Tauhi kia Sihova, ʻa e ʻOtua ʻo e Tauʻatāiná

1, 2. (a) Ko e hā naʻe mahuʻinga ai ʻa e kaveinga ʻo e pōpulá mo e tauʻatāiná ʻi he taimi ʻo e ʻapositolo ko Paulá? (e) Ko hai naʻe pehē ʻe Paula ko e Matavai ia ʻo e tauʻatāina moʻoní?

NAʻE nofo ʻa e muʻaki kau Kalisitiané ʻi he ʻEmipaea Lomá, ʻa ia naʻe mātuʻaki pōlepole ai ʻa e kakaí fekauʻaki mo e ngaahi lao, fokotuʻutuʻu fakaefakamaau, mo e tauʻatāina naʻa nau maʻú. Neongo ia, ko e ʻemipaea mālohi ko iá naʻe fakafalala ki he kau pōpulá ke nau fai ʻa e lahi taha ʻo e ngaahi ngāue faingataʻá. ʻI he taimi ʻe taha, ko e toko 1 nai ʻi he kakai ʻe toko 3 kotoa pē ʻi he ʻEmipaea Lomá naʻe hoko ko ha pōpula. Ko e moʻoni, ko e pōpulá mo e tauʻatāiná naʻe hoko ko e kaveinga mahuʻinga ki he kakai lāuvalé, ʻo kau ai ʻa e kau Kalisitiané.

² Naʻe faʻa tohi ʻa e ʻapositolo ko Paulá ʻo fekauʻaki mo e tauʻatāiná. Ka naʻe ʻikai te ne feinga ke fakaleleiʻi ʻa e ngaahi palopalema ʻa e māmani ko ení, ʻa ē naʻe loto ʻa e kakai tokolahi ʻi he taimi ko iá ke nau faí. ʻI hono kehé, naʻe ngāue mālohi ʻa Paula mo hono kaungā-Kalisitiané ke akoʻi ki he kakaí ʻa e ongoongo lelei ʻo e Puleʻanga ʻo e ʻOtuá pea tokoniʻi kinautolu ke nau mahinoʻi ʻa e mahuʻinga ʻo e feilaulau huhuʻi ʻa Kalaisi Sīsuú. Naʻe tala ʻe Paula ki hono kaungā-Kalisitiané ʻa e feituʻu ʻe maʻu ai ʻa e Matavai ʻo e tauʻatāina moʻoní. Naʻá ne tohi: “Ko Sihová ko e Laumālie, pea ko e feituʻu pē ʻoku ʻi ai ʻa e laumālie ʻo Sihová, ʻoku ʻi ai ʻa e tauʻatāina.”​—2 Kol. 3:17.

3, 4. (a) Ko e hā naʻe lāulea ki ai ʻa Paula ʻi he ngaahi veesi ki muʻa ʻi he 2 Kolinitō 3:17? (e) Ko e hā kuo pau ke tau fai ke maʻu ai ʻa e tauʻatāina ʻoku haʻu meia Sihová?

³ ʻI heʻene tohi hono ua ki he kau Kolinitoó, naʻe lave ai ʻa Paula ki he meʻa naʻe hoko kia Mōsese ʻi heʻene ʻalu hifo mei Moʻunga Sainai hili ʻene ʻi he ʻao ʻo ha ʻāngelo ʻa Sihova. Naʻe ulo ʻa hono matá! ʻI he sio ʻa e kau ʻIsilelí kia Mōsesé, naʻa nau ilifia, ko ia naʻá ne fakapūlouʻi ʻa hono matá. (ʻEki. 34:29, 30, 33; 2 Kol. 3:7, 13) Naʻe fakamatala ʻa Paula: “Ka ʻi he taimi ʻoku tafoki ai ha taha kia Sihová, ʻoku toʻo atu leva ʻa e pūloú.” (2 Kol. 3:16) Ko e hā naʻe ʻuhinga ki ai ʻa Paulá?

