Moʻui Taʻengata ʻi he Māmaní—Ko ha ʻAmanaki Kuo ʻOmai ʻe he ʻOtuá

“Naʻe fakamoʻulaloa ʻa Natula ki he muna. . . ka naʻe tuku ke ne ʻamanaki pe.”—LOMA 8:20, 21.

1, 2. (a) Ko e hā ʻoku mahuʻinga ai kiate kitautolu ʻa e ʻamanaki ʻo e moʻui taʻengata ʻi he māmaní? (e) Ko e hā ʻoku veiveiua ai ʻa e kakai tokolahi ʻo fekauʻaki mo e moʻui taʻengata ʻi he māmaní?

MAHALO ʻokú ke manatuʻi ʻa e fiefia naʻá ke maʻu ʻi hoʻo fuofua ako ʻo ʻilo ʻi he kahaʻu vave maí ni, heʻikai toe tupu ʻo motuʻa ai ʻa e kakaí pea mate ka te nau moʻui taʻengata ʻi he māmaní. (Sione 17:3; Fkh. 21:3, 4) Kuó ke fiefia nai ʻi hono vahevahe atu ʻa e ʻamanaki Fakatohitapu ko iá ki he niʻihi kehé. He ko hono moʻoní, ko e ʻamanaki ʻo e moʻui taʻengatá ko ha tafaʻaki mātuʻaki mahuʻinga ia ʻo e ongoongo lelei ʻa ia ʻoku tau malangaʻí. ʻOku fakafuo ai ʻetau vakai tonu ki he moʻuí.

² ʻI he tuʻunga lahi tahá, ko e ngaahi lotu ʻo e Puleʻanga-Haʻa-Kalisitiané kuo nau tukunoaʻi ʻa e ʻamanaki ʻo e moʻui taʻengata ʻi he māmaní. Lolotonga iá, ʻoku akoʻi ʻe he Tohi Tapú ia ʻoku ʻikai ha toe konga ʻi he tangatá ʻe toe moʻui atu, ka ko e lahi taha ʻo e ngaahi lotú ʻoku nau akoʻi ʻa e tokāteline taʻefakatohitapu ʻoku ʻi ai ʻa e laumālie taʻefaʻamate ʻo e tangatá ʻoku hao moʻui ʻi he maté pea kei moʻui atu ʻi he nofoʻanga laumālié. (Isi. 18:20) Ko ia ai, ko e kakai tokolahi ʻoku nau veiveiua ʻo kau ki he moʻui taʻengata ʻi he māmaní. Te tau ʻeke nai ai: ʻOku poupouʻi moʻoni ʻe he Tohi Tapú ʻa e ʻamanaki ko iá? Kapau ko ia, naʻe fuofua fakahaaʻi ia ʻanefē ʻe he ʻOtuá ki he tangatá?

‘Fakamoʻulaloa ki he Muna ʻi he ʻAmanaki’

