“Tupu mo Kaukaua” Neongo ʻa e Fakafepakí

1, 2. (a) Ko e hā ʻa e fakatuʻutāmaki ʻoku fehangahangai ʻa Paula mo hono ongo kaungāfonongá mo ia ʻi ʻEfesoó? (e) Ko e hā te tau lāulea ki ai ʻi he vahe ko ʻení?

ʻOKU ongona ʻi he ngaahi hala ʻo ʻEfesoó ʻa e ngaahi kalanga, ngaahi kaikaila, pea mo e ʻuʻulu mai ʻa e lele ʻa ha fuʻu kakai tokolahi. Kuo fakatahataha mai ha fuʻu kakai ʻita, pea ʻoku kamata ke hoko ha fuʻu moveuveu lahi! Ko e toko ua ʻo e kaungāfononga ʻo e ʻapositolo ko Paulá ʻoku puke pea fau atu kinaua. Ko e hala fālahi mo fakaʻotuʻotu pou ʻa ia ʻoku tuʻu ai ʻa e ngaahi fale koloá kuo vave ʻa e ʻosi mei ai ʻa e kakaí ʻi he fakaʻau ke tokolahi ange ʻa e fuʻu kakai tōlilí pea nau matua atu ki he fuʻu malaʻe faiʻanga faiva ʻo e koló, ʻa ia naʻe lava ke nofo ai ha kau mamata ʻe toko 25,000. Ko e tokolahi taha ʻo e kakaí ʻoku ʻikai te nau teitei ʻiloʻi ʻa e meʻa kuó ne fakatupunga ʻa e fuʻu vālaú, ka ʻoku ʻi ai ʻenau mahalo ʻo pehē kuo fai ha fakamanamana ki honau temipalé pea mo honau ʻotua fefine ʻofeina ko ʻĀtemisí. Ko ia ʻoku kamata ke nau toutou kaikaila hokohoko: “ʻOku lahi ʻa ʻĀtemisi ʻo e kau ʻEfesoó!”​—Ngā. 19:34.

² ʻOku tau toe sio ai heni ki he feinga ʻa Sētane ke ne ngāueʻaki ʻa e anga-fakamālohi ʻa ha fuʻu kakai ke taʻofi ʻa e mafola ʻa e ongoongo lelei ʻo e Puleʻanga ʻo e ʻOtuá. Ko e moʻoni, ko e fakamanamana ʻo e anga-fakamālohí ʻoku ʻikai ko e founga pē ia ʻa Sētané. ʻI he vahe ko ení, te tau lāulea ai ki ha ngaahi faʻufaʻu ʻe niʻihi ʻa Sētane ke fakafaingataʻaʻiaʻi ʻa e ngāue mo e fāʻūtaha ʻa e kau Kalisitiane ko ia ʻi he ʻuluaki senitulí. Ko e meʻa ʻoku mahuʻinga angé, te tau sio ai ko e kotoa ʻo ʻene ngaahi foungá naʻe taʻelavameʻa, he “naʻe tupu mo kaukaua ai pē ʻa e folofola ʻa Sihová ʻi ha tuʻunga mālohi.” (Ngā. 19:20) Ko e hā naʻe hoko moʻoni ai ʻa e kau Kalisitiane ko iá ʻo ikuná? ʻI he ngaahi ʻuhinga tatau pē ko ia ʻoku tau ikuna ai ʻi he ʻaho ní. Ko e moʻoni, ko e ikuná ʻoku ʻa Sihova ia, ʻo ʻikai ko haʻatautolú. Kae kehe, ʻi he hangē ko e kau Kalisitiane ʻi he ʻuluaki senitulí, kuo pau ke tau fai ʻetau tafaʻakí. ʻI he tokoni ʻa e laumālie ʻo Sihová, ʻe lava ke tau maʻu ai ʻa e ngaahi ʻulungaanga te ne tokoniʻi kitautolu ke fakapapauʻi ʻa e lavameʻa ʻa ʻetau ngāue fakafaifekaú. Tau ʻuluaki vakaiʻi angé ʻa e faʻifaʻitakiʻanga ʻa ʻApolosí.

3, 4. Ko e hā ʻa e meʻa naʻe lāuʻilo ki ai ʻa ʻAkuila mo Pīsila naʻe ʻikai ke ʻiloʻi ʻe ʻApolosí, pea ko e hā ʻa e meʻa naʻá na fai ʻo fekauʻaki mo iá?

