Ko e Muʻaki Kau Kalisitiané mo e Lao ʻa Mōsesé

“Ko e Laó kuo hoko ko ʻetau tiuta ʻoku taki atu kia Kalaisi.”—KALETIA 3:​24, NW.

1, 2. Ko e hā ʻa e niʻihi ʻo e ngaahi ʻaonga naʻe maʻu ʻe he kau ʻIsileli ko ia naʻa nau tauhi lelei ʻa e Lao ʻa Mōsesé?

ʻI HE 1513 K.M., naʻe ʻoange ai ʻe Sihova ki he kau ʻIsilelí ha fokotuʻutuʻu ʻo e ngaahi lao. Naʻá ne tala ki he kakaí kapau te nau talangofua ki hono leʻó, te ne tāpuekina kinautolu pea te nau maʻu ʻa e moʻui fiefia mo fakafiemālie.​—Ekisoto 19:​5, 6.

² Ko e fokotuʻunga Lao ko iá, ʻa ia naʻe ui ko e Lao ʻa Mōsesé, pe ui pē ko e “Lao,” naʻe “maʻoniʻoni mo totonu mo lelei.” (Loma 7:12) Naʻá ne pouaki ʻa e ngaahi ʻulungaanga lelei hangē ko e anga-lelei, faitotonu, ʻulungaanga taau, mo e anga-fakakaungāʻapi. (Ekisoto 23:​4, 5; Livitiko 19:14; Teutalonome 15:​13-​15; 22:​10, 22) Naʻe toe fakaʻaiʻai ʻe he Laó ʻa e kau Siú ke nau feʻofaʻaki. (Livitiko 19:18) ʻIkai ko ia pē, naʻe tapui kinautolu mei he feohi pe maʻu uaifi mei he kau Senitailé ʻa ia naʻe ʻikai ke nau moʻulaloa ki he Laó. (Teutalonome 7:​3, 4) ʻI he tuʻunga ko ha “ʻavahevahe” ʻi he vahaʻa ʻo e kau Siú mo e kau Senitailé, naʻe tauhi ʻe he Lao ʻa Mōsesé ʻa e kakai ʻa e ʻOtuá mei he hoko ʻo ʻuliʻi ʻe he fakakaukau mo e ngaahi tōʻonga fakapanganí.​—Efeso 2:​14, 15; Sione 18:28.

 3. Koeʻuhi naʻe ʻikai malava ha taha ke tauhi haohaoa ʻa e Laó, ko e hā ʻa e ola naʻe iku ki aí?

³ Kae kehe, naʻa mo e kau Siu tokanga tahá naʻe ʻikai lava ke nau talangofua haohaoa ki he Lao ʻa e ʻOtuá. Naʻe fuʻu hulu nai ʻa e meʻa naʻe ʻamanekina ʻe Sihova meiate kinautolú? ʻIkai. Ko e taha ʻo e ngaahi ʻuhinga naʻe ʻoange ai ʻa e Laó ki ʻIsilelí ke “fakaeʻa ʻa e ngaahi faihalá.” (Kaletia 3:​19, NW ) Naʻe ʻai ʻe he Laó ʻa e kau Siu loto-totonú ke nau ʻiloʻi ʻenau fiemaʻu lahi ko ia ha Tokotaha-Huhuʻí. ʻI he taimi naʻe aʻu mai ai ʻa e Tokotaha ko iá, naʻe fiefia ʻa e kau Siu faitōnungá. Ko honau fakahaofi mei he malaʻia ʻo e angahalá mo e maté naʻe ofi!​—Sione 1:29.

 4. ʻI he ʻuhinga fē naʻe hoko ai ʻa e Laó ko e “tiuta ʻoku taki atu kia Kalaisi”?

