“Hokohoko Atu ʻa e ʻAʻeva ʻi he ʻOfá”

1-3. Ko e hā ʻa e ngaahi olá ʻi he taimi ʻoku tau faʻifaʻitaki ai ki he faʻifaʻitakiʻanga ʻa Sihová ʻi hono fakahāhaaʻi ʻa e ʻofá?

“ʻOKU “ʻi ai ʻa e fiefia lahi ange ʻi he foaki atú ʻi he maʻu maí.” (Ngāue 20:35, NW) ʻOku fakamamafaʻi ʻe he ngaahi lea ko ia ʻa Sīsuú ʻa e foʻi moʻoni mahuʻinga ko ʻení: ʻOku ʻomai ʻe he ʻofa taʻesiokitá ʻa hono pale pē ʻoʻona. Neongo ʻoku ʻi ai ʻa e fiefia lahi ʻi hono maʻu ʻa e ʻofá, ʻoku toe lahi ange ʻa e fiefiá ia ʻi he foaki atú, pe ʻi hono fakahāhā, ʻa e ʻofá ki he niʻihi kehé.

² ʻOku ʻikai ha taha ʻe ʻilo lelei ange ki he meʻá ni ʻi heʻetau Tamai fakahēvaní. Hangē ko ia naʻa tau sio ki ai ʻi he ngaahi vahe ki muʻa ʻo e konga ko ʻení, ko Sihova ʻa e faʻifaʻitakiʻanga taupotu taha ʻo e ʻofá. ʻOku ʻikai ha taha kuó ne fakahāhā ʻa e ʻofá ʻi ha ngaahi founga lalahi ange pe ʻi ha vahaʻa taimi fuoloa ange ʻiate ia. Ko ia, ʻoku ʻi ai ha ofo, ʻi hono ui ʻa Sihova ko e “ʻOtua fiefiá”?​—1 Timote 1:11, NW.

³ ʻOku fiemaʻu mai ʻe hotau ʻOtua ʻofá ke tau feinga ke hangē ko iá, tautefito ʻi he hoko mai ki hono fakahāhaaʻi ʻa e ʻofá. ʻOku tala mai ʻe he ʻEfesō 4:32e, 33 (5:1, 2, PM) kiate kitautolu: “Mou hoko muʻa ko e kau faʻifaʻitaki ki he ʻOtua, ʻo tāu mo e fanau kuo ʻofeina: pea fou ʻi he ʻofa.” ʻI heʻetau faʻifaʻitaki ki he faʻifaʻitakiʻanga ʻa Sihova ʻi hono fakahāhaaʻi ʻa e ʻofá, ʻoku tau hokosia ai ʻa e fiefia lahi ange ʻoku hoko mai mei he foaki atú. ʻOku tau toe maʻu ai ʻa e fiemālie ʻi hono ʻiloʻi ʻoku tau fakahōifua kia Sihova, he ʻoku enginaki mai ʻene Folofolá kiate kitautolu ke ‘tau feofaaki.’ (Loma 13:8, PM) Ka ʻoku toe ʻi ai ʻa e ngaahi ʻuhinga kehe ʻoku totonu ai ke tau “fou ʻi he ʻofa.”

4, 5. Ko e hā ʻoku mahuʻinga ai ke tau fakahāhaaʻi ʻa e ʻofa feilaulauʻi-kitá ki he kaungātuí?

⁴ Ko e hā ʻoku mahuʻinga ai ke tau fakahāhaaʻi ʻa e ʻofá ki hotau kaungātuí? ʻI hono ʻai mahinó, ko e ʻofá ko e uho ia ʻo e lotu faka-Kalisitiane moʻoní. Ka ne ʻikai ʻa e ʻofá heʻikai malava ke tau maʻu ha haʻi vāofi mo e kaungā Kalisitiané, pea ko e meʻa ʻoku mahuʻinga angé, heʻikai hatau mahuʻinga ʻi he vakai mai ʻa Sihová. Fakakaukau angé ki he founga ʻoku fakaeʻa ai ʻe he Folofola ʻa e ʻOtuá ʻa e ngaahi moʻoni ko ʻení.

