Naʻe “Hokosia ha Vahaʻa Taimi ʻo e Nonga” ʻe he Fakatahaʻangá

1, 2. Ko e hā naʻe taumuʻa atu ʻa Saula ke ne fai ʻi Tāmasikusí?

ʻOKU fakaofiofi atu ʻa e kau fononga mataʻi-fītaʻá ki Tāmasikusi, ʻa ia ʻoku nau taumuʻa atu ke nau fakahoko ai ha foʻi faʻufaʻu fulikivanu. Te nau laku ʻa e kau ākonga fehiʻanekinaʻi ʻa Sīsuú ki tuʻa mei honau ngaahi ʻapí, haʻi kinautolu, fakamaaʻi kinautolu, pea fau atu kinautolu ki Selusalema ke nau fehangahangai ai pea mo e tautea ʻa e Sanetalimí.

² Ko e taki ʻo e foʻi kulupu fakamālohi ko ʻení ko hono hingoá ko Saula, ʻa ia kuo ʻosi tau ha toto ʻi hono nimá.a He ne toki ʻosi atu pē eni ʻene sio fakataha mo e leleiʻia ʻi hono hanga ʻe hono ngaahi kaungā-mamahiʻi-lotú ʻo tolomakaʻi ʻa Sitīveni ki he maté, ʻa ia ko ha ākonga anga-līʻoa ʻa Sīsū. (Ngā. 7:57–8:1) ʻI he ʻikai ke fiemālie pē ʻi hono fakatangaʻi fefeka ʻa e kau muimui ʻo Sīsū ʻoku nau nofo ko ia ʻi Selusalemá, ʻoku hoko ʻa Saula ia ʻo hangē ha mata-afi ulouló ʻo ne mateuteu atu ke ʻai ke toe mafola atu ʻa e ngaahi afi ʻo e fakatangá. ʻOku loto ʻa Saula ke ne fakaʻauhamālie atu ʻa e faʻahinga naʻá ne vakai ki ai ko ha kulupu lotu mavahe fakakina ʻa ia naʻe ʻiloa ko e “ʻAlunga ʻo e ʻEikí.”​—Ngā. 9:1, 2; sio ki he puha “Mafai Naʻe Maʻu ʻe Saula ʻi Tāmasikusí.”

3, 4. (a) Ko e hā naʻe hoko kia Saulá? (e) Ko e hā ʻa e ngaahi fehuʻi te tau lāulea ki aí?

³ Fakafokifā pē, ʻoku ʻātakaiʻi ʻa Saula ʻe ha maama ngingila. ʻOku sio ʻa hono ngaahi kaungāfonongá ki he māmá ka ʻoku nau tuʻu fakalongomate pē ʻi heʻenau moʻutāfuʻuá. Ko Saula, ʻi hono taaʻi ʻo kuí, ʻokú ne haʻulu hifo ki lalo. ʻI he ʻikai ke ne malava ʻo sió, ʻoku fanongo ʻa Saula ki ha leʻo mei hēvani ʻokú ne pehē mai: “ʻE Saula, ʻe Saula, ko e hā ʻokú ke fakatangaʻi ai aú?” ʻI heʻene fuʻu ʻohovalé, ʻoku ʻeke ange ʻe Saula: “Ko hai koe, Tangataʻeiki?” Ko e tali ʻoku fai ange kia Saulá kuo pau pē ʻokú ne ʻai ia ke ne mātuʻaki moʻutāfuʻua moʻoni: “Ko Sīsū au, ʻa ia ʻokú ke fakatangaʻí.”​—Ngā. 9:3-5; 22:9.

⁴ Ko e hā ʻe lava ke tau ako mei he ʻuluaki ngaahi lea ʻa Sīsū kia Saulá? ʻE lava fēfē ke tau maʻu ʻaonga mei hono sivisiviʻi ʻa e ngaahi meʻa naʻe hoko takatakai ʻi he tafoki mai ko ia ʻa Saulá? Pea ko e hā ʻa e ngaahi lēsoni ʻe lava ke tau ako mei he anga hono ngāueʻaki ʻe he fakatahaʻangá ʻa e vahaʻa taimi ʻo e nonga ʻa ia naʻe hoko mai ʻi he hili ko ia ʻa e tafoki mai ʻa Saulá?

5, 6. Ko e hā ʻe lava ke tau ako mei he ngaahi lea ʻa Sīsū kia Saulá?

