pe “ko e ʻoseni fakalangi,” hangē ko hono fakamatalaʻi ia ʻe he fakamatala ʻi lalo ʻi he New World Translation ʻia Senesi 6:17. Kuo teʻeki ai hoko ha meʻa pehē, ʻo aʻu mai ki he taimi ko iá. Ka ko e meʻa fakatupu kotoa pē naʻe hā mai kia Noá naʻe tuʻu ia ko ha fakamoʻoni fakahāhā ʻe lava moʻoni ke ʻomai ʻe he ʻOtuá ha lōmaki pehē fakaefakaʻauha. Naʻe langa ʻe Noa ʻa e ʻaʻaké, ʻi hono ueʻi ia ʻe he tuí.

 7. (a) Ko e hā naʻe ʻikai ke fiemaʻu ʻe Noá, koeʻuhi kae fai ʻa e meʻa naʻe tuʻutuʻuni kiate ia ʻe he ʻOtuá? (e) ʻOku tau maʻu fēfē ʻa e ʻaonga ʻi he fakakaukau atu ki he tui ʻa Noá, pea ʻe lava fēfē ke hoko ʻa ʻetau tuí ko ha tāpuaki ia ki he niʻihi kehé?

⁷ Naʻe ʻikai ke ʻoange ʻe he ʻOtuá ia kia Noa ha ʻaho ʻa ia ʻe kamata ai ʻa e Lōmakí. Ka naʻe ʻikai ke ngāueʻaki ia ʻe Noa ko ha kalofanga ki hano ohi ʻo ha fakakaukau veiveiua, ʻo fokotuʻu ai ke fika ua ʻa e langa ʻaʻaké mo e malangá ʻi heʻene moʻuí. Naʻe tala ʻi ha taimi feʻunga ʻe he ʻOtuá kia Noa, ʻa e taimi ke hū ai ki he ʻaʻaké. ʻI he taimi tatau, naʻe “fai ʻe Noa; ʻilonga ha meʻa naʻe tuʻutuʻuni kiate ia ʻe he ʻOtua, naʻa ne fai ia.” (Senesi 6:22) Naʻe fononga ʻa Noa ʻaki ʻa e tui, ʻo ʻikai ʻaki ʻa e mamata. He houngaʻia ē ko kitautolu ʻi heʻene fai peheé! ʻOku tau moʻui ʻi he ʻaho ní, koeʻuhi ko ʻene tuí. ʻI hotau tuʻungá foki, ko e tui ʻoku tau fakahaá ʻe lava ke ʻi ai ʻa ʻene kaunga loloto ki he meʻa ʻoku tuku tauhi mei he kahaʻú, ʻo ʻikai maʻatautolu pē kae pehē foki ki heʻetau fānaú pea ki he kakai kehe ʻoku takatakai ʻiate kitautolú.

Ko e Tui ʻa ʻĒpalahamé

 8, 9. (a) Ko e hā naʻe fakatuʻunga ai ʻe ʻĒpalahame ʻa ʻene tuí? (e) Ko e hā ʻa e founga naʻe ‘ha’ ai ʻa Sihova kia ʻĒpalahamé?

⁸ Fakakaukau angé ki he faʻifaʻitakiʻanga ʻe taha​—ko ia ʻa ʻĒpalahamé. (Hepelu 11:​8-10) Naʻe fakatuʻunga ʻe ʻĒpalahame ʻa ʻene tuí ʻi he hā? Ko e ngaahi ʻātakai ko ia ʻa e kau Kalitiá, naʻá ne tupu hake ai ʻi ʻUá naʻe fakaetauhiʻaitoli mo fakamatelie. Ka naʻe fakafōtunga ʻe he ngaahi tākiekina kehe ʻa e fakakaukau ʻa ʻĒpalahamé. ʻOku ʻikai ha veiveiua naʻe lava ke ne feohi mo e foha ʻo Noa ko Semí, ʻa ia naʻe fehopeʻaki ʻa ʻene moʻuí mo ia ʻaki ʻa e taʻu ʻe 150. Naʻe hoko ʻa ʻĒpalahame ʻo tuipau ko Sihova ʻa e “ʻOtua-Taupotu, ʻa ia ko ʻene meʻa ʻa Langi mo Mamani.”​—Senesi 14:22.

