‘Ko Hono Fokotuʻu Hoʻo Fakakaukaú ʻi he Laumālié ʻOku Iku Ia ki he Moʻui mo e Melino’

1, 2. Ko e hā ʻoku mahuʻingaʻia ai ʻa e kau Kalisitiane paní ʻi he Loma vahe 8?

KUÓ KE lau nai ʻa e Loma 8:15-17 ʻi he taimi ʻoku Fakamanatu ai ʻa e pekia ʻa Sīsuú. ʻOku fakamatalaʻi ʻi he ngaahi veesi ko iá ʻa e anga hono ʻiloʻi ʻe he kau Kalisitiane paní ʻenau maʻu ʻa e ʻamanaki ʻo e moʻui taʻengata ʻi hēvaní. ʻOku fakamatala ʻa e Loma 8:1 ʻo fekauʻaki mo e kau paní ko e “faʻahinga ʻoku fāʻūtaha mo Kalaisi Sīsuú.” Ka ʻoku ʻuhinga pē ʻa e Loma vahe 8 ki he kau paní? Pe ʻoku lava ke toe tokoniʻi mo e faʻahinga ʻoku nau maʻu ʻa e ʻamanaki ke moʻui taʻengata ʻi he māmaní?

² Naʻe hiki ʻa e Loma vahe 8 ʻo fakatefito ki he kau paní. ʻOku nau maʻu ʻa e “laumālié” ʻa ia ko e faʻahinga ʻoku nau ‘tatali atu ki he ohi ko e ngaahi foha, ʻa e fakaʻatā ko ia mei honau ngaahi sino fakakakanó.’ (Loma 8:23) ʻI he kahaʻú, te nau hoko ko e ngaahi foha ʻo e ʻOtuá ʻi hēvani. Kuo fakamolemoleʻi ʻe Sihova ʻenau ngaahi angahalá ʻo makatuʻunga ʻi he huhuʻí. Kuó ne talaki ʻoku nau māʻoniʻoni kae lava ke nau hoko ko hono ngaahi foha.​—Loma 3:23-26; 4:25; 8:30.

 3. Ko e hā ʻoku totonu ai ke ako mo e faʻahinga ʻoku nau maʻu ʻa e ʻamanaki ke moʻui taʻengata ʻi he māmaní ʻa e Loma vahe 8?

³ Kae kehe, ʻi he ngaahi vahe ki muʻa ʻo e tohi Lomá, naʻe tohi ai ʻa Paula ʻo fekauʻaki mo ha tangata naʻe ʻikai ke pani ka naʻe vakai ki ai ʻa Sihova ʻokú ne māʻoniʻoni. Ko ʻĒpalahame. Naʻe moʻui ʻa e tangata faitōnunga ko ení ʻi ha taimi fuoloa ia ki muʻa ke ʻomai ʻe Sīsū ʻene moʻuí ko ha huhuʻí. (Lau ʻa e Loma 4:20-22.) ʻI he ʻahó ni, ʻoku toe lava ke vakai ʻa Sihova ʻoku māʻoniʻoni ʻa e kau Kalisitiane faitōnunga ʻoku nau maʻu ʻa e ʻamanaki ʻo e moʻui taʻengata ʻi he māmaní. ʻOku lava foki ke nau maʻu ʻaonga mei he akonaki ʻi he Loma vahe 8.

 4. ʻI he taimi ʻoku tau lau ai ʻa e Loma 8:21, ko e hā ʻoku totonu ke tau ʻeke hifo kiate kitautolú?

⁴ ʻI he Loma 8:21, ʻoku fakapapauʻi mai ai ʻe Sihova ʻe ʻi ai moʻoni ʻa e māmani foʻou pea ʻe fakatauʻatāinaʻi ai ʻa e faʻahinga ʻo e tangatá mei he angahalá mo e maté. ʻOku pehē ʻi he veesi ko ení ʻe “tauʻatāina lāngilangiʻia ʻa e fānau ʻa e ʻOtuá.” ʻOkú ke fakakaukau te ke ʻi he māmani foʻoú? Tau lāulea angé ki he meʻa ʻoku fiemaʻu ke tau faí kae lava ke tau moʻui ai.