⁵ ʻI he taimi naʻe taʻofi tuʻu ai ʻe Sīsū ʻa Saula ʻi he hala ki Tāmasikusí, naʻe ʻikai te Ne ʻeke ange ʻe ia: “Ko e hā ʻokú ke fakatangaʻi ai ʻeku kau ākongá?” Hangē ko ia naʻe lave ki ai ʻi ʻolungá, naʻá ne pehē: “Ko e hā ʻokú ke fakatangaʻi ai aú?” (Ngā. 9:4) ʻIo, ʻoku ongoʻi fakafoʻituitui ʻe Sīsū ʻa e ngaahi ʻahiʻahi naʻe hokosia ʻe heʻene kau muimuí.​—Māt. 25:34-40, 45.

⁶ Kapau ʻoku fakafeʻātungiaʻi koe koeʻuhí ko hoʻo tui kia Kalaisí, ʻe lava ke ke fakapapauʻi ko Sihova mo Sīsū fakatouʻosi ʻokú na ʻafioʻi ʻa ho tuʻungá. (Māt. 10:22, 28-31) ʻE ʻikai nai ke toʻo atu ʻa e ʻahiʻahí ia he taimí ni. Manatuʻi, naʻe sio ʻa Sīsū ʻi he kaunga ʻa Saula ki he mate ʻa Sitīvení, pea sio ki hono fau atu ʻe Saula ʻa e kau ākonga faitōnungá mei honau ngaahi ʻapí ʻi Selusalemá. (Ngā. 8:3) Kae kehe, naʻe ʻikai ke kau mai ʻa Sīsū ia ʻo ne fai ha meʻa ki ai ʻi he taimi ko iá. Ka neongo ia, ko Sihova, fakafou ʻia Kalaisi, naʻá ne ʻoange kia Sitīveni pea mo e kau ākonga kehé ʻa e mālohi naʻe fiemaʻu kiate kinautolu ke nau hoko ai ʻo nofoʻaki faitōnungá.

 7. Ko e hā kuo pau ke ke faí ka ke lava ai ʻo kātakiʻi ʻa e fakatangá?

⁷ Te ke lava foki mo koe ke ke kātakiʻi ʻa e fakatangá kapau te ke fai eni: (1) Fakapapauʻi ke nofoʻaki mateaki, ʻo tatau ai pē pe ko e hā ʻe hokó. (2) Kole ʻa e tokoni ʻa Sihová. (Fil. 4:6, 7) (3) Tuku ʻa e sāuní ia ki he toʻukupu ʻo Sihová. (Loma 12:17-21) (4) Maʻu ʻa e falala ʻe tokonaki atu ʻe Sihova kiate koe ʻa e mālohi ke ke kātakiʻaki kae ʻoua kuó ne sio kuo feʻungamālie ke toʻo atu ʻa e ʻahiʻahí.​—Fil. 4:12, 13.

8, 9. Naʻe anga-fēfē nai ʻa e ongoʻi ʻa ʻAnanaia ʻo fekauʻaki mo e foʻi ngāue ne vaheʻi angé?

⁸ ʻI he hili ʻene tali ange ʻa e fehuʻi ʻa Saula, “Ko hai koe, ʻEiki?” naʻe pehē ange ʻe Sīsū kiate ia: “Tuʻu hake ʻo hū ki he koló, pea ʻe tala atu kiate koe ʻa e meʻa kuo pau ke ke faí.” (Ngā. 9:6) Naʻe taki atu ʻa Saula ʻa ia kuó ne kuí ki hono nofoʻangá ʻi Tāmasikusi, ʻa ia naʻá ne ʻaukai mo lotu ai ʻi he ʻaho ʻe tolu. ʻI he lolotonga iá, naʻe lea ai ʻa Sīsū ʻo fekauʻaki mo Saula ki ha ākonga ʻi he kolo ko iá, ko ha tangata ko hono hingoá ko ʻAnanaia, ʻa ia naʻe “talanoaʻi ʻa e lelei ʻa hono ongoongó ʻe he kau Siu kotoa” naʻe nofo ʻi Tāmasikusí.​—Ngā. 22:12.