⁹ Naʻe tākiekina loloto ʻe ha toe meʻa kehe ʻa ʻĒpalahame. Ko Sihová “naʻa ne fakaha ia ki[a] . . . Epalahame, lolotonga ʻene nofo ʻi Mesopotemia, pea teʻeki ke ne nofo ʻi Kalana, pea ne folofola kiate ia, Hiki mei ho fonua, pea mei ho kāinga, pea haʻu ki he fonua te u toki fakaha atu.” (Ngāue 7:​2, 3) Ko e hā ʻa e founga naʻe ‘fakaha’ ai ʻa Sihova kia ʻĒpalahamé? Naʻe ʻikai ke sio hangatonu ʻa ʻĒpalahame ki he ʻOtuá. (Ekisoto 33:20) Kae kehe, naʻe malava ke hā ʻa Sihova kia ʻĒpalahame ʻi ha misi, fakataha mo ha fakahāhā fakaeʻotua ʻo e lāngilangi, pe fakafou mai ʻi ha talafekau fakaeʻāngelo, pe fakafofonga. (Fakafehoanaki mo Senesi 18:​1-3; 28:​10-15; Livitiko 9:​4, 6, 23, 24.) Neongo pe ko e hā ʻa e founga naʻe hā ai ʻa Sihova kia ʻĒpalahamé, naʻe tuipau ʻa e tangata anga-tonu ko iá naʻe fokotuʻutuʻu ʻe he ʻOtuá kiate ia ha monū maʻongoʻonga. Naʻe tali ia ʻe ʻĒpalahame ʻi he tui.

10. Naʻe anga-fēfē ʻa hono ʻai ʻe Sihova ke mālohi ʻa e tui ʻa ʻĒpalahamé?

¹⁰ Ko e tui ʻa ʻĒpalahamé naʻe ʻikai fakatuʻunga ia ʻi heʻene maʻu ʻa e ngaahi fakaikiiki ʻo fekauʻaki mo e fonua naʻe fakahinohino kiate ia ʻe he ʻOtuá. Naʻe ʻikai fakatuʻunga ia ʻi heʻene ʻiloʻi ʻa e taimi ʻe foaki ange ai kiate ia ʻa e fonua ko iá. Naʻá ne tuí koeʻuhi he naʻá ne ʻiloʻi ʻa Sihova ʻi hono tuʻunga ko e ʻOtua Māfimafi-Aoniú. (Ekisoto 6:3) Naʻe tala ʻe Sihova kia ʻĒpalahame ʻe ʻi ai hono hako, ka naʻe fifili ʻa ʻĒpalahame ʻi ha ngaahi taimi pe ʻe lava fēfē ke hoko ia. Naʻá ne fakaʻau ke motuʻa. (Senesi 15:​3, 4) Naʻe ʻai ʻe Sihova ke mālohi ʻa e tui ʻa ʻĒpalahamé ʻi hono tala ange kiate ia ke hanga hake ki he ngaahi fetuʻú ʻo lau ia ʻo kapau te ne lava. “ʻE pehe ho hako,” ko e tala ange ia ʻe he ʻOtuá. Naʻe uesia loloto ʻa ʻĒpalahame. Naʻe hā mahino ʻe lava ke fakahoko ʻe he Tokotaha-Fakatupu ʻo e ngaahi sino fakalangi fakaofo ko iá ʻa e meʻa kuó ne talaʻofá. Naʻe “tui kia Sihova” ʻa ʻĒpalahame. (Senesi 15:​5, 6) Naʻe ʻikai ke tui pē ʻa ʻĒpalahamé koeʻuhi naʻá ne saiʻia ʻi he meʻa naʻá ne fanongo ki aí; naʻá ne maʻu ʻa e tui makatuʻunga lelei.