⁴ Naʻa tau ako ʻi he kupu ki muʻá ko Sihova, ʻa e Tokotaha-Fakatupu ʻo e meʻa kotoa pē, ko ia Tokotaha pē ʻokú ne maʻu ʻa e tauʻatāina fakaʻaufuli mo taʻefakangatangatá. Ko ia ʻoku ʻuhinga lelei ʻa e ʻi ai ʻa e tauʻatāina ʻi he ʻao ʻo Sihová mo e “feituʻu pē ʻoku ʻi ai ʻa e laumālie ʻo Sihová.” Ka naʻe pehē ʻe Paula kapau ʻoku tau loto ke maʻu ʻa e tauʻatāina ko ení, kuo pau ke tau hanga kia Sihova. ʻOku ʻuhinga ení kuo pau ke tau maʻu ha vahaʻangatae vāofi mo ia. Ko e kau ʻIsileli ʻi he toafá naʻa nau sio pē ki he ngaahi meʻá mei ha vakai fakaetangata, ʻo ʻikai mei he vakai ʻa Sihová. Naʻe hangē ia naʻa nau fakapūlouʻi ʻa honau ʻatamaí mo e lotó. Naʻa nau loto ke fakalato ʻenau ngaahi holi pē ʻanautolú ʻaki hono ngāueʻaki ʻenau tauʻatāina foʻoú.​—Hep. 3:8-10.

 5. (a) Ko e hā ʻa e faʻahinga tauʻatāina ʻoku ʻomai ʻe he laumālie ʻo Sihová? (e) ʻOku anga-fēfē ʻetau ʻiloʻi ʻe kei maʻu pē ʻe ha taha ʻa ia ko ha pōpula pe ʻoku ʻi he pilīsoné ʻa e tauʻatāina ʻoku ʻomai ʻe Sihová? (f) Ko e hā ʻa e ongo fehuʻi ʻoku fiemaʻu ke tau talí?

⁵ Ko e tauʻatāina ʻoku ʻomai ʻe he laumālie ʻo Sihová ʻoku laka ange ia ʻi he tauʻatāina mei he hoko ko ha pōpulá. Ko e laumālie ko iá ʻokú ne ʻomai ʻa e tauʻatāina lahi ange ʻe lava ʻo faifai ange pea ʻomai ʻe he tangatá. ʻE lava ke ne fakatauʻatāinaʻi kitautolu mei he pōpula ki he angahalá mo e maté pea mei he pōpula ki he lotu loí mo ʻene ngaahi tōʻongá. (Loma 6:23; 8:2) He tauʻatāina fakaofo moʻoni ē ko ia! Naʻa mo ha tokotaha ʻa ia ko ha pōpula pe ʻoku ʻi he pilīsoné ʻe lava ke ne maʻu ʻa e tauʻatāina ko ení. (Sēn. 39:20-23) Ko Tuofefine Nancy Yuen mo Tokoua Harold King naʻe tuku pilīsone kinaua taki taha ʻi he ngaahi taʻu lahi koeʻuhi ko ʻena tuí, neongo ia naʻá na kei maʻu pē ʻa e faʻahinga tauʻatāina ko ení. ʻE lava ke ke sio ʻi heʻena talanoa fekauʻaki mo ʻena ngaahi hokosiá ʻi he JW Broadcasting. (Sio ʻi he INTERVIEWS AND EXPERIENCES > ENDURING TRIALS.) Sai tau tali angé ʻa e ongo fehuʻi ko ení. ʻE lava fēfē ke tau fakamoʻoniʻi ʻoku mātuʻaki mahuʻinga kiate kitautolu ʻa ʻetau tauʻatāiná? Pea ʻe lava fēfē ke tau ngāueʻaki fakapotopoto ʻa ʻetau tauʻatāiná?

 6. Naʻe anga-fēfē hono fakahāhā ʻe he kau ʻIsilelí naʻe ʻikai te nau houngaʻia ʻi he tauʻatāina naʻe ʻoange ʻe Sihova kiate kinautolú?

