“ʻOku Ou ʻAtaʻatā Au mei he Toto ʻo e Tangata Kotoa Pē”

1-3. (a) Fakamatalaʻi ʻa e meʻa naʻe hoko ʻi he pō naʻe mate ai ʻa ʻŪtikó. (e) Ko e hā ʻoku fai ʻe Paulá, pea ko e hā ʻoku fakahaaʻi ʻe he meʻa ko eni naʻe hokó ʻo fekauʻaki mo Paulá?

ʻOKU ʻi Taloasi ʻa Paula ʻi ha loki ʻi ʻolunga ʻa ia ʻoku fonu he kakaí. ʻOkú ne fai ha lea lōloa ki he fanga tokouá, koeʻuhí ko e efiafi fakaʻosi eni te ne fakataha ai mo kinautolú. Kuo tuʻapō eni. ʻOku lahilahi ʻa e ngaahi maama ʻoku ulo ʻi he lokí, ʻo fakalahi atu ai ʻa e mafana ʻa e ʻeá pea mo ʻahuina nai. ʻOku tangutu ʻi he taha ʻo e ngaahi matapā teké ha kiʻi talavou ko hono hingoá ko ʻŪtiko. Lolotonga ʻa e lea ʻa Paulá, ʻoku tō hifo ʻa ʻŪtiko ʻo mohe peá ne tō ai mei he matapā teke ʻo e fungavaka uá!

² ʻI he tuʻunga ko ha toketaá, ʻoku ngalingali pē ʻoku kau ʻa Luke ʻi he ʻuluaki faʻahinga ʻoku fakavave ki tuʻa ke vakaiʻi ʻa e kiʻi talavoú. ʻOku ʻikai ha toe filingaua ʻo fekauʻaki mo e tuʻunga kuó ne ʻi aí. “ʻI heʻenau aʻu hifo [kia ʻŪtikó] kuó ne ʻosi mate.” (Ngā. 20:9) Ka ʻoku hoko leva ha mana. ʻOku fakatōmapeʻe hifo ʻa Paula ki he kiʻi talavoú peá ne pehē ki he fuʻu kakaí: “Tuku hoʻomou hohaʻatuʻú, he ʻokú ne moʻui.” Kuo fokotuʻu hake ʻe Paula ʻa ʻŪtiko ʻo ne toe moʻui!​—Ngā. 20:10.

³ ʻOku fakahāhaaʻi ʻe he meʻa ko ení ʻa e mālohi ʻo e laumālie māʻoniʻoni ʻo e ʻOtuá. ʻE ʻikai totonu hano tukuakiʻi ʻa Paula ia ki he mate ʻa ʻŪtikó. Neongo ia, naʻe ʻikai te ne loto ke hoko ʻa e mate ʻa e kiʻi talavoú ʻo ne fakameleʻi ʻa e meʻa mahuʻinga ko eni naʻe hokó pe ke fakatūkiaʻi fakalaumālie ai ha taha pē. ʻI hono fokotuʻu hake ʻo ʻŪtikó, naʻe tuku atu leva ʻe Paula ʻa e fakatahaʻangá kuo nau fiemālie mo fakaivimālohiʻi kakato ke hoko atu ʻenau ngāue fakafaifekaú. ʻOku hā mahino, naʻe mātuʻaki tokanga ʻaupito ʻa Paula ki he moʻui ʻa e niʻihi kehé. ʻOku fakamanatu mai ai kiate kitautolu ʻa ʻene lea: “ʻOku ou ʻataʻatā au mei he toto ʻo e tangata kotoa pē.” (Ngā. 20:26) Tau lāulea angé ki he founga ʻe lava ke tokoniʻi ai kitautolu ʻe he faʻifaʻitakiʻanga ʻa Paulá ʻi he meʻá ni.

 4. Ko e hā ʻa e hokosia faingataʻa naʻe tofanga ai ʻa Paulá?

⁴ Hangē ko ia naʻe lāulea ki ai ʻi he vahe ki muʻá, naʻe tofanga ʻa Paula ʻi ha hokosia faingataʻa. Ko ʻene ngāue fakafaifekau ʻi ʻEfesoó naʻe langaʻi ai ha fuʻu vālautuʻu. Ko e moʻoni, ko e kau tufunga siliva ʻa ia naʻe fakatefito ʻenau maʻuʻanga moʻuí ʻi he lotu kia ʻĀtemisí naʻa nau kau ʻi ha fuʻu fakamoveuveu naʻe hoko! “ʻI he malona hifo ʻa e fuʻu longoaʻá,” ko e fakamatala ia ʻa e Ngāue 20:1, “naʻe ʻoatu ʻe Paula ʻa e fekau ke haʻu ʻa e kau ākongá, pea ʻi he hili ʻene fakalototoʻaʻi kinautolu mo lea māvae angé, naʻá ne kamata ʻene fononga ki Masitōniá.”