⁴ Ko e Lao ʻa Mōsesé naʻe fakataumuʻa ia ko ha fokotuʻutuʻu fakataimi. ʻI heʻene tohi ki he kaungā Kalisitiané, naʻe fakamatalaʻi ia ʻe he ʻapositolo ko Paulá ko ha “tiuta ʻoku taki atu kia Kalaisi.” (Kaletia 3:​24, NW ) Ko ha tiuta ʻi he kuonga muʻá naʻá ne fakafeʻao ʻa e fānaú ki he akó mo fakafoki. Naʻe ʻikai te ne faʻa hoko ia ko e faiakó; naʻá ne taki pē ʻe ia ʻa e fānaú ki he faiakó. ʻI he tuʻunga tatau, ko e Lao ʻa Mōsesé naʻe faʻu ia ke ne taki ʻa e kau Siu manavahē-ʻOtuá kia Kalaisi. Naʻe palōmesi ʻa Sīsū te ne ʻi hono kau muimuí “ʻo aʻu ki he ngataʻanga ʻo mamani.” (Mātiu 28:20) Ko ia ai, ʻi hono fokotuʻu pē ʻa e fakatahaʻanga Kalisitiané, ko e ‘tiutá’​—ʻa e Laó​—naʻe ʻikai ha toe taumuʻa ki ai. (Loma 10:4; Kaletia 3:​25) Ka ko e kau Kalisitiane Siu ia ʻe niʻihi naʻe tuai ʻenau mahinoʻi ʻa e moʻoni mātuʻaki mahuʻinga ko ení. Ko hono olá, naʻa nau hokohoko atu ke tauhi ʻa e ngaahi tafaʻaki ʻo e Laó ʻo aʻu pē ki he hili ʻa e toetuʻu ʻa Sīsuú. Ka ko e niʻihi ia, naʻa nau fakatonutonu ʻenau fakakaukaú. ʻI he fai peheé, naʻa nau fokotuʻu ai ha faʻifaʻitakiʻanga lelei maʻa kitautolu ʻi he ʻahó ni. Tau sio angé pe ʻoku anga-fēfē.

Ngaahi Fakalakalaka Fakafiefia ʻi he Tokāteline Faka-Kalisitiané

 5. Ko e hā ʻa e ngaahi fakahinohino naʻe maʻu ʻe Pita ʻi ha vīsone, pea ko e hā naʻá ne ʻohovale aí?

⁵ ʻI he 36 T.S., naʻe maʻu ai ʻe he ʻapositolo Kalisitiane ko Pitá ha vīsone fakaofo. ʻI he taimi ko iá naʻe fekauʻi ia ʻe ha leʻo mei hēvani ke tāmateʻi pea kai ʻa e fanga manupuna mo e fanga manu naʻe lau ʻoku taʻemaʻa ʻi he malumalu ʻo e Laó. Naʻe ʻohovale ʻa Pita! Kuo teʻeki ʻaupito ke ne “kai ha ngaahi meʻa ʻoku taʻetāu mo taʻemaʻa.” Ka naʻe tala ʻe he leʻó kiate ia: “Ko e ngaahi meʻa kuo fakamaʻa ʻe he ʻOtua, ʻoua te ke pehē ʻe koe ʻoku taʻetāu.” (Ngāue 10:​9-15) ʻI he ʻikai hoko ʻo piki mate ki he Laó, naʻe fakatonutonu ʻe Pita ʻene fakakaukaú. Naʻe taki atu ai ia ki ha ʻilo fakaofo fekauʻaki mo e ngaahi taumuʻa ʻa e ʻOtuá.

6, 7. Ko e hā naʻá ne fakamafeia ʻa Pita ke ne fakaʻosiʻaki te ne malava ʻi he taimi ko ení ke malanga ki he kau Senitailé, pea ko e hā nai ha ngaahi fakamulituku ʻoku ngalingali naʻá ne toe maʻu?

⁶ Ko e meʻa eni naʻe hokó. Naʻe ʻalu ha kau tangata ʻe toko tolu ki he fale naʻe nofo ai ʻa Pitá, ʻo kole ki ai ke ʻalu mo kinautolu ki he ʻapi ʻo ha Senitaile taʻekamu lotu mateaki naʻe hingoa ko Koliniusi. Naʻe fakaafeʻi ʻe Pita ʻa e kau tangatá ni ki fale ʻo ne talitali kinautolu ai. ʻI heʻene mahinoʻi ʻa e ʻuhinga ʻo e vīsoné ni, naʻe ʻalu ai ʻa Pita mo kinautolu ʻi he ʻaho hono hokó ki he ʻapi ʻo Koliniusí. ʻI aí naʻe fai ai ʻe Pita ha fakamoʻoni fakaʻāuliliki fekauʻaki mo Sīsū Kalaisi. ʻI he taimi ko iá, naʻe pehē ʻe Pita: “Ta ko ʻene toki mahino mai e kiate au, ʻoku ʻikai ke filifilimanako ʻa e ʻOtua: ka neongo pē ko e fēʻia ʻa e kakai, ka ʻilonga ʻa ia ʻoku ʻapasia kiate ia, pea ngāue fai ki he totonu, ʻoku ngofua ke ne aʻu mai kiate ia.” Naʻe ʻikai ngata pē ʻia Koliniusi kae pehē foki ki hono kāingá mo hono ngaahi kaungāmeʻa ofí naʻa nau tui kia Sīsū, pea “naʻe hifo ʻa e Laumālie Maʻoniʻoni kiate kinautolu kotoa pē naʻe fanongo ki he fakamatala.” ʻI hono ʻiloʻi ʻa e kau mai ʻa Sihova ʻi he meʻá ni, naʻe “fekau [ʻe Pita] ke papitaiso kinautolu ʻi he huafa ʻo e ʻEiki.”​—Ngāue 10:​17-48.