⁶ ʻI heʻetau maʻu ha meʻaʻofa mahuʻingá, ʻoku tau houngaʻia ʻi he tokotaha naʻá ne ʻomai ia kiate kitautolú. Neongo ia, naʻe ʻikai ke houngaʻia ʻa e kau ʻIsilelí ʻi he tauʻatāina naʻe ʻoange ʻe Sihova kiate kinautolú. ʻI ha ngaahi māhina siʻi pē mei hono fakatauʻatāinaʻi kinautolu ʻe Sihova mei ʻIsipité, naʻe kamata ke nau holi ki he meʻakai mo e inu naʻa nau faʻa maʻu ʻi aí. Naʻa nau lāunga fekauʻaki mo e maná, ʻa e meʻakai naʻe tokonaki ʻe Sihova maʻanautolú. Naʻe aʻu ʻo nau loto ke foki ki ʻIsipite! Kiate kinautolu, ‘ko e iká, kiukamipaá, ko e melení, ko e līkí, ko e onioní, pea mo e kālikí’ naʻe mahuʻinga ange ia ʻi he tauʻatāina naʻe ʻoange ʻe Sihova ke nau lotu ange kiate iá. ʻOku ʻikai ha ofo ʻi he houhau lahi ʻa Sihova ʻiate kinautolú. (Nōm. 11:5, 6, 10; 14:3, 4) ʻOku akoʻi mai ʻe he meʻá ni ha lēsoni mahuʻinga kiate kitautolu.

 7. Naʻe anga-fēfē hono ngāueʻaki ʻe Paula ʻa ʻene akonaki tonu ʻi he 2 Kolinitō 6:1, pea ʻe lava fēfē ke tau fai ʻa e meʻa tatau?

⁷ Naʻe fakatokanga mai ʻa Paula ki he kau Kalisitiane kotoa pē ke ʻoua te nau taʻehoungaʻia ʻi he tauʻatāina kuo ʻomai ʻe Sihova fakafou ʻi hono ʻAló, ʻa Sīsū Kalaisi. (Lau ʻa e 2 Kolinitō 6:1.) Naʻe taʻehaohaoa ʻa Paula, ko ha pōpula ia ki he angahalá mo e maté, pea naʻe ʻai ia ʻe he meʻá ni ke ne ongoʻi kovi lahi. Neongo ia, naʻá ne pehē: “Fakafetaʻi ki he ʻOtuá fakafou ʻia Sīsū Kalaisi ko hotau ʻEikí!” Ko e hā naʻá ne leaʻaki ai iá? Naʻe fakamatala ʻa Paula ki hono kaungā-Kalisitiané: “He ko e lao ʻa e laumālie ko ia ʻoku foaki moʻui fakafou ʻia Kalaisi Sīsuú kuó ne fakatauʻatāinaʻi koe mei he lao ʻa e angahalá mo e maté.” (Loma 7:24, 25; 8:2) ʻI he hangē ko Paulá, ʻoku ʻikai ʻaupito totonu ke ngalo ʻiate kitautolu kuo fakatauʻatāinaʻi kitautolu ʻe Sihova mei he pōpula ki he angahalá mo e maté. ʻOku ʻai ʻe he huhuʻí ke tau malava ʻo tauhi ki hotau ʻOtuá ʻaki ha konisēnisi maʻa, pea ʻoku ʻomai ʻe he meʻá ni kiate kitautolu ʻa e fiefia moʻoni.​—Saame 40:8.

8, 9. (a) Ko e hā ʻa e fakatokanga naʻe fai ʻe he ʻapositolo ko Pitá fekauʻaki mo e founga ʻoku totonu ke tau ngāueʻaki ai ʻetau tauʻatāiná? (e) ʻE lava fēfē ke ngāueʻaki ʻe ha taha ʻa ʻene tauʻatāiná ʻi he founga hala?