 3. Naʻe anga-fēfē ʻa e hā mahino ʻa e taumuʻa ʻa e ʻOtuá ki he tangatá mei he kamataʻanga ʻo hono hisitōliá?

³ Ko e taumuʻa ʻa Sihova ki he faʻahinga ʻo e tangatá naʻe fakahaaʻi mahino ia ʻi he kamataʻanga tofu pē ko ia ʻo e hisitōlia ʻo e tangatá. Naʻe fakahaaʻi mahino ʻe he ʻOtuá ʻe moʻui taʻengata ʻa ʻĀtama kapau naʻá ne talangofua. (Sen. 2:9, 17; 3:22) ʻOku ʻikai ha veiveiua ko e muʻaki ngaahi hako ʻo ʻĀtamá naʻa nau ʻilo ʻo kau ki he tō ʻa e tangatá mei he tuʻunga haohaoá, ʻa ia naʻe fakapapauʻi ia ʻe he fakamoʻoni hā mai. Ko e hūʻanga ki he ngoue ko ʻĪtení naʻe tapui, pea naʻe tupu ʻo motuʻa pea mate ʻa e kakaí. (Sen. 3:23, 24) ʻI he faai mai ʻa e taimí, naʻe ʻalu ai ke toe fuonounou ange ʻa e moʻui ʻa e tangatá. Naʻe moʻui ʻa ʻĀtama ʻi he taʻu ʻe 930. Ko e tokotaha naʻe hao moʻui mai he Lōmakí ʻa Semi naʻe moʻui ʻi he taʻu pē ʻe 600, pea ko hono foha ko ʻAfakisaté naʻe moʻui ʻi he taʻu ʻe 438. Ko e tamai ʻa ʻĒpalahamé, ʻa Tela, naʻe moʻui ʻi he taʻu ʻe 205. Ko e lōloa e moʻui ʻa ʻĒpalahamé ko e taʻu ʻe 175, taʻu ʻe 180 ʻa hono foha ko ʻAisaké, pea ko e taʻu ʻe 147 ʻa e moʻui ʻa Sēkopé. (Sen. 5:5; 11:10-13, 32; 25:7; 35:28; 47:28) Kuo pau pē naʻe lāuʻilo ʻa e kakai tokolahi ki he meʻa naʻe ʻuhinga ki ai ʻa e hōloa ko ení—ko e ʻamanaki ʻo e moʻui taʻengatá kuo mole! Naʻe ʻi ai ha ʻuhinga ki ha ʻamanaki te nau toe moʻui taʻengata?

 4. Ko e hā ʻa e makatuʻunga naʻe maʻu ʻe he kau tangata faitōnunga ʻo e kuohilí ki heʻenau tui ʻe toe fakafoki mai ʻe he ʻOtuá ʻa e ngaahi tāpuaki naʻe fakamoleki ʻe ʻĀtamá?

⁴ ʻOku pehē ʻe he Folofola ʻa e ʻOtuá: “Naʻe fakamoʻulaloa ʻa Natula [pe fakatupu fakaetangatá] ki he muna . . . ka naʻe tuku ke ne ʻamanaki pe.” (Loma 8:20) Ko e hā ʻa e ʻamanaki ko iá? Ko e fuofua kikite ʻa e Tohi Tapú naʻe tuhu ia ki ha “hako” ʻa ia te ne ‘laiki ʻa e ʻulu ʻo e ngatá.’ (Lau ʻa e Senesi 3:1-5, 15.) Ki he faʻahinga faitōnunga ʻo e tangatá, ko e talaʻofa ʻo e Hako ko iá naʻe ʻomai ai ha makatuʻunga ki he ʻamanaki heʻikai ke liʻaki ʻe he ʻOtuá ʻa ʻene taumuʻa ki he faʻahinga ʻo e tangatá. Naʻe ʻoange ai ki he kau tangata hangē ko ʻĒpeli mo Noá ha ʻuhinga ke tui ai ʻe toe fakafoki mai ʻe he ʻOtuá ʻa e ngaahi tāpuaki naʻe fakamoleki ʻe ʻĀtamá. Ko e kau tangata ko ení kuo nau lāuʻilo ko e ‘laiki ʻa e muivaʻe ʻo e Hakó’ ʻe kau ai ʻa hono lilingi ha toto.—Sen. 4:4; 8:20; Hep. 11:4.

 5. Ko e hā ʻokú ne fakahaaʻi naʻe maʻu ʻe ʻĒpalahame ʻa e tui ki he toetuʻú?

⁵ Fakakaukau kia ʻĒpalahame. ʻI hono ʻahiʻahiʻí, “ne feilaulau ʻaki ai ʻe Epalahame ʻa Aisake . . . hono foha tofu pe taha.” (Hep. 11:17) Ko e hā naʻá ne loto-lelei ai ke fai ení? (Lau ʻa e Hepelu 11:19.) Naʻá ne tui ki he toetuʻú! Naʻe ʻi ai e makatuʻunga ʻa ʻĒpalahame ki heʻene tui ki he toetuʻú. Ko hono moʻoní, naʻe toe fakafoki mai ʻe Sihova ʻa e mālohi fakafanau ʻa ʻĒpalahamé pea naʻe ʻai ai ke ne malava mo hono uaifí, ʻa Sela ʻo fakatupu ha foha ʻi heʻena taʻumotuʻá. (Sen. 18:10-14; 21:1-3; Loma 4:19-21) Naʻe toe maʻu foki ʻe ʻĒpalahame ʻa e folofola ʻa Sihová. Naʻe folofola ʻa e ʻOtuá kiate ia: “ʻE ngata ʻia Aisake ʻa e lau ko ho hako.” (Sen. 21:12) Ko ia ai, naʻe maʻu ʻe ʻĒpalahame ʻa e ngaahi ʻuhinga lelei ke ʻamanekina ʻe fokotuʻu ʻe he ʻOtuá ʻa ʻAisake.

