“Te Mou Hoko ko e Kau Fakamoʻoni Kiate Au”

1-3. ʻOku anga-fēfē ʻa e mavahe ʻa Sīsū mei heʻene kau ʻapositoló, pea ko e hā ʻa e ngaahi fehuʻi ʻoku malanga hake aí?

ʻOKU ʻikai te nau loto ke ʻosi atu ia. Ki he kau ʻapositoló, ko e ngaahi uike kuo toki maliu atú naʻe fakafiefia ʻaupito! Naʻe hanga ʻe he toetuʻu ʻa Sīsuú ʻo hikiʻi hake kinautolu mei he mātuʻaki siva ʻa e ʻamanakí ki he fiefia lahi moʻoni. ʻI he ʻaho eni ʻe 40, naʻe toutou hā ai ʻa Sīsū, ʻo ne toe akoʻi mo fakalototoʻaʻi ai pē ʻene kau muimuí. Kae kehe, ʻi he ʻaho ko ení, ko ʻene hā fakaʻosí eni.

² ʻI he tuʻu fakataha ʻi he Moʻunga ko ʻŌlivé, ʻoku fanongo tokanga ai ʻa e kau ʻapositoló ki he foʻi lea kotoa pē ʻa Sīsū. ʻI he ʻosi ʻene leá​—ʻa ia naʻe hā ia ʻo hangē ne fuʻu vave ʻene ʻosí​—ʻokú ne hiki hake hono ongo nimá ʻo ne tāpuakiʻi kinautolu. Hili iá, ʻokú ne kamata ʻalu hake leva mei he māmaní! ʻOku sio fakamamaʻu hake ʻene kau muimuí kiate ia ʻi he lolotonga ko ia ʻene ʻalu hake ki he langí. Faai atu pē, ʻoku fakapuliki ia ʻe ha konga ʻao ʻo ʻikai ke nau kei lava ʻo sio kiate ia. Kuó ne puli atu, ka ʻoku nau kei sio fakamamaʻu hake pē ki he langí.​—Luke 24:50; Ngā. 1:9, 10.

³ ʻOku fakaʻilongaʻi ʻe he meʻa ko eni ne hokó ha liliuʻanga mahuʻinga ʻi he moʻui ʻa e kau ʻapositolo ʻa Sīsuú. Ko e hā te nau fai ʻi he taimi ní he ko honau ʻEikí ē, ʻa Sīsū Kalaisi, kuó ne ʻalu hake ki hēvani? ʻE lava ke tau fakapapauʻi, kuo ʻosi teuʻi kinautolu ʻe honau ʻEikí ke nau hoko atu ʻa e ngāue naʻá ne kamataʻí. Naʻe anga-fēfē ʻene teuʻi kinautolu ki he ngāue mahuʻinga ko ʻeni ne vaheʻi angé, pea naʻe anga-fēfē ʻenau tali ki aí? Pea ʻoku anga-fēfē ʻa e kaunga ki ai ʻa e kau Kalisitiane ʻi he ʻaho ní? Ko e ʻuluaki vahe ʻo e tohi ʻa Ngāué ʻoku maʻu ai ʻa e ngaahi tali fakalototoʻa ki aí.

 4. ʻOku anga-fēfē ʻa e kamata ʻe Luke ʻa ʻene fakamatala kuo lēkooti ʻi he tohi ʻa Ngāué?

⁴ ʻI he kamata ʻe Luke ʻene fakamatalá ʻokú ne tohi ai kia Tiofilusi, ʻa e tangata tatau pē ko ia naʻá ne tohi ki ai ki muʻa ʻi heʻene Kōsipelí.a ʻI heʻene fakamahino mai ko e lēkooti ko ʻení ko e hoko atu pē ia ʻo ʻene ʻuluaki tohí, ʻoku kamata ai ʻa Luke ʻaki hono toʻotoʻo konga lalahi mai ʻa e ngaahi meʻa ne hoko kuo lēkooti ʻi he konga ki mui ʻo ʻene Kōsipelí, ʻo ngāueʻaki ha fakalea kehe ia mo ʻomi ai mo e ngaahi fakaikiiki foʻou.