⁵ ʻI he pō fakaʻosi ʻo ʻene moʻui fakaemāmaní, naʻe tala ange ai ʻe Sīsū ki hono kau muimuí: “Ko e tuʻutuʻuni foʻou ʻoku ou tuku kiate kimoutolu, Ke mou feʻofaʻaki: hange ā ko ʻeku ʻofaʻi kimoutolu, ke pehē foki hoʻomou feʻofaʻaki. Ko e meʻa kó é ʻe ʻilo ai ʻe he kakai kotoa pē ko e kau ako kimoutolu aʻaku, ʻo kapau ʻe ai haʻamou feʻofaʻaki.” (Sione 13:34, 35) “Hange ā ko ʻeku ʻofaʻi kimoutolu”​—ʻio, ʻoku tuʻutuʻuniʻi mai kitautolu ke tau fakahāhā ʻa e faʻahinga ʻofa naʻe fakahāhaaʻi ʻe Sīsuú. ʻI he Vahe 29, naʻa tau fakatokangaʻi ai naʻe fokotuʻu ʻe Sīsū ha faʻifaʻitakiʻanga fisifisimuʻa ʻi hono fakahāhā ʻa e ʻofa feilaulauʻi-kitá, ʻi hono ʻai ʻa e ngaahi fiemaʻu mo e ngaahi mahuʻingaʻia ʻa e niʻihi kehé ʻo muʻomuʻa ia ʻiate kita. Ko kitautolu foki kuo pau ke tau fakahāhā ʻa e ʻofa taʻesiokitá, pea kuo pau ke tau fai ia ke mātuʻaki hā mahino ko ʻetau ʻofá ʻoku eʻa ʻo aʻu ki he faʻahinga ʻi tuʻa mei he fakatahaʻanga Kalisitiané. Ko e moʻoni, ko e ʻofa feilaulauʻi-kita fakatokouá ko e fakaʻilonga ia ʻoku fakahaaʻi ai kitautolu ko e kau muimui moʻoni ʻo Kalaisí.

6, 7. (a) ʻOku tau ʻilo fēfē ʻoku fakamamafaʻi ʻe he Folofola ʻa Sihová ʻa e mahuʻinga ʻo hono fakahāhaaʻi ʻa e ʻofá? (e) Ko e ngaahi lea ʻa Paula ʻoku lēkooti ʻi he 1 Kolinitō 13:4-8 ʻoku fakahangataha ia ki he tafaʻaki fē ʻo e ʻofá?

⁶ Fēfē kapau ʻoku ʻikai ha ʻofa ia ʻiate kitautolu? “Ka ʻoku ʻikai ʻiate au ʻa e ʻofa,” naʻe pehē ʻe he ʻapositolo ko Paulá, “ko e meʻa pe kuo u hoko ki ai, ko ha ukamea ongo au, pe ko ha simipale tatangi.” (1 Kolinitō 13:1) ʻOku ʻomai ʻe ha simipale tatangi ha longoaʻa fakahohaʻa. Fēfē ha lauʻiukamea longoaʻa? Ko ha ongo fakatātā feʻungamālie ē! Ko ha tokotaha taʻeʻofa ʻoku hangē ia ha meʻalea fakamūsika ʻokú ne fakatupu ha longoaʻa leʻo-lahi fakahohaʻa ʻoku fakatupu fehiʻa kae ʻikai ke fakamānako. ʻE malava fēfē ke maʻu ʻe ha taha pehē ha vahaʻangatae vāofi mo e niʻihi kehé? Naʻe toe pehē ʻe Paula: “Neongo te u ʻosiki ʻa e tui, ʻo u lava ai ke hiki moʻunga, ka ʻoku ʻikai ʻiate au ʻa e ʻofa, ko e meʻa noa pe au.” (1 Kolinitō 13:2) Kiʻi sioloto atu angé, ko ha tokotaha ʻoku ʻikai ʻofa ko “ha tokotaha taʻeʻaonga ia,” neongo ko e hā nai ha faʻahinga ngāue pē te ne fakahoko! (The Amplified Bible) ʻIkai ʻoku hā mahino ʻoku fakamamafaʻi ʻe he Folofola ʻa Sihová ʻa e mahuʻinga ʻo hono fakahāhaaʻi ʻa e ʻofá?

⁷ ʻE malava fēfē leva ke tau fakahāhā ʻa e ʻulungaanga ko ʻení ʻi heʻetau ngaahi feangainga mo e niʻihi kehé? Ke tali iá, tau sivisiviʻi angé ʻa e ngaahi lea ʻa Paula ʻoku hā ʻi he 1 Kolinitō 13:4-8. Ko e fakamamafa ʻi he ngaahi veesi ko ʻení ʻoku ʻikai fekauʻaki ia mo e ʻofa ʻa e ʻOtuá kiate kitautolú pe ko ʻetau ʻofa ki he ʻOtuá. ʻI hono kehé, naʻe tokangataha ʻa Paula ia ki he founga ʻoku totonu ke tau fakahāhā ai ʻa e feʻofaʻakí. Naʻá ne fakamatalaʻi ʻa e ngaahi meʻa pau ʻa ia ko e ʻofá pea mo e ngaahi meʻa pau ʻoku ʻikai ko e ʻofá.

