“ʻOku ʻIkai ke Filifilimānako ʻa e ʻOtuá”

1-3. Ko e hā ʻa e vīsone ʻoku maʻu ʻe Pitá, pea ko e hā ʻoku fiemaʻu ai ke tau mahinoʻi ʻa hono mahuʻingá?

KO E taʻú ko e 36 T.S. ʻOku fakamāfanaʻi ʻe he laʻā ʻo e faʻahitaʻu fakatōlaú ʻa Pita ʻi heʻene lotu ʻi he funga ʻato lafalafa ʻo ha fale ʻoku ofi ki tahi ʻi he kolo taulanga ko Siopá. Kuo feʻunga eni mo ha ngaahi ʻaho ʻa ʻene nofo ko ha tokotaha ʻaʻahi ʻi he ʻapi ko ení. Ko ʻene loto-lelei ke nofo ʻi he ʻapi ko ení ʻokú ne fakahaaʻi ai, ʻi ha tuʻunga, ha fakakaukau ʻikai tomuʻa fehiʻa. Ko e tokotaha ʻoku ʻoʻona ʻa e ʻapí ko Saimone, ko ha tokotaha tufunga kiliʻimanu ia, pea ʻoku ʻi ai ʻa e kau Siu ia heʻikai te nau nofo kinautolu mo ha tangata pehē.a Neongo ia, ʻoku teu atu eni ke ako ʻe Pita ha lēsoni mātuʻaki mahuʻinga ʻo fekauʻaki mo e taʻefilifilimānako ʻa Sihová.

² ʻI he lolotonga ʻa e lotu ʻa Pitá, ʻoku ʻāvea hono lotó. Ko e meʻa ʻokú ne sio ki ai ʻi ha vīsoné ʻe fakatupu hohaʻa ia ki ha faʻahinga tokotaha Siu pē. ʻOku ʻalu hifo mei he langí ha meʻa hangē ha fuʻu tupenú ʻoku ʻi ai ʻa e fanga monumanu taʻemaʻa ai ʻi he fakatatau ki he Laó. ʻI hono tala ange ke ne tāmateʻi ʻo kaí, ʻoku tali atu ʻe Pita: “Kuo teʻeki ai ʻaupito ke u kai ha meʻa ʻoku ʻuli mo taʻemaʻa.” Kuo ʻikai ke tuʻo taha pē ka kuo tuʻo tolu hono tala ange kiate ia: “Tuku hoʻo lau ʻoku ʻuli ʻa e ngaahi meʻa kuo fakamaʻa ʻe he ʻOtuá.” (Ngā. 10:14-16) ʻOku hanga ʻe he vīsoné ʻo ʻai ʻa Pita ke ne puputuʻu ka ʻoku ʻikai ke fuoloa.

³ Ko e hā naʻe ʻuhinga ki ai ʻa e vīsone ʻa Pitá? ʻOku mahuʻinga ke tau mahinoʻi ʻa hono ʻuhingá, he ko e uho ʻo e vīsone ko ení ko ha foʻi moʻoni loloto ia ʻo fekauʻaki mo e anga ʻo e vakai mai ʻa Sihova ki he kakaí. ʻI he tuʻunga ko e kau Kalisitiane moʻoní, ʻe ʻikai lava ke tau faifakamoʻoni fakaʻāuliliki fekauʻaki mo e Puleʻanga ʻo e ʻOtuá kae ʻoua kuo tau ako ke tau maʻu ʻa e anga ʻo e vakai ʻa e ʻOtuá ki he kakaí. Ke fakaava ʻa e ʻuhinga ʻo e vīsone ʻa Pitá, tau sivisiviʻi angé ʻa e ngaahi meʻa fakaofo naʻe hoko takatakai aí.

4, 5. Ko hai ʻa Koliniusi, pea ko e hā naʻe hoko ʻi he lolotonga ʻene lotú?

⁴ Naʻe ʻikai ke ʻiloʻi ʻe Pita ia ko e ʻaho ki muʻá ʻi Sesalia, ʻa ia ko ha kilomita nai ʻe 50 ki he tokelaú, naʻe toe maʻu ai ʻe ha tangata ko hono hingoá ko Koliniusi ha vīsone fakaʻotua. Ko Koliniusí, ko ha senituliō ia ʻi he kau tau Lomá, “ko ha tangata lotu ia.”b Naʻá ne toe hoko foki ko ha tangata maʻu fāmili faʻifaʻitakiʻanga lelei ʻa ia “naʻá ne manavahē ki he ʻOtuá fakataha mo e kotoa ʻo hono falé.” Ko Koliniusí naʻe ʻikai ko ha tokotaha ului Siu ia; ko ha Senitaile taʻekamu ia. Ka neongo ia, naʻá ne fakahāhā ʻa e manavaʻofa ki he kau Siu masivá, ʻo ne ʻoange ha tokoni fakamatelie kiate kinautolu. Ko e tangata loto-moʻoni ko ení naʻá ne “fai maʻu pē ʻa e hū tōtōaki ki he ʻOtuá.”​—Ngā. 10:2.