5, 6. (a) Ko e hā te ne tokoniʻi ʻa e kau muimui ʻo Sīsuú ke hanganaki mālohi ai pē ʻenau tuí? (e) Ko e hā ʻa e fakamoʻoni māʻalaʻala ʻokú ne tokoniʻi ʻa e kau Kalisitiané ke nau maʻu ʻa e tui moʻoní ʻi he ʻahó ni?

⁵ Ko e hā te ne hanganaki ʻai ke mālohi ʻa e tui ʻa e kau muimui ʻo Sīsuú? ʻI he Ngāue 1:3, ʻoku tau lau ai fekauʻaki mo Sīsū: “ʻI he hili ʻene faingataʻaʻiá, naʻá ne hā tuʻo lahi kiate kinautolu, koeʻuhí ke nau ʻiloʻi fakapapau naʻá ne moʻui.” ʻI he taimi ʻe niʻihi naʻe hā ʻa Sīsū ki he toko taha pe toko ua, ʻi he taimi ʻe niʻihi ki he kotoa ʻo e kau ʻapositoló, pea ʻi he taimi ʻe taha ki he kau tui laka hake he toko 500. (1 Kol. 15:3-6) Ko e ngaahi fakamoʻoni kotoa ko ení naʻe fakaivimālohiʻi moʻoni ai ʻa e tui ʻa e kau muimui ʻo Sīsuú!

⁶ ʻOku pehē pē mo e tui ʻa e kau Kalisitiane moʻoni ʻi he ʻaho ní ʻoku makatuʻunga ia ʻi he ngaahi fakamoʻoni fakatupu tuipau lahi. ʻOku ʻi ai nai ha fakamoʻoni naʻe moʻui ʻa Sīsū ʻi he māmaní, pekia maʻa ʻetau ngaahi angahalá, pea naʻe fokotuʻu hake ia? Ko ia tofu pē! ʻOku tokonaki mai ʻe he ngaahi fakamatala fakamoʻoni sio tonu mo falalaʻanga ʻi he Folofola fakamānavaʻi ʻa e ʻOtuá ʻa e ngaahi fakamoʻoni fakatupu tuipau kotoa pē ʻoku fiemaʻu kiate kitautolú. Ko hono ako ʻa e ngaahi fakamatala ko ʻení fakataha mo e faʻa lotu ʻo fekauʻaki mo iá ʻe lava ke ne fakaivimālohiʻi lahi ʻetau tuí. Manatuʻi, ko e fakamoʻoni alafalalaʻangá ʻe lava ke ne fakafaikehekeheʻi ʻa e tui moʻoní mo e tui noaʻia peé. Ko e tui moʻoní ʻoku fiemaʻu tefito ia ki hono maʻu ʻa e moʻui taʻengatá.​—Sione 3:16.

 7. Ko e hā ʻa e faʻifaʻitakiʻanga naʻe fokotuʻu ʻe Sīsū ki heʻene kau muimuí ʻi he faiakó mo e malangá?

⁷ Naʻe toe “lea” foki ʻa Sīsū “ʻo fekauʻaki mo e Puleʻanga ʻo e ʻOtuá.” Ko e fakatātaá, naʻá ne fakamatalaʻi ʻa e ngaahi kikite naʻe fakahaaʻi ai ko e Mīsaiá kuo pau ke ne faingataʻaʻia pea mate. (Luke 24:13-32, 46, 47) ʻI he taimi naʻe fakamahino ai ʻe Sīsū ʻa hono ngafa ʻi he tuʻunga ko e Mīsaiá, naʻá ne fakamamafaʻi ʻa e kaveinga tefito ʻa ia ko e Puleʻanga ʻo e ʻOtuá, he naʻá ne hoko ko e Tuʻi kuo kotofa ki he kahaʻú. Ko e Puleʻangá naʻe hoko maʻu pē ia ko e kaveinga tefito ʻo e malanga ʻa Sīsuú, pea ʻoku ngāueʻaki ʻe heʻene kau muimui he ʻaho ní ʻa e kaveinga tefito tatau pē ʻi heʻenau malangá.​—Māt. 24:14; Luke 4:43.

