“Naʻá Ne Fakaʻuhinga Ai mo Kinautolu mei he Folofolá”

1, 2. Ko hai ʻoku fononga mei Filipai ki Tesalonaiká, pea ko e hā nai ʻoku ʻi heʻenau fakakaukaú?

KO E hala kuo lahi hono ʻaluʻí, ʻa ia naʻe ngaohi ʻe he kau mataotao ngaohi hala Lomá, ʻoku kolosi tonu atu ia ʻi he ngaahi moʻunga tokakoví. ʻOku tuifio ʻa e ngaahi ongo kehekehe ʻi he hala ko iá ʻi he taimi ki he taimi​—ko e tangi ʻa e fanga ʻasí, ko e patopatō ʻa e ngaahi vaʻe ʻo e salioté ʻi he ngaahi lauʻimaka matolu ʻo e halá, pea mo e longoaʻa mai ʻa e talanoa ʻa e kau fononga kehekehe, ʻa ia ʻoku ngalingali ʻoku kau ki ai ʻa e kau sōtia, kau mēsianiti, pea mo e kau ngāue fakameaʻa. Ko e kau fononga ʻe toko tolu​—ko Paula, Sailosi pea mo Tīmote​—ʻoku nau fononga ʻo laka hake he kilomita ʻe 130 ʻi he hala ko ení, mei Filipai ki Tesalonaika. Ko e fonongá ʻoku halaʻatā haʻane teitei faingofua, tautautefito kia Paula mo Sailosi. ʻOkú na kei tokanga pē ki hona ngaahi kafo naʻe hoko ʻi Filipaí, ʻa ia naʻe haha ai kinaua ʻaki ha ngaahi ʻakau.​—Ngā. 16:22, 23.

² ʻOku anga-fēfē hono ʻai ʻe he kau tangatá ni ke ʻoua ʻe nofo ʻi heʻenau fakakaukaú ʻa e fuʻu fononga lōloa ʻoku hanga mai mei muʻá? ʻOku tokoni moʻoni ʻa e fetalanoaʻakí. ʻOku nau kei manatuʻi lelei pē ʻi heʻenau fakakaukaú ʻa e hokosia fakafiefia naʻa nau maʻu ʻi he taimi naʻe hoko ai ʻa e sela ʻi Filipaí mo hono fāmilí ko e kau tuí. Ko e hokosia ko iá kuó ne ʻai ʻa e kau fononga ko ení ke ʻāʻāsili ai pē ʻenau fakapapauʻi ke hokohoko atu hono fanongonongo ʻa e folofola ʻa e ʻOtuá. Kae kehe, ʻi heʻenau fakaofiofi atu ki he kolo matāfanga ko Tesalonaiká, ʻoku nau fifili nai pe ʻe fēfē ʻa e tōʻongafai mai ʻa e kau Siu ʻi he kolo ko iá kiate kinautolú. ʻE ʻohofi nai kinautolu, naʻa mo hono haha, ʻo hangē ko ia naʻe hoko ʻi Filipaí?

 3. ʻE lava fēfē ke hoko ʻa e faʻifaʻitakiʻanga ʻa Paula ʻi hono tafunaki ʻa e loto-lahi ke malangá ʻo ʻaonga kiate kitautolu ʻi he ʻaho ní?

³ Naʻe toki fakaeʻa ʻe Paula ki mui ʻa ʻene ngaahi ongoʻí ʻi ha tohi naʻá ne fai ki he kau Kalisitiane ʻi Tesalonaiká: “Neongo naʻa mau ʻuluaki faingataʻaʻia mo ngaohikovia ʻi Filipai, hangē tofu pē ko ia ʻoku mou ʻiloʻí, naʻe tafunaki ʻemau loto-lahí ko e meʻa ʻi hotau ʻOtuá ke mau tala atu kiate kimoutolu ʻa e ongoongo lelei ʻo e ʻOtuá ʻi he fehangahangai mo e fakafepaki lahi.” (1 Tes. 2:2) Ko ia ʻoku hā ngali fakahuʻunga mai ʻe Paula naʻe ʻi ai ʻene ongoʻi manavasiʻi fekauʻaki mo e hū ki he kolo ko Tesalonaiká, tautautefito ʻi he hili ko ia ʻa e meʻa naʻe hoko ʻi Filipaí. ʻE lava ke ke mahinoʻi ʻa e ongoʻi ʻa Paulá? Kuo faifai ange peá ke ongoʻi ko ha meʻa faingataʻa ia ke fanongonongo ʻa e ongoongo leleí? Naʻe falala ʻa Paula kia Sihova ke fakaivimālohiʻi ia, ke tokoniʻi ia ke ne tafunaki ʻa e loto-lahi naʻe fiemaʻu kiate iá. Ko hono ako ʻa e faʻifaʻitakiʻanga ʻa Paulá ʻe lava ke tokoniʻi ai koe ke ke fai ʻa e meʻa tatau.​—1 Kol. 4:16.

