Ke Maʻu ʻa e Moʻuí mo e Melinó, ʻAʻeva ʻo Fakatatau ki he Laumālié
“ʻAʻeva, ʻo ʻikai fakatatau ki he kakanó, kae fakatatau ki he laumālié.”—LOMA 8:4.
1, 2. (a) Ko e hā ʻa e tuʻunga mafatukituki kuo hoko ko e ola ia ʻo e fakaleluʻi e tokanga ʻa ha taha lolotonga ʻene fakaʻulí? (e) Ko e hā ʻa e fakatuʻutāmaki ʻe lava ke hoko ko e ola ia ʻo e hoko ʻo fakaleluʻi fakalaumālié?
“KO E fakaleluʻi ʻo e fakaʻulí ko ha palopalema mafolalahia ia pea ʻoku hā ʻoku fakaʻau ke kovi ange ʻi he taʻu kotoa pē.” Ko e fakafuofua ia ʻa e sekelitali ki he fefonongaʻaki ʻa ʻAmeliká. Ko e ngaahi telefoni toʻotoʻó ʻoku kau ia ʻi he ngaahi meʻangāue ʻoku lava ke ne fakaleluʻi e tokotaha fakaʻulí mei he meʻa ʻe taha ʻoku ʻamanekina ke ne faí—ʻa e fakaʻulí. Laka hake he vahe tolu ʻe taha ʻo e kakai kuo fakaʻekeʻeke ʻi ha savea ʻe taha ne nau pehē kuo ʻosi tuiʻi pe meimei tuiʻi kinautolu ʻe ha meʻalele ʻa ha fakaʻuli ʻokú ne lolotonga ngāueʻaki ha telefoni toʻotoʻo. Ko hono fai ha toe meʻa lolotonga ʻa e fakaʻulí ʻe hā ngali ʻaonga nai, ka ko e olá ʻe lava ke fakatuʻutāmaki.
2 Ko e meʻa tatau ʻe lava ke hoko moʻoni fekauʻaki mo ʻetau lelei fakalaumālié. Hangē tofu pē ko e faʻa taʻefakatokangaʻi ʻe ha fakaʻuli kuo fakaleluʻi ha ngaahi fakaʻilonga ʻo e fakatuʻutāmakí, ko ha tokotaha kuo fakaleluʻi fakalaumālie ʻe lavangofua ke ne tō ki he tuʻunga fakatuʻutāmakí. Kapau te tau fakaʻatā kitautolu tonu ke ʻauhia atu mei hotau ʻalunga faka-Kalisitiané mo e ngaahi ngāue fakateokalatí, ko e olá ʻe lava ke tūkia ai ʻetau tuí ʻo hangē ha vaka ʻoku tūkia ʻi he maká. (1 Tīm. 1:18, 19) Naʻe fakatokanga ʻa e ʻapositolo ko Paulá fekauʻaki mo e fakatuʻutāmaki ko ʻení ʻi he taimi naʻá ne fakatokanga ai ki hono ngaahi kaungā-Kalisitiane ʻi Lomá: “Ko hono fokotuʻu ʻa e fakakaukaú ʻi he kakanó ʻoku iku ia ki he mate, ka ko hono fokotuʻu ʻa e fakakaukaú ʻi he laumālié ʻoku iku ia ki he moʻui mo e melino.” (Loma 8:6) Ko e hā naʻe ʻuhinga ki ai ʻa Paula ʻi he meʻa ko iá? ʻE lava fēfē ke tau fakaʻehiʻehi mei he “fokotuʻu ʻa e fakakaukaú ʻi he kakanó” pea tuli ki hono “fokotuʻu ʻa e fakakaukaú ʻi he laumālié”?
“ʻOku ʻIkai ha Meʻa ke Fakahalaiaʻi Ai” Kinautolu
3, 4. (a) Ko e hā ʻa e fāinga fakafoʻituitui naʻe tohi ʻa Paula fekauʻaki mo iá? (e) Ko e hā ʻoku totonu ke tau mahuʻingaʻia ai ʻi he tuʻunga ʻo Paulá?