 8. ʻE malava fēfē ʻe he kātakí ʻo tokoniʻi kitautolu ʻi heʻetau ngaahi feangainga mo e niʻihi kehé?

⁸ “Oku kataki fuoloa ae ofa.” (PM) Ko e hoko ʻo kātaki-fuoloá ʻoku ʻuhingá ko e kātakiʻi ʻa e niʻihi kehé. (Kolose 3:13) ʻIkai ʻoku tau fiemaʻu ha kātaki pehē? Koeʻuhi ko e ngaahi meʻamoʻui taʻehaohaoa kitautolu ʻoku tau ngāue uma ki he uma, ko e meʻa moʻoni pē ia ke ʻamanekina ʻi he taimi ki he taimi, ʻe fakalotomamahiʻi nai ai kitautolu ʻe hotau fanga tokoua Kalisitiané pea te tau fai nai ʻa e meʻa tatau kiate kinautolu. Ka ʻoku malava ʻe he kātakí mo e anga-fakamaʻumaʻú ʻo tokoniʻi kitautolu ke tau fekuki mo e fanga kiʻi loto-mamahi iiki ʻoku tau kātekina ʻi heʻetau ngaahi feangainga mo e niʻihi kehé​—ʻo ʻoua ʻe maumauʻi ai ʻa e melino ʻa e fakatahaʻangá.

 9. ʻI he ngaahi founga fē ʻe lava ke tau fakahāhaaʻi ai ʻa e anga-leleí ki he niʻihi kehé?

⁹ “Ko ʻOfa ʻoku . . . angalelei.” ʻOku fakahaaʻi ʻa e anga-leleí ʻe he ngaahi ngāue tokoní mo e ngaahi lea fakaʻatuʻí. ʻOku ueʻi kitautolu ʻe he ʻofá ke tau kumi ki ha ngaahi founga ke fakahāhā ai ʻa e anga-leleí, tautefito ki he faʻahinga ʻoku fiemaʻu lahi taha ki aí. Ko e fakatātaá, ʻoku tuēnoa nai ha kaungātui taʻumotuʻa pea ʻoku fiemaʻu nai ki ai ha ʻaʻahi fakalototoʻa. Ko ha faʻē taʻehoa pe ko ha tuofefine ʻokú ne nofo ʻi ha ʻapi ʻoku māvahevahe fakalotu ʻoku fiemaʻu nai ki ai ha tokoni. Ko ha taha ʻoku puke pe fehangahangai mo ha faingataʻa ʻokú ne fiemaʻu nai ke fanongo ki ha ngaahi lea lelei mei ha kaumeʻa mateaki. (Palōveepi 12:25; 17:17) ʻI heʻetau tamuʻomuʻa ke fakahāhaaʻi ʻa e anga-leleí ʻi ha ngaahi founga peheé, ʻoku tau fakahāhā ai ʻa e moʻoni ʻo ʻetau ʻofá.​—2 Kolinito 8:8.

10. ʻOku anga-fēfē hono tokoniʻi kitautolu ʻe he ʻofá ke tau pouaki mo leaʻaki ʻa e moʻoní, naʻa mo e taimi ʻoku ʻikai faingofua ai ke fai peheé?

¹⁰ “Ko ʻOfa . . . ʻoku ne kaungā-fiefia mo e Moʻoni.” ʻOku pehē ʻe ha toe liliu ʻe taha: “Ko ʻofa . . . ʻoku kau fiefia mo e moʻoní.” ʻOku ueʻi kitautolu ʻe he ʻofá ke tau pouaki ʻa e moʻoní pea ke “lea moʻoni ʻa e taha mo e taha.” (Sākalaia 8:16) Ko e fakatātaá, kapau kuo kau ha taha ʻokú te ʻofa ai ʻi ha angahala mamafa, ko e ʻofa kia Sihová​—pea ki he tokotaha faihalá​—te ne tokoniʻi kitautolu ke tau pikimaʻu ki he ngaahi tuʻunga ʻa e ʻOtuá kae ʻikai ko e feinga ke fūfuuʻi, fakakaukauʻi ha kalofanga, pe aʻu ʻo loi fekauʻaki mo e faihalá. Ko hono moʻoní, ko e moʻoni ʻo e tuʻunga ko iá ʻoku faingataʻa nai ke tali. Ka ʻo kapau ʻoku tau hanganaki fakakaukau ki ha lelei maʻá e tokotaha ʻoku tau ʻofa aí, te tau loto ke ne maʻu mo tali ha fakahāhā ʻo e akonaki ʻofa ʻa e ʻOtuá. (Palōveepi 3:11, 12) ʻI he tuʻunga ko e kau Kalisitiane ʻofá, ʻoku tau toe fakaʻamu ke tau “faitotonu ʻi he meʻa kotoa pē.”​—Hepelu 13:18, NW.