 4. Ko e hā ʻoku ngalingali ai naʻe nofo ʻa Paula ʻi Tesalonaika ʻo laka hake he uike ʻe tolú?

⁴ ʻOku tala mai ʻe he fakamatalá ko e lolotonga ko ia ʻene ʻi Tesalonaiká, naʻe malanga ʻa Paula ʻi he sinakoké ʻi he Sāpate ʻe tolu. ʻOku ʻuhinga ení ko ʻene ʻaʻahi ki he koló naʻe feʻunga ia mo e uike pē ʻe tolu? Naʻe ʻikai ko e tuʻungá ia. ʻOku ʻikai te tau ʻiloʻi ʻe kitautolu pe ko fē ʻa e taimi naʻe fuofua ʻalu ai ʻa Paula ki he sinakoké ʻi he hili ko ia ʻene tūʻuta atu ki aí. ʻIkai ko ia pē, naʻe fakahaaʻi ʻe he ongo tohi ʻa Paulá ko e lolotonga ko ia ʻene ʻi Tesalonaiká, ko ia mo hono ongo kaungāfonongá naʻa nau ngāue ke tokangaʻi ʻaki kinautolu. (1 Tes. 2:9; 2 Tes. 3:7, 8) ʻIkai ngata aí, lolotonga ʻene nofo aí, naʻe maʻu tuʻo ua ai ʻe Paula ha ngaahi tokonaki mei he fanga tokoua ʻi Filipaí. (Fil. 4:16) Ko ia ko ʻene nofo ʻi Tesalonaiká ʻoku ngalingali naʻe kiʻi lōloa ange ia ʻi he uike ʻe tolú.

 5. ʻI he founga fē naʻe feinga ai ʻa Paula ke ueʻi ʻa e kakaí?

⁵ ʻI hono tafunaki ko ia ʻa e loto-lahi ke malangá, naʻe lea ʻa Paula ki he faʻahinga naʻe fakatahataha ʻi he sinakoké. Fakatatau ki he meʻa naʻá ne angaʻakí, “naʻá ne fakaʻuhinga ai mo kinautolu mei he Folofolá, ʻo fakamatala mo fakamoʻoniʻi ʻaki ʻa e ngaahi maʻuʻanga fakamatala ʻo pehē naʻe pau ke faingataʻaʻia ʻa e Kalaisí pea mo fokotuʻu hake mei he maté, ʻo ne pehē: ‘Ko e Kalaisí ʻeni, ʻa e Sīsū ko ʻeni ʻa ia ʻoku ou talaki atu kiate kimoutolú.’” (Ngā. 17:2, 3) Fakatokangaʻi ange naʻe ʻikai ke feinga ʻa Paula ia ke ne langaʻi ʻa e ngaahi ongoʻi ʻa ʻene kau fanongó; naʻá ne feinga ke ueʻi honau ʻatamaí. Naʻá ne ʻiloʻi ko e faʻahinga naʻa nau ʻi he sinakoké naʻa nau maheni kinautolu mo e Folofolá mo fakaʻapaʻapaʻi ia. Ko e meʻa naʻe ʻikai te nau maʻú ko e mahinó. Ko ia naʻe fakaʻuhinga, fakamatalaʻi mo fakamoʻoniʻi ai ʻe Paula mei he Folofolá ko Sīsū ʻo Nāsaletí ko e Mīsaia ia naʻe talaʻofaʻakí, pe Kalaisí.