⁵ ʻI he 3 efiafi nai, naʻe lotu ai ʻa Koliniusi ʻi he taimi naʻá ne sio ai ki ha vīsone ʻa ia naʻe tala ange ai ʻe ha ʻāngelo kiate ia: “Ko hoʻo ngaahi lotú mo hoʻo ngaahi foaki ʻofá kuo aʻu hake ia ki he ʻOtuá pea ʻokú ne manatua ia.” (Ngā. 10:4) Hangē ko ia ko e fakahinohino ʻa e ʻāngeló, naʻe fekau atu ʻe Koliniusi ha kau tangata ke ui mai ʻa e ʻapositolo ko Pitá. ʻI he tuʻunga ko ha Senitaile taʻekamú, naʻe teu atu eni ʻa Koliniusi ke hū ʻi ha matapā ʻa ia ʻi he aʻu mai ki he taimi ko iá naʻe kei tāpuni kiate ia. Naʻe teu atu eni ke ne maʻu ʻa e pōpoaki ʻo e fakamoʻuí.

6, 7. (a) Lave ki ha meʻa naʻe hokosia ʻoku fakahaaʻi ai ʻoku tali ʻe he ʻOtuá ʻa e ngaahi lotu ʻa e faʻahinga loto-moʻoni ʻoku nau loto ke ʻilo ʻa e moʻoni ʻo kau kiate iá. (e) Ko e hā ʻe lava ke tau fakaʻosiʻaki mei he ngaahi hokosia peheé?

⁶ ʻOku tali ʻe he ʻOtuá ʻa e ngaahi lotu ʻa e faʻahinga loto-moʻoni he ʻahó ni ʻa ia ʻoku nau loto ke ʻilo ʻa e moʻoni ʻo kau kiate iá? Tau vakai angé ki ha meʻa naʻe hokosia. Naʻe tali ʻe ha fefine ʻi ʻAlipēnia ha tatau ʻo e Taua Leʻo ʻa ia naʻe hā ai ha kupu ʻo fekauʻaki mo hono ʻohake ʻo e fānaú.c Naʻá ne tala ange ki he tokotaha Fakamoʻoni naʻe fakalea ange ʻi hono matapaá: “ʻOkú ke ʻiloʻi koā ko e toki ʻosí ni atu pē ʻeku lotu ki he ʻOtuá ki ha tokoni ki hono ʻohake ʻeku ongo tamaiki fefiné! Kuó ne fekauʻi mai koe! Kuó ke aʻu tonu pē ki hoku lotó mo e meʻa tofu pē ko ia naʻá ku fiemaʻú!” Naʻe kamata ke ako ʻa e fefiné mo ʻene ongo tamaiki fefiné, pea ki mui ai naʻe kau mai ʻa hono husepānití ki he akó.

⁷ Ko ha faʻahinga hokosia hāhāmolofia nai eni? ʻIkai ʻaupito! Ko e faʻahinga hokosia eni ia kuo tuʻo lahi ʻene toutou hoko takatakai ʻi he māmaní​—ʻo tuʻo lahi ʻene toutou hokó ke fai ai ha lau ʻo pehē ko ha meʻa hokonoa pē ia. Ko e hā leva ʻe lava ke tau fakaʻosiʻakí? ʻUluakí, ʻoku tali ʻe Sihova ʻa e ngaahi lotu ʻa e faʻahinga tāutaha loto-moʻoni ʻoku kumi kiate iá. (1 Tuʻi 8:41-43; Saame 65:2) Ko hono uá, ʻoku tau maʻu ʻa e poupou fakaeʻāngeló ʻi heʻetau ngāue fakamalangá.​—Fkh. 14:6, 7.

8, 9. Ko e hā naʻe fakaeʻa ʻe he laumālié kia Pitá, pea naʻe anga-fēfē ʻene fakafeangai ki aí?

