“Kuo Mau Loto-Taha Kotoa”

1, 2. (a) Ko e hā ʻa e ongo fehuʻi mafatukituki ʻoku fehangahangai mo e kulupu pule ʻo e fakatahaʻanga Kalisitiane ʻi he ʻuluaki senitulí? (e) Ko e hā ʻa e tokoni ʻoku maʻu ʻe he fanga tokoua ko iá koeʻuhí ke nau aʻu ai ki he aofangatuku totonú?

ʻOKU tatali vēkeveke atu ʻa e tokotaha kotoa pe ko e hā ʻa e fili ʻe faí. Ko e kau ʻapositolo mo e kau mātuʻa ʻoku nau ʻi he loki ko eni ʻi Selusalemá ʻoku nau fesiofaki, ʻo nau ongoʻi kuo nau aʻu mai eni ki ha foʻi mōmeniti mātuʻaki mahuʻinga. Ko e ʻīsiu ʻo e kamú kuó ne langaʻi ha ongo fehuʻi mafatukituki. ʻOku ʻi he malumalu ʻo e Lao ʻa Mōsesé ʻa e kau Kalisitiané? ʻOku totonu ke ʻi ai ha faʻahinga fakafaikehekehe ʻi he vahaʻa ʻo e kau Kalisitiane Siú mo e kau Kalisitiane Senitailé?

² Ko e kau tangata ko ia ʻoku nau takimuʻá kuo nau ʻosi vakaiʻi ha ngaahi fakamoʻoni lahi. ʻOku ʻi heʻenau fakakaukaú ʻa e Folofola fakaekikite ʻa e ʻOtuá pea pehē foki ki he fakamoʻoni sio tonu mālohi ʻa ia naʻá ne fakahaaʻi mai ʻa e tāpuaki ʻa Sihová. Kuo nau ʻosi fakahaaʻi kakato ʻa e anga ʻenau fakakaukaú. Kuo lahi fau ʻa e fakamoʻoni kuo tānaki mai ʻo fekauʻaki mo e ʻīsiu ʻoku lolotonga fai hono talanoaʻí. ʻOku hā mahino mai ʻoku tataki kinautolu ʻe he laumālie ʻo Sihová. ʻE tali nai ʻe he kau tangata ko ʻení ʻa e tataki ko iá?

 3. ʻE anga-fēfē nai haʻatau maʻu ʻaonga mei hono sivisiviʻi ʻa e fakamatala ʻi he Ngāue vahe 15?

³ Ke tali ʻa e tataki ʻa e laumālié ʻi he tuʻungá ni, ʻe fiemaʻu ki ai ʻa e tui moʻoni pea mo e loto-toʻa. ʻOku nau ʻi he tuʻunga pelepelengesi he ʻe lava ke toe fakalalahi ai pē ʻa e tāufehiʻa mai ʻa e kau taki lotu Siú. Pea ʻoku nau fehangahangai mo e fakafepaki mei he kau tangata ʻi loto ʻi he fakatahaʻangá ʻa ia ʻoku nau ʻosi fakapapauʻi ke nau taki ʻa e kakai ʻa e ʻOtuá ke nau toe foki ʻo fakafalala ki he Lao ʻa Mōsesé. Ko e hā ʻe fai ʻe he kulupu pulé? Tau sio angé ki aí. ʻI heʻetau vakaiʻi ko ia ʻa e fakamatalá ni, te tau sio ai ki he anga hono fokotuʻu ʻe he kau tangata ko iá ha sīpinga ʻa ia ʻoku muimui ki ai ʻa e Kulupu Pule ʻo e Kau Fakamoʻoni ʻa Sihová ʻi he ʻaho ní. Ko ha sīpinga ia ʻoku toe fiemaʻu foki mo kitautolu ke tau muimui ki ai ʻi heʻetau fehangahangai mo ha ngaahi fili ke fai mo e ngaahi pole ʻi heʻetau moʻui ʻi he tuʻunga ko e kau Kalisitiané.

