ʻE Lava ke Ke Tui ki he Tohitapú?

KO E tui ki he Tohitapú ʻoku kei failahia pē, naʻa mo e ʻi he māmani ʻo onopooni ko ení. Ko e fakatātaá, ʻi ha savea Gallup ki muí ni mai ʻo fekauʻaki mo e kau ʻAmeliká, naʻe fakahāhaaʻi ai ʻe he peseti ʻe 80 ʻa e tui ko e Tohitapú ko e Folofola fakamānavaʻi ia ʻa e ʻOtuá. Pe ʻoku peseti māʻolunga pehē ho feituʻú pe ʻikai, ʻoku lava ke ke mahinoʻi ko e kau tui peheé ʻoku nau ʻamanekina ke akoʻi kinautolu ʻi he siasí. Ka ʻoku ʻikai faʻa pehē ia. Ko e fakatātaá, ko e tokāteline ko ia fekauʻaki mo e tautea ʻo e soulú hili ʻa e maté.

ʻOku akoʻi ʻa pulekatolio pe ko ha afi ʻo heli ʻi ha feituʻu ʻi he Tohitapú? ʻI he ʻahó ni, ko e kau mataotao tokolahi ʻi he Puleʻanga-Haʻa-Kalisitiané te nau tali ʻikai. ʻOku pehē ʻe he New Catholic Encyclopedia: “ʻI hono sivisiviʻi aofangatukú, ko e tokāteline Katolika ko ia fekauʻaki mo e pulekatolió ʻoku makatuʻunga ia ʻi he talatukufakaholó, ʻo ʻikai ʻi he Konga Tohitapu Toputapú.” ʻI he fekauʻaki mo helí, ʻoku pehē ʻe he A Dictionary of Christian Theology: “ʻI he F[uakava] F[oʻoú] ʻoku ʻikai ke tau maʻu ʻetautolu ia ai ha afi ʻo heli ko ha konga ʻo e muʻaki malangá.”

Ko hono moʻoní, ko e komisoni tokāteline ʻo e Siasi ʻIngilaní naʻa nau toki fokotuʻu ha ngaahi ʻuluʻi ongoongo ʻi he taimi naʻe fokotuʻu ai ke fakaʻikaiʻi fakaʻaufuli ʻa e akonaki fekauʻaki mo e afi ʻo helí. Ko Dr. Tom Wright, ʻa e faifekau pule ʻo e Litchfield Cathedral, ʻokú ne pehē ko e ʻīmisi ʻo heli ʻi he kuohilí “naʻá ne ʻai ai ʻa e ʻOtuá ko ha fuʻu manu fakailifia pea naʻá ne fakahoko ai ha ngaahi patepate fakaeʻatamai ʻi he tokolahi.” Ko e līpooti ʻa e komisoní ʻokú ne fakamatalaʻi ʻa heli ko ha “meʻa mātuʻaki taʻeʻiai.”a Hangē pē ko iá, ʻoku pehē ʻe he New Catholic Encyclopedia ʻo fekauʻaki mo e fakakaukau ʻa e Katoliká: “ʻOku fakaofiofi atu ʻa e teolosiá ʻi he ʻahó ni ki he palopalema ʻo helí mei ha tafaʻaki ʻoku mavahe ia mei he ʻOtuá.”

Ko hono moʻoní, ko e meʻa ʻoku akoʻi ʻe he Tohitapú ʻo fekauʻaki mo helí ʻoku fepaki ia mo e ngaahi akonaki ʻo pulekatolio mo e afi ʻo helí. ʻOku lave maʻu pē ʻa e Tohitapú ia fekauʻaki mo e mate ʻa e ngaahi soulú. “Ko e [“soulu,” NW] ʻoku fai angahala ko ia ia ʻe mate.” (Isikeli 18:4; fakafehoanaki mo e ongo liliu King James mo e Douay Katoliká.) Fakatatau ki he Tohitapú, ko e kau maté ʻoku ʻikai te nau toe ʻilo ha meʻa, ʻo ʻikai toe lava ke ongoʻi ʻa e mamahí. “Ko e kau moʻui ʻoku nau ʻilo ai pe te nau pekia: ka ko e kau pekia ʻoku ʻikai te nau ʻilo ha momoʻi meʻa, pea ʻoku ʻikai te nau kei sio totongi.” (Koheleti 9:5) Ko e ʻamanaki ʻoku maʻu ʻe he Tohitapú maʻá e kau maté ko e toetuʻu ʻi he kahaʻú. ʻI he taimi naʻe mate ai ʻa e kaumeʻa ʻo Sīsū ko Lāsalosí, naʻe fakatatau ai ʻe Sīsū ʻa e maté ki he mohé. Naʻe fakahāhaaʻi ai ʻe he tuofefine ʻo Lāsalosi ko Māʻatá ʻa e ʻamanaki ʻoku akoʻi ʻi he Tohitapú ʻi heʻene pehē: “ʻOku ou ʻilo te ne toetuʻu ʻi he Toetuʻu ʻi he ʻaho fakamui.” ʻI heʻene fokotuʻu mai ʻa Lāsalosi mei he maté, naʻe fakapapauʻi ai ʻe Sīsū ʻa e ʻamanaki ko iá maʻá e faʻahinga ʻo e tangatá.​—Sione 5:​28, 29; 11:​11-14, 24, 44.