 5. Ko e hā ʻa e tuʻunga naʻe fakamatala ki ai ʻa Paula ʻi he Loma 8:4-13?

⁵ Lau ʻa e Loma 8:4-13. ʻI he vahe hono valu ʻo e tohi Lomá, naʻe fakamatalaʻi ai ʻe Paula ʻa e faʻahinga kehekehe ʻe ua ʻo e kakaí, ko e faʻahinga ʻoku nau moʻui ʻo “fehoanaki mo e kakanó” mo e faʻahinga ʻoku nau moʻui ʻo “fehoanaki mo e laumālié.” ʻOku fakakaukau ʻa e niʻihi ko e ʻuhinga eni ʻa Paula ki he faʻahinga naʻe ʻikai ko e kau Kalisitiané mo e faʻahinga ko e kau Kalisitiané. Ka naʻe tohi heni ʻa Paula ki he kau Kalisitiané, ko e faʻahinga naʻe “ui ke hoko ko e kakai tapú.” (Loma 1:7) Ko ia ko e faʻahinga naʻe moʻui ʻo “fehoanaki mo e kakanó” pea pehē ki he faʻahinga naʻe moʻui ʻo “fehoanaki mo e laumālié” ko e kau Kalisitiane kinautolu. Ko e hā hona kehekehé?

6, 7. (a) Ko e hā ʻa e ʻuhinga ʻe niʻihi ʻo e foʻi lea “kakano” ʻi he Tohi Tapú? (e) ʻOku anga-fēfē hono ngāueʻaki ʻa e foʻi lea “kakano” ʻi he Loma 8:4-13?

⁶ ʻI he taimi ʻoku ngāueʻaki ai ʻe he Tohi Tapú ʻa e foʻi lea ko e “kakano” ʻoku lava ke kehekehe hono ngaahi ʻuhingá. ʻI he taimi ʻe niʻihi ʻoku ʻuhinga ia ki he kakano hotau sinó. (Loma 2:28; 1 Kol. 15:39, 50) ʻOku lava ke toe ʻuhinga ki he vahaʻangatae fakafāmilí. Ko e fakatātaá, ʻoku pehē ʻe he Tohi Tapú ko Sīsuú naʻá ne “mei he hako ʻo Tēvitá ʻo fakatatau ki he tukufakaholo fakaekakanó,” pea naʻe ui ʻe Paula ʻa e kau Siú ko hono “ngaahi kāinga fakatatau ki he tukufakaholo fakaekakanó.”​—Loma 1:3; 9:3.

⁷ Ko ia, ko e hā naʻe ʻuhinga ki ai ʻa Paulá ʻi heʻene lea ʻo fekauʻaki mo e faʻahinga ʻoku nau moʻui ʻo “fehoanaki mo e kakanó” ʻi he Loma 8:4-13? Ke maʻu ʻa e talí, ʻe lava ke tau sio ki he Loma 7:5. Naʻe tohi ai ʻe Paula: “ʻI he taimi naʻa tau moʻui ai ʻo fakatatau ki he kakanó ko e ngaahi holi vevele angahalaʻia ʻa ia naʻe fakaeʻa ʻe he Laó naʻe ngāue ia ʻi hotau ngaahi kupú.” Naʻe fakamatalaʻi heni ʻe Paula ʻa e kakai ʻoku moʻui ʻo “fehoanaki mo e kakanó” ko e faʻahinga ia ʻoku nau tokangataha mo muimui ʻi heʻenau ngaahi holi angahalaʻiá, ʻo nau fai pē ʻa e meʻa ʻoku nau loto ki aí.