⁸ Lolotonga ʻa ʻene kei ʻi he funga ʻató, naʻe “kei fifili ʻa Pita” ki he ʻuhinga ʻo e vīsoné ʻi he taimi naʻe fakaofiofi atu ai ki he falé ʻa e kau talafekau meia Koliniusí. (Ngā. 10:17) ʻE loto-lelei nai ʻa Pita, ʻa ia naʻe tuʻo tolu ʻene pehē ʻe ʻikai te ne kai ʻa e ngaahi meʻakai naʻe lau ʻoku taʻemaʻa ʻi he fakatatau ki he Laó, ke ne ʻalu mo e kau tangatá ni ʻo hū ki he ʻapi ʻo ha Senitaile? ʻI ha founga, naʻe fakaeʻa ʻe he laumālie māʻoniʻoní ʻa e finangalo ʻo e ʻOtuá ʻi he fekauʻaki mo e meʻá ni. Naʻe tala ange kia Pita: “Vakai! ʻOku ʻeke koe ʻe ha kau tangata ʻe toko tolu. Ko ia tuʻu hake, hifo ki lalo ʻo ʻalu mo kinautolu, ʻo ʻoua ʻaupito ʻe tālaʻa, koeʻuhi he ko ʻeku fekauʻi mai kinautolu.” (Ngā. 10:19, 20) Ko e vīsone ko ia ki ha meʻa hangē ha fuʻu tupenú ʻa ia naʻe maʻu ʻe Pitá ʻoku ʻikai ha veiveiua naʻe teuʻi ai ia ke ne talangofua ki he tataki ʻa e laumālie māʻoniʻoní.

⁹ ʻI hono ʻiloʻi naʻe fakahinohinoʻi fakaʻotua ʻa Koliniusi ke ne fekauʻi mai ha faʻahinga kiate iá, naʻe fakaafeʻi ai ʻe Pita ʻa e kau talafekau Senitailé ki loto ki he falé pea “ke nau nofo mo ia ko ʻene kau ʻaʻahi.” (Ngā. 10:23a) Ko e ʻapositolo talangofuá ni naʻá ne ʻosi feʻunuʻaki ia ki he ngaahi fakalakalaka foʻou ʻi hono fakahoko ʻa e finangalo ʻo e ʻOtuá.

10. ʻOku anga-fēfē hono tataki ʻe Sihova ʻa ʻene kakaí, pea ko e hā ʻa e ongo fehuʻi ʻoku fiemaʻu nai ke tau ʻeke hifo kiate kitautolú?

¹⁰ ʻOku aʻu mai ki he ʻahó ni, ʻoku tataki fakalakalaka ʻe Sihova ʻa ʻene kakaí. (Pal. 4:18) Fakafou ʻi hono laumālie māʻoniʻoní, ʻokú ne tataki “ʻa e tamaioʻeiki anga-tonu mo potó.” (Māt. 24:45) ʻI he taimi ʻe niʻihi, te tau maʻu nai ai ha ngaahi fakamāʻalaʻala ʻi he fekauʻaki mo ʻetau mahinoʻi ʻa e Folofola ʻa e ʻOtuá pe ko ha ngaahi liliu ʻe niʻihi ʻi he ngaahi founga ngāue fakaekautahá. ʻOku lelei ke tau ʻeke hifo kiate kitautolu: ‘ʻOku anga-fēfē ʻeku fakafeangai ki he ngaahi fakatonutonu peheé? ʻOku ou fakamoʻulaloa ki he ngaahi tataki ʻa e laumālie ʻo e ʻOtuá ʻi he ngaahi meʻá ni?’

11, 12. Ko e hā naʻe fai ʻe Pita ʻi heʻene aʻu ki Sesaliá, pea ko e hā ʻa e meʻa naʻá ne toki ʻiló?