4, 5. Ko e hā ʻa e fakamaama mei he Folofola fakaekikite ʻa e ʻOtuá naʻe ʻomai ʻe Sēmisi ki he tālanga naʻe faí?

⁴ Ko e ākonga ko Sēmisí, ʻa e tokoua faʻē taha ʻo Sīsuú, naʻá ne lea hake.a ʻI he tuʻunga ko ʻení, ʻoku hangehangē ko ia naʻe sea ʻi he fakatahá. Naʻe hanga ʻe heʻene ngaahi leá ʻo fakapapauʻi mai ʻa e loto-taha ʻoku hā mai kuo aʻu ki ai ʻa e foʻi kulupu ko ʻení fakakātoa. Naʻe pehē ʻe Sēmisi ki he kau tangata ko ia naʻe fakatahataha aí: “Kuo fakamatala fakaʻāuliliki ʻa Simioni ki he anga ʻo e tokanga ʻa e ʻOtuá ʻi he ʻuluaki taimí ki he ngaahi puleʻangá ke toʻo mai meiate kinautolu ha kakai maʻa hono huafá. Pea ko e meʻá ni ʻoku fehoanaki ia mo e lea ʻa e Kau Palōfitá.”​—Ngā. 15:14, 15.

⁵ Ko e lea naʻe fai ʻe Simioni, pe Saimone Pitá, pea mo e fakamoʻoni naʻe ʻomai ʻe Panepasa mo Paulá ʻoku pau pē naʻá ne ʻomi ki he fakakaukau ʻa Sēmisí ʻa e ngaahi konga Tohi Tapu feʻungamālie ʻa ia naʻá ne ʻomi ʻa e fakamaama ʻo kau ki he kaveinga naʻe fai hono tālangaʻí. (Sione 14:26) ʻI he hili hono leaʻaki ʻo pehē “ʻoku fehoanaki ia mo e lea ʻa e Kau Palōfitá,” naʻe toʻo-lea hangatonu ʻa Sēmisi mei he ngaahi lea ʻi he ʻĒmosi 9:11, 12 (NW). Ko e tohi ko iá naʻe fakakau ia ʻi he konga ʻo e Ngaahi Konga Tohi Tapu Faka-Hepeluú ʻa ia ʻoku angamaheniʻaki hono ui ko e “Kau Palōfitá.” (Māt. 22:40; Ngā. 15:16-18) Te ke fakatokangaʻi ko e ngaahi lea naʻe toʻo-lea hangatonu mai ʻe Sēmisí ʻoku kiʻi kehe siʻi ia mei he ngaahi lea ʻoku tau maʻu ʻi he ʻahó ni ʻi he tohi ʻa ʻĒmosí. ʻOku ngalingali naʻe toʻo-lea hangatonu mai ʻa Sēmisi mei he Sepituakiní, ʻa ia ko ha liliu faka-Kalisi ia ʻo e Ngaahi Konga Tohi Tapu Faka-Hepeluú.