⁷ Ko e hā naʻá ne fakamafeia ʻa Pita ke ne fakaʻosiʻaki ko e kau Senitaile ko ia naʻe teʻeki ke nau moʻulaloa ki he Lao ʻa Mōsesé te nau lava he taimi ko ení ke hoko ko e kau muimui ʻo Sīsū Kalaisi? Ko e ʻiloʻilo fakalaumālié. Koeʻuhi kuo fakahā ʻe he ʻOtuá ʻene hōifua ki he kau Senitaile taʻekamú, ʻo huaʻi hifo hono laumālié kia kinautolu, naʻe ʻiloʻi ai ʻe Pita ʻe lava ke tali kinautolu ke papitaiso. ʻI he taimi tatau, ʻoku hā naʻe fakatokangaʻi ʻe Pita ko e ʻOtuá naʻe ʻikai te ne ʻamanekina ʻa e kau Kalisitiane Senitailé ke nau tauhi ʻa e Lao ʻa Mōsesé ko ha tuʻunga ia ki he papitaisó. Kapau naʻá ke moʻui ʻi he taimi ko iá, naʻá ke mei loto-lelei ʻo hangē ko Pitá ke liliu ʻa e anga hoʻo fakakaukaú?

Naʻe Hanganaki Muimui ʻa e Niʻihi Ia ki he ‘Tiutá’

 8. Ko e hā ʻa e vakai ki he kamú naʻe kehe ia mei he fakakaukau ʻa Pitá naʻe pouaki ʻe he kau Kalisitiane ʻe niʻihi naʻe nofo ʻi Selusalemá, pea ko e hā hono ʻuhingá?

⁸ Hili ʻene mavahe mei he ʻapi ʻo Koliniusí, naʻe ʻalu ʻa Pita ki Selusalema. Ko e ongoongo ko ia ko e kau Senitaile taʻekamú kuo nau “tali . . . ʻa e folofola ʻa e ʻOtua” kuo aʻu ia ki he fakatahaʻanga ʻi aí, pea naʻe tokolahi ʻa e kau ākonga Siu naʻa nau hohaʻa fekauʻaki mo e meʻá ni. (Ngāue 11:​1-3) Lolotonga hono ʻiloʻi ko e kau Senitailé ʻe lava ke nau hoko ko e kau muimui ʻo Sīsū, “ko e faʻahinga kamu” naʻa nau fakamatematē ko e kakai ko eni ʻo e ngaahi puleʻanga ʻikai ko e Siú kuo pau ke nau tauhi ʻa e Laó koeʻuhi ka nau moʻui. ʻI he tafaʻaki ʻe tahá, ʻi he ngaahi feituʻu naʻe tokolahi ai ʻa e Senitailé, ʻa ia naʻe tokosiʻi ai ʻa e kau Kalisitiane Siú, naʻe ʻikai fuʻu hoko ai ʻa e kamú ia ko ha meʻa lahi. Naʻe tolonga mai ʻa e ongo fakakaukaú ni ʻi he taʻu nai ʻe 13. (1 Kolinito 1:10) Ko ha ʻahiʻahi pau moʻoni ē ki he muʻaki kau Kalisitiane ko iá​—tautefito ki he kau Senitaile naʻe nofo ʻi he ngaahi feituʻu faka-Siú!