⁸ ʻOku ʻikai totonu ke ngata pē ʻi heʻetau pehē ʻoku tau houngaʻia ʻia Sihová, ka ʻoku totonu ke tau toe tokanga foki ke ʻoua te tau ngāueʻaki ʻetau tauʻatāiná ʻi he founga hala. Ko e fakatātaá, naʻe fakatokanga mai ʻa e ʻapositolo ko Pitá ke ʻoua naʻa tau ngāueʻaki ʻetau tauʻatāiná ko ha kalofanga ke fai ai ʻa e ngaahi meʻa ʻoku halá. (Lau ʻa e 1 Pita 2:16.) Ko e fakatokanga ko ení ʻoku fakamanatu mai ai ʻa e meʻa naʻe hoko ki he kau ʻIsilelí ʻi he toafá. ʻOku toe fiemaʻu foki kiate kitautolu he ʻahó ni ʻa e fakatokanga ko ení, pea aʻu nai ʻo toe lahi ange ai. Ko Sētane mo ʻene māmaní ʻokú na tuʻuaki mai ʻa e ngaahi meʻa manakoa ke tui, kai, inu, pea maʻu ai ʻa e fiefiá. ʻOku ngāueʻaki ʻe he kau tuʻuaki pōtoʻí ʻa e kakai hoihoifuá ke ʻai ke tau fakakaukau kuo pau ke tau fakatau mai ʻa e ngaahi meʻa ʻoku ʻikai moʻoni ke tau fiemaʻú. ʻOku mātuʻaki lavangofua ke kākaaʻi kitautolu ʻe he māmaní ke tau ngāueʻaki ʻetau tauʻatāiná ʻi he founga hala.

⁹ ʻOku toe kaunga ʻa e akonaki ʻa Pitá ki he ngaahi meʻa mafatukituki ange ʻi he moʻuí, hangē ko e ako, ngāue, pe taumuʻa ʻoku tau filí. Ko e fakatātaá, ko e toʻutupu he ʻaho ní ʻoku nau ongoʻi ʻoku tenge kinautolu ke nau ngāue mālohi ʻaupito koeʻuhi ke lava ʻo tali kinautolu ʻe he ngaahi ʻunivēsiti lelei tahá. ʻOku tala ange ʻe he kakai tokolahi kapau te nau maʻu ha ako māʻolunga ange, te nau maʻu ai ha ngaahi ngāue lelei, maʻu ai ha paʻanga lahi, pea fakaʻapaʻapaʻi kinautolu. Ko e kakai ko iá te nau fakahaaʻi ange nai ha fakamatala ʻoku hā ngali fakamoʻoniʻi ai ko e faʻahinga ʻoku maʻu tohi fakamoʻoni ako mei ha ʻunivēsití te nau maʻu ʻa e paʻanga lahi ange ʻi he faʻahinga ʻoku nau maʻu tohi fakamoʻoni ako mei he akoʻanga māʻolungá. Ko e ako māʻolunga angé ʻe hā ngali hangē ko ha fakakaukau lelei ʻaupito ia ki he toʻutupú ʻi he taimi ʻoku pau ai ke nau fai ha ngaahi fili ʻa ia ʻe lava ke kaunga ki he toenga ʻo ʻenau moʻuí. Ka ko e hā ʻoku totonu ke nau manatuʻi mo ʻenau ngaahi mātuʻá?

10. Ko e hā kuo pau ke tau manatuʻí ʻi heʻetau fai ha ngaahi fili ʻi he ngaahi meʻa fakafoʻituituí?

¹⁰ ʻE ongoʻi nai ʻe he niʻihi koeʻuhi ko e meʻa fakafoʻituitui ʻa e ngaahi meʻa ko ení, ʻoku totonu ke nau tauʻatāina pē ke fili ʻa e meʻa ʻoku nau loto ki aí kehe pē ʻoku ʻikai ke fakahohaʻasi ai honau konisēnisí. ʻOku nau fakakaukau nai ki he lea ʻa Paula: “Ko e hā ke fakamāuʻi ai ʻeku tauʻatāiná ʻaki ʻa e konisēnisi ʻo ha taha kehe?” (1 Kol. 10:29) Neongo ʻoku tau tauʻatāina ke fai ʻetau fili pē ʻatautolu fekauʻaki mo ʻetau akó mo ʻetau ngāué, kuo pau ke tau manatuʻi ko ʻetau tauʻatāiná ʻoku ʻi ai hono fakangatangata pea ko e kotoa ʻo ʻetau ngaahi filí ʻoku ʻi ai hono ngaahi nunuʻa. Ko e ʻuhinga ia naʻe pehē ai ʻe Paula: “ʻOku ʻatā ʻa e ngaahi meʻa kotoa pē, ka ʻoku ʻikai ke ʻaonga ʻa e ngaahi meʻa kotoa pē. ʻOku ngofua ʻa e ngaahi meʻa kotoa pē, ka ʻoku ʻikai ke fakatupu langa hake ʻa e ngaahi meʻa kotoa pē.” (1 Kol. 10:23; fakamatala ʻi lalo) Ko ia neongo ʻoku tau tauʻatāina ke fai ha ngaahi fili ʻi he ngaahi meʻa fakafoʻituituí, ʻoku ʻikai ko e meʻa mahuʻinga tahá ʻa e meʻa ʻoku tau loto ki aí.