¹¹ ʻI he ʻaho hili ʻene vīsoné, ko Pita pea mo e toko hiva kehe​—ʻa e kau talafekau ʻe toko tolu naʻe fekauʻi mai ʻe Koliniusí pea mo ha ‘fanga tokoua [Siu] ʻe toko ono’ mei Siopa​—naʻa nau fononga atu ki Sesalia. (Ngā. 11:12) ʻI he talitali mai kia Pitá, naʻe fakatahatahaʻi ʻe Koliniusi “ʻa hono ngaahi kāingá mo hono ngaahi kaungāmeʻa ofí”​—ʻoku hā mahino mai ko e kau Senitaile kotoa. (Ngā. 10:24) ʻI he aʻu atu ʻa Pitá, naʻá ne fai ai ha meʻa naʻe ʻikai ʻaupito haʻane fakakaukau atu te ne teitei fai: Naʻá ne hū ki he ʻapi ʻo ha Senitaile taʻekamu! Naʻe fakamatala ʻa Pita: “ʻOku mou ʻiloʻi lelei ʻa e ʻikai ngofua ki ha Siu ke feohi pe fakaofiofi ki ha tangata ʻo ha matakali kehe, pea neongo ia, kuo fakahā mai ʻe he ʻOtuá kiate au ʻoku ʻikai totonu ke u lau ha tangata ʻoku ʻuli pe taʻemaʻa.” (Ngā. 10:28) ʻI he taimi ko ení naʻe hoko ai ʻo ʻiloʻi ʻe Pita ko e vīsone ko ia naʻá ne maʻú naʻe fakataumuʻa ia ke akoʻi ai ha lēsoni ʻa ia naʻe ʻikai ke fakangatangata pē ia ki he ngaahi faʻahinga meʻakai naʻe totonu ke kai ʻe ha taha. ʻOku ʻikai totonu ke ne “lau ha tangata [naʻa mo ha Senitaile] ʻoku ʻuli.”

¹² Naʻe talitali atu kia Pita ha faʻahinga loto-fiefanongo. “Ko kimautolu eni ʻoku mau ʻi heni kātoa ʻi he ʻao ʻo e ʻOtuá ke fanongo ki he ngaahi meʻa kotoa kuo tuʻutuʻuni ʻe Sihova ke ke leaʻakí,” ko e fakamatala ia ʻa Koliniusí. (Ngā. 10:33) Fakaʻuta atu ki he anga hoʻo ongoʻí kapau naʻá ke fanongo ki ha ngaahi lea pehē mei ha tokotaha mahuʻingaʻia! Naʻe kamataʻaki ʻe Pita ʻa e lea mālohi ko ení: “Ko e toki mahino moʻoni eni kiate au ʻoku ʻikai ke filifilimānako ʻa e ʻOtuá, ka ʻi he puleʻanga kotoa pē, ko e tangata ko ia ʻoku manavahē kiate ia mo fai ʻa e meʻa ʻoku totonú, ʻokú ne tali ia.” (Ngā. 10:34, 35) Naʻe toki ʻilo ai ʻe Pita ko e anga ʻo e vakai ʻa e ʻOtuá ki he kakaí ʻoku ʻikai ke fai ia ʻo fakatatau ki he matakalí, fonuá, pe ko ha toe ngaahi tuʻunga hā ki tuʻa kehe. Naʻe hoko atu ʻa Pita ʻo ne faifakamoʻoni ʻo fekauʻaki mo e ngāue fakafaifekau, pekia, pea mo e toetuʻu ʻa Sīsuú.

13, 14. (a) Ko e hā ʻa e meʻa mahuʻinga naʻe fakahaaʻi ʻi he fekauʻaki mo e tafoki mai ʻa Koliniusi pea mo e kau Senitaile kehe ʻi he 36 T.S.? (e) Ko e hā ʻoku ʻikai totonu ai ke tau fakamāuʻi ʻa e kakaí ʻo fakatuʻunga ʻi honau ngaahi tuʻunga hā mai ki tuʻá?

¹³ Naʻe hoko he taimi ko ení ha meʻa ʻa ia naʻe teʻeki ai ke hoko ha meʻa pehē ki muʻa: “Lolotonga ʻa e kei lea ʻa Pita,” naʻe lilingi hifo ʻa e laumālie māʻoniʻoní ki he “kakai ʻo e ngaahi puleʻangá.” (Ngā. 10:44, 45) Ko e tuʻunga pē eni ʻe taha kuo lēkooti ʻi he Folofolá ʻo kau ki hono lilingi hifo ʻo e laumālié ki muʻa ia ʻi he papitaisó. ʻI hono ʻiloʻi hake ko e fakaʻilonga eni ʻo e hōifua ʻa e ʻOtuá, naʻe hanga ai ʻe Pita ʻo “fekau ke papitaiso kinautolu,” ʻa e kau Senitaile ko iá. (Ngā. 10:48) Ko e tafoki mai ʻa e kau Senitaile ko ení ʻi he 36 T.S. naʻe fakaʻilongaʻi ai ʻa e ngata ʻa e vahaʻa taimi ko ia ʻo hono maʻu ʻe he kau Siú ʻa e hōifua makehé. (Tan. 9:24-27) ʻI heʻene takimuʻa ʻi he tuʻunga ko ení, naʻe ngāueʻaki ai ʻe Pita ʻa e kī hono tolu pea ko e kī fakaʻosi ia ʻi he “ngaahi kī ʻo e Puleʻanga.” (Māt. 16:19) Naʻe fakaava ʻe he kī ko ení ʻa e matapā ki he kau Senitaile taʻekamú ke nau hoko ko e kau Kalisitiane pani ʻe he laumālié.