11. Koeʻuhi ko e ʻofá “ʻoku ne ʻukuma ʻi he meʻa kotoa pe,” ko e hā ʻoku totonu ke tau feinga ke fai fekauʻaki mo e ngaahi tōnounou ʻa e kaungātuí?

¹¹ “Ko ʻOfa . . . ʻoku ne ʻukuma ʻi he meʻa kotoa pe.” Ko e kupuʻi lea ko iá ʻoku ʻuhinga fakaelea “ʻokú ne ʻufiʻufi ʻa e meʻa kotoa pē.” (Kingdom Interlinear) ʻOku pehē ʻe he 1 Pita 4:8: “Ko e ʻofa ʻoku ne ʻufiʻufi ha fufuʻunga angahala.” ʻIo, ko ha Kalisitiane ʻoku puleʻi ʻe he ʻofá ʻoku ʻikai ke vēkeveke ia ke fakahaaʻi ʻa e kotoa ʻo e ngaahi taʻehaohaoa mo e ngaahi tōnounou ʻa hono fanga tokoua Kalisitiané. ʻI he ngaahi tuʻunga lahi, ko e ngaahi fehālaaki mo e ngaahi hala ʻa e kaungātuí ʻoku natula iiki pea ʻoku malava ke ʻufiʻufiʻi ia ʻaki ʻa e ʻofá.​—Palovepi 10:12; 17:9.

12. Naʻe anga-fēfē hono fakahāhaaʻi ʻe he ʻapositolo ko Paulá naʻá ne tui ki he lelei taha fekauʻaki mo Filimoné, pea ko e hā ʻoku malava ke tau ako mei he faʻifaʻitakiʻanga ʻa Paulá?

¹² “Ko ʻOfa . . . ʻoku tui ki he meʻa kotoa pe.” ʻOku pehē ʻe he liliu ʻa Moffatt ko e ʻofá ʻoku “vēkeveke maʻu pē ke tui ki he lelei tahá.” ʻOku ʻikai te tau huʻuhuʻu tōtuʻa fekauʻaki mo hotau kaungātuí, ʻo fehuʻia ʻenau taumuʻa kotoa pē. ʻOku tokoniʻi kitautolu ʻe he ʻofá ke tau “tui ki he lelei tahá” fekauʻaki mo hotau fanga tokouá pea falala kiate kinautolu.a Fakatokangaʻi ha faʻifaʻitakiʻanga ʻi he tohi ʻa Paula kia Filimoné. Naʻe tohi ʻa Paula ke fakaʻaiʻai ʻa Filimone ke ne talitali anga-lelei ʻa e pōpula hola ko ʻOnesemá, ʻa ia naʻá ne hoko ko ha Kalisitiane. ʻI he ʻikai feinga ke fakamālohiʻi atu ʻa Filimoné, naʻe fai ʻe Paula ha fakatangi ʻo makatuʻunga ʻi he ʻofá. Naʻá ne fakahaaʻi ʻa e loto-falala ʻe fai ʻe Filimone ʻa e meʻa totonú, heʻene pehē: “Kuo u tohi atu ʻi heʻeku falala te ke talangofua mai, heʻeku ʻilo ʻe hulu atu hoʻo fai ʻi he meʻa kuo u tala.” (Veesi 21) ʻI he taimi ʻoku ueʻi ai kitautolu ʻe he ʻofá ke tau fakahaaʻi ʻa e loto-falala pehē ki hotau fanga tokouá, ʻoku tau fakatupulekina ai ʻa e lelei tahá ʻiate kinautolu.

13. ʻE malava fēfē ke tau fakahāhā ʻoku tau ʻamanaki ki he lelei tahá ʻi hotau fanga tokouá?

¹³ “Ko ʻOfa . . . ʻoku ne ʻamanaki ʻi he meʻa kotoa pe.” Neongo ʻoku anga-falala ʻa e ʻofá, ʻoku toe ʻamanaki ia. ʻI hono ueʻi ʻe he ʻofá, ʻoku tau ʻamanaki ai ki he lelei tahá ʻi hotau fanga tokouá. Ko e fakatātaá, kapau ʻoku fai ʻe ha tokoua ha “laka hala ki muʻa ke ne lāuʻilo ki aí,” ʻoku tau ʻamanaki te ne tali ʻa e ngaahi feinga anga-ʻofa ke fakatonutonu iá. (Kalētia 6:1, NW) ʻOku tau toe fokotuʻu ʻa e ʻamanaki ko e faʻahinga ko ia ʻoku vaivai ʻi he tuí te nau toe fakaakeake. ʻOku tau anga-kātaki ki he faʻahinga peheé, ʻo fai ʻa e meʻa te tau malavá ke tokoniʻi kinautolu ke nau hoko ʻo mālohi ʻi he tuí. (Loma 15:1; 1 Tesalonaika 5:14) Naʻa mo ha tokotaha ʻoku tau ʻofa ai ʻoku ʻalu hē, heʻikai te tau liʻaki leva ʻa e ʻamanaki ʻe ʻi ai pē ʻa e ʻaho te ne hoko ai ʻo fakakaukau lelei pea foki kia Sihova, ʻo hangē ko e foha maumau-koloa ʻi he talanoa fakatātā ʻa Sīsuú.​—Luke 15:17, 18.