⁹ Fakakaukau atu ki he ngaahi ongoʻi fakatupu puputuʻu kuo pau naʻe maʻu ʻe ʻAnanaiá! Ko eni, ko e ʻUlu ē ʻo e fakatahaʻangá, ʻa Sīsū Kalaisi naʻe toetuʻú, naʻe lea fakafoʻituitui ange kiate ia, ʻo fili ia ki ha foʻi ngāue makehe. He monū moʻoni ia naʻá ne maʻú, ka ʻi he taimi tatau ko ha foʻi ngāue anga-kehe moʻoni ia! ʻI he taimi naʻe tala ange ai kiate ia kuo pau ke ne lea kia Saulá, naʻe tali ange ʻa ʻAnanaia: “ʻEiki, kuó u fanongo mei he tokolahi ʻo fekauʻaki mo e tangatá ni, ʻa e maumau kotoa naʻá ne fai ki hoʻo kakai tapú ʻi Selusalemá. Pea ko eni kuó ne maʻu ʻa e mafai mei he houʻeiki taulaʻeikí ke puke ʻa e faʻahinga kotoa ʻoku ui ki ho huafá.”​—Ngā. 9:13, 14.

10. Ko e hā ʻoku tau ako ʻo fekauʻaki mo Sīsuú ʻi he anga ko ia ʻo ʻene fakafeangai kia ʻAnanaiá?

¹⁰ Naʻe ʻikai ke valokiʻi ʻe Sīsū ia ʻa ʻAnanaia ʻi heʻene fakahaaʻi ange ʻa ʻene hohaʻá. Kae kehe, naʻe ʻoange ʻe Sīsū kiate ia ha fakahinohino mahino. Pea naʻe fakangeingeiaʻi ia ʻe Sīsū ʻaki ʻene tala ange kiate ia ʻa e ʻuhinga naʻá ne loto ai ke ne fakahoko ʻa e ngāue anga-kehe ko ʻení. Naʻe tala ange ʻe Sīsū ʻo fekauʻaki mo Saula: “Ko e tangatá ni ko ha ipu kuo fili maʻaku ke ne fataki hoku huafá ki he ngaahi puleʻangá pea pehē ki he ngaahi tuʻí pea mo e kau ʻIsilelí. He te u fakahaaʻi mahino kiate ia ʻa hono lahi ʻo e ngaahi meʻa kuo pau ke ne faingataʻaʻia ai koeʻuhi ko hoku huafá.” (Ngā. 9:15, 16) Naʻe talangofua ʻa ʻAnanaia kia Sīsū ʻi he taimi pē ko iá. Naʻá ne maʻu ʻa e tokotaha fakatanga ko Saulá peá ne pehē ange kiate ia: “Saula, tokoua, ko e ʻEiki ko Sīsuú, ʻa ia naʻe hā atu kiate koe ʻi he hala naʻá ke haʻu aí, kuó ne fekau mai au koeʻuhi ke ke lava ʻo toe ʻā pea ke ke fonu ʻi he laumālie māʻoniʻoní.”​—Ngā. 9:17.

11, 12. Ko e hā ʻoku tau ako mei he ngaahi meʻa naʻe hoko ʻa ia ʻoku kau ki ai ʻa Sīsū, ʻAnanaia, pea mo Saulá?

¹¹ ʻOku lahilahi e ngaahi moʻoniʻi meʻa ʻoku hoko ʻo hā mahino mai mei he ngaahi meʻa naʻe hoko ʻa ia naʻe kau ki ai ʻa Sīsū, ʻAnanaia, pea mo Saulá. Ko e fakatātaá, ʻoku fakahoko ʻe Sīsū ha ngafa longomoʻui ʻi hono tataki ʻa e ngāue fakamalangá, ʻo hangē tofu pē ko ia naʻá ne palōmesiʻaki te ne faí. (Māt. 28:20) Neongo ʻoku ʻikai te ne lea fakahangatonu ki he tokotaha taki taha ʻi he ʻahó ni, ʻoku tataki ʻe Sīsū ʻa e ngāue fakamalangá ʻo fakafou ʻi he tamaioʻeiki anga-tonú, ʻa ia kuó ne fakanofo he taimí ni ke ne tokangaʻi ʻa e kau sevāniti ʻo hono falé. (Māt. 24:45-47) ʻI he malumalu ʻo e tataki ʻa e Kulupu Pulé, ʻoku fekauʻi atu ai ha kau malanga mo e kau tāimuʻa ke nau kumi ki he faʻahinga ʻoku nau loto ke ʻilo lahi ange ʻo fekauʻaki mo Kalaisí. Hangē ko ia naʻe lave ki ai ʻi he vahe naʻe toki ʻosí, ko e tokolahi ʻo e faʻahinga peheé kuo nau fai ʻa e lotu ki ha tataki pea ʻi he hili pē iá kuo fetuʻutaki ange kiate kinautolu ʻa e Kau Fakamoʻoni ʻa Sihová.​—Ngā. 9:11.