ʻOku fakahā ʻe he kau faihisitōliá ko e akonaki fekauʻaki mo hono maʻu ko ia ʻe he tangatá ha soulu ʻoku mavahe pea ʻoku taʻefaʻamaté naʻe ʻikai tupu ia mei he Tohitapú ka mei he filōsofia faka-Kalisí. ʻOku lau ʻe he New Catholic Encyclopedia ko e kau Hepelū ʻi he kuohilí naʻe ʻikai te nau fakakaukau kinautolu ki he tangatá ʻoku faʻu ʻaki ha sino fakamatelie mo ha soulu taʻefakamatelie. ʻOkú ne pehē ʻo fekauʻaki mo e tui ʻa e kau Hepeluú: “ʻI he hū ʻa e mānava ʻo e moʻuí ki he ʻuluaki tangatá ʻa ia naʻe ngaohi ʻe he ʻOtuá mei he kelekelé, naʻá ne hoko ko ha ‘meʻamoʻui ʻoku moʻui’ (S[enesi] 2.7). Ko e maté naʻe ʻikai lau ia ko hano fakamavahevaheʻi ʻo ha ongo ʻelemēniti kehekehe ʻe ua ʻi he tangatá, ʻo hangē ko ia ʻoku ʻi he filōsofia faka-Kalisí; ʻoku mavahe ʻa e mānava ʻo e moʻuí pea ʻoku hoko leva ʻa e tangatá ko ha ‘meʻamoʻui ʻoku mate’ (L[ivitiko] 21.11; N[omipa] 6.6; 19.13). ʻI he tuʻunga taki taha ko e foʻi lea ‘meʻamoʻui’ ko e [neʹphesh] ia ʻi he faka-Hepeluú ʻa ia ʻoku faʻa liliu ko e ‘soulú,’ ka ko hono moʻoní, ʻoku mei faʻa tatau pē ia mo e tokotahá.”

ʻOku pehē ʻe he ʻenisaikolopētia tatau pē ko iá ko e kau mataotao Katolika ki muí ni maí “kuo nau tauhi maʻu ko e F[uakava] F[oʻoú] ʻoku ʻikai te ne akoʻi ʻe ia ʻa e taʻefaʻamate ʻa e soulú ʻi he ʻuhinga faka-Hēlení [faka-Kalisí].” ʻOkú ne fakaʻosiʻaki ʻo pehē: “Ko e fakaleleiʻanga tefito ki he palopalemá ʻe ʻikai loko maʻu ia ʻi he fakamahamahalo fakafilōsofiá ʻo hangē ko ia ʻi he meʻaʻofa makehe atu ʻo e Toetuʻú.”