3 ʻI heʻene tohi ki he kau Lomá, naʻe tohi ai ʻa Paula ʻo fekauʻaki mo ha fāinga naʻá ne hokosia tonu—ko ha faitau ʻi he vahaʻa ʻo hono kakanó mo hono ʻatamaí. (Lau ʻa e Loma 7:21-23.) Naʻe ʻikai ke nōfoʻi ʻa Paula ia ʻi he fakatonuhiaʻi-kitá pe fakaʻofaʻia-kita, ʻo hangē ia naʻá ne fuʻu mafasia ʻi he angahalá ʻo ʻikai ke ne toe lava ʻe ia ʻo fai ha meʻa. He ko ē, ko ha Kalisitiane matuʻotuʻa ia mo pani ʻe he laumālié, kuo fili ke hoko ‘ko ha ʻapositolo ki he ngaahi puleʻangá.’ (Loma 1:1; 11:13) Ko e hā leva, naʻe tohi ai ʻa Paula fekauʻaki mo ʻene fāinga fakafoʻituituí?
4 Naʻe fakamatala faitotonu ʻe Paula naʻe ʻikai malava ʻiate ia pē ke ne fai ʻa e finangalo ʻo e ʻOtuá ke aʻu ki he tuʻunga naʻá ne loto ki aí. Ko e hā hono ʻuhingá? “Kuo faiangahala kotoa pē mo tōnounou ʻo ʻikai maʻu ʻa e lāngilangi ʻo e ʻOtuá,” ko ʻene leá ia. (Loma 3:23) ʻI he tuʻunga ko ha hako ʻo ʻĀtamá, naʻe moʻulaloa ʻa Paula ki he ngaahi nunuʻa ʻo e angahala ʻi he kakano taʻehaohaoá. ʻOku lava ke tau mahinoʻi ia koeʻuhí ko e kotoa ʻo kitautolú ʻoku tau taʻehaohaoa pea ʻoku pau ke tau fehangahangai mo e ngaahi fāinga meimei tatau ʻi he ʻaho kotoa pē. ʻIkai ko ia pē, ʻoku lahi ʻa e ngaahi fakalelu ʻe lava ke ne afeʻi ʻetau tokangá pea ʻave kitautolu mei he ‘hala ʻefiʻefi ʻoku taki atu ki he moʻuí.’ (Māt. 7:14) Kae kehe, ko e tuʻungá naʻe ʻikai siva ai e ʻamanaki ʻa Paulá, pea ʻoku pehē pē mo kitautolu.
5. Naʻe maʻu mei fē ʻe Paula ʻa e tokoní mo e fakafiemālié?
5 Naʻe tohi ʻa Paula: “Ko hai te ne fakahaofi au . . . ? Fakafetaʻi ki he ʻOtuá fakafou ʻia Sīsū Kalaisi ko hotau ʻEikí!” (Loma 7:24, 25) Naʻá ne lea leva ki he faʻahinga “ʻoku fāʻūtaha mo Kalaisi Sīsuú”—ʻa e kau Kalisitiane paní. (Lau ʻa e Loma 8:1, 2.) Fakafou ʻi hono laumālie māʻoniʻoní, ʻoku ohi kinautolu ʻe Sihova ko e ngaahi foha, ʻo ui kinautolu ke nau hoko ko e “ngaahi kaungāʻea fakataha mo Kalaisi.” (Loma 8:14-17) Ko e laumālie ʻo e ʻOtuá, fakataha mo ʻenau tui ki he feilaulau huhuʻi ʻa Kalaisí, ʻokú ne ʻai kinautolu ke nau lava ʻo ikuna ʻi he fāinga naʻe fakamatala ki ai ʻa Paulá pea ʻoku “ʻikai ha meʻa ke fakahalaiaʻi ai kinautolu.” ʻOku fakatauʻatāinaʻi ai kinautolu “mei he lao ʻa e angahalá mo e maté.”