6, 7. (a) Ko e hā ʻa e fuakava naʻe fai ʻe Sihova mo ʻĒpalahamé? (e) Naʻe anga-fēfē hono ʻomai ʻe he talaʻofa ʻa Sihova kia ʻĒpalahamé ʻa e ʻamanaki ki he faʻahinga ʻo e tangatá?

⁶ Koeʻuhi ko e tuʻu-ki-muʻa ʻa e tui ʻa ʻĒpalahamé, naʻe fai ai ʻe Sihova ha fuakava mo ia ʻo felāveʻi mo ʻene fānaú pe “hako.” (Lau ʻa e Senesi 22:18.) Ko e konga tefito ʻo e “hako” naʻe fakamoʻoniʻi ia ko Sīsū Kalaisi. (Kal. 3:16) Naʻe tala foki ʻe Sihova kia ʻĒpalahame ko hono “hako” ʻe mātuʻaki fakatokolahi “ke tatau mo e ngaahi fetuʻu ʻo e langi, pe ko e ʻoneʻone ʻi he matātahi”—ko ha fuʻu tokolahi naʻe ʻikai ke ʻiloʻi ʻe ʻĒpalahame. (Sen. 22:17) Kae kehe, naʻe fakahaaʻi ki mui ai ʻa e tokolahi ko iá. Ko Sīsū Kalaisi mo e toko 144,000, ʻa ia te nau pule mo ia ʻi hono Puleʻangá, ʻoku faʻuʻaki kinautolu ʻa e “hako.” (Kal. 3:29; Fkh. 7:4; 14:1) Ko e Puleʻanga Faka-Mīsaiá ko e founga ia “ʻe monuʻia ai ʻa e ngaahi puleʻanga ʻo mamani.”

⁷ Naʻe ʻikai nai ke mahinoʻi ʻe ʻĒpalahame ʻa e mahuʻinga kakato ʻo e fuakava naʻe fai ʻe Sihova mo iá. Kae kehe, ʻoku pehē ʻe he Tohi Tapú naʻá ne “nofo ʻamanaki ki he kolo ʻoku oʻona ʻa e ngaahi tuʻunga.” (Hep. 11:10) Ko e kolo ko iá ko e Puleʻanga ʻo e ʻOtuá. Ke maʻu ʻa e ngaahi tāpuaki ʻi he malumalu ʻo e Puleʻanga ko iá, ʻe fiemaʻu ke toe moʻui ʻa ʻĒpalahame. Ko e moʻui taʻengata ʻi he māmaní ʻe malava ke hoko kiate ia fakafou ʻi he toetuʻú. Pea ko e moʻui taʻengatá ʻe ala malava ia ki he faʻahinga te nau hao moʻui ʻi ʻĀmaketoné pe faʻahinga ko ia ʻe toe fokotuʻu hake mei he maté.—Fkh. 7:9, 14; 20:12-14.

“Ko e Laumalie ʻi Hoku Fatu ʻOku Kukuta Tuʻu, ʻo Ueʻi Au”

8, 9. Ko e hā ʻoku ʻikai ko ha fakamatala ai pē ʻa e tohi Siopé ki he ʻahiʻahi ʻo ha tangata ʻe toko taha?