14. ʻI he ngaahi founga fē ʻe ʻahiʻahiʻi nai ai ʻetau kātakí ʻi he loto fakatahaʻangá, pea ʻe anga-fēfē hono tokoniʻi kitautolu ʻe he ʻofá ke tau tali ki aí?

¹⁴ “Ko ʻOfa . . . ʻoku ne kataki ʻi he meʻa kotoa pe.” ʻOku fakaivia kitautolu ʻe he kātakí ke tau tuʻu maʻu ʻi he fehangahangai mo e ngaahi fakaloto-mamahí pe ngaahi faingataʻá. Ko e ngaahi ʻahiʻahiʻi ʻo e kātakí ʻoku ʻikai ke hoko mai pē ia mei tuʻa ʻi he fakatahaʻangá. ʻI he taimi ʻe niʻihi, ʻoku ʻahiʻahiʻi nai kitautolu mei loto. Koeʻuhi ko e taʻehaohaoá, ʻe fakalotomamahiʻi nai kitautolu ʻe hotau fanga tokouá ʻi ha taimi. ʻE hanga nai ʻe ha lea taʻefakakaukauʻi ʻo ʻai ke tau ongoʻi loto-mamahi. (Palōveepi 12:18) Ko ha meʻa nai ʻi he fakatahaʻangá ʻoku ʻikai ke fakaleleiʻi ia ʻo hangē ko ia ʻoku tau fakakaukau atu ʻoku totonu ke ʻi aí. Ko e ʻulungaanga ʻo ha tokoua ʻoku tokaʻi ʻoku hoko nai ia ʻo fakatupu loto-mamahi, ʻo fakatupunga ai kitautolu ke tau fifili, ‘ʻE lava fēfē ke fai pehē ha Kalisitiane?’ ʻI he taimi ʻoku fehangahangai ai mo e ngaahi tuʻunga peheé, te tau mavahe ai mei he fakatahaʻangá pea taʻofi hono tauhi ʻa Sihová? ʻIkai, kapau ʻoku tau maʻu ʻa e ʻofá! ʻIo, ʻoku taʻofi kitautolu ʻe he ʻofá mei he hoko ʻo fakakuihi ʻe he ngaahi hala ʻa ha tokoua ʻo ʻikai ai te tau malava ke kei sio ki ha lelei ʻiate ia pe ʻi he fakatahaʻangá fakakātoa. ʻOku fakaivia kitautolu ʻe he ʻofá ke tau kei loto-tōnunga ki he ʻOtuá pea poupou ki he fakatahaʻangá neongo ko e hā ha meʻa ʻoku leaʻaki nai pe fai ʻe ha tangata taʻehaohaoa.​—Sāme 119:165.

15. Ko e hā ʻa e meheká, pea ʻoku anga-fēfē hono tokoniʻi kitautolu ʻe he ʻofá ke tau fakaʻehiʻehi mei he ongo fakatupu ʻauha ko ʻení?

¹⁵ “Ko ʻOfa ʻoku ʻikai te ne meheka.” ʻOku malava ke ʻai kitautolu ʻe he meheká ke tau hoko ʻo loto-meheka ki he meʻa ʻoku maʻu ʻe he niʻihi kehé​—ʻenau ngaahi koloá, ngaahi monuú, pe ngaahi malavá. Ko e meheka peheé ko ha foʻi ongo siokita, fakatupu ʻauha, ka ʻikai ke mapuleʻi ʻe lava ke ne maumauʻi ʻa e melino ʻa e fakatahaʻangá. Ko e hā te ne tokoniʻi kitautolu ke tau talitekeʻi ʻa e “holi ki he meheka”? (Sēmisi 4:5, PM) Ko e talí ko e ʻofá. ʻOku malava ʻe he ʻulungaanga mātuʻaki mahuʻinga ko ʻení ke ne fakaivia kitautolu ke tau fiefia fakataha mo e faʻahinga ʻoku nau ngali maʻu ha ngaahi lelei ʻe niʻihi ʻi he moʻuí ʻoku ʻikai ke tau maʻu ia ʻe kitautolu. (Loma 12:15) ʻOku tokoniʻi kitautolu ʻe he ʻofá ke ʻoua te tau vakai ki ai ko ha meʻa fakatupu-ʻita fakafoʻituitui ʻi hono maʻu ʻe ha taha ha fakahīkihiki koeʻuhi ko ha malava makehe pe lavameʻa tuʻu-ki-muʻa.