8, 9. (a) Ko e hā ʻa e ongo foʻi fakakaukau hala ʻe ua naʻe maʻu ʻe he kau ʻapositolo ʻa Sīsuú? (e) Naʻe anga-fēfē hono fakatonutonu ʻe Sīsū ʻa e fakakaukau ʻa e kau ʻapositoló, ʻo ʻomai ai ki he kau Kalisitiane ʻi he ʻaho ní ʻa e lēsoni ko e hā?

⁸ ʻI he fakatahataha ʻa e kau ʻapositoló ʻi he Moʻunga ko ʻŌlivé, naʻe fai ai ʻenau fakataha fakaʻosi mo Sīsū ʻi he māmaní. ʻI he vēkeveké, naʻa nau ʻeke: “ʻEiki, te ke toe fakafoki mai ʻa e Puleʻangá ki ʻIsileli he taimí ni?” (Ngā. 1:6) ʻI he foʻi fehuʻi ʻe taha ko ʻení, naʻe fakaeʻa ai ʻe he kau ʻapositoló ha ongo foʻi fakakaukau hala ʻe ua ʻa ia naʻa nau maʻu. ʻUluakí, naʻa nau fakakaukau kinautolu ʻe toe fakafoki mai ʻa e Puleʻanga ʻo e ʻOtuá ki ʻIsileli fakakakano. Ko hono uá, naʻa nau ʻamanekina ʻe kinautolu ko e Puleʻanga ne talaʻofá ʻe kamata pule ai pē ia ʻi he taimi ko iá, ʻi he “taimí ni.” Naʻe anga-fēfē ʻa hono tokoniʻi kinautolu ʻe Sīsū ke fakatonutonu ʻenau fakakaukaú?

⁹ ʻOku ngalingali pē naʻe ʻiloʻi ʻe Sīsū ʻe ʻi ai pē taimi ʻe fakatonutonu ai ʻa e fakakaukau naʻa nau ʻuluaki maʻú. Ko hono moʻoní, ko ʻene kau muimuí naʻe ʻamanaki ke nau fakamoʻoni sio pau ki hono fanauʻi ʻo ha puleʻanga foʻou, ko ʻIsileli fakalaumālie, ʻi he ʻaho pē ʻe hongofulu ki mui ai! Ko e ngaahi feangainga ʻa e ʻOtuá mo ʻIsileli fakakakanó naʻe ofí ni ke ngata atu ia. ʻI he fekauʻaki mo e foʻi fakakaukau hono uá, naʻe fakamanatu anga-ʻofa ange ʻe Sīsū kia kinautolu: “ʻOku ʻikai ʻa kimoutolu ia ke ʻilo ki he ngaahi taimi pe ngaahi kuonga ʻa ia kuo taʻofi ʻe he Tamaí ki hono mafai pē ʻoʻoná.” (Ngā. 1:7) Ko Sihova ʻa e Tokotaha-Fokotuʻu-mo-Tauhi-Taimi Lahí. Ki muʻa ke pekia ʻa Sīsuú, naʻá ne pehē ʻe ia tonu, naʻa mo e ʻAló naʻe ʻikai te ne ʻilo ʻi he taimi ko iá ʻa e “ʻaho mo e houa” ʻe hoko mai ai ʻa e ngataʻangá ka “ko e Tamaí toko taha pē.” (Māt. 24:36) ʻI he aʻu mai ki he ʻaho ní, kapau ʻoku hohaʻa taʻetotonu ʻa e kau Kalisitiané ʻo fekauʻaki mo e taimi ʻo e ngataʻanga ʻo e fokotuʻutuʻu ko ení, ko hono moʻoní, ʻoku nau hohaʻa kinautolu ʻo fekauʻaki mo e meʻa ʻoku ʻikai ʻa kinautolu ia ke ʻilo ki ai.