³ Lolotonga ʻa e fononga ʻa Paula ki ʻEfesō ʻi he lolotonga ʻo ʻene fononga fakamisinale hono tolú, naʻe aʻu mai ki he koló ha Siu ko hono hingoá ko ʻApolosi. Ko ʻene haʻú mei he kolo ʻiloa ko ʻAlekisanitulia ʻi ʻIsipité. Naʻe maʻu ʻe ʻApolosi ha ngaahi ʻulungaanga fisifisimuʻa. Naʻá ne pōtoʻi lea ʻaupito. Tānaki atu ki heʻene pōtoʻi leá, “naʻá ne ʻilo lahi ki he Folofolá.” ʻIkai ko ia pē, naʻe “mafana hono lotó ʻi he laumālié.” ʻI heʻene fonu ʻi he faivelengá, naʻe lea loto-toʻa ʻa ʻApolosi ʻi he ʻao ʻo ha kau fanongo Siu ʻi he sinakoké.​—Ngā. 18:24, 25.

⁴ Naʻe fanongo ʻa ʻAkuila mo Pīsila ki he lea ʻa ʻApolosí. ʻOku ʻikai ha veiveiua naʻá na fiefia he fanongo kiate ia ʻokú ne “faiako totonu ʻaki ʻa e ngaahi meʻa fekauʻaki mo Sīsuú.” Ko e meʻa naʻá ne leaʻaki ʻo fekauʻaki mo Sīsuú naʻe totonu. Kae kehe, naʻe ʻikai ke fuoloa kuo ʻiloʻi ʻe he ongo meʻa Kalisitiane ko iá naʻe ʻi ai ʻa e meʻa mahuʻinga naʻe ʻikai ke ʻiloʻi ʻe ʻApolosi. “Ko e papitaiso pē naʻe fai ʻe Sioné naʻá ne maheni mo iá.” Ko e ongo meʻa māʻulalo ko ení, ʻa ia ko ha ongo ngaohi-tēniti, naʻe ʻikai te na ongoʻi papaka ʻi he pōtoʻi lea pe ko e tuʻunga fakaako ʻo ʻApolosí. ʻI hono kehé, “naʻá na ʻave ia ʻo nau ō peá na fakamatalaʻi ʻo toe totonu ange ʻa e ʻalunga ʻo e ʻOtuá kiate ia.” (Ngā. 18:25, 26) Pea naʻe anga-fēfē ʻa e fakafeangai ki ai ʻa e tangata pōtoʻi lea mo poto ko ʻení? ʻOku hā mahino, naʻá ne fakahāhā ʻa e taha ʻo e ngaahi ʻulungaanga mahuʻinga taha ʻe lava ke fakatupulekina ʻe ha Kalisitiane​—ko e anga-fakatōkilaló.

5, 6. Ko e hā naʻá ne fakamafeia ʻa ʻApolosi ke ne hoko ʻo ʻaonga lahi ange kia Sihová, pea ko e hā ʻoku lava ke tau ako mei he faʻifaʻitakiʻanga ʻa ʻApolosí?

⁵ Koeʻuhí naʻe tali ʻe ʻApolosi ʻa e tokoni ʻa ʻAkuila mo Pīsilá, naʻá ne hoko ai ko ha sevāniti ola lelei ange ʻa Sihova. Naʻá ne fononga ki ʻĀkeia, ʻa ia naʻá ne “tokoniʻi lahi” ai ʻa e kau tuí. Naʻe toe hoko moʻoni foki ʻo ola lelei ʻa ʻene malanga ki he kau Siu ʻi he vahefonua ko iá ʻa ia naʻa nau tuʻukāivi ʻo pehē naʻe ʻikai ko Sīsū ʻa e Mīsaia naʻe tomuʻa talá. ʻOku fakamatala ʻa Luke: “ʻI he ʻao ʻo e kakaí pea ʻaki ʻa e mālohi lahi naʻá ne fakamoʻoniʻi fakaʻāuliliki naʻe hala ʻa e kau Siú, ʻo fakahaaʻi kiate kinautolu mei he Folofolá ko Sīsū ʻa e Kalaisí.” (Ngā. 18:27, 28) Ko ha tāpuaki lahi ē ka ko ʻApolosi! Ko hono moʻoní, naʻá ne hoko ko e toe ʻuhinga ia ʻe taha ki he hokohoko atu “ʻa e folofola ʻa Sihová” ʻo kaukauá. Ko e hā ʻe lava ke tau ako mei he faʻifaʻitakiʻanga ʻa ʻApolosí?