 6. Naʻe anga-fēfē hono ʻomai ʻe he Folofolá ha fakamaama ki he tālanga naʻe faí?

⁶ Fakafou ʻi he palōfita ko ʻĒmosí, naʻe tomuʻa tala ai ʻe Sihova ʻe hoko mai ʻa e taimi ʻa ia te Ne fokotuʻu hake ai ʻa e “palepale ʻo Tēvita,” ʻa ia, ko e laine fakatuʻi ʻoku taki atu ki he Puleʻanga Faka-Mīsaiá. (ʻIsi. 21:26, 27) ʻE toe feangainga nai ʻa Sihova mo e kau Siu fakakakanó ʻataʻatā pē ʻi he tuʻunga ko ha puleʻangá? ʻIkai. ʻOku tānaki mai ʻe he kikité ko e “kakai ʻo e ngaahi puleʻangá kotoa” ʻe ʻomi fakataha kinautolu ʻi he tuʻunga ko e ‘kakai ʻoku uiʻaki ʻa e huafa’ ʻo e ʻOtuá. Manatuʻi, ko e toki ʻosi atu pē eni ʻa e fakamoʻoni ʻa Pita ʻo pehē ko e ʻOtuá “naʻe ʻikai ʻaupito haʻane fai ha fakafaikehekehe ʻiate kitautolu [kau Kalisitiane Siú] mo kinautolu [kau tui Senitailé], ka naʻá ne fakamaʻa honau lotó ko e meʻa ʻi heʻenau tuí.” (Ngā. 15:9) ʻI hono fakalea ʻe tahá, ko e finangalo ia ʻo e ʻOtuá ke ʻomi fakatouʻosi ʻa e kau Siú mo e kau Senitailé ki he Puleʻangá ʻi he tuʻunga ko e kau ʻea. (Loma 8:17; ʻEf. 2:17-19) ʻOku ʻikai ʻaupito ha teitei fakahuʻunga mai ʻe he ngaahi kikite fakamānavaʻi ko iá ʻo pehē ko e kau tui Senitailé kuo pau ke ʻuluaki kamu kinautolu ʻi he kakanó pe ko ʻenau hoko ko e kau ului.

7, 8. (a) Ko e hā ʻa e meʻa naʻe fokotuʻu ange ʻe Sēmisí? (e) ʻOku totonu ke fēfē ʻetau mahinoʻi ʻa e ngaahi lea ʻa Sēmisí?

⁷ ʻI hono ueʻi ʻe he fakamoʻoni pehē mei he Folofolá pea mo e fakamoʻoni mālohi naʻá ne fanongo ki aí, naʻe hoko atu ai ʻa Sēmisi ʻo ne ʻoatu ʻa e ngaahi leá ni ko ha fokotuʻu fakakaukau: “Ko ia ai, ko ʻeku filí ke ʻoua ʻe fakahohaʻasi ʻa e faʻahinga mei he ngaahi puleʻangá ʻa ia ʻoku nau tafoki ki he ʻOtuá, ka ke fai ha tohi kiate kinautolu ke nau fakaʻehiʻehi mei he ngaahi meʻa kuo ʻuliʻi ʻe he ngaahi ʻaitolí, mei he fehokotaki fakasino taʻetāú, mei he meʻa kuo sisiná, pea mei he totó. He mei he ngaahi taimi ki muʻá kuo malangaʻi ai ʻe he faʻahinga ʻa Mōsese ʻi he kolo ki he kolo, pea ko ʻene ngaahi tohí kuo lau leʻo-lahi ia ʻi he ngaahi sinakoké ʻi he Sāpate kotoa pē.”​—Ngā. 15:19-21.

⁸ ʻI he pehē ʻe Sēmisi “ko ia ai, ko ʻeku filí,” naʻá ne fakahaaʻi anga-fakaaoao nai ai ʻa hono mafaí​—ʻi he tuʻunga nai ko e sea ia ʻo e fakatahá​—ki he fanga tokoua kehé peá ne fakaehaua ʻo ne fili pē ʻe ia ʻa e meʻa ke faí? Mole ke mamaʻo! Ko e kupuʻi lea faka-Kalisi naʻe liliu ko e “ko ʻeku filí” ʻe lava ke ʻuhinga ia “ʻoku ou pehē” pe “ʻoku ʻoatu ʻeku fakakaukau.” ʻI he ʻikai ʻaupito ke ne pulepuleʻi ʻa e foʻi kulupú fakakātoa, naʻe fokotuʻu atu ʻe Sēmisi ha meʻa ke nau fakakaukau ki ai, ʻa ia naʻe makatuʻunga ʻi he fakamoʻoni naʻe fai ʻa e fanongo ki ai pea mo e meʻa naʻe leaʻaki ʻe he Folofolá ʻo fekauʻaki mo e tuʻunga ko iá.