Ko e Tohitapú pe Talatukufakaholó

Naʻe anga-fēfē leva ʻa e hū mai ʻa e ngaahi fakakaukau taʻefaka-Tohitapú ki he akonaki fakasiasí? ʻOku taku ʻe he ngaahi siasi lahi ko honau mafai māʻolunga tahá ko e Tohitapú. Ko e fakatātaá, naʻe lea, ʻo ʻikai loko fuoloa mei heni ʻa Tuʻitapu Sōane Paulo II, ʻo fekauʻaki mo e fiemaʻu ko ia ʻo e Tohitapú ke “tali ia ʻe he kau tuí ʻoku moʻoni fakaʻaufuli pea hoko ia ko e tuʻutuʻuni taupotu taha ʻo ʻetau tuí.” ʻOku talilahia ia, ka, ko e ngaahi akonaki ia ʻa e Puleʻanga-Haʻa-Kalisitiané ʻi he ʻaho ní ʻoku ʻikai tatau ia mo ia ʻo e kau Kalisitiane ʻo e muʻaki senitulí. Ko e tokolahi taha ʻo e ngaahi siasí ʻoku nau lau ʻenautolu ʻa e ngaahi liliú ko ha konga ia ʻo e fakalakalaka māmālie ʻo e tokāteline fakasiasí. ʻIkai ko ia pē, ʻoku fakakaukau ʻa e Siasi Katoliká ia ko e talatukufakaholo fakasiasí ʻokú ne maʻu ʻe ia ʻa e mafai tatau pē mo ia ʻo e ngaahi Konga Tohitapú. ʻOku pehē ʻe he New Catholic Encyclopedia ko e siasí “ʻoku ʻikai te ne maʻu ʻe ia ha foʻi moʻoni ʻo makatuʻunga ʻataʻatā pe ʻi he Konga Tohitapú taʻekau ai ʻa e talatukufakaholó, pea ʻikai makatuʻunga ʻataʻatā pē ʻi he talatukufakaholó taʻekau ai ʻa e Konga Tohitapú.”

ʻI he tuʻunga fakahisitōliá, kuo fetongi ʻe he ngaahi siasí ia ʻa e ngaahi akonaki Fakatohitapú ʻaki ʻa e ngaahi akonaki makatuʻunga pē ʻi he talatukufakaholó. Ko hono moʻoní, ʻoku tui ʻa e ngaahi siasi lahi ia ʻi he ʻahó ni ʻoku hala ʻa e ngaahi akonaki ʻa e Tohitapú. Ko e fakatātaá, ʻoku pehē ʻe he New Catholic Encyclopedia “ʻoku hā mahino ko e ngaahi fakamatala lahi faka-Tohitapú ʻoku ʻikai pē moʻoni ia ʻi he taimi ʻoku fakamāuʻi ai ʻo fakatatau ki he ʻilo fakaeonopooni ʻo e saienisí mo e hisitōliá.” ʻI he lave fekauʻaki mo e akonaki faka-Tohitapu ko ia ko e kau maté ʻoku ʻikai te nau ʻilo ha meʻá, ʻokú ne tānaki atu: “Naʻa mo e ngaahi meʻa fakalotú, ʻoku fakamoʻoni ʻa e F[uakava] M[otuʻá] ki he taʻekakato ʻa e ʻilo fekauʻaki mo e . . . moʻui hili ʻa e maté.” ʻOku lave ʻa e ʻenisaikolopētiá ki he Sāme 6:5 (veesi 6 ʻi he ngaahi Tohitapu ʻe niʻihi) ko ha fakatātā ia ʻo e meʻá ni: “ʻI he maté ʻoku ʻikai ha lave ia ai kiate koe; ʻi Seoli [pe Hētesi] ko hai te ne fakahīkihikiʻi koé?” Ko e ngaahi seminālio mo e ngaahi kolisi Palotisani ʻe niʻihi kuo ʻikai te nau kei akoʻi ʻenautolu ko e Tohitapú ʻoku ʻikai haʻane hala. ʻI he tafaʻaki ʻe tahá, ʻoku tui ʻa e Siasi Katoliká ia ʻokú ne maʻu ʻe ia ʻa e mafai fakaeakonaki ko ia ʻokú ne fakaʻuhingaʻi ʻa e meʻa ʻoku akoʻi ʻi he Tohitapú. Ka te ke fifili nai, ‘ʻE fēfē leva kapau ko e ngaahi fakaʻuhinga peheé ʻoku ngali kehekehe ia mo e ngaahi Konga Tohitapú?’