10. Ko e hā ʻa e tōʻonga fakakaukau ʻa e kau ʻapositoló ʻoku totonu ke tau fakatupulekiná, pea ko e hā hono ʻuhingá?

¹⁰ Neongo ia, ʻoku totonu ke tau tokanga ke ʻoua te tau siolalo ki he kau ʻapositolo ʻa Sīsuú, ʻa ia naʻa nau hoko ko e kau tangata ʻo e tui lahi. Naʻa nau tali anga-fakatōkilalo ʻa e fakatonutonú. Ko e toe meʻa ʻe taha, neongo ko ʻenau fehuʻí naʻe tupu mei he fakakaukau hala, naʻe toe fakahaaʻi mai ai naʻa nau maʻu ha tōʻonga fakakaukau lelei. Naʻe toutou fakalototoʻaʻi ʻe Sīsū ʻa ʻene kau muimuí: “Hanganaki leʻo.” (Māt. 24:42; 25:13; 26:41) Naʻa nau ʻāʻā fakalaumālie, ʻo nau fakasio vēkeveke ki ha fakamoʻoni ʻo e teu ko ia ke fai ʻe Sihova ha meʻá. Ko e faʻahinga tōʻonga fakakaukau ia ʻoku fiemaʻu ke tau fakatupulekina he ʻaho ní. Ko hono moʻoní, ko e ‘ngaahi ʻaho fakaʻosi’ ʻoku tāutuku atu ko ení, ʻokú ne ʻai ke toe fakavavevave ange ia ʻi ha toe taimi ki muʻa ʻa e fiemaʻu ko ia ke tau fai peheé.​—2 Tīm. 3:1-5.

11, 12. (a) Naʻe ʻoange ʻe Sīsū ki heʻene kau muimuí ʻa e fekau ko e hā? (e) Ko e hā naʻe feʻungamālie ai kia Sīsū ke ne lave ki he laumālie māʻoniʻoní ʻi he fekauʻaki mo e fekau ke malangá?

¹¹ Naʻe fakamanatu ange ʻe Sīsū ki he kau ʻapositoló ʻa e meʻa ʻoku totonu ko ʻenau tokanga tefitó ia. Naʻá ne tala ange: “Te mou maʻu ʻa e mālohi ʻi he ʻalu hifo kiate kimoutolu ʻa e laumālie māʻoniʻoní, pea te mou hoko ko e kau fakamoʻoni kiate au ʻi Selusalema, ʻi he kotoa ʻo Siuteá mo Samēlia, pea ki he feituʻu taupotu taha ʻo e māmaní.” (Ngā. 1:8) ʻI Selusalema, ʻa ia naʻe tāmateʻi ai ʻe he kakaí ʻa Sīsuú, ʻe ʻuluaki fanongonongo ai ʻa e ongoongo ʻo ʻene toetuʻú. Mei ai leva, ʻe mafola atu ʻa e pōpoaki ko iá ki he kotoa ʻo Siuteá, pea ki Samēlia, pea ki he ngaahi feituʻu mamaʻo atu aí.

¹² ʻOku feʻungamālie ʻa e lave ʻa Sīsū ki he fekau ke malangá ʻi he hili pē ko ia ʻene toe leaʻaki ʻene talaʻofa ke ʻohifo ʻa e laumālie māʻoniʻoní ke ne tokoniʻi kinautolú. Ko e taha eni ʻo e ngaahi ʻasi laka hake he tuʻo 40 ʻa e kupuʻi lea “laumālie māʻoniʻoní” ʻi he tohi ʻa Ngāué. ʻOku toutou fakamahino mai ʻe he tohi Tohi Tapu māʻalaʻala ko ʻení ʻe ʻikai lava ke tau fakahoko ʻa e finangalo ʻo Sihová ʻo taʻekau ki ai ʻa e tokoni ʻa e laumālie māʻoniʻoní. He mahuʻinga leva ē ke tau lotu maʻu pē ʻo kole ʻa e laumālie ko iá! (Luke 11:13) ʻOku ʻikai mo ha toe taimi ʻe mātuʻaki fiemaʻu ai ia kiate kitautolu ka ko e taimí ni.

13. ʻOku lahi fēfē ʻa e vāhenga-ngāue fakamalanga kuo tuku ki he kakai ʻa e ʻOtuá ʻi he ʻaho ní, pea ko e hā ʻoku totonu ai ke tau fakahoko vēkeveke iá?