 9. Naʻe ʻomi ʻe he foʻi fokotuʻu ʻa Sēmisí ʻa e ngaahi ʻaonga ko e hā?

⁹ Ko e foʻi fokotuʻu ʻa Sēmisí ko ha foʻi fokotuʻu lelei nai ia? ʻOku hā mahino mai naʻe lelei ia, he ki mui aí, naʻe tali ia ʻe he kau ʻapositoló pea mo e kau mātuʻá. Ko e hā leva ʻa e ngaahi ʻaonga naʻe hoko aí? ʻI he tafaʻaki ʻe tahá, ko e meʻa naʻe fokotuʻu ange ke faí ʻe ʻikai te ne “fakaongosiaʻi,” pe “fakakinaʻi” ʻa e kau Kalisitiane Senitailé ʻaki hano hilifaki atu kiate kinautolu ʻa e ngaahi fiemaʻu ʻa e Lao ʻa Mōsesé. (Ngā. 15:19; Paaki Foʻou) ʻI he tafaʻaki leva ʻe tahá, ko e fili ko ʻení ʻe fakahāhā ai ʻa hono tokaʻi ʻa e konisēnisi ʻo e kau Kalisitiane Siú, ʻa ia kuo nau fanongo ʻi he faai mai ʻa e ngaahi taʻú ʻi hono ‘lau leʻo-lahi ʻa e ngaahi tohi ʻa Mōsesé ʻi he ngaahi sinakoké ʻi he Sāpate kotoa pē.’b (Ngā. 15:21) Ko e meʻa ko ʻeni naʻe fokotuʻu ange ke faí te ne fakaivimālohiʻi moʻoni ʻa e haʻi ʻi he vahaʻa ʻo e kau Kalisitiane Siú mo e kau Kalisitiane Senitailé. Mahulu hake aí, ʻe fakahōifua ia kia Sihova ko e ʻOtuá, he ʻoku tapua atu ai ʻa ʻene taumuʻá. He founga lelei moʻoni ē ke solova ʻaki ha palopalema ʻa ia naʻá ne fakamanamanaʻi ʻa e fāʻūtaha mo e lelei ʻa e fakatahaʻanga fakalūkufua ʻo e kakai ʻa e ʻOtuá! Pea ko ha faʻifaʻitakiʻanga lelei moʻoni eni ki he fakatahaʻanga Kalisitiane ʻi he ʻaho ní!

10. ʻOku anga-fēfē ʻa e muimui ʻa e Kulupu Pule ʻi he ʻaho ní ki he sīpinga naʻe fokotuʻu ʻe hono hoatatau ʻi he ʻuluaki senitulí?

¹⁰ Hangē ko ia naʻe lave ki ai ʻi he vahe ne toki ʻosi atú, ʻi he hangē ko hono hoatatau ʻi he ʻuluaki senitulí, ʻoku hanga ʻa e Kulupu Pule ʻo e Kau Fakamoʻoni ʻa Sihová ʻi he ʻaho ní kia Sihova, ʻa e Hau Fakalevelevá, pea mo Sīsū Kalaisi, ʻa e ʻUlu ʻo e fakatahaʻangá, ki ha tataki ʻi he ngaahi meʻa kotoa pē.c (1 Kol. 11:3) ʻOku anga-fēfē hono fai ení? Ko Albert D. Schroeder, ʻa ia naʻá ne kau ʻi he Kulupu Pulé mei he 1974 ʻo aʻu ki he ngata ʻa e ʻalunga ʻo ʻene moʻui ʻi he māmaní ʻi Maʻasi 2006, naʻá ne fakamatala: “ʻOku fakataha ʻa e Kulupu Pulé ʻi he Pulelulú, ʻo kamata ʻa e fakatahá ʻaki ʻa e lotu ʻo kole ʻa e tataki ʻa e laumālie ʻo Sihová. ʻOku fai ʻa e feinga moʻoni ke sio ʻoku fakahoko ʻa e meʻa kotoa pē pea ʻoku fai ʻa e fili kotoa pē ʻo fehoanaki mo e Folofola ʻa e ʻOtuá ko e Tohi Tapú.” ʻI he tuʻunga meimei tatau, ko Milton G. Henschel, ko ha mēmipa fuoloa ia ʻo e Kulupu Pulé ʻa ia naʻe ngata ʻa e ʻalunga ʻo ʻene moʻui ʻi he māmaní ʻi Maʻasi 2003, naʻá ne ʻomai ha fehuʻi mātuʻaki mahuʻinga ki he kau maʻu tohi fakamoʻoni ako ʻo e kalasi hono 101 ʻo e Akoʻanga Tohi Tapu Taua Leʻo ko Kiliatí. Naʻá ne ʻeke, “ʻOku ʻi ai ha toe kautaha kehe ʻi he māmaní ʻa ia ko honau kau takí ʻoku nau kumi faleʻi ki he Folofola ʻa e ʻOtuá, ʻa e Tohi Tapú, ki muʻa ke nau fai ha ngaahi fili mahuʻinga?” ʻOku ʻosi mahino pē ʻa e tali ia ki aí.