 6. Naʻe anga-fēfē ʻa e fakaʻuhinga ʻa Sīsū mei he Folofolá, pea ko e hā ʻa e olá?

⁶ Naʻe muimui ʻa Paula ki he tuʻunga naʻe fokotuʻu ʻe Sīsuú, ʻa ia naʻá ne ngāueʻaki ʻa e Folofolá ko ha makatuʻunga ia ki heʻene faiakó. Ko e fakatātaá, lolotonga ʻene ngāue fakamalanga ki he kakaí, naʻe tala ai ʻe Sīsū ki heʻene kau muimuí, fakatatau ki he Folofolá, ko e Foha ʻo e tangatá kuo pau ke ne faingataʻaʻia, mate, pea ʻe fokotuʻu hake ia mei he maté. (Māt. 16:21) Hili ʻene toetuʻú, naʻe hā ʻa Sīsū ki heʻene kau ākongá. Ko e moʻoni, ʻe fakahaaʻi ʻe he meʻa pē ko iá naʻá ne leaʻaki ʻa e moʻoní. Neongo ia, naʻe ʻoange ʻe Sīsū ha toe meʻa lahi ange kiate kinautolu. ʻI he fekauʻaki mo e meʻa naʻá ne leaʻaki ki ha ongo ākonga, ʻoku tau lau ai: “ʻI heʻene kamata ʻia Mōsese mo e kotoa ʻo e Kau Palōfitá, naʻá ne fakaʻuhinga kiate kinaua ʻi he ngaahi meʻa ʻo kau kiate ia tonu ʻoku ʻi he kotoa ʻo e Folofolá.” Ko e hā ʻa e olá? Naʻe kalanga ʻa e ongo ākongá: “ʻIkai ne vela hota lotó ʻi heʻene lea kiate kitaua ʻi he halá, ʻi heʻene veteveteki kakato mai ʻa e Folofolá kiate kitauá?”​—Luke 24:13, 27, 32.

 7. Ko e hā ʻoku mahuʻinga ai ke fakatuʻunga ʻetau akonakí ʻi he Folofolá?

⁷ Ko e pōpoaki ʻo e Folofola ʻa e ʻOtuá ʻoku ʻi ai hono mālohi. (Hep. 4:12) Ko ia ʻoku fakatuʻunga ai ʻe he kau Kalisitiane he ʻaho ní ʻenau ngaahi akonakí ʻi he Folofola ko iá, ʻo hangē ko ia naʻe fai ʻe Sīsū, Paula pea mo e kau ʻapositolo kehé. ʻOku tau toe fakaʻuhinga foki mo kitautolu mo e kakaí, ʻo fakamatalaʻi ʻa e meʻa ʻoku ʻuhinga ki ai ʻa e ngaahi potu Folofolá, pea ʻoatu ʻa e fakamoʻoni ki he meʻa ʻoku tau faiakoʻakí ʻaki hono fakaava ʻa e Tohi Tapú ke fakahaaʻi ki he tokotaha-ʻapí ʻa e meʻa ʻoku leaʻaki aí. He ko ē, ko e pōpoaki ʻoku tau ʻoatú ʻoku ʻikai ko haʻatau pōpoaki. ʻI hono ngāueʻaki maʻu pē ʻa e Tohi Tapú, ʻoku tau tokoniʻi ai ʻa e kakaí ke nau ʻilo ʻoku tau fanongonongo, ʻo ʻikai ko haʻatau ngaahi fakakaukau, ka ko e ngaahi akonaki ʻa e ʻOtuá. ʻIkai ngata aí, ʻoku lelei ke tau manatuʻi ko e pōpoaki ʻoku tau malangaʻí ʻoku makatuʻunga fefeka ia ʻi he Folofola ʻa e ʻOtuá. ʻOku falalaʻanga fakaʻaufuli ia. ʻIkai ʻoku hanga ʻe hono ʻilo ʻo e meʻa ko iá ʻo ʻoatu kiate koe ʻa e loto-falala ke ke vahevahe loto-lahi atu ʻa e pōpoakí, ʻo hangē ko ia naʻe fai ʻe Paulá?

8-10. (a) Naʻe anga-fēfē ʻa e fakafeangai ʻa e kakai ʻi Tesalonaiká ki he ongoongo leleí? (e) Ko e hā naʻe meheka ai ʻa e niʻihi ʻo e kau Siú kia Paulá? (f) Naʻe anga-fēfē ʻa e tōʻongafai ʻa e kau fakafepaki Siú?