6. Ko e hā ʻoku totonu ke tokanga ai ʻa e kau sevāniti kotoa ʻa e ʻOtuá ki he ngaahi lea ʻa Paulá?
6 Lolotonga ko e lea ʻa Paulá naʻe fai ki he kau Kalisitiane paní, ko e meʻa naʻá ne leaʻaki fekauʻaki mo e laumālie ʻo e ʻOtuá mo e feilaulau huhuʻi ʻa Kalaisí ʻe lava ke maʻu ʻaonga mei ai ʻa e kau sevāniti kotoa ʻa Sihová ʻo tatau ai pē pe ko e hā ʻa e ʻamanaki ʻoku nau maʻú. Neongo naʻe fakamānavaʻi ʻa Paula ke ne ʻoatu ʻa e akonaki ko iá ki he kau Kalisitiane paní, ʻoku mātuʻaki mahuʻinga ke mahinoʻi ʻe he kotoa ʻo e kau sevāniti ʻa e ʻOtuá ʻa e meʻa naʻá ne tohí pea feinga ke maʻu ʻaonga mei ai.
Anga Hono “Fakahalaiaʻi” ʻe he ʻOtuá “ʻa e Angahala ʻi he Kakanó”
7, 8. (a) ʻI he ʻuhinga fē naʻe “vaivai” ai ʻa e Laó “ko e meʻa ʻi he kakanó”? (e) Ko e hā kuo fakahoko lavameʻa ʻe he ʻOtuá fakafou ʻi hono laumālié mo e huhuʻí?
7 ʻI he vahe hono 7 ʻo e tohi Lomá, naʻe fakamatala totonu ai ʻa Paula ki he mālohi ʻo e angahalá ʻi he kakano taʻehaohaoá. ʻI he vahe hono 8, naʻá ne fakamatala ai ki he mālohi ʻo e laumālie māʻoniʻoní. Naʻe fakamatala ʻa e ʻapositoló ki he anga ʻo e lava ke tokoniʻi ʻe he laumālie ʻo e ʻOtuá ʻa e kau Kalisitiané ʻi heʻenau fāinga ke faitau mo e mālohi ʻo e angahalá, koeʻuhí kae lava ke nau moʻui ʻo fehoanaki mo e finangalo ʻo Sihová pea maʻu ʻene hōifuá. Naʻe fakahaaʻi ʻe Paula ʻo pehē fakafou ʻi he laumālie ʻo e ʻOtuá mo e feilaulau huhuʻi ʻa hono ʻAló, kuo fakahoko lavameʻa ai ʻe he ʻOtuá ha meʻa ʻa ia naʻe ʻikai lava ʻe he Lao ʻa Mōsesé.
8 Ko e Laó, fakataha mo hono ngaahi fekau lahí, naʻá ne fakahalaiaʻi ʻa e kau angahalá. ʻIkai ngata aí, ko e kau taulaʻeiki lahi ʻo ʻIsileli naʻa nau ngāue ʻi he malumalu ʻo e Laó naʻa nau taʻehaohaoa pea ʻikai lava ke nau ʻoatu ha feilaulau feʻunga ki he angahalá. Ko ia ai, ko e Laó naʻe “vaivai ia ko e meʻa ʻi he kakanó.” Ka ʻi hono “fekau mai ʻa hono ʻAló tonu ʻi he tatau ʻo e kakano angahalaʻiá” pea foaki atu ia ko ha huhuʻí, naʻe “fakahalaiaʻi” ʻe he ʻOtuá “ʻa e angahala ʻi he kakanó,” ʻo ikuʻi ai ʻa e “meʻa naʻe ʻikai malava ke fai ʻe he Laó.” Ko e olá, ʻoku lau ai ʻa e kau Kalisitiane paní ʻoku nau māʻoniʻoni makatuʻunga ʻi heʻenau tui ki he feilaulau huhuʻi ʻa Sīsuú. ʻOku fakaʻaiʻai kinautolu ke nau “ʻaʻeva, ʻo ʻikai fakatatau ki he kakanó, kae fakatatau ki he laumālié.” (Lau ʻa e Loma 8:3, 4.) Ko e moʻoni, kuo pau ke nau fai pehē ʻi he faitōnunga ʻo aʻu ki he ngataʻanga ʻo honau ʻalunga ʻi he māmaní koeʻuhi ke foaki ange “ʻa e kalauni ʻo e moʻuí.”—Fkh. 2:10.