11. Naʻe anga-fēfē hono fakaaʻu ʻa e fili ʻa e kulupu pulé ki he ngaahi fakatahaʻangá?

¹¹ Naʻe aʻu ʻa e kulupu pule ʻi Selusalemá ki ha fili loto-taha ʻi he ʻīsiu ʻo e kamú. Kae kehe, ke ngāue fāʻūtaha ʻa e fanga tokoua ʻi he ngaahi fakatahaʻangá, naʻe fiemaʻu ke fakaaʻu mahino atu ʻa e fili ko iá kiate kinautolu pea ʻi ha founga fakatupu langa hake mo fakalototoʻa. Ko e hā ʻa e founga lelei taha ke faiʻaki ení? ʻOku pehē ʻe he fakamatalá: “Naʻe fili leva ʻe he kau ʻapositoló mo e kau mātuʻá, fakataha mo e fakatahaʻangá fakalūkufua, ke fekauʻi atu ha ongo tangata kuo fili mei honau lotolotongá ke ō ki ʻAniteoke, fakataha mo Paula mo Panepasa; naʻa nau fekauʻi atu ʻa Siutasi ʻa ē naʻe ui ko Pāsapá pea mo Sailosi, ʻa ia ko e ongo tangata naʻá na takimuʻa he lotolotonga ʻo e fanga tokouá.” ʻIkai ko ia pē, naʻe teuteu ha tohi pea naʻe ʻave ia he kau tangatá ni koeʻuhí ke lava ke lau ia ʻi he kotoa ʻo e ngaahi fakatahaʻanga ʻi ʻAniteoke, Sīlia mo Silisiá.​—Ngā. 15:22-26.

12, 13. Ko e hā ʻa e lelei naʻe aʻusiá ʻi hono (a) fekauʻi atu ʻa Siutasi mo Sailosí? (e) ʻave ha tohi mei he kulupu pulé?

¹² ʻI he tuʻunga ko e “ongo tangata naʻá na takimuʻa he lotolotonga ʻo e fanga tokouá,” naʻe taau kakato ʻa Siutasi mo Sailosi ke na hoko ko e ongo fakafofonga ʻo e kulupu pulé. Ko hono fekauʻi atu ko ia ʻa e kau tangata ʻe toko faá ʻe ʻai ai ke hā mahino ko e pōpoaki naʻa nau ʻoatú naʻe ʻikai ko ha tali pē ia ki he fehuʻi naʻe ʻoange ki muʻá, ka ko e fakahāhā mahino ia ʻo e fakahinohino mei he kulupu pulé. Ko e haʻu ko ia ʻa e “ongo tangata kuo fili” ko ení ʻe faʻu ai ha haʻi vāofi ʻi he vahaʻa ʻo e kau Kalisitiane Siu ʻi Selusalemá pea mo e kau Kalisitiane Senitaile ʻi he ngaahi fakatahaʻangá. Ko ha fokotuʻutuʻu fakapotopoto mo anga-ʻofa moʻoni ē! ʻOku ʻikai ha veiveiua naʻá ne pouaki ʻa e melinó mo e uouongatahá ʻi he lotolotonga ʻo e kakai ʻa e ʻOtuá.