 9. Ko e hā naʻe mātuʻaki mahuʻinga ai ke fakaleleiʻi ʻa e ʻīsiu fekauʻaki mo e kamú?

⁹ Naʻe iku ʻo aʻu ʻa e ʻīsiu ko ení ki hono tumutumú ʻi he 49 T.S. ʻi he taimi naʻe haʻu ai ʻa e kau Kalisitiane mei Selusalemá ki Sīlia ʻAniteoke, ʻa ia naʻe malanga ai ʻa Paulá. Naʻa nau kamata ke akoʻaki ko e kau Senitailé kuo uluí kuo pau ke nau kamu ʻo fakatatau ki he Laó. Pea naʻe hoko ha taʻefelotoi mo ha fekīhiaki lahi ʻiate kinautolu pea mo Paula mo Panepasa! Kapau naʻe ʻikai fakaleleiʻi ʻa e ʻīsiu ko ení, ko e kau Kalisitiane ʻe niʻihi, tatau ai pē pe mei he tupuʻanga Siu pe Senitaile, kuo pau te nau tūkia. Ko ia ai, naʻe fai ʻa e ngaahi fokotuʻutuʻu kia Paula mo e tokosiʻi kehe ke nau ō ki Selusalema ʻo kole ki he kulupu pule Kalisitiané ke fakaleleiʻi tā tuʻo taha ʻa e ʻīsiu ko ení.​—Ngāue 15:​1, 2, 24.

Ko ha Faikehekehe Loto-Moʻoni ʻo e Fakakaukaú​—Pea, Fāʻūtaha Leva!

10. Ko e hā ʻa e ngaahi poini ʻe niʻihi naʻe lāulea ki ai ʻa e kulupu pulé ki muʻa ke nau fai ʻa e fili fekauʻaki mo e tuʻunga ʻo e kau Senitailé?

¹⁰ ʻI ha fakataha naʻe fokotuʻutuʻu, naʻe fakafekiki moʻoni ʻa e niʻihi ʻo loto ki he kamú, lolotonga ia naʻe ʻoatu ʻe he niʻihi ia ʻa e fakakaukau ʻe tahá. Ka naʻe ʻikai ko e tuʻunga fakaeongó ia naʻe ikuná. Hili ʻa e hoko ha fakafekiki lahi, naʻe fakamatalaʻi ʻe he ʻapositolo ko Pitá mo Paula ʻa e ngaahi fakaʻilonga kuo hanga ʻe Sihova ʻo fakahoko ʻi he haʻohaʻonga ʻo e kau taʻekamú. Naʻá na fakamatala kuo lilingi hifo ʻe he ʻOtuá ʻa e laumālie māʻoniʻoní ki he kau Senitaile taʻekamú. Ko hono moʻoní, naʻá na ʻeke, ‘ʻE lava ʻe he fakatahaʻanga Kalisitiané ke siʻaki totonu ʻa e faʻahinga ko ia kuo tali lelei ʻe he ʻOtuá?’ Naʻe lau leva ʻe he ākonga ko Sēmisí ha potu Folofola ʻa ia naʻe tokoni kia kinautolu kotoa naʻe ʻi aí ke ʻiloʻi ʻa e finangalo ʻo Sihova ki he meʻa ko iá.​—Ngāue 15:​4-7.

11. Ko e hā ʻa e moʻoniʻi meʻa naʻe ʻikai kau ia ʻi hono fai ʻo e fili fekauʻaki mo e kamú, pea ko e hā ʻokú ne fakahaaʻi naʻe toloto e tāpuaki ʻa Sihová ʻi he filí?

¹¹ Naʻe tokanga ʻa e tokotaha kotoa he taimí ni ki he kulupu pulé. ʻE hanga ʻe heʻenau tukuʻau faka-Siú ʻo ofeʻi ʻenau filí ke nau loto ki he kamú? ʻIkai. Naʻe fakapapauʻi ʻe he kau tangata faitōnunga ko ení ke muimui ki he ngaahi Konga Tohitapú mo e ngaahi tataki ʻa e laumālie māʻoniʻoni ʻo e ʻOtuá. Hili ʻenau fanongo ki he fakamoʻoni mahino fekauʻaki mo iá, naʻe loto-taha kotoa ai ʻa e kulupu pulé ʻoku ʻikai ha fiemaʻu ia ki he kau Kalisitiane Senitailé ke nau kamu mo ʻi he malumalu ʻo e Lao ʻa Mōsesé. ʻI he aʻu atu ʻa e talá ki he fanga tokouá, naʻa nau fiefia, pea naʻe kamata ʻa e ngaahi fakatahaʻangá ke “fakautuutu ʻenau tokolahi ʻi he ʻaho kotoa pe.” Ko e kau Kalisitiane ko ia naʻa nau moʻulaloa ki he fakahinohino māʻalaʻala fakateokalati ko iá naʻe tāpuekina ʻaki ʻa e tali mālohi Fakatohitapu. (Ngāue 15:​19-​23, 28, 29; 16:​1-5) Neongo ia, naʻe kei toe ha fehuʻi mahuʻinga ke tali.