5, 6. (a) Ko e hā nai ʻa e fuoloa ʻo e ʻi Masitōnia ʻa Paulá, pea ko e hā naʻá ne fai maʻá e fanga tokoua ʻi aí? (e) Ko e hā ʻa e tōʻonga fakakaukau naʻe tauhi maʻu ʻe Paula ki hono ngaahi kaungātuí?

⁵ ʻI heʻene fononga ki Masitōniá, naʻe afe ai ʻa Paula ʻi he taulanga ʻo Taloasí ʻo ne nofo ai ʻi ha taimi. Naʻe ʻamanaki ʻa Paula te ne fetaulaki ai mo Taitusi, ʻa ia naʻe fekauʻi atu ki Kolinitoó. (2 Kol. 2:12, 13) Kae kehe, ʻi heʻene hoko ʻo mahino naʻe ʻikai haʻu ʻa Taitusí, naʻe ʻalu ai ʻa Paula ki Masitōnia, ʻo ne nofo nai ai ʻi he taʻu ʻe taha pe ofi ai ʻo ne “fai ha ngaahi lea fakalototoʻa lahi ki he faʻahinga ʻi aí.”a (Ngā. 20:2) Naʻe faai atu pē ʻo toki fetaulaki ʻa Taitusi mo Paula ʻi Masitōnia, ʻo ne ʻoatu ʻa e ongoongo lelei fekauʻaki mo e anga ʻo e tali ʻa e kau Kolinitoó ki he ʻuluaki tohi naʻe fai ʻe Paulá. (2 Kol. 7:5-7) Naʻe ueʻi ai heni ʻa Paula ke ne toe fai ha tohi ʻe taha kiate kinautolu, ʻa ia ʻoku tau ʻiloʻi he taimí ni ko e tohi 2 Kolinitoó ia.

⁶ ʻOku taau ke fakatokangaʻi ʻoku ngāueʻaki ʻe Luke ʻa e foʻi lea ko e “fakalototoʻaʻi” mo e “fakalototoʻa” ke fakamatalaʻi ʻaki ʻa e ʻaʻahi ʻa Paula ki he fanga tokoua ʻi ʻEfesō mo Masitōniá. He fakamatalaʻi lelei ē ʻe he foʻi lea ko iá ʻa e anga ʻo e tōʻongafai ʻa Paula ki hono kaungātuí! ʻI hono kehe mei he kau Fālesí, ʻa ia naʻa nau siolalo ki he niʻihi kehé, naʻe vakai ʻa Paula ia ki he fanga sipí ko hono ngaahi kaungāngāue. (Sione 7:47-49; 1 Kol. 3:9) Naʻe tauhi maʻu ʻe Paula ʻa e tōʻonga fakakaukau ko iá ʻo aʻu ki he taimi naʻe pau ai kiate ia ke ne akonakiʻi fefeka kinautolú.​—2 Kol. 2:4.

 7. ʻE lava fēfē ke faʻifaʻitaki ʻa e kau ʻovasia Kalisitiane he ʻaho ní ki he faʻifaʻitakiʻanga ʻa Paulá?

⁷ ʻI he ʻahó ni, ʻoku feinga ʻa e kau mātuʻa ʻi he fakatahaʻangá mo e kau ʻovasia sēketí ke nau faʻifaʻitaki ki he faʻifaʻitakiʻanga ʻa Paulá. Naʻa mo e taimi ʻoku nau fai ai ha valokí, ʻoku nau maʻu ʻa e taumuʻa ko hono fakaivimālohiʻi ʻa e faʻahinga ʻoku fiemaʻu kiate kinautolu ha tokoní. ʻOku feinga ʻa e kau ʻovasiá ʻi he kaungāongoʻi ke nau fai ha fakalototoʻa kae ʻikai ko e fakahalaiaʻi. Naʻe peheni hono fakamatalaʻi ʻe he ʻovasia sēketi taukei ʻe taha: “Ko e tokolahi taha hotau fanga tokouá mo e fanga tuofāfiné ʻoku nau loto ke fai ʻa e meʻa ʻoku totonú, ka ʻoku nau faʻa fāinga mo e ngaahi ongoʻi feifeitamakí, manavaheé, pea mo e ongoʻi ko ia ʻoku ʻikai hanau mālohi ke tokoniʻi kinautolú.” ʻE lava ke hoko ʻa e kau ʻovasiá ko ha matavai ʻo e mālohi ki he ngaahi kaungātui peheé.​—Hep. 12:12, 13.