11. Ko e hā ʻa e ʻuhinga kuo fakatauʻatāinaʻi ai kitautolu ʻe Sihová?

¹¹ ʻI he fakatokanga mai ʻa Pita ke ʻoua te tau ngāueʻaki ʻetau tauʻatāiná ʻi he founga halá, naʻá ne pehē ai ko e founga totonu ke ngāueʻaki ai iá ko e hoko “ko ha kau tamaioʻeiki ʻa e ʻOtuá.” Ko e ʻuhinga naʻe ngāueʻaki ai ʻe Sihova ʻa Sīsū ke ne fakatauʻatāinaʻi kitautolu mei he pōpula ki he angahalá mo e maté koeʻuhi ke lava ʻo tau ngāueʻaki ʻetau moʻuí kotoa ke tauhi kiate Ia.

12. Ko e hā ʻa e faʻifaʻitakiʻanga naʻe fokotuʻu ʻe Noa mo hono fāmilí kiate kitautolú?

¹² Ko e founga lelei taha ke ngāueʻaki ai ʻetau tauʻatāiná ko e ngāueʻaki hotau taimí mo e iví ʻi he tauhi kakato kia Sihová. Ko hono fai ení ʻe maluʻi ai kitautolu mei hono fakaʻatā ʻa e ngaahi taumuʻa fakamāmaní mo e ngaahi holi fakafoʻituituí ke hoko ko e ngaahi meʻa mahuʻinga taha ia ʻi heʻetau moʻuí. (Kal. 5:16) Fakakaukau ki he meʻa naʻe fai ʻe Noa mo hono fāmilí. Naʻa nau moʻui ʻi ha māmani anga-fakamālohi mo ʻulungaanga taʻetaau. Ka naʻe ʻikai te nau kau ʻi he ngaahi taumuʻa mo e ngāue ʻa e kakai takatakai ʻiate kinautolú. Naʻa nau fili ke hanganaki femoʻuekina ʻi hono fai ʻa e ngāue naʻe ʻoange ʻe Sihova ke nau faí. Naʻa nau faʻu ʻa e ʻaʻaké, tānaki ʻa e meʻakai maʻanautolu mo e fanga manú, pea fakatokanga ki he niʻihi kehé fekauʻaki mo e Lōmakí. “Naʻe fai ʻe Noa ʻo fakatatau ki he meʻa kotoa pē naʻe tuʻutuʻuni ʻe he ʻOtuá kiate iá. Naʻá ne fai ʻa e meʻa tofu pē ko iá.” (Sēn. 6:22) Ko hono olá, naʻe hao ʻa Noa mo hono fāmilí ʻi he ngata ʻa e māmani ko iá.​—Hep. 11:7.