¹⁴ ʻI he tuʻunga ko e kau fanongonongo ʻo e Puleʻangá ʻi he ʻaho ní, ʻoku tau ʻiloʻi “ʻoku ʻikai ha filifilimānako ʻi he ʻOtuá.” (Loma 2:11) Ko hono finangaló ia “ke fakahaofi ʻa e faʻahinga kakai kotoa pē.” (1 Tīm. 2:4) Ko ia kuo pau ke ʻoua ʻaupito te tau fakamāuʻi ʻa e kakaí ʻo fakatuʻunga ʻi honau ngaahi tuʻunga hā mai ki tuʻá. Ko e fekau ko ia kuo tuku mai kiate kitautolú ko e fiemaʻu ke tau faifakamoʻoni fakaʻāuliliki ʻo fekauʻaki mo e Puleʻanga ʻo e ʻOtuá, pea ʻoku kau ki ai ʻa e malanga ki he kakai kotoa pē, ʻo tatau ai pē pe ko e hā honau matakalí, fonuá, fōtunga hā maí, pe puipuituʻa fakalotú.

15, 16. Ko e hā naʻe fakakikihi ai ʻa e kau Kalisitiane Siu ʻe niʻihi mo Pitá, pea naʻe anga-fēfē ʻene fakamatala ki he ʻuhinga ʻo e ngaahi meʻa naʻá ne faí?

¹⁵ ʻOku ʻikai ha veiveiua ko e vēkeveke ko ia ʻa Pita ke ne fakahā ʻa e meʻa naʻe hokó, naʻá ne fononga ai ki Selusalema. ʻOku hā mahino, ko e ongoongo ko ia ʻo pehē kuo “tali” ʻe he kau Senitaile taʻekamú “ʻa e folofola ʻa e ʻOtuá” naʻe ʻuluaki aʻu ia ki ai ʻiate ia. ʻI he hili pē ʻa e aʻu atu ki ai ʻa Pitá, “naʻe kamata ʻa e kau poupou ki he kamú ke nau fakaangaʻi ia.” Naʻa nau hohaʻa koeʻuhí naʻá ne hū “ki he fale ʻo e kau tangata naʻe ʻikai kamu peá ke kai fakataha mo kinautolu.” (Ngā. 11:1-3) Naʻe ʻikai ko e ʻīsiú ia pe ʻe malava ke hoko ʻa e kau Senitailé ko ha kau muimui ʻo Kalaisi. ʻI hono kehé, naʻe vilitaki moʻoni ʻa e kau ākonga Siu ia ko iá ʻo pehē naʻe fiemaʻu ki he kau Senitailé ke nau tauhi ʻa e Laó​—ʻo kau ai ʻa e kamú​—koeʻuhí kae lava ke nau lotu kia Sihova ʻi ha tuʻunga fakahōifua. ʻOku hā mahino mai, naʻe faingataʻa ki he kau ākonga Siu ʻe niʻihi ke nau tukuange ʻa e Lao ʻa Mōsesé.

¹⁶ Naʻe anga-fēfē ʻa e fakamatala ʻa Pita ki he ʻuhinga ʻo e ngaahi meʻa naʻá ne faí? Fakatatau ki he Ngāue 11:4-16, naʻá ne fakamatala ki he ngaahi fakamoʻoni ʻe fā ʻo e tataki fakahēvaní: (1) ko e vīsone fakaʻotua naʻá ne maʻú (Veesi 4-10); (2) ko e fekau ne ʻoange ʻe he laumālié (Veesi 11, 12); (3) ko e ʻaʻahi ʻa e ʻāngeló kia Koliniusí (Veesi 13, 14); pea (4) ko hono lilingi hifo ʻa e laumālie māʻoniʻoní ki he kau Senitailé. (Veesi 15, 16) Naʻe fakaʻosiʻaki ʻe Pita ha fehuʻi mātuʻaki fakatupu fakalotoʻi: “Ko ia ai, kapau naʻe foaki ʻe he ʻOtuá ʻa e meʻaʻofa taʻetotongi tatau [ko e laumālie māʻoniʻoní] kiate kinautolu [kau Senitaile tuí] mo ia naʻá ne foaki kiate kitautolu [kau Siú] kuo tau tui ki he ʻEiki ko Sīsū Kalaisí, ko hai leva au ke u malava ke taʻofi ʻa e ʻOtuá?”​—Ngā. 11:17.