¹³ Ko e ʻuhinga ʻo e meʻa ʻoku fekauʻaki mo e “feituʻu taupotu taha ʻo e māmaní” kuo liliu ia talu mei he ngaahi ʻaho ko iá. Kae kehe, hangē ko ia ʻoku hā ʻi he vahe ki muʻá, ko e Kau Fakamoʻoni ʻa Sihová kuo nau tali loto-ʻaufuatō ʻa e vāhenga-ngāue ko ʻeni ke faifakamoʻoní, ʻi he ʻiloʻi ko e finangalo ia ʻo e ʻOtuá ke fanongo ʻa e faʻahinga kakai kotoa pē ki he ongoongo lelei ʻo hono Puleʻangá. (1 Tīm. 2:3, 4) ʻOkú ke mātuʻaki femoʻuekina ʻi he ngāue fakahaofi moʻui ko ení? ʻE ʻikai malava ke ke maʻu ʻi ha toe feituʻu ha ngāue ʻoku mohu ʻuhinga mo fakafiemālie ange! ʻE ʻoatu ʻe Sihova ʻa e mālohi ʻoku fiemaʻu kiate koe ke ke fakahokoʻaki iá. Ko e tohi ʻa Ngāué te ne tala atu kiate koe ʻa e meʻa lahi ʻo fekauʻaki mo e ngaahi founga totonu ke ngāueʻakí pea mo e tōʻonga fakakaukau ke fakatupulekina kae lava ai ke ke hoko ʻo ola leleí.

14, 15. (a) Ko e hā naʻe leaʻaki ʻe he ongo ʻāngeló ʻo fekauʻaki mo e toe foki mai ʻa Kalaisí, pea ko e hā e meʻa naʻá na ʻuhinga ki aí? (Toe sio foki ki he fakamatala ʻi laló.) (e) Naʻe anga-fēfē ʻa hono fakamoʻoniʻi naʻe “ʻi he anga tatau” pē ʻa e toe foki mai ʻa Kalaisí mo ʻene mavahe haké?

¹⁴ Hangē ko ia naʻe lave ki ai ʻi he kamataʻanga ʻo e vahe ko ení, naʻe ʻalu hake ʻa Sīsū mei he māmaní ʻo ne pulia ʻo ʻikai toe lava ke fai ha sio kiate ia. Ka ko e kau ʻapositolo ʻe toko 11 naʻa nau kei tuʻu atu pē ai, ʻo sio ki he langí. Faai atu pē, naʻe hā mai ha ongo ʻāngelo ʻe toko ua ʻo na ʻoatu ʻa e kiʻi valoki anga-vaivai ko ení: “ʻA e kau tangata ʻo Kāleli, ko e hā ʻoku mou tuʻu ai ʻo sio ki he langí? Ko e Sīsū ko eni ʻa ia kuo ʻohake meiate kimoutolu ki he langí te ne toe haʻu ʻi he anga tatau mo ia kuo mou sio ai kiate ia ʻi heʻene ʻalu hake ki he langí.” (Ngā. 1:11) Naʻe ʻuhinga nai ʻa e ongo ʻāngeló ʻe toe foki mai ʻa Sīsū ʻi he sino tatau, ʻo hangē ko ia ʻoku akoʻi ʻe he kau lotu ʻe niʻihi? ʻIkai, naʻe ʻikai ko ʻena ʻuhingá ia. ʻOku anga-fēfē ʻetau ʻiloʻi ení?