16. Kapau ʻoku tau ʻofa moʻoni ʻi hotau fanga tokouá, ko e hā te tau fakaʻehiʻehi ai mei he pōlepole fekauʻaki mo e meʻa ʻoku tau fai ʻi he ngāue ʻa Sihová?

¹⁶ “Ko ʻOfa . . . ʻoku ʻikai te ne fai pe ke ongoongoa, ʻoku ʻikai te ne fakafuofuolahi.” ʻOku taʻofi kitautolu ʻe he ʻofá mei he futaʻaki hotau ngaahi talēnití pe ngaahi lavameʻá. Kapau ʻoku tau ʻofa moʻoni ʻi hotau fanga tokouá, ʻe lava fēfē ke tau fieongoongoa hokohoko fekauʻaki mo ʻetau lavameʻa ʻi he ngāue fakafaifekaú pe ko hotau ngaahi monū ʻi he fakatahaʻangá? ʻOku malava ʻe he pōlepole peheé ke ne fakalotosiʻi ʻa e niʻihi kehé, ʻo ʻai kinautolu ke nau ongoʻi ʻoku nau māʻulalo hifo ʻi hono fakahoa atú. ʻOku ʻikai ke fakaʻatā kitautolu ʻe he ʻofá ke tau fieongoongoa fekauʻaki mo e meʻa ʻoku tuku mai ʻe he ʻOtuá ke tau fai ʻi heʻene ngāué. (1 Kolinitō 3:5-9) ʻIkai ngata aí, ko e ʻofá “ʻoku ʻikai te ne fakafuofuolahi,” pe hangē ko e lau ʻa e liliu ʻe taha, ʻoku ʻikai te ne “tukulotoa ʻa e ngaahi fakakaukau fakamafutofuta fekauʻaki mo hono mahuʻinga pē ʻoʻoná.” ʻOku taʻofi kitautolu ʻe he ʻofá mei hono maʻu ha fakakaukau māʻolunga kiate kitautolú.​—Loma 12:3.

17. ʻOku ueʻi kitautolu ʻe he ʻofá ke tau fakahāhā ʻa e fakaʻatuʻi ki he niʻihi kehé ʻi he hā, pea ko e hā ʻa e faʻahinga ʻulungaanga te tau fakaʻehiʻehi mei aí?

¹⁷ “Ko ʻOfa . . . ʻoku ʻikai te ne fai taʻetāu.” Ko ha tokotaha ʻokú ne fai taʻetaau ʻokú ne ngāue ʻi ha founga mātuʻaki taʻetotonu pe fakamamahi. Ko ha ʻalunga pehē ʻoku taʻeʻofa ia, he ʻokú ne fakahāhaaʻi ha mātuʻaki taʻetokaʻi ʻo e ngaahi ongoʻi mo e lelei ʻa e niʻihi kehé. ʻI hono kehé, ʻoku ʻi ai ha tuʻunga anga-ʻofa ʻi he ʻofá ʻa ia ʻokú ne ueʻi kitautolu ke tau fakahāhā ʻa e fakaʻatuʻi ki he niʻihi kehé. ʻOku pouaki ʻe he ʻofá ʻa e ngaahi anga-leleí, ʻulungaanga fakaʻotuá, mo e tokaʻi ʻo hotau kaungātuí. Ko ia ai, ʻe ʻikai fakaʻatā kitautolu ʻe he ʻofá ke tau kau ʻi ha “tōʻonga fakamā”​—ko hono moʻoní, ko ha ʻulungaanga pē ʻe fakaʻohovale pe fakalotomamahi ki hotau fanga tokoua Kalisitiané.​—Efeso 5:3, 4, NW.