⁶ Ko hono fakatupulekina ʻa e anga-fakatōkilaló ʻoku fiemaʻu fakaʻaufuli ia ki he kau Kalisitiané. ʻOku tāpuakiʻiʻaki kitautolu taki taha ʻa e ngaahi tufakanga kehekehe​—ʻo tatau ai pē pe ko e ngaahi meʻá ni ʻoku fekauʻaki ia mo haʻatau ngaahi malava fakanatula, taukei, pe ko ha ʻilo kuo tau maʻu. Kae kehe, ko ʻetau anga-fakatōkilaló kuo pau ke mahulu atu ia ʻi he ngaahi tufakanga ʻoku tau maʻú. He ka ʻikai, ʻe hoko nai hotau ngaahi tufakangá ʻo fakatupu palopalema. Te tau hoko nai ai ko e kelekele lelei ʻoku tupu ai ʻa e vao kona ko ia ko e hīkisiá. (1 Kol. 4:7; Sēm. 4:6) Kapau ʻoku tau anga-fakatōkilalo moʻoni, te tau feinga mālohi ke sio ki he niʻihi kehé ʻoku nau māʻolunga ange ʻiate kitautolu. (Fil. 2:3) Heʻikai ai ke tau ʻita ʻi hano fakatonutonuʻi kitautolu pe talitekeʻi hano akoʻi kitautolu ʻe he niʻihi kehé. Heʻikai ʻaupito ai ke tau pīkitai loto-pōlepole ki heʻetau ngaahi fakakaukau pē ʻatautolú ʻi he taimi ʻoku tau ʻilo ai ʻoku ʻikai ke fehoanaki ia mo e ngaahi tataki lolotonga ʻa e laumālie māʻoniʻoní. ʻI heʻetau nofo anga-fakatōkilalo ai peé, ʻoku tau ʻaonga ai kia Sihova mo hono ʻAló.​—Luke 1:51, 52.

 7. Naʻe anga-fēfē hono fokotuʻu ʻe Paula mo ʻApolosi ha faʻifaʻitakiʻanga lelei ʻo e anga-fakatōkilaló?

⁷ ʻOku toe hanga foki ʻe he anga-fakatōkilaló ʻo taʻofi ʻa e fakavahavahaʻá. ʻE lava ke ke sioloto atu ki he vēkeveke ʻa Sētane ke fakatupu ha ngaahi māvahevahe he lotolotonga ʻo e muʻaki kau Kalisitiane ko iá? He mei fiefia lahi ē ko ia kapau naʻe hanga ʻe he ongo tama longomoʻui ko iá, ʻa ʻApolosi mo e ʻapositolo ko Paulá ʻo fakaʻatā kinaua ke na hoko ʻo fakavahavahaʻa, ʻo na feʻauʻauhi loto-meheka nai ki he hoko ʻo faitākiekina ʻi he lotolotonga ʻo e ngaahi fakatahaʻangá! Naʻe mei faingofua pē ia kiate kinaua ke na fai pehē. ʻI Kolinitō, naʻe kamata ke pehē ai ʻe he kau Kalisitiane ʻe niʻihi, “ʻOku ʻo Paula au,” lolotonga ia ne pehē ʻe he niʻihi ia, “ʻOku ʻo ʻApolosi au.” Naʻe fakalototoʻaʻi nai ʻe Paula mo ʻApolosi ha ngaahi fakakaukau fakamavahevahe pehē? ʻIkai! Pea ko Paulá naʻá ne fakahaaʻi anga-fakatōkilalo ʻa e tokoni ʻa ʻApolosi ki he ngāué, ʻo ne ʻoange kiate ia ha ngaahi monū ʻo e ngāué. ʻI he tafaʻaki leva ʻa ʻApolosí, naʻá ne muimui ʻi he tataki ʻa Paulá. (1 Kol. 1:10-12; 3:6, 9; Tai. 3:12, 13) Ko ha faʻifaʻitakiʻanga lelei ē ʻo e ngāue fakataha anga-fakatōkilaló kiate kitautolu ʻi he ʻaho ní!

 8. ʻI he hala fē naʻe foki ai ʻa Paula ki ʻEfesoó, pea ko e hā hono ʻuhingá?

⁸ Naʻe palōmesi ʻa Paula te ne toe foki mai ki ʻEfesō, pea naʻá ne fai ki heʻene leá.a (Ngā. 18:20, 21) Kae, fakatokangaʻi ʻa e anga ʻo ʻene toe fokí. Naʻa tau sio fakamuimui kiate iá ʻi ʻAniteoke, ʻi Sīlia. Ke aʻu ki ʻEfesoó, naʻe mei lava ke ne fai ha fononga nounou ki Selūsia, ʻo ne heka ai ʻi ha vaka, pea folau hangatonu ai ki he feituʻu naʻá ne taumuʻa ki aí. ʻI hono kehé, naʻe fononga ia ʻo “fou atu . . . ʻi he ngaahi vāhenga ʻi lotofonuá.” ʻI ha foʻi fakafuofua ʻe taha, ko e fononga ʻa Paulá ʻo hangē ko ia ʻoku hā ʻi he Ngāue 18:23 mo e 19:1 ko hono fakakātoá ʻoku fakafuofua nai ki he kilomita ʻe 1,600! Ko e hā naʻe fili ai ʻe Paula ha hala fakaongosia peheé? Koeʻuhí he ko ʻene taumuʻá ia ke “fakaivimālohiʻi ʻa e kau ākongá kotoa.” (Ngā. 18:23) Ko ʻene fononga fakamisinale hono tolú, hangē pē ko e ongo fononga ʻe ua ki muʻá, ʻe fiemaʻu ki ai ʻa e meʻa lahi meiate ia, ka naʻá ne lau kotoa ia naʻe ʻaonga. Ko e kau ʻovasia sēketí pea mo honau ngaahi uaifí ʻoku nau fakahāhā he ʻahó ni ha laumālie tatau. ʻIkai ʻoku tau houngaʻia ʻi heʻenau ʻofa feilaulauʻi-kitá?