¹⁵ Naʻe pehē ʻe he ongo ʻāngeló ʻe toe foki mai ʻa Sīsū, ʻo ʻikai ʻi he fōtunga tatau, ka “ʻi he anga tatau.”b Naʻe fēfē ʻa e anga ʻo ʻene mavahe haké? Naʻe ʻikai lava ʻo fai ha sio kiate ia ʻi he taimi ko ia naʻe lea ai ʻa e ongo ʻāngeló. Ko e kau tangata toko siʻi pē ko iá, ʻa e kau ʻapositoló, naʻa nau ʻiloʻi kuo mavahe atu ʻa Sīsū mei he māmaní pea naʻá ne ʻalu haké ki heʻene Tamaí ʻi hēvani. Ko e anga ʻo e toe foki mai ʻa Kalaisí ʻe meimei tatau pē. Pea naʻe pehē pē. ʻI he ʻahó ni, ko e faʻahinga pē ʻoku nau maʻu ʻa e ʻiloʻilo fakalaumālié ʻoku nau ʻiloʻi ko Sīsuú ʻokú ne lolotonga ʻi he mafai fakatuʻí. (Luke 17:20) ʻOku fiemaʻu ia ke tau ʻiloʻi ʻa e fakamoʻoni ʻo ʻene ʻi hení pea fakahaaʻi ia ki he niʻihi kehé koeʻuhí ke nau lava ai foki mo kinautolu ʻo sio ki he fakavavevave ʻa hotau taimí.

16-18. (a) Mei he Ngāue 1:13, 14, ko e hā ʻoku tau ako ʻo fekauʻaki mo e ngaahi fakatahataha faka-Kalisitiane ki he lotú? (e) Ko e hā ʻe lava ke tau ako mei he faʻifaʻitakiʻanga naʻe fokotuʻu ʻe Mele ko e faʻē ʻa Sīsuú? (f) Ko e hā ʻoku mātuʻaki mahuʻinga ai ʻi he ʻahó ni ʻa e ngaahi fakataha faka-Kalisitiané?

¹⁶ ʻOku ʻikai ke ʻi ai ha ofo ʻi he “foki ki Selusalema mo e fiefia lahi” ʻa e kau ʻapositoló. (Luke 24:52) ʻE anga-fēfē leva haʻanau tali ki he tataki mo e fakahinohino ʻa Kalaisí? ʻI he veesi 13 mo e 14 ʻo e Ngāue vahe 1, ʻoku tau ʻilo ai naʻa nau fakatahataha ʻi ha “loki ʻi ʻolunga,” pea ʻoku tau ako ai ha ngaahi fakaikiiki fakatupu tokanga ʻo fekauʻaki mo e ngaahi fakatahataha peheé. Ko e ngaahi fale ʻi Pālesitainé ʻi he taimi ko iá naʻe faʻa ʻi ai ha loki ai ʻi ʻolunga, ʻa ia naʻe lava ke fai ʻa e hū ki aí ʻi ha sitepu ʻi tuʻa. ʻE lava nai ke pehē ko e “loki ʻi ʻolunga” ko ʻení ko e loki ia ʻi ʻolunga ʻi he fale naʻe lave ki ai ʻi he Ngāue 12:12, ʻa ia ko e fale ia ʻo e faʻē ʻa Maʻaké? Pe ko e hā pē ʻa e tuʻungá, ʻoku ngalingali pē ko ha kiʻi fale lahi feʻunga mo feʻungamālie ia ki he kau muimui ʻo Kalaisí ke nau fakatahataha ai. Ka ko hai naʻe fakatahataha aí, pea ko e hā ʻa e meʻa naʻa nau faí?

¹⁷ Fakatokangaʻi ange ko e fakatahataha ko iá naʻe ʻikai ke fakangatangata pē ia ki he kau ʻapositoló, pe ki he kakai tangatá pē. Ko e “kau fefine ʻe niʻihi” naʻa nau ʻi ai, ʻo kau ai ʻa e faʻē ʻa Sīsuú, ʻa Mele. Ko e lave fakahangatonu fakaʻosi eni kia Mele ʻi he Tohi Tapú. ʻOku feʻungamālie ke fakakaukau kiate ia ʻi he tuʻunga ko iá, ʻa e ʻikai ko ia ke ne kumi ki ha tuʻunga tuʻu-ki-muʻá, ka ne anga-fakatōkilalo ʻo ne haʻu ke lotu fakataha mo hono fanga tuongaʻane mo hono fanga tokoua fakalaumālié. Kuo pau pē naʻe fakafiemālie kiate ia ʻa e fakataha mo ia ʻi he taimi ko ení ʻa hono ngaahi foha kehe ʻe toko faá, ʻa ia naʻe ʻikai ke nau hoko ko e kau tui ʻi he lolotonga ʻa e kei moʻui ʻa Sīsuú. (Māt. 13:55; Sione 7:5) Talu mei he pekia mo e toetuʻu ʻa honau tokoua faʻē tahá, naʻa nau hoko ai ko e kau tangata kuo liliu.​—1 Kol. 15:7.