¹³ Naʻe tokonaki mai ʻe he tohí ha fakahinohino mahino ki he kau Kalisitiane Senitailé ʻo ʻikai fekauʻaki pē mo e ʻīsiu ʻo e kamú kae toe pehē foki ki he meʻa kuo pau ke nau fai koeʻuhí ke nau maʻu ai ʻa e hōifua mo e tāpuaki ʻa Sihová. Naʻe pehē ʻe he konga mahuʻinga ʻo e tohí: “Kuo hā lelei ki he laumālie māʻoniʻoní pea mo kimautolu tonu ke ʻoua ʻe toe tānaki atu ha kavenga kiate kimoutolu tuku kehe ʻa e ngaahi meʻa pau ko ení: Ke fakaʻehiʻehi ai pē mei he ngaahi meʻa kuo feilaulauʻaki ki he ngaahi ʻaitolí, mei he totó, mei he meʻa kuo sisiná, pea mei he fehokotaki fakasino taʻetāú. Kapau te mou mātuʻaki fakaʻehiʻehi mei he ngaahi meʻá ni, te mou lakalakaimonū. Fakatauange ke mou maʻu ha moʻui lelei!”​—Ngā. 15:28, 29.

14. ʻOku anga-fēfē ʻa e malava ki he kakai ʻa Sihová ke nau ngāue fāʻūtaha ʻi he māmani fakatupu māvahevahe ʻo e ʻaho ní?

¹⁴ ʻI he ʻahó ni, ko e uouongataha ʻo e tuí pea mo e ngāue fāʻūtahá ʻoku lotolotoi ia ʻi he Kau Fakamoʻoni ʻa Sihová, ʻa ia ko hono fakakātoá ʻoku nau laka hake ʻi he toko 8,000,000 ʻi he ngaahi fakatahaʻanga laka hake he 100,000 he māmaní takatakai. ʻOku lava fēfē ke hoko ha fāʻūtaha pehē, tautautefito ʻi he vakai atu ki he māveuveú mo e fakakaukau fakatupu māvahevahe ʻoku lotolotoi ʻi he māmani ʻo e ʻaho ní? Ko e ʻuhinga tefitó, ko e fāʻūtahá ko e ola ia ʻoku hoko mei he tataki mahino mo papau ʻa ia ʻoku hanga ʻe Sīsū Kalaisi, ko e ʻUlu ʻo e fakatahaʻangá, ʻo tokonaki mai fakafou ʻi he “tamaioʻeiki anga-tonu mo potó,” ʻa ia ko e Kulupu Pulé. (Māt. 24:45-47) ʻOku toe tupu foki ʻa e fāʻūtahá mei he anga ʻo e tali-angi loto-lelei ʻa e fetokouaʻaki fakamāmanilahí ki he fakahinohino ʻa e Kulupu Pulé.

15, 16. Ko e hā ʻa e ola naʻe hoko ʻi he fekauʻaki mo e ʻīsiu ʻo e kamú, pea ko e hā naʻá ne fakatupunga ʻa e ola ko iá?

¹⁵ ʻOku hoko atu ʻa e fakamatala ʻa e tohi ʻa Ngāué ʻo tala mai kiate kitautolu ko e taimi ko ia naʻe aʻu ai ki ʻAniteoke ʻa e fanga tokoua naʻe fekauʻi atu mei Selusalemá, “naʻa nau fakatahatahaʻi ʻa e kau ākongá pea ʻoange kiate kinautolu ʻa e tohí.” Naʻe anga-fēfē ʻa e fakafeangai ʻa e fanga tokoua ʻi aí ki he fakahinohino mei he kulupu pulé? “ʻI he hili hono lau [ʻa e tohí], naʻa nau fiefia ʻi he fakalototoʻa kuo faí.” (Ngā. 15:30, 31) ʻIkai ko ia pē, naʻe hanga ʻe Siutasi mo Sailosi ʻo “fakalototoʻaʻi ʻa e fanga tokouá ʻaki ha ngaahi malanga mo fakaivimālohiʻi kinautolu.” ʻI he ʻuhinga ko iá, naʻe hoko ai ʻa e ongo tangata ko iá ko ha “ongo palōfita,” ʻo hangē pē ko hono ui ʻa Panepasa, Paula mo e faʻahinga kehe ko e kau palōfitá​—ʻa ia ko ha foʻi lea ia ʻoku ʻuhinga ki he faʻahinga kuo nau talaki pe fakahā ʻa e finangalo ʻo e ʻOtuá.​—Ngā. 13:1; 15:32; ʻEki. 7:1, 2.