8, 9. (a) Ko e hā naʻá ne fakaleluʻi ʻa e ngaahi palani ʻa Paula ke folau ki Sīliá? (e) Ko e hā naʻe tukulotoa nai ai ʻe he kau Siú ʻa e tāufehiʻa kia Paulá?

⁸ Naʻe ʻalu atu ʻa Paula mei Masitōnia ki Kolinitō.b Hili ʻene nofo ai ʻi ha māhina ʻe tolu, naʻá ne vēkeveke ke hoko atu ki Senikelea, ʻa ia naʻá ne palani ke heka ai ʻi ha vaka ki Sīlia. ʻE malava ai ke ne ʻalu mei ai ki Selusalema ʻo ʻave ʻa e ngaahi tokoní ki he fanga tokoua masiva ʻi aí.c (Ngā. 24:17; Loma 15:25, 26) Kae kehe, naʻe hoko ha ngaahi meʻa taʻeʻamanekina ʻo liliu ai ʻa e ngaahi palani ʻa Paulá. ʻOku fakamatala ʻa e Ngāue 20:3: “Naʻe faʻufaʻufono kiate ia ʻa e kau Siú”!

⁹ ʻOku ʻikai ke fakaʻohovale ʻa hono tukulotoa ʻe he kau Siú ʻa e tāufehiʻa kia Paulá, he naʻa nau lau ia ko ha tokotaha naʻe tafoki ʻo fakafepaki ki he moʻoní. Ki muʻa atu, naʻe hoko ʻene ngāue fakafaifekaú ʻo tafoki mai ai ʻa Kalisipō​—ko ha tokotaha tuʻu-ki-muʻa ʻi he sinakoke ʻo e kau Kolinitoó. (Ngā. 18:7, 8; 1 Kol. 1:14) ʻI ha toe taimi ʻe taha, naʻe ʻomi ai ʻe he kau Siu ʻi Kolinitoó ha ngaahi tukuakiʻi ʻo Paula kia Kalio, ko e kōvana ʻo ʻĀkeiá. Ka naʻe fakataʻeʻaongaʻi ʻe Kalio ʻa e ngaahi tukuakiʻi ko iá ʻo pehē naʻe ʻikai hano makatuʻunga​—ko ha tuʻutuʻuni ia naʻá ne fakaʻitaʻi lahi ʻa e ngaahi fili ʻo Paulá. (Ngā. 18:12-17) Naʻe ʻiloʻi pe huʻuhuʻu nai ʻa e kau Siu ʻi Kolinitoó ʻe vavé ni ha tukufolau ʻa Paula mei Senikelea ʻa ia naʻe ofi maí, ko ia naʻa nau fai ai ha faʻufaʻu ke lapasi ia ʻi ai. Ko e hā ʻe fai ʻe Paulá?

10. Ko ha loto-foʻi nai ia ʻa Paula ʻa e ʻikai te ne ʻalu ki Senikeleá? Fakamatalaʻi.

¹⁰ Koeʻuhí ke ne ʻi ha tuʻunga malu​—pea ke maluʻi ʻa e ngaahi paʻanga naʻe tuku ange kiate iá​—naʻe fili ai ʻa Paula ia ke ʻoua te ne ʻalu ki Senikelea pea ke ne toe foki ʻo fou atu ʻi Masitōnia. Ko e moʻoni, ko e fononga ʻi ʻutá ʻe ʻi ai pē hono ngaahi fakatuʻutāmaki ʻoʻona. Naʻe faʻa toi holo ʻa e kau kaihaʻa fakamālohí ʻi he ngaahi hala ʻo e kuonga muʻá. Naʻa mo e fanga kiʻi nofoʻanga mālōloó ʻe lava pē ke ʻikai malu ia. Neongo ia, naʻe fili pē ʻa Paula ke ne fehangahangai mo e ngaahi fakatuʻutāmaki ʻi ʻutá kae ʻikai ko ia naʻe tatali mai kiate ia ʻi Senikeleá. Ko e meʻa ʻoku sai ʻakí, naʻe ʻikai ke ne fononga toko taha pē. Ko e ngaahi kaungāfononga ʻo Paula ʻi he konga ko ʻeni ʻo ʻene fononga fakamisinalé naʻe kau ai ʻa Keio, Sēkunio, Sōpeta, Talofima, Tikiko, Tīmote, mo ʻAlisitako.​—Ngā. 20:3, 4.