⁸ Naʻe ʻosi hokosia ʻe Paula ia ʻa e moʻoni ʻo e ngaahi lea ʻa Sīsū: “ʻOku ʻikai ha tamaioʻeiki ʻe lahi ʻi hono ʻeikí. Kapau kuo nau fakatangaʻi au, te nau fakatangaʻi mo kimoutolu foki; kapau kuo nau tauhi ʻeku leá, te nau tauhi foki mo hoʻomou leá.” (Sione 15:20) ʻI Tesalonaika, naʻe fetaulaki ai ʻa Paula mo ha fakafeangai kehekehe pehē tofu pē​—naʻe vēkeveke ʻa e niʻihi ke nau fai ki he folofolá, ka naʻe talitekeʻi ia ʻe he niʻihi. ʻI he fekauʻaki mo e faʻahinga naʻa nau tali lelei iá, ʻoku tohi ʻe Luke: “Naʻe hoko ai ʻa e niʻihi ʻo kinautolu [ʻa e kau Siú] ko e kau tui [kau Kalisitiane] pea nau kau fakataha atu kia Paula mo Sailosi, pea pehē ki ha fuʻu kakai tokolahi ʻo e kau Kalisí ʻa ia naʻa nau lotu ki he ʻOtuá, fakataha mo e kakai fefine tuʻu-ki-muʻa tokotokolahi.” (Ngā. 17:4) Ko e moʻoni, naʻe fiefia ʻa e kau ākonga foʻou ko ʻení ʻi hono tokoniʻi kinautolu ke nau mahinoʻi totonu ʻa e Folofolá.

⁹ Neongo naʻe fakahoungaʻi ʻe he niʻihi ʻa e ngaahi lea ʻa Paulá, naʻe ʻūʻūnifo mai kiate ia ʻa e niʻihi ia. Ko e niʻihi ʻo e kau Siu ʻi Tesalonaiká naʻa nau meheka ʻi he lavameʻa ʻa Paula ʻi hono ikunaʻi mai ha “fuʻu kakai tokolahi ʻo e kau Kalisí.” Ko e kau Siu ko iá, ʻi heʻenau taumuʻa ke maʻu mai ha kau ului Siú, naʻa nau akoʻi ai ʻa e kau Senitaile Kalisí ʻi he ngaahi akonaki ʻo e Ngaahi Konga Tohi Tapu Faka-Hepeluú pea naʻa nau vakai ki he kau Kalisi ko iá ko e kakai ia ʻanautolu. Kae fakafokifā pē, ʻoku hangē ia naʻe kaihaʻasi mai ʻe Paula ʻa e kau Kalisi ko ʻení, pea naʻe hoko tonu eni ʻi he sinakoké! Naʻe teketekelili ʻa e kau Siú.

¹⁰ ʻOku tala mai ʻe Luke ʻa e meʻa naʻe hoko ʻi he hili iá: “Ko e kau Siú, ʻi heʻenau meheká, naʻa nau fakatahatahaʻi mai ha kau tangata fulikivanu ʻa ia naʻa nau nofo noaʻia holo ʻi he feituʻu faiʻanga fakataú ʻo nau maʻu ai ha fuʻu kakai pea nau hoko atu leva ʻo fakatupu ha fuʻu moveuveu ʻi he koló. Naʻa nau ʻohofi ʻa e ʻapi ʻo Sēsoní ʻo nau kumi ʻa Paula mo Sailosi ke ʻomi ki tuʻa ki he fuʻu kakaí. ʻI he ʻikai ke nau maʻu kinauá, naʻa nau fusi atu ʻa Sēsoni mo ha fanga tokoua ʻe niʻihi ki he kau pule ʻo e koló, ʻo nau kaila atu: ‘Ko e ongo tangata ko eni ʻa ia kuó na fulihi ʻa e māmani kuo nofoʻí ʻokú na ʻi heni foki, pea kuo talitali kinaua ʻe Sēsoni ko ʻene ongo ʻaʻahi. Ko e kau tangatá ni kotoa ʻoku nau fakafepaki ki he ngaahi tuʻutuʻuni ʻa Sisá, ʻo nau pehē ʻoku toe ʻi ai ha tuʻi ia ʻe taha, ko Sīsū.’” (Ngā. 17:5-7) ʻE anga-fēfē hono uesia ʻe he meʻa naʻe fai ʻe he fuʻu kakai ʻita ko ení ʻa Paula mo hono ongo kaungāfonongá?