Ko e Mahuʻinga ʻo e Ngaahi Konga Tohitapú

Naʻe toutou lave ʻa Sīsū ki he ngaahi Konga Tohitapú ko e mafai fakaʻosí ia, ʻo ne faʻa kamataʻaki ʻene ngaahi poiní ʻaki ʻene pehē: “Kuo tohi.” (Mātiu 4:​4, 7, 10; Luke 19:46) Ko e moʻoni, ʻi he taimi naʻe lea ai ʻa Sīsū fekauʻaki mo e tuʻunga mali ʻo e tangatá, naʻe ʻikai ko ʻene toʻo mai ia mei he fakamahalo ʻa e filōsofia faka-Kalisí ka mei he fakamatala ʻa Sēnesi fekauʻaki mo e fakatupú. (Senesi 1:27; 2:24; Mātiu 19:​3-9) ʻOku hā mahino, naʻe fakakaukau ʻa Sīsū ki he ngaahi Konga Tohitapú ko e fakamānava ia ʻe he ʻOtuá pea ʻoku moʻoni. ʻI heʻene lotu ki he ʻOtuá, naʻá ne pehē: “Ko e folofola aʻau ko e moʻoni ia.”​—Sione 17:17.b

ʻOku fakamatala ʻa e Tohitapú ki hono valokiʻi ʻe Sīsū ʻa e kau taki lotu ʻo hono taimí: “Mālō muʻa hoʻomou taʻetokaʻi ʻa e tuʻutuʻuni ʻa e ʻOtua, ka mou mamafa ki he [“talatukufakaholo,” NW] ʻamoutolu . . . ʻOku mou fakataʻeʻaongaʻi ʻa e folofola ʻa e ʻOtua hoʻomou [“talatukufakaholó,” NW].” (Maake 7:​6-13) ʻI he tuʻunga tatau, naʻe talitekeʻi ʻe he ʻapositolo ko Paulá ʻa e tenge ko ia ke fakakau mai ʻa e filōsofia faka-Kalisí pe ngaahi talatukufakaholo halá ki heʻene akonakí. “Mou vakai,” ko ʻene fakatokangá ia. “Naʻa faifai pea ai ha taha, te ne fai ʻaki ʻene poto fiefilosefa, ʻa ia ko e koto muna mo e kākā, ʻo ne holataki kimoutolu ʻi he ʻalunga ʻo e ngaahi tuʻutuʻuni [“talatukufakaholo,” NW] ʻa e kakai.” (Kolose 2:8; 1 Kolinito 1:​22, 23; 2:​1-13) Naʻe ʻi ai ʻa e ngaahi talatukufakaholo pe akonaki naʻe fakaʻaiʻai ʻe Paula ke tauhi maʻu ʻe he kau Kalisitiané, ka ko e ngaahi meʻa ia naʻe makatuʻunga ʻi he ngaahi Konga Tohitapú pea naʻe mātuʻaki feongoongoi ia mo ia. (2 Tesalonaika 2:​13-15) “Ko e potu Folofola kotoa pe ne fakamanava mei he ʻOtua,” ko hono hiki ia ʻe Paulá, “koeʻuhiā ke tuʻu kakato ʻa e tangata fakaʻotua, kuo ʻosi sāuni ki he ngāue lelei fulipe.”​—2 Timote 3:​16, 17.

Naʻe tomuʻa ʻilo ʻe Paula ia ʻe ʻi ai ʻa e ʻauhia mamaʻo mei he ngaahi Konga Tohitapú. Naʻá ne fakatokanga kia Tīmote: “E hoko ae kuoga e ikai te nau faa kataki ai ae akonaki totonu; . . . Bea te nau fakatafoki honau teliga mei he mooni.” Naʻá ne naʻinaʻi kia Tīmote: “Ka ke leo be akoe i he mea kotoabe.” (2 Timote 4:​3-5, PM) ʻO anga-fēfē? Ko e founga ʻe taha ko e “anga fakaʻeiʻeiki.” ʻOku fakamatalaʻi ʻe ha tikisinale faka-Kalisi ʻa e foʻi lea faka-Tohitapu ko ení “ko ha loto-lelei ke ako mo fakafuofuaʻi lelei ha meʻa.” Naʻe ngāueʻaki ʻe Luke ʻa e kupuʻi lea ko ení ke fakamatalaʻiʻaki ʻa e kau fanongo ʻa Paula ʻi Pēlea ʻi he ʻuluaki senitulí. Ko e ngaahi akonaki ʻa Paulá naʻe foʻou ia kiate kinautolu, pea naʻe ʻikai te nau loto ke tākihalaʻi kinautolu. ʻI hono fakaongoongoleleiʻi kinautolú, naʻe tohi ai ʻe Luke: “Naʻe anga fakaʻeiʻeiki ange ʻa e [kau Pēleá] ʻiate kinautolu ʻi Tesalonaika, he naʻa nau tali loto lelei ʻaupito ʻa e folofola, ʻo nau kumi ʻi he Tohitapu ʻi he ʻaho kotoa pe ʻa e moʻoni ʻo e ngaahi meʻa ko ia.” Ko e anga fakaʻeiʻeikí naʻe ʻikai pehē ai ia naʻe tālaʻa ʻa e kau Pēleá ʻo nau taʻefietui ki ha meʻa. Ka, ko e ola ʻenau fekumi faitotonú naʻe “tokolahi honau kakai naʻe tui.”​—Ngāue 17:​11, 12.