¹² Naʻe tali talangofua ʻe ʻAnanaia ha foʻi ngāue naʻe vaheʻi ange pea naʻe tāpuakiʻi ia. ʻOkú ke talangofua ki he fekau ko ia ke faifakamoʻoni fakaʻāulilikí, ʻo aʻu kapau ʻoku ʻai koe ʻe he foʻi ngāue ko eni kuo vaheʻi atú ke ke ongoʻi manavasiʻi? Ki he niʻihi, ko e ʻalu mei he fale ki he falé pea mo e fetaulaki mo e kau solá ʻe lava ke ne fakatupunga ʻa e ongoʻi loto-moʻua. Ko e niʻihi ʻoku nau ongoʻi ʻe kinautolu ko ha pole ia ke malanga ki he kakaí ʻi he ngaahi feituʻu pisinisí, ʻi he halá, pe fakafou ʻi he telefoní pe faitohí. Naʻe ikuʻi ʻe ʻAnanaia ʻene manavaheé pea naʻá ne maʻu ai ʻa e monū ko hono tokoniʻi ʻa Saula ke ne maʻu ʻa e laumālie māʻoniʻoní.b Naʻe lavameʻa ʻa ʻAnanaia koeʻuhí naʻá ne falala kia Sīsū peá ne vakai kia Saula ʻi he tuʻunga ko hono tokoua ia. ʻE lava ke tau ikuʻi ʻetau ngaahi ongoʻi manavaheé kapau, ʻi he hangē ko ʻAnanaiá, te tau falala ko Sīsuú ʻokú ne tataki ʻa e ngāue fakamalangá, kapau te tau kaungāongoʻi ki he kakaí, pea kapau ʻe aʻu ʻo tau vakai ki he faʻahinga tāutaha fakatupu manavahē tahá te nau ala lava ke hoko ko hotau fanga tokoua.​—Māt. 9:36.

13, 14. Kapau ʻokú ke ako ʻa e Tohi Tapú ka ʻoku teʻeki ai ke ke papitaiso, ko e hā ʻe lava ke ke ako mei he faʻifaʻitakiʻanga ʻa Saulá?

¹³ Naʻe vave ʻa e ngāue ʻa Saula ʻo fakatatau ki he meʻa naʻá ne akó. ʻI he hili hono fakamoʻui iá, naʻá ne hoko ʻo papitaiso pea kamata ke ne feohi vāofi mo e kau ākonga ʻi Tāmasikusí. Ka naʻá ne fai ʻe ia ʻa e meʻa lahi ange. “Tuai-e-kemo naʻe kamata ke ne malanga ʻi he ngaahi sinakoké ʻo fekauʻaki mo Sīsū, ko e tokotahá ni ko e ʻAlo ʻo e ʻOtuá.”​—Ngā. 9:20.

¹⁴ Kapau ʻokú ke ako ʻa e Tohi Tapú ka ʻoku teʻeki ai ke ke papitaiso, te ke hoko ʻo hangē ko Saulá ʻo fakapapauʻi ke ke ngāue ʻo fakatatau ki he meʻa ʻokú ke akó? ʻIo, naʻe fakamoʻoni sio tonu ʻa Saula ʻi ha mana naʻe fakahoko ʻe Kalaisi, pea ʻoku ʻikai ha veiveiua naʻe tokoni ʻa e meʻá ni ke ne ueʻi ia ke ne fai ha meʻa. Ka naʻe fakamoʻoni sio tonu foki mo ha niʻihi kehe ʻi he ngaahi mana naʻe fakahoko ʻe Sīsuú. Hangē ko ʻení, naʻe sio ha kulupu ʻo e kau Fālesí ʻi heʻene fakamoʻui ha tangata nima mate, pea ko ha fuʻu tokolahi ʻo e kau Siú ʻi he tuʻunga fakalūkufuá naʻa nau ʻiloʻi naʻe fokotuʻu hake ʻe Sīsū ʻa Lāsalosi mei he maté. Neongo ia, naʻe kei taʻemahuʻingaʻia pē ʻa e tokolahi ia ʻo kinautolu, ʻo aʻu ki heʻenau fakafepaki. (Mk. 3:1-6; Sione 12:9, 10) ʻI hono kehé, naʻe liliu ʻa Saula ia. Ko e hā naʻe fai ai ʻe Saula ia ha fakafeangai lelei kae ʻikai ke fai pehē ʻa e niʻihi kehé iá? Koeʻuhí naʻá ne manavahē ki he ʻOtuá ʻo lahi ange ia ʻi he manavahē tangatá pea naʻá ne houngaʻia loloto ʻi he meesi naʻe fakahāhā ange ʻe Kalaisi kiate iá. (Fil. 3:8) Kapau te ke fakafeangai pehē ʻi he tuʻunga meimei tatau, ʻe ʻikai te ke tuku ai ha meʻa ʻe taha ke ne taʻofi koe mei he kau atu ʻi he ngāue fakamalangá pea mei he hoko ʻo taau ki he papitaisó.