9. Ko e hā ʻa e ʻuhinga ʻo e foʻi lea “lao” hangē ko ia ʻoku ngāueʻaki ʻi he Loma 8:2?
9 Tānaki atu ki he “Laó,” naʻe lave ʻa Paula ki he ‘lao ʻo e laumālie ko iá’ mo e “lao ʻa e angahalá mo e maté.” (Loma 8:2) Ko e hā ʻa e ngaahi lao ko ʻení? Ko e foʻi lea “lao” ʻi hení ʻoku ʻikai ʻuhinga ia ki ha ngaahi lao pau, ʻo hangē ko ia ʻi he Lao ʻa Mōsesé. ʻOku pehē ʻe ha tohi maʻuʻanga fakamatala ʻe taha: “Ko e foʻi lea faka-Kalisi heni ki he laó ʻoku ʻuhinga ia ko ha tefitoʻi moʻoni ʻi loto ki he meʻa ke fai—tatau ai pē pe ʻoku lelei pe kovi—ʻoku ngāue tuʻumaʻu hangē ha laó. ʻOku toe ʻuhinga ʻa e foʻi leá ki ha tuʻunga ʻo ha moʻui ʻa ha tokotaha.”
10. ʻOku anga-fēfē ʻetau moʻulaloa ki he lao ʻa e angahalá mo e maté?
10 Naʻe tohi ʻe he ʻapositolo ko Paulá: “Hangē tofu pē ko e fou mai ʻi he tangata pē taha ʻa e hū ʻa e angahalá ki he māmaní pea mo e maté fakafou ʻi he angahalá, pea ko ia kuo mafola ai ʻa e maté ki he tangata kotoa pē koeʻuhi kuo nau angahala kotoa pē.” (Loma 5:12) ʻI he tuʻunga ko e ngaahi hako ʻo ʻĀtamá, ko kitautolu kotoa ʻoku tau moʻulaloa ki he lao ʻa e angahalá mo e maté. ʻOku ueʻi maʻu pē kitautolu ʻe hotau kakano angahalaʻiá ke tau fai ʻa e ngaahi meʻa ʻoku taʻefakahōifua ki he ʻOtuá, fakataha mo e ʻamanaki atu pē ki he mate. ʻI heʻene tohi ki he kau Kalētiá, naʻe ui ai ʻe Paula ʻa e ngaahi tōʻongafai mo e ngaahi ʻulungaanga ko iá “ko e ngaahi ngāue ʻa e kakanó.” Naʻá ne tānaki mai leva: “Ko e faʻahinga ʻoku nau tōʻongaʻaki ʻa e ngaahi meʻa peheé ʻe ʻikai te nau maʻu tofiʻa ʻi he Puleʻanga ʻo e ʻOtuá.” (Kal. 5:19-21) Ko e faʻahinga kakai pehení ʻoku nau tatau pē mo e faʻahinga ʻoku nau ʻaʻeva ʻo fakatatau ki he kakanó. (Loma 8:4) Ko ʻenau “tefitoʻi moʻoni ʻi loto ki he meʻa ke faí” mo ʻenau ‘tuʻunga ki he moʻuí’ ʻoku mātuʻaki fakakakano. Ka ko e faʻahinga ʻoku nau fakahoko ʻa e feʻauakí, kau ʻi he tauhi ʻaitolí, tōʻongaʻaki ʻa e ngāue fakafaʻahikehé, pe kau ʻi he ngaahi angahala mamafa kehé ko e faʻahinga pē ia ʻoku nau ʻaʻeva ʻo fakatatau ki he kakanó? ʻIkai, he ko e ngaahi ngāue ʻa e kakanó ʻoku toe kau ki ai mo e meʻa ʻe pehē nai ʻe he niʻihi ko e ngaahi tōnounou fakafoʻituitui pē, ʻo hangē ko e meheká, ʻita tōlilí, fekīhiakí, mo e loto-koví. Ko hai ia ʻe lava ke ne pehē kuó ne mātuʻaki fakatauʻatāinaʻi ia mei he ʻaʻeva ʻo fakatatau ki he kakanó?
11, 12. Ko e hā ʻa e tokonaki kuo fai ʻe Sihova ke tokoniʻi kitautolu ke ikuʻi ʻa e lao ʻa e angahalá mo e maté, pea ko e hā kuo pau ke tau fai ke maʻu ʻa e hōifua ʻa e ʻOtuá?