13. Ko e hā ʻoku fekau mai ʻe Sihova ke tau faí?

¹³ Ko e hā ʻoku fekauʻi mai ʻe Sihova ke tau fai ʻi he ʻaho ní? ʻI he hoko ko e kau ākonga ʻa Sīsuú, ʻoku tau ʻiloʻi ʻoku fekauʻi mai ʻe he ʻOtuá ke tau malanga. (Lau ʻa e Luke 4:18, 19.) ʻI he ʻahó ni, kuo fakakuihi ai ʻe Sētane ʻa e tokolahi taha ʻo e kakaí pea ʻoku ʻikai te nau ʻiloʻi ko e kau pōpula kinautolu ki he lotu loí, ngaahi meʻa fakamatelié, mo e fokotuʻutuʻu fakapolitikalé. (2 Kol. 4:4) ʻI he hangē ko Sīsuú, ʻoku tau maʻu ʻa e monū ko hono tokoniʻi ʻa e niʻihi kehé ke nau ʻiloʻi mo lotu kia Sihova, ʻa e ʻOtua ʻo e tauʻatāiná. (Māt. 28:19, 20) ʻOku ʻikai ke faingofua ʻa e malanga ki he niʻihi kehé. ʻI he ngaahi feituʻu ʻe niʻihi, ʻoku ʻikai ke mahuʻingaʻia ai ʻa e kakaí ʻi he ʻilo ki he ʻOtuá, pea ʻoku aʻu ʻo ʻita ʻa e niʻihi ʻi heʻetau malanga kiate kinautolú. Ka koeʻuhi ʻoku fekauʻi mai ʻe Sihova ke tau malanga, ʻoku totonu ke tau ʻeke hifo, ‘ʻE lava ke u ngāueʻaki ʻeku tauʻatāiná ke fai ʻa e meʻa lahi ange ʻi he ngāue ʻa Sihová?’

14, 15. Ko e hā kuo fili ʻe he tokolahi ʻo e kakai ʻa Sihová ke nau faí? (Sio ki he ʻuluaki fakatātā ʻi he kupú ni.)

¹⁴ ʻOku fakalototoʻa ʻa e ʻiloʻi ʻe he tokolahi ʻo e kakai ʻa Sihová ʻoku mātuʻaki ofi ʻa e ngataʻanga ʻo e fokotuʻutuʻu ko ení pea kuo nau fili ke fakafaingofuaʻi ʻenau moʻuí pea nau kamata tāimuʻa. (1 Kol. 9:19, 23) ʻOku tāimuʻa ʻa e niʻihi ʻi honau feituʻú, lolotonga ia ʻoku hiki ʻa e niʻihi ki he ngaahi fakatahaʻanga ʻoku nau fiemaʻu tokoní. ʻI he taʻu ʻe nima fakamuimuí, kuo kamata tāimuʻa ai ʻa e toko 250,000 tupu, pea ʻi he taimi ní ʻoku ʻi ai ʻa e kau tāimuʻa tuʻumaʻu ʻe toko 1,100,000 tupu. He meʻa fakaofo moʻoni ʻa hono ngāueʻaki ʻe he fuʻu tokolahi ʻenau tauʻatāiná ke tauhi kia Sihova ʻi he founga ko ení!​—Saame 110:3.

¹⁵ Ko e hā naʻá ne tokoniʻi kinautolu ke nau ngāueʻaki fakapotopoto ai ʻenau tauʻatāiná? Fakakaukau angé kia John mo Judith, ʻa ia kuó na ngāue ʻi he ngaahi fonua ʻe niʻihi ʻi he taʻu ʻe 30 kuohilí. ʻOkú na fakamatala ʻi he taimi naʻe kamata ai ʻa e Ako Ngāue Tāimuʻá ʻi he 1977, naʻe fakalototoʻaʻi ai ʻa e kau akó ke nau hiki ʻo ngāue ʻi he feituʻu naʻe lahi ange ai ʻa e fiemaʻú. Ke aʻusia ʻa e taumuʻa ko iá, naʻe fiemaʻu kia John mo Judith ke na tauhi ke faingofua ʻena moʻuí. Ko ia naʻe faʻa fetongi ai ʻe John ʻene ngāué. Naʻe faifai pē ʻo na ō ʻo malanga ʻi ha fonua muli. Ko e hā naʻá ne tokoniʻi kinaua ke na ikuʻi ʻa e ngaahi faingataʻa hangē ko hono ako ha lea foʻou mo e feʻunuaki ki ha anga fakafonua mo e ʻea foʻou? Naʻá na lotu kia Sihova pea falala kiate ia te ne tokoniʻi kinaua. ʻOku fēfē ʻena ongoʻi fekauʻaki mo e tauhi kia Sihova ʻi he foungá ni ʻi he ngaahi taʻu kotoa ko ení? ʻOku pehē ʻe John: “Naʻá ku ongoʻi naʻá ku femoʻuekina ʻi he ngāue lelei taha kuo faifai ange peá u ʻiloʻi pe hokosiá. Naʻe hoko ʻo toe moʻoni ange ʻa Sihova kiate au, ʻi hono tuʻunga ko ha tamai ʻofá. ʻOku ou mahinoʻi lelei ange he taimí ni ʻa e ʻuhinga ʻo e Sēmisi 4:8: ‘ʻUnuʻunu ofi ki he ʻOtuá, pea te ne ʻunuʻunu ofi mai kiate kimoutolu.’ Naʻá ku ʻiloʻi kuó u maʻu ʻa e meʻa naʻá ku kumi ki aí, ko ha taumuʻa fakafiemālie ʻi he moʻuí.”