15, 16. Ko e hā ʻa e meʻa naʻe fai ʻe Saula ʻi he ngaahi sinakoké, pea naʻe anga-fēfē ʻa e fakafeangai ki ai ʻa e kau Siu ʻi Tāmasikusí?

¹⁵ ʻE lava ke ke sioloto atu ki he ʻohovale, moʻutāfuʻua, mo e ʻita kuo pau naʻe aake hake ʻi he fuʻu kakaí ʻi he taimi naʻe kamata ke malanga ai ʻa Saula ʻo fekauʻaki mo Sīsū ʻi he ngaahi sinakoké? “ʻIkai ko e tangata ʻeni naʻá ne haveki ʻa e faʻahinga ʻi Selusalema ʻa ia naʻa nau ui ki he huafá ni?” ko ʻenau ʻeké ia. (Ngā. 9:21) ʻI heʻene fakamatala ki he liliu ʻa hono lotó ʻi he fekauʻaki mo Sīsuú, naʻe hanga ai ʻe Saula ʻo “fakamoʻoniʻi totonu ko e Kalaisí ʻeni.” (Ngā. 9:22) Ko e fakaʻuhinga totonú ʻoku ʻikai ko ha foʻi kī fakamāmanilahi ia. ʻE ʻikai lava ke ne fakaava ʻe ia ʻa e ʻatamai kotoa pē kuo haʻi sēini ʻe he talatukufakaholó pe ngaahi loto kotoa pē kuo pukenimā ʻe he hīkisiá. Ka neongo ia, naʻe ʻikai ke foʻi ʻa Saula ia.

¹⁶ ʻI he taʻu ʻe tolu ki mui aí, naʻe kei fakafepaki ai ʻa e kau Siu ʻi Tāmasikusí kia Saula. Faai atu pē, naʻa nau feinga ke tāmateʻi ia. (Ngā. 9:23; 2 Kol. 11:32, 33; Kal. 1:13-18) ʻI he taimi naʻe ʻiloʻi ai ʻa e faʻufaʻu ko iá, naʻe fili ai ʻe Saula ʻa e ʻalunga fakapotopotó peá ne mavahe ai mei he koló ʻaki ʻene tuku ke tukutuku hifo ia ʻi ha kato ʻi ha foʻi ava ʻi he ʻā ʻo e koló. ʻOku fakamatalaʻi ʻe Luke ʻa e faʻahinga naʻa nau tokoni ki he hola ʻa Saula ʻi he pō ko iá ʻo pehē naʻe ʻave ia “ʻe heʻene [Saula] kau ākongá.” (Ngā. 9:25) Ko e fakalea ko ʻení ʻokú ne fakahaaʻi mai ko e niʻihi ʻi he faʻahinga naʻe fanongo ki he lea ʻa Saula ʻi Tāmasikusí naʻa nau tali ʻa ʻene malangá pea nau hoko ai ko e kau muimui ʻo Kalaisi.

17. (a) ʻOku fēfē ʻa e fakafeangai ʻa e kakaí ki he moʻoni ʻo e Tohi Tapú? (e) Ko e hā ʻoku totonu ke tau hokohoko atu hono faí, pea ko e hā hono ʻuhingá?