11. (a) ʻI heʻene fakaofi atu ki hono taʻu 100, naʻe anga-fēfē ʻa e tali ʻa ʻĒpalahame ki he talaʻofa ʻa e ʻOtuá ʻe maʻu ʻe Sela kuo motuʻá ha fohá? (e) Ko e faʻahinga tui fēfē naʻe fakafetaulakiʻiʻaki ʻe ʻĒpalahame ʻa e ʻahiʻahi ʻo fekauʻaki mo hono ʻave ki Moʻunga Molaia ʻa hono fohá ke foaki atu ia ko ha feilaulaú?

¹¹ ʻI he taimi naʻe fakaofi atu ai ʻa ʻĒpalahame ki hono taʻu 100, pea ofi ʻa hono uaifi ko Selá ki he taʻu 90, naʻe toe fai ʻe Sihova ʻa ʻene talaʻofa ko ia ʻe ʻi ai ha foha ʻo ʻĒpalahamé pea ʻe hoko ʻa Sela ko ha faʻē. Naʻe fakakaukau fakamoʻomoʻoni ʻa ʻĒpalahame ki hona tuʻungá. “Ka naʻe ʻikai te ne talaʻa ki he talaʻofa ʻa e ʻOtua ʻi haʻane taʻetui; ka naʻe hoko ʻo kaukaua ʻene tui, mo ne fakahikihikiʻi ʻa e ʻOtua; mo matuʻaki falala, ko e meʻa kuo ne talaʻofa ki ai ʻoku ne malava foki ke fai.” (Loma 4:​19-21) Naʻe ʻiloʻi ʻe ʻĒpalahame ʻe ʻikai taʻeala lava ʻa e talaʻofa ʻa e ʻOtuá. Ki mui ai, koeʻuhi ko ʻene tuí, naʻe talangofua ʻa ʻĒpalahame ʻi hono tala ange ʻe he ʻOtuá kiate ia ke ʻave ʻa hono foha ko ʻAisaké ki he fonua ko Molaiá pea foaki hake ai ia ko ha feilaulau. (Senesi 22:​1-12) Naʻe falala kakato ʻa ʻĒpalahame ko e ʻOtua ko ia naʻá ne fakatupunga fakaemana ha foha ke fanauʻí ʻe lava foki ke ne toe fakafoki mai ʻa e moʻuí kiate ia koeʻuhi ke fakahoko ʻa e toe ngaahi talaʻofa ʻa ia naʻá Ne fai fekauʻaki mo iá.​—Hepelu 11:​17-19.

12. Naʻe lōloa fēfē ʻa e hokohoko atu ʻo e fonongaʻaki ʻe ʻĒpalahame ʻa e tuí, pea ko e hā ʻa e pale ʻoku fakatatali kiate ia mo e kau mēmipa ʻo hono fāmilí ʻa ē naʻa nau fakahāhā ʻa e tui mālohí?

¹² Naʻe fakahaaʻi ʻe ʻĒpalahame naʻe tataki ia ʻe he tuí ʻikai ʻi ha ngaahi tuʻunga pē ka ʻi he kotoa ʻo ʻene moʻuí. Lolotonga ʻa e taimi ʻo ʻene moʻuí, naʻe ʻikai ke maʻu ʻe ʻĒpalahame ia mei he ʻOtuá ha konga ʻo e Fonua ʻo e Talaʻofá ko hano tofiʻa. (Ngāue 7:5) Ka, naʻe ʻikai ke hoko ʻo ongosia ʻa ʻĒpalahame ia pea foki ki ʻUa ʻo e kau Kalitiá. ʻI he taʻu ʻe 100, ʻo aʻu ki heʻene maté, naʻá ne nofo ʻi he ngaahi tēniti ʻi he fonua ko ia naʻe tataki ia ki ai ʻe he ʻOtuá. (Senesi 25:7) Fekauʻaki mo ia mo hono uaifi ko Selá, ko hona foha ko ʻAisaké, mo hona mokopuna ko Sēkopé, ʻoku pehē ʻi he Hepelu 11:16: “ʻOku ʻikai māʻi kinautolu ʻe he ʻOtua ke ui ia ko honau ʻOtua, he naʻa ne teuteu moʻonautolu ha kolo.” ʻIo, ʻoku ʻi ai ha feituʻu ʻa Sihova maʻa kinaua ʻi he feituʻu fakaemāmani ʻo hono Puleʻanga faka-Mīsaiá.