Ngaahi ʻAonga ʻo e Moʻuiʻaki ʻa e Tohitapú

Naʻe ʻiloa ʻa e muʻaki kau Kalisitiané fakatouʻosi ʻi heʻenau piki maʻu ki he Tohitapú pea mo ʻenau ʻofa feilaulauʻi-kitá. Ka ko e ʻahó ni ia, ʻoku tokolahi ʻa e kakai ia kuo nau “maʻu hono geeji oe lotu, ka oku nau liaki a hono malohi.” (2 Timote 3:5, PM) Ko ha faʻahinga lotu faka-Kalisitiane pē ʻi he ʻahó ni ʻoku ʻikai pīkitai ki he muʻaki Kalisitiané ʻe ʻikai lava ke ne maʻu ʻe ia ʻa e mālohi moʻoni ko ia ʻe lelei ai ʻa e moʻui ʻa e kakaí. ʻE lava ke tokoni eni ke fakamatalaʻi ʻa e ʻuhinga ʻoku tau sio ai ki he tupulekina ʻo e fakamālohí, ʻulungaanga taʻetāú, movete ʻa e fāmilí, pea mo e fakamatelié ʻi he konga lahi ʻo e Puleʻanga-Haʻa-Kalisitiané? ʻI he ngaahi fonua “Kalisitiane” ʻe niʻihi, ko e ngaahi tau fekeʻikeʻi fakamatakalí ʻoku fai ia ʻo aʻu pē ki he vahaʻa ʻo e kau mēmipa ʻo e lotu tatau pē.

Kuo mole atu nai ʻa e laumālie anga fakaʻeiʻeiki ia ʻo e kau Pēleá? ʻOku ʻi ai nai ha toe kulupu ʻo ha kakai ʻi he ʻahó ni ʻoku nau tui mo moʻuiʻaki ʻa e Tohitapú?

ʻOku pehē ʻe he Encyclopedia Canadiana: “Ko e ngāue ʻa e Kau Fakamoʻoni ʻa Sihová ko hono fakaake ia mo toe fokotuʻu ʻa e muʻaki lotu faka-Kalisitiané ʻa ia naʻe fai ʻe Sīsū mo ʻene kau ākongá lolotonga ʻa e ongo senituli ʻuluaki mo e ua ʻo hotau kuongá.” ʻI he lave ki he Kau Fakamoʻoní, ʻoku pehē ʻe he New Catholic Encyclopedia: “ʻOku nau sio ki he Tohitapú ko e matavai pē ia ki heʻenau tuí mo e mafai ki he ʻulungāngá.”

ʻOku ʻikai ha veiveiua ko ha ʻuhinga tefito ia ʻoku ʻiloa takai ai ʻa e Kau Fakamoʻoni ʻa Sihová ʻi he māmaní ʻi heʻenau lakalakaimonū fakalaumālié, melinó, mo e fiefiá. Ko ia ai, ʻoku mau fakaʻaiʻai atu ʻemau kau lautohí ke mou ako ke lahi ange ʻa e ngaahi akonaki fakatupu moʻui lelei fakalaumālie ʻa e Tohitapú. Ko e ʻilo lahi angé ʻe lava ke tākiekina atu ia ki ha toe falala lahi ange ki he Tohitapú mo ha tui mālohi ange ki he ʻOtuá. Ko e ngaahi ʻaonga taʻengata ʻo e tui peheé ʻoku tuha moʻoni ia mo e feinga ʻoku faí.

[Fakamatala ʻi lalo]

[Fakatātā ʻi he peesi 6]

Ko e ʻapositolo ko Paulá mo e niʻihi kehe naʻa nau malanga ʻi he māketí

[Fakatātā ʻi he peesi 7]

Ko e Kau Fakamoʻoni ʻa Sihová ʻoku nau “sio ki he Tohitapú ko e matavai pē ia ki heʻenau tuí mo e mafai ki he ʻulungāngá”