11 He fiefia ē ko kitautolu he kuo ʻai ʻe Sihova ke tau malava ʻo ikuʻi ʻa e lao ʻa e angahalá mo e maté! Naʻe pehē ʻe Sīsū: “Naʻe ʻofa lahi ʻaupito ʻa e ʻOtuá ki he māmaní ʻo ne foaki ai hono ʻAlo tofu-pē-taha-ne-fakatupú, koeʻuhi ko e tokotaha kotoa pē ʻokú ne ngāueʻi ʻa e tui kiate iá ke ʻoua naʻa ʻauha ka ne maʻu ʻa e moʻui taʻengatá.” ʻI hono tali ʻa e ʻofa ʻa e ʻOtuá pea ngāueʻi ʻa e tui ki he feilaulau huhuʻi ʻa Sīsū Kalaisí, ʻe lava ke fakatauʻatāinaʻi ai kitautolu mei he fakahalaia ʻoku tupu mei heʻetau angahala tukufakaholó. (Sione 3:16-18) Ko ia ai, te tau hehema nai ke tau kalanga, hangē ko ia naʻe fai ʻe Paulá: “Fakafetaʻi ki he ʻOtuá fakafou ʻia Sīsū Kalaisi ko hotau ʻEikí!”
12 Ko hotau tuʻungá ʻoku meimei tatau ia mo e hoko ʻo moʻui mei ha puke lahi. Kapau ʻoku tau fie sai ʻaupito, kuo pau ke tau fai ʻa e meʻa ʻoku tala mai ʻe he toketaá ke tau faí. Neongo ko hono ngāueʻi ʻa e tui ki he huhuʻí ʻe lava ke ne fakatauʻatāinaʻi kitautolu mei he lao ʻa e angahalá mo e maté, ʻoku tau kei taʻehaohaoa pē mo angahalaʻia. ʻOku lahi ʻa e meʻa ʻoku kau ki hono maʻu ha tuʻunga moʻui lelei fakalaumālie pea mo hono maʻu ʻa e hōifua mo e tāpuaki ʻa e ʻOtuá. ʻI he fekauʻaki mo hono fakahoko ʻa e “fiemaʻu māʻoniʻoni ʻa e Laó,” ʻoku toe ʻomi ʻe Paula ʻa e tuʻunga ko ia ʻo e ʻaʻeva ʻo fakatatau ki he laumālié.
ʻAʻeva ʻo Fakatatau ki he Laumālié —Anga-Fēfē?
13. Ko e hā ʻoku ʻuhinga ki ai ʻa e pehē ke ʻaʻeva ʻo fakatatau ki he laumālié?
13 ʻI he taimi ʻoku tau ʻaʻeva aí, ʻoku tau ngaʻunu fakalakalaka atu ki ha feituʻu pe taumuʻa pau. Ko ia ai, ko e ʻaʻeva ʻo fakatatau ki he laumālié ʻoku fiemaʻu ki ai ʻa e laka ki muʻa fakalaumālie tuʻumaʻu—ʻikai ko e haohaoa fakalaumālie. (1 Tīm. 4:15) ʻI he ʻaho ki he ʻaho pea ʻi he lelei taha ʻo ʻetau malavá, kuo pau ke tau feinga ke ʻaʻeva, pe moʻuiʻaki ʻetau moʻuí, ʻo fakatatau ki he tataki ʻa e laumālié. Ko e “ʻaʻeva ʻi he laumālié” ʻoku taki atu ia ki he hōifua ʻa e ʻOtuá.—Kal. 5:16.