 8. Ko e hā naʻe fiemaʻu ai ʻe Paula ke ne fakatokanga ki he kau Kalisitiane paní ʻo fekauʻaki mo e moʻui ʻo “fehoanaki mo e kakanó”?

⁸ Ko e hā naʻe fakatokanga ai ʻa Paula ki he kau Kalisitiane paní ʻo fekauʻaki mo e moʻui ʻo “fehoanaki mo e kakanó”? Pea ko e hā ʻoku fiemaʻu ai ki he kau Kalisitiane kotoa ʻi he ʻaho ní ʻa e fakatokanga ko ení? Koeʻuhí ʻe lava ke kamata ʻe ha sevāniti faitōnunga ʻa e ʻOtuá ʻo ʻai ʻa ʻene ngaahi holí ko e meʻa muʻomuʻa taha ia ʻi heʻene moʻuí. Ko e fakatātaá, naʻe tohi ʻa Paula ko e niʻihi ʻo e fanga tokoua ʻi Lomá naʻa nau hoko ko e kau pōpula “ki heʻenau ngaahi hoholi.” Naʻe lava ke ne ʻuhinga eni ki he fehokotaki fakasinó, meʻakaí pe ngaahi fakafiefia kehe ʻa ia naʻe hoko ia ko e meʻa mahuʻinga taha ʻi heʻenau moʻuí. (Loma 16:17, 18; Fil. 3:18, 19; Sute 4, 8, 12) Pea ʻi he taimi ʻe taha, naʻe ʻi ai ha meʻa naʻe hoko ʻi he fakatahaʻanga ʻi Kolinitoó ʻa ia ko ha tokoua naʻe fehokotaki fakasino taʻetaau mo e “uaifi ʻo ʻene tamaí.” (1 Kol. 5:1) ʻOku hā mahino, naʻe fiemaʻu ki he muʻaki kau Kalisitiané ʻa e fakatokanga ʻa Paula ʻo fekauʻaki mo e moʻui ʻo “fehoanaki mo e kakanó.”​—Loma 8:5, 6.

 9. Ko e hā naʻe ʻikai ke lave ki ai ʻa e Loma 8:6?

⁹ Ko e fakatokanga ko ení ʻoku toe ngāueʻaki ia ʻi he ʻahó ni. Naʻa mo ha tokotaha kuó ne tauhi kia Sihova ʻi he ngaahi taʻu lahi, ʻe lava ke ne kamata ke moʻui ʻo “fehoanaki mo e kakanó.” Ko ia, naʻe ʻuhinga nai ʻa Paulá ʻoku totonu ke ʻoua te tau fakakaukau ki he ngaahi meʻa hangē ko e meʻakaí, ngāué, fakafiefiá pe faisoó? ʻIkai ʻaupito. Ko e ngaahi meʻa anga-maheni ia ʻi he moʻuí. Naʻa mo Sīsū naʻá ne fiefia ʻi he meʻakaí pea naʻá ne fafanga ʻa e niʻihi kehé. Naʻá ne toe ʻiloʻi ʻa e fiemaʻu ke ne mālōlō. Pea naʻe tohi ʻe Paula ʻo pehē ʻi he nofo malí, ko e fehokotaki fakasinó ʻoku mahuʻinga.

10. Ko e hā ʻa e ʻuhinga ʻo e kupuʻi lea “fokotuʻu ʻa e fakakaukaú”?

¹⁰ Ko e hā naʻe ʻuhinga ki ai ʻa Paula ʻi he kupuʻi lea “fokotuʻu ʻa e fakakaukaú”? Ko e foʻi lea faka-Kalisi naʻe ngāueʻaki ʻe Paulá ʻoku ʻuhinga iá, ko e tokangataha kotoa ʻa e fakakaukau mo e palani ʻa ha taha ki ha meʻa. Naʻe fakamatalaʻi ʻe ha mataotao ʻe taha ʻo pehē, ko e kupuʻi lea ko ení ʻoku lave ia ki he faʻahinga ʻoku nau “talanoa maʻu pē ki he meʻa ʻoku nau mahuʻingaʻia taha aí,” pea ʻoku nau tokangataha pē ki heʻenau ngaahi holi siokitá. ʻOku nau fakaʻatā ʻa e ngaahi holi ko iá ke ne puleʻi ʻenau founga moʻuí.