¹⁶ ʻOku hā mahino naʻe tāpuakiʻi ʻe Sihova ʻa e foʻi fokotuʻutuʻu kotoa ko iá, ʻo ʻomi ai ʻa e ʻīsiu ko iá ki ha fakaleleiʻanga fakafiefia. Ko e hā ʻa e kī ki he ola lelei ko iá? ʻOku ʻikai toe fehuʻia, ko e fakahinohino mahino mo taimi totonu ko ia ʻa e kulupu pulé, ʻo makatuʻunga ʻi he Folofola ʻa e ʻOtuá pea mo e tataki ʻa e laumālie māʻoniʻoní. Tānaki atu ki he meʻa ko iá ʻa e founga anga-ʻofa mo e mahuʻingaʻia fakafoʻituitui ʻa ia naʻe fakaaʻuʻaki ʻa e ngaahi fili ko iá ki he ngaahi fakatahaʻangá.

17. Naʻe anga-fēfē hono fokotuʻu ʻa e sīpinga ki he ngaahi tafaʻaki ʻe niʻihi ʻo e ngaahi ʻaʻahi ʻa e kau ʻovasia sēketi ʻi hotau ʻaho ní?

¹⁷ ʻI he muimui ki he sīpinga ko iá, ʻoku tokonaki mai ʻe he Kulupu Pule ʻo e Kau Fakamoʻoni ʻa Sihová ʻi he ʻaho ní ʻa e fakahinohino taimi totonu ki he fetokouaʻaki fakamāmanilahí. ʻI he taimi ʻoku fai ai ha ngaahi filí, ʻoku fakaaʻu mai ʻa e ngaahi fili ko iá ki he ngaahi fakatahaʻangá ʻi ha founga mahino mo fakahangatonu. Ko e founga ʻe taha ʻoku fai ai ení ʻoku fakafou ia ʻi he ngaahi ʻaʻahi ʻa e kau ʻovasia sēketí. ʻOku fononga ʻa e fanga tokoua feilaulauʻi-kita ko ʻení mei he fakatahaʻanga ki he fakatahaʻanga, ʻo tokonaki ʻa e fakahinohino mahino mo e fakalototoʻa fakalotomāfana. Hangē ko Paula mo Panepasá, ʻoku nau fakamoleki ʻa e taimi lahi ʻi he ngāue fakafaifekaú, “ʻo faiako mo talaki ʻa e ongoongo lelei ʻo e folofola ʻa Sihová, fakataha mo ha niʻihi kehe tokolahi.” (Ngā. 15:35) Hangē ko Siutasi mo Sailosí, ʻoku nau fakalototoʻaʻi “ʻa e fanga tokouá ʻaki ha ngaahi malanga” pea fakaivimālohiʻi kinautolu.

18. ʻE lava fēfē ke fakapapauʻi ʻe he kakai ʻa e ʻOtuá te nau hokohoko atu hono maʻu ʻa e tāpuaki ʻa Sihová?