14. Ko e hā ʻa e hehema ʻa e faʻahinga ʻoku nau “ʻaʻeva ʻo fehoanaki mo e kakanó”?
14 ʻI heʻene tohi ki he kau Lomá, ʻoku hoko atu ʻa Paula ʻo lea fekauʻaki mo e faʻahinga kakai ʻe ua ʻoku nau maʻu ʻa e tūkunga fakaefakakaukau fepakipaki. (Lau ʻa e Loma 8:5.) ʻI hení ʻoku ʻikai ke ʻuhinga papau ai ʻa e kakanó ia ki he sino fakakakanó. ʻI he Tohi Tapú, ko e foʻi lea “kakano” ʻoku ngāueʻaki ia ʻi he taimi ʻe niʻihi ke fakahaaʻi ʻa e natula angahalaʻia mo taʻehaohaoa hotau kakano kuo hingá. Ko e faʻahinga natula ko ʻení ko e meʻa ia ʻokú ne fakatupunga ʻa e fepakipaki ʻi he vahaʻa ʻo e kakanó pea mo e fakakaukau naʻe lave ki ai ʻa Paula ki muʻá. Kae kehe, ʻi he ʻikai ke hangē ko iá, ko e faʻahinga “ʻoku nau ʻaʻeva ʻo fehoanaki mo e kakanó” ʻoku ʻikai pē ke nau fai ʻe kinautolu ha faitau. ʻI he ʻikai ke fakakaukauʻi ʻa e meʻa ʻoku fiemaʻu mai ʻe he ʻOtuá meiate kinautolú pea tali ʻa e tokoni kuó ne tokonaki maí, ʻoku nau hehema kinautolu ia ke “fokotuʻu ʻenau fakakaukaú ʻi he ngaahi meʻa ʻo e kakanó.” ʻOku nau faʻa hangataha kinautolu ki hono fakalato ʻenau ngaahi fiemālie fakasinó mo e ngaahi holi fakamatelié. ʻI hono kehé, ko e hehema ʻa e faʻahinga ʻoku nau “ʻaʻeva ʻo fehoanaki mo e laumālié” ko e fokotuʻu ʻenau fakakaukaú “ʻi he ngaahi meʻa ʻo e laumālié”—ʻa e ngaahi tokonaki mo e ngāue fakalaumālié.
15, 16. (a) ʻOku uesia fēfē ʻe he meʻa ʻoku fokotuʻu ai ʻete fakakaukaú ʻete tōʻonga fakaefakakaukaú? (e) Ko e hā ʻe lava ke tau leaʻaki fekauʻaki mo e tūkunga fakaefakakaukau ʻa e tokolahi taha ʻo e kakai he ʻaho ní?
15 Lau ʻa e Loma 8:6. Ke fai ha faʻahinga meʻa pē—tatau ai pē pe ʻoku lelei pe kovi—kuo pau ke fokotuʻu ai ʻete fakakaukaú. Ko e kakai ʻoku nau fokotuʻu hokohoko ʻenau fakakaukaú ʻi he ngaahi meʻa ʻo e kakanó ʻoku vave ʻenau fakatupulekina ha tōʻonga fakaefakakaukau pe hehema ʻa ia ʻoku mātuʻaki fakahangataha ʻi he ngaahi meʻa ʻo e kakanó. Ko ʻenau ngaahi vakaí, mahuʻingaʻiá, mo ʻenau saiʻiá ʻoku faʻa hoko ia ʻo femoʻuekina fakaʻaufuli ʻi he ngaahi meʻa ko iá.
16 Ko e hā ʻa e ngaahi meʻa ʻoku femoʻuekina ki ai ʻa e kakai tokolahi taha ʻi he ʻaho ní? Naʻe tohi ʻe he ʻapositolo ko Sioné: “Ko e meʻa kotoa pē ʻi he māmaní—ʻa e holi ʻo e kakanó pea mo e holi ʻo e matá pea mo e fiehāʻaki ʻa e meʻa ʻokú te maʻú—ʻoku ʻikai tupu ia mei he Tamaí, ka ʻoku tupu ia mei he māmaní.” (1 Sio. 2:16) Ko e ngaahi holi ko ʻení ʻoku kau ki ai ʻa e ngaahi meʻa hangē ko e fakaʻaluʻalú, tuʻu-ki-muʻá, mo e koloá. Ko e ngaahi tohí, ngaahi makasiní, ngaahi faivá, mo e ngaahi polokalama he televīsoné, pea mo e ʻInitanetí ʻoku fonungutungutu ʻi he ngaahi meʻa pehení, koeʻuhí pē he ko e meʻa ia ʻoku fokotuʻu ai ʻe he tokolahi taha ʻo e kakaí ʻenau fakakaukaú pea ko e meʻa ia ʻoku nau saiʻia moʻoni aí. Kae kehe, “ko hono fokotuʻu ʻa e fakakaukaú ʻi he kakanó ʻoku iku ia ki he mate”—ko e mate fakalaumālie he taimí ni mo e mate fakasino ʻi he kahaʻu vave maí ni. Ko e hā hono ʻuhingá? “Koeʻuhi ko hono fokotuʻu ʻa e fakakaukaú ʻi he kakanó ʻoku iku ia ki he fili mo e ʻOtuá, he ʻoku ʻikai ke moʻulaloa ia ki he lao ʻa e ʻOtuá, pea ko hono moʻoní, heʻikai pē malava ia ke pehē. Ko ia ko e faʻahinga ʻoku nau ʻaʻeva ʻo fehoanaki mo e kakanó ʻoku ʻikai lava ke nau fakahōifuaʻi ʻa e ʻOtuá.”—Loma 8:7, 8.