¹⁷ ʻI he taimi naʻe ʻuluaki kamata ai ke ke talanoa ki ho fāmilí, ngaahi kaungāmeʻá, pea mo e niʻihi kehé ʻo fekauʻaki mo e ngaahi meʻa lelei naʻá ke akó, ʻoku pau pē naʻá ke ʻamanekina ʻe tali ʻe he tokotaha kotoa ʻa e tonu fakaʻaufuli ko ia ʻa e moʻoni ʻo e Tohi Tapú. Kuo fai pehē nai ʻa e niʻihi, lolotonga iá kuo ʻikai ke fai pehē ʻa e tokolahi ia. Ko e moʻoni, kuo ngaohi nai koe ʻe he ngaahi mēmipa ʻi ho fāmilí tonu ʻo ke hangē ha filí. (Māt. 10:32-38) Kae kehe, kapau ʻokú ke hokohoko atu ke fakaleleiʻi ʻa hoʻo malava ke fakaʻuhinga mei he Folofolá pea kapau te ke tauhi maʻu ha ʻulungaanga faka-Kalisitiane, naʻa mo e faʻahinga ʻoku nau fakafepaki atu kiate koé ʻe lava ke faifai atu pē pea liliu honau lotó.​—Ngā. 17:2; 1 Pita 2:12; 3:1, 2, 7.

18, 19. (a) ʻI he taimi naʻe fakapapauʻi ai ʻe Panepasa ʻa e hoko ʻa Saula ko ha ākongá, ko e hā ʻa e ola naʻe hoko aí? (e) ʻE lava fēfē ke tau faʻifaʻitaki kia Panepasa mo Saula?

¹⁸ ʻI he taimi naʻe hū ai ʻa Saula ki Selusalemá, ʻoku lava pē ke mahinoʻi ʻa e ʻuhinga naʻe fakataʻetaʻetui ai ʻa e kau ākongá ki heʻene ngaahi taukaveʻi ko ia ʻo pehē ko ia eni kuó ne hoko ko ha ākongá. Kae kehe, ʻi he taimi naʻe fakapapauʻi ai ʻe Panepasa ʻa e hoko ʻa Saula ko ha ākongá, naʻe tali ia ʻe he kau ʻapositoló, pea naʻá ne nofo mo kinautolu ʻi ha taimi. (Ngā. 9:26-28) Naʻe fakapotopoto ʻa Saula, ka naʻe ʻikai te ne maaʻi ʻa e ongoongo leleí. (Loma 1:16) Naʻá ne malanga loto-toʻa ʻi Selusalema, ʻa e feituʻu tonu ko ia naʻá ne kamata ai ʻa hono fakatangaʻi kakaha ʻa e kau ākonga ʻa Sīsū Kalaisí. ʻI he fakatokangaʻi hake ʻe he kau Siu ʻi Selusalemá ko honau taki-taú eni kuo tafoki ia ki he tafaʻaki ʻe tahá, naʻa nau ongoʻi fakaliliʻa mo moʻutāfuʻua pea nau feinga ai he taimi ko ʻení ke tāmateʻi ia. “ʻI hono ʻiloʻi eni ʻe he fanga tokouá,” ko e lau ia ʻa e fakamatalá, “naʻa nau ʻomai [ʻa Saula] ki Sesalia ʻo nau tuku atu ia ki Tāsusi.” (Ngā. 9:30) Naʻe fakamoʻulaloa ʻa Saula ki he fakahinohino ʻa Sīsuú ʻa ia naʻe ʻomi fakafou ʻi he fakatahaʻangá. Naʻe maʻu ʻaonga fakatouʻosi ai ʻa Saula pea mo e fakatahaʻangá.

¹⁹ Fakatokangaʻi ange naʻe tamuʻomuʻa ʻa Panepasa ke tokoni kia Saula. ʻOku ʻikai ha veiveiua naʻe tokoni ʻa e foʻi ngāue anga-lelei ko ʻení ke fakatupulekina ai ʻa e vahaʻangatae kaungāmeʻa māfana naʻe tupu ʻi he vahaʻa ʻo e ongo sevāniti faivelenga ko ʻeni ʻa Sihová. ʻOkú ke loto-lelei, ʻo hangē ko Panepasá, ke ke tokoni ki he faʻahinga foʻou ʻi he fakatahaʻangá, ʻo ngāue fakataha mo kinautolu ʻi he malaʻe malangá pea tokoniʻi kinautolu ke nau fakalakalaka fakalaumālie? ʻE tāpuakiʻi lahi koe kapau te ke fai pehē. Kapau ko ha tokotaha malanga foʻou koe ʻo e ongoongo leleí, ʻokú ke tali, ʻo hangē ko Saulá, ʻa e tokoni ʻoku fai atu kiate koé? ʻI he ngāue fakataha mo e kau malanga taukei angé, ʻe fakaleleiʻi ai ʻa hoʻo pōtoʻi ʻi he ngāue fakafaifekaú, ʻe tupulekina ai ʻa hoʻo fiefiá, pea te ke faʻu ai ha ngaahi haʻi fakaekaungāmeʻa ʻa ia ʻe lava ke tuʻuloa.