 9. Ko e hā naʻe fiemaʻu ai ke toe papitaiso ha kulupu ʻo ha kau ākongá, pea ko e hā ʻa e lēsoni ʻe lava ke tau ako mei honau ʻalungá?

⁹ ʻI he aʻu ʻa Paula ki ʻEfesoó, naʻá ne ʻilo ai ha kulupu ʻo e kau ākonga nai ʻe toko 12 ʻa Sione ko e Faipapitaisó. Naʻa nau papitaiso kinautolu ʻi he malumalu ʻo ha fokotuʻutuʻu naʻe ʻikai ke kei ngāueʻaki. ʻIkai ko ia pē, naʻe hā ngali naʻe siʻi pe ʻikai haʻanau ʻilo ʻe taha ʻo fekauʻaki mo e laumālie māʻoniʻoní. Naʻe ʻomi kinautolu ʻe Paula ki he ʻilo fakamuimui tahá, pea ʻi he hangē ko ʻApolosí, naʻe fakamoʻoniʻi naʻa nau anga-fakatōkilalo mo vēkeveke ke ako. ʻI he hili ʻa e papitaiso ʻi he huafa ʻo Sīsuú, naʻa nau maʻu ʻa e laumālie māʻoniʻoní pea mo ha ngaahi meʻaʻofa fakaemana ʻe niʻihi. ʻOku hā mahino leva, ko e ʻalu fakataha mo e kautaha fakateokalati laka ki muʻa ʻa Sihová ʻokú ne ʻomai ʻa e ngaahi tāpuaki.​—Ngā. 19:1-7.

10. Ko e hā naʻe hiki ai ʻa Paula mei he sinakoké ki ha holó, ʻo fokotuʻu ai ʻa e faʻifaʻitakiʻanga ko e hā kiate kitautolu ʻi heʻetau ngāue fakafaifekaú?

¹⁰ Naʻe vave ʻene hoko mai heni ha toe fakatātā ʻe taha ʻo e fakalakalaká. Naʻe malanga loto-toʻa ʻa Paula ʻi he sinakoké ʻi he māhina ʻe tolu. Neongo naʻá ne fai ʻa e “fakaʻuhinga fakatupu tuipau ʻo fekauʻaki mo e Puleʻanga ʻo e ʻOtuá,” naʻe loto-fefeka ʻa e niʻihi pea nau hoko ko e kau fakafepaki moʻoni. ʻI he ʻikai fakamoleki noa hono taimí ʻi he faʻahinga naʻe “laukovi fekauʻaki mo e ʻAlunga ʻo e ʻEikí,” naʻe fai ʻe Paula ʻa e ngaahi fokotuʻutuʻu ke malanga ʻi ha holo ʻo ha ʻapiako. (Ngā. 19:8, 9) Ko e faʻahinga ko ia naʻa nau loto ke fai ha fakalakalaka fakalaumālié naʻe fiemaʻu ke nau hiki mei he sinakoké ki he holó. ʻI he hangē ko Paulá, te tau mavahe nai mei ha ngaahi fetalanoaʻaki ʻi heʻetau fakatokangaʻi ʻoku ʻikai fie fanongo ʻa e tokotaha ʻapí pe ʻoku loto pē ia ke fakakikihi. ʻOku kei toe lahi ʻa e kakai hangē ha sipí ʻoku fiemaʻu ke nau fanongo ki heʻetau pōpoaki fakalototoʻá!

11, 12. (a) Naʻe anga-fēfē hono fokotuʻu ʻe Paula ha faʻifaʻitakiʻanga ʻi he hoko ʻo ngāue mālohi mo feʻunuʻakingofuá? (e) Kuo anga-fēfē ʻa e feinga ʻa e Kau Fakamoʻoni ʻa Sihová ke hoko ʻo ngāue mālohi mo feʻunuʻakingofua ʻi heʻenau ngāue fakafaifekau ki he kakaí?