11. Ko e hā ʻa e ongo tukuakiʻi naʻe fai kia Paula mo hono ongo kaungāfanongonongo ʻo e Puleʻangá, pea ko e hā ʻa e tuʻutuʻuni naʻe ʻi he fakakaukau nai ʻa e kau talatalaakí? (Sio ki he fakamatala ʻi laló.)

¹¹ Ko ha fuʻu kakai ʻita ko ha meʻa fakalilifu ia. ʻOku nau ʻoho fakavave ʻo hangē ko e taʻemanonga ʻa ha fuʻu vaitafe ʻoku tafe mālohi​—ʻo nau anga-fakamālohi mo taʻemapuleʻi. Ko e meʻatau eni naʻe ngāueʻaki ʻe he kau Siú ʻi heʻenau feinga ke tafiʻi atu meiate kinautolu ʻa Paula mo Sailosí. Pea ʻi he hili hono fakatupu ʻe he kau Siú “ha fuʻu moveuveu” ʻi he koló, naʻa nau feinga ke fakalotoʻi ʻa e kau pulé ʻo pehē ko e ngaahi tukuakiʻí naʻe mafatukituki. Ko e ʻuluaki tukuakiʻí ko ʻenau pehē ko Paula mo hono ongo kaungāfanongonongo ʻo e Puleʻangá naʻa nau “fulihi ʻa e māmani kuo nofoʻí,” neongo ko Paula mo hono ongo kaungāfonongá naʻe ʻikai te nau fakatupu ʻe kinautolu ʻa e moveuveu naʻe hoko ʻi Tesalonaiká! Ko e tukuakiʻi hono uá naʻe mātuʻaki mafatukituki ange ia. Naʻe fakakikihiʻi ʻe he kau Siú ʻo pehē ko e kau misinalé ni naʻa nau fanongonongo ʻe kinautolu ha Tuʻi kehe ia, ko Sīsū, ko ia naʻa nau talangataʻa ai ki he ngaahi tuʻutuʻuni ʻa e ʻemipolá.a

12. Ko e hā ʻokú ne fakahaaʻi ko e ngaahi tukuakiʻi naʻe fai ki he kau Kalisitiane ʻi Tesalonaiká naʻe mei lava ke ne ʻomi ha ngaahi nunuʻa mafatukitukí?

¹² Manatuʻi ko e kau taki lotú naʻa nau ʻomi ha tukuakiʻi meimei tatau ʻo kau kia Sīsū. Naʻa nau pehē kia Pailato: “Naʻa mau ʻilo ʻa e tangatá ni ʻokú ne fakamoveuveuʻi homau puleʻangá . . . peá ne pehē ko ia tonu ʻa e Kalaisí ko ha tuʻi.” (Luke 23:2) ʻI he manavahē nai ʻa Pailato naʻa fakaʻosiʻaki ʻe he ʻemipolá ʻo pehē naʻá ne tukutukuʻi pē ha talisone lahí, naʻá ne tautea mate ʻa Sīsū. ʻI he tuʻunga meimei tatau, ko e ngaahi tukuakiʻi naʻe fai ki he kau Kalisitiane ʻi Tesalonaiká naʻe mei lava ke ne ʻomai ha ngaahi nunuʻa mafatukituki. ʻOku pehē ʻe ha maʻuʻanga fakamatala ʻe taha: “ʻOku faingataʻa ke ala fakamatalaʻi ʻa e fakatuʻutāmaki naʻe fakaeʻa atu ʻe he meʻá ni kinautolu ki aí, he ‘ko e foʻi fokotuʻu atu tofu pē ko ia ʻo ha talisone ki he kau ʻEmipolá naʻe faʻa hoko moʻoni ai ha tautea mate ki he faʻahinga kuo tukuakiʻí.’” ʻE lavameʻa nai ʻa e foʻi ʻoho loto-tāufehiʻa ko ení?