Fēfē ʻa e Kau Kalisitiane Siú?

12. Ko e hā ʻa e fehuʻi naʻe toe ke fakaleleiʻí?

¹² Naʻe fakahaaʻi mahino ʻe he kulupu pulé ko e kau Kalisitiane Senitailé naʻe ʻikai fiemaʻu ke nau kamu. Kae fēfē ʻa e kau Kalisitiane Siú ia? Ko e fili ʻa e kulupu pulé naʻe ʻikai kāpui pau ai ʻa e tafaʻaki ko ia ʻo e fehuʻí.

13. Ko e hā ʻoku hala ai ke pehē ko e tauhi ʻo e Lao ʻa Mōsesé naʻe fiemaʻu ia ki he fakamoʻuí?

¹³ Ko e kau Kalisitiane Siu ʻe niʻihi ʻa ia naʻa nau ‘mamahiʻi ʻa e laó’ naʻa nau hokohoko atu ke kamu ʻenau fānaú mo tauhi ʻa e ngaahi tafaʻaki ʻe niʻihi ʻo e Laó. (Ngāue 21:20) Naʻe toe hulu atu ʻa e niʻihi ia, ʻo aʻu ʻo fakamatematē naʻe fiemaʻu ki he kau Kalisitiane Siú ke nau tauhi ʻa e Laó koeʻuhi ka nau moʻui. ʻI he meʻá ni, naʻa nau mātuʻaki hala ai. Ko e fakatātaá, ʻe lava fēfē ʻe ha Kalisitiane ke foaki ha feilaulau monumanu ki he fakamolemole ʻo e angahalá? Kuo ʻai ia ʻe he feilaulau ʻa Kalaisí ke taʻeʻaonga ʻa e ngaahi feilaulau peheé. Fēfē ʻa e fiemaʻu ko ia ʻa e Laó ke fakaʻehiʻehi ʻa e kau Siú mei he feohi vāofi mo e kau Senitailé? Naʻe mei faingataʻa lahi ki he kau ʻevangeliō faivelenga Kalisitiané ke tauhi ʻa e ngaahi fakangatangata ko iá pea kei fakahoko ʻa e fekau ko ia ke akoʻi ʻa e kau Senitailé ki he meʻa kotoa pē kuo akoʻi ʻe Sīsuú. (Mātiu 28:​19, 20; Ngāue 1:8; 10:28)a ʻOku ʻikai ha fakamoʻoni ia naʻe fakamahino ʻa e meʻa ko ení ʻi he fakataha ʻa e kulupu pulé. Kae kehe, naʻe ʻikai liʻaki ai ʻa e fakatahaʻangá ʻo ʻikai ha tokoni.

14. Ko e hā ʻa e tataki fekauʻaki mo e Laó naʻe tokonaki mai ʻe he ngaahi tohi fakamānavaʻi ʻa Paulá?

¹⁴ Naʻe haʻu ʻa e tatakí, ʻikai ʻi ha founga ʻo ha tohi mei he kulupu pulé, ka ʻi ha toe ngaahi tohi fakamānavaʻi naʻe hiki ʻe he kau ʻapositoló. Ko e fakatātaá, naʻe ʻoatu ʻe he ʻapositolo ko Paulá ha pōpoaki mālohi ki he kau Siu mo e kau Senitaile naʻa nau nofo ʻi Lomá. ʻI heʻene tohi kia kinautolú, naʻá ne fakamatalaʻi ai ko e Siu moʻoní “ʻoku Siu ʻi loto, pea ko e kamu moʻoni ʻa e kamu ʻo e loto, ʻa ia ʻoku tuʻunga ʻi ha laumalie.” (Loma 2:​28, 29) ʻI ha tohi tatau, naʻe ngāueʻaki ʻe Paula ha fakatātā ke fakamoʻoniʻi ko e kau Kalisitiané naʻe ʻikai ke nau kei ʻi he malumalu ʻo e Laó. Naʻá ne fakaʻuhinga heʻikai lava ke mali ha fefine mo ha tangata ʻe ua ʻi he taimi tatau. Ka ʻo kapau ʻe mate hono husepānití, naʻá ne ʻatā ke toe mali. Naʻe ngāueʻaki leva ʻe Paula ʻa e fakatātaá, ʻo fakahaaʻi ko e kau Kalisitiane paní ʻe ʻikai lava ke nau moʻulaloa ki he Lao ʻa Mōsesé pea toe kau kia Kalaisi ʻi he taimi tatau. Naʻe pau ke nau hoko ʻo ‘mate kia Lao’ koeʻuhi ke lava ʻo nau fāʻūtaha ai mo Kalaisi.​—Loma 7:​1-5.