⁸ Lolotonga ʻa e vahaʻa taimi mei he moʻui ʻa e mokopuna ua ʻo ʻĒpalahame ko Siosifá ki he moʻui ʻa e palōfita ko Mōsesé, naʻe moʻui ai ha tangata ko Siope hono hingoá. Ko e tohi Siopé, ngalingali naʻe tohi ia ʻe Mōsese, ʻoku fakamatalaʻi ai ʻa e ʻuhinga naʻe fakaʻatā ai ʻe Sihova ʻa Siope ke faingataʻaʻiá pea mo hono ikuʻangá. Kae kehe, ko e tohi Siopé ʻoku ʻikai ko ha fakamatala pē ia ʻo kau ki he ʻahiʻahi ʻo ha tangata ʻe toko taha; ʻoku fakatefito ia ʻi he ngaahi ʻīsiu ʻoku kaunga ki ai ʻa e tokotaha kotoa ʻi he ʻunivēsí. ʻOku ʻomai ʻe he tohí ʻa e fakamaama ki he māʻoniʻoni ʻa Sihová ʻi hono ngāueʻi ʻa ʻene pulé, pea ʻoku fakahaaʻi ai ko e anga-tonu pea mo e ʻamanaki ʻo e moʻuí ki he kau sevāniti fakaemāmani kotoa pē ʻa e ʻOtuá ʻoku kau ia ʻi he ʻīsiu naʻe langaʻi hake ʻi ʻĪtení. Neongo naʻe ʻikai ke mahinoʻi ʻe Siope ʻa e ʻīsiu ko ení, naʻe ʻikai te ne fakaʻatā ʻa hono kaungāmeʻa ʻe toko tolú ke nau ʻai ia ke ne fakakaukau naʻe ʻikai te ne tauhi ʻene anga-tonú. (Siope 27:5) ʻOku totonu ke fakaivimālohiʻi ʻe he meʻá ni ʻetau tuí pea tokoniʻi ai kitautolu ke tau lāuʻilo ʻe lava ke tau tauhi maʻu ʻetau anga-tonú pea pouaki ʻa e tuʻunga-hau ʻo Sihová.

⁹ Hili ʻa e lea ʻa e kau fakangalingali fakafiemālie ʻe toko tolu ʻo Siopé, “Toki tali ʻe Ilaiu foha ʻo Palekela ko e haʻa Pusa.” Ko e hā naʻe ueʻi ai ia ke ne leá? “ʻOku ou pito he lea,” ko ʻene laú ia. “Ko e laumalie ʻi hoku fatu ʻoku kukuta tuʻu, ʻo ueʻi au.” (Siope 32:5, 6, 18) Neongo ko e meʻa naʻe leaʻaki ʻe ʻIlaiū ʻi hono fakamānavaʻí naʻe fakahoko ia ʻi hono fakamoʻui ʻo Siopé, ko ʻene ngaahi leá ʻoku toe mohu ʻuhinga ia ki he niʻihi kehé. ʻOku ʻomai ai ʻa e ʻamanaki ki he kau tauhi anga-tonu kotoa pē.

10. Ko e hā ʻokú ne fakahaaʻi ko e pōpoaki ʻa Sihova ki ha tokotahá ʻoku ʻi ai ʻene kaunga lahi ange he taimi ʻe niʻihi ki he faʻahinga ʻo e tangatá fakalūkufua?

¹⁰ ʻOku ʻomai ʻe Sihova ha pōpoaki ʻi he taimi ʻe niʻihi ki ha tokotaha, ʻa ia ʻoku toe ʻi ai ʻene kaunga lahi ange ki he faʻahinga ʻo e tangatá fakalūkufua. ʻE lava ke ʻiloʻi eni ʻi he kikite ʻa Taniela fekauʻaki mo e misi ʻa e tuʻi Pāpilone ko Nepukanesá ʻo kau ki hono tā hifo ʻo ha fuʻu ʻakau. (Tan. 4:10-27) Lolotonga naʻe ʻi ai hono fakahoko ʻa e misi ko iá ʻi he felāveʻi mo Nepukanesá, naʻe tuhu ia ki he meʻa naʻe lahi mamaʻo ange. Naʻe fakahaaʻi ai ko e pule fakaʻotua ki he māmaní fakafou ʻi ha puleʻanga ʻi he laine ʻo Tuʻi Tēvitá ʻe toe fakahaaʻi ia hili ha vahaʻa taimi ʻo e taʻu ʻe 2,520, ʻo kamata ʻi he 607 K.M.a Ko e pule ʻa e ʻOtuá ki hotau foʻi kolopé naʻe kamata foʻou ia ʻi hono fakanofo ʻo Sīsū Kalaisi ko e Tuʻi fakahēvani ʻi he taʻu 1914. Fakakaukau atu pē ki he vavé ni hono fakahoko ʻe he Puleʻangá ʻa e ʻamanaki ʻa e faʻahinga talangofua ʻo e tangatá!