11. ʻOku anga-fēfē hono fai ʻe he kau Kalisitiane he ʻaho ní ʻa e ngaahi meʻa te nau malavá ke maluʻi ai kinautolú, pea ko e hā ʻa e faʻifaʻitakiʻanga naʻe fokotuʻu ʻe Sīsū ʻi he meʻá ni?

¹¹ Hangē ko Paulá, ʻoku fai ʻe he kau Kalisitiane he ʻaho ní ʻa e meʻa te nau malavá ke maluʻi kinautolu lolotonga ʻa e ʻi he ngāue fakafaifekaú. ʻI he ngaahi feituʻu ʻe niʻihi, ʻoku nau fononga fakakulupu ai​—pe fononga tautau toko ua​—kae ʻikai ko e fononga toko taha. Fēfē nai ʻa e fakatangá? ʻOku lāuʻilo ʻa e kau Kalisitiané ʻoku ʻikai ke taʻealakalofi ia. (Sione 15:20; 2 Tīm. 3:12) Neongo ia, ʻoku ʻikai te nau fakaeʻa ʻiloʻilo pau atu kinautolu ki he fakatuʻutāmakí. Fakakaukau atu ki he faʻifaʻitakiʻanga ʻa Sīsuú. ʻI he taimi ʻe taha, ʻi he kamata ke toʻo hake ʻe ha kau fakafepaki ʻi Selusalemá ha ngaahi foʻi maka ke tolongi ʻaki iá, “naʻe toi ʻa Sīsū ia peá ne ʻalu atu mei he temipalé.” (Sione 8:59) Ki mui ai, ʻi he taimi naʻe faʻufaʻufono ai ʻa e kau Siú ke fakapoongi iá, “naʻe ʻikai ke kei ʻalu fakahāhā holo ʻa Sīsū ʻi he lotolotonga ʻo e kau Siú, ka naʻá ne mavahe mei ai ki he vahefonua ofi ki he toafá.” (Sione 11:54) Naʻe fai ʻe Sīsū ʻa e ngaahi meʻa naʻá ne malavá ke maluʻi ia ʻi he taimi naʻe ʻikai fepaki ai ʻa e fai peheé mo e finangalo ʻo e ʻOtuá kiate iá. ʻOku fai ʻe he kau Kalisitiane he ʻaho ní ʻa e meʻa tatau.​—Māt. 10:16.

12, 13. (a) Ko e hā naʻe hoko ki he fakatahaʻangá ʻi hono fokotuʻu hake ʻa ʻŪtikó? (e) Ko e hā ʻa e ʻamanaki makatuʻunga ʻi he Tohi Tapú ʻokú ne fakafiemālieʻi ʻa e faʻahinga ʻi he ʻahó ni kuo mole atu honau ngaahi ʻofaʻangá ʻi he maté?

¹² Naʻe fononga fakataha atu ʻa Paula mo hono ngaahi kaungāfonongá ʻo fou ʻi Masitōnia pea ʻoku hā mai naʻa nau movete leva. ʻOku hā mahino mai, naʻe toe fakataha ʻa e kulupú ni ʻi Taloasi.d ʻOku pehē ʻe he fakamatalá: “ʻI he ʻaho ʻe nima naʻa mau ʻalu hifo ai kiate kinautolu ki Taloasi.”e (Ngā. 20:6) Ko e feituʻu ko ʻení naʻe fokotuʻu hake ai ʻa e kiʻi talavou ko ʻŪtikó, ʻo hangē ko ia naʻe fakamatala ki ai ʻi he kamataʻanga ʻo e vahé ni. Fakaʻuta atu ki he anga ʻo e ongoʻi ʻa e fanga tokouá ʻi he sio kuo fokotuʻu hake ʻo toe moʻui ʻa honau kaungāmeʻa ko ʻŪtikó! Hangē ko ia ʻoku tala mai ʻe he fakamatalá, “naʻe taʻehanotatau ʻa ʻenau fiefiá.”​—Ngā. 20:12.