17, 18. (a) Naʻe langaʻi ʻe he fakamoʻoni naʻe ʻomi ʻe Pitá ʻa e ʻahiʻahi ko e hā ki he kau Kalisitiane Siú? (e) Ko e hā ʻe lava ai ke hoko ko ha pole ʻa hono tauhi maʻu ʻa e fāʻūtaha ʻa e fakatahaʻangá, pea ko e hā ʻa e ongo fehuʻi ʻoku lelei ke tau ʻeke hifo kiate kitautolú?

¹⁷ Ko e fakamoʻoni naʻe ʻomi ʻe Pitá naʻe langaʻi ai ha ʻahiʻahi mafatukituki ki he kau Kalisitiane Siu ko iá. Te nau malava nai ke tuku ki tafaʻaki ha faʻahinga fakaʻilonga pē ʻo e tomuʻa fehiʻá pea tali ʻa e kau Senitaile toki papitaiso foʻoú ʻi he tuʻunga ko honau ngaahi kaungā-Kalisitiane? ʻOku tala mai ʻe he fakamatalá: “ʻI heʻenau [kau ʻapositoló mo e kau Kalisitiane Siu kehé] fanongo ki he ngaahi meʻá ni, naʻe tuku ʻenau fakakikihí, pea nau fakalāngilangiʻi ʻa e ʻOtuá, ʻo pehē: ‘Tā kuo tuku atu foki ʻe he ʻOtuá ki he kakai ʻo e ngaahi puleʻangá ʻa e faingamālie ke fakatomala koeʻuhi ke nau maʻu ai ʻa e moʻuí.’” (Ngā. 11:18) Ko e tōʻonga fakakaukau lelei ko iá naʻe tauhi ai ʻa e fāʻūtaha ʻa e fakatahaʻangá.

¹⁸ Ko hono tauhi maʻu ʻa e fāʻūtahá ʻi he ʻaho ní ʻe lava ke hoko ia ko ha pole, he ko e haʻu ʻa e kau lotu moʻoní “mei he kotoa ʻo e ngaahi puleʻanga mo e ngaahi matakali mo e ngaahi kakai mo e ngaahi lea.” (Fkh. 7:9) ʻOku tau maʻu leva ai ha ngaahi matakali, anga-fakafonua, mo e ngaahi puipuituʻa kehekehe ʻi he ngaahi fakatahaʻanga lahi. ʻOku lelei ke tau ʻeke hifo kiate kitautolu: ‘Kuó u ʻosi taʻakifuʻu nai mei hoku lotó ha faʻahinga fakaʻilonga pē ʻo e tomuʻa fehiʻá? ʻOku ou ʻosi fakapapauʻi nai ke ʻoua ʻaupito te u fakaʻatā ʻa e ngaahi tōʻonga fakatupu māvahevahe ʻo e māmani ko ʻení​—ʻo kau ai ʻa e mamahiʻi-fonuá, lau matakalí, futaʻaki hoto anga-fakafonuá, pea mo e lau-lanú​—ke ne tākiekina ʻa e anga ʻo ʻeku fakafeangai ki hoku fanga tokoua Kalisitiané?’ Manatuʻi ʻa e meʻa naʻe hoko kia Pita (Kīfasi) ʻi ha ngaahi taʻu hili ʻa e tafoki mai ʻa e ʻuluaki kau Senitailé. ʻI he tukulolo ʻo fai ki he tomuʻa fehiʻa ʻa e niʻihi kehé, naʻá ne “fakamavaheʻi ia” mei he kau Kalisitiane Senitailé pea naʻe pau ai ke fakatonutonuʻi ia ʻe Paula. (Kal. 2:11-14) Tuku ke tau hanganaki maluʻi kitautolu ke toe malu ange mei he tauhele ʻo e tomuʻa fehiʻá.