¹¹ Naʻe malanga fakaʻaho nai ʻa Paula ʻi he holo ʻapiako ko iá mei he 11:00 pongipongi nai ki he 4:00 efiafi nai. (Ngā. 19:9) Ngalingali ko e ngaahi houa lōngonoa taha kae vela taha ia ʻo e ʻahó ʻa ia ʻoku tuku ai ʻe he tokolahi ʻenau ngāué ka nau maʻu ha meʻatokoni mo mālōlō. Fakaʻuta atu kapau naʻe muimui ʻa Paula ki he taimi-tēpile fefeka ko iá ʻi he taʻu kakato ʻe ua, te ne fakamoleki nai ai ʻa e houa laka hake he 3,000 ʻi he faiakó.b Ko ia ko ha toe ʻuhinga foki eni ʻe taha naʻe hoko ai ʻa e folofola ʻa Sihová ʻo tupu mo kaukaua ai peé. Ko Paulá naʻe ngāue mālohi mo feʻunuʻakingofua. Naʻá ne feʻunuʻaki ʻene taimi-tēpilé koeʻuhí ke feau ʻe heʻene ngāue fakafaifekaú ʻa e ngaahi fiemaʻu ʻa e kakai ʻi he feituʻu ko iá. Ko e hā ʻa e olá? “Naʻe fanongo ai ʻa e faʻahinga kotoa pē naʻe nofo ʻi he vahefonua ʻo ʻĒsiá ki he folofola ʻa e ʻEikí, fakatouʻosi ʻa e kau Siu mo e kau Kalisi.” (Ngā. 19:10) Ko ha faifakamoʻoni fakaʻāuliliki ē naʻá ne fakahokó!

¹² ʻOku pehē pē mo e Kau Fakamoʻoni ʻa Sihova ʻi onopōní kuo fakamoʻoniʻi ʻoku nau ngāue mālohi mo feʻunuʻakingofua. ʻOku tau feinga ke aʻu ki he kakaí ʻi ha feituʻu pē pea ʻi ha taimi pē ʻe lava ke maʻu ai kinautolú. ʻOku tau faifakamoʻoni ʻi he ngaahi halá, ʻi he ngaahi feituʻu faiʻanga fakataú, pea ʻi he ngaahi tauʻanga meʻalelé. ʻOku tau fetuʻutaki nai ki he kakaí ʻi he telefoní pe ko e faitohi. Pea ʻi he ngāue fale-ki-he-falé, ʻoku tau fai ai ʻa e ngaahi feinga ke aʻu ki he kakaí ʻi he ngaahi taimi ʻoku mātuʻaki ngalingali te tau maʻu ai kinautolu ʻi honau ngaahi ʻapí.

13, 14. (a) Naʻe fakamafeia ʻe Sihova ʻa Paula ke ne fai ʻa e hā? (e) Ko e hā ʻa e fehālaaki naʻe fai ʻe he ngaahi foha ʻo Sivá, pea ʻoku anga-fēfē hono fai ʻe he tokolahi he ʻahó ni ʻi Puleʻanga-Haʻa-Kalisitiane ʻa e hala meimei tatau?

¹³ ʻOku fakahaaʻi mai ʻe Luke kiate kitautolu naʻe hoko atu ha vahaʻa taimi fakaofo, ʻi hono fakamafeia ʻe Sihova ʻa Paula ke ne fakahoko “ha ngaahi ngāue fakaofo makehe atu.” Naʻa mo e ngaahi konga tupenu mo e ngaahi ʻēpani naʻe tui ʻe Paulá naʻe ʻave ia ki he kakai naʻe puké, ʻa ia naʻe fakamoʻui ai kinautolu. Ko e ngaahi laumālie fulikivanú naʻe kapusi kinautolu ki tuʻa fakafou ʻi he ongo foungá ni foki.c (Ngā. 19:11, 12) Ko e ngaahi ikunaʻi tuʻu-ki-muʻa pehē ʻo e ngaahi mālohi ʻo Sētané naʻe tohoakiʻi mai ai ʻa e tokanga lahi, ka naʻe ʻikai ke lelei hono kotoa.