¹³ Ko e moʻoni, ko e ngaahi mana peheé ʻoku ʻikai ke hoko ia ʻi he ʻahó ni. Ka neongo ia, ko e faʻahinga kuo mole atu honau ngaahi ʻofaʻangá ʻi he maté ʻoku “taʻehanotatau ʻa ʻenau fiefiá” ko e meʻa ʻi he ʻamanaki makatuʻunga he Tohi Tapú ʻa ia ko e toetuʻú. (Sione 5:28, 29) Fakakaukau atu: Koeʻuhí ko ʻene taʻehaohaoá, naʻe faifai atu pē ʻo toe mate pē ʻa ʻŪtiko. (Loma 6:23) Ka ko e faʻahinga ʻe toetuʻu hake ʻi he māmani foʻou ʻa e ʻOtuá ʻoku nau maʻu ʻa e ʻamanaki ko e moʻui taʻengata! ʻIkai ko ia pē, ko e faʻahinga ʻoku fokotuʻu hake ke pule mo Sīsū ʻi hēvaní ʻoku fakateunga kinautolu ʻaki ʻa e taʻefaʻamaté. (1 Kol. 15:51-53) Ko e kau Kalisitiane he ʻaho ní​—tatau ai pē pe ʻoku nau kau ʻi he kau paní pe ko e “fanga sipi kehe”​—ʻoku nau maʻu ʻa e ʻuhinga lelei ke “taʻehanotatau ʻa ʻenau fiefiá.”​—Sione 10:16.

14. Ko e hā naʻe tala ange ʻe Paula ki he kau mātuʻa ʻEfesoó ʻi he taimi naʻá ne fakataha ai mo kinautolu ʻi Mīletó?

¹⁴ Naʻe fononga ʻa Paula mo ʻene kulupú mei Taloasi ki ʻĀsosi, pea mei ai leva ki Meteline, Kaio, Samo, mo Mīleto. Ko e taumuʻa ʻa Paulá ke aʻu taimi tonu atu ki Selusalema ki he Kātoanga ʻo e Penitekosí. Ko ʻene fakavavevave ko ia ke aʻu ki Selusalema ʻi he Penitekosí ʻoku hā mei ai ʻa e ʻuhinga naʻá ne fili ai ha vaka naʻe takai ʻo ʻikai fou ʻi ʻEfesō ʻi heʻene folau ko ʻeni ʻo fokí. Kae kehe, koeʻuhí naʻe loto ʻa Paula ke talanoa mo e kau mātuʻa ʻEfesoó, naʻá ne kole ai ke nau fetaulaki mo ia ʻi Mīleto. (Ngā. 20:13-17) ʻI heʻenau aʻu maí, naʻe tala ange ʻe Paula kiate kinautolu: “ʻOku mou ʻiloʻi lelei ʻa e anga ʻeku tōʻongafai ʻi homou lotolotongá talu mei he ʻuluaki ʻaho naʻá ku tūʻuta ai ʻi he vahefonua ʻo ʻĒsiá, ʻa ʻeku ngāue fakatamaioʻeiki maʻá e ʻEikí ʻi he anga-fakatōkilalo moʻoni pea ʻi he tangi-ʻa-loʻimata mo e ngaahi ʻahiʻahi naʻe tō mai kiate au mei he ngaahi faʻufaʻu ʻa e kau Siú, lolotonga iá naʻe ʻikai ke u tauholomui mei hono tala atu kiate kimoutolu ha meʻa pē ki haʻamou lelei pea mei hono akoʻi kimoutolu ʻi he ʻao ʻo e kakaí pea mei he fale ki he fale. Ka naʻá ku faifakamoʻoni fakaʻāuliliki fakatouʻosi ki he kau Siú pea ki he kau Kalisí ʻo fekauʻaki mo e fakatomala ki he ʻOtuá pea mo e tui ki hotau ʻEiki ko Sīsuú.”​—Ngā. 20:18-21.

