Talatupuʻa 4: Ko e ʻOtuá ko ha Tolu-Tahaʻi-ʻOtua

Ko e hā e tupuʻanga ʻo e talatupuʻá? “ʻOku malava ke malanga hake ʻa e fakakaukau ko e tokāteline Tolu-Tahaʻi-ʻOtuá naʻe toki faʻu ia ʻi he konga ki mui ʻo e senituli hono 4. ʻI ha ʻuhinga, ʻoku moʻoni eni . . . Ko e faʻunga ‘ʻOtua ʻe taha ʻi he Toko Tolú’ naʻe ʻikai fokotuʻu fefeka ia, ʻo ʻikai tali kakato ia ko e konga ʻo e tui faka-Kalisitiané mo e tui ne fakahaaʻi, ki muʻa ʻi he ngataʻanga ʻo e senituli hono 4.”—New Catholic Encyclopedia (1967), Voliume 14, peesi 299.

“Ko e Fakataha ʻi Nīseá naʻe fai ia ʻi Mē 20, 325 [T.S.]. Naʻe sea ai ʻa Konisitanitaine tonu, ʻo ne tataki longomoʻui ʻa e fetalanoaʻakí, peá ne fokotuʻu atu . . . ʻa e tefitoʻi moʻoni mahuʻinga ʻo fakahaaʻi ʻa e felāveʻi ʻa Kalaisi mo e ʻOtuá ʻi he tui naʻe tuku mai ʻe he fakatahá, ko e ‘taha mo e Tamaí.’ . . . ʻI he manavahē ki he ʻemipolá, ko e kau pīsopé, tuku kehe pē ʻa e toko ua, naʻa nau fakamoʻoni hingoa ki he tui fakalotú, ko e tokolahi ʻo kinautolu naʻe ʻikai ʻaupito te nau tui ki ai.”—Encyclopædia Britannica (1970), Voliume 6, peesi 386.

Ko e hā e lau ʻa e Tohi Tapú? “Kuo fonu ia [Sitīveni] ʻi he Laumālie Maʻoniʻoni; pea ʻi heʻene sio fakamamaʻu ki he langi naʻa ne ʻilo ʻa e Sikaina ʻo e ʻOtua, pea mo Sisū ʻoku ne tuʻu mei he toʻomataʻu ʻo e ʻOtua; pea ne pehē, ʻOku ou sio ni ki he ngaahi langi kuo matangaki, pea ko e Fanautama ʻa Tangata ʻoku ne tuʻu mei he toʻomataʻu ʻo e ʻOtua.”—Ngāue 7:55, 56.

Ko e hā naʻe fakaeʻa ʻi he vīsone ko ení? ʻI he fonu he ivi ngāue ʻo e ʻOtuá, naʻe sio ai ʻa Sitīveni kia Sīsū “ʻoku ne tuʻu mei he toʻomataʻu ʻo e ʻOtua.” ʻOku hā mahino leva naʻe ʻikai toe hoko ʻa Sīsū ko ha ʻOtua ʻi he hili ʻene toetuʻu ki hēvaní, ka ʻi hono kehé, ko ha meʻamoʻui laumālie mavahe ia. ʻOku ʻikai ha lave ia ki ha tokotaha hono tolu ʻi he tafaʻaki ʻo e ʻOtuá ʻi he fakamatala ko ení. Neongo e feinga ke maʻu ha ngaahi kupu ʻi he Tohi Tapú ke ne poupouʻi ʻa e tokāteline Tolu-Tahaʻi-ʻOtuá, ko e pātele Tominika ko Marie-Émile Boismard naʻá ne tohi ʻi heʻene tohi À l’aube du christianisme—La naissance des dogmes (ʻI he Mafoa e Ata ʻo e Lotu Faka-Kalisitiané—Ko e Fanauʻi ʻo e Ngaahi Tokāteliné): “Ko e fakamatala ko ia ʻoku ʻi ai ʻa e toko tolu ʻi he ʻOtua ʻe tahá . . . ʻoku ʻikai lava ke lau ia ʻi ha feituʻu ʻi he Fuakava Foʻoú.”

Ko e tokāteline naʻe pouaki ʻe Konisitanitainé naʻe fakataumuʻa iá ke fakangata ai ʻa e māvahevahe ʻi he lotoʻi Siasí ʻi he senituli hono faá. Kae kehe, naʻe langaʻi moʻoni hake ai ha toe ʻīsiu ʻe taha: Ko Melé, ʻa e fefine naʻá ne fanauʻi ʻa Sīsuú, “ko e Faʻē ia ʻa e ʻOtuá”?

Fakafehoanaki ʻa e ngaahi veesi Tohi Tapu ko ení: Mātiu 26:39; Sione 14:28; 1 Kolinito 15:27, 28; Kolose 1:15, 16

MOʻONIʻI MEʻA:

Ko e tokāteline Tolu-Tahaʻi-ʻOtuá ko ha toki faʻu ia ʻi he konga ki mui ʻo e senituli hono faá

[Fakatātā ʻi he peesi 7]

[Maʻuʻanga Tā ʻi he peesi 7]

Museo Bardini, Florence