13, 14. (a) Ko e hā naʻe ʻikai lavameʻa ai ʻa e fuʻu kakai ʻitá ʻi he ʻoho naʻa nau faí? (e) Naʻe anga-fēfē hono fakahāhā ʻe Paula ʻa e pōtopotoʻi ʻo hangē ko Kalaisí, pea ʻe lava fēfē ke tau faʻifaʻitaki ki heʻene faʻifaʻitakiʻangá?

¹³ Naʻe ʻikai lava ʻe he fuʻu kakai ʻitá ke nau taʻofi ʻa e ngāue fakamalanga ʻi Tesalonaiká. Ko e hā hono ʻuhingá? Ko e ʻuhinga ʻe taha ki ai, naʻe ʻikai ke nau maʻu ʻa Paula mo Sailosi. ʻIkai ko ia pē, ʻoku hā mahino mai naʻe ʻikai ke tuipau ʻa e kau pule ʻo e koló ki he moʻoni ʻo e ngaahi tukuakiʻí. Hili ʻenau fiemaʻu ha “totongi maluʻi,” mahalo ko e totongi maluʻi ke ʻatā, naʻa nau tukuange ʻa Sēsoni mo e fanga tokoua kehe ʻa ia naʻe ʻomi ki honau ʻaó. (Ngā. 17:8, 9) ʻI he muimui ʻi he enginaki ʻa Sīsū ke “pōtopotoʻi ʻo hangē ko e ngatá kae vale ʻi he koví ʻo hangē ko e lupé,” naʻe fakapotopoto ai ʻa Paula ʻo fakamamaʻo mei he fakatuʻutāmakí koeʻuhí ke lava ke hokohoko atu ʻene malangá ʻi ha feituʻu kehe. (Māt. 10:16) ʻOku hā mahino, ko e loto-lahi naʻe tafunaki ʻe Paulá naʻe ʻikai ke ʻuhingá ia naʻe ʻikai te ne tokanga. ʻE lava fēfē ke muimui ʻa e kau Kalisitiane he ʻaho ní ki heʻene faʻifaʻitakiʻangá?

¹⁴ ʻI onopooni, ko e haʻa faifekau ʻo Puleʻanga-Haʻa-Kalisitiané kuo nau faʻa fakakoviʻi ha fuʻu kakai ke nau fakatangaʻi ʻa e Kau Fakamoʻoni ʻa Sihová. ʻI heʻenau ngaahi kalanga ʻo tukuakiʻi ʻaki ʻa e angatuʻu mo e talisoné, kuo nau fakakoviʻi ai ʻa e kau pulé ke nau fai ha meʻa ki he Kau Fakamoʻoní. ʻI he hangē ko e kau fakatanga ko ia ʻo e ʻuluaki senitulí, ʻoku ueʻi ʻa e kau fakafepaki ʻi onopōní ʻe he meheká. Tatau ai pē pe ko e hā, ʻoku ʻikai ke fakaafeʻi mai ʻe he kau Kalisitiane moʻoní ia ʻa e faingataʻá. ʻOku tau fakaʻehiʻehi mei he tuʻu atu ʻo fehangahangai hangatonu mo e kakai ʻita mo taʻefakaʻatuʻi peheé ʻi ha taimi pē ʻe ala lava aí, ʻo tau feinga kitautolu ke hokohoko atu ʻetau ngāué ʻi he melino, ʻo toki foki mai nai ʻamui ange ʻi he taimi ʻe nonga hifo ai ʻa e ngaahi meʻá.