Tuai ke Mahinoʻi ʻa e Poiní

15, 16. Ko e hā naʻe taʻemalava ai ʻa e kau Kalisitiane Siu ʻe niʻihi ke maʻu ʻa e poini fekauʻaki mo e Laó, pea ko e hā ʻoku fakahaaʻi ʻe he meʻá ni fekauʻaki mo e fiemaʻu ko ia ke nofoʻaki tokanga fakalaumālié?

¹⁵ Ko e fakaʻuhinga ʻa Paula fekauʻaki mo e Laó naʻe taʻealafakakikihiʻi. Naʻe anga-fēfē leva, ʻa e taʻemalava ʻa e kau Kalisitiane Siu ʻe niʻihi ke maʻu ʻa e poiní? Ko e taha e ʻuhingá, naʻa nau masiva he ʻiloʻilo fakalaumālié. Ko e fakatātaá, naʻa nau taʻetokangaʻi hono maʻu ʻo e meʻakai mālohi fakalaumālié. (Hepelu 5:​11-14) Naʻa nau toe tōmokosi foki ʻi hono maʻu ʻo e ngaahi fakataha faka-Kalisitiané. (Hepelu 10:​23-25) Ko e toe ʻuhinga ʻe taha naʻe ʻikai maʻu ai ʻe he niʻihi ʻa e poiní ngalingali naʻe fekauʻaki ia mo e natula ʻo e Laó tonu. Naʻe fakatefito ia ʻi he ngaahi meʻa naʻe lava ke sio mo ongoʻi mo ala ki ai, ʻo hangē ko e temipalé mo e tuʻunga taulaʻeikí. Naʻe faingofua ange ki ha taha ʻoku masiva ʻi he tuʻunga fakalaumālié ke ne tali ʻa e Laó ʻi hono tali lelei ʻa e ngaahi tefitoʻi moʻoni loloto ange ʻo e lotu faka-Kalisitiané, ʻa ia naʻe fakatefito ia ʻi he ngaahi meʻa moʻoni taʻehāmai.​—2 Kolinito 4:18.

¹⁶ Ko e toe ʻuhinga ʻe taha ki he vēkeveke ʻa e kau Kalisitiane lau pē ʻe niʻihi ke tauhi ʻa e Laó naʻe toʻo lalahi mai ia ʻe Paula ʻi heʻene tohi ki he kau Kalētiá. Naʻá ne fakamatalaʻi ko e kau tangata ko ení naʻa nau loto ke fai ʻa e vakai kia kinautolu ko e kau ʻapasiaʻi, ko e kau mēmipa ʻo ha lotu tefito. ʻI he ʻikai ke nau hā mahino atu ʻi he koló, naʻa nau loto-lelei kinautolu ke fai ʻa e meimei fakangaloku kotoa pē koeʻuhi ke tali lelei ai kinautolu. Naʻa nau mahuʻingaʻia ange kinautolu ʻi hono maʻu ʻa e leleiʻia ʻa e tangatá ʻi he maʻu ʻa e hōifua ʻa e ʻOtuá.​—Kaletia 6:12.