¹⁸ Toe fakatokangaʻi ange foki ʻa e ʻuhinga naʻe fakatahataha ai ʻa e kau ākongá ni: “ʻI he taumuʻa pē taha, naʻe kīvoi ʻa e faʻahingá ni kotoa ʻi he lotu.” (Ngā. 1:14) Ko e fakatahataha fakatahá kuo hoko maʻu pē ia ko ha fiemaʻu tefito ki he lotu ʻa e Kalisitiané. ʻOku tau fakatahatahá ke tau fefakalototoʻaʻaki, ke maʻu ʻa e fakahinohino mo e akonaki pea hiliō aí, ke tau kau fakataha ʻi he lotu ki heʻetau Tamai fakahēvaní, ʻa Sihova. Ko ʻetau ngaahi lotu mo e ngaahi hiva ʻo e fakahīkihiki ʻi he ngaahi taimi peheé ʻoku fakahōifua ʻaupito ia kiate ia pea ʻoku mātuʻaki mahuʻinga ia kiate kitautolu. Fakatauange ke ʻoua ʻaupito naʻa tau liʻaki ʻa e ngaahi fakatahataha toputapu mo fakatupu langa hake ko ʻení!​—Hep. 10:24, 25.

19-21. (a) Ko e hā ʻoku tau ako mei he ngafa tefito naʻe fakahoko ʻe Pita ʻi he fakatahaʻangá? (e) Ko e hā naʻe fiemaʻu ai ke ʻi ai ha fetongi ʻo Siutasí, pea ko e hā ʻe lava ke tau ako mei he founga naʻe fakahokoʻaki iá?

¹⁹ Ko e kau muimui ko ia ʻo Kalaisí naʻa nau fehangahangai he taimi ko ení mo ha fiemaʻu fakaekautaha mahuʻinga, pea ko e ʻapositolo ko Pitá naʻe takimuʻa ʻi he ngāue ki aí. (Veesi 15-26) ʻIkai ʻoku fakafiemālie ke ʻiloʻi ʻa e tuʻunga ne aʻu ki ai ʻa Pitá ʻi he ngaahi uike ko eni talu mei heʻene fakafisingaʻi tuʻo tolu ʻa hono ʻEikí? (Mk. 14:72) ʻOku tau hehemangofua kotoa ki he angahalá, pea ʻoku fiemaʻu kiate kitautolu ʻa e ngaahi fakamanatu ko Sihová ʻoku “lelei” mo “faʻa fakamolemole” ki he faʻahinga ʻoku fakatomala loto-moʻoní.​—Saame 86:5.

²⁰ Naʻe ʻiloʻi ʻe Pita ko Siutasi, ʻa e ʻapositolo naʻá ne lavakiʻi ʻa Sīsuú, ʻoku totonu ke ʻi ai hano fetongi. Ka ʻe fetongí ʻe hai? Ko e ʻapositolo foʻou ko iá ʻoku totonu ko e tokotaha ia naʻe muimui ʻia Sīsū ʻi he kotoa ʻo ʻene ngāue fakafaifekaú pea naʻá ne fakamoʻoni ki heʻene toetuʻú. (Ngā. 1:21, 22) Naʻe fehoanaki ia mo e talaʻofa tonu ʻa Sīsū: “Ko kimoutolu ko ia kuo muimui ʻiate aú te mou nofo ʻi he ngaahi taloni ʻe 12, ʻo fakamāuʻi ʻa e ngaahi matakali ʻe 12 ʻo ʻIsilelí.” (Māt. 19:28) ʻOku hā mahino naʻe fakataumuʻa ʻe Sihova ke ʻai ʻa e kau ʻapositolo ʻe toko 12 naʻe muimui ʻia Sīsū lolotonga ʻene ngāue fakafaifekau ʻi he māmaní ʻo faʻuʻaki kinautolu ʻa e “maka fakavaʻe ʻe 12” ʻi he kahaʻú ʻo Selusalema Foʻoú. (Fkh. 21:2, 14) Ko ia naʻe fakaʻatā ai ʻe he ʻOtuá ʻa Pita ke ne sio ko e kikite ko ia, “ke maʻu hono lakanga ʻe ha taha kehe,” naʻe ʻuhinga iá kia Siutasi.​—Saame 109:8.