18. Ko e hā ʻoku ʻikai ke kounaʻi ai ʻe ha tokotaha ʻofa ke fai ʻa e meʻa kotoa pē ʻi heʻene foungá?

¹⁸ “Ko ʻOfa . . . ʻoku ʻikai te ne kumi ʻene lelei aʻana.” Ko e Revised Standard Version ʻokú ne pehē heni: “Ko e ʻofá ʻoku ʻikai te ne vilitaki ʻi heʻene founga pē ʻaʻaná.” Ko ha tokotaha ʻofa ʻoku ʻikai te ne kounaʻi ko e meʻa kotoa pē ke fai ia ʻi heʻene foungá, ʻo hangē ia ʻoku tonu maʻu pē ʻa ʻene ngaahi fakakaukaú. ʻOku ʻikai te ne tākiekina kākā ʻa e niʻihi kehé, ʻo ngāueʻaki hono ngaahi mālohi fakalotoʻí ke ikuʻi ʻaki ʻa e faʻahinga ʻoku nau maʻu ha fakakaukau kehé. Ko e loto-taʻeʻunua peheé te ne fakahaaʻi ʻe ia ha tuʻunga ʻo e loto-pōlepolé, pea ʻoku pehē ʻe he Tohitapú: “Ko e pōlepolé ʻoku iku atu ia ki he ʻauha.” (Palōveepi 16:18, NW) Kapau ʻoku tau ʻofa moʻoni ʻi hotau fanga tokouá, te tau tokaʻi ʻenau ngaahi fakakaukaú, pea ʻo ka malava, te tau fakahāhā ha loto-lelei ke ʻulutukua. Ko ha laumālie ʻulutukua ʻoku fehoanaki ia mo e ngaahi lea ʻa Paulá: “Ke ʻoua naʻa kumi ʻe ha taha ʻene lelei aʻana, ka ko e lelei ʻa e taha.”​—1 Kolinito 10:24.

19. ʻOku anga-fēfē hono tokoniʻi kitautolu ʻe he ʻofá ke tau fai ha tali ʻi he taimi ʻoku fakalotomamahiʻi ai kitautolu ʻe he niʻihi kehé?

¹⁹ “Ko ʻOfa . . . ʻoku ʻikai te ne fakaʻita, ʻoku ʻikai te ne lau ʻa e kovi.” ʻOku ʻikai ke ʻitangofua ʻa e ʻofá ʻi he meʻa ʻoku leaʻaki pe fai ʻe he niʻihi kehé. Ko e moʻoni, ʻoku fakaenatula pē ke te hoko ʻo loto-mamahi ʻi he taimi ʻoku fakalotomamahiʻi ai kitautolu ʻe he niʻihi kehé. Ka naʻa mo e ʻita ʻoku ʻuhinga leleí, heʻikai ke fakaʻatā kitautolu ʻe he ʻofá ke tau nofoʻaki fakaʻita ai pē. (Efeso 4:26, 27) Heʻikai ke tau tauhi ha lēkooti ʻo e ngaahi lea pe ngaahi ngāue fakalotomamahí, ʻo hangē hano hiki kinautolu ʻi ha tohi moʻua koeʻuhi ke ʻoua naʻa ngalo kinautolu. ʻI hono kehé, ʻoku ueʻi kitautolu ʻe he ʻofá ke tau faʻifaʻitaki ki hotau ʻOtua ʻofá. Hangē ko ia naʻa tau vakai ki ai ʻi he Vahe 26, ʻoku fakamolemole ʻa Sihova ʻi he ʻi ai ha ʻuhinga lelei ke fai pehē aí. ʻI he taimi ʻokú ne fakamolemoleʻi ai kitautolú, ʻokú ne fakangaloʻi, ʻa ia, ʻoku ʻikai te ne tauhi ʻa e ngaahi angahala ko iá kia kitautolu ʻi ha taimi ʻi he kahaʻú. ʻIkai ʻoku tau fakamālōʻia ʻi he ʻikai ke lau maʻu pē ʻe Sihova ʻetau koví?

20. ʻOku totonu ke fēfē ʻetau talí kapau ʻoku maʻu ha kaungātui ʻe he faihalá pea iku ai ki ha faingataʻa?

²⁰ “Ko ʻOfa . . . ʻoku ʻikai te ne fiefia ʻi he taʻetotonu.” ʻOku pehē heni ʻe ha liliu ʻe taha: “Ko ʻofa . . . ʻoku ʻikai te ne hākahaka ʻi he ngaahi angahala ʻa e kau tangata kehé.” ʻOku pehē ʻe he liliu ʻa Moffatt: “ʻOku ʻikai ʻaupito ke fiefia ʻa e ʻofá ʻi he taimi ʻoku faihala ai ʻa e niʻihi kehé.” ʻOku ʻikai ke fiefia ʻa e ʻofá ʻi he taʻetotonú, ko ia ai, ʻoku ʻikai te tau fakasiʻisiʻi ʻa e mafatukituki ʻo e ʻulungaanga taʻetāú ʻi ha faʻahinga founga pē. ʻE fēfē ʻetau talí kapau ʻoku maʻu ha kaungātui ʻe he angahalá pea iku ai ki ha faingataʻa? ʻE ʻikai ke fakaʻatā kitautolu ʻe he ʻofá ke tau fiefia ai, ke hangē ʻokú te pehē atu ai, ‘Sai! Ko hono tuhá pē ia!’ (Palōveepi 17:5) Kae kehe, ʻoku tau fiefia ʻi he taimi ʻoku fou ai ha tokoua naʻe faihala ʻi ha ngaahi sitepu lelei ke toe fakaakeake mei heʻene tō fakalaumālié.