20, 21. Kuo anga-fēfē hono mātuʻaki ngāue ʻaonga ʻaki ʻe he kau sevāniti ʻa e ʻOtuá he kuohilí mo e lolotongá ni ʻa e ‘ngaahi vahaʻa taimi ʻo e nongá’?

²⁰ ʻI he hili ʻa e tafoki mai ʻa Saulá pea mo ʻene mavahe ʻi ha tuʻunga malú, “ko e fakatahaʻanga ʻi he kotoa ʻo Siutea mo Kāleli mo Samēliá naʻa nau hokosia ha vahaʻa taimi ʻo e nonga.” (Ngā. 9:31) Naʻe anga-fēfē hono ngāueʻaki ʻe he kau ākongá ʻa e “taimi faingamālie” ko ʻení? (2 Tīm. 4:2) ʻOku pehē ʻe he fakamatalá naʻe hoko ʻo “langa hake” kinautolu. Ko e kau ʻapositoló mo e fanga tokoua fua fatongia kehé naʻa nau fakaivimālohiʻi ʻa e tui ʻa e kau ākongá pea nau takimuʻa ʻi he hoko ʻa e fakatahaʻangá ʻo “ʻaʻeva . . . ʻi he manavahē kia Sihová pea ʻi he fakafiemālie ʻa e laumālie māʻoniʻoní.” Ko e fakatātaá, naʻe ngāueʻaki ʻe Pita ʻa e taimi ko iá ke ne fakaivimālohiʻi ai ʻa e kau ākonga ʻi he kolo ko Litá ʻi he Lautoka ko Sāloní. Ko ʻene ngaahi feingá naʻe ʻai ai ʻa e tokolahi naʻa nau nofo takai aí ke nau “tafoki ki he ʻEikí.” (Ngā. 9:32-35) Naʻe ʻikai ke hoko ʻa e kau ākongá ʻo fakaleluʻi ʻe he tuli ki he ngaahi meʻa kehé ka naʻa nau tōtōivi ʻi hono fai ʻa e fetokoniʻakí mo hono malangaʻi ʻa e ongoongo leleí. Ko e olá naʻe hoko ai ʻa e fakatahaʻangá ʻo “tupu fakautuutu ai pē.”

²¹ ʻI he ofi ki he ngataʻanga ʻo e senituli hono 20, naʻe hokosia ai ʻe he Kau Fakamoʻoni ʻa Sihová ʻi he ngaahi fonua lahi ʻi he tuʻunga meimei tatau ha “vahaʻa taimi ʻo e nonga.” Ko e ngaahi founga-pule ʻa ia naʻa nau fakafeʻātungiaʻi ʻa e kakai ʻa e ʻOtuá ʻi he ngaahi hongofuluʻi taʻu naʻe fakafokifā pē ʻene ngatá, pea ko e ngaahi fakataputapui ʻe niʻihi ʻi he ngāue fakamalangá naʻe tukutukuange atu pe toʻo ʻosi atu ia. Naʻe puke ai ʻe he laui mano ʻo e Kau Fakamoʻoní ʻa e faingamālié ni ke malanga ai ki he kakaí, fakataha mo ha ngaahi ola fakatoʻoaloto.

22. ʻE lava fēfē ke ke mātuʻaki ngāue ʻaonga ʻaki ʻa e tauʻatāina ʻokú ke maʻú?

²² ʻOkú ke ngāue lelei ʻaki ʻa e tauʻatāina ʻokú ke maʻú? Kapau ʻokú ke nofo ʻi ha fonua ʻokú ne maʻu ʻa e tauʻatāina fakalotú, ʻe saiʻia ʻa Sētane ke ne fakaʻaiʻai koe ke ke tuli ki he ngaahi koloa fakamatelié, kae ʻikai ko e ngaahi meʻa ʻo e Puleʻangá. (Māt. 13:22) ʻAi ke ʻoua ʻe fakaleluʻi ʻa hoʻo tokangá. Ngāue lavameʻa ʻaki ha faʻahinga vahaʻa taimi pē ʻo e nongá ʻokú ke maʻu nai he taimí ni. Vakai ki he ngaahi taimi peheé ko ha ngaahi faingamālie ia ke faifakamoʻoni fakaʻāuliliki ai pea ke langa hake ai ʻa e fakatahaʻangá. Manatuʻi ange, ko e ngaahi tuʻunga ʻokú ke ʻi aí ʻe lava pē ke liliu fakafokifā ia.