13. Ko hai ʻi he kau sevāniti ʻa Sihova ʻi he ʻaho ní ʻokú ne ʻoatu ʻa e fakamoʻoni ki hono maʻu ʻa e tui hangē ko ia ko ʻĒpalahamé?

¹³ ʻOku ʻi ai ʻa e faʻahinga he ʻahó ni ʻi he lotolotonga ʻo e kau sevāniti ʻa Sihová ʻoku nau tatau mo ʻĒpalahame. Kuo nau ʻaʻeva ʻaki ʻa e tuí ʻi he ngaahi taʻu lahi. ʻI he mālohi ko ia ʻoku foaki ʻe he ʻOtuá, kuo nau lavaʻi ai ʻa e ngaahi fakafeʻātungia hangē ha moʻungá. (Mātiu 17:20) ʻOku ʻikai te nau fakaholomui ʻi he tuí koeʻuhi ko e ʻikai te nau ʻiloʻi totonu ʻa e taimi ko ia ʻe foaki ange ai kiate kinautolu ʻe he ʻOtuá ʻa e tofiʻa ko ia kuó ne talaʻofaʻakí. ʻOku nau ʻilo ʻe ʻikai taʻeala hoko ʻa e folofola ʻa Sihová, pea ʻoku nau lau ia ko ha monū mahuʻinga ʻaupito ke fakakau ʻi he lotolotonga ʻo ʻene Kau Fakamoʻoní. ʻOku pehē ʻa e anga ʻo hoʻo ongoʻí?

Ko e Tuí Naʻá Ne Ueʻi ʻa Mōsesé

14. Naʻe anga-fēfē hono fakatoka ʻa e makatuʻunga ki he tui ʻa Mōsesé?

¹⁴ Ko e faʻifaʻitakiʻanga ʻe taha ʻo e tuí ko Mōsese. Ko e hā ʻa e makatuʻunga ki heʻene tuí? Naʻe fakatoka ia mei heʻene kei valevalé. Neongo naʻe maʻu ʻe he ʻofefine ʻo Feló ʻa Mōsese ʻi ha puha pepailo ʻi he Vaitafe Nailá peá ne ʻave ia ʻo hoko ko hono foha, naʻe tauhi hake ʻa e tamasiʻí mo tokangaʻi ʻe he faʻē Hepelū tonu ʻa Mōsese ko Siokāpesí, lolotonga ʻa hono muʻaki ngaahi taʻú. ʻOku hā mahino naʻe akoʻi lelei ia ʻe Siokāpesi, ʻi hono fakahūhū kiate ia ʻa e ʻofa kia Sihova mo e houngaʻia ʻi Heʻene ngaahi talaʻofa kia ʻĒpalahamé. Ki mui ai, ʻi hono tuʻunga ko ha mēmipa ʻo e fale ʻo Feló, “naʻe akoʻi ʻa Mosese ʻi he faʻahinga poto kotoa ʻo e kakai Isipite.” (Ngāue 7:​20-22; Ekisoto 2:​1-10; 6:20; Hepelu 11:23) Kae kehe, neongo ʻa e tuʻunga lelei ʻo Mōsesé, naʻe ʻi he kakai nofo pōpula ʻa e ʻOtuá ʻa hono lotó.