19. Naʻe kamata malanga ʻa e kau Kalisitiane Siu ʻi ʻAniteoké kia hai, pea ko e hā hono olá?

¹⁹ Naʻe kamata malanga ʻa e kau muimui ʻo Sīsuú ki he kau Senitaile taʻekamú? Fakatokangaʻi ange ʻa e meʻa naʻe hoko ki mui ʻi ʻAniteoke ʻo Sīliá.d Ko e kolo ko ʻení naʻe ʻi ai ha fuʻu komiunitī Siu lahi ai, pea naʻe ʻikai ke fuʻu loko ʻi ai ha fetāufehiʻaʻaki ia ai ʻi he vahaʻa ʻo e kau Siú mo e kau Senitailé. Ko ia naʻe hoko ai ʻa ʻAniteoke ko ha ʻatimosifia lelei ia ki he malanga ko ia ki he kau Senitailé. Ko e feituʻu eni naʻe kamata talaki ai ʻe ha kau ākonga Siu ʻe niʻihi ʻa e ongoongo leleí “ki he kakai lea faka-Kalisí.” (Ngā. 11:20) Ko e ngāue fakamalanga ko ʻení naʻe ʻikai ke fakahanga pē ia ki he kau Siu lea faka-Kalisí ka naʻe toe fai foki ia ki he kau Senitaile taʻekamú. Naʻe faitāpuekina ʻe Sihova ʻa e ngāué, pea “naʻe hoko ha fuʻu tokolahi ko e kau tui.”​—Ngā. 11:21.

20, 21. Naʻe anga-fēfē hono fakahāhā ʻe Panepasa ʻa e anga-fakanānā totonú, pea ʻe lava fēfē ke tau fakahāhā ʻa e anga-fakanānā meimei tatau ʻi heʻetau fakahoko ʻetau ngāue fakafaifekaú?

²⁰ Ke fai ha tokanga ki he ngoue ko ʻeni kuo motuʻá, naʻe fekauʻi atu ai ʻe he fakatahaʻanga ʻi Selusalemá ʻa Panepasa ki ʻAniteoke. Ko e tupu ʻāfaʻafa ko ia ʻa e mahuʻingaʻiá ʻoku hā mahino mai naʻe fuʻu lahi ia kiate ia ke ne lava ʻo ngāueʻi toko taha. Ko hai ia ha toe taha ʻe feʻungamālie ange ke tokoni ki ai ka ko Saula, ʻa ia naʻe ʻamanaki atu ke ne hoko ko e ʻapositolo ki he ngaahi puleʻangá? (Ngā. 9:15; Loma 1:5) ʻE sio fakavahavahaʻa nai ʻa Panepasa ia kia Saula? ʻI hono kehé, naʻe fakahāhā ʻe Panepasa ʻa e anga-fakanānā totonu. Naʻá ne tamuʻomuʻa ke ʻalu ki Tāsusi, ke fakasio ʻa Paula, pea ʻomi ia ki ʻAniteoke ke tokoni ange. Naʻá na ngāue fakataha ai ʻi ha taʻu ʻe taha ʻi hono langa hake ʻa e kau ākonga ʻi he fakatahaʻanga aí.​—Ngā. 11:22-26a.

²¹ ʻE lava fēfē ke tau fakahāhā ʻa e anga-fakanānaá ʻi hono fakahoko ʻa ʻetau ngāue fakafaifekaú? Ko e ʻulungaanga ko ʻení ʻoku kau ki ai ʻa ʻetau ʻiloʻi hifo hotau ngaahi fakangatangatá. ʻOku tau maʻu kotoa ʻa e ngaahi mālohi mo e ngaahi malava kehekehe. Ko e fakatātaá, ʻe ola lelei nai ʻa e niʻihi ʻi he faifakamoʻoni ʻi he founga ʻikai anga-mahení pe malanga fale ki he falé ka ʻe faingataʻa nai kiate kinautolu ke nau fai ha ngaahi toe ʻaʻahi pe kamataʻi ha ngaahi ako Tohi Tapu. Kapau te ke saiʻia ke fakaleleiʻi ha faʻahinga tafaʻaki ʻi hoʻo ngāue fakafaifekaú, fēfē kapau te ke kole ki ha tokoni? ʻI hono fai ʻo e tamuʻomuʻa peheé, ʻe lava ai ke ke hoko ʻo lavameʻa ange mo maʻu ʻa e fiefia lahi ange ʻi he ngāue fakafaifekaú.​—1 Kol. 9:26.

22, 23. Ko e hā ʻa e fakahāhā ʻo e ʻofa fakatokouá naʻe fai ʻe he fanga tokoua ʻi ʻAniteoké, pea ʻoku anga-fēfē hono fai ʻe he kakai ʻa e ʻOtuá he ʻaho ní ʻa e meʻa meimei tatau?

