‘ʻIkai ʻAfio ʻa e ʻOtuá ʻi ha Ngaahi Temipale Kuo Ngaohi ʻe he Nimá’

ʻOKU ʻikai ha veiveiua naʻe alāanga ʻa Paula mo e ngaahi temipale ʻo ʻĀtená, he ko e ngaahi temipalé ni naʻe lava ke maʻu ia ʻi he ngaahi kolo lahi naʻá ne ʻaʻahi ki ai lolotonga ʻa ʻene ngaahi fononga fakamisinalé. Fakatatau ki he Encyclopædia Britannica, naʻe ʻiloa ʻa ʻĀtena ko ha ʻotua fefine ʻo ʻikai ngata pē ʻi he taú mo e potó kae pehē foki ki he “ngaahi ngāue fakameaʻa mo e ngaahi ngāue pōtoʻi fakalūkufua ʻi he taimi melinó.”

Ko e temipale ʻiloa taha ʻo ʻĀtená ko e Pāfenoní, naʻe fokotuʻu ʻi ʻAtenisi, ʻa e kolo naʻe fakahingoa ki he ʻotua fefiné. ʻI he vakai ki ai ko e taha ia ʻo e temipale lahi taha ʻo e māmani motuʻá, naʻe tuku ʻi he Pāfenoní ha maka tā-tongitongi koula mo e lei mita ʻe 12 ʻo ʻĀtena. ʻI he taimi naʻe ʻaʻahi ai ʻa Paula ki ʻAtenisí, ko e temipale māpele hinehina ko ení ne ʻosi tuʻu ʻiloa ia he koló ʻi he taʻu nai ʻe 500.

ʻI he vakai atu ki he Pāfenoní, naʻe malanga ai ʻa Paula ki ha kulupu ʻo e kau ʻAtenisí fekauʻaki mo e ʻOtuá ʻa ia ʻoku ʻikai te ne nofo ʻi ha ngaahi temipale ngaohi ʻe he nimá. (Ngāue 17:​23, 24) Mahalo pē ko e fisifisimuʻa ʻo e ngaahi temipale ʻo ʻĀtená pe ko e molumalu ʻo hono ngaahi ʻaitolí naʻe ʻai ai ia ke hā ngali fakaueʻiloto lahi ange ai ki he niʻihi ʻo e kau fanongo ʻa Paulá ʻo laka ange ia ʻi ha ʻOtua taʻehāmai naʻe ʻikai te nau ʻiloʻi. Kae kehe, hangē ko ia naʻe fakahaaʻi ange ʻe Paulá, ʻoku ʻikai totonu ke fakaʻuta atu ko e Tokotaha-Fakatupu ʻo e faʻahinga ʻo e tangatá “ʻoku tatau mo ha konga koula, pe siliva, pe maka, ha meʻa kuo tongitongi, ko e ngaue . . . ʻa ha tangata.”—Ngāue 17:29.

Ko e ngaahi ʻotua mo e ngaahi ʻotua fefine hangē ko ʻĀtená—ʻa ia ko honau lāngilangí ʻoku fakatuʻunga he ngaahi temipalé mo e maka fakamanatú—kuo nau hā mai pea puli atu. Ko e maka fakamanatu ʻo ʻĀtená naʻe pulia ia mei he Pāfenoní ʻi he senituli hono nima T.S., pea ko e toetoenga pē ʻo ha niʻihi siʻi ʻo hono ngaahi temipalé ʻoku kei ʻi aí. Ko hai ʻi he ʻahó ni ʻoku hanga kia ʻĀtena ki he potó mo e tatakí?

He kehe moʻoni ia meia Sihova, “ʻa e ʻOtua ʻo itaniti” ʻa ia kuo teʻeki ke mamata ai ha tangata ʻi ha taimí. (Loma 16:26; 1 Sione 4:12) Naʻe tohi ʻe he ngaahi foha ʻo Kolá: “Ko hotau ʻOtua, ʻo lauikuonga pea taʻengata: te ne taki kitautolu.” (Sāme 48:14) Ko e founga ʻe taha ke maʻu ai ʻa e tataki ʻa Sihova ko e ʻOtuá ko hono ako ʻa ʻene Folofolá, ko e Tohi Tapú, pea ngāueʻaki ʻa ʻene akonakí ʻi heʻetau moʻuí.