15. Ko e hā naʻe hoko kia Mōsese ʻi hono fakaʻilongaʻi ia fakataha mo e kakai ʻa Sihová?

¹⁵ ʻI hono taʻu 40, naʻe taaʻi ai ʻe Mōsese ha tangata ʻIsipite koeʻuhi ke fakahaofi ha tangata ʻIsileli ʻa ia naʻe taʻetotonu ʻa hono ngaohikoviʻí. Naʻe hā mei he meʻa ko ʻeni naʻe hokó ʻa e anga ʻo e fakakaukau ʻa Mōsese ki he kakai ʻa e ʻOtuá. Ko e moʻoni, “ko tui naʻe fakataleʻi ai ʻe Mosese ʻi heʻene tangata hono lau ko e tama ʻa e ʻofefine ʻo Felo.” ʻI he ʻikai ke pipiki ki “haʻane maʻu fakataimi pe ha malie tuʻu he angahala” ʻi he hoko ko ha mēmipa ʻo e nofoʻanga fakatuʻi ʻo ʻIsipité, naʻe ueʻi ia ʻe he tuí ke fakaʻilongaʻi ia fakataha mo e kakai ngaohikovia ʻa e ʻOtuá.​—Hepelu 11:​24, 25; Ngāue 7:​23-25.

16. (a) Ko e hā ʻa e fekau naʻe ʻoange ʻe Sihova kia Mōsesé, pea naʻe tokoniʻi fēfē ia ʻe he ʻOtuá? (e) Naʻe anga-fēfē hono fakahaaʻi ʻe Mōsese ʻa e tuí, ʻi heʻene fakahoko ʻa e fekaú?

¹⁶ Naʻe vēkeveke ʻa Mōsese ke fai ha ngāue ke ʻomai ʻaki ha fakanonga ki hono kakaí, ka naʻe teʻeki ke hoko mai ʻa e taimi ia ʻa e ʻOtuá ki honau fakahaofí. Naʻe pau ke hola ʻa Mōsese mei ʻIsipite. Naʻe toki hoko ʻi he taʻu nai ʻe 40 ki mui ʻa hono fekauʻi ʻe Sihova ʻa Mōsese fakafou ʻi ha ʻāngelo ke foki ki ʻIsipite ke tataki ki tuʻa ʻa e kau ʻIsilelí mei he fonua ko iá. (Ekisoto 3:​2-10) Naʻe anga-fēfē ʻa e tali ʻa Mōsesé? Naʻe ʻikai te ne fakahaaʻi ha veiveiua ki he malava ʻa Sihova ke fakahaofi ʻa ʻIsilelí, ka naʻe ʻikai te ne ongoʻi taau ki he fatongia naʻe tuku ange ki ai ʻe he ʻOtuá. ʻI he anga-ʻofa, naʻe tokonaki ange ʻe Sihova ʻa e fakalototoʻa ko ia naʻe fiemaʻu ʻe Mōsesé. (Ekisoto 3:​11–4:17) Naʻe tupu ʻo mālohi ʻa e tui ʻa Mōsesé. Naʻá ne foki ki ʻIsipite ʻo toutou fakatokanga kia Felo, mata ki he mata, ʻa e ngaahi mala ʻe hoko ki ʻIsipite ʻi he ʻikai ke tuku ange ʻe he tokotaha pule ko iá ʻa ʻIsileli ke nau ō ʻo lotu kia Sihová. Naʻe ʻikai ke ʻi ai ha mālohi fakafoʻituitui ʻo Mōsese ke fakatupunga ʻa e ngaahi mala ko iá. Naʻá ne fononga ʻaki ʻa e tui, ʻikai ʻaki ʻa e mamata. Ko ʻene tuí naʻe ʻia Sihova mo ʻene folofolá. Naʻe fakamanaʻi ʻe Felo ʻa Mōsese. Ka naʻe kītaki pē ʻa Mōsese. “Ko tui naʻa ne liʻaki ai ʻa Isipite, ʻo ʻikai te ne manavahe ki he tuputamaki ʻa e tuʻi: he naʻa ne kitaki heʻene sio ki he Tuʻi Taʻehamai.” (Hepelu 11:27) Naʻe ʻikai ke haohaoa ʻa Mōsese. Naʻá ne fai ʻa e ngaahi lākahala. (Nomipa 20:​7-12) Kae kehe, ʻi he hili ʻa hono fekauʻi ia ʻe he ʻOtuá, naʻe puleʻi ʻa e ʻalunga kotoa ʻo ʻene moʻuí ʻe he tuí.