15. Naʻe anga-fēfē ʻa e fakafeangai ʻa e kau Pēleá ki he ongoongo leleí?

¹⁵ Koeʻuhí ke na malu, naʻe tuku atu ai ʻa Paula mo Sailosi ki Pēlea, ʻa ia ko hono mamaʻó ko e kilomita ʻe 65 nai. ʻI heʻena aʻu ki aí, naʻe ʻalu ʻa Paula ki he sinakoké ʻo ne lea ki he faʻahinga naʻe fakatahataha aí. He fakafiefia ē ke maʻu ha kakai fiefanongo! Naʻe tohi ʻe Luke ʻo pehē ko e kau Siu ʻo Pēleá “naʻa nau anga-fakaʻeiʻeiki ange kinautolu ʻi he faʻahinga ko ia ʻi Tesalonaiká, he naʻa nau tali mātuʻaki loto-vēkeveke ʻa e folofola ʻa e ʻOtuá, ʻo nau vakaiʻi fakalelei fakaʻaho ʻa e Folofolá pe naʻe moʻoni koā ʻa e ngaahi meʻa naʻa nau fanongo aí.” (Ngā. 17:10, 11) Naʻe fakaʻatakoviʻi mai nai ʻe he ngaahi lea ko iá ʻa e faʻahinga ʻi Tesalonaika ʻa ia naʻa nau tali ʻa e moʻoní? Mole ke mamaʻo. Naʻe tohi ki mui ʻa Paula kiate kinautolu: “ʻOku mau fakamālō taʻetuku foki ai ki he ʻOtuá, koeʻuhí ʻi he taimi naʻa mou maʻu ai ʻa e folofola ʻa e ʻOtuá, ʻa ia naʻa mou fanongo ai meiate kimautolú, naʻa mou tali ia ʻo ʻikai ko ha lea ʻa ha tangata, kae hangē tofu pē ko ia ko hono tuʻunga moʻoní, ko e folofola ia ʻa e ʻOtuá, ʻa ia foki ʻoku ngāue ʻiate kimoutolu kau tuí.” (1 Tes. 2:13) Ka ko e hā naʻá ne ʻai ʻa e kau Siu ʻi Pēleá ke nau mātuʻaki anga-fakaʻeiʻeikí?

16. Ko e hā ʻoku feʻungamālie ai hono fakamatalaʻi ʻa e kau Pēleá ʻo pehē naʻa nau “anga-fakaʻeiʻeiki”?

¹⁶ Neongo naʻe fanongo ʻa e kau Pēleá ki ha meʻa foʻou, naʻe ʻikai te nau huʻuhuʻu ki ai pe fakaangaʻi fefeka; pea naʻe ʻikai te nau tōngofua. ʻUluakí, naʻa nau fanongo fakalelei ki he meʻa naʻe leaʻaki ʻe Paulá. ʻI he hili iá, naʻa nau vakaiʻi ʻa e meʻa naʻa nau akó ʻaki ʻenau hanga ki he Folofolá, ʻa ia naʻe fakamatalaʻi ʻe Paula ke nau mahinoʻí. ʻIkai ko ia pē, naʻa nau ako tōtōivi ʻa e Folofola ʻa e ʻOtuá, ʻo ʻikai ʻi he Sāpaté pē, ka ʻi he ʻaho kotoa pē. Pea naʻa nau fai ia ʻaki ʻa e “mātuʻaki loto-vēkeveke,” ʻo nau līʻoa kinautolu ki hono kumi ʻa e meʻa naʻe fakaeʻa ʻe he Folofolá koeʻuhi ko hono maʻu ʻa e ʻilo ki he akonaki foʻou ko ʻení. ʻI he hili iá, naʻa nau hoko moʻoni ʻo anga-fakatōkilalo feʻunga ke nau fai ha ngaahi liliu, he “naʻe hoko ai ʻa e tokolahi ʻo kinautolu ko e kau tui.” (Ngā. 17:12) Tāneʻineʻi ke fakamatalaʻi kinautolu ʻe Luke ʻo pehē naʻa nau “anga-fakaʻeiʻeiki”!

17. Ko e hā ʻoku mātuʻaki taau ai ke fakaongoongoleleiʻi ʻa e faʻifaʻitakiʻanga ʻa e kau Pēleá, pea ʻe lava fēfē ke tau hokohoko atu ke faʻifaʻitaki ki ai ʻo tatau ai pē pe ko e hā hono fuoloa ʻetau ʻi he moʻoní?