¹⁸ Fēfē nai ʻa e ngaahi fakatahaʻangá? Ko e hā te ne ʻai ʻa e ngaahi fakatahaʻanga ʻi he kotoa ʻo e foʻi māmaní ke nau malava ke hokohoko atu hono maʻu ʻa e melino mo e uouongataha ʻi he māmani fakatupu māvahevahe ʻo e ʻaho ní? Manatuʻi ko e ākonga ko Sēmisí naʻá ne tohi ki mui: “Ko e poto ʻoku mei ʻolungá, ʻuluakí ʻoku maʻa, hoko ai ʻa e fakamelino, fakaʻatuʻi, mateuteu ke talangofua . . . ʻIkai ko ia pē, ko e fua ʻo e māʻoniʻoní ʻoku tūtuuʻi ia ʻi he ngaahi tuʻunga melino maʻá e faʻahinga ʻoku fakamelinó.” (Sēm. 3:17, 18) Tatau ai pē pe naʻe fakakaukau ʻa Sēmisi ki he fakataha naʻe fai ʻi Selusalemá pe ʻikai, ʻoku ʻikai haʻatau ʻilo ʻe taha ki ai. Ka ʻi heʻetau lāulea ki he ngaahi meʻa naʻe hoko ʻa ia kuo lēkooti ʻi he Ngāue vahe 15, ʻoku moʻoni ko e toki taimi pē ʻoku lava ai ke maʻu ʻa e tāpuaki ʻa Sihová ʻa e taimi ʻoku ʻi ai ai ʻa e fāʻūtahá mo e feongoongoí.

19, 20. (a) Naʻe anga-fēfē ʻa e hā mahino naʻe ʻi ai ʻa e melino mo e fāʻūtaha ʻi he fakatahaʻanga ʻi ʻAniteoké? (e) Ko e hā naʻe malava ke fai ʻe Paula mo Panepasa ʻi he taimi ko ʻení?

¹⁹ Ko e ʻi ai ko ia ʻa e melino mo e fāʻūtaha ʻi he fakatahaʻanga ʻi ʻAniteoké ʻi he taimi ko ʻení, naʻe hā mahino ia. ʻI he ʻikai ha fakafetau ki he ongo tokoua mei Selusalemá, naʻe koloaʻaki ʻe he fanga tokoua ʻi ʻAniteoké ʻa e ʻaʻahi ʻa Siutasi mo Sailosí. ʻOku pehē ʻi he fakamatalá: “ʻI he hili ʻena nofo atu ai ʻi ha kiʻi vahaʻa taimi, ne tuku atu kinaua ʻe he fanga tokouá mo e talamonū ke na maʻu ha fononga lelei ki he faʻahinga naʻa nau fekauʻi mai kinauá,” ʻa ia, ko ʻena foki ia ki Selusalemá.d (Ngā. 15:33) ʻE lava ke tau fakapapauʻi ko e fanga tokoua ʻi Selusalemá naʻa nau toe fiefia foki ʻi he taimi naʻa nau fanongo ai ki he fakamatala ʻa e ongo tangatá ʻo fekauʻaki mo ʻena fonongá. ʻOku mālō mo e ʻofa maʻataʻatā ʻa Sihová, naʻe lavaʻi fiefia ai ʻa e ngāue naʻe fekauʻi atu kinaua ke na faí!

²⁰ Ko Paula mo Panepasa, ʻa ia naʻá na nofo pē ʻi ʻAniteoké, naʻe lava he taimi ko ʻení ke na fakahangataha ʻena ngaahi feingá ki he takimuʻa mālohi ʻi he ngāue fakaʻevangelioó, ʻo meimei hangē pē ko ia ʻoku fai ʻe he kau ʻovasia sēketi he ʻaho ní ʻi he taimi ʻoku nau ʻaʻahi ai ki he ngaahi fakatahaʻanga ʻoku nau tokangaʻí. (Ngā. 13:2, 3) He tāpuaki moʻoni ē ki he kakai ʻa Sihová! Ka naʻe anga-fēfē hono toe ngāueʻaki mo tāpuakiʻi lahi ange ʻe Sihova ʻa e ongo ʻevangeliō faivelenga ʻe toko ua ko ʻení? Te tau toki sio ki ai ʻi he vahe hono hokó.