17. Naʻe iku ki he hā ʻa Noa, ʻĒpalahame, mo Mōsese, ʻi heʻenau fononga ʻaki ʻa e tuí, neongo naʻe ʻikai te nau moʻui ke sio ʻi he maama foʻou ʻa e ʻOtuá?

¹⁷ ʻOfa ke fakamoʻoniʻi ʻoku hangē ʻa hoʻo tuí ko Noá, ʻĒpalahamé, mo Mōsesé. Ko e moʻoni naʻe ʻikai te nau sio ʻi honau taimí ki he maama foʻou ʻa e ʻOtuá. (Hepelu 11:39) Naʻe teʻeki ai ke hoko ʻa e taimi ʻa e ʻOtuá kuo kotofá; naʻe ʻi ai ʻa e ngaahi tafaʻaki kehe ʻo ʻene taumuʻá naʻe kei fiemaʻu pē ke fakahoko. Ka, ko ʻenau tui ki he folofola ʻa e ʻOtuá naʻe ʻikai ngaue, pea ko honau hingoá ʻoku ʻi he tohi ʻo e moʻui ʻa e ʻOtuá.

18. Ki he faʻahinga ko ia kuo ui ki he moʻui fakahēvaní, ko e hā naʻe fiemaʻu ai ke nau fononga ʻaki ʻa e tuí?

¹⁸ “Kuo tokonaki ʻe he ʻOtua ha meʻa lelei hake maʻatautolu,” ko e tohi ia ʻa e ʻaposetolo ko Paulá. ʻA ia, naʻe kikiteʻi ʻe he ʻOtuá ʻa e meʻa lelei ange maʻa kinautolu ko ia ʻoku tatau mo Paulá, ʻa ia kuo ui ki he moʻui fakahēvaní fakataha mo Kalaisí. (Hepelu 11:40) Ko e faʻahinga ʻeni naʻe tautefito ʻa e fakakaukau ki ai ʻa Paulá ʻi he taimi naʻá ne tohi ai ʻa e ngaahi lea naʻe hiki ʻi he 2 Kolinito 5:7: “Ko ʻemau fononga ʻoku fai aki ʻa e tui, ʻo ʻikai ʻaki ʻa e mamata.” ʻI he taimi naʻe tohi ai iá, naʻe teʻeki ai ha taha ʻo kinautolu te nau maʻu honau pale fakahēvaní. ʻOku ʻikai lava ke nau sio ki ai ʻaki honau mata fakamatelié, ka ko ʻenau tui ki aí naʻe makatuʻunga lelei. Kuo fokotuʻu hake ʻa Kalaisi mei he maté, ko e ʻuluaki polopolo kiate kinautolu ko ia ʻe tāpuakiʻiʻaki ʻa e moʻui fakahēvaní. Pea naʻe laka hake ʻi he kau fakamoʻoni ʻe toko 500 naʻa nau mamata kiate ia ki muʻa ʻi heʻene ʻalu hake ki hēvaní. (1 Kolinito 15:​3-8) Kuo nau maʻu ʻa e ʻuhinga feʻunga ke puleʻi ʻa e ʻalunga kotoa ʻo ʻenau moʻuí ʻaki ʻa e tui ko iá. Ko kitautolu foki kuo tau maʻu ʻa e ngaahi ʻuhinga makatuʻunga ʻi he ʻilo ke ʻaʻeva ʻaki ʻa e tuí.