¹⁷ Naʻe ʻikai ke teitei ʻiloʻi ʻe he kau Pēlea ia ko iá ko e lēkooti ʻo ʻenau tali ʻa e ongoongo leleí ʻe fakatolonga ia ʻi he Folofola ʻa e ʻOtuá ʻi he tuʻunga ko ha faʻifaʻitakiʻanga laulōtaha ia ʻo e anga-fakaʻeiʻeiki fakalaumālié. Naʻa nau fai ʻa e meʻa tofu pē naʻe ʻamanaki atu ʻa Paula te nau faí pea mo e meʻa naʻe finangalo ʻa Sihova ko e ʻOtuá ke nau faí. ʻI he tuʻunga tatau pē, ko e meʻa ia ʻoku tau fakalototoʻaʻi ʻa e kakaí ke nau faí​—ke nau sivisiviʻi fakalelei ʻa e Tohi Tapú koeʻuhí ke fakatuʻunga fefeka ʻenau tuí ʻi he Folofola ʻa e ʻOtuá. Ka ʻi he hili ʻetau hoko ko e kau tuí, ʻoku ngata nai ʻa e fiemaʻu ke tau anga-fakaʻeiʻeikí? ʻI hono kehé, ʻoku hoko ʻo toe mātuʻaki mahuʻinga ange ke tau vēkeveke ke ako meia Sihova pea vave ke ngāueʻaki ʻa ʻene ngaahi akonakí. ʻI he founga ko iá, ʻoku tau fakaʻatā ai ʻa Sihova ke ne fakafuo kitautolu pea akoʻi kitautolu ʻo fakatatau ki hono finangaló. (ʻAi. 64:8) ʻOku tau hoko leva ai ʻo ʻaonga mo fakahōifua kakato ki heʻetau Tamai fakahēvaní.

18, 19. (a) Ko e hā naʻe mavahe ai ʻa Paula mei Pēleá, ka naʻe anga-fēfē ʻene fakahāhā ʻa e kītaki ʻa ia ʻoku taau ke tau faʻifaʻitaki ki aí? (e) Ko hai ʻe hoko atu ki ai ʻa e malanga ʻa Paulá, pea ʻe fai ia ʻi fē?

¹⁸ Naʻe ʻikai ke nofo ʻa Paula ʻi Pēlea ʻo fuoloa. ʻOku tau lau: “ʻI he ʻiloʻi ʻe he kau Siu mei Tesalonaiká naʻe toe talaki ʻe Paula ʻa e folofola ʻa e ʻOtuá ʻi Pēleá, naʻa nau omi ki ai ke fakaʻaiʻai mo fakatupunga ke ʻita ʻa e fuʻu kakaí. Pea naʻe tuku atu leva ʻe he fanga tokouá ʻa Paula ke ne ʻalu ki tahi, kae nofo pē ai ʻa Sailosi mo Tīmote. Kae kehe, ko e faʻahinga ko ia naʻa nau ō mo Paulá naʻa nau ō mo ia ʻo aʻu ki ʻAtenisi, pea naʻa nau mavahe ʻi he hili ʻenau maʻu ha fakahinohino ke haʻu ʻa Sailosi mo Tīmote kia Paula ʻi he vave taha ʻe ala lavá.” (Ngā. 17:13-15) He kīkīvoi moʻoni ē ko e ngaahi fili ko ia ʻo e ongoongo leleí! Naʻe ʻikai ke feʻunga pē ʻi hono tuli ʻo Paula mei Tesalonaiká; naʻa nau fononga ki Pēlea pea nau feinga ke langaʻi ʻi ai ʻa e faʻahinga palopalema tatau pē​—ka naʻe iku kotoa ia ko e koto kulanoa. Naʻe ʻiloʻi ʻe Paula ko ʻene vāhenga-ngāué naʻe lahi; naʻá ne hiki pē ʻo malanga ʻi ha feituʻu kehe. Fakatauange ke tau hoko mo kitautolu he ʻahó ni ʻo maʻu ʻa e loto-fakapapau tatau ke tau fakaikunoaʻi ʻa e ngaahi feinga ʻa e faʻahinga ʻoku nau loto ke taʻofi ʻa e ngāue fakamalangá!

¹⁹ ʻI he ʻosi ko ia hono fai ha fakamoʻoni fakaʻāuliliki ki he kau Siu ʻi Tesalonaika mo Pēleá, naʻe ako moʻoni ai ʻe Paula ʻa e meʻa lahi ʻo fekauʻaki mo e mahuʻinga ʻo e faifakamoʻoni ʻi he loto-lahí pea mo e fakaʻuhinga mei he Folofolá. ʻOku tau pehē pē mo kitautolu. Ka ʻi he taimi ko ʻení, naʻe ʻamanaki ke fehangahangai ai ʻa Paula mo ha kau fanongo kehe ia​—ko e kau Senitaile ʻo ʻAtenisí. Te ne fēfē ʻi he kolo ko iá? ʻI he vahe hono hokó, te tau sio ai ki ai.