16. Kuo anga-fēfē hono ngāuefakapotopotoʻaki ʻe he laui afe ʻa ʻenau tauʻatāiná?

¹⁶ Ko e niʻihi, hangē ko John mo Judith, ʻoku lava ke nau tāimuʻa ʻi ha taimi lōloa. Koeʻuhi ko e ngaahi tuʻungá, ʻe lava ke tāimuʻa ʻa e niʻihi ʻi ha vahaʻa taimi siʻi pē. Neongo ia, ʻoku pole ʻa e tokolahi ke nau ngāue ʻi he ngaahi langa takatakai ʻi he māmaní. Ko e fakatātaá, ko e fanga tokoua mo e fanga tuofāfine nai ʻe toko 27,000 naʻa nau ʻalu ʻo tokoni ʻi he langa ʻo e ʻuluʻi ʻapitanga ʻi he māmaní ʻi Warwick, Niu ʻIoke. Naʻe ʻalu ʻa e niʻihi ʻi he uike ʻe ua, ko e niʻihi ʻi ha ngaahi māhina, pea ko e niʻihi ʻi he taʻu ʻe taha pe lōloa ange ai. Ko e tokolahi ʻo e fanga tokoua mo e fanga tuofāfine ko iá naʻa nau fai ʻa e ngaahi feilaulau koeʻuhi ke nau ngāue ʻi Warwick. Ko e ngaahi faʻifaʻitakiʻanga fisifisimuʻa kinautolu ʻo e kakai kuo nau ngāueʻaki ʻenau tauʻatāiná ke fakahīkihikiʻi mo fakalāngilangiʻi ʻa Sihova, ko e ʻOtua ʻo e tauʻatāiná!

17. Ko e hā ʻe lava ke tau fakatuʻamelie atu ki ai kapau ʻoku tau ngāuefakapotopotoʻaki he taimí ni ʻetau tauʻatāiná?

¹⁷ ʻOku tau houngaʻia ʻi heʻetau ʻiloʻi ʻa Sihová mo ʻetau maʻu ʻa e tauʻatāina ʻoku tupu mei he lotu kiate iá. Tau fakamoʻoniʻi ʻaki ʻa e ngaahi fili ʻoku tau faí ko e tauʻatāina ko ení ʻoku mātuʻaki mahuʻinga kiate kitautolu. ʻI he ʻikai ke ngāueʻaki ia ʻi ha founga halá, tau ngāueʻaki ia ke tauhi ʻa Sihova ʻi he kakato taha ʻo ʻetau malavá. ʻE lava leva ke tau fiefia ai ʻi he ngaahi tāpuaki kuo talaʻofa mai ʻe Sihova fekauʻaki mo e taimi ʻa ia ʻe hoko moʻoni ai ʻa e kikite ni: “Ko e ngaahi meʻa fakatupú ʻe fakatauʻatāinaʻi foki mei he pōpula ki he ʻauhá pea nau maʻu ʻa e tauʻatāina lāngilangiʻia ʻa e fānau ʻa e ʻOtuá.”​—Loma 8:21.