11. Ko e hā ʻa e niʻihi ʻo e ngaahi meʻa ʻe lava ke hoko ʻo fuʻu mahuʻinga kiate kitautolú?

¹¹ Naʻe fiemaʻu ki he kau Kalisitiane ʻi Lomá ke nau sivisiviʻi kinautolu mo ʻiloʻi ʻa e meʻa naʻe fokotuʻu ai ʻenau fakakaukaú. Ko e “ngaahi meʻa ʻo e kakanó”? ʻI he ʻahó ni, ʻoku fiemaʻu foki ke tau fakakaukau ki he meʻa ʻoku tau mahuʻingaʻia taha aí. Ko e hā ʻa e meʻa ʻoku tau saiʻia taha ke talanoa ʻo fekauʻaki mo iá? Ko e hā ʻoku tau saiʻia taha hono faí? ʻOku fakatokangaʻi nai ʻe he niʻihi ʻoku nau fakakaukau maʻu pē ʻo fekauʻaki mo hono ʻahiʻahiʻi ʻa e kalasi kehekehe ʻo e uainé, teuteuʻi honau ʻapí, fakatau mai ʻa e vala foʻou, ʻinivesi ʻa e paʻangá pe palani ki ha ngaahi folau ʻeveʻeva. ʻOku ʻikai ke hala ʻa e ngaahi meʻa ko ení. ʻOku nau hoko nai ko e ngaahi meʻa anga-maheni pē ʻi heʻetau moʻuí. Ko e fakatātaá, naʻa mo Sīsū naʻá ne tokonaki ʻa e uaine ki ha mali, pea naʻe faleʻi ʻe Paula ʻa Tīmote ke ne inu ha “meʻi uaine” koeʻuhí ko ʻene mahamahakí. (1 Tīm. 5:23; Sione 2:3-11) Ka naʻe ʻikai ko e uainé ʻa e meʻa mahuʻinga taha ʻi heʻenau moʻuí. Fēfē kitautolu? Ko e hā ʻoku muʻomuʻa taha ʻi heʻetau moʻuí?

12, 13. Ko e hā ʻoku totonu ai ke tau tokanga fekauʻaki mo e meʻa ʻoku tau tokangataha ki aí?

¹² Naʻe fakatokanga mai ʻa Paula: “Ko hono fokotuʻu ʻa e fakakaukaú ʻi he kakanó ʻoku iku ia ki he mate.” (Loma 8:6) Ko e hā naʻá ne ʻuhinga ki aí? Kapau ʻoku tau moʻui ʻo “fehoanaki mo e kakanó,” ʻe lava ke mole ai hotau vahaʻangatae mo Sihová ʻi he taimí ni pea mole mo ʻetau moʻui ʻi he kahaʻú. Ka ʻoku ʻikai totonu ke hoko eni. ʻE lava ke liliu ha taha. Manatuʻi ʻa e tangata naʻe ʻulungaanga taʻetaau ʻi Kolinitoó ʻa ia naʻe pau ke tuʻusí? Naʻá ne liliu pea siʻaki ʻene ngaahi holi taʻetāú. Naʻá ne toe tauhi kia Sihova ʻi ha ʻalunga maʻa.​—2 Kol. 2:6-8.