“Fakamoui Ia mei he Alu Hifo ki he Luo”

11. Ko e hā ʻa e meʻa ʻoku fakahaaʻi ʻe he ngaahi lea ʻa ʻIlaiuú ʻo kau ki he ʻOtuá?

¹¹ ʻI hono fai ha tali kia Siopé, ʻoku fakamatala ʻa ʻIlaiū ʻo kau ki “ha faifekau [pe talafekau], koe fakamatala, koe taha mei he toko taha afe, ke fakaha ki he tagata ene maonioni.” Fēfē kapau ko e talafekau ko ení ʻoku “lotu ia ki he Otua, bea e tokaga ia ki ai”? ʻOku pehē ʻe ʻIlaiū: “Oku toki aloofa ai [ʻa e ʻOtuá] kiate ia, o ne behe, Fakamoui ia mei he alu hifo ki he luo: kuou iloʻi ae huhui. E moui lelei hake hono jino i ha tamajii: e toe foki ia ki he gaahi aho o ene kei jii.” (Siope 33:23-26, PM) Ko e ngaahi lea ko iá naʻe fakahaaʻi ai ʻa e loto-lelei ʻa e ʻOtuá ke tali ha “huhui” pe ʻufiʻufi koeʻuhi ko e faʻahinga fakatomala ʻo e tangatá.—Siope 33:24, PM.

12. Ko e hā ʻa e ʻamanaki ʻoku ʻomai ʻe he ngaahi lea ʻa ʻIlaiuú ki he faʻahinga ʻo e tangatá fakalūkufua?

¹² ʻOku ngalingali naʻe ʻikai mahinoʻi kakato ʻe ʻIlaiū ʻa e huhuʻí, ʻo hangē pē ko e ʻikai mahinoʻi kakato ʻe he kau palōfitá ʻa e meʻa kotoa naʻa nau hikí. (Tan. 12:8; 1 Pita 1:10-12) Ka neongo ia, ko e ngaahi lea ʻa ʻIlaiuú naʻe tapua mai ai ʻa e ʻamanaki ʻe ʻi ai ʻa e ʻaho ʻe tali ai ʻe he ʻOtuá ha huhuʻi pea fakatauʻatāinaʻi ʻa e tangatá mei he nunuʻa ʻo e taʻumotuʻá pea mo e maté. Ko e ngaahi lea ʻa ʻIlaiuú naʻe ʻomai ai ʻa e ʻamanaki fisifisimuʻa ʻo e moʻui taʻengata. Ko e tohi Siopé ʻoku toe fakahaaʻi ai ʻe ʻi ai ha toetuʻu.—Siope 14:14, 15.

13. Ko e hā ʻa e ʻuhinga ʻo e ngaahi lea ʻa ʻIlaiuú ki he kau Kalisitiané?

¹³ ʻI he ʻahó ni, ko e ngaahi lea ʻa ʻIlaiuú ʻoku hokohoko atu ʻa e ʻi ai hono ʻuhinga ki he laui miliona ʻo e kau Kalisitiane ʻoku nau ʻamanaki ke hao moʻui atu ʻi hono fakaʻauha ʻo e fokotuʻutuʻu ʻo e ngaahi meʻa lolotongá. Ko e faʻahinga taʻumotuʻa ʻi he haʻohaʻonga ʻo e kau hao moʻuí te nau foki ki he ngaahi ʻaho ʻo ʻenau kei siʻí. (Fkh. 7:9, 10, 14-17) ʻIkai ko ia pē, ko e ʻamanaki ʻo e sio ki hono fakafoki ki he ngaahi ʻaho ʻo ʻenau talavoú ʻa e faʻahinga ʻe fokotuʻu maí ʻe hokohoko atu ai ʻa e fiefia ʻa e kakai faitōnungá. Ko e moʻoni, ki he moʻui taʻefaʻamate ʻi hēvani ʻa e kau Kalisitiane paní pea mo e moʻui taʻengata ʻi he māmaní ʻa e “fanga sipi kehe” ʻa Sīsuú ʻoku makatuʻunga fakatouʻosi ia ʻi hono ngāueʻi ʻa e tui ki he feilaulau huhuʻi ʻa Kalaisí.—Sione 10:16; Loma 6:23.