¹⁴ Ko e niʻihi ʻo e “kau Siu naʻe ʻalu holo ʻo nau fai ʻa e kapusi tēmenioó” naʻa nau feinga ke faʻifaʻitakiʻi ʻa e ngaahi mana ʻa Paulá. Ko e niʻihi ʻo e kau Siu ko iá naʻa nau feinga ke kapusi tēmeniō ʻaki hono ngāueʻaki ʻa e hingoa ʻo Sīsū mo Paulá. ʻOku ʻomai ʻe Luke ʻa e fakatātā ʻo fekauʻaki mo e ngaahi foha ʻe toko fitu ʻo Sivá​—ko e ngaahi mēmipa ia ʻo ha fāmili taulaʻeiki​—ʻa ia naʻa nau feinga ke fai ʻa e meʻá ni. Naʻe pehē ange ʻe he tēmenioó kiate kinautolu: “ʻOku ou ʻiloʻi ʻa Sīsū pea ʻoku ou lāuʻilo kia Paula; ka ko hai kimoutolu ia?” Naʻe ʻohofi leva ʻe he tangata naʻe uluisino ai ʻa e tēmenioó ʻa e kau fakangalingali ko iá, ʻo ne ʻoho atu kiate kinautolu ʻo hangē ha manu fekaí, ʻo ne ʻai kinautolu ke nau tukulele, kuo nau lavelavea mo telefua. (Ngā. 19:13-16) Ko ha ikuna lahi moʻoni eni ki he “folofola ʻa Sihová,” ʻi he hoko ʻo hā maeʻeeʻa moʻoni ʻa e faikehekehe ʻi he vahaʻa ʻo e mālohi naʻe ʻoange kia Paulá pea mo e taʻeʻiai ha mālohi ʻa e kau lotu loi ko iá. ʻOku ʻi ai ʻa e laui miliona he ʻahó ni ʻoku nau taukaveʻi hala ʻo pehē ko e ui pē ki he huafa ʻo Sīsuú pe ko hono ui pē kita ko ha “Kalisitiané” ʻoku ʻosi feʻunga ia. Kae kehe, hangē ko ia naʻe fakahaaʻi ʻe Sīsuú, ko e faʻahinga pē ʻoku nau fai moʻoni ʻa e finangalo ʻo ʻene Tamaí ʻoku nau maʻu ha ʻamanaki moʻoni ki he kahaʻú.​—Māt. 7:21-23.

15. ʻI he fekauʻaki mo e ngāue fakafaʻahikehé mo e ngaahi meʻa ʻoku fekauʻaki mo e ngaahi tōʻonga fakafaʻahikehé, ʻe lava fēfē ke tau muimui ʻi he faʻifaʻitakiʻanga ʻa e kau ʻEfesoó?

¹⁵ Ko e tuʻunga fakamā ʻo e ngaahi foha ʻo Sivá naʻe taki atu ia ki ha mafolalahia ʻa e manavahē-ʻOtuá, ʻa ia naʻá ne tākiekina ai ʻa e tokolahi ke hoko ko e kau tui pea nau siʻaki atu ʻa e ngaahi ngāue fakafaʻahikehé. Ko e anga fakafonua ʻo ʻEfesoó naʻe lotolotoi ai ʻa e ngaahi ngāue fakafaimaná. Ko e faimaná mo e ngaahi meʻa ʻomi monuú naʻe angamaheniʻaki, ʻo tatau pē mo e ngaahi laulau fakafaimaná, ʻa ia naʻe faʻa lau ia mei ha meʻa naʻe hiki. Naʻe ueʻi leva heni ʻa e kau ʻEfesō tokolahi ke nau ʻomai ʻenau ʻū tohi fakafaimaná ʻo tutu kinautolu ʻi he ʻao ʻo e kakaí​—neongo naʻe hā mahino ko honau mahuʻingá ko e paʻanga ʻe laulaui mano ʻi he ngaahi mahuʻinga ʻo e ʻaho ní.d ʻOku līpooti ʻe Luke: “Ko ia naʻe tupu mo kaukaua ai pē ʻa e folofola ʻa Sihová ʻi ha tuʻunga mālohi.” (Ngā. 19:17-20) Ko ha ikunaʻi kāfakafa ē ʻe he moʻoní ʻa e loí mo e fakatēmenioó! Ko e kakai faitōnunga ko iá naʻa nau fokotuʻu mai ha faʻifaʻitakiʻanga lelei kiate kitautolu he ʻaho ní. ʻOku pehē pē mo kitautolu ʻoku tau moʻui ʻi ha māmani ʻoku lotolotoi ai ʻa e ngaahi ngāue fakafaʻahikehé. Kapau te tau ʻilo ʻoku tau maʻu ha meʻa ʻoku fekauʻaki mo e ngāue fakafaʻahikehé, te tau fai ʻa e meʻa naʻe fai ʻe he kau ʻEfesoó​—ʻo tau fakaʻauha leva ia! Tuku ke tau hanganaki fakamamaʻo ʻaupito mei he ngaahi tōʻonga fakalielia peheé, ʻo tatau ai pē pe ko e hā hono mahuʻingá.

16, 17. (a) Fakamatalaʻi ʻa e anga hono kamataʻi ʻe Temetelio ʻa e maveuveu ʻi ʻEfesoó. (e) Naʻe anga-fēfē hono fakahāhā ʻe he kau ʻEfesoó ʻenau fuʻu māfana tōtuʻá?