19. Hangē ko ia ʻoku hā ʻi he Hepelu 1:​1, 2, ʻoku fakafou ʻia hai ʻa e lea mai ʻa e ʻOtuá kiate kitautolú?

¹⁹ ʻI he ʻahó ni, ʻoku ʻikai ke lea ʻa Sihova ki hono kakaí ʻo fakafou ʻi ha ʻāngelo, ʻo hangē ko ia naʻá ne fai kia Mōsese ʻi he ʻuluʻakau velá. Kuo folofola ʻa e ʻOtuá ʻo fakafou ʻi hono ʻAló. (Hepelu 1:​1, 2) Ko e meʻa kuo leaʻaki ʻe he ʻOtuá ʻo fakafou ʻiate Iá, kuó Ne hiki ia ʻi he Tohitapú, ʻa ia kuo liliu ia ki he ngaahi lea ʻa e kakai takatakai ʻi he māmaní.

20. ʻOku anga-fēfē ʻa e lelei lahi ange ʻa hotau tuʻungá ʻia Noa, ʻĒpalahame, mo Mōsesé?

²⁰ ʻOku tau maʻu ʻo lahi ʻaupito ange, ʻi he meʻa ko ia naʻe maʻu ʻe Noa, ʻĒpalahame, mo Mōsesé. ʻOku tau maʻu ʻa e Folofola kakato ʻa e ʻOtuá​—ko e konga lahi ʻo iá kuo ʻosi fakahoko. ʻI he vakai atu ki he meʻa kotoa pē ʻoku leaʻaki ʻe he Tohitapú ʻo fekauʻaki mo e kau tangata mo e kau fefine ʻa ia kuo nau fakamoʻoniʻi ko e Kau Fakamoʻoni anga-tonu kinautolu ʻa Sihova ʻi he fehangahangai mo e ngaahi fakatanga kehekehe kotoa pē, ʻoku naʻinaʻi mai ʻi he Hepelu 12:1: “Ke tau huʻihuʻi ʻa e fakamamafa kotoa pe, mo e angahala ʻoku tau moʻuangofua ki ai, pea tau kitaki atu ʻetau lele he fakapuepue kuo tala humaki mai kiate kitautolu.” Ko ʻetau tuí ʻoku ʻikai ko ha meʻa ia ke ʻai noaʻia. Ko e “angahala ʻoku tau moʻuangofua ki ai” ko e ʻikai ha tuí. ʻOku fiemaʻu ha faitau mālohi kapau ʻoku fiemaʻu ke tau hokohoko atu ʻi he “fononga ʻoku fai aki ʻa e tui.”

[Fakamatala ʻi lalo]

Ko e Hā Haʻo Tali?

◻ Ko e hā ʻoku kau ki he “fononga ʻoku fai aki ʻa e tui”?

◻ ʻOku tau lava fēfē ʻo maʻu ʻa e ʻaonga mei he founga ʻo hono fakahāhā ʻe Noa ʻa e tuí?

◻ ʻOku tokoniʻi fēfē kitautolu ʻi he founga ʻo hono ngāueʻi ʻe ʻĒpalahame ʻa e tuí?

◻ Ko e hā ʻoku tuhu ai ʻa e Tohitapú kia Mōsese ko ha faʻifaʻitakiʻanga ʻo e tuí?

[Fakatātā ʻi he peesi 10]

Naʻe fononga ʻa ʻĒpalahame ʻaki ʻa e tuí

[Fakatātā ʻi he peesi 10]

Naʻe fakahāhā ʻe Mōsese mo ʻĒlone ʻa e tui ʻi he taimi naʻá na ʻi he ʻao ai ʻo Feló