15. Ko e hā ha ngaahi ʻaonga ʻe niʻihi ʻo e faifakamoʻoni fale-ki-he-falé?

¹⁵ ʻOku lahi ʻa e ngaahi founga ke aʻu ai ki he kakaí mo e ongoongo leleí ʻi he ʻahó ni. ʻI he hangē ko Paulá, ʻoku tau feinga ke ʻalu ki he feituʻu ʻoku ʻi ai ʻa e kakaí, pe ko e tauʻanga pasí, ngaahi hala moʻumoʻuá, pe ʻi he ngaahi feituʻu faiʻanga fakataú. Neongo ia, ʻoku kei hoko pē ʻa e ʻalu mei he fale ki he falé ko e founga malanga tefito ia ʻoku ngāueʻaki ʻe he Kau Fakamoʻoni ʻa Sihová. Ko e hā hono ʻuhingá? Ko e ʻuhinga ʻe taha, ko e malanga fale-ki-he-falé ʻoku ʻoange ai ki he tokotaha kotoa ha faingamālie feʻunga ke ne fanongo ai ki he pōpoaki ʻo e Puleʻangá ʻi ha tuʻunga tuʻumaʻu, ʻo fakahāhā ai ʻa e taʻefilifilimānako ʻa e ʻOtuá. ʻOku toe fakaʻatā foki ai ʻa e faʻahinga loto-totonú ke nau maʻu ha tokoni fakafoʻituitui ʻo fakatatau ki heʻenau ngaahi fiemaʻú. Tānaki atu ki ai, ko e ngāue fakafaifekau fale-ki-he-falé ʻoku langa hake ai ʻa e tui mo e kātaki ʻa e faʻahinga ʻoku nau fai iá. Ko e moʻoni, ko ha fakaʻilonga ʻo e kau Kalisitiane moʻoni he ʻaho ní ko ʻenau faivelenga ko ia ʻi he faifakamoʻoni “ʻi he ʻao ʻo e kakaí pea mei he fale ki he fale.”

16, 17. Naʻe anga-fēfē hono fakahāhā ʻe Paula ʻa e taʻemanavaheé, pea ʻoku anga-fēfē ʻa e faʻifaʻitaki ʻa e kau Kalisitiane ʻi he ʻaho ní ki heʻene faʻifaʻitakiʻangá?

¹⁶ Naʻe fakamatalaʻi ʻe Paula ki he kau mātuʻa ʻEfesoó ʻoku ʻikai te ne ʻilo pe ko e hā ʻa e ngaahi fakatuʻutāmaki ʻe tali mai kiate ia ʻi heʻene foki ki Selusalemá. “Neongo ia, ʻoku ʻikai te u lau ʻeku moʻuí ʻoku ʻi ai hano mahuʻinga kiate au,” ko ʻene tala angé ia, “kehe pē ke u ʻosiki hoku ʻalungá pea mo e ngāue ko ia kuó u maʻu mei he ʻEiki ko Sīsuú, ke faifakamoʻoni fakaʻāuliliki ki he ongoongo lelei ʻo e ʻofa maʻataʻatā ʻa e ʻOtuá.” (Ngā. 20:24) ʻI he taʻemanavaheé, naʻe ʻikai fakaʻatā ʻe Paula ha tuʻunga ʻe taha​—pe ko e mahamahakí pe fakafepaki kakahá​—ke ne taʻofi ia mei hono fakakakato ʻa e ngāue ne vaheʻi angé.

¹⁷ ʻOku pehē pē ʻa hono kātekina ʻe he kau Kalisitiane he ʻaho ní ha ngaahi tuʻunga faingataʻa kehekehe. ʻOku fehangahangai ʻa e niʻihi mo e fakataputapui fakapuleʻanga mo e fakatanga. Ko e niʻihi ʻoku nau faitau loto-toʻa mo e ngaahi mahamahaki fakatupu hōloa fakaesinó pe fakaeongó. ʻOku fekuki ʻa e toʻutupu Kalisitiané mo e tenge mei he toʻumeʻá ʻi he ʻapiakó. Pe ko e hā pē ʻa e ngaahi tuʻunga ʻoku nau ʻi aí, ʻoku tuʻu fakamakatuʻu pē ʻa e Kau Fakamoʻoni ʻa Sihová, ʻo hangē ko ia naʻe fai ʻe Paulá. ʻOku nau fakapapauʻi ke “faifakamoʻoni fakaʻāuliliki ki he ongoongo lelei.”