¹⁶ ʻOku tau aʻu mai eni ki he founga ʻa Sētane ʻoku fakamatalaʻi ʻe Luke ʻi heʻene tohi ʻo pehē “naʻe malanga hake ha fuʻu felāuaki ʻo fekauʻaki mo e ʻAlunga ʻo e ʻEikí.” Naʻe ʻikai ko haʻane fakalahiʻi eni ʻa e ngaahi meʻá.e (Ngā. 19:23) Ko ha tufunga siliva ko hono hingoá ko Temetelio naʻá ne kamataʻi ʻa e palopalemá. Naʻá ne maʻu ʻa e tokanga ʻa hono ngaahi kaungātufunga silivá ʻaki ʻene tomuʻa fakamanatu ange kiate kinautolu ko ʻenau lakalakaimonuú naʻe maʻu ia mei hono fakatau atu ʻa e ngaahi ʻaitolí. Naʻá ne hoko atu ʻo pehē ko e pōpoaki naʻe malangaʻi ʻe Paulá naʻe kau kovi ia ki heʻenau pisinisí, koeʻuhí naʻe ʻikai lotu ʻa e kau Kalisitiané ki he ngaahi ʻaitolí. Naʻá ne ʻai leva ke maongo ki he pōlepole ʻaki ʻe heʻene kau fanongó ʻa honau koló mo ʻenau mamahiʻi-fonuá, ʻi heʻene fakatokanga kiate kinautolu ko honau ʻotua fefine ē ko ʻĀtemisí pea mo honau temipale ʻiloa he māmaní moʻo ʻĀtemisí naʻe hoko ʻo ʻi he tuʻunga fakatuʻutāmaki ʻo “vakai ki ai ko e meʻa noa pē.”​—Ngā. 19:24-27.

¹⁷ Ko e fakamalanga ʻa Temetelió naʻe iku atu ia ki he meʻa naʻá ne fakaʻamu ki aí. Naʻe kamata ke toutou kaikaila ʻa e kau tufunga silivá “ʻOku lahi ʻa ʻĀtemisi ʻo e kau ʻEfesoó!” pea naʻe hoko ha fuʻu vālautuʻu ʻi he koló, ʻo taki atu ai ki he fuʻu kakai māfana tōtuʻa naʻe fakamatalaʻi ʻi he kamataʻanga ʻo e vahe ko ení.f Koeʻuhí ko Paulá ko ha tokotaha moʻui feilaulauʻi-kita, naʻá ne loto ke hū ki he malaʻe faiʻanga faivá ke lea ki he fuʻu kakaí, ka naʻe vilitaki ʻa e kau ākongá ke ne fakamamaʻo mei he fakatuʻutāmakí. Naʻe tuʻu hake ha tokotaha ko ʻĀlekisānita ʻi he ʻao ʻo e fuʻu kakaí ʻo ne feinga ke fai ha lea. Koeʻuhí ko ha Siu ia, naʻá ne vēkeveke nai ke fakamatalaʻi ʻa e kehekehe ʻi he vahaʻa ʻo e kau Siú mo e kau Kalisitiane ko ení. Ko e ngaahi fakamatala peheé naʻe ʻikai nai ke tokanga ki ai ʻa e fuʻu kakai ia ko iá. ʻI heʻenau ʻiloʻi ko ha tokotaha Siu iá, naʻa nau kaikailaʻi ia ʻo ʻikai lava ke toe ongo ʻene leá, ʻo nau toe kaikaila ʻo pehē “ʻOku lahi ʻa ʻĀtemisi ʻo e kau ʻEfesoó!” ʻo feʻunga mo e houa nai ʻe ua. Ko e fuʻu māfana tōtuʻa fakalotú kuo ʻikai ke liliu ia talu mei ai. ʻOkú ne kei ʻai pē ʻa e kakaí ke nau hoko ʻo fuʻu mātuʻaki taʻefakakaukau lelei.​—Ngā. 19:28-34.

18, 19. (a) Naʻe anga-fēfē hono fakanonga hifo ʻe he pule ʻo e koló ʻa e fuʻu kakai ʻi ʻEfesoó? (e) Kuo anga-fēfē hono maluʻi ʻa e kakai ʻa Sihová ʻi he taimi ʻe niʻihi ʻe he kau maʻu mafai fakaemāmaní, pea ko e hā ʻe lava ke tau fai ke maʻu ai ʻa e maluʻi peheé?

¹⁸ Faifai pē, naʻe fakanonga hifo ʻe he pule ʻo e koló ʻa e fuʻu kakaí. ʻI he tuʻunga ko ha tangata fakaʻutoʻuta lelei mo ʻatamai fakapotopotó, naʻe fakapapauʻi ʻe he ʻōfisa ko ení ki he fuʻu kakaí ko honau temipalé mo e ʻotua fefiné naʻe ʻikai ke ʻi ha tuʻunga fakatuʻutāmaki ia koeʻuhí ko e kau Kalisitiane ko ení, ko Paula ia mo hono ngaahi kaungāfonongá naʻe ʻikai te nau fai ha hia fekauʻaki mo e temipale ʻo ʻĀtemisí, pea naʻe ʻi ai ha founga totonu ki hono ʻohake ʻo e ngaahi ʻīsiu peheé. Mahalo ko e lea naʻe maongo tahá, ko ʻene fakamanatu ange ki he fuʻu kakaí naʻa nau ʻi he tuʻunga fakatuʻutāmaki ʻi hano fakahoko mai ʻa e houhau ʻa Lomá koeʻuhí ko e fakatahataha taʻefakalao mo taʻemapuleʻi ko ení. ʻI he meʻa ko iá, naʻá ne tukuange atu ʻa e fuʻu kakaí. Hangē pē ko e oma ʻa ʻene mapuna hake ʻenau ʻitá, naʻe pehē pē ʻene hōloa hifo he taimi ko ení koeʻuhí ko e ngaahi lea ʻuhinga lelei mo fakapotopoto ko iá.​—Ngā. 19:35-41.