17. Ko fē taimi naʻe hoko ai ʻo māʻalaʻala lelei ʻa e vakai totonu fekauʻaki mo hono tauhi ʻo e Laó?

¹⁷ Ko e kau Kalisitiane ʻiloʻilo ko ia naʻa nau ako fakalelei ʻa e ngaahi tohi fakamānavaʻi fakaʻotua ʻa Paula mo e niʻihi kehé naʻa nau maʻu ʻa e ngaahi fakamulituku totonu fekauʻaki mo e Laó. Kae kehe, naʻe toki aʻu mai ki he 70 T.S. naʻe hoko ai ʻo māʻalaʻala taʻetoeveiveiua ʻa e vakai totonu ki he Lao ʻa Mōsesé ki he kau Kalisitiane Siu kotoa pē. Naʻe hoko eni ʻi he taimi naʻe fakaʻatā ai ʻe he ʻOtuá ʻa Selusalema, ko hono temipalé, mo hono ngaahi lēkooti kau ki he tuʻunga taulaʻeikí ke fakaʻauhá. Naʻe ʻai heni ʻo taʻemalava ki ha taha pē ke ne tauhi ʻa e ngaahi tafaʻaki kotoa ʻo e Laó.

Ngāueʻaki ʻa e Lēsoní ʻi he ʻAhó Ni

18, 19. (a) Ko e hā ʻa e ngaahi fakakaukau kuo pau ke tau talí pea ko e hā ʻa e ngaahi fakakaukau kuo pau ke tau fakaʻehiʻehi mei ai koeʻuhi ka tau nofoʻaki moʻui lelei fakalaumālié? (e)  Ko e hā ʻoku hanga ʻe he faʻifaʻitakiʻanga ʻa Paulá ʻo akoʻi kia kitautolu fekauʻaki mo e muimui ki he fakahinohino ʻoku tau maʻu mei he fanga tokoua fua fatongiá? (Sio ki he puha ʻi he peesi 24.)

¹⁸ Hili ʻa e lāulea ki he ngaahi meʻa naʻe hoko ʻi he kuohilí, mahalo ʻokú ke fifili: ‘Kapau naʻá ku moʻui ʻi he taimi ko iá, naʻe mei fēfē haʻaku tali hono fakaeʻa fakalakalaka mai ʻa e finangalo ʻo e ʻOtuá? Naʻá ku mei piki mate ki he ngaahi fakakaukau tukufakaholó? Pe naʻá ku mei kātaki nai kae ʻoua kuo hoko ʻo māʻalaʻala ʻa e mahino totonú? Pea ʻi heʻene hoko maí, naʻá ku mei poupouʻi ʻaufuatō ia?’

¹⁹ Ko e moʻoni, ʻoku ʻikai lava ke tau fakapapauʻi pe naʻe mei fēfē haʻatau tali kapau naʻa tau moʻui ʻi he taimi ko iá. Ka ʻe lava ke tau ʻeke kia kitautolu: ‘ʻOku anga-fēfē ʻeku tali ki he ngaahi fakamāʻalaʻala fekauʻaki mo e mahino faka-Tohitapú ʻi he taimi ʻoku ʻomai ai ʻi he ʻaho ní? (Mātiu 24:45) ʻI he taimi ʻoku tokonaki mai ai ha fakahinohino Fakatohitapu, ʻoku ou feinga ke ngāueʻaki ia, ʻo ʻikai ko hono tauhi pē ʻo e tuʻutuʻuni ʻo e laó ka ko e laumālie ʻo iá? (1 Kolinito 14:20) ʻOku ou tatali anga-kātaki kia Sihova ʻi he taimi ʻoku hā ngali tuai ai hono maʻu ha tali ki he ngaahi fehuʻi kuo fuoloa maí?’ ʻOku mātuʻaki mahuʻinga ke tau ngāueʻaongaʻaki ʻa e meʻakai fakalaumālie ʻoku ala maʻu ʻi he ʻaho ní, koeʻuhiā “naʻa ʻiloange te tau ʻauhia atu.” (Hepelu 2:1) ʻI he taimi ʻoku tokonaki mai ai ʻe Sihova ha fakahinohino fakafou ʻi heʻene Folofolá, ko hono laumālié, pea mo ʻene kautaha fakaemāmaní, tau fanongo tokanga. Kapau te tau fai pehē, ʻe tāpuekina kitautolu ʻe Sihova ʻaki ʻa e moʻui taʻehanongataʻanga ʻa ia ʻoku fakatou fakafiefia mo fakafiemālie.

[Fakamatala ʻi lalo]

ʻE Fēfē Haʻo Tali?

• ʻI he ʻuhinga fē naʻe hangē ai ʻa e Lao ʻa Mōsesé ha “tiuta ʻoku taki atu kia Kalaisi”?