23, 24. (a) Ko e hā ʻa e ongo poini ʻoku tau ako mei he talanoa ʻo kau kia Tāpaitá? (e) Ko e hā ʻoku totonu ko ʻetau fakapapaú ia?

²³ Fakakaukau atu ki he meʻa naʻe hoko ki ha ākonga ko hono hingoá ko Tāpaita, pe Toakase. Naʻá ne nofo ʻi Siopa, ʻa ia ko ha kolo naʻe ʻikai ke mamaʻo mei Lita. Ko e tuofefine faitōnunga ko ʻení naʻá ne ngāue fakapotopoto ʻaki ʻa hono taimí mo ʻene ngaahi koloá, ʻa ia naʻá ne “fai ʻa e ngaahi ngāue lelei lahi mo e ngaahi foaki ʻofa.” Kae fakafokifā pē, naʻá ne puke peá ne mate.c Ko ʻene maté naʻe fakatupunga ai ʻa e mamahi lahi ʻi he lotolotonga ʻo e kau ākonga ʻi Siopá, tautautefito ki he lotolotonga ʻo e kau uitou naʻe aʻu ki ai ʻa ʻene anga-leleí. ʻI he aʻu ʻa Pita ki he fale ʻa ia naʻe teuteu ai ʻa hono sinó ki he tanú, naʻá ne fakahoko ai ha mana ʻa ia naʻe teʻeki ai ha mana pehē ia kuo fakahoko ki muʻa ʻe he kau ʻapositolo ʻa Sīsū Kalaisí. Naʻe lotu ʻa Pita peá ne fokotuʻu hake leva ʻa Tāpaita mei he maté! ʻE lava ke ke sioloto atu ki he fiefia ʻa e kau uitoú mo e kau ākonga kehé ʻi he taimi naʻe ui ai ʻe Pita ke nau foki mai ki he lokí peá ne fakahaaʻi atu ʻa Tāpaita kuó ne moʻuí? He moʻoni ē, kuo pau pē naʻe fakaivimālohiʻi kinautolu ʻe he ngaahi meʻa ko ʻeni naʻe hokó ki he ngaahi ʻahiʻahi naʻe toka mai mei muʻá! ʻOku mahinongofua mei ai ʻa e hoko ko ia ʻa e mana ko iá ʻo “ʻiloa ʻi he kotoa ʻo Siopá, pea naʻe hoko ʻa e tokolahi ko e kau tui ki he ʻEikí.”​—Ngā. 9:36-42.

²⁴ ʻOku tau ako ha ongo poini mahuʻinga ʻe ua mei he talanoa fakalotomāfana ko ʻeni ʻo kau kia Tāpaitá. (1) Ko e moʻuí ʻoku fuonounou pē. He mātuʻaki mahuʻinga moʻoni leva ē ke tau ʻai ha hingoa lelei ʻi he vakai mai ʻa e ʻOtuá ʻi he lolotonga ko ia ʻetau kei malava ke fai peheé! (Koh. 7:1) (2) Ko e ʻamanaki ʻo e toetuʻú ʻoku papau. Naʻe ʻafioʻi ʻe Sihova ʻa e ngaahi ngāue anga-lelei lahi naʻe fakahoko ʻe Tāpaitá, pea naʻá ne fakapaleʻi ia. Te ne manatuʻi ʻa ʻetau ngāue mālohí pea te ne fokotuʻu hake kitautolu kapau ʻe ngata ʻetau moʻuí ʻa kitautolu ki muʻa ia ʻi ʻĀmaketone. (Hep. 6:10) Ko ia tatau ai pē pe ʻoku tau lolotonga kātekina ha “taimi faingataʻa” pe ʻoku tau maʻu ha “vahaʻa taimi ʻo e nonga,” tuku ke tau kītaki ʻi he faifakamoʻoni fakaʻāuliliki ʻo fekauʻaki mo Kalaisí.​—2 Tīm. 4:2.