¹⁹ Naʻe ʻikai ko e fuofua taimi eni naʻe fai ai ʻe ha tangata ʻatamai lelei ʻi ha tuʻunga mafai fakaemāmani ha meʻa ke maluʻi ai ʻa e kau muimui ʻo Sīsuú, pea ʻe ʻikai ko e fakaʻosí ia. Ko hono moʻoní, naʻe tomuʻa mamata ʻa e ʻapositolo ko Sioné ʻi ha vīsone ʻa ia ʻi he lolotonga ʻa e ngaahi ʻaho fakaʻosi ko ení, ko e ngaahi ʻelemēniti tuʻu maʻumaʻuluta ʻo e māmani ko ení, ʻa ia ʻoku fakatātaaʻi ʻe he māmaní, te ne folofua ha fuʻu lōmaki lahi ʻo e fakatanga fakasētane ki he kau muimui ʻo Sīsuú. (Fkh. 12:15, 16) Kuo hoko ʻo moʻoni ʻa e meʻa ko iá. ʻI he ngaahi tuʻunga lahi, ko e kau fakamaau ko ia ʻoku fakamaau totonú kuo ueʻi kinautolu ke nau maluʻi ʻa e ngaahi totonu ʻa e Kau Fakamoʻoni ʻa Sihová ki heʻenau fakataha ke fai ʻenau lotú pea mo hono vahevahe atu ʻa e ongoongo leleí ki he niʻihi kehé. Ko e moʻoni, ko hotau ʻulungāngá tonu ʻoku malava ke ʻi ai ʻene kaunga ki he ngaahi ikuna peheé. Ko e ʻulungaanga ʻo Paulá ʻoku ngalingali naʻá ne maʻu ai ʻa e tokaʻi anga-fakakaumeʻa ʻa e kau ʻōfisa fakapuleʻanga ʻe niʻihi ʻi ʻEfesō, ko ia naʻa nau vēkeveke ai ke fakapapauʻi ʻokú ne ʻi ha tuʻunga malu pē. (Ngā. 19:31) Fakatauange ke hoko ʻa ʻetau ʻulungaanga faitotonu mo fakaʻapaʻapá ʻo tapua lelei atu kitautolu ki he faʻahinga foki ko ia ʻoku tau fetaulaki mo iá. ʻOku ʻikai ʻaupito ke tau ʻiloʻi ʻe kitautolu ʻa hono lahi ʻe lava ke aʻu ki ai ʻa hono ngaahi olá.

20. (a) ʻOku anga-fēfē hoʻo ongoʻi fekauʻaki mo e anga ʻo e kaukaua ʻa e folofola ʻa Sihová ʻi he ʻuluaki senitulí pea mo ʻene kaukaua ʻi he ʻaho ní? (e) Ko e hā hoʻo fakapapau ʻi he fekauʻaki mo e ngaahi ikuna ʻa Sihova ʻi hotau taimí?

²⁰ ʻIkai ʻoku fakafiefia ke fakakaukau atu ki he anga ʻo e “tupu mo kaukaua ai pē ʻa e folofola ʻa Sihová” ʻi he ʻuluaki senitulí? ʻOku fakafiefia tatau pehē pē ke sio ki he anga ʻo e tuʻu mei mui ʻa Sihova ʻi he ngaahi ikuna meimei tatau ʻi hotau taimí. Te ke saiʻia ke maʻu ʻa e monū ʻo e ʻi ai haʻo kaunga, neongo ka siʻisiʻi, ʻi he ngaahi ikuna peheé? Peʻi ako leva mei he ngaahi faʻifaʻitakiʻanga kuo tau lāulea ki aí. Nofoʻaki anga-fakatōkilalo, hanganaki ʻalu fakataha mo e kautaha fakalakalaka ʻa Sihová, hokohoko atu ʻa e ngāue mālohí, talitekeʻi ʻa e ngaahi ngāue fakafaʻahikehé, pea fai ho tūkuingatá ke fai ha fakamoʻoni lelei fakafou ʻi ho ʻulungaanga faitotonu mo fakaʻapaʻapá.