21-23. (a) Ko e hā naʻe ʻuhinga ki ai ʻa Paula ʻi heʻene pehē ko “ʻOfa ʻoku ʻikai ke kaʻanga ia ʻi ha taimi”? (e) Ko e hā ʻe lāulea ki ai ʻi he vahe fakaʻosí?

²¹ “Ko ʻOfa ʻoku ʻikai ke kaʻanga ia ʻi ha taimi.” Ko e hā naʻe ʻuhinga ki ai ʻa Paula ʻi he ngaahi lea ko iá? Hangē ko ia ʻoku hā ʻi he potutohí, naʻá ne lāulea ki he ngaahi meʻaʻofa ʻa e laumālié ʻa ia naʻe ʻi ai ʻi he lotolotonga ʻo e muʻaki kau Kalisitiané. Naʻe hoko ʻa e ngaahi meʻaʻofa ko iá ko e ngaahi fakaʻilonga ʻo e toka ʻa e hōifua ʻa e ʻOtuá ʻi he fakatahaʻanga naʻe toki fokotuʻu foʻoú. Ka naʻe ʻikai lava ʻa e kau Kalisitiane kotoa pē ke faifakamoʻui, kikite, pe lea kehekehe. Kae kehe, naʻe ʻikai ko ha fuʻu meʻa mahuʻinga ia; ko e ngaahi meʻaʻofa fakaemaná ʻe faai atu pē ʻi ha tuʻunga ʻo ngata. Neongo ia, ʻe ʻi ai ʻa e meʻa kehe ia ʻe kei tuʻu, ko e meʻa ʻe malava ʻe he Kalisitiane kotoa pē ke fakatupulekina. Naʻe tuʻu-ki-muʻa ange ia, ʻo tuʻuloa ange, ʻi ha meʻaʻofa fakaemana pē. Ko hono moʻoní, naʻe ui ia ʻe Paula ko “ha hala ʻoku fungani hake.” (1 Kolinitō 13:1 [12:31, PM]) Ko e hā ʻa e “hala ʻoku fungani hake” ko ʻení? Ko e hala ia ʻo e ʻofá.

²² Ko e moʻoni, ko e ʻofa faka-Kalisitiane naʻe fakamatalaʻi ʻe Paulá “ʻoku ʻikai ke kaʻanga ʻi ha taimi,” ʻa ia, ʻe ʻikai ʻaupito ke ngata ia. ʻI he aʻu mai ki he ʻaho ní, ko e ʻofa feilaulauʻi-kita fakatokouá ʻokú ne fakaʻilongaʻi ʻa e kau muimui moʻoni ʻo Sīsuú. ʻIkai ʻoku tau sio ki he fakamoʻoni ʻo e ʻofa peheé ʻi he ngaahi fakatahaʻanga ʻa e kau lotu ʻa Sihová ʻi māmani lahi? ʻE tolonga ʻo taʻengata ʻa e ʻofa ko iá, he ʻoku talaʻofa mai ʻe Sihova ʻa e moʻui taʻengatá ki heʻene kau sevāniti loto-tōnungá. (Sāme 37:9-11, 29) ʻOfa ke tau hokohoko atu ke fai hotau lelei tahá ke “fou ʻi he ʻofa.” ʻI he fai peheé, ʻe malava ai ke tau hokosia ʻa e fiefia lahi ange ʻoku haʻu mei he foaki atú. Mahulu hake aí, ʻe lava ke tau moʻui atu ai pē​—ʻio, ʻo ʻofa ai pē​—ki he kotoa ʻo ʻitānití, ʻi he faʻifaʻitaki ki hotau ʻOtua ʻofa ko Sihová.

²³ ʻI he vahe ko ʻeni ʻoku fakaʻosiʻaki ʻa e konga ki he ʻofá, kuo tau lāulea ai ki he founga ʻe malava ke tau fakahāhaaʻi ai ʻa e feʻofaʻakí. Ka ʻi he vakai atu ki he ngaahi founga lahi ʻa ia ʻoku tau maʻu ʻaonga ai mei he ʻofa ʻa Sihová​—pea pehē foki ki hono mālohí, fakamaau totonú, mo e potó​—ʻoku lelei ke tau ʻeke, ‘ʻE lava fēfē ke u fakahāhā kia Sihova ʻoku ou ʻofa moʻoni ʻiate ia?’ Ko e fehuʻi ko iá ʻe lāulea ki ai ʻi heʻetau vahe fakaʻosí.