Folofua ʻa Mate mei he Māmaní

14. Ko e hā ʻokú ne fakahaaʻi naʻe fiemaʻu ʻa e meʻa lahi ange ʻi he Lao ʻa Mōsesé koeʻuhi ke maʻu ai ʻe he kau ʻIsilelí ʻa e ʻamanaki ʻo e moʻui taʻengatá?

¹⁴ Naʻe hoko ʻa e fānau ʻa ʻĒpalahamé ko ha puleʻanga tauʻatāina ʻi he taimi naʻa nau kau ai ki ha vahaʻangatae fakaefuakava mo e ʻOtuá. ʻI hono foaki kia kinautolu ʻa e Laó, naʻe pehē ʻe Sihova: “Te mou tauhi ʻeku ngaahi tuʻutuʻuni mo ʻeku ngaahi konisitutone, ʻa ia ka fai ʻe ha tangata, te ne moʻui ai.” (Liv. 18:5) Kae kehe, koeʻuhi naʻe ʻikai lava ke nau moʻui ʻo fakatatau ki he ngaahi tuʻunga haohaoa ʻo e Laó, naʻe fakahalaiaʻi ʻa e kau ʻIsilelí ʻe he Laó pea naʻe fiemaʻu ke fakatauʻatāinaʻi kinautolu mei he fakahalaia ko iá.—Kal. 3:13.

15. Ko e hā ʻa e tāpuaki he kahaʻú naʻe fakamānavaʻi ʻa Tēvita ke ne hikí?

¹⁵ Hili ʻa Mōsesé, naʻe fakamānavaʻi ʻe Sihova ʻa e kau hiki Tohi Tapu kehe ke nau lave ki he ʻamanaki ʻo e moʻui taʻengatá. (Sāme 21:4; 37:29) Ko e fakatātaá, naʻe fakaʻosiʻaki ʻe he tokotaha-tohi-saame ko Tēvitá ha saame ʻo kau ki he fāʻūtaha ʻa e kau lotu-moʻoni ʻi Saioné ʻaki ʻa e ngaahi lea: “Ko e potu ia naʻe tuʻutuʻuni ai ʻe Sihova hono tapuekina, ko e moʻui ʻo taʻengata.”—Sāme 133:3.

16. Fakafou ʻia ʻAisea, ko e hā naʻe talaʻofaʻaki ʻe Sihova ʻo kau ki he kahaʻu “ʻo mamani katoa”?

¹⁶ Naʻe fakamānavaʻi ʻe Sihova ʻa ʻAisea ke ne kikite ʻo kau ki he moʻui taʻengata ʻi he māmaní. (Lau ʻa e Aisea 25:7, 8.) ʻI he hangē ha “pulou” fakafulutāmakia—ko ha kafú—kuo fakamafasiaʻi ʻe he angahalá mo e maté ʻa e faʻahinga ʻo e tangatá. ʻOku fakapapauʻi ʻe Sihova ki heʻene kakaí ko e angahalá mo e maté ʻe folofua, pe toʻo atu ia “mei he funga ʻo mamani katoa.”

17. Ko e hā ʻa e ngafa fakaekikite ʻo e Mīsaiá ʻoku fakaʻatā ai ʻa e hala ki he moʻui taʻengatá?

¹⁷ Toe fakakaukau angé ki he fokotuʻutuʻu naʻe tuʻutuʻuni ʻe he Lao ʻa Mōsesé ʻo felāveʻi mo e kosi maʻa ʻAsaselí. Tuʻo taha he taʻu, ʻi he ʻAho Fakaleleí, ko e taulaʻeiki lahí naʻá ne ‘hilifaki hono ongo nimá fakatouʻosi ki he ʻulu ʻo e kosi moʻuí, peá ne vete ʻi hono fungá ʻa e ngaahi kovi kotoa ʻo haʻa Isilelí, peá ne hilifaki kotoa ki he ʻulu ʻo e kosí pea ʻe fua ʻe he kosí ʻa e ngaahi kovi kotoa pe kuo hilifaki kiate iá, ʻo ʻave ki ha fonua mamate.’ (Liv. 16:7-10, 21, 22) Naʻe tomuʻa tala ʻe ʻAisea ʻa e hoko mai ʻa e Mīsaiá, ʻa ia te ne fakahoko ha ngafa meimei tatau ʻo ne toʻo atu ʻa e “mahaki,” “mamahi,” pea mo e “angahala ʻa e tokolahi” ʻo fakaʻatā ai ʻa e hala ki he moʻui taʻengatá.—Lau ʻa e Aisea 53:4-6, 12.