18. Naʻe anga-fēfē hono tauhi ʻe Paula ʻa ia tonu ke ne ʻataʻatā mei he halaia ʻi he totó, pea ʻe lava fēfē ke fai ʻe he kau mātuʻa ʻEfesoó ʻa e meʻa tatau?

¹⁸ Naʻe hoko atu leva ʻa Paula ʻo ne ʻoange ha enginaki fakahangatonu ki he kau mātuʻa ʻEfesoó, ʻo ne ngāueʻaki ʻa hono ʻalunga ʻoʻoná tonu ko ha faʻifaʻitakiʻanga. ʻUluakí naʻá ne fakahā ange kiate kinautolu ʻoku ngalingali ko e taimi fakaʻosi pē eni te nau sio ai kiate iá. Hili iá, naʻá ne fakahaaʻi ange: “ʻOku ou ʻataʻatā au mei he toto ʻo e tangata kotoa pē, he kuo ʻikai te u tauholomui mei hono tala atu kiate kimoutolu ʻa e finangalo kotoa ʻo e ʻOtuá.” ʻE lava fēfē ke faʻifaʻitaki ʻa e kau mātuʻa ʻEfesoó kia Paula pea tauhi ai kinautolu ke nau ʻataʻatā mei he halaia ʻi he totó? Naʻá ne tala ange kiate kinautolu: “Tokanga kiate kimoutolu pea ki he kotoa ʻo e tākangá, ʻa ia kuo fakanofo kimoutolu ki ai ʻe he laumālie māʻoniʻoní ko honau kau mātuʻa, ke tauhi ʻa e fakatahaʻanga ʻa e ʻOtuá, ʻa ia naʻá ne fakatau mai ʻaki ʻa e taʻataʻa ʻo hono ʻAló tonu.” (Ngā. 20:26-28) Naʻe fakatokanga ʻa Paula ʻe hūhū mai ha “fanga ulofi fekai” ki he tākangá pea te nau “leaʻaki ʻa e ngaahi meʻa kuo mioʻi ke tohoakiʻi ʻa e kau ākongá ke muimui ʻiate kinautolu.” Ko e hā ʻoku totonu ke fai ʻe he kau mātuʻá? “Mou hanganaki ʻā,” ko e fakatokanga ia ʻa Paulá, “pea manatuʻi ko e taʻu ē ʻe tolu, ʻi he pō mo e ʻaho, naʻe ʻikai ʻaupito tuku ʻeku enginaki ki he tokotaha taki taha ʻo kimoutolu fakataha mo e tangi-ʻa-loʻimata.”​—Ngā. 20:29-31.

19. Ko e hā ʻa e tafoki ʻo fakafepaki ki he moʻoní naʻe tupu hake ʻi he ngataʻanga ʻo e ʻuluaki senitulí, pea naʻe iku atu eni ki he hā ʻi he ngaahi senituli ki mui aí?

¹⁹ Naʻe ʻasi ʻa e “fanga ulofi fekai” ʻi he ngataʻanga ʻo e ʻuluaki senitulí. ʻI he 98 T.S. nai, naʻe tohi ʻe he ʻapositolo ko Sioné: “Naʻa mo e lolotongá ni kuo ʻosi ʻasi mai ha ngaahi fili tokolahi ʻo Kalaisi . . . Naʻa nau ʻalu atu meiate kitautolu, ka naʻe ʻikai te nau mei hotau faʻahingá; he kapau naʻa nau mei hotau faʻahingá, naʻa nau mei nofo maʻu mo kitautolu.” (1 Sio. 2:18, 19) ʻI he senituli hono tolú, naʻe iku atu ʻa e tafoki ʻo fakafepaki ki he moʻoní ki he tupu hake ko ia ʻa e kalasi haʻa faifekau ʻo Puleʻanga-Haʻa-Kalisitiané, pea ʻi he senituli hono faá, naʻe tali fakaʻofisiale ai ʻe ʻEmipola Konisitanitaine ʻa e faʻahinga faʻunga “lotu faka-Kalisitiane” fakameleʻi ko ení. ʻI hono ohi mai ʻa e ngaahi ouau fakapanganí ʻo ʻai ke nau hā ngali “faka-Kalisitiané,” naʻe hoko moʻoni ai ʻa e kau taki lotú ʻo nau “leaʻaki ʻa e ngaahi meʻa kuo mioʻi.” Ko e ngaahi nunuʻa ʻo e tafoki ko eni ʻo fakafepaki ki he moʻoní ʻoku kei mātā ia ʻi he ngaahi akonaki mo e ngaahi tōʻonga ʻo Puleʻanga-Haʻa-Kalisitiané.