17, 18. ʻE lava fēfē ke tau tuli ki hono fokotuʻu ʻa e fakakaukaú ʻi he laumālié, pea ko e hā hono ola ʻo ʻetau fai peheé?
17 ʻI he tafaʻaki ʻe tahá, “ko hono fokotuʻu ʻa e fakakaukaú ʻi he laumālié ʻoku iku ia ki he moʻui mo e melino”—ko e moʻui taʻengata ʻi he kahaʻú pea pehē ki he melino ʻi loto mo e melino mo e ʻOtuá he taimí ni. ʻE lava fēfē ke tau tuli ki “hono fokotuʻu ʻa e fakakaukaú ʻi he laumālié”? ʻAki ʻa e fokotuʻu maʻu pē ʻetau fakakaukaú ʻi he ngaahi meʻa ʻo e laumālié pea fakaʻatā ha hehema mo ha vakai fakalaumālie ke fakatupulekina ʻia kitautolu. ʻI heʻetau fai ení, ʻoku tau maʻu ai ha tūkunga fakakaukau ʻoku “moʻulaloa ia ki he lao ʻa e ʻOtuá” pea ʻoku “fehoanaki mo” ʻene ngaahi fakakaukaú. ʻI he taimi ʻoku tau fehangahangai ai mo ha ʻahiʻahi, heʻikai ke tau veiveiua fekauʻaki mo e ʻalunga ʻoku totonu ke tau tuli ki aí. ʻE ueʻi kitautolu ke fai ʻa e fili totonú—ʻa e fili ʻoku fehoanaki mo e laumālié.
18 Ko ia ai, ʻoku mātuʻaki mahuʻinga ke fokotuʻu ʻetau fakakaukaú ʻi he ngaahi meʻa ʻo e laumālié. ʻOku tau fai eni ʻaki ʻa e ‘ʻai ke tuʻu mateuteu hotau ʻatamaí ki he ngāue,’ ʻo langa takai ʻetau moʻuí ʻi ha founga-tuʻumaʻu fakalaumālie ʻoku kau ai ʻa e lotu tuʻumaʻu, lau mo e ako Tohi Tapu, maʻu fakataha, mo e ngāue fakafaifekau faka-Kalisitiane. (1 Pita 1:13) ʻI he ʻikai fakaʻatā ʻa e ngaahi meʻa ʻo e kakanó ke ne fakaleluʻi kitautolú, tau fokotuʻu ʻetau fakakaukaú ʻi he ngaahi meʻa ʻo e laumālié. Ko ia te tau ʻaʻeva ai pē ʻo fakatatau ki he laumālié. ʻI he fai peheé ʻe ʻomi ai kia kitautolu ʻa e ngaahi tāpuaki, he ko hono fokotuʻu ʻa e fakakaukaú ʻi he laumālié ʻoku iku ia ki he moʻui mo e melino.—Kal. 6:7, 8.
ʻE Lava Ke Ke Fakamatalaʻi?
• Ko e hā ʻa e “meʻa naʻe ʻikai malava ke fai ʻe he Laó,” pea naʻe ikuʻi fēfē ia ʻe he ʻOtuá?
• Ko e hā ʻa e “lao ʻa e angahalá mo e maté,” pea ʻe lava fēfē ke fakatauʻatāinaʻi kitautolu mei ai?
• Ko e hā kuo pau ke tau fai ke fakatupulekina ai ʻa e “fokotuʻu ʻa e fakakaukaú ʻi he laumālié”?
[Fakatātā ʻi he peesi 12]
ʻOkú ke ʻaʻeva ʻo fakatatau ki he kakanó pe fakatatau ki he laumālié?