18, 19. Ko e hā ʻa e ʻamanaki ʻoku fakamamafaʻi ʻi he Aisea 26:19 pea mo e Taniela 12:13?

¹⁸ Fakafou ʻia ʻAisea, naʻe tala ʻe Sihova ki hono kakaí ʻa ʻIsileli: “E moui a hoo kakai mate, te nau toetuu fakataha mo hoku jino mate ni. Mou a o hiva, akimoutolu oku nofo i he efu: he oku tatau hoo hahau moe hahau oe mohuku mata, bea e buaki e he kelekele ae mate.” (Ai. 26:19, PM) Ko e Ngaahi Konga Tohi Tapu Faka-Hepeluú ʻoku fakahaaʻi mahino mai ai ʻa e ʻamanaki ʻo ha toetuʻu pea mo e moʻui ʻi he māmaní. Ko e fakatātaá, ʻi he meimei taʻu 100 ʻa Tanielá naʻe fakapapauʻi ange ʻe Sihova kiate ia: “Te ke malolo, pea te ke tuʻu ʻi ho tofiʻa ʻi he fakaʻosi ʻo e ngaahi ʻaho.”—Tan. 12:13.

¹⁹ Koeʻuhi ko e ʻamanaki ʻo e toetuʻú, naʻe lava ai ʻa Māʻata ke ne leaʻaki kia Sīsū ʻo felāveʻi mo hono tuongaʻane kuo maté: “ʻOku ou ʻilo te ne toetuʻu ʻi he Toetuʻu ʻi he ʻaho fakamui.” (Sione 11:24) Naʻe liliu nai ʻe he ngaahi akonaki ʻa Sīsuú pea mo e ngaahi tohi fakamānavaʻi ʻa ʻene kau ākongá ʻa e ʻamanaki ko ení? ʻOku kei hoko nai ʻa e moʻui taʻengata ʻi he māmaní ko e ʻamanaki ia ʻoku tuku mai ʻe Sihova ki he faʻahinga ʻo e tangatá? Te tau lāulea ki he tali ki he ongo fehuʻi ko ení ʻi he kupu hono hokó.

[Fakamatala ʻi lalo]

ʻE Lava Ke Ke Fakamatalaʻi?

• Ko e fakatupu fakaetangatá ‘naʻe fakamoʻulaloa ia ki he muna’ ʻo makatuʻunga ʻi he ʻamanaki fē?

• Ko e hā ʻokú ne fakahaaʻi naʻe tui ʻa ʻĒpalahame ki he toetuʻú?

• Ko e hā ʻa e ʻamanaki ʻoku ʻomai ki he faʻahinga ʻo e tangatá ʻi he ngaahi lea ʻa ʻIlaiū kia Siopé?

• ʻOku anga-fēfē hono fakamamafaʻi ʻe he Ngaahi Konga Tohi Tapu Faka-Hepeluú ʻa e ʻamanaki ʻo ha toetuʻu pea mo e moʻui taʻengata ʻi he māmaní?

[Fakatātā ʻi he peesi 5]

Ko e ngaahi lea ʻa ʻIlaiū kia Siopé ʻoku ʻomai ai ʻa e ʻamanaki ʻe fakatauʻatāinaʻi ʻa e tangatá mei he tuʻunga ʻo e taʻumotuʻá mo e maté

[Fakatātā ʻi he peesi 6]

Naʻe fakapapauʻi kia Taniela te ne ‘tuʻu ʻi hono tofiʻá ʻi he fakaʻosi ʻo e ngaahi ʻahó’