• ʻE anga-fēfē haʻo fakamatalaʻi ʻa e ngaahi faikehekehe ʻi he ngaahi founga ʻo e tali ʻa Pita mo e “faʻahinga kamu” ki he ngaahi fakatonutonu ki hono mahinoʻi ʻo e moʻoní?

• Ko e hā kuó ke ako fekauʻaki mo e founga ʻoku fakaeʻa ai ʻe Sihova ʻa e moʻoní ʻi he ʻaho ní?

[Puha/Fakatātā ʻi he peesi 24]

Fetaulaki Anga-Fakatōkilalo ʻa Paula mo ha ʻAhiʻahi

Hili ha fononga fakamisinale lavameʻa, naʻe tūʻuta ʻa Paula ki Selusalema ʻi he 56 T.S. ʻI aí naʻe fakatatali mai ha ʻahiʻahi. Ko e ongoongo ko ia kuó ne akoʻi ko e Laó kuo tuku ia ki tafaʻakí ne aʻu ia ki he fakatahaʻangá. Naʻe manavasiʻi ʻa e kau tangata matuʻotuʻá naʻa tūkia ʻa e kau Kalisitiane Siu toki uluí ʻi he lea hangatonu ʻa Paula fekauʻaki mo e kaveinga ʻo e Laó pea te nau fakaʻosiʻaki nai ai ʻoku ʻikai ke tokaʻi ʻe he kau Kalisitiané ʻa e ngaahi fokotuʻutuʻu ʻa Sihová. ʻI he fakatahaʻangá, naʻe ʻi ai ʻa e kau Kalisitiane Siu ʻe toko fā naʻa nau fai ha fuakava, mahalo ko ha fuakava Nāsili. Naʻe pau ke nau ʻalu ki he temipalé koeʻuhi ke fakakakato ʻa e ngaahi fiemaʻu ʻo e fuakavá.

Naʻe kole ʻe he kau tangata matuʻotuʻá kia Paula ke ne fakafeʻao ʻa e toko faá ki he temipalé pea tokangaʻi ʻenau ngaahi fakamolé. Naʻe ʻosi tohi ʻe Paula ha ongo tohi fakamānavaʻi ʻikai siʻi hifo he uá ʻa ia naʻá ne fakaʻuhinga ai ko e tauhi ʻo e Laó naʻe ʻikai fiemaʻu ia ki he fakamoʻuí. Kae kehe, naʻá ne fakaʻatuʻi ʻa e konisēnisi ʻo e niʻihi kehé. Naʻá ne tohi ki muʻa: “Ki he faʻahinga ʻoku moʻulaloa ki he Lao, naʻa ku hange ha moʻulaloa ki he Lao . . . koeʻuhi pe ke u maʻu ai ʻakinautolu ʻoku moʻulaloa ki he Lao.” (1 Kolinito 9:​20-23) Lolotonga naʻe ʻikai ʻaupito haʻane fakangaloku ʻi he taimi naʻe kaunga mai ai ha ngaahi tefitoʻi moʻoni Fakatohitapu mātuʻaki mahuʻingá, naʻe ongoʻi ʻe Paula ʻe lava ke ne tali ʻa e fokotuʻu ʻa e kau tangata matuʻotuʻá. (Ngāue 21:​15-26) Naʻe ʻikai hala ia kiate ia ke fai pehē. Naʻe ʻikai ha meʻa ʻe taʻefakatohitapu fekauʻaki mo e fokotuʻutuʻu ki he ngaahi fuakavá, pea ko e temipalé kuo ngāueʻaki ia ki he lotu maʻá, ʻikai ko e lotu ʻaitolí. ʻI he vakai atu ke ʻoua naʻa fakatupunga ha tūkiá, naʻe fai leva ʻe Paula ʻo hangē ko ia naʻe kole angé. (1 Kolinito 8:13) ʻOku ʻikai ha veiveiua naʻe fiemaʻu heni ha anga-fakatōkilalo lahi ʻaupito mei he tafaʻaki ʻa Paulá, ko ha moʻoniʻi meʻa ʻokú ne hanga ʻo fakaloloto ʻetau houngaʻia kiate iá.

[Fakatātā ʻi he peesi 22, 23]

ʻI ha ngaahi taʻu, ko e ngaahi fakakaukau kehekehe fekauʻaki mo e Lao ʻa Mōsesé naʻe tolonga mai ia ʻi he haʻohaʻonga ʻo e kau Kalisitiané