20, 21. Naʻe anga-fēfē hono fakahāhā ʻe Paula ha laumālie feilaulauʻi-kitá, pea ʻe lava fēfē ke fai ʻe he kau mātuʻa Kalisitiane he ʻaho ní ʻa e meʻa tatau?

²⁰ Ko e ʻalunga moʻui ʻa Paulá naʻe kehekehe lahi ʻaupito ia mei he faʻahinga ʻa ia ʻi he ngaahi taimi ki mui maí ne nau ngāuehalaʻaki ʻa e tākangá ki ha lelei maʻanautolu. Naʻá ne ngāue ke tokoni kiate ia koeʻuhí ke ʻoua te ne hilifaki ha kavenga ki he fakatahaʻangá. Ko ʻene ngaahi feinga naʻe fai maʻá e ngaahi kaungātuí naʻe ʻikai te ne fai iá koeʻuhí ke maʻu mei ai haʻane lelei fakafoʻituitui. Naʻe fakalototoʻaʻi ʻe Paula ʻa e kau mātuʻa ʻEfesoó ke nau fakahāhā ha laumālie feilaulauʻi-kita. “Kuo pau ai ke mou tokoniʻi ʻa e faʻahinga ʻa ia ʻoku vaivaí,” ko ʻene tala ange ia kiate kinautolú, “pea kuo pau ke mou manatuʻi ʻa e ngaahi lea ʻa e ʻEiki ko Sīsuú, ʻi heʻene pehē ʻe ia tonu: ‘ʻOku ʻi ai ʻa e fiefia lahi ange ʻi he foaki atú ʻi he maʻu maí.’”​—Ngā. 20:35.

²¹ ʻI he hangē ko Paulá, ko e kau mātuʻa Kalisitiane ʻi he ʻaho ní ʻoku nau feilaulauʻi-kita. ʻI he kehe mei he haʻa faifekau ʻo Puleʻanga-Haʻa-Kalisitiané, ʻa ia ʻoku nau kai ʻa e moʻui ʻa ʻenau tākangá, ko e faʻahinga kuo tuku ki ai ʻa e fatongia ke “tauhi ʻa e fakatahaʻanga ʻa e ʻOtuá” ʻoku nau fakahoko taʻesiokita honau ngaahi ngafá. Ko e hīkisiá mo e sio tuʻungá ʻoku ʻikai hano feituʻu ʻoʻona ʻi he fakatahaʻanga Kalisitiané, he ko e faʻahinga ʻoku nau “kumi . . . ho nau ogoogolelei onautolu be” ʻe ʻikai te nau lavameʻa ʻi he lele lōloá. (Pal. 25:27, PM) Ko e fielahí pe ʻafungí ko hono ikuʻangá pē ko e fakamā.​—Pal. 11:2.

22. Ko e hā naʻá ne ʻai ʻa Paula ke ʻofeina ia ʻe he kau mātuʻa ʻo ʻEfesoó?

²² Ko e ʻofa moʻoni ʻa Paula ki hono fanga tokouá naʻe ʻofeina ai ia ʻe kinautolu. Ko e moʻoni, ʻi he hoko mai ʻa e taimi kiate ia ke ne mavahe aí, “naʻe hoko ha fetāngihi ʻi he kotoa honau haʻohaʻongá, pea naʻa nau fāʻofua ʻia Paula ʻo nau ʻuma lolomi kiate ia.” (Ngā. 20:37, 38) ʻOku fakahoungaʻi moʻoni mo ʻofa ʻa e kau Kalisitiané ʻi he faʻahinga, ʻa ia ʻi he hangē ko Paulá, ʻoku nau foaki taʻesiokita atu kinautolu koeʻuhí ko e tākangá. Hili ʻa e vakai ki he faʻifaʻitakiʻanga lelei moʻoni ʻa Paulá, ʻikai te ke loto-tatau naʻe ʻikai ko haʻane pōlepole pe ko haʻane fakalahi ʻi he taimi naʻá ne pehē ai: “ʻOku ou ʻataʻatā au mei he toto ʻo e tangata kotoa pē”?​—Ngā. 20:26.