¹³ Ko e tangata ko iá ko e faʻifaʻitakiʻanga tuʻu-ki-muʻa ia ʻo e moʻui ʻo “fehoanaki mo e kakanó,” neongo ia naʻe malava ke ne liliu. Ko ia kapau kuo kamata ha Kalisitiane ʻi he ʻahó ni ke muimui ʻi heʻene ngaahi holi angahalaʻiá kae ʻikai ko e ngaahi tuʻunga ʻa Sihová, ʻe lava mo ia ke ne liliu. ʻI heʻetau manatuʻi ʻa e fakatokanga ʻa Paulá ʻoku lava ke ueʻi ai kitautolu ke tau fai ha ngaahi liliu pē ʻoku fiemaʻu ke tau faí.

14, 15. (a) Ko e hā naʻe tala mai ʻe Paula ke fokotuʻu ai ʻetau fakakaukaú? (e) Ko e hā ʻoku ʻikai ke ʻuhinga ki ai ʻa e “fokotuʻu ʻa e fakakaukaú ʻi he laumālié”?

¹⁴ Hili ʻa e lea ʻa Paula ʻo fekauʻaki mo e fakatuʻutāmaki ʻo e “fokotuʻu ʻa e fakakaukaú ʻi he kakanó,” naʻá ne toe pehē: “Ko hono fokotuʻu ʻa e fakakaukaú ʻi he laumālié ʻoku iku ia ki he moʻui mo e melino.” Ko ha pale fakaofo ia ʻe lava ke tau maʻu!

¹⁵ Ka “ko hono fokotuʻu ʻa e fakakaukaú ʻi he laumālié” ʻoku ʻikai ke ʻuhinga iá heʻikai ke fehangahangai ʻa e tokotaha ko iá mo e ngaahi meʻa ʻoku hoko tonu ʻi he moʻuí. ʻOku ʻikai ke ʻuhinga iá ko ha taha ʻokú ne fakakaukau mo talanoa ʻataʻatā pē ʻo fekauʻaki mo Sihova pe ko e Tohi Tapú. Ko e fakatātaá, ko e kau sevāniti ʻa e ʻOtuá ʻi he ʻuluaki senitulí naʻa nau maʻu ha moʻui anga-maheni. Naʻa nau kai mo inu, mali, ʻohake ha fāmili pea maʻu ha ngāue.​—Mk. 6:3; 1 Tes. 2:9.

16. Ko e hā ʻa e meʻa naʻe mahuʻinga taha ʻi he moʻui ʻa Paulá?

¹⁶ Ka naʻe ʻikai ke fakaʻatā ʻe Paula mo e muʻaki kau Kalisitiane kehé ʻa e ngaahi ngāue anga-maheni ko ení ke hoko ia ko e ngaahi meʻa mahuʻinga taha ʻi heʻenau moʻuí. Ko e fakatātaá, ʻoku tau ʻiloʻi ko e maʻuʻanga moʻui ʻa Paulá ko e ngaohi-tēniti. Ka naʻe ʻikai ke hoko ʻene ngāué ko e meʻa mahuʻinga taha ia ʻi heʻene moʻuí. Ko e meʻa mahuʻinga taha ʻi he moʻui ʻa Paulá ko ʻene tauhi ki he ʻOtuá. Naʻe tokangataha ʻa Paula ki he ngāue fakamalangá mo e faiakó. (Lau ʻa e Ngāue 18:2-4; 20:20, 21, 34, 35.) Naʻe fiemaʻu ki he fanga tokoua mo e fanga tuofāfine ʻi Lomá ke nau faʻifaʻitaki kia Paula, pea ʻoku totonu ke pehē foki mo kitautolu.​—Loma 15:15, 16.