²² Ko ʻAniteoke, ʻi he tataki fakaʻotuá, naʻe fuofua ui ai “ʻa e kau ākongá ko e kau Kalisitiane.” (Ngā. 11:26e) Ko e hingoa ko iá ʻa ia naʻe fakamafaiʻi mai ʻe he ʻOtuá ʻokú ne fakamatalaʻi feʻungamālie ʻa e faʻahinga ʻa ia ko ʻenau founga moʻuí ʻoku fakafuo ʻo fakatatau ki he founga moʻui ʻa Kalaisí. ʻI he hoko ʻa e kakai ʻo e ngaahi puleʻangá ko e kau Kalisitiané, naʻe hoko ai ha haʻi ʻo e fetokouaʻakí ʻi he vahaʻa ʻo e kau tui Siú mo e Senitailé? Fakakaukau atu ki he meʻa naʻe hoko ʻi he taimi naʻe hoko ai ha fuʻu honge lahi ʻi he 46 T.S. nai.e ʻI he kuonga muʻá, naʻe uesia lahi ʻe he ngaahi hongé ʻa e kakai masivá, ʻa ia naʻe ʻikai ke ʻi ai haʻanau paʻanga talifaki pe ko ha toe meʻakai talifaki. ʻI he lolotonga ʻa e honge ko ʻení, ko e kau Kalisitiane Siu naʻa nau nofo ʻi Siuteá, ʻa ia ko e tokolahi ʻo kinautolú ʻoku hā ngali naʻa nau masiva, naʻe mātuʻaki fiemaʻu kiate kinautolu ha tokoni. ʻI hono ʻiloʻi ʻa e fiemaʻu ko iá, ko e fanga tokoua ʻi ʻAniteoké​—ʻo kau ai ʻa e kau Kalisitiane Senitailé​—naʻa nau “fai ha tokoni . . . ki he fanga tokoua ʻoku nofo ʻi Siuteá.” (Ngā. 11:29) Ko ha fakahāhā moʻoni ia ʻo e ʻofa fakatokouá!

²³ ʻOku ʻikai ke toe kehe ia ʻi he lotolotonga ʻo e kakai ʻa e ʻOtuá he ʻaho ní. ʻI he taimi ʻoku tau ʻilo ai ʻoku fusimoʻomo ʻa hotau fanga tokouá​—ʻi ha fonua kehe pe ʻi hotau feituʻú​—ʻoku tau kakapa loto-lelei atu ke tokoni kiate kinautolu. ʻOku fokotuʻutuʻu vave ʻe he Ngaahi Kōmiti Vaʻá ʻa hono fokotuʻu ha ngaahi Kōmiti Tokoni Fakatamaki ke nau tokangaekina ʻa hotau fanga tokoua ʻa ia kuo uesia nai ʻe he ngaahi fakatamaki fakanatulá, ʻo kau ai ʻa e ngaahi afaá, mofuiké, pea mo e ngaahi peau kulá. Ko e ngaahi ngāue fakaetokoni peheé kotoa ʻoku fakahaaʻi ai ʻa e moʻoni ko ia ʻo ʻetau fetokouaʻakí.​—Sione 13:34, 35; 1 Sio. 3:17.

24. ʻE lava fēfē ke tau fakahāhā ʻoku tau fakamahuʻingaʻi ʻi hotau lotó ʻa e ʻuhinga ʻo e vīsone naʻe maʻu ʻe Pitá?

²⁴ ʻI he tuʻunga ko e kau Kalisitiane moʻoní, ʻoku tau fakamahuʻingaʻi ʻi hotau lotó ʻa e ʻuhinga ʻo e vīsone ko ia naʻe maʻu ʻe Pita ʻi he funga fale ʻi Siopá ʻi he ʻuluaki senitulí. ʻOku tau lotu ki ha ʻOtua taʻefilifilimānako. Ko hono finangaló ia ke tau faifakamoʻoni fakaʻāuliliki ʻo fekauʻaki mo hono Puleʻangá, ʻa ia ʻoku kau ki ai ʻa e malanga ki he niʻihi kehé ʻo tatau ai pē pe ko e hā ʻa honau matakalí, tupuʻanga fakafonuá, pe tuʻunga fakasōsialé. Ko ia ai, tuku ke tau fakapapauʻi ke tau ʻoange ki he faʻahinga kotoa te nau fanongó ha faingamālie ke nau fai mai ai ha tali ki he ongoongo leleí.​—Loma 10:11-13.