²¹ Naʻe anga-fēfē hono fai ʻa e fili ko iá? ʻAki hono fai ha talotalo pe lulu ki ai, ʻa ia ko ha tōʻonga anga-maheni ia ʻi he ngaahi taimi ʻo e Tohi Tapú. (Pal. 16:33) Kae kehe, ko hono fakahaaʻi fakaʻosi eni ʻe he Tohi Tapú ʻa hono ngāueʻaki ʻa e talotaló pe lulú ʻi he founga ko ení. ʻOku hā mahino, ko hono huaʻi hifo ʻo e laumālie māʻoniʻoní ki mui aí naʻe hā mei ai ʻa e ʻikai ke kei ngāueʻaki ʻa e founga ko iá. Kae fakatokangaʻi ange ʻa e ʻuhinga naʻe ngāueʻaki ai ʻa e talotaló pe lulú. Naʻe lotu ʻa e kau ʻapositoló: “ʻA e ʻafiona, ʻe Sihova, ʻokú ke ʻafioʻi ʻa e ngaahi loto kotoa pē, fakahaaʻi mai pe ko fē ʻa e taha ʻi he ongo tangatá ni kuó ke fili.” (Ngā. 1:23, 24) Naʻa nau lotó ke ʻa Sihova ʻa e filí. Ko Mataiasi, ʻa ia ʻoku ngalingali ko e taha ia ʻo e kau ākonga ʻe toko 70 ʻa ia naʻe fekauʻi atu ʻe Sīsū ke nau malangá, ko ia naʻe filí. Naʻe hoko leva ai ʻa Mataiasi ko e taha ʻo e “toko Hongofulu-mā-uá.”c​—Ngā. 6:2.

22, 23. Ko e hā ʻoku totonu ai ke tau fakamoʻulaloa mo talangofua ki he faʻahinga ʻoku takimuʻa ʻi he fakatahaʻangá ʻi he ʻaho ní?

²² Ko e meʻa ko eni naʻe hokó ʻokú ne fakamanatu mai kiate kitautolu ʻa e mahuʻinga ʻo e fokotuʻutuʻu māú ʻi he lotolotonga ʻo e kakai ʻa e ʻOtuá. ʻOku aʻu mai ki he ʻahó ni, kuo fili ha kau tangata fua fatongia ke nau hoko ko e kau ʻovasia ʻi he fakatahaʻangá. ʻOku vakaiʻi fakalelei ʻe he kau mātuʻá ʻa e ngaahi tuʻunga taau Fakatohitapu ʻoku fiemaʻu ki he kau ʻovasia ko iá, pea ʻoku nau lotu ki he tataki ʻa e laumālie māʻoniʻoní. Ko ia ʻoku vakai ai ʻa e fakatahaʻangá ki he kau tangata ko iá ko e fakanofo kinautolu ʻe he laumālie māʻoniʻoní. ʻI he tafaʻaki ʻa kitautolú, ʻoku tau nofoʻaki fakamoʻulaloa ai pē mo talangofua ki heʻenau tatakí, ʻo pouaki ha laumālie fāitaha ʻi he fakatahaʻangá.​—Hep. 13:17.

²³ ʻI hono fakaivimālohiʻi ko eni ʻo e kau ākonga ko iá ʻi he ngaahi hā ko ia ʻa Sīsū ʻi heʻene toetuʻú mo fakaivia ʻe he ngaahi fakalelei fakaekautahá, naʻa nau mateuteu kakato ai ki he meʻa naʻe toka mei muʻá. Ko e vahe hokó ʻe fai ai ʻa e lāulea ki he meʻa mātuʻaki mahuʻinga ko iá.