17. Ko e hā ʻa e ngaahi ʻaonga ʻi hono fokotuʻu ʻetau “fakakaukaú ʻi he laumālié”?

¹⁷ ʻE fēfē ʻetau moʻuí kapau te tau tokangataha ʻi he tauhi kia Sihová? ʻOku pehē ʻi he Loma 8:6: “Ko hono fokotuʻu ʻa e fakakaukaú ʻi he laumālié ʻoku iku ia ki he moʻui mo e melino.” Ko hono fai ení ʻoku kau ki ai ʻa hono fakaʻatā ʻetau fakakaukaú ke tataki ʻe he laumālie ʻo Sihová pea ako ke fakakaukau ʻo hangē ko ʻene fakakaukaú. ʻOku talaʻofa mai ʻe Sihova ʻa e moʻui fiefia mo e nonga ʻi he taimí ni mo e moʻui taʻengata ʻi he kahaʻú.

18. ʻE lava fēfē ke tau maʻu ʻa e melinó ʻi he taimi ʻoku fokotuʻu ai ʻetau “fakakaukaú ʻi he laumālié”?

¹⁸ Ko e hā naʻe ʻuhinga ki ai ʻa Paula ʻi heʻene pehē ʻe lava ke tau maʻu ʻa e melino ʻi hono “fokotuʻu ʻa e fakakaukaú ʻi he laumālié”? ʻOku fiemaʻu ʻe he tokotaha kotoa ʻa e melinó, tautefito ʻa e nonga ʻo e fakakaukaú, ka ko e tokosiʻi pē ʻoku nau maʻu iá. ʻOku tau fakamālō kia Sihova ʻi he lava ke maʻu ʻe heʻetau fakakaukaú ʻa e nonga moʻoní. ʻOku lava ke tau toe melino mo e faʻahinga ʻi hotau fāmilí pea pehē ki he faʻahinga ʻi he fakatahaʻangá. Koeʻuhí ko ʻetau taʻehaohaoá, ʻi he taimi ʻe niʻihi te tau fetōʻaki ai mo hotau fanga tokouá mo e fanga tuofāfiné. ʻI he taimi ʻoku hoko ai iá, ʻoku tau muimui ki he faleʻi ʻa Sīsuú: “Fakamelino mo ho tokouá.” (Māt. 5:24) Manatuʻi ʻoku toe tauhi ho tokouá mo ho tuofefiné kia Sihova, “ko e ʻOtua ʻa ia ʻokú ne foaki ʻa e melinó.”​—Loma 15:33; 16:20.

19. Ko e hā ʻa e melino makehe ʻe lava ke tau maʻú?

¹⁹ Kapau te tau fokotuʻu ʻetau “fakakaukaú ʻi he laumālié,” te tau toe hoko ai ʻo melino mo e ʻOtuá. Naʻe tohi ʻe he palōfita ko ʻAiseá: “Te ke [Sihova] tauhi ia i he melino haohaoa, aia oku faaki hono loto kiate koe: Koeuhi oku ne falala kiate koe.”​—ʻAi. 26:3, PM; lau ʻa e Loma 5:1.

20. Ko e hā ʻokú ke houngaʻia ai ʻi he akonaki ʻoku ʻomai ʻi he Loma vahe 8?

²⁰ Tatau ai pē pe ʻoku tau maʻu ʻa e ʻamanaki ke moʻui taʻengata ʻi hēvani pe ʻi he māmaní, ko kitautolu kotoa ʻe lava ke tau maʻu ʻaonga mei he ngaahi lea fakapotopoto ʻi he Loma vahe 8. ʻOku tau houngaʻia ʻi hono fakalototoʻaʻi kitautolu ʻe he Tohi Tapú ke tau tokangataha ki he tauhi kia Sihová kae ʻikai ki heʻetau ngaahi holí. ʻOku tau ʻiloʻi ko hono fokotuʻu ʻetau “fakakaukaú ʻi he laumālié” ʻoku lava ke tau maʻu ai ʻa e pale fakaofo. Naʻe tohi ʻe Paula: “Ko e meʻaʻofa ʻoku foaki ʻe he ʻOtuá ko e moʻui taʻengata ʻia Kalaisi Sīsū ko hotau ʻEikí.”​—Loma 6:23.